Pọl nin odibo da gbẹn ilẹta ji Timoti nọn yi ọwanlẹn bii ọle. Bhi ọne ilẹta, ọle da yọle: “Isira Osẹnobulua bi Jesu Kristi bi ene ẹhi nan zẹle, mẹn rẹ taman uwẹ nin uwẹ re obọ rẹkhan ene adia nan. Re obọ rẹkhan ele nọnsẹn, hẹi lu eku.”—1 Tim. 5:21.

Nin mhan rẹ sabọ lẹn ene ẹhi nan tẹmhọnlẹn bhi enan, mhan dẹ ka zilo nyan ene ẹhi ne bha deba bhi ọne usun nan. Ọ wo khia bhi ẹlo a ghe, ọ i yi ene itue 144,000 ene ẹhi nan tẹmhọnlẹn bhi enan. Ẹghe nin Pọl rẹ gbẹn ọne ẹmhọn nan ji Timoti, a bha sẹ ha riọ enanzẹle kpanọ diọbhi okhun. Ene etuegbe nesi Jesu bi enanzẹle nekẹle bha sẹ kiẹn ẹlinmhin bhi ọne ẹghe nan, bhiriọ, ele i da sabọ ha yi “ene ẹhi nan zẹle” nan tẹmhọnlẹn bhi enan.—1 Kọr. 15:​50-54; 1 Tẹsẹ. 4:​13-17; 1 Jọn. 3:2.

Sẹyẹ, “ene ẹhi nan zẹle” i da ha yi ene ẹhi ne sọtẹ da Jehova bhi ẹghe nin okpamẹn rẹ rọ, ranmhude ibo ọsi Esu ene ẹhi ne sọtẹ ha ye, ele da yẹ kiẹn ẹlinmhin-ebe. Ele da re egbe ele kiẹn eghian nesi Jesu. (Gen. 6:2; Luk 8:​30, 31; 2 Pita. 2:4) Bhi ẹghe odalo, a dẹ mun ele ọbhi uhio nọn i mhọn ọkpẹnlẹn bhi ẹkẹ ikpe 1,000. A ha ki zẹbue, a ki dunmhun ele bi Esu a.—Jud 6; Arẹm. 20:​1-3, 10.

Bhiriọ, “ene ẹhi nan zẹle” nin Pọl tẹmhọnlẹn dẹ ha yi ene ẹhi ne ribhi okhun, ne wo ha sun rẹkhan “Osẹnobulua bi Jesu Kristi.”

Ẹhi ne ribhi okhun manman wo bun. (Hib. 12:​22, 23) Ọ bha khẹke nin mhan ha riale ghe iwẹnna ọkpa ele rebhe wo lu. (Arẹm. 14:​17, 18) Bhi ọsi ijiẹmhin, ọ mhọn ẹghe ọkpa nin ẹhi ọkpa sẹsẹ rẹ fuẹn eyokhọnlẹn ọsi Asiria a ne bun sẹbhi 185,000. (2 Ki. 19:35) Sẹyẹ, asabọmiẹn ẹhi ne bunbun a je ne dọ “koko ẹbho rebhe ne rẹ ẹbho lu olukhọ bi ẹbho rebhe ne gbuhi a sibhi Agbejele [nọnsi Jesu] re.” (Mat. 13:​39-41) Asabọmiẹn a bhọ dẹ je eso bhi ẹwẹ ele nin ele dọ “koko enanzẹle” ha khian okhun. (Mat. 24:31) Sẹyẹ, a je eso bhi ẹwẹ ele nin ele ha ‘gbega mhan bhi uwedẹ nesẹmhan rebhe.’—Ps. 91:11; Mat. 18:10; yẹ fẹ Matiu 4:11; Luk 22:43.

Asabọmiẹn iwẹnna kpataki nan rẹ ha rẹkpa agbotu nọnsi Jehova, ọle hi iwẹnna nan mun nin “ene ẹhi nan zẹle” nan tẹmhọnlẹn bhi 1 Timoti 5:21. Ebi a ta nẹga ọne ulọnlẹn nan rẹman ghe, Pọl wo ha re adia nin ene ewanlẹn rẹji ebi ele ha rẹ ha lu iwẹnna nin ele lu bhi agbotu yẹ. Sẹyẹ, ọle da yọle ghe nin ene ribhi agbotu ha mun ekpẹn nin ene ewanlẹn. Ọle da ji ele lẹn ghe nin ele hẹi ha lu eku beji ele rẹ lu iwẹnna nọnsele, sẹyẹ, nin ele hẹi re otua-otua ha bhuohiẹn sade ele bha sẹ manman ria eria nyan ọne ẹmhọn fo. Ebezẹle nọn da khẹke nin ele manman re obọ rẹkhan ebi Pọl taman ele hi, “isira Osẹnobulua bi Jesu Kristi bi ene ẹhi nan zẹle” ele rẹ lu ọne iwẹnna nan. Ọ wo dọ khia bhi ẹlo ghe, a mun ọne ẹsọn nin ẹhi eso nin ele rẹ ha rẹkpa agbotu. Ẹsọn bii, nin ele rẹ ha gbega eguọmhandia nesi Osẹnobulua, ha rẹkpa ele bhi iwẹnna itẹmhọn Osẹnobulua nin ele lu, yẹ dọ ha taman Jehova ebi ele daghe beji ele rẹ rẹkpa ele.—Mat. 18:10; Arẹm. 14:6.