Uwẹ be gbẹlokotọ tie ene ebe Ọkhẹughe nọn bha sẹ bue gbe nan ne dagbare? Fẹghe si uwẹ dẹ sabọ re ewanniẹn ọbhi ene inọnta nan:

Ẹlo nela ọkhẹke nin mhan rẹ ha ghe enanzẹle?

Ẹmhọn ele manman ti mhan bhọ ranmhude urẹọbhọ nọnsele. Sokpan, mhan ida ha gẹn ele gbera eji ọkhẹke nin mhan gẹn ele sẹ. Mhan iguanọ nin mhan ha ga ọria soso. (Jude 16, ftn.) Mhan ida ha nọọn ele ẹmhọn egbe ele la ikhuaẹloghe nin ele mhọnlẹn.​—w20.01, p. 29.

Bezẹle nọn da khẹke nin uwẹ rẹọbhọ ghe Jehova lẹn uwẹ tobuwẹ?

Baibo tale ghe Jehova lẹn uwẹ ọkuẹsẹ a biẹ uwẹ. Ọle họn erọnmhọn nọnsi uwẹ. Ọle lẹn ebi uwẹ ria ẹmhọnlẹn bi ebe re uwẹ bhi ọkhọle. Emhin nin uwẹ lu dẹ sabọ re ọle ha ghọnghọn la ha khọẹkẹ. (1 Chron. 28:9; Prov. 27:11) Ọle si uwẹ kẹ egbe.​—w20.02, p. 12.

Ẹghela ọ rẹ khẹke nin mhan rẹ ha huẹan yẹ rẹ talọ?

Ọ ti mhan bhọ rẹ ha tẹmhọn iJehova. Mhan dẹ talọ dagbare ahamiẹn ọria ho nin ọle ne obọ ọbhi emhin nọn bha gba. Ewanlẹn bhi agbotu talọ dagbare rẹ re adia nin ene ribhi agbotu. Mhan ida ha nọọn ibhio mhan ne ribhi otọ nan da mun idobolo ọbhi iwẹnna nọnsẹmhan ebi ele rẹ sẹyẹ lu ọle yẹ. Sẹyẹ ene ribhi eje sẹ iriọ ida ha ta ebi ele rẹ lu iwẹnna oga yẹ bhi enin. Mhan ida yẹ ha ta ọta ẹkhokhọ dagbare.​—w20.03, pp. 20-21.

Be iriso nan tẹmhọnlẹn bhi uhọnmhọnlẹn nọnzi eva bhi ebe nọnsi Joel rẹ dikẹ bhi ọne a tẹmhọnlẹn bhi uhọnmhọnlẹn nọnzi isinlin bhi ebe nọnsi Revelation yẹ?

Joel 2:​20-29 da yọle ghe Osẹnobulua khu ene iriso kua, yẹ haosa emhin nin ele riia. Ọnan ki gbera Osenobulua da biri ẹlinmhin nọn khiale kuọ ẹbho. Ọnan da munsẹ ẹghe nin Babylon rẹ mun okhọn re bhi otọ Izrẹl bi akizẹbue. Enanzẹle, ele Revelation 9:​1-11 re iriso rẹ khọkhọ ranmhude uwedẹ nin ele rẹ wewe ẹmhọn ibhohiẹn nin Osẹnobulua ha dọ bhohiẹn ọne agbọn nan. Ọnan wo manman ba ene ribhi ẹkẹ ọne agbọn bhi egbe.​—w20.04, pp. 3-6.

Họla hi ojie ọsi North ẹlẹnan?

Russia bi agbaẹbho ne ribhi ibo nọnsọle. Ele wo kpokpo ẹbho nesi Osẹnobulua yẹ mun idobolo ọbhi iwẹnna oga nọnsele. Ọle yẹ wo ne ojie ọsi south gbegbe.​—w20.05, p. 13.

Ikpẹ isinlin ọsi ẹlinmhin nọn khiale nan sounun ọlẹn bhi Galatians 5:​22, 23, ele ọkpa be hi ikpẹ nin ẹlinmhin nọn khiale ha sabọ rẹkpa ọria ha mhọnlẹn?

Eye. Ẹlinmhin nọn khiale dẹ yẹ sabọ rẹkpa mhan ha mhọn ikpẹ ebhebhe bọsi ikhiakhiale. (Eph. 5:​8, 9)​—w20.06, p. 17.

Okhẹnan nela ribhọ sade mhan wo tẹmhọn egbe mhan bhi intanẹt?

Ọnan dẹ sabọ re ẹbho ha riale ghe mhan dẹgbọ, ghe mhan imhọn idegbere.​—w20.07, pp. 6-7.

Be ẹbho ne tẹmhọn Osẹnobulua ha sabọ luẹ bhi obọ ẹbho ne gbe ehẹn?

Ẹghe nin ele ha rẹ miẹn ehẹn ele rẹ dagbare dọ gbe ehẹn. Sẹyẹ, eji ele ha da miẹn ehẹn ele diọ. Ele manman guẹ ebi a rẹ noo ene emhin nan rẹ gbe ehẹn. Ele re izebhudu dọ gbe ehẹn aharẹmiẹn emhin rebhe bha dia nọnsẹn. Inian ọ yẹ khẹke nin mhan ha lu sade mhan tẹmhọn Osẹnobulua.​—w20.09, p. 5.

Uwedẹ nela mhan ha rẹ sabọ rẹkpa ẹbho nin mhan man ele iBaibo ziẹn oyẹẹ nin ele mhọn da iJehova?

Ọkhẹke nin mhan ha re izebhudu nin ele ghe, nin ele ha tie Baibo ẹdẹdẹ yẹ ria eria nyan ọlẹn. Ọ yẹ khẹke nin mhan man ele ebi a rẹ nan erọnmhọn yẹ.​—w20.11, p. 4.

Eria nela Baibo ha tẹmhọnlẹn ẹghe nin ọle rẹ yọle ghe a dẹ “re ọrebhe ha nyẹnlẹn ranmhude iKristi”?​—1 Cor. 15:22.

Paul bha ha tale ghe eria rebhe ne yuno dẹ riọkpanọ. Sokpan, enanzẹle ne da riọkpanọ ha khian okhun ọle ha tẹmhọnlẹn. (1 Cor. 1:2; 15:18)​—w20.12, pp. 5-6.

Be enanzẹle ha lu sade ele riọkpanọ ha khian okhun fo ẹghe nan ha rẹ khue akala nọn kike?​—1 Cor. 15:​51-53.

Ele dẹ deba iJesu re ẹlọnmọn rẹ sun ene ẹbho. (Rev. 2:​26, 27)​—w20.12, pp. 12-13.