1. Inọnta nela mhan ha sabọ ha nọọn sade mhan ria eria nyan emhin rebhe nin Jehova manlẹn?

MHAN ha ria eria nyan uwedẹ nin Jehova rẹ man otọ bi okhun, emhin sabọ rẹ dia mhan bhi egbe beji ọ dia iDavid bhi egbe, ẹghe nin ọle rẹ nan erọnmhọn ji Jehova yọle: “Imẹn ha daghe okhun nọnsẹ, iwẹnna obọ nọnsẹ, uki, bi ene ahiẹnhiẹn nin uwẹ mhanmhanlẹn, họ bhọ okpea ọkhọnkhan, nin uwẹ da re ọle bhi ọkhọle, bi ọmọn nọnsi okpea nin uwẹ da ha gbẹloghe ọle?” (Ps. 8:​3, 4) Beji emhin dia iDavid bhi egbe, ọ sabọ rẹ han mhan ilo ghe, Jehova ji ẹmhọn mhan da rẹtẹ ọle, arẹmiẹn mhan manman khere bhi eji emhin nin ọle manlẹn ye, emhin bọsi ahiẹnhiẹn ne ribhi okhun. Bhi ọne uhọnmhọn-ọta nan, mhan dẹ luẹ kere ghe, Jehova wo gbẹloghe Adam bi Eve. Sẹyẹ, ọle da ne ele ba azagba-uwa nọnsọle.

2. Be iJehova ha guanọ nin Adam bi Eve lu?

² Imọn ọhẹnhẹn nin Jehova ha mhọn bhi ọne otọ nan hi, Adam bi Eve. Ọle da wo ha re oyẹẹ nin ele lu emhin. Osẹnobulua da ha guanọ nin Adam bi Eve ha mhọn imọn ne bunbun. Ọle bhọ da taman ele yọle: “Bha ha biẹ nin bha bunbun, nin bha vuọn ọne otọ nan yẹ ha gbẹloghe ọle.” (Gen. 1:28) Osẹnobulua da ha guanọ nin ele ha mhọn imọn, yẹ re ọne otọ nan mhọn-ose a. Adam, Eve, bi imọn nesele ha rẹ sabọ ha ribhi azagba-uwa nọnsi Osẹnobulua rẹ sẹbhi ighegheghe sade ele hẹnmhọn nanlẹn.

3. Bezẹle nin mhan ha da sabọ yọle ghe, Adam bi Eve wo ha mhọn ihe kpataki nin ele da ha zẹ bhi azagba-uwa nọnsi Jehova?

³ Adam bi Eve wo rẹ ha mhọn ihe kpataki nin ele da zẹ bhi azagba-uwa nọnsi Jehova. David ki ha tẹmhọn ebi Osẹnobulua rẹ man eria yẹ bhi Psalm 8:​5, ọle da yọle: “Uwẹ da lu ọle, nin ene  ẹhi re ikhere khua okhun gbera ọle, sẹyẹ, uwẹ da re ekpẹn bi uyi nanlẹn.” Ẹmhọanta nọn ghe, ọ iyi ahu, ilẹnmhin, bi ẹwanlẹn nin Jehova re nin ene ẹhi ọle re nin eria. (Ps. 103:20) Ọrẹyiriọ, khere ene ẹhi rẹ khua okhun gbera eria. Emhin ọhan-ilo wo khọnan! Iẹnlẹn wo gene mhẹn an nin Adam bi Eve ẹghe nin Jehova rẹ man ele.

4. Be sunu ji ihe nin Adam bi Eve da ha zẹ bhi azagba-uwa nọnsi Jehova? Be imhan ha zilo nyan bhi ọne uhọnmhọn-ọta nan?

 ⁴ Adam bi Eve bha yẹ ha ribhi azagba-uwa nọnsi Jehova ranmhude ele bha hẹnmhọn nanlẹn. Ọnan da wo si ọkakale ji imọn nesele beji mhan ha luẹ kere bhi ọne uhọnmhọn-ọta nan. Ọkpakinọn, emhanmhan nọnsi Jehova rẹji eria bha sẹ fidenọ. Ọle sẹyẹ guanọ nin eria ne hẹnmhọn nanlẹn ha yi imọn nesọle rẹ sẹbhi ighegheghe. Bhi ọne uhọnmhọn-ọta nan, mhan dẹ zilo nyan ebi Jehova sẹ rẹ mun ekpẹn mhan bhi egbe yẹ. Mhan dẹ yẹ zilo nyan ebi mhan ha lu nian, nin mhan rẹ rẹman ghe, mhan guanọ nin mhan deba azagba-uwa nọnsi Jehova. Bhi ọkike ọle, mhan ki zilo nyan erọnmhọn nin imọn nesi Jehova ha miẹn bhi obọ ọle rẹ sẹbhi ighegheghe.

5. Be imhan ha rẹ rẹman yẹ ghe, ọ ti mhan bhọ nin Osẹnobulua rẹ man mhan bhi arẹkhọkhọ nọnsọle?

⁵ Ekpẹn Jehova mun mhan bhi egbe, nin ọle rẹ man mhan bhi arẹkhọkhọ nọnsọle. (Gen. 1:​26, 27) Ranmhude Osẹnobulua man mhan bhi arẹkhọkhọ nọnsọle, mhan dẹ sabọ ha mhọn ikpẹ esili nesọle yẹ re ele man. Ikpẹ bọsi oyẹẹ, ẹkẹ-ẹjẹjẹ, asun-rẹkhan, bi ikhiakhiale. (Ps. 86:15; 145:17) Beji mhan ha rẹ ha mhọn ene ikpẹ nan, yẹ re ele man, mhan ki ha re ogẹn ji Jehova. Sẹyẹ, mhan ki rẹman ghe, ọ ti mhan bhọ nin ọle rẹ man mhan bhi arẹkhọkhọ nọnsọle. (1 Pet. 1:​14-16) Mhan dẹ ha ghọnghọn sade mhan lu emhin ne ti Jehova bhọ. Sẹyẹ, ranmhude Jehova man mhan bhi arẹkhọkhọ nọnsọle, mhan dẹ sabọ kiẹn unan ọria nin ọle guanọ bhi azagba-uwa nọnsọle.

6. Be iJehova rẹ re ọne otọ nan mun ekpẹn mhan bhi egbe yẹ?

⁶ Jehova da man ọne otọ nan nin mhan. Ẹghe ne bunbun ne gbera ọkuẹsẹ Jehova man okpea nin ọhẹnhẹn, ọle da ka man ọne otọ nan nin eria da ha nyẹnlẹn. (Job 38:​4-6; Jer. 10:12) Ranmhude Osẹ nọn fuẹkẹ-nẹ-ẹdẹ Jehova khin, ọle da ne emhin ne bunbun nin mhan, ne ha re imhan ha sọnyẹnmhẹn bhi iẹnlẹn. (Ps. 104:​14, 15, 24) Ẹghe nin Osẹnobulua rẹ ha man emhin, ọle da ria eria nyan emhin nin ọle man, yẹ dọ kere ghe, ele wo ha mhẹn. (Gen. 1:​10, 12, 31) Ekpẹn Jehova re ọle mun eria bhi egbe, nin ọle rẹ ji eria da ha gbẹloghe emhin rebhe ne mhọn-ose a nin ọle man ọbhi ọne otọ nan. (Ps. 8:6) Ebi Jehova guanọ hi, nin eria nin egbe gba nan ha gbẹloghe ene emhin nan nin ọle manlẹn, yẹ re ele ha sọnyẹnmhẹn rẹ sẹbhi ighegheghe. Uwẹ be khuẹnmhẹn iJehova ẹghe rebhe rẹji ọne emhanmhan nan bhi ẹghe odalo?

7. Be iJoshua 24:15 rẹ rẹman yẹ ghe, mhan mhọn ọne isẹhoa rẹ tobọmhan zẹ ebi mhan ho nin mhan lu?

⁷ Jehova re ọne isẹhoa nin mhan rẹ tobọmhan zẹ ebi mhan ha lu. Imhan dẹ sabọ zẹ ebi mhan ha re iẹnlẹn nọnsẹmhan lu. (Tie Joshua 24:15.) Ọ re iJehova ghọnghọn sade mhan zẹ rẹ ga ọle. (Ps. 84:11; Prov. 27:11) Mhan dẹ sabọ tobọmhan zẹ rẹ lu emhin kẹkẹ ne mhẹn. Bha ji mhan zilo nyan ijiẹmhin ọkpa, nọn rẹman ebi Jesu rẹ noo isẹhoa nin ọle mhọn rẹ tobọle zẹ yẹ.

8. Sounun bhi ijiẹmhin ọkpa nọn rẹman ebi Jesu rẹ noo isẹhoa nin ọle mhọnlẹn rẹ tobọle zẹ.

⁸ Mhan dẹ sabọ re egbe khọkhọ ijiẹmhin nọnsi Jesu, sade mhan zẹ rẹ ha mun ẹmhọn ẹbho kalo gbera egbe mhan. Ẹghe ọkpa ribhọ nin egbe rẹ lọ iJesu bi etuegbe nesọle. Bhiriọ, ele da diọbhi eje fi ahiẹ a nin ele da koahua. Ọkpakinọn, ele bha ki sabọ koahua. Bezẹle?  Ranmhude, usun ẹbho da bu ele re nin Jesu man ele emhin. Ọrẹyiriọ, Jesu bha ji ẹkẹ khọ ọle. Sokpan, ọle da mhọn itohan da ele, yẹ munhẹn ha man ele emhin ne bunbun. (Mark 6:​30-34) Ahamiẹn mhan re egbe khọkhọ iJesu, yẹ ha noo ẹghe bi ahu nọnsẹmhan rẹ rẹkpa ẹbho, mhan ki re ogẹn ji Aba mhan nọn ribhi okhun. (Matt. 5:​14-16) Mhan ki yẹ rẹman iJehova ghe, mhan guanọ nin mhan deba azagba-uwa nọnsọle.

9. Isẹhoa kpataki nela Jehova re nin eria?

⁹ Jehova re ọne isẹhoa nin eria rẹ ha biẹ imọn, yẹ man ene imọn emhin nin ele da hoẹmhọn ọlẹn, yẹ ha ga ọle. Ahamiẹn ene biẹ imọn bha khin, ọne isẹhoa nan be ti bha bhọ? Arẹmiẹn Jehova lu emhin esili ne bunbun nin ene ẹhi, ọle bha re ọne isẹhoa nin ele rẹ ha biẹ imọn. Bhiriọ, ahamiẹn aba bi inẹn uwẹ khin, ọkhẹke nin isẹhoa nin Jehova re nin uwẹ rẹ ha biẹ imọn ha ti uwẹ bhọ. Ẹsọn kpataki nin Jehova mun nin bha hi, nin bha rẹ re adia bi ibhude nọnsọle rẹ bẹẹ ele wanre. (Eph. 6:4; Deut. 6:​5-7; Ps. 127:3) Nin ene biẹ imọn da sabọ miẹn ọne ẹsọn nan, agbotu nọnsi Jehova zẹ emhin kẹkẹ egbe dagbare nọn ha sabọ rẹkpa ele. Emhin bọsi, ebe nesẹmhan, vidio, illo, bi emhin nekẹle bhi jw.org. Bhi ọsi ẹmhọanta, Aba mhan nọn ribhi okhun, bi Ọmọn nọnsọle wo manman hoẹmhọn ibhokhan nesẹmhan. (Luke 18:​15-17) Ọ dẹ wo ha re iJehova ghọnghọn sade ene biẹ imọn mun udu nyan ọlẹn, yẹ dọnmhegbe gbẹloghe imọn nesele. Ọ yẹ khẹke nin ene biẹ imọn rẹkpa imọn nesele rẹ ha mhọn ọne ikhuaẹloghe rẹ deba azagba-uwa nọnsi Jehova rẹ sẹbhi ighegheghe.

10-11. Isẹhoa nela Jehova re nin mhan ranmhude izọese ọsi ọmọn nọnsọle?

¹⁰ Jehova da re ọmọn nin ọle hoẹmhọn ọlẹn rẹ zọese nin mhan, beji mhan ha da sabọ kie dọ deba azagba-uwa nọnsọle. Beji mhan ka ta bhi  uduọle nọnzi enẹn, Adam bi Eve da mun isẹhoa nin ele bi imọn nesele mhọnlẹn rẹ deba azagba-uwa nọnsi Jehova fia. (Rom. 5:12) Ranmhude Adam bi Eve tan ẹlo a gbobọrauhi nọnsi Osẹnobulua, ọle da ne ele sibhi azagba-uwa nọnsọle re. Ọkpakinọn, be a ki sunu ji imọn nesele? Ranmhude Jehova hoẹmhọn mhan, ọle da lu ọle nin mhan da sabọ deba azagba-uwa nọnsọle. Ọle da ji Jesu nin ukpọmọn ọkpa sẹsẹ nọnsọle re, nin ọle dọ yu nin mhan. (John 3:16; Rom. 5:19) Ranmhude ọne izọese nan, Jehova da zẹ itue 144,000 ne sun rẹkhan ọlẹn, nin ele dọ ha yi imọn nesọle.​—Rom. 8:​15-17; Rev. 14:1.

¹¹ Sẹyẹ, ẹbho ne bunbun wo ha ga iJehova, yẹ lu iho nọnsọle. Ele mhọn ọne iruduba rẹ deba azagba-uwa nọnsi Osẹnobulua bhi ẹghe nin edọnmhẹn nọn kike ha rẹ fo, sade ikpe uli nin Jesu ha rẹ gbẹloghe sotọ. (Ps. 25:14; Rom. 8:​20, 21) Ranmhude ọne ikhuaẹloghe nan nin ele mhọnlẹn, ele bhọ munhẹn ha tie iJehova nin Aman nọn man ele “Aba.” (Matt. 6:9) Eria nan ha riọkpanọ bhi uu ki ha mhọn isẹhoa rẹ luẹ ebi Jehova guanọ bhi obọ ele. Bhiriọ, ene hẹnmhọn nanlẹn ki yẹ dọ deba azagba-uwa nọnsọle.

12. Inọnta nela mhan ha zilo nyan nian?

¹² Beji mhan ki sẹ luẹ kere, Jehova sẹ wo lu emhin ne bunbun rẹ mun ekpẹn mhan bhi egbe. Ọle re enanzẹle kiẹn imọn nesọle. Sẹyẹ, ọle re ikhuaẹloghe nin usun ẹbho ne bunbun nin ele rẹ kiẹn imọn nesọle bhi agbọn ọsọgbọn nọn vade. (Rev. 7:9) Emhin nela mhan ha lu nian nin mhan rẹ rẹman iJehova ghe, mhan guanọ nin mhan deba azagba-uwa nọnsọle rẹ sẹbhi ighegheghe?

13. Be imhan ha lu nin mhan da sabọ deba azagba-uwa nọnsi Osẹnobulua? (Mark 12:30)

¹³ Ha re ọkhọle rebhe ga iJehova nin uwẹ rẹ rẹman ghe, uwẹ hoẹmhọn ọlẹn. (Tie Mark 12:30.) Osẹnobulua wo lu ẹsele ne bunbun nin mhan. Sokpan, ọnọn lu uhọnmhọn-emhin nẹ  bhọ hi, isẹhoa nin mhan mhọnlẹn rẹ ha ga ọle. Mhan rẹman iJehova ghe mhan hoẹmhọn ọlẹn sade mhan ‘re obọ rẹkhan uhi nesọle.’ (1 John 5:3) Jehova guanọ nin mhan re obọ rẹkhan uhi nin Jesu gbe nin mhan, nin mhan rẹ dọ re ẹbho kiẹn edibo, yẹ gbe ele ruẹ bhi amẹn. (Matt. 28:19) Osẹnobulua yẹ guanọ nin mhan hoẹmhọn ọdeọde. (John 13:35) Jehova dẹ miẹn eria ne hẹnmhọn nanlẹn ọbhi egbe, nin ele dọ deba azagba-uwa nọnsọle.​—Ps. 15:​1, 2. 

14. Be imhan ha rẹ sabọ ha mhọn ahoẹmhọn-egbe da ẹbho yẹ? (Matthew 9:​36-38; Romans 12:10)

¹⁴ Bha ha mhọn ahoẹmhọn-egbe da ẹbho. Oyẹẹ ke okhun nẹ bhi ikpẹ nesi Jehova. (1 John 4:8) Jehova ka re oyẹẹ man mhan, ọkuẹsẹ mhan bhọ dọ lẹn ọlẹn. (1 John 4:​9, 10) Ọle mhan re egbe khọkhọ sade mhan mhọn ahoẹmhọn-egbe da ẹbho. (Eph. 5:1) Uwedẹ nọn mhẹn nẹ nin mhan ha rẹ sabọ re oyẹẹ man ẹbho hi, sade mhan rẹkpa ele rẹ lẹn iJehova beji ẹghe sẹ yẹ rẹ ribhọ nian. (Tie Matthew 9:​36-38.) Mhan ha rẹkpa ele, ele ki lẹn ebi ele ha lu yẹ nin ele da sabọ deba azagba-uwa nọnsi Osẹnobulua. Ahamiẹn ọria mianmẹn fo, ọkhẹke nin mhan ha mun ekpẹn nanlẹn yẹ re oyẹẹ man ọlẹn. (1 John 4:​20, 21) Be imhan ha rẹ lu ọnan yẹ? Mhan ki ha gbaẹkẹ ọle. Bhi ọsi ijiẹmhin, ahamiẹn ọle lu emhin nin mhan bha lẹn ebezẹle nin ọle da lu ọle, mhan ida ha riale ghe, emhin ebe nin ọle mhọn bhi ọkhọle zẹle nin ọle da lu ọle. Sokpan, mhan ki ha mun ekpẹn nanlẹn, yẹ ha riale ghe, ọle mhẹn gbera mhan.​—Tie Romans 12:10; Phil. 2:3.

15. Eria nela ọkhẹke nin mhan mhọn itohan bi ifuẹkẹ da?

¹⁵ Ha mhọn itohan bi ifuẹkẹ da ẹbho rebhe. Ahamiẹn mhan guanọ nin mhan deba ẹbho ne da ha tie iJehova Aba ele rẹ sẹbhi ighegheghe, ọkhẹke nin mhan ha re obọ rẹkhan ebe ribhi Baibo. Bhi ọsi ijiẹmhin, Jesu yọle nin mhan ha mhọn itohan bi ifuẹkẹ da ẹbho rebhe, rẹ dọ sẹbhi eghian mhan. (Luke 6:​32-36) Ahamiẹn ọnọghọ mhan rẹ lu iriọ ẹghe rebhe, ọkhẹke nin mhan re egbe khọkhọ iJesu bhi uwedẹ nin ọle rẹ ria eria bi uwedẹ nin ọle rẹ lu emhin. Ahamiẹn mhan dọnmhegbe rẹ hẹnmhọn nin Jehova, yẹ re egbe khọkhọ iJesu, mhan ki rẹman Aba mhan nọn ribhi okhun ghe, mhan guanọ nin mhan deba azagba-uwa nọnsọle rẹ sẹbhi ighegheghe.

16. Be imhan ha lu nin mhan hẹi re itọn ọbhi elin ọsi azagba-uwa nọnsi Jehova?

¹⁶ Hẹi lu emhin nọn ha re itọn sin azagba-uwa nọnsi Jehova. Emhin nọn kẹ sunu bhi azagba-uwa nọn, nin obhokhan rẹ ha re egbe khọkhọ uwedẹ nin ọnọn mẹn ọlẹn rẹ lu emhin. Ahamiẹn ene wanre bhi azagba-uwa re obọ rẹkhan adia ne ribhi Baibo, ele ki ha yi ijiẹmhin esili rẹji ibhokhan nin ele mẹnlẹn. Sokpan, ahamiẹn ele lu emhin ne imhẹn, ene ibhokhan sabọ rẹ ha re egbe khọkhọ ele. Iriọ yẹ nọn bhi azagba-uwa nọnsi Jehova. Ahamiẹn obhio mhan nọn ka rẹ ha ga iJehova nọnsẹn de sibhi oga re, yẹ munhẹn ha nyẹn iẹnlẹn esankan, ibhio mhan nekẹle sabọ deba ọle ha lu emhin ebe. Eria ne lu iriọ ki re itọn ọbhi elin ọsi azagba-uwa nọnsi Jehova. (1 Thess. 4:​3-8) Ọ bha khẹke nin mhan re egbe khọkhọ ijiẹmhin ne imhẹn. Sẹyẹ, ọ bha khẹke nin mhan ji emhin soso riia ikolu nin mhan bi Aba mhan nọn ribhi okhun ko mhọnlẹn an.

17. Iria-eria nela ọkhẹke nin mhan rẹban? Bezẹle?

¹⁷ Hẹi mun udu nyan afe bi ua, sokpan mun udu nyan iJehova. Jehova ve nin mhan ghe, ahamiẹn mhan mun ẹmhọn Agbejele bi ikhiakhiale nọnsọle kalo bhi iẹnlẹn nọnsẹmhan, ọle ki re ebale, ukpọn, bi eji mhan ha dia nin mhan. (Ps. 55:22; Matt. 6:33) Ahamiẹn mhan mun udu nyan ọne ive nan, mhan ida ha riale ghe afe bi ua ọsi ọne agbọn nan dẹ sabọ gbega mhan, yẹ re eghọnghọn nin mhan. Mhan lẹn sẹbhọ ghe, ahamiẹn mhan lu iho nọnsi Jehova, ọle ọkpa mhan ha da ha mhọn ọfure ọsaje. (Phil. 4:​6, 7)  Aharẹmiẹn mhan dẹ sabọ dẹ emhin ne bunbun nin mhan guanọ, ọkhẹke nin mhan nọọn egbe mhan si mhan dẹ miẹn ẹghe bi ahu rẹ noo ele. Ọ dẹ be sabọ sunu ghe, emhin nin mhan mhọnlẹn mhan ki hoẹmhọn ọlẹn gbera emhin nọn hi ki rẹ khin? Ọkhẹke nin mhan yere ghe, Osẹnobulua mun ẹsọn nin mhan miẹn bhi azagba-uwa nọnsọle. Bhiriọ, ọ bha khẹke nin mhan ha noo ẹghe nọnsẹmhan rẹ khu afe bi ua. Mhan iguanọ nin mhan diabe ọne usẹn obhokhan nọn mun isẹhoa nin ọle mhọnlẹn rẹ dọ ga iJehova, yẹ kiẹn ọkpa bhi imọn nesọle fia, ranmhude ọle manman hoẹmhọn afe bi ua.​—Mark 10:​17-22.

18. Udede ekpẹn bi erọnmhọn nela eria ne hẹnmhọn nin Osẹnobulua ha miẹn bhi obọ ọle rẹ sẹbhi ighegheghe?

¹⁸ Eria ne hẹnmhọn nin Osẹnobulua dẹ ha mhọn udede isẹhoa rẹ ha ga ọle, yẹ hoẹmhọn ọlẹn rẹ sẹbhi ighegheghe! Ene mhọn ọne iruduba rẹ nyẹnlẹn bhi ọne otọ nan dẹ ha ghọnghọn, beji ele ha rẹ ha gbẹloghe ọne otọ nan nin Jehova man nọn ha yi uwa nọnsele. Bhi ẹghe nọn bha yẹ ree gbe nian, Agbejele nọnsi Osẹnobulua dẹ re ọne otọ nan bi emhin rebhe ne ribhọ kiẹn ọsọgbọn. Jesu ki ne ọnọghọ rebhe kie nin Adam bi Eve si re, ẹghe nin ele rẹ zẹ rẹ sibhi azagba-uwa nọnsi Osẹnobulua re. Sẹyẹ, Jehova ki riọ ẹbho ne bunbun kpanọ bhi uu, re iẹnlẹn nọn gbale nin ele, yẹ re isẹhoa nin ele rẹ nyẹnlẹn bhi ighegheghe bhi otọ-ọfubhegbe. (Luke 23:​42, 43) Ẹghe nin egbe ha rẹ gba nin ẹbho ne ga iJehova, ele ki dọ ha mhọn ekpẹn bi uyi nin David tẹmhọn ọlẹn.​—Ps. 8:5.

19. Be ọkhẹke nin mhan lẹn?

¹⁹ Ikhuaẹloghe nọn mhẹn an, ọle uwẹ wo mhọn riọ, sade uwẹ deba “usun ẹbho” ne ha nyẹnlẹn bhi ọne otọ nan. Osẹnobulua hoẹmhọn uwẹ; ọle guanọ nin uwẹ deba azagba-uwa nọnsọle. Bhiriọ, dọnmhegbe ha lu eka nin uwẹ ha sabọ lu, nin uwẹ da ha lu ebe ti ọle bhọ. Ha khua ẹlo ghe ive nesi Osẹnobulua beji uwẹ rẹ nyẹn iẹnlẹn ukpẹdẹ-ukpẹdẹ. Ji isẹhoa nin uwẹ mhọnlẹn rẹ ha ga Aba mhan nọn ribhi okhun ha ti uwẹ bhọ. Sẹyẹ, ji ọ ha ti uwẹ bhọ ghe, bhi ẹghe odalo, uwẹ dẹ sabọ gẹn Osẹnobulua rẹ sẹbhi ighegheghe.