1. Be ibhio mhan ne bunbun rẹ ha dọnmhegbe bhi oga nọnsi Jehova yẹ?

 MHAN wo mhọn iwẹnna ne bunbun bhi obọ nin mhan ha lu bhi oga nọnsi Jehova beji ọkpẹnlẹn ọsi ọne agbọn nan rẹ ha si re. (Matt. 24:14; Luke 10:2; 1 Pet. 5:2) Mhan rebhe dọnmhegbe rẹ lu eka nin mhan ha sabọ lu bhi oga nọnsi Jehova. Ene bunbun bhi ẹwẹ mhan wo ha tẹmhọn Osẹnobulua gbera ọnikhẹ. Eso yẹ mhọnlẹn bhi ọkhọle nin ele rẹ lu iwẹnna ọkanẹfan. Eso guanọ nin ele dọ ha ga bhi Bẹtẹ, la deba ha bọn uwa oga kẹkẹ. Ibhio mhan nin ikpea ne bunbun wo ha wẹnna kaka nin ele da sẹ ene a ha ne ọbhi ihe ọsi ene zẹ sike ewanlẹn, la ewanlẹn. (1 Tim. 3:​1, 8) Ọ wo re iJehova ghọnghọn rẹ daghe ẹbho nesọle dọnmhegbe rẹ ha ga ọle bhi ene uwedẹ nan.​—Ps. 110:3; Isa. 6:8.

2. Be emhin ha dia mhan yẹ bhi egbe, sade mhan bha sabọ lu ebi mhan guanọ nin mhan lu bhi oga nọnsi Jehova?

² Egbe sabọ rẹ lọ mhan sade ikpe ne bunbun gbera, emhin nin mhan khu ọi bhi oga nọnsi Jehova bha sẹ mhan obọ. Egbe sabọ yẹ rẹ lọ mhan, ahamiẹn idia nin mhan ye bha ji ẹsọn eso da sẹ mhan obọ bhi ẹkẹ agbotu. (Prov. 13:12) Ọnan hi ebe sunu ji Melissa. * Ọle wo rẹ ha guanọ nin ọle dọ ga bhi Bẹtẹ, la yo Isiku ọsi Ene Tẹmhọn Agbejele. Sokpan, ọle da yọle: “Mẹn ki gbera ikpe ọsi ọria nọn ha sabọ ga bhi Bẹtẹ, la ọnọn ha sabọ yo ọne isiku nan. Mẹn iyẹ da sabọ ga bhi ene uwedẹ nan. Bhiriọ, ẹgheso, egbe ki wo lọ mẹn.”

3. Emhin eso nela ọkhẹke nin ibhio mhan lu beji ele ha da sẹ eria nan ha ne ọbhi ihe bhi ẹkẹ agbotu?

³ Ọkuẹsẹ a mun ẹsọn eso nin ene elasẹre bhi ẹkẹ agbotu, ọ dẹ khẹke nin ele wanre bhi uwedẹ nin ele rẹ talọ bi uwedẹ nin ele rẹ ria eria. Ọ yẹ khẹke nin ele ha mhọn ikpẹ esili. Bhi ọsi ijiẹmhin, ele sabọ rẹ lẹn emhin, ele sabọ ha zẹ emhin ne mhẹn rẹ lu, yẹ  muegbe rẹ miẹnsọn nan mun nin ele. Bhi obọ nọnkẹle, ele imhọn iziẹngbe, ele igbẹlokotọ lu emhin. Sẹyẹ, ele imhọn ekpẹn. Uwẹ ha dọnmhegbe rẹ ha mhọn ikpẹ esili, ihe nin uwẹ guanọ ki sẹ uwẹ obọ bhi ẹghe nin uwẹ bha re ẹlo ọi. Bha ji mhan fẹ okha ọsi obhio mhan natiọle Nick ghe. Ẹghe nin ọle rẹ ha ribhi ikpe 20, a bha re ọle kiẹn ene zẹ sike ewanlẹn. Bhiriọ, ọle bha ha ghọnghọn. Ọle da yọle: “Mẹn da ha riale ghe, mẹn mhọn eji mẹn ida lu nọnsẹn.” Ọkpakinọn, Nick bha ji ọnan da re egbe lọ ọle. Ọ da wo dọnmhegbe rẹ ha rẹkpa bhi agbotu, yẹ manman ha tẹmhọn Osẹnobulua. Ejayenan nian, ọkpa bhi Ene Sun iBẹtẹ ọle ki khin.

4. Be imhan ha zilo nyan bhi ọne uhọnmhọn-ọta nan?

⁴ Ahamiẹn egbe lọ uwẹ ranmhude uwẹ bha sẹ sabọ mun emhanmhan nin uwẹ khu ọi bhi ẹkẹ agbotu sẹ, taman iJehova ebi emhin dia uwẹ bhi egbe yẹ. (Ps. 37:​5-7) Rẹ deba ọnin, taman ibhio mhan nin ikpea ne ki wanre bhi oga, nin ele rẹkpa uwẹ lẹn emhin nin uwẹ ha lu nin uwẹ da sabọ ha lu re alo bhi oga nọnsi Jehova. Ọkhẹke nin uwẹ dọnmhegbe lu rẹkhan ebi ele taman uwẹ. Uwẹ ha lu iriọ, ọne ihe sabọ rẹ sẹ uwẹ obọ. Ọkpakinọn, asabọmiẹn ọne ihe ida sẹ uwẹ obọ nian, beji ọ rẹ sunu ji Melissa nin mhan ka tẹmhọn ọlẹn. Ọnan ha sunu, be bhọ uwẹ ha lu yẹ nin egbe hẹi lọ ẹ bhi oga nọnsi Jehova? Nin mhan rẹ miẹn ewanniẹn rẹji ọne inọnta nan, mhan dẹ zilo nyan emhin ea bhi ọne uhọnmhọn-ọta nan. (1) Ebi mhan ha lu nin egbe hẹi lo mhan, (2) ebi mhan ha lu nin mhan da manman ha ghọnghọn, bi (3) emhanmhan nin uwẹ ha sabọ ha mhọnlẹn ne ha manman re uwẹ ha ghọnghọn.

5. Be ọkhẹke nin mhan denọ ẹlo ọi ahamiẹn mhan guanọ nin mhan ha ghọnghọn bhi oga nọnsi Jehova? (Ecclesiastes 6:9)

⁵ Beji Ecclesiastes 6:9 rẹman, mhan dẹ sabọ miẹn eghọnghọn sade mhan denọ ẹlo ọbhi ebe ha sabọ re eghọnghọn nin mhan. (Tie ọle.) Nin ọria rẹ sọnyẹnmhẹn bhi “ebi ẹlo daghe,” ọle dẹ ji ebi ọle mhọnlẹn da ha ti ọle bhọ, rẹ sẹbhi ebi ọle sabọ lu nian. Bhi obọ nọnkẹle, ọria nọn zozo guanọ ebe ghọn ọlẹn, ki ha guanọ emhin nọn ida sẹ ọle obọ. Be ọnan man mhan le? Nin mhan da sabọ ha ghọnghọn, ọkhẹke nin mhan denọ ẹlo ọbhi ebi mhan mhọn nian, bi emhin nọn ha sabọ sẹ mhan obọ bhi ẹghe odalo.

6. Okha nela mhan ha zilo nyan nian? Be imhan ha tẹmhọnlẹn bhi ọne okha?

⁶ Beji a miẹn ghe, imhan nin eria guanọ emhin ọgbọn nin mhan ha lu beji ẹghe rẹ ha gbera, mhan dẹ gene sabọ ji emhin nin mhan mhọnlẹn da khọn mhan? Ehe, mhan dẹ sabọ ha sọnyẹnmhẹn bhi emhin nin mhan mhọn nian. Nin mhan rẹ sabọ lu ọnan, bha ji mhan zilo nyan arẹkhọkhọ ọkpa nin Jesu da noo igho natiọle talent, nan gbẹn ọbhi Matthew 25:​14-30. Mhan ki yẹ zilo nyan ebi ọne arẹkhọkhọ ha rẹ sabọ rẹkpa mhan rẹ manman ha sọnyẹnmhẹn bhi emhin nin mhan sabọ lu nian.

7. Sounun bhi okha nin Jesu da noo igho natiọle italent.

⁷ Okha nin Jesu da noo igho natiọle talent tẹmhọn okpea nọn ha muegbe okhian. Ọkuẹsẹ ọle kpanọ, ọle da datie eguọmhandia nesọle, yẹ ne igho natiọle talent nin ele rẹ do ẹki. * Ranmhude ọle lẹn ele nọnsẹn, ọle da gha ọne igho nin ele beji ahu nọnsele sẹ. Ọle da ne italent isẹn nin ọkpa bhi ẹwẹ ele, ọle da ne italent eva nin ọbhebhe, yẹ re italent ọkpa nin ọnọnkẹle. Ọguọmhandia nin ọhẹnhẹn bi ọne ọzeva da gene noo ọne igho rẹ do ẹki nin ebeanlẹn ele. Ọkpakinọn, ọne ọzea bha noo igho nan re nanlẹn rẹ do ẹki. Bhiriọ, ebeanlẹn ọlẹn da khu ọle fia.

8. Bezẹle nin ọguọmhandia nin ọhẹnhẹn nan tẹmhọnlẹn bhi ọne okha nan ha da ha ghọnghọn?

 ⁸ Ọguọmhandia nin ọhẹnhẹn dẹ wo manman ha ghọnghọn, ranmhude ebeanlẹn ọlẹn ne italent isẹn nanlẹn. Ebeanlẹn ọlẹn wo gbaẹkẹ ọle, ọle zẹle nin ọle da sabọ mun udede igho nọn sẹ iriọ nanlẹn. Ọguọmhandia nọnzeva a ha rẹ wo ji ẹkẹ ha khọ ọle, ranmhude, igho nan ne nanlẹn bha sẹ italent isẹn. Ọkpakinọn ọle be lu iriọ?

9. Be iJesu bha taman mhan ọguọmhandia nọnzeva lu? (Matthew 25:​22, 23)

⁹ Tie Matthew 25:​22, 23. Jesu bha yọle ghe ọguọmhandia nọnzeva wo ha khọẹkẹ, la re ẹmhọn gbanọ ọbhi ẹkẹ ranmhude talent eva ọkpa a re nanlẹn. Jesu bha yẹ yọle ghe, ọle wo ha zaka-zuyọn yọle: ‘Bezẹle nin ebeanlẹn mẹn da re ọnan ọkpa nin mẹn? Be ọnọnkẹle lu nin mẹn isabọ lu? Sẹyẹ, ahamiẹn ẹmhọn mẹn iti ọle bhọ, mẹn khian dọ gbe ọne igho nan wotọ yẹ ha lu ọsi egbe mẹn.’

10. Be ọguọmhandia nọnzeva khian igho nan re nanlẹn yẹ?

¹⁰ Ọguọmhandia nọnzeva da lu tee beji ọne ọhẹnhẹn lu. Ọle da re igho nọnsi ebeanlẹn ọlẹn rẹ do ẹki nanlẹn, yẹ re ọne italent eva khuan italent enẹn. Ebeanlẹn ọlẹn da wo lu ọle nọnsẹn nin ọle rẹ wẹnna kaka. Ebeanlẹn ọlẹn da wo ha ghọnghọn. Ọle da mun ẹsọn ọbhebhe nanlẹn.

11. Be imhan ha lu nin mhan da manman ha ghọnghọn bhi oga nọnsi Jehova?

¹¹ Iriọ yẹ nọn, ahamiẹn mhan re egbe rebhe miẹnsọn nan mun nin mhan bhi oga nọnsi Jehova, mhan ki ha ghọnghọn. Bhiriọ, wo manman ha lu iwẹnna itẹmhọn Osẹnobulua, uwẹ ha yẹ ha rẹkpa bhi ẹkẹ agbotu. (Acts 18:5; Heb. 10:​24, 25) Ha muegbe ikolo oga ọbhi otọ,  beji uwẹ ha da sabọ re ewanniẹn ọbhi inọnta nọn ha sabọ bọn ibhio uwẹ okhun. Ahamiẹn a re ọta nin uwẹ bhi ikolo oga nan do bhi ẹkẹ uzana, dọnmhegbe mun egbe ọle nọnsẹn. Kẹ ha vae dọ ha miẹnsọn nan mun nin uwẹ bhi ẹkẹ agbotu, uwẹ ha yẹ ha yi ọria nan gbaẹkẹ ọle. Hẹi re ẹlo gbe ẹsọn soso nan mun nin uwẹ a. Dọnmhegbe ha luẹ ba emhin nin uwẹ guẹle. (Prov. 22:29) Beji uwẹ ha rẹ ha wẹnna kaka bhi iwẹnna itẹmhọn Osẹnobulua, yẹ re egbe rebhe miẹnsọn nan mun nin uwẹ bhi ẹkẹ agbotu, uwẹ ki ha lu re alo, yẹ manman ha ghọnghọn bhi oga nọnsi Jehova. (Gal. 6:4) Ọ ki yẹ re ọle lẹkhẹ nin uwẹ rẹ deba ẹbho ha ghọnghọn sade a re ele ọbhi ihe nin uwẹ guanọ nan yẹ re uwẹ ọi.​—Rom. 12:15; Gal. 5:26.

12. Be rẹkpa Melissa bi Nick rẹ manman ha ghọnghọn bhi oga nọnsi Jehova?

¹² Uwẹ be yẹ ye obhio mhan nin Melissa re, nọn rẹ ha guanọ nin ọle dọ ga bhi Bẹtẹ, la yo Isiku ọsi Ene Tẹmhọn Agbejele? Arẹmiẹn ọle bha yẹ sabọ lu ebi ọle rẹ ha mhọn bhi ọkhọle, ọle da yọle: “Mẹn da wo wẹnna kaka bhi iwẹnna ọkanẹfan nin mẹn ha lu, yẹ dọnmhegbe noo uwedẹ kẹkẹ nan rẹ tẹmhọn Osẹnobulua. Ọnan da wo rẹ mẹn ha ghọnghọn.” Be iNick nin mhan ka tẹmhọnlẹn lu yẹ, ẹghe nan bha rẹ re ọle kiẹn ọkpa bhi ene zẹ sikẹ ewanlẹn? Ọle da yọle: “Mẹn da dọnmhegbe ha lu eka nin mẹn ha sabọ lu​—bọsi nin mẹn rẹ ha tẹmhọn Osẹnobulua yẹ ha re ewanniẹn nọn gbale ọbhi inọnta bhi ikolo oga. Mẹn da yẹ gbẹn vuọn ebe nan rẹ tie ọria bhi Bẹtẹ. Bhi ukpe nọn rẹkhan ọlẹn, a da wo tie mẹn.”

13. Be ha nabhọre sade uwẹ re egbe rebhe miẹnsọn nan mun nin uwẹ nian? (Ecclesiastes 2:24)

¹³ Ihe nin uwẹ guanọ dẹ be sẹ uwẹ obọ bhi ẹghe odalo, sade uwẹ re egbe rebhe miẹnsọn nan mun nin uwẹ? Asabọmiẹn ọ dẹ sẹ uwẹ obọ beji ọ rẹ sẹ iNick obọ. A sabọ yẹ miẹn ọ ida sẹ uwẹ obọ, beji ọ bha rẹ sẹ Melissa obọ. Ọrẹyiriọ, bọsi Melissa, uwẹ dẹ yẹ sabọ ha ghọnghọn, yẹ ha mhọn ọkhọnlẹn bhi ebi uwẹ sabọ lu bhi oga nọnsi Jehova nian. (Tie Ecclesiastes 2:24.) Rẹ deba ọnin, uwẹ ki yẹ manman ha ghọnghọn, ranmhude uwẹ lẹn sẹbhọ ghe, ọne iwẹnna nin uwẹ lu ti Jesu Kristi nin Ebeanlẹn mhan bhọ.

14. Emhin nela ọkhẹke nin mhan yere sade mhan khu ọbhi emhanmhan nesẹmhan bhi oga nọnsi Jehova?

¹⁴ Ahamiẹn mhan lu eka nin mhan sabọ lu bhi oga nọnsi Jehova nian, ọnan be rẹman ghe nin mhan hẹi dọnmhegbe lu gbera iriọ? Hiehie! Ọkhẹke nin mhan ha mhọn emhanmhan ne ha rẹkpa mhan rẹ ha tẹmhọn Osẹnobulua yẹ man emhin nọnsẹn. Ọ yẹ khẹke nin mhan ha mhọn emhanmhan ne ha sabọ rẹkpa ibhio mhan nin mhan ko ga. Nin mhan da sabọ mun ene emhanmhan nan sẹ, ọkhẹke nin mhan gbẹlokotọ, yẹ ha lu emhin ọbhi oleghe, beji mhan ha rẹ ha rẹkpa ibhio mhan nin mhan ko ga. Ọ iyi nin mhan rẹ ha khu ọsi egbe mhan.​—Prov. 11:2; Acts 20:35.

15. Emhanmhan eso nela uwẹ ha sabọ khu ọi ne ha re uwẹ manman ha ghọnghọn?

¹⁵ Emhanmhan nela uwẹ ha sabọ ha mhọnlẹn? Bhii Jehova nin ọle rẹkpa uwẹ lẹn emhanmhan nin uwẹ ha sabọ munsẹ. (Prov. 16:3; Jas. 1:5) Uwẹ sabọ rẹ khu ọbhi ọkpa bhi ene emhanmhan nan. Emhanmhan bọsi nin uwẹ rẹ lu iwẹnna ọkanẹfan ọsi ẹghe eso, la  ọsi ẹghe rebhe, nin uwẹ rẹ dọ ga bhi Bẹtẹ, nin uwẹ rẹ deba ibhio mhan ne bọn uwa oga. Uwẹ sabọ yẹ rẹ luẹ urolo ọbhebhe, beji uwẹ ha da sabọ re ọle tẹmhọn Osẹnobulua man ẹbho ne zẹ ọne urolo, la dọ ha lu iwẹnna itẹmhọn Osẹnobulua bhi agbaẹbho ọbhebhe. Uwẹ dẹ sabọ lẹn emhin rẹji ene emhanmhan nan sade uwẹ tie iluẹmhin 10 bhi ebe nọnsẹmhan natiọle “Organized to Do Jehovah’s Will.” Uwẹ dẹ yẹ sabọ taman ene ewanlẹn ne ribhi agbotu nọnsẹ nin ele rẹkpa  uwẹ. * Beji uwẹ ha rẹ ha khu ọbhi ene emhanmhan nan, ẹbho ki wo ha daghe ebi uwẹ rẹ ha lu re alo yẹ, bhiriọ, uwẹ ki wo manman ha ghọnghọn.

16. Be bhọ uwẹ ha lu sade uwẹ bha sẹ sabọ mun emhanmhan nin uwẹ khu ọi sẹ?

¹⁶ Be uwẹ ha lu yẹ sade uwẹ bha sẹ sabọ mun ọkpa bhi ene emhanmhan nin sẹ? Khu ọbhi emhanmhan ọbhebhe nin uwẹ ha sabọ munsẹ. Bha ji mhan zilo nyan emhin eso nin uwẹ ha sabọ khu ọi.

17. Beji 1 Timothy 4:​13, 15 rẹman, emhin nela obhio mhan nin okpea ha lu nin ọle da sabọ ha man emhin nọnsẹn?

¹⁷ Tie 1 Timothy 4:​13, 15. Ahamiẹn obhio mhan nin okpea nọn mianmẹn uwẹ khin, uwẹ sabọ rẹ wẹnna kaka nin uwẹ da sabọ ha re ọta man nọnsẹn, yẹ man emhin nọnsẹn. Bezẹle? Ranmhude, uwẹ ha guẹ ebi a rẹ tie ebe nọnsẹn, re ọta man nọnsẹn, yẹ man emhin nọnsẹn, eria ne ka uwẹ ehọ ki miẹn elele bhọ. Dọnmhegbe luẹ uhọnmhọn-ọta kẹkẹ ne ribhi ebe nọnsẹmhan natiọle “Manman Guẹ Ebe Nan Tie Bi Iman-Emhin.” Uwẹ ha yẹ ha re obọ rẹkhan ebi uwẹ luẹ bhọ. Ha luẹ ene uhọnmhọn-ọta ne ribhi ọne ebe ukpọkpa-ukpọkpa, uwẹ ha yẹ luẹ ọle ọbhi otọ bhi uwa. Dọnmhegbe lu rẹkhan ọlẹn sade uwẹ re ọta man. Nọọn ọwanlẹn nọn re adia nin ọria sade ọria re ọta man fo, la ewanlẹn ebhebhe ne guẹ ebi a rẹ re ọta man nọnsẹn yẹ, nin ele rẹkpa uwẹ lẹn eji uwẹ ha da lu re alo bhi ọta nin uwẹ rẹman. * (1 Tim. 5:17) Ọ iyi nin uwẹ rẹ lẹn ene uhọnmhọn-ọta ne ribhi ọne ebe ọkpa ọkhẹke nin uwẹ luẹ. Ọ yẹ khẹke nin uwẹ guẹ ebi a rẹ re ọta man yẹ, nọn da sabọ ziẹn urẹọbhọ ọsi ene ka uwẹ ehọ, bi nin ele da sabọ re obọ rẹkhan  ebi ele họn. Uwẹ ha lu iriọ, uwẹ ki manman ha ghọnghọn. Sẹyẹ, ele ki ha ghọnghọn.

18. Be imhan ha lu nin mhan da sabọ ha tẹmhọn Osẹnobulua nọnsẹn?

¹⁸ Ẹsọn nọn khẹke mhan rebhe hi, nin mhan rẹ tẹmhọn Osẹnobulua, yẹ re ẹbho kiẹn edibo. (Matt. 28:​19, 20; Rom. 10:14) Ọ dẹ be yẹẹ uwẹ rẹ guẹ ebi a rẹ miẹn ọne ẹsọn kpataki nan yẹ? Luẹ ebe nọnsẹmhan natiọle “Manman Guẹ Ebe Nan Tie Bi Iman-Emhin.” Uwẹ ha yẹ mhanmhan emhin ne ha rẹkpa uwẹ rẹ re obọ rẹkhan ebi uwẹ luẹ bhi ọne ebe. Uwẹ dẹ yẹ miẹn emhin ne ha rẹkpa uwẹ bhi Ebe Ọsi Ikolo Unyẹnmhin bi Iwẹnna Oga Nọnsẹmhan, bi vidio nesẹmhan natiọle “Ebi Uwẹ Ha Sabọ Ta” nan rẹman bhi ikolo oga nin mhan do bhi ẹkẹ uzana. Noo ene uwedẹ nan kẹkẹ nin uwẹ rẹ lẹn ọnọn ha rẹkpa uwẹ nẹ. Uwẹ ha re obọ rẹkhan ene emhin nan, uwẹ ki guẹ ebi a rẹ tẹmhọn Osẹnobulua yẹ, yẹ manman ha ghọnghọn.​—2 Tim. 4:5.

19. Be uwẹ ha rẹ sabọ ha mhọn ikpẹ esili yẹ?

¹⁹ Hẹi yelea ghe, emhin nọn lu uhọnmhọn emhin nẹ nin uwẹ ha sabọ khu ọi, ọle hi nin uwẹ rẹ ha mhọn ikpẹ esili ne ha re uwẹ sikẹ iJehova. (Gal. 5:​22, 23; Col. 3:12; 2 Pet. 1:​5-8) Be uwẹ ha rẹ sabọ lu ọnan yẹ? Bhi ọsi ijiẹmhin, ahamiẹn uwẹ guanọ nin uwẹ manman ha mhọn urẹọbhọ, uwẹ sabọ rẹ tie uhọnmhọn-ọta bhi ebe nesẹmhan ne tẹmhọn ebi uwẹ ha rẹ ha mhọn urẹọbhọ nọn ziẹnlẹn yẹ. Uwẹ dẹ yẹ miẹn emhin ne ha re urẹọbhọ nọnsẹ deziẹn sade uwẹ ghe ividio nesẹmhan nan rẹman bhi JW Broadcasting^® ne tẹmhọn ebi ibhio mhan rẹ re urẹọbhọ man yẹ ẹghe nin ele rẹ kuẹlo da ọkakale. Uwẹ ha yẹ zilo nyan uwedẹ nin uwẹ ha rẹ sabọ re egbe khọkhọ ele.

20. Be imhan ha lu nin mhan da manman ha ghọnghọn, bi nin egbe hẹi manman lọ mhan gbe?

²⁰ Bhi ọsi ẹmhọanta, imhan rebhe guanọ nin mhan ha lu gbera eka nin mhan lu nian bhi oga nọnsi Jehova. Sokpan, bhi agbọn ọsọgbọn nọn vade, ọle mhan ha da sabọ lu iriọ tee. Ọkuẹsẹ ọne ẹghe nin vae, bha ji mhan dọnmhegbe ha lu eka nin mhan ha sabọ lu nian. Bhiriọ, mhan ki ha ghọnghọn. Sẹyẹ, egbe ida manman lọ mhan gbe ranmhude mhan bha sabọ lu eka nin mhan ho nin mhan lu bhi oga nọnsi Jehova. Ọnọn lu uhọnmhọn emhin nẹ hi, mhan ki re ogẹn ji Jehova nin “Osẹnobulua ọsi eghọnghọn.” (1 Tim. 1:11) Bhiriọ, bha ji mhan wo ha ghọnghọn bhi ebi mhan sabọ lu nian!