UHỌNMHỌN-ỌTA NỌNZI 15
ILLO 124 Bha Ji Mhan Ha Mhọn Asun-rẹkhan
Manman Ha Mun Udu Nyan Agbotu Nọnsi Jehova
“Bha wo ha ria ẹmhọn ene rẹ bha khian, ne tẹmhọn Osẹnobulua man bha.”—HIB. 13:7.
EBI A HA LUẸ BHỌ
Mhan dẹ zilo nyan ebi mhan ha lu rẹ sabọ wo ha mun udu nyan agbotu nọnsi Jehova.
1. Be a rẹ ha dia ẹbho nesi Jehova yẹ bhi ore nin ọhẹnhẹn?
ẸGHE nọn hi ki rẹ khin nin Jehova rẹ mun ẹsọn nin ẹbho nesọle, ọle ho nin ele lu ọle rẹkhan emhanmhan. (1 Kọr. 14:33) Bhi ọsi ijiẹmhin, iho nọnsi Osẹnobulua nọn nan rẹ wewe ọne ọta nọn mhẹn na bhi otọ ọne agbọn nan rebhe. (Mat. 24:14) Jesu, ọle Jehova re mundia nọn ha dia ọne iwẹnna nan. Jesu sẹ wo lu ọle beji ha da miẹn ghe a ki ha lu ọne iwẹnna nan rẹkhan emhanmhan. Beji a rẹ ha mun agbotu gbọ bhi eje kẹkẹ bhi ore nin ọhẹnhẹn, a da ne ene ewanlẹn mundia ne ha re emhin khian bhi ene agbotu. (Iwẹnna 14:23) Ene etuegbe bi ewanlẹn eso yẹ ha ribhi Jerusalẹm. Ele wo ha re adia re nọn khẹke nin ene agbotu ha re obọ rẹkhan. (Iwẹnna 15:2; 16:4) Nin ele rẹ ha re obọ rẹkhan ene adia kẹkẹ nan ha re nin ele, ‘urẹọbhọ ọsi ene ribhi agbotu da ha ziẹn ọbhọ. Rẹ deba ọnin, ele da ha bun ọbhọ ukpẹdẹ-ukpẹdẹ.’—Iwẹnna 16:5.
2. Rẹ na bhi ukpe 1919 ha vade, be Jehova sẹ rẹ dia ẹbho nesọle yẹ, yẹ re ebale oriọn nin ele?
2 Jehova sẹyẹ wo dia ẹbho nesọle ẹlẹnan. Rẹ na bhi ukpe 1919 ha vade, Jesu sẹ wo noo usun khere bhi ẹwẹ enanzẹle rẹ ha dia iwẹnna itẹmhọn Osẹnobulua, yẹ re ebale oriọn nin ene rẹkhan ọlẹn. a (Luk 12:42) Ọ wo khia bhi ẹlo a ghe Jehova nan erọnmhọn ọbhi iwẹnna nin ele lu.—Isa. 60:22; 65:13, 14.
3-4. (a) Zilo nyan ijiẹmhin nọn rẹman ebi mhan rẹ miẹn elele bhọ yẹ nin mhan rẹ lu emhin rẹkhan emhanmhan. (b) Be mhan ha zilo nyan bhi ọne uhọnmhọn-ọta nan?
3 Sade mhan i lu emhin rẹkhan emhanmhan nọn, mhan i rẹ sabọ lu ọne iwẹnna nin Jesu mun nin mhan. (Mat. 28:19, 20) Bhi ọsi ijiẹmhin, sade a bha mhanmhan eji agbotu kẹkẹ ha da ha tẹmhọn Osẹnobulua na nọn, ọrebhe ha wo rẹ dọ ha tẹmọn Osẹnobulua bhi eji ghọn ọlẹn. Ibhio mhan kẹkẹ ha wo rẹ dọ ha tẹmhọn Osẹnobulua bhi ijian ọkpa igba ne bunbun, sokpan, a bhọ i da zẹwẹ tẹmhọn Osẹnobulua bhi eji enekẹle. Uwẹ dẹ sabọ ria ẹmhọn uwedẹ ọbhebhe nin mhan rẹ miẹn elele bhọ nin mhan rẹ lu emhin rẹkhan emhanmhan?
4 Beji Jesu rẹ dia edibo nesọle bhi iwẹnna itẹmhọn Osẹnobulua nin ele ha lu bhi ẹghe ẹdẹlẹ, iriọ ọle yẹ rẹ dia mhan ẹlẹnan. Bhi ọne uhọnmhọn-ọta nan, mhan dẹ zilo nyan ijiẹmhin nin Jesu re ọbhi otọ, bi ebi agbotu nọnsi Jehova rẹ re obọ rẹkhan ọlẹn yẹ ẹlẹnan. Mhan dẹ yẹ zilo nyan ebi mhan ha rẹ rẹman yẹ ghe mhan mun udu nyan agbotu nọnsi Jehova.
IJIẸMHIN ỌSI JESU AGBOTU NỌNSẸMHAN RE OBỌ RẸKHAN
5. Uwedẹ ọkpa nela mhan rẹ re obọ rẹkhan ijiẹmhin nọnsi Jesu? (Jọni 8:28)
5 Obọ Osẹnobulua, ọle Jesu da luẹ ebi ọle lu bi ebi ọle ta. Agbotu nọnsi Jehova yẹ wo re obọ rẹkhan ijiẹmhin nọnsi Jesu ẹlẹnan. Ọta nọnsi Osẹnobulua ele noo rẹ taman mhan emhin ne mhẹn bi emhin ne i mhẹn, ọle ele yẹ noo rẹ re adia nin mhan. (Tie Jọni 8:28; 2 Tim. 3:16, 17) Ẹghe-ẹghe a rẹ taman mhan nin mhan ha tie Ọta nọnsi Osẹnobulua yẹ re obọ rẹkhan ọlẹn bhi iẹnlẹn nọnsẹmhan. Be mhan rẹ miẹn elele bhọ yẹ nin mhan rẹ re obọ rẹkhan ọne adia nan?
6. Uwedẹ kpataki nela mhan rẹ miẹn elele bhọ sade mhan luẹ Baibo?
6 Mhan manman wo miẹn elele bhọ sade mhan noo ebe nesẹmhan rẹ luẹ Baibo. Bhi ọsi ijiẹmhin, mhan sabọ noo iman-emhin ne ribhi Baibo rẹ fẹ adia nin agbotu nọnsi Jehova re nin mhan ghe. Mhan ha kere ghe Baibo adia nin ele re nin mhan na vae, ọ ki rẹkpa mhan rẹ manman ha mun udu nyan ele.—Rom 12:2.
7. Uhọnmhunje nela Jesu wewe? Uwedẹ nela agbotu nọnsi Jehova rẹ re obọ rẹkhan ijiẹmhin nọnsi Jesu?
7 Jesu da wewe “ọne ọta nọn mhẹn ọsi Agbejele nọnsi Osẹnobulua.” (Luk 4:43, 44) Jesu da yẹ taman edibo nesọle nin ele ha wewe ẹmhọn ọne Agbejele. (Luk 9:1, 2; 10:8, 9) Eji ọ hi ki rẹ khin nin ẹbho ne ribhi agbotu nọnsi Jehova da nyẹnlẹn, la ihe nọn hi ki rẹ khin nin ele ye bhi agbotu, ele deba tẹmhọn ọne Agbejele.
8. Isẹhoa nela mhan mhọnlẹn?
8 Udede isẹhoa mhan mhọn rẹ ha tẹmhọn Agbejele nọnsi Osẹnobulua man ẹbho! Ọ i yi ọrebhe mhọn ọne isẹhoa nan. Bhi ọsi ijiẹmhin, beji Jesu ribhi ọne otọ nan, ọle bha re otọ nin ẹlinmhin ne i mhẹn rẹ ha tẹmhọn ọlẹn man ẹbho. (Luk 4:41) Ẹlẹnan nian, ọkuẹsẹ ọria deba ẹbho nesi Jehova ha tẹmhọn ọlẹn, ọkhẹke nin ọle ha nyẹnlẹn bhi uwedẹ nọn ti Osẹnobulua bhọ. Mhan rẹman ghe ọne isẹhoa nin mhan mhọn rẹ ha tẹmhọn Osẹnobulua ti mhan bhọ, sade mhan dọnmhegbe rẹ ha lu ọle bhi eji ọ hi ki rẹ khin nin mhan da miẹn ẹbho, bi bhi ẹghe nọn hi ki rẹ khin. Bọsi Jesu, mhan dọnmhegbe rẹ ha tẹmhọn Osẹnobulua man ẹbho, ye man ele ẹmhọanta.—Mat. 13:3, 23; 1 Kọr. 3:6.
9. Be agbotu nọnsi Jehova rẹ rẹkpa ẹbho rẹ lẹn elin nọnsi Osẹnobulua yẹ?
9 Jesu da rẹkpa ẹbho rẹ lẹn elin nọnsi Osẹnobulua. Bhi erọnmhọn nin Jesu nan ji Aba ọle nọn ribhi okhun, ọle da yọle: “Mẹn rẹkpa ele rẹ lẹn elin nọnsẹ.” (Jọni 17:26) Agbotu nọnsi Jehova re egbe Jesu beji ele rẹ dọnmhegbe rẹ ha lu eka nin ele ha sabọ lu rẹ rẹkpa ẹbho rẹ dọ lẹn elin nọnsi Osẹnobulua. New World Translation of the Holy Scriptures nin ele zedu ọle, ọle uwedẹ ọkpa nin agbotu rẹ lu ọnan. A wo re elin nọnsi Osẹnobulua ọbhi ije kẹkẹ nọn khẹke nọn ha ye tee beji ọ ha ye bhi urolo nan ka rẹ gbẹn Baibo. Bhi urolo nan sẹ zedu ọne Baibo rebhe diọ, la obọ ọkpa bhọ bun gbera 270. Bhi Appendix A4 bi A5 bhi ọne Baibo nan, uwẹ dẹ daghe ebezẹle nan da re elin nọnsi Osẹnobulua fikiere bhi eji ọkhẹke nọn ha ye, bi ebi a rẹ lu ọle yẹ. Appendix C nọn ribhi Study Bible bhi urolo Ebo manman wo tẹmhọn ebezẹle nọn da khẹke nin elin nọnsi Osẹnobulua zegbere igba 237 bhi obọ Baibo nan re urolo Grik gbẹn.
10. Be uwẹ miẹn luẹ bhi ọta nin okhuo ọkpa nọn nyẹnlẹn bhi Myanmar ta?
10 Bọsi Jesu, mhan ho nin mhan rẹkpa ẹbho ne bunbun rẹ dọ lẹn elin nọnsi Osẹnobulua. Beji okhuo ọkpa nọn ribhi ikpe 67 nọn nyẹnlẹn bhi Myanmar dọ lẹn kere ghe Osẹnobulua mhọn elin, ọle da munhẹn ha viẹ. Ọle da yọle: “Nin mẹn rẹ wanre sẹ inian, ọnan ẹghe ọhẹnhẹn bhi iẹnlẹn nọnsẹmhẹn nin mẹn rẹ họn ghe Jehova hi elin nọnsi Osẹnobulua. . . . Uwẹ wo man mẹn emhin kpataki nọn khẹke nin mẹn lẹn bhi iẹnlẹn.” Beji ijiẹmhin ọsi ọne okhuo nan rẹman, a ha man ẹbho elin nọnsi Osẹnobulua, ọ dẹ sabọ rẹso eria ne mhọn ọkhọle esili.
WO HA MUN UDU NYAN AGBOTU NỌNSI JEHOVA
11. Be ene ewanlẹn ha rẹ rẹman yẹ ghe ele mun udu nyan agbotu nọnsi Jehova? (Yẹ fẹ ifoto ghe.)
11 Uwedẹ ọkpa nela ene ewanlẹn ha rẹ rẹman ghe ele mun udu nyan agbotu nọnsi Osẹnobulua? Ahamiẹn a re adia nin ele, ọkhẹke nin ele dọnmhegbe re tie ọle nọnsẹn, yẹ re obọ rẹkhan ọlẹn. Bhi ọsi ijiẹmhin, ọ i yi adia rẹji ebi ele ha rẹ ha re obọ kẹkẹ man yẹ bhi ikolo oga, la ebi ele ha rẹ ha nan erọnmhọn yẹ ọkpa a rẹ nin ele. A yẹ re adia nin ele rẹji ebi ele ha rẹ ha gbẹloghe ihuan nesi Jesu yẹ. Ahamiẹn ene ewanlẹn re obọ rẹkhan adia nin agbotu re nin ele, ọ ki rẹkpa ene ibhio mhan rẹ lẹn ghe Jehova hoẹmhọn ele, sẹyẹ ẹmhọn ele rẹtẹ ọle.
Ene ewanlẹn rẹkpa mhan rẹ ha mun udu nyan adia ne na obọ agbotu nọnsi Jehova vae (Fẹ uduọle nọnzi 11 ghe) b
12. (a) Bezẹle nọn da khẹke nin mhan ha hẹnmhọn nin ene rẹ mhan khian? (Hibru 13:7, 17) (b) Bezẹle nọn da khẹke nin mhan ha ghe eji ene ewanlẹn da lu nọnsẹn?
12 Ahamiẹn ene ewanlẹn re adia nin mhan, ọkhẹke nin mhan re ọkhọle rebhe re obọ rẹkhan ọlẹn. Mhan da ha lu iriọ, mhan ki rẹ ọle lẹkhẹ nin ele rẹ ha miẹnsọn nọnsele. Baibo yọle ghe nin mhan ha hẹnmhọn nin ene re mhan khian, sẹyẹ nin mhan ha degbere nin ele. (Tie Hibru 13:7, 17.) Ọnan sabọ rẹ ha nọghọ mhan rẹ lu ẹgheso. Bezẹle? Ranmhude ọ bha gba nin ene ewanlẹn. Ahamiẹn eji ele i da lu nọnsẹn ọkpa mhan denọ ẹlo ọ i, ghe ọ i yi eji ele da lu nọnsẹn, mhan ki ha re iyobọ nin eghian mhan. Uwedẹ nela? Mhan i da yẹ ha gbaẹkẹ adia nin mhan miẹn bhi obọ agbotu nọnsi Jehova, ọnan bhọ emhin nin eghian mhan guanọ. Be bhọ mhan ha rẹ sabọ lẹn ohoghe nin eghian mhan wewe nẹga, yẹ rẹban ele?
HẸI JI ẸBHO RE UWẸ MIẸN GHE UWẸ BHA YẸ HA MUN UDU NYAN AGBOTU NỌNSI JEHOVA
13. Be eghian nesi Osẹnobulua rẹ re unun riia agbotu nọnsẹmhan an yẹ?
13 Eghian mhan ki ha ho nin ele re emhin ne gbale nin agbotu nọnsi Jehova lu rẹ kiẹn emhin ebe. Bhi ọsi ijiẹmhin, mhan luẹ bhi Baibo ghe Jehova guanọ nin mhan ha yi eria ne khiale, nin mhan khia bhi uwedẹ nin mhan rẹ nyẹnlẹn, yẹ ha ga ọle bhi uwedẹ nin ọle guanọ. Ọle yọle ghe nan khu ọria nọn lu emhin ebe nọn bha ho nọn fidenọ sibhi agbotu re. (1 Kọr. 5:11-13; 6:9, 10) Mhan wo re obọ rẹkhan ọne uhi nan bhi Baibo. Ranmhude mhan re obọ rẹkhan ọne uhi nan, eghian mhan ki ha yọle ghe mhan bha hoẹmhọn ẹbho, ghe mhan bhu ẹbho ohiẹn, sẹyẹ mhan i zẹwẹ re otọ nin ẹbho ne lu emhin bhi uwedẹ nọn dikẹ bhi ebi Baibo tale.
14. Ọria nela noo ẹbho rẹ bha agbotu nọnsi Jehova ohoghe?
14 Lẹn obọ ọria nin ọne ohoghe na vae. Esu hi ọnọn sua ẹbho bhọ rẹ ha bha ene ohoghe nan da agbotu nọnsi Osẹnobulua. Ọle hi “aba ohoghe.” (Jọni 8:44; Gen. 3:1-5) Bhiriọ, ọkhẹke nin mhan ha mhọnlẹn bhi ọkhọle ghe, Esu dẹ ha noo eghian mhan rẹ bha agbotu nọnsi Jehova ohoghe. Ọnan emhin nọn wo sunu bhi ore nin ọhẹnhẹn.
15. Be ene mun okalo bhi oga lu da Jesu bi ene rẹkhan ọlẹn?
15 Arẹmiẹn ọ gba nin Jesu nin Ọmọn nọnsi Osẹnobulua, sẹyẹ ọle wo ha lu emhin ọhan-ilo kẹkẹ, Esu da noo ẹbho eso rẹ ha bha ọle ohoghe. Bhi ọsi ijiẹmhin, ene mun okalo bhi oga da taman ẹbho ghe, “ojie ọsi ene ẹlinmhin-ebe” re ahu nin Jesu rẹ sabọ ha khu ẹlinmhin ne i mhẹn si ẹbho bhi egbe re. (Mak 3:22) Ẹghe nan rẹ ha gui ẹzọ nọnsi Jesu, ene mun okalo bhi oga da yọle ghe, ọle re unun ji Osẹnobulua. Ele da yẹ sua ẹbho ọbhọ rẹ gbe Jesu a. (Mat. 27:20) Akizẹbue, beji ene rẹkhan Jesu ha wewe ọne ọta nọn mhẹn, ẹbho ne kpokpo ele “da sua ẹbho ne iyi ibhokhan Ju ọbhọ” rẹ ha kpokpo ele. (Iwẹnna 14:2, 19) Watchtower ọsi Dizẹmba 1, 1998, da ta ọnan rẹji ẹmhọn nọn ribhi ebe ọsi Iwẹnna 14:2. Ọ da yọle: “Ọ i yi ọne ọta nọn mhẹn nin ene Kristiẹn ha wewe ọkpa ene ibhokhan Ju he, ọkpakinọn, ele da ha ta ọta ebe ele bhi egbe beji a ha da miẹn ene ẹbho bha yẹ ha ka ele ehọ, yẹ he ele.”
16. Be ọkhẹke nin mhan yere sade mhan họn ọta ohoghe?
16 Esu yẹ wo bha ọne ohoghe nan rẹ dọ sẹbhi ẹlẹnan. Ọle sẹyẹ wo “hiẹ ẹbho ne ribhi ọne otọ agbọn nan rebhe.” (Arẹm.12:9) Ahamiẹn uwẹ họn ọta nọn bha gba rẹji agbotu nọnsi Jehova, la ibhio mhan ne re agbotu khian, yere ebi eghian nesi Osẹnobulua rẹ nin Jesu bi edibo nesọle lu emhin yẹ bhi ore nin ọhẹnhẹn. Ẹlẹnan nian, a wo gbe ẹbho nesi Jehova, yẹ riia ele elin an beji Baibo ka wo ta ọbhi otọ. (Mat. 5:11, 12) Ohoghe ne sẹ inian i da sabọ hiẹ mhan sade mhan lẹn eji ele na vae, yẹ re ẹjẹje lu emhin. Be ọkhẹke nin mhan lu?
17. Be mhan ha lu beji ha da miẹn ghe ọta ohoghe bha hiẹ mhan? (2 Timoti 1:13) (Yẹ fẹ ọne ẹkpẹti ghe nọn yọle, “ Ebi Mhan Ha Rẹ Sabọ Rẹban Ọta Ohoghe Yẹ.”)
17 Rẹban ọta ohoghe. Pọl nin odibo wo tẹmhọn ebi ọkhẹke nin mhan lu sade mhan họn ọta ohoghe. Ọle da taman Timoti nin ọle “gbuhi nin ẹbho eso . . . nin ele hẹi yẹ re ehọ bhi okha ohoghe” bi nin ele rẹban “okha ne ire ogẹn ji Osẹnobulua.” (1 Tim. 1:3, 4; 4:7) Arẹmiẹn obhokhan dẹ sabọ mun emhin bhi otọ mun fiọbhi unun, ọria nọn wanre i da lu ebe sẹ iriọ, ranmhude ọle lẹn okhẹnan nọn ha sabọ sire. Mhan dọnmhegbe rẹ rẹban ọta ohoghe ranmhude mhan lẹn obọ ọria nọn na vae. Ọkpakinọn, mhan re ehọ ọbhi “iman-emhin esili” ọsi ẹmhọanta.—Tie 2 Timoti 1:13.
18. Be mhan ha rẹ rẹman yẹ ghe mhan mun udu nyan agbotu nọnsi Jehova?
18 Mhan zilo nyan ea bhi ene uwedẹ nin agbotu nọnsi Osẹnobulua rẹ re egbe khọkhọ Jesu. Beji uwẹ ha rẹ ha luẹ Baibo, gbẹlokotọ bhi uwedẹ ebhebhe nin agbotu nọnsi Jehova rẹ re egbe khọkhọ Jesu. Rẹkpa ẹbho bhi agbotu nin uwẹ ye rẹ manman ha mun udu nyan agbotu nọnsi Jehova. Wo ha sun rẹkhan Jehova bi agbotu nin ọle noo rẹ mun iho nọnsole sẹ, nin uwẹ rẹ rẹman ghe uwẹ mun udu nyan ọne agbotu. (Ps. 37:28) Bha ji isẹhoa nin mhan mhọn rẹ ha ribhi ẹwẹ ẹbho nesi Jehova ne mhọn oyẹẹ bi asun-rẹkhan ha ti mhan bhọ.
BE UWẸ HA RẸ WANNIẸN ENE INỌNTA NAN YẸ?
-
Uwedẹ kẹkẹ nela ẹbho nesi Osẹnobulua rẹ re egbe khọkhọ Jesu?
-
Be mhan ha rẹ wo ha rẹman ghe mhan mun udu nyan agbotu nọnsi Jehova?
-
Be ọkhẹke nin mhan lu yẹ sade mhan họn ọta ohoghe?
ILLO 103 Ewanlẹn Nin Jehova Ne Nin Mhan
b EMHIN NAN RẸMAN BHI IFOTO: Beji ene ewanlẹn zilo nyan ebi a ha rẹ ha lu iwẹnna itẹmhọn Osẹnobulua nan da re ebe wa yẹ fo, ọwanlẹn ọkpa nọn sun usun nan rẹ dagbare bhi inẹbho da taman ene ibhio mhan ebi ene ewanlẹn yọle a ki dẹ rẹ ha lu ọle yẹ. Ọle da yọle nin ele sikẹ egbuwa yẹ fikeke gbe ọle.
