Ẹghe nin Jesu rẹ ha ribhi okhun, ọle da luẹ ikpẹ esili ne rẹkpa ọle rẹ sabọ deba ẹbho ha wẹnna. Bhiriọ, ẹghe nin ọle rẹ vae bhi ọne otọ nan, ọle da ha yi ọria nọn sabọ deba ẹbho wẹnna nọnsẹn. Be imhan ha rẹ sabọ re egbe khọkhọ ijiẹmhin nọnsi Jesu yẹ? Ahamiẹn mhan gbẹlokotọ fẹ ijiẹmhin nọnsọle ghe, mhan dẹ sabọ miẹn adia ea ne ha rẹkpa mhan rẹ sabọ deba ẹbho ha wẹnna nọnsẹn. Ene adia nan dẹ rẹkpa mhan rẹ manman deba ibhio mhan ha lu emhin kugbe bhi ọfure.

Ọria nọn deba ibo ọle wẹnna nọnsẹn mhọn idegbere. Ẹlo nọn ghanlẹn ọle rẹ ghe eria ne deba ọle wẹnna. Ọle idọnmhegbe nin ọle rẹ ha re egbe man. Unan idegbere nọn sẹ inian Jesu luẹ bhi obọ Aba ọle. Arẹmiẹn Jehova ọkpa a tie ọle Aman nọn man emhin, ọle guanọ nin ẹbho lẹn ghe, Ọmọn nọnsọle yẹ deba ọle bhi ọne iwẹnna nan. Mhan lẹn ọnan bhi ebi Osẹnobulua tale ẹghe nin ọle rẹ yọle: “Ji mhan man okpea bhi arẹkhọkhọ nọnsẹmhan.” (Gen. 1:26) Jesu da lẹn ghe, Jehova manman mhọn idegbere ẹghe nin ọle rẹ ta ene ọta nin.​—Ps. 18:35.

Jesu yẹ wo ha mhọn idegbere ẹghe nin ọle rẹ ha ribhi ọne otọ nan. Ẹghe nin ẹbho rẹ ha gẹn ọlẹn ranmhude emhin nin ọle lu, ọle bha miẹn ọne ogẹn ọbhi egbe. Sokpan, ọle da ha re ọne ogẹn ji Osẹnobulua. (Mark 10:17, 18; John 7:15, 16) Jesu wo dọnmhegbe rẹ deba edibo nesọle ha ribhi ọfure.  Ọle bha ha ne ele lu emhin bii igbọn. Sokpan, ọle da ne ele ha lu emhin bii imọẹ. (John 15:15) Ọle bhọ da sa amẹn rẹ kpe ele oẹ a, nin ọle rẹ rẹman ele ghe, ọkhẹke nin ele ha mhọn idegbere. (John 13:5, 12-14) Ọ yẹ khẹke nin mhan ha re ẹlo nọn ghanlẹn ghe ene imhan ko wẹnna. Mhan ida ha mun ẹmhọn mhan kalo gbera ọsi ele. Mhan bi ene imhan ko wẹnna dẹ sabọ lu emhin ne bunbun ahamiẹn mhan re ẹlo nọn ghanlẹn rẹ ghe ele, bi sade mhan iguanọ nan wo ha gẹn mhan ọkpa ẹghe rebhe.​—Rom. 12:10.

Ọria nọn mhọn idegbere yẹ lẹn ghe, “emhanmhan dẹ de odọ re sade a guanọ adia bhi obọ eria.” (Prov. 15:22) Aharẹmiẹn mhan manman guẹ emhin nin mhan lu, ọkhẹke nin mhan ha mhọn ọlẹn bhi ọkhọle ghe, ọria soso iribhọ nọn lẹn emhin rebhe fo. Jesu tobọle bhọ da yọle ghe, ọ iyi emhin rebhe ọle lẹnlẹn. (Matt. 24:36) Ọle bhọ da yẹ ha guanọ nin ọle lẹn emhin nin edibo nesọle ne bha gba fo lẹnlẹn, bi emhin nin ele ria bhi ọkhọle. (Matt. 16:13-16) Ọnan zẹle nọn da wo ha yẹẹ ene deba ọle wẹnna rẹ ha ribhi eji ọle ye. Iriọ yẹ nọn rẹji mhan. Ahamiẹn mhan mhọn idegbere, yẹ lẹn sẹbhọ ghe mhan bha lẹn emhin rebhe fo, yẹ ha ka ẹbho ehọ, mhan ki ha mhọn ọfure bhi ẹwẹ mhan. Sẹyẹ, emhanmhan nọnsẹmhan ki de odẹ re.

Ọ wo manman khẹke nin ene ewanlẹn re egbe khọkhọ idegbere nọnsi Jesu beji ele ha rẹ ha wẹnna kugbe. Ọkhẹke nin ele lẹn sẹbhọ ghe, ahu ẹlinmhin nọn khiale nọnsi Osẹnobulua dẹ sabọ noo ọwanlẹn nọn hi ki rẹ khin sade ele do ikolo. Ahamiẹn ele ji ene ewanlẹn rebhe ne ribhi ọne ikolo da talọ ọbhi ẹmhọn nin ele zilo nyan, ọnan ki rẹkpa ele rẹ zẹ emhin nin ọrebhe bhi agbotu ha da miẹn elele.

Ọria nọn deba ẹbho wẹnna nọnsẹn noo ẹwanlẹn sade ọle deba ẹbho wẹnna. Ọle ida ha yọle ghe, uwedẹ nin ọle guanọ nan rẹ ha lu emhin ọkpa a ha rẹ lu ọle. Jesu wo ha mhọn isẹhoa ne bunbun rẹ daghe ebi Aba ọle rẹ ha noo ẹwanlẹn nọn gbale yẹ. Bhi ọsi ijiẹmhin, Jehova da je ọle nin ọle dọ miẹn eria fan bhi obọ uu nọn rẹ khẹke ele.​—John 3:16.

Ọ iyi ẹghe rebhe Jesu wo rẹ ha lu emhin bhi uwedẹ nin ọle rẹ ha ho nin ọle rẹ lu ọle. Yere ebi ọle rẹ rẹkpa okhuo nọn na bhi Phoenicia vae yẹ, arẹmiẹn ibhokhan Izrẹl a je ọle bu. (Matt. 15:22-28) Ọle bha ha mhọn ọlẹn bhi ọkhọle ghe, ẹghe rebhe edibo nesọle ha rẹ wo ha lu emhin nọn gbale. Bhi ọsi ijiẹmhin, ẹghe nin Peter nin ọmọẹ ọle nọn manman sikẹ ọle rẹ he ọle bhi ogbakha, Jesu da yẹ rẹhunmhan ọlẹn. Akizẹbue, ọle da mun ẹsọn kpataki nin Peter miẹn. (Luke 22:32; John 21:17; Acts 2:14; 8:14-17; 10:44, 45) Ijiẹmhin nọnsi Jesu rẹman mhan ghe, ọkhẹke nin mhan rẹman ẹbho ghe, ọria  nọn mhọn ẹwanlẹn mhan khin, sade mhan bha ha yọle ebi mhan ho nan lu ọkpa a ha lu.​—Phil. 4:5.

Ahamiẹn mhan re ẹwanlẹn rẹ lu emhin, ọ dẹ yẹ rẹkpa mhan rẹ sabọ ha fi uwedẹ nin mhan rẹ lu emhin denọ, beji mhan ha da sabọ deba ọria nọn hi ki rẹ khin ha wẹnna bhi ọfure. Jesu wo lu ẹbho ne nẹga ọle nọnsẹn sẹbhọ ghe, eghian ọlẹn da yọle ghe, ọle ne ene koko igho uhọnmhọn, bi eria olukhọ ne ka ọle ehọ ha lu imọẹ. (Matt. 11:19) Mhan dẹ be sabọ deba ọria nọn hi ki rẹ khin wẹnna kugbe bhi ọfure beji Jesu lu? Obhio mhan nin okpea nin Louis nọn deba ẹbho kẹkẹ wẹnna ẹghe nin ọle rẹ ha lu iwẹnna ọfẹotughe, yẹ ha ga bhi Bẹtẹ da yọle: “Nan rẹ deba ẹbho nekẹle ne bha gba fo ha wẹnna, inian ọ diabe, a re udo ne iyi ẹlo-ẹlo ha bọn uwa. Ranmhude ene udo iyi abọkpa, a dẹ manman miẹnsọn ọbhọ, sokpan, ọne egbe-uwa dẹ sabọ dia. Mẹn yẹ dọnmhegbe rẹ fi emhin eso denọ beji mẹn ha da sabọ deba ẹbho ha wẹnna bhi ọfure. Bhiriọ, mhan ki sabọ miẹnsọn nin mhan guanọ nin mhan miẹn.” Ijiẹmhin esili wo khọnan!

Ẹghela mhan ha rẹ sabọ noo ẹwanlẹn rẹ ne ene ribhi agbotu nọnsẹmhan lu emhin? Mhan dẹ sabọ re ọnan man sade mhan deba ibhio mhan dagbare bhi inẹbho. A sabọ yọle nin mhan deba obhio mhan nin idia nin ọle ye bhi azagba-uwa dikẹ bhi ọsi mhan, la nin mhan iko yi otu wẹnna. Mhan dẹ be sabọ fẹkẹ deba ele ha khian, la fi uwedẹ nin mhan rẹ tẹmhọn Osẹnobulua denọ diọbhi uwedẹ nin ele rẹ guanọ ọlẹn, nin ele da sabọ sọnyẹnmhẹn bhi iwẹnna itẹmhọn Osẹnobulua?

Ọria nọn deba ẹbho wẹnna nọnsẹn wo “muegbe rẹ ha zẹ emhin bhi obọ.” (1 Tim. 6:18) Asabọmiẹn Jesu lẹn ghe, Aba ọle bha re emhin he nanlẹn, ẹghe nin ọle rẹ deba Ọle ha wẹnna. Ẹghe nin Jehova rẹ ha man emhin ne ribhi okhun, Jesu da ha ribhi enin. Bhiriọ, ọle da luẹ emhin bhi obọ ọle. (Prov. 8:27) Ẹghe nin Jesu ki rẹ vae bhi ọne otọ nan, ọle da yẹ man edibo nesọle emhin nin ọle luẹ bhi obọ Aba ọle. (John 15:15) Bhiriọ, ọkhẹke nin mhan re egbe khọkhọ iJehova, beji mhan ha rẹ ha taman ene imhan ko wẹnna emhin nin mhan lẹnlẹn. Bhi ọsi ẹmhọanta, ọria nọn deba ẹbho wẹnna nọnsẹn ida ne emhin nin ọle lẹnlẹn he, ne ha rẹkpa ene deba ọle wẹnna, beji ọle ha da lẹn emhin nẹ ele. Ọle ki ha ghọnghọn nin ọle rẹ taman ẹbho emhin nin ọle lẹnlẹn.

Mhan dẹ yẹ sabọ ta ọta izebhudu man ene imhan ko wẹnna. Ọ ibe re imhan ghọnghọn sade ọria khuẹnmhẹn imhan bhi ẹsọn nin mhan miẹn? Jesu da re ẹghe ọbhi otọ rẹ taman ene deba ọle wẹnna ikpẹ esili nin ele mhọnlẹn. (Sẹyẹ fẹ Matthew 25:19-23; Luke 10:17-20 ghe.) Ọle bhọ da yẹ taman ele ghe, ele dẹ lu iwẹnna nọn gbera ọsi ọle. (John 14:12) Ọne ukpasọn ọkuẹsẹ ọle yu, ọle da wo khuẹnmhẹn etuegbe nesọle ne sun rẹkhan ọlẹn. Ọle da yọle: “Ibha hi ene sun rẹkhan mẹn bhi ẹkẹ edọnmhẹn nesẹmhẹn.” (Luke 22:28) Ene ọta nan nin Jesu taman ele dẹ wo re izebhudu nin ele, yẹ rẹkpa ele rẹ manman ha miẹnsọn. Ahamiẹn mhan re ẹghe ọbhi otọ rẹ khuẹnmhẹn ene imhan ko wẹnna, ele dẹ wo manman ha ghọnghọn, yẹ wo manman ha miẹnsọn, ranmhude, obulu a rẹ miẹn ahu ilọnmhọn.

Obhio mhan natiọle Kayode da yọle: “Ọria nọn deba ẹbho wẹnna nọnsẹn iyi ọria nọn gba nan fo. Sokpan, ọle re ẹbho nin ele ko wẹnna ghọnghọn, yẹ re iwẹnna lẹkhẹ nin ele.” Ọria nọn sẹ iriọ uwẹ be khin? Uwẹ sabọ nọọn ibhio ẹ nin bha ko wẹnna si ọria nọn deba ẹbho wẹnna nọnsẹn uwẹ khin. Ahamiẹn ọ yẹẹ ele rẹ deba uwẹ ha wẹnna, beji ọ rẹ ha yẹẹ edibo nesi Jesu rẹ deba ọle ha wẹnna, ọta nin Paul nin odibo tale ki munsẹ bhi egbe ẹ. Enin yọle: “Ene deba bha wẹnna nin bha da ha miẹn eghọnghọn mhan khin.”​—2 Cor. 1:24.