1. Bezẹle nin Jesu da taman Jehova nin ọle gbẹloghe ene rẹkhan ọlẹn?

 ỌNE ukpasọn ọkuẹsẹ Jesu yu, ọle da bhii Aba ọle nọn ribhi okhun emhin kpataki, ghe, nin ọle gbẹloghe ene rẹkhan ọlẹn. (John 17:15, 20) Bhi ọsi ẹmhọanta, Jehova ka wo gbẹloghe ẹbho nesọle yẹ gbega ele khẹ. Ọrẹyiriọ, Jesu lẹnmhin Esu dẹ wo manman kpokpo ene rẹkhan ọlẹn. Jesu yẹ lẹnmhin ghe, ele dẹ ha guanọ urẹkpa bhi obọ Jehova beji ele ha da sabọ ziẹngbe ekpokpo nesi Esu.

2. Beji Psalm 33:18-20 rẹman, bezẹle nọn bha da khẹke nin mhan ha mun ofẹn sade mhan kuẹlo da ọnọghọ?

² Ọne agbọn Esu nan wo ha si ọnọghọ ne bunbun ji eguọmhandia nesi Jehova ẹlẹnan. Mhan kuẹlo da ọnọghọ kẹkẹ ẹlẹnan ne ha sabọ re egbe lọ mhan, yẹ bhọ dọnmhẹn asun-rẹkhan nin mhan mhọn da Jehova. Ọkpakinọn, mhan dẹ luẹ bhi ọne uhọnmhọn-ọta nan ghe, ọ bha khẹke nin mhan ha mun ofẹn. Jehova ghe mhan rebhe. Ọnan rẹman ghe, ọle daghe ọnọghọ nin mhan kuẹlo da. Sẹyẹ, ọle guanọ nin ọle rẹkpa mhan. Bha ji mhan zilo nyan ijiẹmhin eva bhi Baibo ne rẹman ebi Jehova rẹ rẹkpa “ẹbho ne mun ofẹn ọlẹn” yẹ.—Tie Psalm 33:18-20.

3. Ẹghela mhan ha rẹ sabọ ha riale ghe mhan ọkpa khian?

³ Arẹmiẹn mhan mhọn ibhio ne bunbun bhi agbotu nin mhan ko ga kugbe, ẹgheso, mhan sabọ rẹ ha riale ghe imhan ọkpa khian. Bhi ọsi ijiẹmhin, ene usẹn sabọ ha riale ele ọkpa khian, sade ele re otọ ebi ele rẹọ ọi man ene ele ko ribhi klass, la sade ele la diọbhi agbotu ọsọgbọn. Ahamiẹn eso bhi ẹwẹ mhan lu akhiẹ, la emhin ribhọ ne re egbe lọ ele, ele ki ha riale ghe ọria soso iribhọ nọn ha rẹkpa ele. Ele sabọ rẹ ha si egbe re ikeke nin ele rẹ taman ẹbho ebi emhin dia ele yẹ bhi egbe, ranmhude ele sabọ ha riale ghe, iriọ a da miẹn ele ida lẹn otọ ebi emhin dia ele yẹ bhi egbe. Sẹyẹ ẹgheso, mhan sabọ ha riale, si ọria soso ribhọ  nin ẹmhọn mhan gene rẹtẹ. Ahamiẹn mhan riale ghe imhan ọkpa khian, ọ dẹ sabọ re imhan ha riale ọria iribhọ nọn ha rẹkpa mhan, yẹ ha kpokpo egbe. Jehova bha guanọ nin emhin re iriọ dia mhan bhi egbe. Bezẹle nin mhan ha da sabọ ta iriọ?

4. Bezẹle nin Ẹlaija nin akhasẹ da yọle ghe ọle ọkpa ki kẹre?

⁴ Bha ji mhan fẹ ijiẹmhin ọsi Ẹlaija nin akhasẹ ghe. Jezibẹl da yọle ghe, ọle dẹ gbe ọle a. Ranmhude ọnan, ọle da wo ha nẹ khian rẹ na ebe gbera ikpẹdẹ 40. (1 Ki. 19:1-9) Bhi ọkike ọle, ọle ọkpa ki ha ribhi ẹkẹ uhio bhi ẹkẹ oke, ọle da taman Jehova ghe, ọle ọkpa hi akhasẹ nọn ki kẹre. (1 Ki. 19:10) Sokpan, akhasẹ nekẹle sẹyẹ ribhi ọne otọ. Bhi ọsi ijiẹmhin, Obedaya da dọnmhegbe rẹ miẹn akhasẹ 100 fan bhi obọ Jezibẹl nin ọgbugbe. (1 Ki. 18:7, 13) Bhiriọ, bezẹle nin Ẹlaija ki da ha riale ghe, ọle ọkpa khian? Ọle be ha riale ene akhasẹ rebhe nin Obedaya miẹnfan yuno? Ọle be ha riale ọle ọkpa khian, ranmhude ẹbho bha dọ deba ọle dọ ha ga Jehova, arẹmiẹn Jehova bhọ rẹman ghe osẹ ọsi ohoghe Beli khin bhi Oke ọsi Kamẹl? Ọle be ha riale ghe, ọria soso bha lẹn okhẹnan nin ọle ye, la ẹmhọn ọlẹn bha rẹtẹ ọria soso? Baibo bha manman re otọle man ebi emhin dia Ẹlaija yẹ bhi egbe. Ọkpakinọn, ebi mhan lẹnlẹn hi, Jehova lẹn ebezẹle nin Ẹlaija da ha riale ọle ọkpa khian. Sẹyẹ, Ọle lẹn ebi Ọle ha rẹ rẹkpa ọle yẹ.

5. Be Jehova rẹ rẹkpa Ẹlaija rẹ lẹn yẹ ghe, ọ iyi ọle ọkpa khian?

⁵ Jehova da rẹkpa Ẹlaija bhi uwedẹ kẹkẹ. Ọle da nọọn Ẹlaija inọnta igba eva beji ọle ha da talọ. Ọle da nọọn Ẹlaija ghe, be uwẹ lu bhi enan? (1 Ki. 19:9, 13) Jehova da kaehọ beji Ẹlaija ha taman ọlẹn ebi emhin dia ọle yẹ bhi egbe. Jehova da rẹkpa Ẹlaija rẹ lẹn ghe, ọle ribhi eji ọle ye, sẹyẹ, ọle manman mhọn ahu. Ọle da yẹ rẹkpa Ẹlaija rẹ lẹn ghe ọle mhọn ẹbho ne bunbun ne yẹ ha ga ọle. (1 Ki. 19:11, 12, 18) Edandan iribhọ ghe ọkhọle nọnsi Ẹlaija da lọre, ẹghe nin ọle rẹ taman Jehova ebi emhin dia ọle yẹ bhi egbe fo, bi ebi ọle ki họn ebi Jehova taman ọlẹn fo. Jehova da mun ẹsọn kpataki kẹkẹ nin Ẹlaija miẹn. Ọle da taman ọlẹn nin ọle zẹ Hezaẹl nin ọle ha yi ojie ọsi Siria, Jehu nin ọle ha yi ojie ọsi Izrẹl, Ẹlaisha nin ọle ha yi akhasẹ.  (1 Ki. 19:15, 16) Nin Jehova rẹ mun ene ẹsọn nan nin Ẹlaija, ọle da rẹkpa ọle rẹ ha mun ọkhọle ọbhi emhin ne mhẹn. Jehova da yẹ re Ẹlaisha nanlẹn nin ele ko ha yi ikokhian ne manman sikẹ egbe. Be uwẹ ha rẹ miẹn urẹkpa nọnsi Jehova yẹ sade uwẹ riale uwẹ ọkpa khian?

6. Be uwẹ ha sabọ taman Jehova bhi erọnmhọn sade uwẹ riale ghe uwẹ ọkpa khian? (Psalm 62:8)

⁶ Jehova guanọ nin uwẹ ha nan erọnmhọn ji ọle. Ọle daghe ọnọghọ kẹkẹ nin uwẹ kuẹlo da. Sẹyẹ, ọle ji uwẹ lẹn ghe ọle dẹ ka uwẹ ehọ ẹghe nọn hi ki rẹ khin nin uwẹ rẹ nan ẹrọnmhọn ji ọle. (1 Thess. 5:17) Ọ ti ọle bhọ rẹ ha kaehọ eguọmhandia nesọle. (Prov. 15:8) Be uwẹ ha sabọ taman Jehova bhi erọnmhọn sade uwẹ riale ghe uwẹ ọkpa khian? Taman Jehova ebi emhin dia uwẹ yẹ bhi egbe beji Ẹlaija lu. (Tie Psalm 62:8.) Taman ọlẹn emhin ne kpokpo uwẹ bhi ọkhọle, bi ebi ele dia uwẹ yẹ bhi egbe. Taman Jehova nin ọle rẹkpa uwẹ rẹ lẹn ebi uwẹ ha lu yẹ sade uwẹ riale uwẹ ọkpa khian, la sade uwẹ lu akhiẹ. Bhi ọsi ijiẹmhin, bhi isiku, ahamiẹn uwẹ riale uwẹ ọkpa khian, la ofẹn ha mun uwẹ sade ene ibha ko ribhi klass nọọn uwẹ inọnta eso rẹji emhin nin uwẹ rẹọ ọi, bhii Jehova nin ọle re izebhudu nin uwẹ, beji uwẹ ha da sabọ wanniẹn ele. Uwẹ sabọ bhọ rẹ taman ọlẹn nin ọle re ẹwanlẹn nin uwẹ rẹ wanniẹn ele nọnsẹn. (Luke 21:14, 15) Ahamiẹn emhin ribhọ ne re egbe lọ uwẹ, bhii Jehova nin ọle rẹkpa uwẹ rẹ ne obhio mhan nọn deziẹn bhi oga zilo ene emhin. Uwẹ sabọ rẹ bhii Jehova nin ọle rẹkpa obhio mhan nin uwẹ ha ne talọ rẹ lẹn ebi emhin dia uwẹ yẹ bhi egbe. Ahamiẹn uwẹ taman Jehova ebi emhin dia uwẹ yẹ bhi egbe, yẹ daghe ebi ọle rẹ ha re ewanniẹn ọbhi erọnmhọn nesẹ yẹ, sẹyẹ, uwẹ da miẹn urẹkpa ọsi ibhio mhan ọbhi egbe, uwẹ ida yẹ manman ha riale ghe uwẹ ọkpa khian.

7. Be uwẹ miẹn luẹ bhi obọ Mauricio?

⁷ Jehova mun ẹsọn kpataki nin mhan rebhe miẹn. Uwẹ de sabọ ha mhọn ọlẹn bhi ọkhọle ghe, ọle daghe ẹsọn kẹkẹ nin uwẹ miẹn bhi agbotu, bi iwẹnna itẹmhọn Osẹnobulua nin uwẹ lu. Sẹyẹ, ọ ti ọle bhọ. (Ps. 110:3) Ahamiẹn uwẹ wo manman ha lu ilọnmhọn oga, be ọ ha rẹ rẹkpa uwẹ yẹ sade uwẹ riale ghe uwẹ ọkpa khian? Bha ji mhan fẹ ijiẹmhin ọsi obhio mhan nin okpea nin usẹn natiọle Mauricio ghe. * Ọ bha sẹ bue nin Mauricio mianmẹn, ọkpa bhi imọẹ ọlẹn ne manman sikẹ ọle da fẹkẹ ha de sibhi oga re. Mauricio da yọle: “Mẹn ki daghe ọle zẹ Jehova obọ, ọnan da re egbe lọ mẹn. Mẹn da ha riale si mẹn dẹ yẹ sabọ mun ive nin mẹn ve nin Jehova sẹ nin mẹn rẹ ga ọle, yẹ ha ribhi agbotu nọnsọle. Mẹn da ha riale ghe imẹn ọkpa khian, yẹ ha riale ọria soso ida lẹn ebi emhin dia mẹn yẹ bhi egbe.” Emhin nela rẹkpa Mauricio? Ọle da yọle: “Mẹn da manman ha dagbare bhi inẹbho. Ọnan da rẹkpa mẹn rẹ zobọ bhọ rẹ  ha ria ẹmhọn egbe mẹn ọkpa, bi ebi emhin dia mẹn yẹ bhi egbe. Beji mẹn ha deba ibhio mhan dagbare bhi inẹbho, mẹn da ha ghọnghọn. Mẹn bha yẹ ha riale ghe imẹn ọkpa khian.” Aharẹmiẹn mhan iyẹ sabọ deba ibhio mhan dagbare bhi iwẹnna itẹmhọn Osẹnobulua rẹ na bhi uwa rẹ sẹbhi uwa, mhan wo yẹ miẹn izebhudu beji mhan rẹ deba ele lu iwẹnna itẹmhọn Osẹnobulua nan re ilẹta bi foni lu. Emhin ọbhebhe nela yẹ rẹkpa Mauricio? Ọle da yọle: “Mẹn da yẹ wo ha sasa bhi agbotu. Ahamiẹn a re ọta nin mẹn bhi ikolo oga nan do bhi ẹkẹ uzana, mẹn ki dọnmhegbe rẹ muegbe ọle nọnsẹn yẹ re ọle man. Ene ọta nan ha re mẹn bhi ikolo oga da re imẹn ha riale ghe, ẹmhọn mẹn ti Jehova bi ẹbho nekẹle bhọ.”

8. Be ọnọghọ ne kaka ha rẹ sabọ rẹso mhan yẹ?

⁸ Mhan lẹnmhin ghe mhan dẹ kuẹlo da ọnọghọ bhi ẹghe ọkike ọsi ọne agbọn nan. (2 Tim. 3:1) Ọkpakinọn, asabọmiẹn mhan bha rẹ ha riale ghe, mhan dẹ miẹn unan ọnọghọ eso, la ẹghe nin ele rẹ sunu ji mhan sabọ rẹ han mhan ilo. Asabọmiẹn mhan re osukpa miẹn ghe mhan iyẹ mhọn igho, mhan khọnmhọn emianmhẹn ọbe, la ọria nin mhan hoẹmhọnlẹn yu. Bhi ẹghe ne sẹ iriọ, egbe sabọ rẹ lọ mhan, la mhan sabọ rẹ ha kpokpo egbe manman nọn sade ọ diabe mhan wo ha na bhi ẹkẹ ọnọghọ na bhi ọnọghọ, la ọnọghọ kẹkẹ wo re osukpa ha sunu ji mhan. Ọrẹyiriọ, yere ghe, Jehova lẹn ọnọghọ nin mhan kuẹlo da. Sẹyẹ, ọle dẹ rẹkpa mhan rẹ sabọ ziẹngbe ene ọnọghọ.

9. Tẹmhọn ọnọghọ eso nin Jobu kuẹlo da?

⁹ Bha ji mhan zilo nyan ebi Jehova rẹ rẹkpa Jobu yẹ. Bhi obhi ẹghe khere, Jobu da kuẹlo da ọkakale kẹkẹ. Bhi ukpẹdẹ ọkpa, a da taman Jobu ghe, a do elanmhẹn nesọle eso muno, yẹ gbono enekẹle a. A da yẹ taman ọlẹn ghe, a gbono eguọmhandia nesọle a. Sẹyẹ, imọn nesọle nin ọle manman hoẹmhọnlẹn yuno. (Job 1:13-19) Ọ bha sẹ bue gbe nin ene emhin nan sunu, Esu da mun emianmhẹn ọbe gbe Jobu beji ọle sẹyẹ lu akhiẹ. (Job 2:7) Idia nin Jobu ye da kaka sẹbhọ ghe, ọle da yọle: “Iẹnlẹn nọnsẹmhẹn sọnọn mẹn; ọ iyẹ ghọn mẹn rẹ ha nyẹnlẹn.”—Job 7:16.

10. Be Jehova rẹ rẹkpa Jobu yẹ rẹ sabọ ziẹngbe ọnọghọ nin ọle kuẹlo da? (Fẹ adudu nọn ribhi odalo ọne ebe nan ghe.)

¹⁰ Jehova da rẹkpa Jobu. Ranmhude Jehova hoẹmhọn Jobu, ọle da rẹkpa ọle rẹ sabọ ziẹngbe ọnọghọ nin ọle kuẹlo da. Jehova da nin Jobu talọ. Ọle da ye ọle re ẹwanlẹn nọn gbale nin Ọle mhọn, bi uwedẹ nin Ọle rẹ gbẹloghe emhin nin Ọle manlẹn. Ọle da yẹ taman Jobu ẹmhọn elanmhẹn ne bunbun ne khua nin ọle manlẹn. (Job 38:1, 2; 39:9, 13, 19, 27; 40:15; 41:1, 2) Jehova da yẹ noo Ẹlaihu nin usẹn okpea rẹ ziẹn Jobu udu, yẹ re ikoudure nanlẹn. Ẹlaihu da yẹ ji ọle lẹn ghe, Jehova wo re ihaosa nin eguọmhandia Nesọle ne ziẹngbe. Ọkpakinọn, Jehova da yẹ noo Ẹlaihu rẹ re adia eso nin Jobu. Ẹlaihu da rẹkpa Jobu rẹ zobọ bhọ rẹ manman ha ria ẹmhọn egbe ọle, beji ọle rẹ ye ọle re ghe, inian mhan dia khere sade a re imhan rẹ khọkhọ Jehova nin Aman nọn man otọ bi okhun. (Job 37:14) Jehova da yẹ mun ẹsọn nin Jobu. Ọle da taman ọlẹn ghe, nin ọle nan erọnmhọn nin ikokhian nesọle ea ne lu olukhọ. (Job 42:8-10) Uwedẹ nela Jehova rẹ rẹkpa mhan ẹlẹnan sade mhan kuẹlo da ọkakale?

11. Be Baibo rẹ rẹkpa mhan yẹ sade mhan kuẹlo da ọnọghọ?

¹¹ Jehova ine mhan talọ beji ọle rẹ ne iJobu talọ. Ọkpakinọn, ọle noo Baibo rẹ ne imhan talọ. (Rom. 15:4) Ọle re ikhuaẹloghe nin ọle re nin mhan bhi ẹghe odalo rẹ ko mhan udu re.  Bha ji mhan fẹ ọta eso ghe bhi ẹkẹ Baibo ne ha sabọ ko mhan udu re sade mhan kuẹlo da ọnọghọ. Bhi ẹkẹ Baibo, Jehova da rẹkpa mhan rẹ lẹn ghe, emhin soso iribhọ rẹ sẹbhi ọkakale nin mhan ha miẹn nọn ha “sabọ ne mhan sibhi oyẹẹ [nọnsọle] re.” (Rom. 8:38, 39) Ọle yẹ ji mhan lẹn ghe, ọle “sikẹ ọrebhe ne sotie ọle” bhi erọnmhọn. (Ps. 145:18) Jehova taman mhan ghe ahamiẹn mhan mun udu nyan ọlẹn, mhan dẹ sabọ ziẹngbe ọnọghọ nọn hi ki rẹ khin, yẹ ha ghọnghọn aharẹmiẹn mhan loya. (1 Cor. 10:13; Jas. 1:2, 12) Baibo yẹ rẹkpa mhan rẹ lẹn ghe, ọnọghọ nin mhan miẹn ẹlẹnan, ọsi obhi ẹghe khere nọn sade mhan re ọle khọkhọ iẹnlẹn ighegheghe nin mhan ha miẹn bhi ẹghe odalo. (2 Cor. 4:16-18) Jehova da re ikhuaẹloghe nin mhan ghe, ọle dẹ gbe Esu bi ẹbho ne imhẹn ne si ọnọghọ ji mhan khuelo. (Ps. 37:10) Uwẹ be sẹ luẹ ijeso bhi Baibo ne ha sabọ ko uwẹ udu re ọbhi uhọnmhọn, ne ha rẹkpa uwẹ rẹ ziẹngbe ọnọghọ nin uwẹ ha miẹn bhi ẹghe odalo?

12. Be Jehova guanọ nin mhan lu beji mhan ha da manman miẹn elele bhi Ọta nọnsọle?

¹² Jehova guanọ nin mhan ha re ẹghe ọbhi otọ rẹ luẹ Baibo ẹghe-ẹghe, yẹ manman ha ria eria nyan ebi mhan tiele. Ahamiẹn mhan re obọ rẹkhan ebi mhan luẹle, urẹọbhọ nọnsẹmhan ki ha ziẹn ọbhọ. Sẹyẹ, mhan ki manman ha sikẹ Aba mhan nọn ribhi okhun. Bhiriọ, mhan ki sabọ ha ziẹngbe ọnọghọ nin mhan kuẹlo da. Jehova yẹ re ẹlinmhin nọn khiale nọnsọle nin ẹbho ne mun udu nyan Ọta nọnsọle. Sẹyẹ, ọne ẹlinmhin nin dẹ sabọ re ọne “ahu nọn gbera eji ahu ọsi ọria sẹle” nin mhan rẹ sabọ ziẹngbe ọnọghọ nọn hi ki rẹ khin.—2 Cor. 4:7-10.

13. Be ebale oriọn nin “ọne ọguọmhandia nọn wanlan nan gbaẹkẹ ọle” ne dagbare rẹ rẹkpa mhan ziẹngbe ọnọghọ yẹ?

¹³ Jehova wo ha rẹkpa “ọne ọguọmhandia nọn wanlan nan gbaẹkẹ ọle” rẹ ha ne ebe ne bunbun, ividio bi illo dagbare, ne ha sabọ rẹkpa mhan rẹ ziẹn urẹọbhọ nọnsẹmhan, yẹ rẹkpa mhan sikẹ Jehova. (Matt. 24:45) Ọkhẹke nin mhan ha noo ene emhin nan nin Jehova ne nin mhan nọnsẹn. Obhio nin okhuo nọn na bhi United States vae, wo la tẹmhọn ebi ebale oriọn rebhe ne dagbare rẹ wo manman ti ọle bhọ yẹ. Ọle da yọle: “Bhi ikpe 40 nin mẹn sẹ rẹ ga Jehova, emhin kẹkẹ ribhọ ne sẹ wo dọnmhẹn asun-rẹkhan nin mẹn mhọn da ọle.” Ọle da wo kuẹlo da ọkakale kikẹ. Ọria nọn da anyọn nọn ha hẹn imoto dọ gbe aba ọle nọn nẹ a, emianmhẹn ọbe da gbe ene biẹ ọle a, ọle da yẹ khọnmhọn emianmhẹn kansa igba eva. Be bhọ rẹkpa ọle rẹ ziẹngbe? Ọle da yọle: “Jehova  wo ha gbẹloghe mẹn. Ene ebale oriọn nin ọle noo ọne ọguọmhandia nọn wanlẹn nan gbaẹkẹ ọle rẹ ne dagbare wo rẹkpa mẹn rẹ ziẹngbe. Ranmhude ọnan, mẹn dẹ sabọ ta ebi Jobu ta nọn yọle: ‘Mẹn dẹ re ọkhọ nọnsẹmhẹn rebhe ha mhọn asun-rẹkhan rẹ sẹbhi ukpẹdẹ uu!’ ”—Job 27:5.

14. Be Jehova rẹ noo ibhio mhan rẹ rẹkpa mhan yẹ sade mhan ribhi ọnọghọ? (1 Thessalonians 4:9)

¹⁴ Jehova man ẹbho nesọle le ghe, nin ele ha re oyẹẹ man ibhio ele, yẹ re ikoudure nin ele sade ele ribhi ọnọghọ. (2 Cor. 1:3, 4; Tie 1 Thessalonians 4:9.) Beji Ẹlaihu lu, ibhio mhan wo guanọ nin ele ha rẹkpa mhan, beji mhan ha da sun rẹkhan Jehova sade mhan kuẹlo da ọnọghọ. (Acts 14:22) Bhi ọsi ijiẹmhin, bha ji mhan fẹ ebi ibhio mhan ne ribhi agbotu nin Diane ye rẹ re izebhudu nanlẹn, yẹ rẹkpa ọle rẹ sun rẹkhan Jehova ẹghe nin ọdọ ọle rẹ manman ha khọnmhọn. Ọle da yọle: “Ọne ẹghe nan bha lẹkhẹ. Ọkpakinọn, mhan wo daghe uwedẹ nin Jehova rẹ gbẹloghe mhan bhi ene uki nin emhin bha rẹ lẹkhẹ nin mhan. Ibhio mhan bhi agbotu da vae dọ rẹkpa mhan. Ele da ha rẹnẹ ji mhan, re ifoni tie mhan, yẹ mun mhan dede. Ọnan da rẹkpa mhan rẹ sabọ ziẹngbe. Ranmhude mẹn iguẹ hẹn imoto, ibhio mhan da ha mun mẹn vae bhi ikolo oga, yẹ mun mẹn yo inẹbho ẹghe nin mẹn ha rẹ sabọ.” Ọ wo manman re imhan ghọnghọn ghe, mhan ribhi azagba-uwa ne re inian re oyẹẹ man!

15. Be re imhan rẹọbhọ ghe mhan dẹ sabọ ziẹngbe ọnọghọ?

¹⁵ Mhan rebhe dẹ kuẹlo da ọnọghọ. Ọrẹyiriọ, beji mhan luẹle, imhan ọkpa ida tobọmhan khọn ọnọghọ nin mhan kuẹlo da. Beji aba nọn mhọn oyẹẹ lu, Jehova muegbe nin ọle rẹ wo ha rẹkpa mhan. Ọle ribhi ikeke mhan. Sẹyẹ, ọle wo muegbe nin ọle rẹ họn erọnmhọn nesẹmhan, yẹ rẹkpa mhan. (Isa. 43:2) Mhan rẹọbhọ ghe mhan dẹ sabọ ziẹngbe ọnọghọ, ranmhude ọle ne emhin rebhe nin mhan, ne ha rẹkpa mhan rẹ sabọ ziẹngbe. Ọle re isẹhoa nin mhan rẹ ha nan erọnmhọn ji ọle, re Baibo nin mhan, yẹ ne ebale oriọn ne bunbun nin mhan, bi ibhio mhan ne ha rẹkpa mhan bhi ẹghe ọnọghọ.

16. Be imhan ha lu nin Jehova da ha gbẹloghe mhan?

¹⁶ Ọ wo manman ti mhan bhọ nin mhan rẹ ha mhọn Aba bhi okhun nọn rẹkpa mhan! “Ọle re ọkhọle nọnsẹmhan ghọnghọn.” (Ps. 33:21) Mhan dẹ sabọ rẹman Jehova ghe, uwedẹ nin ọle rẹ gbẹloghe mhan ti mhan bhọ, sade mhan noo emhin rebhe nin ọle rẹ rẹkpa mhan. Ọ yẹ khẹke nin mhan dọnmhegbe ha lu emhin nọn ha re Osẹnobulua ha rẹkpa mhan. Ọnan rẹman ghe, mhan dẹ ha dọnmhegbe nin mhan rẹ ha hẹnmhọn nin Jehova yẹ lu emhin ne mhẹn. Mhan ha lu iriọ, ọle ki gbẹloghe mhan rẹ sẹbhi ighegheghe!—1 Pet. 3:12.