UHỌNMHỌN-ỌTA NỌNZI 14
ILLO 56 Tobuwẹ Zẹ Nin Uwẹ Rẹ Ga Osẹ
“Ha Lu Re Alo”
“Bha ji mhan ha lu re alo.”—HIB. 6:1.
EBI A HA LUẸ BHỌ
Mhan dẹ daghe ebi Kristiẹn nọn deziẹn bhi oga rẹ ria eria yẹ, bi ebi ọle rẹ lu emhin yẹ bhi uwedẹ nin Osẹnobulua guanọ. Mhan ki yẹ daghe ebi ọle rẹ zẹ emhin nọn gbale yẹ.
1. Be Jehova guanọ bhi obọ mhan?
EMHIN ọkpa nọn manman re okhuo bi ọdọ ghọnghọn hi, sade ele dọ ha mhọn ọmọn. Arẹmiẹn ene biẹ ọmọn wo manman hoẹmhọn ọmọn nọnsele nan la biẹ, ele bha ho nọn wo ha yi ọmọn-obọ khian. Bhi ọsi ẹmhọanta, ele dẹ wo manman ha kpokpo egbe sade ọle bha wanre. Iriọ yẹ nọn, ọ wo re Jehova ghọnghọn sade mhan dọnmhegbe dọ kiẹn edibo nesi Jesu. Ọkpakinọn ọle bha guanọ nin mhan wo ha ribhi eji ọkpa. (1 Kọr. 3:1) Sokpan, ọle guanọ nin mhan kiẹn Kristiẹn ne “ria eria bii ọwanlẹn.”—1 Kọr. 14:20.
2. Be imhan ha zilo nyan bhi ọne uhọnmhọn-ọta nan?
2 Be a re ọle ta nin ọria rẹ dọ kiẹn Kristiẹn nọn deziẹn bhi oga? Be imhan ha lu beji mhan ha da sabọ dọ kiẹn Kristiẹn nọn deziẹn bhi oga? Be ene ẹmhọanta ne dinmhin ne ribhi Baibo rẹ rẹkpa mhan yẹ rẹ dọ kiẹn Kristiẹn nọn deziẹn? Bezẹle nọn bha da khẹke nin mhan ha riale ghe mhan deziẹn fo, ghe ọ bha khẹke nin mhan yẹ ha wẹnna bhọ rẹ ha ziẹn ikolu nin mhan bi Jehova ko mhọn? Mhan dẹ re ewanniẹn ọbhi ene inọnta nan bhi ọne uhọnmhọn-ọta nan.
BE A RE ỌLE TA NIN ỌRIA RẸ DỌ KIẸN KRISTIẸN NỌN DEZIẸN BHI OGA?
3. Be a re ọle ta nin ọria rẹ dọ kiẹn Kristiẹn nọn deziẹn bhi oga?
3 Ọne ukpọta Grik nan zedu ọle diọbhi “ọwanlẹn” bhi Baibo, a dẹ yẹ sabọ rẹ ọle tẹmhọn ọria nọn manman deziẹn bhi uwedẹ nin ọle rẹ re ikpẹ ne khẹke Kristiẹn man. (Ẹfẹ. 4:13) Beji ọmọn rẹ fẹkẹ wanre ọkuẹsẹ ọle dọ kiẹn ọwanlẹn, iriọ ọ yẹ rẹ khẹke nin mhan rẹ ha ziẹn ikolu nin mhan bi Jehova ko mhọnlẹn nin mhan rẹ sabọ dọ kiẹn Kristiẹn nọn deziẹn. Aharẹmiẹn mhan sabọ dọ kiẹn Kristiẹn nọn deziẹn, ọ bha khẹke nin mhan zobọ bhọ rẹ ha lu re alo. (1 Tim. 4:15) Imhan rebhe rẹ dọ sẹbhi ene ibhokhan dẹ sabọ dọ kiẹn Kristiẹn ne deziẹn. Be imhan ha rẹ sabọ lẹn Kristiẹn nọn deziẹn yẹ?
4. Be a rẹ lẹn ọria nọn deziẹn bhi oga yẹ?
4 Ọria nọn lu emhin rebhe nin Osẹnobulua guanọ, ọle hi Kristiẹn nọn deziẹn. Ọria nọn sẹ inian i dọ ha zẹ ọnọn ọle ha re obọ rẹkhan bhi uhi nesi Osẹnobulua. Bhi ọsi ẹmhọanta, ranmhude ọ bha gba nanlẹn, ọle dobọ ẹgheso. Ọrẹyiriọ, ọle re emhin nin ọle lu ukpẹdẹ-ukpẹdẹ rẹ rẹman ghe ọle ria eria nọnsẹn, yẹ lu emhin bhi uwedẹ nin Osẹnobulua guanọ. Ọria nọn sẹ inian ki mun akpa ọsọgbọn yọ, yẹ dọnmhegbe rẹ ha ria eria ẹghe-ẹghe beji Jehova rẹ ria eria. (Ẹfẹ. 4:22-24) Ọle man egbe ọle emhin beji ọle ha da sabọ ha re uhi nesi Jehova, bi adia ne ribhi Baibo rẹ zẹ emhin ne mhẹn rẹ lu. Bhiriọ, ọle i dọ ha guanọ nan ne uhi kẹkẹ ọbhi otọ nanlẹn ọkuẹsẹ ọle lẹn ebi ọle ha lu. Ahamiẹn ọle zẹ emhin nin ọle ho nin ọle lu, ọle dọnmhegbe kaka rẹ lu ọle.—1 Kọr. 9:26, 27.
5. Be bhọ ha sabọ sunu ji Kristiẹn nọn bha deziẹn bhi oga? (Ẹfẹsọs 4:14, 15)
5 Bhi obọ nọnkẹle, ọ i zẹwẹ nọghọ eria eku, la eria nin uwedẹ nọnsele bha dia rẹ hiẹ Kristiẹn nọn bha deziẹn bhi oga. Kristiẹn nọn sẹ inian sabọ rẹ dọ ha rẹọbhi ọta ohoghe nan wewe bhi niuz bi intanẹt, sẹyẹ ẹbho ne de sibhi oga re sabọ rẹ hiẹ ọle. a (Tie Ẹfẹsọs 4:14, 15.) Ọria nọn sẹ inian sabọ rẹ wo ha mhọn ikhu, ha si ozughu, kẹ ha miẹn ohu yẹ de fiọbhi edọnmhẹn.—1 Kọr. 3:3.
6. Be imhan ha rẹ sabọ khọkhọ uwedẹ nin Kristiẹn rẹ fẹkẹ lu re alo rẹ dọ kiẹn Kristiẹn nọn deziẹn? (Yẹ fẹ ifoto ghe.)
6 Beji mhan ka tẹmhọnlẹn, Baibo re uwedẹ nin ọria rẹ lu re alo dọ kiẹn Kristiẹn nọn deziẹn rẹ khọkhọ uwedẹ nin obhokhan rẹ wanre dọ kiẹn ọwanlẹn. Obhokhan khere bha lẹn eji a ye, bhiriọ ọkhẹke nin ọwanlẹn ha dia ọle yẹ gbega ọle. Nan rẹ re ijiẹmhin ọbhọ, inẹn sabọ rẹ taman ọmọn nọnsọle nin ọle mun ọle obọ mhọn beji ele rẹ fan ukhuo ra. Ọkpakinọn, beji ọne ọmọn rẹ wanre, ọne inẹn sabọ rẹ re otọ nanlẹn rẹ tobọle ha fan ukhuo ra, ọrẹyiriọ, ọle ki ye ọle re nin ọle fẹ ukhuo ghe nọnsẹn ọkuẹsẹ ọle lu iriọ. Ọne ọmọn ha ki wanre, ọ i yi ọria ha yẹ ha taman ọlẹn ebi ọkhẹke nin ọle lu ọkuẹsẹ ọle fan ukhuo ra. Beji ọ rẹ khẹke nin ọwanlẹn rẹkpa obhokhan beji a ha da miẹn ọle bha de ọbhi okhẹnan, iriọ Kristiẹn ne bha sẹ deziẹn rẹ wo guanọ urẹkpa ọsi Kristiẹn ne deziẹn beji a ha da miẹn ele bha dọ lu emhin nọn ha riia ikolu nin ele bi Jehova ko mhọnlẹn an, bi beji ele ha da sabọ zẹ emhin nọn mhẹn rẹ lu. Ọkpakinọn, ahamiẹn Kristiẹn nọn deziẹn ho nin ọle zẹ emhin nin ọle ha lu, ọle ki dọ fẹ adia ne ribhi Baibo ghe nin ọle rẹ lẹn ebi Jehova ghe ọne ẹmhọn yẹ. Ẹghenin ọle ki re ebi ọle gua otọle rẹ zẹ emhin nin ọle ha lu.
Ọkhẹke nin Kristiẹn ne bha deziẹn luẹ ebi a rẹ re obọ rẹkhan adia ne ribhi Baibo yẹ, beji ele ha da sabọ ha zẹ emhin nọn mhẹn rẹ lu (Fẹ uduọle nọnzi 6 ghe)
7. Kristiẹn ne deziẹn bhi oga be guanọ urẹkpa ọsi ẹbho ebhebhe?
7 Ọnan ki be rẹman ghe Kristiẹn ne deziẹn bhi oga i zẹwẹ guanọ urẹkpa bhi obọ ọria soso? Eye. Kristiẹn ne deziẹn bhi oga yẹ wo guanọ urẹkpa ẹgheso. Ọkpakinọn, ọria nọn bha sẹ deziẹn ki ha guanọ nin ẹbho taman ọlẹn ebi ọle ha lu, la nin ele nanlẹn zẹ emhin nọn khẹke nin ọle tobọle zẹ. Bhi obọ nọnkẹle, Kristiẹn nọn deziẹn bhi oga ki noo ẹwanlẹn bi adia nin ọle miẹn bhi obọ ọria ne lẹn emhin nẹ ọle rẹ tobọle zẹ emhin nin ọle ha lu, ranmhude ọle lẹn ghe Jehova guanọ nin ọle “tobọle mun ihẹ nọnsọle.”—Gal. 6:5.
8. Uwedẹ nela Kristiẹn ne deziẹn bhi oga rẹ dikikẹ?
8 Beji eria ne wanre rebhe i rẹ ko mhọn egbe ọkpa, iriọ Kristiẹn rebhe ne deziẹn i rẹ ko mhọn ikpẹ ọkpa. Bhi ọsi ijiẹmhin, eso sabọ rẹ manman ha wanlan, eso sabọ rẹ manman ha mhọn izebhudu, eso sabọ rẹ manman ha zẹ emhin bhi obọ, sẹyẹ eso ebhebhe sabọ rẹ manman ha mhọn ẹkẹ-ẹjẹjẹ. Rẹ deba ọnin, ahamiẹn Kristiẹn eva ne deziẹn bhi oga ko ribhi idia ọkpa, ele sabọ rẹ zẹ emhin kẹkẹ rẹ lu, ọkpakinọn, emhin nin ele zẹ rẹ lu ki sẹyẹ diẹn mun adia ne ribhi Baibo. Ọnan kẹ wo sunu sade Kristiẹn zẹ bhi ẹmhọn nin ọle ha da tobọle re ọkhọle-umueria nọnsọle zẹ. Nin ele rẹ lẹn ọnan, ele i dọ ha re unun riia egbe a ranmhude emhin nin ele zẹ dikikẹ. Okugbe nọn ribhi ẹwẹ mhan hi emhin nọn manman rẹtẹ ele.—Rom 14:10; 1 Kọr. 1:10.
BE ỌKHẸKE NIN MHAN LU RẸ SABỌ DỌ KIẸN KRISTIẸN NỌN DEZIẸN?
9. Ọ be wo re osukpa sunu nin ọria rẹ dọ kiẹn Kristiẹn nọn deziẹn? Re otọle man.
9 Beji ẹghe ha rẹ ha gbera, obhokhan ki dọ wanre kiẹn ọwanlẹn, ọkpakinọn, ọ i wo re inian sunu nin ọria rẹ dọ kiẹn Kristiẹn nọn deziẹn bhi oga. Bhi ọsi ijiẹmhin, ibhio mhan nin ikpea bi ikhuo ne ha ribhi agbotu nọn ribhi Kọrint miẹn ọne ọta nọn mhẹn ọbhi egbe, ele da mianmẹn, ele da miẹn elinmhin nọn khiale yẹ manman luẹ emhin bhi emhin nin Pọl nin odibo ha man ele le. (Iwẹnna 18:8-11) Ikpe ne bunbun rẹ gbera beji ele mianmẹn fo, ene bunbun bhi ẹwẹ ele bha sẹyẹ deziẹn bhi oga. (1 Kọr. 3:2) Be mhan ha lu beji a da miẹn ghe emhin nọn sẹ inian bha sunu ji mhan?
10. Be imhan ha lu beji mhan ha da sabọ dọ kiẹn Kristiẹn ne deziẹn bhi oga? (Jud 20)
10 Emhin ọhẹnhẹn nọn khẹke nin mhan lu rẹ sabọ kiẹn Kristiẹn nọn deziẹn hi, nin mhan rẹ ji ọ ha hu mhan bhi udu rẹ ha lu re alo. Ẹghe i ribhọ nin ẹbho ne “hoẹmhọn emhin nin ẹwanlẹn iye,” ne bha ho nin ele lu re alo ha rẹ sabọ kiẹn Kristiẹn nọn deziẹn. (Prov. 1:22) Mhan bha ho nin mhan diabe eria ne wanre ne sẹyẹ ho nin ene biẹ ele ha taman ele ebi ele ha lu. Ọkpakinọn, mhan ho nin mhan tobọmhan ha zẹ ebi mhan ha lu, yẹ dọnmhegbe ha ziẹn ikolu nin mhan bi Jehova ko mhọn. (Tie Jud 20.) Ahamiẹn uwẹ sẹyẹ dọnmhegbe nin uwẹ rẹ kiẹn Kristiẹn nọn deziẹn, bhii Jehova nin ọle re ọne “ọhubhudu bi ahu nin [uwẹ] rẹ ha lu ọle.”—Fil. 2:13.
11. Emhin nela Jehova ne nin mhan ne ha rẹkpa mhan rẹ sabọ dọ kiẹn Kristiẹn ne deziẹn? (Ẹfẹsọs 4:11-13)
11 Jehova bha yọle nin mhan tobọmhan lu ọle rẹ dọ kiẹn Kristiẹn nọn deziẹn. Ọle noo ene ewanlẹn ne sun mhan, ne yẹ man mhan emhin bhi agbotu rẹ rẹkpa mhan rẹ sabọ dọ kiẹn Kristiẹn ne deziẹn bhi oga. Ele rẹkpa mhan rẹ sabọ “dọ kiẹn okpea-ọba, nọn wo gba nan fo bhi uwedẹ rebhe, beji ọ rẹ gba nin Kristi.” (Tie Ẹfẹsọs 4:11-13.) Jehova yẹ wo re ẹlinmhin nọn khiale nọnsọle nin mhan beji mhan ha da sabọ “lẹn uwedẹ nin Kristi rẹ ria eria.” (1 Kọr. 2:14-16) Rẹ deba ọnan, Osẹnobulua da je nan gbẹn ebe ọsi Matiu, Mak, Luk bi Jọni beji mhan ha da sabọ lẹn uwedẹ nin Jesu rẹ ha ria eria, uwedẹ nin ọle rẹ ha talọ, bi uwedẹ nin ọle rẹ ha lu emhin bhi ẹghe nin ọle rẹ ha lu iwẹnna oga bhi ọne otọ nan. Uwẹ da ha re egbe khọkhọ Jesu bhi uwedẹ nin ọle rẹ ria eria bi uwedẹ nin ọle rẹ lu emhin, uwẹ ki sabọ dọ kiẹn Kristiẹn nọn deziẹn.
EBI IMAN-EMHIN NE DINMHIN NE RIBHI BAIBO RẸ RẸKPA MHAN YẸ
12. Be bhọ hi “ene emhin ọhẹnhẹn nọn khẹke nin mhan luẹ rẹji Kristi”?
12 Nin mhan rẹ sabọ dọ kiẹn Kristiẹn nọn deziẹn bhi oga, ọ i yi ene iman-emhin ọhẹnhẹn rẹji Kristi ọkpa ọkhẹke nin mhan lẹn, ne yi ene ikuẹ-kuẹ iman-emhin ne ribhi Baibo. Eso bhi ene ikuẹ-kuẹ iman-emhin hi, urẹọbhọ, imianmẹn, ariọkpanọ bi ẹmhọn ufidenọ. (Hib. 6:1, 2) Eso bhi iman-emhin nin Kristiẹn rẹọ i khọnan. Ọnan zẹle nin Pita nin odibo da tẹmhọn ele beji ọle ha tẹmhọn Osẹnobulua bhi ẹghe iluemhin ọsi Pẹnticọst. (Iwẹnna 2:32-35, 38) Ọkhẹke nin mhan rẹọbhi ene iman-emhin nan beji mhan ha da sabọ dọ kiẹn edibo nesi Jesu. Pọl nin odibo da yọle ghe, ahamiẹn ọria bha rẹọbhi ẹmhọn ariọkpanọ, ọle i da sabọ yọle ghe odibo nọnsi Jesu ọle khin. (1 Kọr. 15:12-14) Ọkpakinọn, ọkhẹke nin mhan luẹ gbera ene ikuẹ-kuẹ iman-emhin nan ne ribhi Baibo.
13. Be ọkhẹke nin mhan lu nin mhan rẹ sabọ miẹn elele bhi ene ebale oriọn ne zeze nan tẹmhọnlẹn bhi Hibru 5:14? (Yẹ fẹ ifoto ghe.)
13 Ene ikuẹ-kuẹ iman-emhin nan wo dikẹ bhi ebale oriọn ne zeze ne ribhi Baibo. Ọ i yi uhi nesi Jehova ọkpa ene ebale oriọn ne zeze tẹmhọnlẹn, sokpan ọ yẹ tẹmhọn ene adia kẹkẹ ne ribhọ, ne rẹkpa mhan rẹ sabọ lẹn otọ ebi Jehova rẹ ria eria. Nin mhan rẹ sabọ miẹn elele bhi ene ebale oriọn ne zeze nan, ọkhẹke nin mhan manman ha luẹ Ọta nọnsi Osẹnobulua, ha ria eria nyan ọlẹn, yẹ dọnmhegbe ha re obọ rẹkhan ebi mhan luẹ. Mhan ha lu iriọ, mhan ki sabọ guẹ rẹ ha zẹ emhin ne ti Jehova bhọ. b—Tie Hibru 5:14.
Ebale oriọn ne zeze ne ribhi Baibo rẹkpa mhan rẹ ha zẹ emhin ne ti Jehova bhọ (Fẹ uduọle nọnzi 13 ghe) c
14. Be Pọl rẹ rẹkpa Kristiẹn ne ribhi Kọrint rẹ sabọ dọ ha yi Kristiẹn ne deziẹn yẹ?
14 Ọ i lẹkhẹ nin Kristiẹn ne bha deziẹn bhi oga rẹ sabọ zẹ emhin nọn gbale rẹ lu sade ele ribhi idia nin Baibo bha da wo tẹmhọn ebi ele ha lu yẹ tee. Ahamiẹn uhi soso i ribhi Baibo nọn tẹmhọn ebi ele ha lu, eso ki ha riale ghe, ele dẹ sabọ lu ebe ghọn ele. Eso ki ha ho nan re uhi nin ele bhi ẹmhọn nọn bha da khẹke nan re uhi ọbhi otọ. Bhi ọsi ijiẹmhin, ọ diabe ghe Kristiẹn eso bhi Kọrint da ha taman Pọl nin ọle re uhi ọbhi otọ nin ele rẹji ebi ele ha lu yẹ bhi ẹmhọn ebale nan rẹ ze ji ẹbọ. Pọl bha taman ele ebi ele ha lu. Sokpan, ọle da ji ọdeọde bhi ẹwẹ ele lẹn ghe, ele mhọn ‘ọne ahu rẹ tobele zẹ ebe ghọn ele.’ Ọnin hi, nin ele rẹ tobele re ọkhọle-umueria nọnsele rẹ zẹ ebi ele ha lu. Ọle da sounun bhi adia eso bhi Baibo nọn ha sabọ rẹkpa ele rẹ zẹ emhin nọn mhẹn rẹ lu, beji a ha da miẹn ọkhọle nọnsele bha dọ ha gbe ele asan, yẹ dua ẹbho ebhebhe oẹ. (1 Kọr. 8:4, 7-9) Pọl da re ọne uwedẹ nan rẹ ha rẹkpa ibhokhan Kọrint rẹ sabọ wanre bhi uwede oriọn, beji ele ha da sabọ ha noo ẹwanlẹn nọnsele rẹ ria eria sade ele ho nin ele zẹ ebi ele ha lu, ọ i yi nin ele rẹ ha khẹ nin ọria taman ele ebi ele ha lu, la ha guanọ nan gbe uhi nin ele.
15. Be Pọl rẹ rẹkpa ibhokhan Hibru yẹ rẹ sabọ ha lu re alo?
15 Mhan yẹ wo miẹn emhin kpataki ọbhebhe luẹ bhi ẹmhọn nin Pọl gbẹn ji ibhokhan Hibru. Eso bhi ẹwẹ ele bha yẹ ha zien ikolu nin ele bi Jehova ko mhọnlẹn. Bhi ọsi ẹmhọanta, ele da “fikie dọ ha wọn amẹn-inyẹn, ọ iyi ebale [oriọn] nọn zeze.” (Hib. 5:12) Ele bha ka luẹ ẹmhọanta ọgbọn nin Jehova ha noo agbotu rẹ man ele le, sẹyẹ ele bha ka miẹn ene iman-emhin ọbhi egbe. (Prov. 4:18) Bhi ọsi ijiẹmhin, ibhokhan Ju ne bunbun da ha yọle ghe, ọ sẹyẹ khẹke nan ha re obọ rẹkhan uhi nin Jehova na obọ Mozis gbe, arẹmiẹn ọ gbera ikpe 30 nin izọese nọnsi Jesu re ọkpẹnlẹn ọbhi ọne uhi. (Rom 10:4; Taitọs 1:10) Ene ikpe 30 ne gbera rẹ wo sẹ nin ene Kristiẹn rẹ lẹn ghe ọ bha yẹ khẹke nin ele ha re obọ rẹkhan ene uhi nin Jehova na obọ Mozis gbe. Bhiriọ, Pọl da ha rẹkpa ele rẹ sabọ miẹn ẹmhọanta ne dinmhin nin ọle ha man ele ọbhi egbe. Ilẹta nin Pọl gbẹn ji ele da rẹkpa ele rẹ lẹn ghe, uwedẹ ọgbọn nin Jehova re ọbhi otọ nan rẹ ha ga ọle rẹ na bhi obọ izọese nọnsi Jesu mhẹn gbera ọne ele rẹ ka ha ga khẹ. Ọnan da wo re izebhudu nin ele rẹ yẹ wo ha tẹmhọn Osẹnobulua arẹmiẹn ibhokhan Ju kpokpo ele.—Hib. 10:19-23.
EBEZẸLE NỌN BHA DA KHẸKE NIN MHAN HA RIALE GHE MHAN DEZIẸN FO
16. Emhin ọbhebhe nela ọkhẹke nin mhan lu rẹ gbera nin mhan rẹ lu rẹ alo dọ kiẹn Kristiẹn nọn deziẹn?
16 Ọ i yi nin mhan rẹ dọ kiẹn Kristiẹn ne deziẹn bhi oga ọkpa ọkhẹke nin mhan dọnmhegbe rẹ lu, sẹyẹ, ọkhẹke nin mhan dọnmhegbe rẹ wo ha ribhi iriọ. Nin mhan rẹ sabọ lu ọnan, ọkhẹke nin mhan rẹban ọne iria-eria ghe mhan deziẹn fo, ghe ọ bha yẹ khẹke nin mhan ha wẹnna bhọ rẹ ha ziẹn ikolu nin mhan bi Jehova ko mhọn. (1 Kọr. 10:12) Ọkhẹke nin mhan ‘wo ha fẹ egbe mhan ghe,’ nin mhan rẹ sabọ lẹn si mhan yẹ wo lu re alo.—2 Kọr. 13:5.
17. Be ilẹta nin Pọl gbẹn ji ibhokhan Kolose rẹ rẹman yẹ ebezẹle ọkhẹke nin mhan wo ha yi Kristiẹn nọn deziẹn?
17 Bhi ilẹta nin Pọl gbẹn ji ibhokhan Kolose, ọle da gbo kie tẹmhọn ebezẹle ọkhẹke nin mhan rẹ wo ha yi Kristiẹn nọn deziẹn. Arẹmiẹn ibhokhan Kolose wo deziẹn bhi oga, Pọl da taman ele nin ele gbẹlokotọ beji a ha da miẹn ghe uwedẹ nin ẹbho rẹ ria eria bhi ọne agbọn nan bha hiẹ ele. (Kol. 2:6-10) Sẹyẹ, ẹghe-ẹghe Ẹpafras nọn manman lẹn ẹbho bhi ọne agbotu rẹ ha nan erọnmhọn ji ele, beji ele ha da sabọ “deziẹn nọnsẹn.” (Kol. 4:12) Be mhan luẹ bhi ọnan? Pọl bi Ẹpafras lẹnmhin ghe, nin ọria rẹ sabọ wo ha yi Kristiẹn nọn deziẹn, ọkhẹke nin ọle guanọ urẹkpa bhi obọ Osẹnobulua, sẹyẹ, ọkhẹke nin ọle tobọle wẹnna bhọ. Ele da ha guanọ nin ene Kristiẹn ne ribhi Kolose wo manman deziẹn bhi oga aharẹmiẹn ele kuẹlo da ọkakale nọn hi ki rẹ khin.
18. Be ha sabọ sunu ji Kristiẹn nọn deziẹn bhi oga? (Yẹ fẹ ifoto ghe.)
18 Pọl da sekhae nin ibhokhan Hibru ghe, ahamiẹn ọria nọn deziẹn bha gbẹlokotọ, ọ dẹ sabọ sunu ghe Osẹnobulua i da yẹ ha re ẹlo esili ghe ọle ghẹdẹ. Ahamiẹn ọle dọ manman gbi bhi ọkhọle, ọ dẹ sabọ re ọle miẹn ghe ọle i da ha ho nin ọle fidenọ beji Osẹnobulua ha da rẹhunmhan ọlẹn. Akhuẹnmhẹn Osẹnobulua ghe, idia ọsi ene ibhokhan Hibru bha khọ sẹ inian. (Hib. 6:4-9) Eria ne ga Jehova ẹlẹnan nan miẹn ghe ele i yẹ sasa bhi oga, la nan khu bhi agbotu ne ki dọ fidenọ kii? Uwedẹ nin ele rẹ re idegbere fidenọ rẹman ghe, ele dikẹ bhi ẹbho nin Pọl ha mhọn bhi ọkhọle. Ọrẹyiriọ, ahamiẹn ele fikie bu Jehova re, ele dẹ ha guanọ urẹkpa nọnsọle. (Ezek. 34:15, 16) Ene ewanlẹn dẹ sabọ taman obhio mhan nọn deziẹn bhi oga nọn rẹkpa ele rẹ kie sabọ deba Jehova ha mhọn ikolu nọn ziẹn.
Jehova re urẹkpa nin eria ne kie guanọ ne deba ọle ha mhọn ikolu nọn ziẹn (Fẹ uduọle nọnzi 18 ghe)
19. Emhanmhan nela ọkhẹke nin mhan ha mhọn?
19 Ahamiẹn uwẹ khu ọbhọ nin uwẹ rẹ sabọ dọ kiẹn Kristiẹn nọn deziẹn, ebi uwẹ khu ọ i dẹ sẹ uwẹ obọ. Wo ha luẹ ene ẹmhọanta ne dinmhin ne ribhi Baibo, yẹ wo manman dọnmhegbe ha ria eria beji Jehova rẹ ria eria. Ahamiẹn uwẹ ki sabọ dọ kiẹn Kristiẹn nọn deziẹn bhi oga fo, wo dọnmhegbe rẹ wo ha lu re alo khian.
BE UWẸ HA RẸ WANNIẸN ENE INỌNTA NAN YẸ?
-
Be a re ọle ta nin ọria rẹ dọ kiẹn Kristiẹn nọn deziẹn?
-
Be mhan ha lu beji mhan ha da sabọ dọ kiẹn Kristiẹn nọn deziẹn?
-
Bezẹle nọn bha da khẹke nin mhan ha riale ghe mhan deziẹn fo?
ILLO 65 Lu Re Alo!
a Fẹ ọne uhọnmhọn-ọta ghe nọn yọle, “Protect Yourself From Misinformation” bhi usun uhọnmhọn-ọta natiọle “More Topics” bhi jw.org bi JW Library.®
b Fẹ ọne uhọnmhọn-ọta natiọle “Emhin Nin Uwẹ Ha Sabọ Dọ Luẹ Ẹmhọn Ọlẹn” ghe bhi ọne ebe nan.
c EMHIN NAN RẸMAN BHI IFOTO: Obhio mhan nin okpea re obọ rẹkhan adia nin ọle miẹn bhi Baibo beji ọle rẹ zẹ emhin nin ọle ha noo rẹ re egbe re ahoho.
