Uwẹ be sẹ re ẹghe ọbhi otọ rẹ tie Ọne Ọkhẹughe kẹkẹ ọsi ọne ukpe nan? Ahamiẹn uwẹ lu iriọ, fẹghe si uwẹ dẹ sabọ re ewanniẹn ọbhi ene inọnta nan:

Ijiẹmhin nela Jehova re ọbhi otọ rẹji ebi ọkhẹke nan rẹ ha ne ikhuo lu emhin yẹ?

Jehova i zọn ikhuo, ọle bha hoẹmhọn ikpea nẹ ikhuo. Ọle manman wo ka ikhuo ehọ. Sẹyẹ, ebi emhin dia ele yẹ bhi egbe bi ebe kpokpo ele bhi ọkhọle manman wo rẹtẹ ọle. Ọle yẹ wo gbaẹkẹ ele ghe ele dẹ sabọ lu iwẹnna nọnsọle nọnsẹn.—w24.01, apapale 15-16.

Be mhan ha rẹ sabọ re obọ rẹkhan ebe ribhi Ẹfẹsọs 5:7 yẹ, nọn yọle: “Bha hẹi deba ele ha lu emhin ne sẹ iriọ”?

Bhi ọne ulọnlẹn nan, Pọl nin odibo da ha sekha nin mhan ghe, nin mhan hẹi deba ẹbho muobọ, ẹbho ne ha re ọle nọghọ mhan rẹ ha re obọ rẹkhan adia nesi Jehova. Ẹbho bii enin mhan ko rẹnẹ ji egbe, rẹ dọ sẹbhi enin mhan ko muobọ bhi intanẹti.—w24.03, apapale 22-23.

Ọta ohoghe nela ọkhẹke nin mhan da gbega egbe mhan?

Ọkhẹke nin mhan mhọn ẹwanlẹn bhi okha eso nin imọẹ mhan je ji mhan nin mhan bha lẹn otọ ọle, okha eso nin mhan bha lẹn otọ ọle nin ẹbho nin mhan bha lẹn je ji mhan, bi ọta ohoghe nin mhan họn bhi unun ẹbho ne de sibhi oga re, ne man lu ghe ele ho nin ele luẹ Baibo.—w24.04, apapale 12.

Be mhan bha lẹn rẹji uwedẹ nin Jehova ha rẹ bhuohiẹn Solomọn nin Ojie yẹ, ẹbho ne yuno bhi ẹghe ọsi Sodọm bi Gomora, bi bhi ẹghe ọne Okpamẹn nọn rọle? Ọkpakinọn, be bhọ mhan lẹn?

Mhan bha lẹn si Jehova wo gbe ele khuelo sẹsẹsẹ. Sokpan, ebi mhan lẹn hi, Jehova lẹn ebe sunu, sẹyẹ, Osẹ nọn mhọn itohan ọle khin.—w24.05, apapale 3-4.

Nin Osẹnobulua rẹ ha yi “ọne Udo”, be ọ rẹkpa mhan rẹ lẹn? (Deut. 32:4)

Ọ rẹkpa mhan rẹ lẹn ghe mhan dẹ sabọ re Jehova kiẹn ugue nọnsẹmhan. Mhan dẹ sabọ mun udu nyan ọlẹn ranmhude, ọle wo mun ive nesọle sẹ. Sẹyẹ, ọle i beghe, ọle i fidenọ, sẹyẹ iho nọnsọle i fidenọ.—w24.06, apapale 26-28.

Be ha rẹkpa uwẹ nin emhin hẹi ha nọghọ uwẹ sade uwẹ diọbhi agbotu ọbhebhe?

Mun udu nyan Jehova nin ọle rẹkpa uwẹ, beji ọle rẹ rẹkpa eguọmhandia nesọle bhi ẹghe nọn gbera. Hẹi ha re agbotu nin uwẹ ye nian rẹ khọkhọ ọne uwẹ ka rẹ ha ye khẹ. Wo re egbe rebhe ha deba lu emhin nọn hi ki rẹ khin nan lu bhi ọne agbotu nin uwẹ ye. Uwẹ ha yẹ deba ibhio uwẹ bhi enin ha lu ọmọẹ.—w24.07, apapale 26-28.

Emhin nela mhan miẹn luẹ bhi ene arẹkhọkhọ ea nan tẹmhọnlẹn bhi Matiu uhọnmhọnlẹn nọnzi 25?

Arẹkhọkhọ ọsi ohuan bi ọsi ẹbhe rẹkpa mhan rẹ lẹn ghe ọkhẹke nin mhan manman ha mhọn urẹọbhọ bi asun-rẹkhan. Arẹkhọkhọ ọsi ene ikhuo ne bha hẹgẹn ne wanlan bi ene i wanlan, rẹkpa mhan rẹ lẹn ghe ọkhẹke nin mhan manman muegbe ọbhi otọ yẹ ha babegbe. Sẹyẹ, arẹkhọkhọ ọsi talẹnt da rẹkpa mhan rẹ daghe ebezẹle nọn da khẹke nin mhan manman ha wẹnna kaka.—w24.09, apapale 20-24.

Be ununro ọsi ọne uwa oga nin Solomọn bọn yo sẹ yẹ?

2 Chronicles 3:4 bhi Baibo ebhebhe da yọle ghe uyomhin ọsi ọne ununro dẹ sẹbhi “kiubit 120.” Ọ da ha yi iriọ, ọne ununro ki ha yi, 53-mita (ifiti 175). Ọkpakinọn, Baibo ebhebhe nan zedu ọle da yọle ghe “kiubit 20,” la imita isilin (ifiti 30) ọ yo sẹ. Ranmhude ebi ọne uwa oga nyẹnyẹn sẹ yẹ, ọ diabe ghe, ọne kiubit 20 nan wo gene de mun ebi ọne ununro yo sẹ yẹ.—w24.10, apapale 31.

Be a re ọle ta nin ọria nọn zẹ sikẹ ene ewanlẹn rẹ “ha yi ọria nọn mhọn okhuo ọkpa”? (1 Tim. 3:12)

Ebi a re ọle ta hi, ọle ki ha mhọn okhuo ọkpa sẹsẹ, ọle i da ha gboghẹ. Sẹyẹ, ọle i da ji ẹmhọn okhuo ọbhebhe ha ti ọle bhọ.—w24.11, apapale 19.

Bezẹle nin mhan ha da sabọ yọle ghe ọ i yi emhin nọn khẹke nin ẹbho lu bhi iluemhin ọsi Ebale Emuan Ọsi Ebeanlẹn Mhan Jọni 6:53 ha tẹmhọnlẹn?

Jọni 6:53 da tẹmhọn ebezẹle nọn da khẹke nan le efun nọnsi Jesu yẹ wọn bhi aranlẹn nọnsọle. Ibhokhan Ju ne ha ribhi Galili, nọn khẹke nin ele ha mhọn urẹọbhọ da Jesu ọle ta ọne ọta nan man, bhi ukpe 32 C.E. Ọkpakinọn, ukpe ọkpa gbera fo ọkuẹsẹ Jesu mun iluemhin ọsi Ebale Emuan Ọsi Ebeanlẹn Mhan gbọ bhi Jerusalẹm. Ẹbho ne ha deba ọle gbẹloghe bhi okhun Jesu ha ne talọ bhi ẹghe ọne iluemhin nan.—w24.12, apapale 10-11.