UHỌNMHỌN-ỌTA NỌNZI 7
Ihe ọsi Ewanlẹn bhi Ẹkẹ Agbotu
“Jesu Kristi [hi] uhọnmhọn ọsi agbotu. Ọle hi ọnọn miẹn agbotu fan.”—EPH. 5:23.
ILLO 137 Ikhuo Ne Ga Nọnsẹn
EBI MHAN DA LUẸ *
1. Emhin ọkpa nela zẹle nin ọfure bi okugbe da ribhi ẹwẹ ene ga iJehova?
Ọ WO ti mhan bhọ rẹ ha yi ọkpa bhi ẹwẹ ene ga iJehova. Bezẹle nin mhan da mhọn ọfure bi okugbe bhi ẹwẹ mhan? Emhin ọkpa nọn zẹle hi, mhan dọnmhegbe rẹ mun ekpẹn nin ene iJehova ne ọbhi ihe. Bhi ọsi ẹmhọanta, mhan ha dọ manman lẹn otọ ebi Jehova rẹ mhanmhan azagba-uwa nọnsọle yẹ, okugbe nọn ribhi ẹwẹ mhan ki wo kie manman ziẹn ọbhọ.
2. Inọnta nela mhan ha re ewanniẹn ọi bhi ọne uhọnmhọn-ọta nan?
2 Bhi ọne uhọnmhọn-ọta nan, mhan dẹ tẹmhọn ẹbho nin Jehova ne ọbhi ihe bhi ẹkẹ agbotu. Rẹ deba ọnin, mhan ki yẹ re ewanniẹn ọbhi ene inọnta nan: Iwẹnna nela Jehova mun nin ikhuo bhi ẹkẹ agbotu? Ẹmhọanta be nọn ghe, okpea nọn hi ki rẹ wo khin hi ebeanlẹn ọsi okhuo nọn hi ki rẹ wo khin? Ihe nin ọwanlẹn ye bhi agbotu bi ọne ọdafẹn ye bhi azagba-uwa nọnsọle, abọkpa be nọn? Bha ji mhan ka zilo nyan ẹlo nọn khẹke nin mhan rẹ ha ghe ibhio mhan nin ikhuo.
ẸLO NELA ỌKHẸKE NIN MHAN RẸ HA GHE IBHIO MHAN NIN IKHUO?
3. Be ha rẹkpa mhan rẹ manman ha khuẹnmhẹn ibhio mhan nin ikhuo ranmhude iwẹnna nin ele lu?
3 Mhan yi ibhio mhan nin ikhuo akhuẹnmhẹn bhi uwedẹ nin ele rẹ wẹnna kaka rẹ gbẹloghe azagba-uwa nọnsele, bhi uwedẹ nin ele rẹ deba tẹmhọn Osẹnobulua bi uwedẹ nin ele rẹ rẹkpa bhi agbotu. Ahamiẹn mhan lẹn ẹlo nin Jehova bi Jesu rẹ ghe ibhio mhan nin ikhuo, mhan ki manman ha khuẹnmhẹn ene ibhio mhan nin ikhuo. Beji mhan ha rẹ ha zilo nyan uwedẹ nin Paul rẹ ha ne ikhuo nin ele ko ga lu emhin, mhan ki dọ daghe uwedẹ nọn khẹke nin mhan rẹ ha ne ibhio mhan nin ikhuo lu emhin.
4. Be iBaibo rẹ rẹman yẹ ghe, ẹlo nin Jehova rẹ ghe ikpea ọle yẹ rẹ ghe ikhuo?
4 Baibo rẹkpa mhan lẹn ghe, ẹlo nin Jehova rẹ ghe ikpea ọle yẹ rẹ ghe ikhuo. Bhi ọsi ijiẹmhin, Baibo rẹkpa mhan lẹn ghe, bhi ore nin ọhẹnhẹn, Jehova da re ẹlinmhin nọn khiale nọnsọle nin ikpea bi ikhuo. Ọnan da rẹkpa ele rẹ sabọ ha lu emhin ọhan-ilo, bọsi nan rẹ sabọ ha zẹ urolo kẹkẹ. (Acts 2:1-4, 15-18) Ikpea bi ikhuo, ele Jehova re ẹlinmhin nọn khiale rẹ zẹ nin ele dọ deba iJesu gbẹloghe bhi okhun. (Gal. 3:26-29) Ikpea bi ikhuo, ele ha miẹn isẹhoa rẹ nyẹnlẹn bhi ọne otọ nan bhi ighegheghe. (Rev. 7:9, 10, 13-15) Ikpea bi ikhuo, ele Osẹnobulua mun ọne ẹsọn nan nin ele rẹ ha tẹmhọn ọlẹn. (Matt. 28:19, 20) Bhi ọsi ijiẹmhin, bhi ebe nọnsi Acts, a da sounun bhi elin ọsi okhuo ọkpa natiọle Priscilla. Ọle bi ọdọ ọle natiọle Aquila da gboto ẹmhọn Osẹnobulua fanọn an man Apollos, arẹmiẹn Apollos manman lẹn ebe.—Acts 18:24-26.
5. Be Luke 10:38, 39, 42 rẹ rẹkpa mhan lẹn ẹlo nin Jesu rẹ ghe ikhuo?
5 Jesu wo ha mun ekpẹn nin ikhuo. Ọle bha ha re egbe khọkhọ ekhẹn iPharisee ne ha re ẹlo gbe ikhuo a rẹ sẹbhọ ghe ele ine ikhuo talọ bhi ogbakha, arẹbiẹn nin ele dọ ha man ele ẹmhọn Osẹnobulua. Ọkpakinọn, Jesu wo ha man ikhuo emhin ne dinmhin nọnsi Osẹnobulua. * (Tie Luke 10:38, 39, 42.) Jesu ji ikhuo da ha rẹkhan ọlẹn beji ọle rẹ ha wewe ẹmhọn Osẹnobulua rẹ nabhi agbaẹbho rẹ sẹbhi agbaẹbho. (Luke 8:1-3) Ikhuo, ele ka miẹn iJesu ẹghe nin Jesu rẹ riọkpanọ fo bhi uu. Jesu da je ele nin ele dọ taman etuegbe nesọle ghe ọle riọkpanọ.—John 20:16-18.
6. Be iPaul rẹ rẹman yẹ ghe ọle mun ekpẹn nin ikhuo?
6 Paul wo taman iTimothy ghe, nin ọle ha mun ekpẹn nin ikhuo. Ọ da taman ọlẹn ghe, nin ọle ha ghe ene wanre bhi ẹwẹ ele bii inẹn, ọle a ha ghe ene elasẹre bhi ẹwẹ ele bi ibhio. (1 Tim. 5:1, 2) Arẹmiẹn Paul rẹkpa iTimothy wanre bhi oga, ọle tobọle da yọle ghe obọ inẹn Timothy bi odede ọle, ọle Timothy da ka luẹ ẹmhọn Osẹnobulua. (2 Tim. 1:5; 3:14, 15) Ẹghe nin Paul rẹ gbẹn ilẹta ji Kristiẹn ne ribhi Rome, ọle da sounun bhi elin ọsi ikhuo eso yọle nan tuẹ ele. Ọle bha wo gheghe sounun bhi ẹsọn nin ene ikhuo nan miẹn bhi oga, ọle da yẹ khuẹnmhẹn ele.—Rom. 16:1-4, 6, 12; Phil. 4:3.
7. Inọnta nela mhan ha ki re ewanniẹn ọi nian?
7 Mhan sẹ luẹ kere ghe, ikpea bha ghan gbera ikhuo bhi ẹlo nọnsi Osẹnobulua. Ibhio mhan nin ikhuo mhọn eji ele da yẹ wo rẹkpa bhi agbotu. Ọkhẹke nin ewanlẹn bhi agbotu ha miẹn urẹkpa nọnsele ọbhi egbe nin ọfure bi okugbe da ha ribhi ẹkẹ agbotu. Ọkpakinọn, ọkhẹke nin mhan re ewanniẹn ọbhi ene inọnta nan: Bezẹle nin Jehova da taman ikhuo nin ele ha gbanọ eto ẹgheso? Mhan dẹ be sabọ yọle ghe, ranmhude, ikpea ọkpa a ne ọbhi ihe ọsi ewanlẹn bi ene zẹ sikẹ ene ewanlẹn, okpea nọn hi ki rẹ wo khin hi ebeanlẹn ọsi okhuo nọn hi ki rẹ wo khin?
OKPEA NỌN HI KI RẸ WO KHIN HI EBEANLẸN ỌSI OKHUO NỌN HI KI RẸ WO KHIN?
8. Ephesians 5:23 be rẹman ghe, okpea nọn hi ki rẹ wo khin hi ebeanlẹn ọsi okhuo nọn hi ki rẹ khin bhi ẹkẹ agbotu? Gbotọle fanọn an.
8 Ẹmhọanta be nọn ghe, okpea nọn hi ki rẹ wo khin hi ebeanlẹn ọsi okhuo nọn hi ki rẹ wo khin bhi ẹkẹ agbotu? Eye! Jesu Kristi, ọle ọkpa hi ebeanlẹn ọsi ọrebhe bhi ẹkẹ agbotu. (Tie Ephesians 5:23.) Bhi azagba-uwa, ọdọ hi ebeanlẹn ọsi okhuo ọle. Bhiriọ, ọmọn okpea ida sabọ ha yi ebeanlẹn ọsi inẹn ọlẹn aharẹmiẹn ọle mianmẹn. (Eph. 6:1, 2) Bhi ẹkẹ agbotu, ahu nin ikpea mhọn nin ele rẹ ha gbẹloghe ibhio mhan nin ikpea bi ibhio mhan nin ikhuo, mhọn eji ọsẹle. (1 Thess. 5:12; Heb. 13:17) Ibhio mhan nin ikhuo ne bha sẹ bọ ọdọ ne iyẹ ribhi uwa, sẹyẹ wo mun ekpẹn nin ene biẹ ele bi ewanlẹn ne ribhi ẹkẹ agbotu. Ọkpakinọn, Jesu Kristi ọkpa hi ebeanlẹn nọnsele.
Ibhio mhan ne bha sẹ bọ ọdọ la ne bha sẹ re okhuo ne iyẹ deba ene biẹ ele nyẹnlẹn, odotọ ugbẹloghe nọnsi Jesu ele ye (Fẹ uduọle 8 ghe)
9. Be ọkhẹke nin obhio mhan nin okhuo lu, sade ọle ribhi idia nọn ha re ọle miẹnsọn nọn khẹke okpea bhi ẹkẹ agbotu?
9 Arẹmiẹn ibhio mhan nin ikpea iyi ebeanlẹn rẹji ibhio mhan nin ikhuo nọn hi ki rẹ khin bhi ẹkẹ agbotu, ibhio mhan nin ikpea Jehova ne mundia nin ele ha mun ọkalo bhi iman-emhin bi ilọnmhọn oga rebhe nan lu bhi ẹkẹ agbotu. Ọle bha ne ibhio mhan nin ikhuo ọbhi ọne ihe nan. (1 Tim. 2:12) Bezẹle? Ranmhude, ọle guanọ nan ha lu emhin rebhe rẹkhan emhanmhan bhi agbotu nọnsọle. Ọnan zẹle nin ọle da yẹ re iJesu mundia nin ọle ha yi Ebeanlẹn ọsi ikpea. Idia eso ribhọ nin ikhuo ha da sabọ lu iwẹnna nọn khẹke nin ikpea lu bhi ẹkẹ agbotu. Ọkpakinọn, ọkuẹsẹ ele lu ọle, Osẹnobulua da yọle ọkhẹke nin ele gbanọ eto. * (1 Cor. 11:4-7) Osẹnobulua guanọ nin ele ha gbanọ eto bhi idia nọn sẹ inian, ranmhude, ọle ho nin ele re ọne isẹhoa nan rẹman ghe, ele mun ekpẹn nin ene ribhi ihe bhi ẹkẹ agbotu. Ọnan bha rẹman ghe ọle re ẹlo gbe ene ikhuo a. Ejayenan nian, bha ji mhan wanniẹn ọne inọnta nan: Ihe nin ọwanlẹn ye bhi agbotu bi ọne ọdafẹn-uwa ye bhi azagba-uwa nọnsọle, abọkpa be nọn?
IWẸNNA ỌSI EWANLẸN BHI AGBOTU BI ỌSI ỌDAFẸN-UWA
10. Be ha sabọ re ọwanlẹn bhi agbotu ha riale ghe, ọle dẹ sabọ ha gbuhi nin ene ribhi ẹkẹ agbotu?
10 Ewanlẹn bhi agbotu hoẹmhọn iJesu Kristi. Ele yẹ hoẹmhọn ihuan nin Jehova bi Jesu taman ele nin ele ha gbẹloghe. (John 21:15-17) Ọwanlẹn bhi agbotu sabọ ha ghe egbe ọle bii aba rẹji ene ribhi ẹkẹ agbotu ranmhude ọle hoẹmhọn ele. Ọle sabọ ha riale ghe, ahamiẹn ọdafẹn bhi uwa mhọn ọne ahu nin ọle rẹ gbuhi nin azagba-uwa nọnsọle nin ọle rẹ gbega ele, ọwanlẹn bhi agbotu dẹ yẹ sabọ ha gbuhi nin ene ribhi ẹkẹ agbotu. Ene ribhi agbotu dẹ sabọ si ene ewanlẹn ọbhọ nin ele ha re inian ria eria, sade ele bu ene ewanlẹn nin ele ha taman ele ebi ele ha lu. Sokpan, ihe nin ọwanlẹn ye bhi agbotu bi ọne ọdafẹn ye bhi azagba-uwa, ọkpa be nọn?
Ewanlẹn hi ene rẹkpa agbotu rẹ ha ziẹn ikolu nin ele bi Jehova ko mhọnlẹn. Ele re oyẹẹ man ọrebhe bhi ẹkẹ agbotu. Jehova re ahu nin ele rẹ khu ọria nọn bha ka fidenọ sibhi agbotu re (Fẹ uduọle 11 bi 12 ghe)
11. Bezẹle nin mhan ha da sabọ yọle ghe, iwẹnna ọsi ọwanlẹn bhi agbotu bi ọsi ọdafẹn-uwa mhọn eji ele da khọ egbe?
11 Paul nin odibo rẹman ghe, ihe ọsi ewanlẹn bhi agbotu, bi ọne ọdafẹn ye bhi azagba-uwa mhọn eji ele da khọ egbe. (1 Tim. 3:4, 5) Bhi ọsi ijiẹmhin, Jehova guanọ nin ọrebhe bhi azagba-uwa ha hẹnmhọn nin ọdafẹn nọnsele. (Col. 3:20) Iriọ ọle yẹ rẹ guanọ nin ọrebhe bhi ẹkẹ agbotu ha hẹnmhọn nin ene ewanlẹn ne ribhi ẹkẹ agbotu. Jehova guanọ nin ọdafẹn bhi uwa bi ewanlẹn ne ribhi ẹkẹ agbotu rẹkpa ẹbho nin ele gbẹloghe rẹ dọ manman hoẹmhọn ọlẹn. Jehova yẹ guanọ nin ele ha re oyẹẹ man ẹbho nin ele gbẹloghe. Beji ọdafẹn-uwa rẹ rẹkpa azagba-uwa nọnsọle sade ele ribhi ọnọghọ, iriọ Jehova yẹ rẹ guanọ nin ewanlẹn bhi agbotu ha rẹkpa ene ribhi ẹkẹ agbotu sade ele ribhi ọnọghọ. (Jas. 2:15-17) Rẹ deba enan, Jehova yẹ guanọ nin ewanlẹn bhi agbotu bi ọdafẹn-uwa ha rẹkpa ene ele gbẹloghe rẹ ha re obọ rẹkhan uhi nesọle. Jehova iguanọ nin ele ha man ẹbho emhin ne iribhi Baibo.—1 Cor. 4:6.
Ọdafẹn-uwa Jehova re mundia nin ọle ha mun ọkalo bhi azagba-uwa nọnsọle. Ọkuẹsẹ ọdafẹn-uwa nọn mhọn oyẹẹ tare ebi a ha rẹ lu emhin yẹ bhi uwa, ọle dẹ ka deba okhuo ọle zilo ọle (Fẹ uduọle 13 ghe)
12-13. Beji Romans 7:2 rẹman, be ihe ọsi ọwanlẹn bhi agbotu rẹ dikẹ bhi ọsi ọdafẹn-uwa yẹ?
12 Arẹmiẹn ihe ọsi ọwanlẹn bhi agbotu, bi ọsi ọdafẹn-uwa mhọn eji ele da khọ egbe, ele wo manman dikẹ. Bhi ọsi ijiẹmhin, Jehova re ahu nin ewanlẹn bhi agbotu rẹ sabọ ha bhohiẹn sade ẹmhọn zegbere bhi ẹkẹ agbotu. Ọle yẹ re ahu nin ele rẹ sabọ khu ọria nọn bha ka fidenọ sibhi agbotu re.—1 Cor. 5:11-13.
13 Bhi obọ nọnkẹle, emhin eso yẹ ribhọ nin Osẹnobulua re ahu nin ọdafẹn-uwa rẹ lu, sokpan, ọle bha re ahu nin ewanlẹn bhi agbotu rẹ lu ọle. Bhi ọsi ijiẹmhin, ọdafẹn-uwa mhọn ọne ahu nin ọle rẹ gbuhi ọbhi otọ nin ene ribhi azagba-uwa nọnsọle. Ọle yẹ mhọn ọne ahu rẹ lu ọle nin ọrebhe re obọ rẹkhan ene uhi. (Tie Romans 7:2.) Ọle mhọn ọne ahu rẹ taman imọn nesọle ẹghe nin ele ha rẹ ha nabhi uwa ọsemuan. Ọle mhọn ọne ahu rẹ re oya nin ọmọn nọnsọle nọn bha re obọ rẹkhan ọne uhi nan. (Eph. 6:1) Ọdafẹn-uwa nọn mhọn oyẹẹ dẹ ka deba okhuo ọle zilo fo, ọkuẹsẹ ọle gbuhi ọbhi otọ bhi uwa ranmhude efun ọkpa ele khin. *—Matt. 19:6.
MUN EKPẸN NIN JESU—ỌNỌN SUN AGBOTU NỌNSI OSẸNOBULUA
Jesu ribhi odotọ ugbẹloghe nọnsi Jehova beji ọle rẹ sun agbotu (Fẹ uduọle 14 ghe)
14. (a) Beji Mark 10:45 rẹman, bezẹle nọn da yi emhin nọn gbale ghe, Jesu Jehova re mundia nin ọle ha gbẹloghe agbotu? (b) Be bhọ ẹsọn ọsi Otu Nọn Sun Oga? (Fẹ ẹkpẹti ghe nọn yọle “ Iwẹnna ọsi Otu Nọn Sun Oga.”)
14 Iẹnlẹn nọnsi Jesu, ọle Jehova rẹ dẹ ọrebhe ne ribhi ẹkẹ agbotu. Ọne izọese nọnsi Jesu zẹle nin ọrebhe da mhọn ọne isẹhoa rẹ vae bhi agbotu nọnsi Jehova dọ ha ga ọle. (Tie Mark 10:45; Acts 20:28; 1 Cor. 15:21, 22) Bhiriọ, emhin nọn gbale nọn nin Jehova rẹ re Jesu mundia nin ọle ha sun agbotu. Jesu mhọn ọne ahu rẹ gbuhi ọbhi otọ nin ene ribhi agbotu ha rẹkhan. Ọle yẹ mhọn ọne ahu rẹ lu ọle nin ọrebhe ha rẹkhan ene uhi. (Gal. 6:2) Sokpan, ọ iyi uhi ọkpa Jesu wo gbe ọbhi otọ. Ọle yẹ gbẹloghe mhan nọnsẹn ranmhude ọle hoẹmhọn mhan.—Eph. 5:29.
15-16. Be uwẹ miẹn luẹ bhi ọta nin obhio mhan nin okhuo natiọle Marley tale? Be uwẹ yẹ miẹn luẹ bhi ọne iBenjamin tale?
15 Ibhio mhan nin ikhuo dẹ rẹman ghe, ele mun ekpẹn nin Jesu Kristi sade ele hẹnmhọn nin ikpea nin ọle ne ọbhi ihe nin ele ha gbẹloghe ele. Obhio mhan nin okhuo natiọle Marley nọn nyẹnlẹn bhi United States da tale ghe, ọ ti ọle bhọ rẹ ha ribhi odotọ ọdọ ọle, ghe ọ yẹ wo ti ọle bhọ rẹ ha lu eka nọn khẹke ọle bhi ẹkẹ agbotu. Ọle da yọle: “Ẹghe rebhe mẹn rẹ wẹnna kaka nin mẹn rẹ ha mun ekpẹn nin ọdọ mẹn, bi ewanlẹn ne ribhi ẹkẹ agbotu, ranmhude ihe nin Jehova ne ele ọi. Ọdọ mẹn bi ewanlẹn ne ribhi ẹkẹ agbotu wo re ọle lẹkhẹ nin mẹn rẹ lu iriọ, ranmhude ele mun ekpẹn nin mẹn yẹ gbekhuẹnmhẹn nin mẹn bhi iwẹnna nin mẹn lu.” Ibhio mhan nin ikhuo wo rẹọbhi ebi ọne obhio mhan nan tale.
16 Ahamiẹn ibhio mhan nin ikpea mun ekpẹn nin ibhio mhan nin ikhuo, ele ki rẹman ghe ele re obọ rẹkhan emhanmhan nọnsi Jehova. Obhio mhan nin Benjamin nọn nyẹnlẹn bhi England da yọle: “Mẹn wo miẹn emhin ne bunbun luẹ bhi ewanniẹn nin ibhio mhan nin ikhuo re ọbhi inọnta bhi ikolo oga. Sẹyẹ, mẹn yẹ wo miẹn emhin luẹ bhi obọ ele bhi uwedẹ nin ele rẹ tẹmhọn Osẹnobulua bi uwedẹ nin ele rẹ man emhin sade mhan ribhi inẹbho. Mẹn riale ghe iwẹnna kpataki ele lu.”
17. Bezẹle nọn da khẹke nin mhan ha re obọ rẹkhan emhanmhan nin Jehova re ọbhi otọ?
17 Ahamiẹn ikpea, ikhuo, ene ọdafẹn-uwa bi ewanlẹn bhi ẹkẹ agbotu re obọ rẹkhan emhanmhan nin Jehova re ọbhi otọ, ọfure ki wo ha ribhi ẹkẹ agbotu. Ọnọn ke okhun nẹ hi, mhan ki ha re ogẹn ji Aba mhan nọn ribhi okhun.—Ps. 150:6.
ILLO 123 Ha Re Obọ Rẹkhan Adia Nin Jehova Rẹ Nin Mhan
^ udu ọle 5 Iwẹnna nela Jehova mun nin ikhuo bhi ẹkẹ agbotu? Ẹmhọanta be gene nọn ghe, okpea nọn hi ki rẹ wo khin hi ebeanlẹn ọsi okhuo nọn hi ki rẹ wo khin? Ihe nin ọwanlẹn ye bhi agbotu bi ọne ọdafẹn ye bhi azagba-uwa, abọkpa be nọn? Bhi ọne uhọnmhọn-ọta nan, mhan dẹ noo iBaibo rẹ re ewanniẹn ọbhi ene inọnta nin.
^ udu ọle 5 Fẹ uduọle nọnzi 6 ghe bhi uhọnmhọn-ọta nọn yọle “Ha Rẹkpa Ibhio Mhan Nin Ikhuo.” Ọne Ọkhẹughe ọsi September 2020, ọle ọ da dagbare.
^ udu ọle 9 Fẹ ọne ẹkpẹti ghe nọn yọle, “ Idia Eso Nọn Da Khẹke Nin Okhuo Gbanọ Eto”
^ udu ọle 13 Nin mhan rẹ lẹn họla mhọn ọne ahu rẹ tare agbotu nela azagba-uwa ha deba, fẹ uduọle 17 rẹ sẹbhi 19 ghe bhi uhọnmhọn-ọta nọn yọle “Ha Mun Ekpẹn Nin Ọrebhe bhi Ẹkẹ Agbotu Nọnsi Jehova.” Ọne Ọkhẹughe ọsi August 2020, ọle ọne uhọnmhọn-ọta na dagbare.
^ udu ọle 59 Ahamiẹn uwẹ guanọ eji a da gbotọ ọne ẹmhọn nan fanọn an, fẹ apapale 209 rẹ sẹbhi 212 ghe, bhi ebe natiọle “Keep Yourselves in God’s Love.”
^ udu ọle 64 Nin bha rẹ manman lẹn iwẹnna ọsi Otu Nọn Sun Oga, bha fẹ apapale 20 rẹ sẹbhi 25 ghe, bhi Watchtower ọsi July 15, 2013.
