1-2. (a) Be imhan rebhe guanọ? (b) Emhin nela mhan rẹọi?

MHAN rebhe guanọ nan hoẹmhọn mhan. Mhan rebhe yẹ guanọ nan ha ne mhan lu emhin bhi uwedẹ nọn gbale. Ọ manman ba bhi egbe sade ẹghe rebhe eria rẹ lu mhan khọlọ la sade ele bha re oyẹẹ ne mhan lu emhin.

² Jehova lẹn ghe mhan guanọ nan ha re oyẹẹ ne mhan lu emhin, ghe, ibhohiẹn eku iyẹẹ mhan. (Ps. 33:5) Mhan rẹọbhọ ghe, Jehova manman hoẹmhọn mhan, ọle yẹ guanọ nan ha lu mhan nọnsẹn. Uhi nin ọle na bhi obọ iMoses gbe nin ibhokhan Izrẹl wo re ọnan man. Ahamiẹn ẹbho lu uwẹ khọlọ ẹghe rebhe, la ele bha re oyẹẹ ne uwẹ lu emhin, ọ manman ba bhi egbe. Ahamiẹn ọnan sẹ sunu ji uwẹ, ọne uhi nan * dẹ sabọ rẹkpa ẹ, ranmhude ọ rẹman ghe, ẹmhọn ẹbho nesọle rẹtẹ ọle.

3. (a) Beji Romans 13:8-10 rẹ re otọle man, emhin nela mhan ha miẹn sade mhan luẹ ene uhi nin Osẹnobulua na bhi obọ iMoses gbe? (b) Inọnta nela mhan ha zilo nyan?

³ Mhan ha luẹ ene uhi nin Osẹnobulua na bhi obọ iMoses gbe, mhan ki dọ kere ghe Jehova manman hoẹmhọn mhan. (Tie Romans 13:8-10.) Bhi ọne uhọnmhọn-ọta nan, mhan dẹ zilo nyan eso bhi ene uhi nin Osẹnobulua gbe nin ibhokhan Izrẹl, mhan ki yẹ re ewanniẹn ọbhi ene inọnta nan: Bezẹle nin mhan ha da sabọ yọle ghe oyẹẹ nin Jehova mhọn da mhan zẹle nin ọle da mun ọne Uhi gbọ? Bezẹle nin mhan ha da sabọ yọle ghe ọne Uhi rẹkpa ẹbho rẹ ha bhu ohiẹn nọn gbale? Ene ẹbho ne ha  ribhi ihe, uwedẹ nela ọkhẹke nin ele rẹ ha re ọne Uhi khian? Ẹbho nela ọne Uhi manman gbega? Ewanniẹn ọsi ene inọnta nan dẹ sabọ ko mhan udu re. Ọ dẹ sabọ re ikhuẹloghe nin mhan, yẹ rẹkpa mhan sikẹ Osẹnobulua nọnsẹn.—Acts 17:27; Rom. 15:4.

4. (a) Bezẹlẹ nin mhan ha da sabọ yọle ghe oyẹẹ zẹle nin Jehova da gbe uhi nin ọle gbe nin ibhokhan Izrẹl? (b) Beji mhan miẹn tie bhi Matthew 22:36-40, uhi nela iJesu re otọle man?

⁴ Mhan dẹ sabọ yọle ghe, oyẹẹ zẹle nin Jehova da gbe Uhi nin ọle gbe nin ibhokhan Izrẹl. (1 John 4:8) Jehova gbe ene uhi nin ibhokhan Izrẹl nin ele da sabọ ha mhọn oyẹẹ da Osẹnobulua bi ibo ele. (Lev. 19:18; Deut. 6:5; tie Matthew 22:36-40.) Bhiriọ, ene uhi rebhe dẹ sabọ man mhan ẹmhọn oyẹẹ nọnsi Osẹnobulua. Bha ji mhan zilo nyan eso bhi ene uhi.

5-6. Be iJehova guanọ bhi obọ ọsi okhuo bi ọdọ? Be iJehova gbẹlokotọ daghe? Re ijiẹmhin man.

⁵ Ha sun rẹkhan okhuo ẹ la ọdọ ẹ, uwẹ ha yẹ ha gbẹloghe imọn nesẹ nọnsẹn. Jehova guanọ nin okhuo bi ọdọ manman hoẹmhọn egbe ele. Ọle guanọ nin ọne oyẹẹ hẹi fo ghẹdẹ. (Gen. 2:24; Matt. 19:3-6) Akhailu nọn sade okhuo ọria la ọdọ ọria gboghẹ. Ranmhude ọnan, Osẹnobulua da tale bhi ọne uhi ghe nin okhuo la ọdọ hẹi ne ọria nọn iyi okhuo ọle la ọdọ ọle nowẹ. (Deut. 5:18) Olukhọ nọn rẹji Osẹnobulua sade ọria zẹ okhuo ọle la ọdọ ọle obọ dọ gboghẹ. Ọ yẹ manman ba bhi egbe. (Gen. 39:7-9) Ahamiẹn ọkpa bhi ẹwẹ okhuo bi ọdọ gboghẹ, ọ dẹ sabọ ba ọnọnkẹle bhi egbe rẹ na bhi ikpe ne bunbun.

⁶ Jehova gbẹlokotọ daghe ebi okhuo bi ọdọ rẹ ne egbe nyẹnlẹn yẹ. Ọle wo ha guanọ nin ibhokhan Izrẹl ha lu okhuo ele nọnsẹn. Ọne uhi taman ikpea ghe nin ele hoẹmhọn ikhuo ele, ghe nin ele hẹi wo gheghe ha khu okhuo ele fia. (Deut. 24:1-4; Matt. 19:3, 8) Ọkpakinọn, ahamiẹn ẹmhọn nọn kaka zegbere rẹ sẹbhọ ghe ọria khu okhuo ọle fia, ọkhẹke nin ọle re ebe nan rẹ khu okhuo fia bhi isi ọdọ nanlẹn. Ọne ebe nan, ọle ọne okhuo ha sabọ rẹ rẹman ghe ọle bha gboghẹ. Sẹyẹ, ọne okpea kuẹ sabọ re ọne ebe nan nin okhuo ọle, ọle ki ka dọ nin ene ewanlẹn bhi ọne agbaẹbho talọ fo. Bhiriọ, ene ewanlẹn ki miẹn ọne isẹhoa re ka dọnmhegbe nin ele rẹ rẹkpa ọle bi okhuo ọle rẹ ta ọne ẹmhọn ọbhi ekpẹn. Ẹmhọanta nọn ghe, okpea ha gheghe ha guanọ nin ọle khu okhuo ọle fia, asabọmiẹn Osẹnobulua ida mun ọlẹn mhọn. Ọkpakinọn, Osẹnobulua daghe eviẹ nin ọne okhuo viẹ. Beji ọ rẹ ba ọne okhuo bhi egbe, iriọ ọ yẹ rẹ ba Osẹnobulua bhi egbe.—Mal. 2:13-16.

7-8. (a) Be iJehova taman ene biẹ imọn nin ele lu? (Fẹ adudu nọn ribhi odalo ọne ebe nan ghe.) (b) Be imhan miẹn luẹ bhi ọnan?

⁷ Ọne uhi yẹ rẹman ghe, ẹmhọn ibhokhan manman ti Jehova bhọ. Jehova taman ene biẹ imọn ghe, nin ele ha re ebi ene imọn guanọ nin ele, bi nin ele rẹkpa ene imọn ha deba ọle mhọn ikolu nọn ziẹnlẹn. Jehova yẹ taman ele ghe, nin ele noo isẹhoa rebhe nin ele mhọnlẹn rẹ rẹkpa imọn nesele hoẹmhọn ọlẹn yẹ lẹn otọ uhi nesọle. (Deut. 6:6-9; 7:13) Emhin ọkpa nọn re iJehova re oya nin ibhokhan Izrẹl hi, ele da ha re imọn nesele rẹ zọese. (Jer. 7:31, 33) Jehova guanọ nin ibhokhan Izrẹl ha ghe imọn nesele bii ẹsele nọn na bhi obọ ọle vae, ọ iyi bii emhin nin ele gheghe mhọnlẹn.—Ps. 127:3.

⁸ Ebi mhan luẹ bhọ: Jehova daghe ebi okhuo bi ọdọ rẹ ne egbe lu emhin yẹ. Ọle guanọ nin ene biẹ imọn hoẹmhọn imọn nesele. Ọle dẹ bhu ohiẹn nọnsele sade ele bha lu imọn nesele nọnsẹn.

9-11. Bezẹle nin Jehova da gbe uhi nin ibhokhan Izrẹl ghe nin ele hẹi ji emhin ọsi ọria ha sa ele bhi ẹlo?

⁹ Hẹi ji emhin nọnsi ọria ha sa uwẹ bhi ẹlo. Ọne uhi da yẹ yọle nin mhan hẹi ji emhin nọnsi ọria ha sa mhan bhi ẹlo. (Deut. 5:21; Rom. 7:7) Bezẹle nin Jehova da gbe ọne uhi nan nin ẹbho nesọle? Ranmhude ọle guanọ nin ele gbega ọkhọle bi iria-eria nọnsele. Jehova lẹn sẹbhọ ghe, ọkuẹsẹ ọria lu emhin nọn bha gba, ọkhọle ọ da munhẹn. (Prov. 4:23) Ahamiẹn ibhokhan  Izrẹl ji iria-eria nọn imhẹn da nabhi ọkhọle nọnsele, ele iyẹ da ha re oyẹẹ ne egbe lu emhin. David nin ojie de ọbhi ọne ufi nan. Arẹmiẹn ọria esili ọle khin, ọle da ji ọkhuo ọria ọbhebhe ha sa ọle bhi ẹlo. Ọnan da re ọle gboghẹ. (Jas. 1:14, 15) David ki ne ọne okhuo nowẹ fo, ọle da ha dọnmhegbe nin ọle gbe gue ọne olukhọ. Bhiriọ, ọle da ha si ọdọ ọne okhuo nin ọle dọ nin ọne okhuo nowẹ. Ranmhude ọne okpea bha ka, ọle da mhanmhanlẹn nan gbe ọle a.—2 Sam. 11:2-4; 12:7-11.

¹⁰ Obhokhan Izrẹl ha ji emhin ọria sa ọle bhi ẹlo, Jehova dẹ sabọ lẹn, ranmhude ọle sabọ daghe ọkhọle nọnsi ọria. (1 Chron. 28:9) Jehova re ọne uhi nan rẹ taman ibhokhan Izrẹl ghe, ọkhẹke nin ele rẹban iria-eria nọn ha re ele ha lu emhin bhi uwedẹ nọn bha gba. Ọnan rẹman ghe Jehova manman hoẹmhọn mhan, ghe ọle yẹ manman mhọn ẹwanlẹn.

¹¹ Ebi mhan luẹ bhọ: Ọ iwo gheghe yi ebi ọria dia yẹ bhi egbe ọkpa iJehova daghe, Ọle sabọ daghe emhin ne ribhi ọkhọle ọsi ọria. (1 Sam. 16:7) Emhin soso iribhọ nin mhan ha sabọ re nẹhe nanlẹn. Arẹmiẹn eji mhan da mhẹn ọle manman gbẹlokotọ fẹghe, ọle guanọ nin mhan dọnmhegbe lẹn iria-eria ne imhẹn ne ribhi ọkhọle nọnsẹmhan beji mhan ha da sabọ rẹban ele.—2 Chron. 16:9; Matt. 5:27-30.

12. Be bhọ ene uhi nin Jehova gbe nin ibhokhan Izrẹl rẹman?

¹² Uhi nin Jehova gbe nin ibhokhan Izrẹl yẹ rẹman ghe, ọ ti Jehova bhọ sade mhan bhu ohiẹn bhi uwedẹ nọn gbale. (Ps. 37:28; Isa. 61:8) Jehova re ijiẹmhin man mhan ebi mhan ha rẹ ha lu emhin nọn gbale da ẹbho yẹ. Ibhokhan Izrẹl ha re obọ rẹkhan uhi nesọle, ọle ki nan erọnmhọn nin ele. Ahamiẹn ele re obọ gbera ene uhi, ele ki loya. Bha ji mhan sẹyẹ zilo nyan uhi eva ebhebhe nin Jehova gbe nin ibhokhan Izrẹl.

13-14. Be iJehova taman ibhokhan Izrẹl bhi uhi nin ọhẹnhẹn bi uhi nọnzi eva bhi ẹwẹ ene Uhi Igbe nin ọle gbe nin ele? Elele nela ele ha miẹn bhọ sade ele re obọ rẹkhan ene uhi?

¹³ Re ọkhọle rebhe rẹ ha ga iJehova ọkpa. Uhi nin ọhẹnhẹn bi ọzeva nin Jehova gbe nin ibhokhan Izrẹl da taman ele ghe, Jehova ọkpa ọkhẹke nin ele ha ga, ghe nin ele hẹi ga ẹbọ. (Ex. 20:3-6) Ọ iyi Jehova ọnọn ha miẹn elele sade ele re obọ rẹkhan ene uhi nan, ele ene ha miẹn elele bhọ. Ẹghe nin ibhokhan Izrẹl rẹ re obọ rẹkhan ọne uhi nan, emhin da wo ha kiẹọnlẹn nin ele. Ọkpakinọn, ẹghe nin ele ki rẹ ha ga ẹbọ beji agbaẹbho nekẹle rẹ ha ga ẹbọ, ele da ha le oya.

¹⁴ Yẹ ria ẹmhọn emhin ne sunun ji ibhokhan Canaan. Ẹbọ ele wo ha ga. Bhiriọ, ele da ha fa egbe ele a. (Ps. 115:4-8) Ele ki ha lu emhin okan rẹ ga ene ẹbọ nan, yẹ re imọn nesele rẹ zọese nin ele. Iriọ ene ibhokhan Izrẹl yẹ ha lu bhi ẹghe nin ele rẹ fi ikeke gbe iJehova ha ga ẹbọ. Ele da ha fa egbe ele a yẹ re imọn nesele zọese. (2 Chron. 28:1-4) Sẹyẹ, ene ribhi ihe da fi ikeke gbe ibhohiẹn nọn gbale nọnsi Jehova. Ele da ha re ahu nọnsele rẹ denyẹnyẹn ene ibhioguele. (Ezek. 34:1-4) Jehova da taman ene ibhokhan Izrẹl ghe, ọle dẹ re oya nin ene lu ikhuo ne iyẹ mhọn ọdọ khọlọ, bi ene yẹ lu imọn ne iyẹ mhọn aba khọlọ. (Deut. 10:17, 18; 27:19) Bhi obọ nọnkẹle, Jehova da nan erọnmhọn nin ele bhi ẹghe nin ele rẹ ha sun rẹkhan ọlẹn, bi ẹghe nin ele rẹ ha nin ẹbho lu emhin bhi uwedẹ nọn gbale.—1 Ki. 10:4-9.

15. Be uhi nin ọhẹnhẹn bi ọne ọzeva nan gbe nin ibhokhan Izrẹl man mhan le rẹji Jehova?

¹⁵ Ebi mhan luẹ bhọ: Ọ iyi obọ iJehova ọ ye sade ẹbho ne yọle ele ga ọle fi ikeke gbe uhi nesọle ha re oya nin ẹbho nesọle. Ọrẹyiriọ, Jehova hoẹmhọn mhan, ọle daghe ọle sade mhan miẹn ibhohiẹn eku bhi egbe. Ọ ba ọle bhi egbe gbera ebi emhin rẹ ba inẹn ọmọn bhi egbe yẹ sade ọne ọmọn le oya. (Isa. 49:15) Asabomiẹn ghe, ọle ida re ẹjẹje re ọkpẹnlẹn ọbhi oya nin mhan miẹn bhi obọ ọsi ene iga ọle. Ọkpakinọn,  ahamiẹn ele bha fidenọ dọ ha ga ọle, ọle ki re uwedẹ nin ele rẹ ne ẹbho nesọle lu emhin rẹ bhu ohiẹn nọnsele.

16-18. Be ene ewanlẹn bhi otọ Izrẹl rẹ ha re ene uhi nesi Osẹnobulua khian yẹ? Be imhan miẹn luẹ bhi ọnan?

¹⁶ Ene uhi nan nin Jehova gbe nin ibhokhan Izrẹl rẹso iẹnlẹn nọnsele rebhe. Bhiriọ, ọkhẹke nin ene ewanlẹn ha bhu ene ẹbho ohiẹn bhi uwedẹ nọn gbale beji Jehova guanọn. Ọ iyi ẹmhọn ne rẹtẹ oga nọnsi Jehova ọkpa ene ewanlẹn talọ ọi, ele yẹ talọ ọbhi ẹmhọn kẹkẹ ne zegbere ukpẹdẹ-ukpẹdẹ. Bha ji mhan fẹ ijiẹmhin eso ghe.

¹⁷ Obhokhan Izrẹl ha gbe ọria a, a iwo re ẹjẹje yẹ gbe ọne obhokhan Izrẹl a. Ene ewanlẹn bhi ọne agbaẹbho ki ka guanọ otọ ọne ẹmhọn fo, ọkuẹsẹ ele lẹn ebi ele ha khian ọne obhokhan Izrẹl nọn gbe ọria yẹ. (Deut. 19:2-7, 11-13) Ene ewanlẹn yẹ talọ ọbhi ẹmhọn ebhebhe ne zegbere ẹdẹdẹ, bhi ọsi ijiẹmhin, sade itue eva gbugan ọbhi ẹmhin, la sade okhuo bi ọdọ mhọn ẹmhọn. (Ex. 21:35; Deut. 22:13-19) Ahamiẹn ghe ene ewanlẹn bhu ohiẹn nọn gbale, bi sade ene ibhokhan Izrẹl re obọ rẹkhan ene Uhi, ọrebhe ki miẹn elele. Ele ki yẹ re ogẹn ji Jehova.—Lev. 20:7, 8; Isa. 48:17, 18.

¹⁸ Ebi mhan luẹ bhọ: Emhin rebhe bhi iẹnlẹn nọnsẹmhan wo rẹtẹ iJehova. Ọle guanọ nin mhan ha lu emhin nọn gbale yẹ mhọn oyẹẹ da ẹbho. Aharẹmiẹn ẹkhokho mhan ye, ọle lẹn ebi mhan lu bi ebi mhan ta.—Heb. 4:13.

19-21. (a) Ene iJehova ne mundia ne ha gbẹloghe ẹbho nesọle, uwedẹ nela ọkhẹke nin ele rẹ ha nin ene ẹbho lu emhin? (b) Be ọne uhi nin Jehova gbe ọbhi otọ rẹ ha gbega ẹbho nesọle yẹ? Be imhan miẹn luẹ bhi ọnan?

¹⁹ Jehova bha ha guanọ nin ẹbho nesọle ha lu emhin beji agaẹbho ne nega ele rẹ lu emhin. Bhiriọ, ọle da taman ene ọle ne mundia ne ha gbẹloghe ele ghe, nin ele hẹi ha deba ibo soso sade ele re ọne uhi bhu ohiẹn. Sẹyẹ, ọle da taman ele ghe, nin ele ha re oyẹẹ man sade ele bhu ohiẹn.—Deut. 1:13-17; 16:18-20.

²⁰ Jehova mhọn ẹjẹjẹ da ẹbho nesọle. Ọnan zẹle nin ọle da gbe ene uhi nan ọbhi otọ nọn ha gbega ele. Bhi ọsi ijiẹmhin, ranmhude ọne Uhi rẹman ghe, ọkhẹke nin ọria nan re orẹsin sin lẹn ọnọn re ọrẹsin sin ọlẹn, ẹbho ida kẹ sabọ ha re orẹsin sin ọria. (Deut. 19:16-19; 25:1) Sẹyẹ, ọkuẹsẹ a yọle ghe, ọria nan re orẹsin sin lu khọlọ, ọkhẹke nin itue eva ka dọ sọsali ọbhi ọne ẹmhọn. (Deut. 17:6; 19:15) Ahakimiẹn ghe otuọnkpa daghe obhokhan Izrẹl ẹghe nin ọle rẹ ha lu khọlọ kii? Ọ be khẹke nin ọne ọria nọn lu khọlọ ha ghọnghọn ghe a ida lu ọle emhin soso ranmhude ẹbho ne daghe ọle bha si itue eva? Hiehie! Ranmhude Jehova yẹ daghe ọle. Aba, ọle Osẹnobulua re ahu nan rẹ ha gbẹloghe bhi azagba-uwa. Ọrẹyiriọ, ọne ahu mhọn eji ọ sẹle. Ẹmhọn eso ha zegbere bhi azagba-uwa, ene ewanlẹn bhi ọne agbaẹbho mhọn ọne ahu nin ele rẹ talọ ọbhi ọne ẹmhọn, yẹ rẹman ebi ọne azagba-uwa ha rẹ re ọne ẹmhọn khian yẹ.—Deut. 21:18-21.

²¹ Ebi mhan luẹ bhọ: Ijiẹmhin esili Jehova wo rẹman mhan, ranmhude, emhin nọn gbale ọkpa  ọle lu. (Ps. 9:7) Ọle nan erọnmhọn nin ẹbho ne re obọ rẹkhan uhi nesọle. Ọkpakinọn, ọle re oya nin ene re obọ gbera ene uhi. (2 Sam. 22:21-23; Ezek. 9:9, 10) Ẹbho eso sabọ ha ghọnghọn ranmhude a bha mun ele ze bhi emhin ọbe nin ele lu. Ọkpakinọn, Jehova dẹ re oya nin ele bhi ẹghe nọn khẹke. (Prov. 28:13) Ahamiẹn ghe ele bha ka fidenọ, ele ki dọ lẹn sẹbho ghe, a ha do ọbhi obọ nọnsi Jehova, ọle khọ nẹ.—Heb. 10:30, 31.

22-24. (a) Ẹbho nela ọne Uhi nan manman gbega? Emhin nela ọnan man mhan le rẹji Jehova? (b) Isekha nela mhan kere bhi Exodus 22:22-24?

²² Ọne Uhi wo ha gbega ibhioguele. Ibhioguele bọsi, obhokhan nọn iyẹ mhọn aba, okhuo nin ọdọ ọle yu, bi ẹbho ne nin agbaẹbho ebhebhe vae dọ ha deba ele nyẹnlẹn. Jehova da taman ene ha gbẹloghe bhi Izrẹl yọle: “Bha hẹi bhu ohiẹn gbe ẹbho ne vae dọ deba bha ha nyẹnlẹn, la obhokhan nọn iyẹ mhọn aba. Sẹyẹ, bha hẹi miẹn okhuo nin ọdọ ọle yu ukpọn ranmhude ọle vae dọ mọnmọn emhin bhi obọ ibha.” (Deut. 24:17) Ibhioguele ne imọn ọnọn rẹkpa ele, Jehova mhọn ẹjẹjẹ da ele. Ọle re oya nin ẹbho ne bha ha lu ele nọnsẹn.—Tie Exodus 22:22-24.

²³ Ọne Uhi yẹ gbega azagba-uwa ranmhude Jehova tale bhi ọne Uhi ghe nin ene ribhi azagba-uwa hẹi ha ne egbe ele nowẹ. (Lev. 18:6-30) Ene agbaẹbho ne nega ibhokhan Izrẹl wo ha lu ilọnmhọn ne sẹ inian. Ọkpakinọn, ọkhẹke nin ọne emhin nan ha sọnnọn ibhokhan Izrẹl beji ọ rẹ ha sọnnọn iJehova.

²⁴ Be imhan miẹn luẹ bhi ọnan: Jehova guanọ  nan miẹn ghe, oyẹẹ, ọle eria nin ọle ne ọbhi ihe re ne ẹbho lu emhin. Igboghẹ nọn hi ki rẹ khin sọnnọn iJehova. Ọle guanọ nin ẹbho rebhe, manman nọn ene ibhioguele miẹn ugbega.

25-26. (a) Bezẹle nin mhan ha da yọle ghe oyẹẹ bi ibhohiẹn nọn gbale diabe ahoho bi iẹnlẹn? (b) Bhi uhọnmhọn-ọta nọn ki sẹ ọle bhi egbe bhi ẹwẹ ene uhọnmhọn-ọta enẹn nin mhan yọle mhan dẹ zilo nyan, emhin nela mhan ha tẹmhọnlẹn?

²⁵ Oyẹẹ bi ibhohiẹn nọn gbale diabe ahoho bi iẹnlẹn. Bhi ọne otọ nan, ọria ida sabọ ha nyẹnlẹn sade ahoho iribhọ nin ọle ha hiẹnhiẹn ọbhi egbe. Mhan ha rẹọbhọ ghe uwedẹ nọn gbale Jehova rẹ ne mhan lu emhin, oyẹẹ nin mhan mhọn da ọle ki ha ziẹn ọbhọ. Sẹyẹ, ahamiẹn ghe mhan mhọn oyẹẹ da Osẹnobulua bi uwedẹ nesọle, mhan ki ha mhọn ọne ọkhọle nin mhan ha rẹ hoẹmhọn ẹbho ne nega mhan yẹ ha lu ele nọnsẹn.

²⁶ Ene Uhi nin Jehova na bhi obọ iMoses gbe nin ibhokhan Izrẹl wo rẹkpa ele rẹ deba iJehova ha mhọn ikolu nọn manman dinmhin. Ọkpakinọn, Osẹnobulua bha yẹ ha noo ene Uhi nan ẹghe nin Jesu ki rẹ vae dọ re gbe ọle zọese nin mhan. Emhin ọbhebhe nọn gbera ene uhi nin Jehova na bhi obọ iMoses gbe nin ibhokhan Izrẹl, ọle iJehova ki mun gbọ. (Rom. 10:4) Paul tale ghe ọne Uhi nan diabe adudu ọsi emhin ne mhẹn ne vade. (Heb. 10:1) Bhi uhọnmhọn-ọta nọn ki sẹ ọle bhi egbe bhi ẹwẹ ene uhọnmhọn-ọta enẹn nin mhan yọle mhan dẹ zilo nyan, mhan ki tẹmhọn eso bhi ene emhin ne mhẹn ne vade. Mhan ki yẹ tẹmhọn ebezẹle nin ahoẹmhọn-egbe bi ibhohiẹn nọn gbale da yi emhin kpataki bhi ẹkẹ agbotu.