UHỌNMHỌN-ỌTA NỌNZI 16
“Obhio Uwẹ Dẹ Riọkpanọ”!
“Jesu da taman [Mata] ghe: ‘Obhio uwẹ dẹ riọkpanọ.’” —JOHN 11:23.
ILLO 151 Jehova Dẹ Riọ Ene Yulu
EBI MHAN DA LUẸ a
1. Be obhokhan okpea rẹ re urẹọbhọ nin ọle mhọn da ive ọsi ariọkpanọ man yẹ?
OBHOKHAN okpea natiọle Matthew da wo manman ha khọnmhọn rẹ sẹbhọ ghe ọ da khẹke nan lu ọpresiọn kẹkẹ nanlẹn. Ẹghe nin ọle rẹ ha ribhi ikpe ihinlọn, ọle bi azagba-uwa nọnsọle da ko ha ghe JW Broadcasting®. Ọne JW Broadcasting ki khian fo, a da re ividio ọsi illo man. Bhi ọne ividio, ẹbho da ha gbe obokhian nin ẹbho nesele nan riọkpanọ bhi uu. b Ele ki ghe ọle fo, Matthew da bu ene biẹ ọle, mun ele obọ mhọn yẹ yọle: “Aba, inẹn, ibha daghe ọle ghe mẹn ha rẹ yu nian, mẹn dẹ yẹ riọ kpanọ bhi ẹghe odalo? Bha dẹ yẹ miẹn mẹn, ọ dẹ fure.” Ria ẹmhọn ebi ene biẹ ọle ha rẹ ha ghọnghọn yẹ ranmhude ọmọn nọnsele wo mhọn urẹọbhọ nọn ziẹnlẹn da ive ọsi ariọkpanọ.
2-3. Bezẹle nọn da yi emhin nọn mhẹn nin mhan rẹ ha ria eria nyan ive ọsi ariọkpanọ?
2 Bhi ẹghe rẹ sẹ ẹghe, ọ dẹ ha mhẹn nin mhan rebhe rẹ ha re ẹghe ọbhi otọ rẹ ria eria nyan ive ọsi ariọkpanọ bhi Baibo. (John 5:28, 29) Bezẹle? Ranmhude mhan bha lẹn ẹdẹ nọn ha we ewiẹ. Mhan sabọ rẹ wo dọ manman ha khọnmhọn, la ọria nọnsẹmhan sabọ rẹ wo yu. (Eccl. 9:11; Jas. 4:13, 14) Urẹọbhọ nin mhan mhọn da ive ọsi ariọkpanọ ha rẹkpa mhan rẹ ziẹngbe bhi ene idia nan. (1 Thess. 4:13) Baibo ji mhan lẹn ghe, Aba mhan nọn ribhi okhun wo manman lẹn mhan nọnsẹn. Sẹyẹ, ọle wo hoẹmhọn mhan. (Luke 12:7) Ranmhude Jehova wo manman lẹn mhan nọnsẹn, ọle ha riọ mhan kpanọ, mhan ida dikẹ bhi unan ọria nin mhan ka khin, sẹyẹ, mhan dẹ sabọ ye emhin nin mhan ka lẹn re. Ranmhude Jehova manman hoẹmhọn mhan zẹle nin ọle da guanọ nin ọle re ọne isẹhoa nin mhan rẹ nyẹnlẹn bhi ighegheghe. Ọle yẹ zẹ nin ọle ha da riọ mhan kpanọ.
3 Bhi ọne uhọnmhọn-ọta nan, mhan dẹ ka zilo nyan ebe re imhan rẹọbhi ive ọsi ariọkpanọ. Mhan ki yẹ zilo nyan ọta izebhudu nọn ribhi John 11:23 nọn mun ọne uhọnmhọn-ọta nan mhọn nọn yọle: “Obhio uwẹ dẹ riọkpanọ.” Bhi ọkike ọle, mhan ki zilo nyan ebi mhan ha rẹ manman ha ziẹn iruduba nin mhan mhọn da ive ọsi ariọkpanọ yẹ.
EBEZẸLE NIN MHAN DA RẸỌBHI IVE ỌSI ARIỌKPANỌ
4. Ọkuẹsẹ mhan rẹọbhi ive nin ọria ve, be ọkhẹke nin mhan lẹn rẹji ọne ọria nọn ve ọne ive? Re ijiẹmhin man.
4 Ọkuẹsẹ mhan rẹọbhi ive nin ọria ve, mhan dẹ ka fẹghe si ghọn ọne ọria nọn ve ọne ive rẹ lu ọle, sẹyẹ si ọle mhọn ọne ahu nin ọle rẹ mun ọlẹn sẹ. Bha ji mhan fẹ ọne ijiẹmhin nan ghe: Nan mhan yọle efi ọhananbẹ dunmhun uwẹ uwa a. Ọkpakinọn, ọmọẹ ẹ da bu uwẹ re yẹ ve nin uwẹ yọle, ‘Imẹn dẹ rẹkpa uwẹ rẹ kie bun uwa nọnsẹ.’ Ọle bha wo gheghe re ukpunun tale, sokpan ọle muegbe nin ọle rẹ rẹkpa uwẹ. Ahamiẹn ọria nọn manman guẹ ebi a rẹ bun uwa yẹ ọne ọmọẹ ẹ nan khin, sẹyẹ ọle mhọn emhin nan rẹ wẹnna, uwẹ ida zẹwẹ ha mhọn edandan da ive nin ọle ve nin uwẹ. Osẹnobulua nọn ve ive ọsi ariọkpanọ nin uwẹ kii? Ọ be ghọn ọlẹn nin ọle rẹ mun ọne ive sẹ? Sẹyẹ, ọle be mhọn ọne ahu nin ọle rẹ lu ọle?
5-6. Bezẹle nin mhan ha da sabọ yọle ghe, ọ ghọn Jehova rẹ riọ ẹbho ne yu kpanọ?
5 Ọ be gene ghọn Jehova nin ọle re riọ ẹbho ne yu kpanọ bhi uu? A igbo kie ta ọnin! Ọle wo muegbe nin ọle rẹ lu ọle. Ọle da ji ẹbho eso ne gbẹn Baibo gbẹn ive ọsi ariọkpanọ nin ọle da lu bhi ẹghe odalo ọbhi otọ. (Isa. 26:19; Hos. 13:14; Rev. 20:11-13) Jehova ha ve ive, a igbo miẹn ọle bha mun ọlẹn sẹ. (Josh. 23:14) Bhi ọsi ẹmhọanta, ọ wo ghọn Jehova rẹ riọ ẹbho ne yu kpanọ. Bezẹle nin mhan da ta iriọ?
6 Ria ẹmhọn ọta nin Jobu tale. Ọle rẹọbhọ ghe ọle ha yu, ọ dẹ wo ha ghọn Jehova rẹ riọ ọle kpanọ. (Job 14:14, 15.) Ọ wo ghọn Jehova rẹ riọ eguọmhandia nesọle ne yu kpanọ. Jehova wo guanọ nin ele riọ kpanọ dọ ha mhọn egbe nọn daanlẹn, yẹ ha ghọnghọn. Be ki da sunu ji ẹbho ne bunbun ne bha miẹn ọne isẹhoa rẹ luẹ ẹmhọn Jehova ọkuẹsẹ ele yu? Osẹnobulua nọnsẹmhan yẹ wo guanọ nin ọle riọ ele kpanọ. (Acts 24:15) Ọle guanọ nin ọle re ọne isẹhoa nin ele rẹ dọ kiẹn imọẹ ọle, yẹ nyẹnlẹn bhi ọne otọ nan rẹsẹbhi ighegheghe. (John 3:16) Bhi ọsi ẹmhọanta, ọ wo ghọn Jehova rẹ riọ ẹbho ne yu kpanọ bhi uu.
7-8. Be re imhan rẹọbhọ ghe Jehova mhọn ọne ahu nin ọle rẹ riọ ẹbho ne yu kpanọ?
7 Jehova be mhọn ọne ahu nin ọle rẹ riọ ẹbho ne yu kpanọ? Ehe! Ọle hi “Ọnọn Ke Okhun Nẹ.” (Rev. 1:8) Bhiriọ, ọle mhọn ahu nẹ eghian nọn hi ki rẹ khin rẹ dọ sẹbhi uu. (1 Cor. 15:26) Ọnan re izebhudu bi ahu nin mhan. Bha ji mhan fẹ ebe sunu ji obhio mhan nin okhuo natiọle Emma Arnold ghe. Ọle bi azagba-uwa nọnsọle da kuẹlo da ọnọghọ nọn dọnmhẹn urẹọbhọ nọnsele bhi ẹghe nan rẹ khọn okhọn nọnzeva bhi ọne otọ agbọn nan rebhe. Nin ọle rẹ sabọ ko ọmọn okhuo nọnsọle udu re ranmhude ẹbho nin ele hoẹmhọn ọlẹn ne yu bhi ighan ọsi Nazi, ọle da yọle: “Ahamiẹn ẹbho ne yu ida yẹ riọkpanọ, ọ ki rẹman ghe uu ki ziẹn nẹ Osẹnobulua nọnsẹmhan. Ọkpakinọn, ọnan ida sabọ sunu.” Bhi ọsi ẹmhọanta, emhin soso iribhọ nọn mhọn ahu gbera Jehova. Osẹnobulua nọn mhọn ahu nẹ, nọn ka re iẹnlẹn nin mhan dẹ yẹ sabọ kie re iẹnlẹn nin ọria nọn yu.
8 Emhin ọbhebhe nọn re imhan rẹọbhọ ghe Osẹnobulua dẹ sabọ riọ ẹbho ne yu kpanọ hi, Jehova sabọ wo manman ye emhin re. Arẹmiẹn ene ahiẹnhiẹn wo manman bun, ọle mhọn elin nin ọle tie ọdeọde bhi ẹwẹ ele. (Isa. 40:26) Sẹyẹ, ẹbho ne yu ribhi ayere nọnsọle. (Job 14:13; Luke 20:37, 38) Ọ ida nọghọ ọle rẹ ye emhin rebhe re rẹji ẹbho nin ọle da riọ kpanọ, rẹ dọ sẹbhi uwedẹ nin ele rẹ lu emhin, emhin ne sunu ji ele bhi iẹnlẹn, bi emhin nin ele ka lẹn.
9. Be re imhan rẹọbhi ive ọsi ariọkpanọ nin Jehova vele?
9 Mhan dẹ sabọ rẹọbhi ive nin Jehova ve nin ọle rẹ riọ ẹbho ne yu kpanọ bhi ẹghe odalo, ranmhude mhan lẹnmhin ghe ọ ghọn ọlẹn rẹ lu ọle. Sẹyẹ, ọle mhọn ọne ahu nin ọle rẹ lu ọle. Bha ji mhan fẹ emhin ọbhebhe ghe nọn re imhan rẹọbhi ọne ive nan: Jehova ka lu ọle bhi ẹghe nọn gbera. Bhi ẹghe ẹdẹlẹ, ọle da re ahu nin ikpea eso rẹ dọ sẹbhi Jesu rẹ riọ ẹbho kpanọ bhi uu. Bha ji mhan zilo nyan ọkpa bhi ene ariọkpanọ nin Jesu lu nan tẹmhọnlẹn bhi John uhọnmhọnlẹn 11.
ỌMỌẸ JESU DA YU
10. Be sunu bhi ẹghe nin Jesu rẹ ha tẹmhọn Osẹnobulua bhi Jọdan? Be ọle ki lu? (John 11:1-3)
10 Tie John 11:1-3. Re ọkhọle ria ẹmhọn emhin nọn sunu bhi Bẹtani beji ukpe 32 C.E. ha bu ọkpẹnlẹn. Jesu mhọn imọẹ bhi ọne agbaẹbho nan. Ene imọẹ ọle hi, Lazarọs, Meri bi Mata. (Luke 10:38-42) Ọkpakinọn, Lazarọs da ha khọnmhọn. Ọnan da re ibhio ọle ha kpokpo egbe. Bhiriọ ele da je uhọnmhunje bu Jesu nọn ha ribhi Jọdan bhi ọne ẹghe nan. Ọ dẹ re ọria ikpẹdẹ eva rẹ na bhi enin khian sẹbhi Bẹtani. (John 10:40) Ọ ba bhi egbe a ghe, ọkuẹsẹ ene ẹbho nan je ele uhọnmhunje sẹbhi eji Jesu ye, Lazarọs da yu. Arẹmiẹn Jesu lẹnmhin ghe ọmọẹ ọle yu, ọle da sẹyẹ gbe ikpẹdẹ eva bhi eji ọle ha ye ọkuẹsẹ ọle nabhi uwedẹ ha khian Bẹtani. Bhiriọ, ikpẹdẹ enẹn ọ ki ha ye nin Lazarọs yu ọkuẹsẹ Jesu sẹbhi enin. Jesu da ha guanọ nin ọle lu emhin nọn ha re imọẹ ọle ha ghọnghọn yẹ re ogẹn ji Osẹnobulua.—John 11:4, 6, 11, 17.
11. Be ọne okha nan man mhan le rẹji ẹmhọn ọmọẹ?
11 Ọne okha nan man mhan le ebi a re ọmọẹ ọsaje ta. Fẹ ọnan ghe: Beji Meri bi Mata je uhọnmhunje bu Jesu, ele bha taman ọlẹn nin ọle ha vade Bẹtani. Ebi ele gheghe ta hi, ọmọẹ ọle khọnmhọn. (John 11:3) Beji Lazarọs yu, Jesu ha rẹ sabọ na bhi eji ọle ye riọ ọle kpanọ. Sokpan Jesu da diọbhi Bẹtani dọ bu imọẹ ọle nin Meri bi Mata. Uwẹ be mhọn ọmọẹ nọn ha khian bu uwẹ re bhi ẹghe ọkakale aharẹmiẹn uwẹ bha tie ọle? Ọ ha yi riọ, lẹn sẹbhọ ghe uwẹ mhọn ọmọẹ nọn ha sabọ rẹkpa uwẹ bhi “ẹghe ọnọghọ.” (Prov. 17:17) Bọsi Jesu, bha ji mhan ha yi imọẹ ne sẹnian rẹji ẹbho. Bhi eyayenan nian, bha ji mhan fikie diọbhi ọne okha nin mhan daghe ebe ki sunu.
12. Be Jesu taman Mata? Bezẹle nin ọta nin ọle taman ọlẹn ida yi ọta ihoho? (John 11:23-26)
12 Tie John 11:23-26. Mata ki lẹn sẹbhọ ghe Jesu sikẹ Bẹtani, ọle da re ẹjẹje runẹ bu ọle yẹ yọle: “Ebeanlẹn mẹn, sade uwẹ ribhi enan nọn, obhio mẹn irẹ yu.” (John 11:21) Ẹmhọanta nọn ghe sade Jesu ribhi enin nọn, ọle ha rẹ re egbe daan Lazarọs. Jesu da ha mhọn ọlẹn bhi ọkhọle nin ọle bhọ rẹ lu emhin nọn gbera ọnin. Ọle da yọle: “Obhio uwẹ dẹ riọkpanọ.” Ọle da ta emhin ọbhebhe nọn ha re Mata rẹọbhi ọne ive nan. Ọle da yọle: “Imẹn hi ariọkpanọ bi iẹnlẹn.” Bhi ọsi ẹmhọanta, Osẹnobulua re ahu nanlẹn nin ọle rẹ riọ ẹbho ne yu kpanọ. Ọkuẹsẹ ọne ẹghe nan, ọle ka riọ obhokhan ọmanmhẹn kpanọ bhi uu beji ọle wo la yu. Ọle yẹ riọ usẹn okpea kpanọ bhi uu. Asabọmiẹn ukpẹdẹ nin ọle yu tee ọle lu ọnan. (Luke 7:11-15; 8:49-55) Ọkpakinọn, ọle dẹ be sabọ riọ ọria nọn ki gbe ikpẹdẹ enen bhi idin nin egbe nọnsọle ki munhẹn ha wea?
“LAZARỌS, DAGBARE!”
Jesu da wo manman mhọn ẹkẹ-ẹjẹjẹ da imọẹ ọle ne lu akhiẹ (Fẹ uduọle nọnzi 13 bi 14 ghe)
13. Beji a rẹman bhi John 11:32-35, be Jesu lu yẹ beji ọle daghe Meri bi ẹbho nekẹle viẹ? (Yẹ fẹ ifoto ghe.)
13 Tie John 11:32-35. Re ọkhọle muno emhin nọn kie sunu. Meri nin obhio Lazarọs da dagbare bu Jesu. Ọle da gbo ta ọta nin obhio ọle ka ta. Ọle da yọle: “Ebeanlẹn mẹn, sade uwẹ ribhi enan nọn, obhio mẹn irẹ yu.” Ọle bi ẹbho nekẹle da wo manman ha lu akhiẹ. Ọ da wo manman ba Jesu bhi egbe beji ọle daghe ele viẹ. Jesu ki daghe uwedẹ nin ele rẹ wo ha viẹ, egbe bha yẹ ji ọle ziẹn, bhiriọ ọle da gbe eviẹ a. Ọle muegbe nin ọle rẹ lu emhin nọn ha re ele zobọ bhọ rẹ ha viẹ. Jesu lẹn ebi ọ rẹ ba bhi egbe yẹ sade ọria nọnsẹmhan yu.
14. Be uwedẹ nin Jesu rẹ lu emhin beji ọle daghe Meri viẹ man mhan le rẹji Jehova?
14 Uwedẹ nin Jesu rẹ lu emhin beji ọle daghe Meri viẹ rẹkpa mhan rẹ lẹn ghe Jehova manman mhọn ẹkẹ-ẹjẹjẹ. Bezẹle nin mhan da ta iriọ? Beji mhan ka luẹ bhi uhọnmhọn-ọta nọn gbera, Jesu re egbe khọkhọ Aba ọle bhi uwedẹ nin ọle rẹ ria eria, bi bhi ebi emhin dia ọle yẹ bhi egbe. (John 12:45) Eviẹ nin Jesu ha viẹ beji ọle daghe imọẹ ọle lu akhiẹ rẹkpa mhan rẹ lẹn ghe, ọ manman ba Jehova bhi egbe sade ọle daghe mhan lu akhiẹ ranmhude ọria nọnsẹmhan nọn yu. (Ps. 56:8) Ọnan ibe re uwẹ guanọ nin uwẹ sikẹ Aba mhan nọn mhọn ẹkẹ-ẹjẹjẹ?
Jesu da rẹman ghe ọle dẹ sabọ riọ ẹbho ne yu kpanọ (Fẹ uduọle nọnzi 15 bi 16 ghe)
15. Beji a tẹmhọnlẹn bhi John 11:41-44, be sunu bhi eji a da re Lazarọs tọ? (Yẹ fẹ ifoto ghe.)
15 Tie John 11:41-44. Jesu ki vae bhi eji a da re Lazarọs tọ, ọle da taman ene ẹbho nin ele wenẹ ọne udo nan rẹ gue ọne idin kie. Mata bha ka, ọle da yọle ghe ọ ki dẹ ha ya. Jesu ki da taman ọlẹn yọle: “Mẹn bha be taman uwẹ ghe uwẹ ha mhọn urẹọbhọ, uwẹ ki daghe uyi nọnsi Osẹnobulua?” (John 11:39, 40) Jesu ki da khua ẹlo okhun yẹ nan eronmhọn bhi isira ọrebhe. Ọle da ha ho nin ọrebhe lẹn ghe Jehova ki mhọn obọ bhi emhin nọn ki da sunu. Ọle ki nan erọnmhọn fo, ọle da reso yọle: “Lazarọs, dagbare!” Lazarọs da gene khian dagbare bhi ẹkẹ ọne idin. Jesu da lu emhin nin ẹbho eso rẹ ha riale ghe ọ ida sabọ sunu.—Fẹ study note nọn ribhi John 11:17 ghe bhi Baibo bhi urolo ebo.
16. Be okha nọn ribhi John uhọnmhọnlẹn 11 rẹ manman ziẹn urẹọbhọ nin mhan mhọn da ive ọsi ariọkpanọ yẹ?
16 Okha nọn ribhi John uhọnmhọnlẹn 11 ziẹn urẹọbhọ nin mhan mhọn da ive ọsi ariọkpanọ. Be ọ rẹ yi iriọ yẹ? Ye ebi Jesu taman Mata re. Ọle da yọle: “Obhio uwẹ dẹ riọkpanọ.” (John 11:23) Bọsi Aba ọle, ọ ghọn Jesu, sẹyẹ ọle mhọn ọne ahu nin ọle rẹ mun ọne ive nan sẹ. Eviẹ nin Jesu viẹ rẹman ghe, ọ ghọn ọlẹn nin ọle rẹ re ọkpẹnlẹn ọbhi uu bi ọbalọ nọn sire. Ẹghe nin Lazarọs ki rẹ riọkpanọ bhi idin, ọ da wo kie gene rẹman ghe, Jesu mhọn ọne ahu nin ọle rẹ riọ ẹbho ne yu kpanọ bhi idin. Sẹyẹ, ria ẹmhọn emhin nin Jesu ye Mata le re. Ọle da yọle: “Mẹn bha be taman uwẹ ghe uwẹ ha mhọn urẹọbhọ, uwẹ ki daghe uyi nọnsi Osẹnobulua?” (John 11:40) Mhan wo mhọn emhin esili ne bunbun ne re imhan rẹọbhọ ghe, ive ọsi ariọkpanọ nin Jehova vele dẹ gene munsẹ. Ọkpakinọn, be imhan ha rẹ manman ziẹn ọne urẹọbhọ nin mhan mhọn da ive ọsi ariọkpanọ yẹ?
EBI MHAN HA RẸ MANMAN HA ZIẸN IRUDUBA NIN MHAN MHỌN DA IVE ỌSI ARIỌKPANỌ YẸ
17. Be ọkhẹke nin mhan ha mhọn bhi ọkhọle sade mhan luẹ ẹmhọn ariọkpanọ ne ribhi Baibo?
17 Ha tie ẹmhọn ariọkpanọ ne sunu bhi ẹghe nọn gbera yẹ ria eria nyan ele. Itue elẹnlẹn nan riọ kpanọ a tẹmhọnlẹn bhi Baibo. c Ọ dẹ ha mhẹn sade uwẹ re ẹghe ọbhi otọ rẹ luẹ ẹmhọn ọdeọde bhi ene ariọkpanọ nan. Beji uwẹ ha rẹ ha lu iriọ, ha yere ghe eria bii mhan ene ẹbho nan khin. Guanọ emhin nin uwẹ ha sabọ miẹn luẹ bhọ. Ria eria nyan ebi ọdeọde bhi ẹwẹ ele rẹ re ahu nọnsi Osẹnobulua man yẹ, bi ebi ọ rẹ ghọn ọlẹn rẹ riọ ẹbho ne yu kpanọ. Ọnọn ke okhun nẹ hi, nin uwẹ rẹ dọ luẹ ẹmhọn ariọkpanọ ọsi Jesu. Yere ghe ẹlo ọsi ẹbho ne bunbun sẹbhi ọne ariọkpanọ nan. Ọne ariọkpanọ nan manman wo ziẹn iruduba nin mhan mhọn da ive ọsi ariọkpanọ.—1 Cor. 15:3-6, 20-22.
18. Be uwẹ ha rẹ sabọ ha noo illo nesẹmhan nọnsẹn yẹ ne tẹmhọn ive ọsi ariọkpanọ? (Yẹ fẹ ebi a gbẹn ọbhi otọle ghe.)
18 Ha so illo ne tẹmhọn iruduba ọsi ariọkpanọ, ha kaehọ ele yẹ ria eria nyan ele. d (Eph. 5:19) Ene illo nan dẹ rẹkpa mhan rẹ manman ziẹn urẹọbhọ nin mhan mhọn da ive ọsi ariọkpanọ. Bha ha kaehọ ele, bha ha luẹ ele, ibha ha yẹ ha zilo nyan emhin kpataki nin bha miẹn luẹ bhọ bhi oga azagba-uwa nọnsẹbha. Lẹn ene illo ọbhi uhọnmhọn, uwẹ ha yẹ ha ria ẹmhọn ele, beji ele ha da sabọ ziẹn urẹọbhọ nọnsẹ, yẹ rẹso uwẹ bhi ọkhọle. Bhiriọ, uwẹ ha ki kuẹlo da ọnọghọ, la ọria nọnsẹ yu, ẹlinmhin nọnsi Jehova ki rẹkpa uwẹ rẹ ye ene illo re beji ele ha da re ahu bi ikoudure nin uwẹ.
19. Emhin eso nela rẹji ariọkpanọ mhan ha sabọ ha re ọkhọle muno? (Fẹ ọne ẹkpẹti ghe nọn yọle, “ Inọnta Nela Uwẹ Ha Nọọn Ele Le?”)
19 Ha re ọkhọle muno emhin ne da sunu. Jehova man mhan bhi uwedẹ nin mhan ha rẹ sabọ ha re ọkhọle muno ebi agbọn ọsọgbọn ha diayẹ. Obhio mhan nin okhuo da yọle: “Mẹn sẹ wo re ẹghe ọbhi otọ rẹ re ọkhọle ha muno ebi agbọn ọsọgbọn ha diayẹ rẹsẹbhọ ghe, inian ọ ki diabe mẹn sabọ re ihue mun uyamhin ọsi ene aroro.” Ha re ọkhọle muno ọlẹn ghe uwẹ miẹn ikpea bi ikhuo ne re urẹọbhọ man nan tẹmhọnlẹn bhi Baibo. Ọria nela bhi ẹwẹ ele uwẹ guanọ nin uwẹ miẹn? Inọnta nela uwẹ guanọ nin uwẹ nọọn ọne ọria le? Re ọkhọle ha muno ọlẹn ghe, uwẹ bi ẹbho nesẹ ne yu kie ko nyẹnlẹn beji a riọ ele kpanọ. Ria ẹmhọn ebi ọne ukpẹdẹ nin ha diayẹ, ọta nin uwẹ ha ka taman ele, ebi uwẹ ha rẹ dede ele yẹ, bi eghọnghọn nin uwẹ da ha ye.
20. Be ọkhẹke nin mhan muegbe rẹ lu?
20 Ive ọsi ariọkpanọ nin Jehova ve nin mhan manman wo ti mhan bhọ. Mhan lẹn sẹbhọ ghe Jehova dẹ mun ọne ive nan sẹ ranmhude ọ ghọn ọlẹn rẹ lu ọle. Sẹyẹ ọle mun ọne ahu nin ọle rẹ lu ọle. Bha wo ji mhan muegbe rẹ ha ziẹn urẹọbhọ nin mhan mhọn da ọne ive nan. Mhan ha lu iriọ, mhan ki manman sikẹ Osẹnobulua nọnsẹmhan nọn ve nin ọdeọde bhi ẹwẹ mhan yọle: ‘Eria nesẹ dẹ riọkpanọ!’
ILLO 147 Ive ọsi Aribhọ ọsi Ẹdẹdẹmhẹndẹ
a Ahamiẹn ọria nọnsẹ sẹ ka yu khẹ, edandan iribhọ ghe ive ọsi ariọkpanọ dẹ manman re ikoudure nin uwẹ. Ọkpakinọn, be uwẹ ha rẹ gbotọle fanọn an man ẹbho yẹ ebezẹle nin uwẹ da rẹọbhi ive ọsi ariọkpanọ? Be uwẹ ha rẹ manman ziẹn ọne iruduba nin uwẹ mhọn da ọne ive ọsi ariọkpanọ yẹ? Ọne uhọnmhọn-ọta nan dẹ rẹkpa mhan rebhe rẹ ziẹn uruduba nin mhan mhọn da ọne ive nan.
b Uhọnmhọn-ọta ọsi ọne illo hi, Ọ Dẹ Kẹ Lu Ọle Nin Mhan. Broadcast ọsi Novẹmba 2016 a da re ọle man.
c Fẹ ọne ẹkpẹti ghe nọn yọle “Eight Resurrections Described in the Bible” bhi Watchtower ọsi Ọgọst 1, 2015, apapale 4.
d Fẹ ene illo nan ghe bhi “Re Eghọnghọn So Illo” ji Jehova: “Riale Ebi Agbọn Ọsọgbọn Ha Diayẹ” (Illo 139), “Mun Ọkhọle Bhi Ene Ive Nan” (Illo 144), bi “Jehova Dẹ Riọ Ene Yulu” (Illo 151). Yẹ fẹ ene illo ikẹ nan ghe bhi jw.org “Ọ Dẹ Kẹ Lu Ọle Nin Mhan,” “The New World to Come,” bi “You Will See.”
