UHỌNMHỌN-ỌTA NỌNZI 5
“Kristi Hi Uhọnmhọn ọsi Okpea”
“Kristi hi uhọnmhọn ọsi okpea.”—1 COR. 11:3.
ILLO 12 Jehova Hi Osẹ Nọn Kpọnọ Nẹ
EBI MHAN DA LUẸ *
1. Emhin nela ha sabọ rẹso uwedẹ nin okpea rẹ nin okhuo ọle bi imọn nesọle lu emhin?
BE UWẸ riale a re ọle ta nin okpea rẹ ha yi ọdafẹn ọsi azagba-uwa? Ikpea eso rẹọbhọ ghe, uwedẹ nan rẹ lu emhin bhi eji ele na vae, bi uwedẹ nan rẹ bẹẹ ele wanre, ọle ọkhẹke nin ele yẹ rẹ ha nin ikhuo ele bi imọn nesele ha lu emhin. Obhio mhan natiọle Yanita nọn na bhi Europe vae da yọle, “Bhi eji mẹn da nyẹnlẹn, ẹbho wo manman re ẹlo gbe ikhuo a, ele ki yẹ ha ghe ele bii igbọn.” Obhio mhan ọkpa natiọle Luke nọn nyẹnlẹn bhi United States da yọle, aba eso ki ha taman imọn ikpea nesele ghe, ikhuo imhọn unun nan rẹ talọ bhi eji ikpea ye, ghe ebi ele ha ta imhọn uhọnmhọn hiehie.” Ọkpakinọn, ọ iyi inian Jehova guanọ nin ikpea rẹ ha nin ikhuo lu emhin. (Yẹ fẹ Mark 7:13 ghe.) Bhiriọ, be bhọ okpea ha rẹ sabọ ha yi ọdafẹn-uwa nọn mhẹn yẹ?
2. Be bhọ ọkhẹke nin ọdafẹn-uwa ka lẹn? Bezẹle?
2 Nin okpea rẹ ha yi ọdafẹn-uwa nọn mhẹn, ọkhẹke nin ọle ka lẹn ebi Jehova guanọ nin ọle lu. Ọ yẹ khẹke nin ọle lẹn ebezẹle nin Jehova da re ọle ọbhi ọne ihe nan, bi ebi ọle ha miẹn luẹ bhi ijiẹmhin nọnsi Jehova bi Jesu. Bezẹle nọn da khẹke nin ikpea lẹn enan rebhe? Ranmhude, Jehova hi ọnọn re ele ọbhi ọne ihe nan. Bhiriọ, ọle guanọ nin ele noo ọne ihe nan nọnsẹn.—Luke 12:48b.
BE IJEHOVA RẸ MHANMHAN AZAGBA-UWA NỌNSỌLE YẸ?
3. Be imhan miẹn luẹ bhi 1 Corinthians 11:3 bhi uwedẹ nin Jehova rẹ mhanmhan azagba-uwa nọnsọle?
3 Tie 1 Corinthians 11:3. Ọne ulọnlẹn nan rẹman ebi Jehova rẹ mhanmhan azagba-uwa nọnsọle yẹ bhi otọ bi okhun. Ranmhude Jehova hi uhọnmhọn azagba-uwa rebhe, ọle mhọn ọne ahu nin ọle rẹ tare ebi ọdafẹn-uwa ha rẹ re emhin khian yẹ. Bhiriọ, ọdafẹn-uwa rebhe dẹ taman iJehova ebi ele rẹ re emhin khian yẹ. (Rom. 14:10; Eph. 3:14, 15) Jehova re iJesu mundia nin ọle ha sun agbotu. Sokpan, Jesu dẹ taman iJehova ebi ọle rẹ ne mhan lu emhin yẹ. (1 Cor. 15:27) Jehova yẹ re ọdọ mundia nin ọle ha gbẹloghe azagba-uwa nọnsọle. Ọkpakinọn, ọdọ dẹ taman iJehova bi Jesu ebi ọle rẹ ne azagba-uwa nọnsọle lu emhin yẹ.—1 Pet. 3:7.
4. Be iJehova bi Jesu mhọn ọne ahu rẹ lu?
4 Ranmhude Jehova hi Uhọnmhọn azagba-uwa ne ribhi otọ bi okhun, ọle mhọn ọne ahu nin ọle rẹ gbuhi rẹ taman ele ebi ele ha rẹ re emhin khian yẹ. Ọle dẹ yẹ sabọ luọle nin ele re obọ rẹkhan ọlẹn. (Isa. 33:22) Ranmhude Jesu hi ọnọn sun agbotu, ọle mhọn ọne ahu nin ọle rẹ gbuhi, yẹ luọle nin mhan re obọ rẹkhan ọlẹn.—Gal. 6:2; Col. 1:18-20.
5. Ahu nela ọdafẹn-uwa mhọnlẹn? Be bhọ ọle imhọn ọne ahu rẹ lu?
5 Ọkhẹke nin ọdafẹn-uwa ha gbuhi ọbhi otọ nin ene ribhi azagba-uwa nọnsọle beji Jehova bi Jesu lu. (Rom. 7:2; Eph. 6:4) Ọkpakinọn, ọne ahu nan mhọn eji ọsẹle. Bhi ọsi ijiẹmhin, ọkhẹke nin uhi nin ọle gbe diẹn obọ mun adia ne ribhi Baibo. (Prov. 3:5, 6) Ọle imhọn ahu rẹ gbuhi nin ẹbho ne iribhi azagba-uwa nọnsọle. (Rom. 14:4) Imọn nesọle ha wanre sibhi uwa re, ọkhẹke nin ele yẹ ha mun ekpẹn nanlẹn, sokpan ele iyẹ ribhi odotọ ọle.—Matt. 19:5.
BEZẸLE NIN JEHOVA DA MHANMHANLẸN NIN ẸBHO ESO HA RIBHI IHE?
6. Bezẹle nin Jehova da mhanmhanlẹn nin azagba-uwa ha mhọn ọdafẹn?
6 Oyẹẹ nin Jehova mhọn da ene ga ọle zẹle nin ọle da mhanmhanlẹn nin ẹbho eso ha ribhi ihe bhi ẹwẹ ele. Ẹsele ọle re ọle lu nin mhan. Ọnan zẹle nin azagba-uwa nọnsi Jehova da sabọ lu emhin kugbe bhi ọfure. (1 Cor. 14:33, 40) Sade mhan bha lẹn ọnọn khẹke nọn ha mun ọkalo bhi azagba-uwa la bhi agbotu nọn, ene ga iJehova irẹ ha ghọnghọn. Sẹyẹ, emhin irẹ ha khian nọnsẹn. Bhi ọsi ijiẹmhin, ọria soso bhi azagba-uwa irẹ lẹn ọnọn khẹke nọn ha gbuhi ọbhi otọ, yẹ mun ọkalo rẹ re obọ rẹkhan ene uhi.
7. Beji Ephesians 5:25, 28 rẹman, Jehova be guanọ nin ikpea ha denyẹnyẹn ikhuo ele?
7 Ahamiẹn emhin esili nọn nin Osẹnobulua rẹ mhanmhanlẹn nin okpea ha yi ọdafẹn bhi uwa, bezẹle nin ikhuo ne bunbun da riale ghe, ọdọ ele denyẹnyẹn ele, ghe ele iji ele da zẹ-obọ-zẹ-oẹ? Ele re inian ria eria ranmhude, ikpea ne bunbun ire obọ rẹkhan adia nin Jehova gbe ọbhi otọ nin ene ribhi azagba-uwa ha re obọ rẹkhan. Sokpan, uwedẹ nan rẹ lu emhin bhi eji ele na vae ele lu rẹkhan. Ikpea eso yẹ wo re obọ oya mun ikhuo ele ranmhude ele guanọ nin ele rẹman ẹbho ghe, ikpea ele gene khin, ghe ele nyan uwa. Ikpea ne sẹ inian ki ha riale ghe, aharẹmiẹn ikhuo ele bha hoẹmhọn ele, ele dẹ sabọ lu ọle nin ọne okhuo da ha mun ofẹn ele. Bhiriọ, ene ikhuo ha ki ha mun ofẹn ele, ele iyẹ da gbudu ha talọ dagbare bhi uwa. * Ikpea ne re inian lu emhin yẹ ria eria, ele ire obọ esili mun ikhuo ele. Emhin nin ele lu bha diẹn mun iho nọnsi Jehova, bhiriọ, emhin ọbe ele lu.—Tie Ephesians 5:25, 28.
BE OKPEA HA RẸ SABỌ HA YI ỌDAFẸN-UWA NỌN MHẸN YẸ?
8. Be okpea ha rẹ sabọ ha yi ọdafẹn-uwa nọn mhẹn yẹ?
8 Ahamiẹn okpea guanọ nin ọle ha yi ọdafẹn nọn mhẹn, ọkhẹke nin ọle re egbe khọkhọ uwedẹ nin Jehova bi Jesu rẹ noo ihe nọnsele. Bha ji mhan zilo nyan ikpẹ eva nin Jehova bi Jesu rẹman, bi uwedẹ nin ọdafẹn-uwa ha rẹ ha re ene ikpẹ nan man sade ọle ne okhuo ọle bi imọn nesọle lu emhin.
9. Be iJehova rẹ re idegbere man yẹ?
9 Idegbere. Arẹmiẹn iJehova hi ọnọn mhọn ẹwanlẹn nẹ bhi ọne agbọn nan rebhe, ọle ka ene ga ọle ehọ sade ele talọ. (Gen. 18:23, 24, 32) Ọle re isẹhoa nin ẹbho nin ọle gbẹloghe rẹ ta ebe re ele bhi ọkhọle dagbare. (1 Ki. 22:19-22) Arẹmiẹn Jehova wo khia, ọle ikhẹ nin mhan wo khia bii ọle ẹlẹnan nian. Ọle rẹkpa mhan nin emhin kiẹn ọlẹn nin mhan arẹmiẹn eria olukhọ mhan khin. (Ps. 113:6, 7) Bhi ọsi ẹmhọanta, Baibo tie iJehova ọnọn rẹkpa mhan. (Ps. 27:9; Heb. 13:6) David nin Ojie bhọ da tale ghe idegbere nọnsi Jehova, ọle rẹkpa ọle rẹ lu emhin rebhe nin ọle sabọ lu.—2 Sam. 22:36.
10. Be iJesu rẹ re idegbere man yẹ?
10 Bha ji mhan fẹ ijiẹmhin nọnsi Jesu ghe. Arẹmiẹn ọle hi Ebeanlẹn ọsi edibo nesọle, ọle da yẹ kpe ele oẹ. Bezẹle nin Jehova da ji ọne ijiẹmhin nan nọnsi Jesu ha ribhi Baibo? Ranmhude, ọle guanọ nin ọdafẹn-uwa bi ẹbho ebhebhe re egbe khọkhọ ọne ijiẹmhin nan nọnsi Jesu. Jesu tobọle bhọ da yọle: “Mẹn re ijiẹmhin man bha, beji a ha da miẹn ghe, ebi mẹn lu, ọle bha ha yẹ lu.” (John 13:12-17) Arẹmiẹn ihe nọn khua Jesu ye, ọle bha ha khẹ ne ẹbho dọ ga ọle. Sokpan, ọle hi ọnọn ha lu emhin rẹ rẹkpa ẹbho.—Matt. 20:28.
Ọdafẹn-uwa dẹ rẹman ghe ọle mhọn idegbere sade ọle miẹnsọn kẹkẹ bhi uwa, bi sade ọle rẹkpa ene ribhi azagba-uwa nọnsọle rẹ ziẹn ikolu nin ele bi Jehova ko mhọnlẹn (Fẹ uduọle 11 bi 13 ghe)
11. Uwedẹ nela ọdafẹn-uwa ha rẹ re egbe khọkhọ iJehova bi Jesu bhi uwedẹ nin ele rẹ re idegbere man?
11 Ebi mhan miẹn luẹ bhọ. Ọdafẹn-uwa dẹ sabọ re idegbere man bhi uwedẹ kẹkẹ. Bhi ọsi ijiẹmhin, ọle ida ha riale ghe okhuo ọle bi imọn nesọle ida fiobọdọn. Aharẹmiẹn emhin nin ele ta dikẹ bhi ebi ọle mhọn bhi ọkhọle, ọle ki yẹ ka ele ehọ. Okhuo ọkpa natiọle Marley nọn nyẹnlẹn bhi United States da yọle: “Ẹgheso, emhin kikẹ imẹn bi ọdọ mẹn ko mhọn bhi ọkhọle. Ọrẹyiriọ, ọle ka mẹn ehọ yẹ ria eria nyan ebi mẹn tale, ọkuẹsẹ ọle tare ebi a ha rẹ re emhin khian yẹ. Ranmhude ọnan, mẹn da wo dọ rẹọbhọ ghe, ọle hoẹmhọn mẹn, ghe ọle yẹ mun ekpẹn nin mẹn.” Uwedẹ ọbhebhe nin okpea ha rẹ rẹman ghe ọle mhọn idegbere hi, ọle ki ha miẹnsọn bhi uwa, aharẹmiẹn ene nyẹnlẹn bhi idunmhun nọnsele ghe ene ẹsọn bii ẹsọn ọsi ikhuo. Sokpan, ọnan iyi emhin nọn lẹkhẹ. Bezẹle? Obhio mhan nin okhuo natiọle Rachel da yọle: “Bhi eji mẹn na vae, ahamiẹn okpea rẹkpa okhuo ọle kpe ekpan, la rẹkpa ọle gbọnọ uwa, idiake nesọle la ibhio ọle ki ha tale ghe, ọle iyi okpea, ghe okhuo ọle bhọ hi ọnọn ki re ọle ọbhi uwa. Ahamiẹn inian ọ yẹ dia bhi eji uwẹ da nyẹnlẹn, yere ghe, Jesu kpe oẹ ọsi edibo nesọle, arẹmiẹn ẹbho ghe ọne ẹsọn nan bii ẹsọn ọsi igbọn. Ọdafẹn nọn mhẹn dẹ ha khu ọbhọ nin okhuo ọle bi imọn nesọle ha ghọnghọn. Ọ iyi ebe ha re ẹbho ha ghe ọle bii okpọria ọle ha mun kalo ha khu. Gbera idegbere, ikpẹ ọbhebhe nela ha rẹkpa okpea nin ọle da ha yi ọdafẹn-uwa nọn mhẹn?
12. Be iJehova bi Jesu lu ranmhude oyẹẹ nin ele mhọn da mhan?
12 Oyẹẹ. Oyẹẹ re iJehova lu emhin rebhe nin ọle lu. (1 John 4:7, 8) Ọle da gbẹn iBaibo nin mhan, yẹ tie mhan vae bhi agbotu nọnsọle, nin ọle rẹ rẹman ghe ọle hoẹmhọn mhan, ghe, ọle guanọ nin mhan kiẹn imọẹ ọle. Ọle gbega mhan yẹ guanọ nin mhan ha ghọnghọn. Jehova yẹ re emhin rebhe nin mhan nin mhan rẹ ha gbẹloghe egbe yẹ rẹ sọnyẹnmhẹn bhi iẹnlẹn. (1 Tim. 6:17) Aharẹmiẹn mhan fiobọdọn, ọle ki dia mhan bhi uwedẹ. Sokpan, ọle ida zobọ bhọ rẹ sẹyẹ ha hoẹmhọn mhan. Ranmhude oyẹẹ nin Jehova mhọn da mhan, ọle da je iJesu re nin ọle dọ yu nin mhan. Jesu yẹ hoẹmhọn mhan sẹbhọ ghe, ọle da muegbe rẹ yu ọbhi olukhọ nọnsẹmhan. (John 3:16; 15:13) Emhin soso iribhọ nọn ha re iJehova bi Jesu zobọ bhọ rẹ hoẹmhọn ene sun rẹkhan ele.—John 13:1; Rom. 8:35, 38, 39.
13. Bezẹle nọn da yi emhin kpataki nin ọdafẹn-uwa rẹ ha re oyẹẹ nin ene ribhi azagba-uwa nọnsọle lu emhin? (Yẹ fẹ ẹkpẹti ghe nọn yọle “ Ebi Okpea Nọn La Re Okhuo Ha Rẹ Lu Emhin Yẹ, Nin Okhuo Ọle Da Ha Mun Ekpẹn Nanlẹn”)
13 Ebi mhan miẹn luẹ bhọ. Oyẹẹ ọkhẹke nin ọdafẹn-uwa rẹ ha lu emhin rebhe nin ọle lu. Bezẹle nọn da yi emhin kpataki nin ọle rẹ lu iriọ? John nin odibo da re ewanniẹn ọbhọ ẹghe nin ọle rẹ yọle: “Ọria nọn bha sabọ hoẹmhọn obhio ọle [la azagba-uwa nọnsọle] nin ọle daghe, ida sabọ hoẹmhọn Osẹnobulua nin ọle isabọ daghe.” (1 John 4:11, 20) Ọdafẹn-uwa nọn hoẹmhọn ene ribhi azagba-uwa nọnsọle, nọn yẹ guanọ nin ọle re egbe khọkhọ iJehova bi Jesu dẹ rẹkpa azagba-uwa nọnsọle deba iJehova ha mhọn ikolu nọn ziẹnlẹn. Ọle dẹ ha ne ebi azagba-uwa nọnsọle ha rẹ ha gbẹloghe egbe nin ele, yẹ rẹman ele ghe ọle hoẹmhọn ele. (1 Tim. 5:8) Ọle dẹ bẹẹ imọn nesọle wanre bhi uwedẹ nọn diale. Emhin ne ha re ogẹn ji Jehova, ne ha yẹ sabọ rẹkpa azagba-uwa nọnsọle, ele ọkpa ọle ha zẹ rẹ lu. Ejayenan nian, bha ji mhan zilo nyan ebi ọdafẹn-uwa ha rẹ sabọ re egbe khọkhọ iJehova bi Jesu yẹ, beji ọle ha rẹ ha lu ene emhin nan rebhe.
EMHIN NE KHẸKE NIN ỌDAFẸN-UWA HA LU
14. Be ọdafẹn-uwa ha rẹ rẹkpa ene ribhi azagba-uwa nọnsọle rẹ deba iJehova ha mhọn ikolu nọn ziẹnlẹn yẹ?
14 Ọle dẹ rẹkpa ene ribhi azagba-uwa nọnsọle rẹ deba iJehova ha mhọn ikolu nọn ziẹnlẹn. Jesu wo re egbe khọkhọ Aba ọle beji ọle rẹ ha rẹkpa ẹbho ne rẹkhan ọlẹn rẹ ha mhọn urẹọbhọ nọn ziẹnlẹn. (Matt. 5:3, 6; Mark 6:34) Inian ọ yẹ khẹke nin ọdafẹn ha lu bhi azagba-uwa ẹlẹnan. Ọkhẹke nin ọle ha rẹkpa ene ribhi azagba-uwa nọnsọle rẹ deba iJehova ha mhọn ikolu nọn ziẹnlẹn. Ọnan emhin kpataki nọn khẹke nin ọle ha mun kalo. (Deut. 6:6-9) Be ọle ha rẹ lu ọnan yẹ? Ọle ki mhanmhanlẹn nan miẹn ghe, ọle bi azagba-uwa nọnsọle luẹ iBaibo, yo ikolo oga, yẹ tẹmhọn Osẹnobulua. Ọnan ki rẹkpa ele rẹ deba iJehova ha mhọn ikolu nọn ziẹnlẹn.
15. Be ọdafẹn-uwa ha rẹ rẹman ene ribhi azagba-uwa nọnsọle yẹ ghe, ọle hoẹmhọn ele?
15 Ọkhẹke nin ọle rẹman ene ribhi azagba-uwa nọnsọle ghe ọle hoẹmhọn ele. Bhi isira ẹbho ne bunbun, Jehova da taman iJesu ghe ọle hoẹmhọn ọlẹn. (Matt. 3:17) Jesu yẹ rẹman edibo nesọle ghe ọle hoẹmhọn ele bhi uwedẹ nin ọle rẹ ne ele lu emhin, bi ebi ọle taman ele. Ele da yẹ taman iJesu ghe, ele hoẹmhọn ọlẹn. (John 15:9, 12, 13; 21:16) Ọdafẹn-uwa dẹ sabọ re ebi ọle lu rẹ taman okhuo ọle bi imọn nesọle ghe, ọle hoẹmhọn ele. Bhi ọsi ijiẹmhin, ọle ki ha deba ele luẹ iBaibo. Ọ yẹ khẹke nin ọle ha taman ele ghe ọle hoẹmhọn ele, ghe ẹmhọn ele ti ọle bhọ. Sẹyẹ, ọle ki yẹ ha khuẹnmhẹn ele bhi isira ẹbho.—Prov. 31:28, 29.
Nin ọdafẹn-uwa rẹ re iJehova ha ghọnghọn, ọkhẹke nin ọle ha wẹnna nin ọle miẹn ebi ọle ha rẹ ha gbẹloghe azagba-uwa nọnsọle (Fẹ uduọle 16 ghe)
16. Emhin ọbhebhe nela ọkhẹke nin ọdafẹn-uwa ha lu? Be ọle ha rẹ lu ọnan ọbhi oleghe yẹ?
16 Ọkhẹke nin ọle ha ne ebi azagba-uwa nọnsọle ha rẹ ha gbẹloghe egbe nin ele. Jehova wo ha ne ebi ibhokhan Izrẹl ha rẹ ha gbẹloghe egbe nin ele, arẹmiẹn ele gbobọrauhi nesọle. (Deut. 2:7; 29:5) Jehova sẹyẹ wo ne ebi mhan ha rẹ ha gbẹloghe egbe nin mhan ẹlẹnan. (Matt. 6:31-33; 7:11) Sẹyẹ, Jesu da re ebale nin ene ha rẹkhan ọlẹn. (Matt. 14:17-20) Ọle da yẹ re egbe daan ẹbho ne bunbun ne ha khọnmhọn. (Matt. 4:24) Ọdafẹn-uwa dẹ ha re iJehova ghọnghọn sade ọle guanọ ebi ọle ha rẹ ha gbẹloghe azagba-uwa nọnsọle. Ọkpakinọn, ọkhẹke nin ọle lu ọle ọbhi oleghe. Ọ bha khẹke nin ọle ha noo ẹghe nọnsọle rebhe bhi isi iwẹnna rẹ sẹbhọ ghe, ọle iyẹ da sabọ ha gbẹloghe ele bhi uwedẹ oriọn, yẹ rẹman ele ghe ọle hoẹmhọn ele.
17. Ijiẹmhin nela Jehova bi Jesu re ọbhi otọ, bhi uwedẹ nin ele rẹ re adia nin mhan?
17 Ọkhẹke nin ọle ha re adia nin ene ribhi azagba-uwa nọnsọle. Jehova re adia nin mhan ranmhude ọle guanọ nin ọle rẹkpa mhan. (Heb. 12:7-9) Beji Jehova lu, Jesu yẹ wo re oyẹẹ re adia nin mhan. (John 15:14, 15) Ọle ida zobọ bhọ rẹ re adia nin mhan aharẹmiẹn ọne adia dẹ ba mhan bhi egbe. Sokpan, oyẹẹ ọle ha rẹ lu ọle. (Matt. 20:24-28) Ọle lẹn sẹbhọ ghe, ọ bha gba nin mhan fo, bhiriọ mhan dẹ sabọ fiobọdọn.—Matt. 26:41.
18. Be ọkhẹke nin ọdafẹn-uwa nọn mhẹn yere?
18 Jehova bi Jesu, ọle ọdafẹn-uwa re egbe khọkhọ sade ọle rẹhunmhan okhuo ọle bi imọn nesọle, ahamiẹn ele fiobọdọn. Ọle ida ha to mun ele. (Col. 3:19) Ọkpakinọn, ọle ki ha re ifuẹkẹ dia ele beji Galatians 6:1 tale. Sẹyẹ, ọle ki ha yere ghe, ọle tobọle bhọ yẹ fiobọdọn. Ọle ki yẹ ha dọnmhegbe rẹ re ijiẹmhin esili nọnsọle rẹ rẹkpa ele beji Jesu lu.—1 Pet. 2:21.
19-20. Be ọdafẹn ha rẹ re egbe khọkhọ iJehova bi Jesu yẹ, sade ọle ho nin ọle zẹ ebi azagba-uwa nọnsọle ha lu?
19 Ọle ida ha khu ọsi egbe ọle ọkpa sade ọle ho nin ọle tare ebi a ha rẹ lu emhin yẹ bhi azagba-uwa. Emhin ne ha mhẹn ẹbho bhi egbe, ọle Jehova khu ọi. Bhi ọsi ijiẹmhin, ọ iyi ranmhude elele nin ọle ha miẹn zẹle nin ọle da man mhan. Sokpan, ebezẹle nin ọle da man mhan hi, nin mhan yẹ sọnyẹnmhẹn bhi iẹnlẹn. Sẹyẹ, ọ iyi ọria soso sua iJehova bhọ nin ọle je ọmọn nọnsọle re nin ọle dọ yu ọbhi olukhọ nọnsẹmhan. Sokpan, ọle tobọle je ọle re nin mhan da miẹn urẹkpa. Emhin nin ẹbho ha da miẹn elele, ele Jesu wo lu. (Rom. 15:3) Bhi ọsi ijiẹmhin, ẹghe ọkpa ribhọ nin egbe rẹ lọ ọle. Ọkpakinọn, ọle bha dọ hẹan, sokpan, ọle da sẹyẹ dọ man ẹbho ne bu ọle re emhin.—Mark 6:31-34.
20 Ọdafẹn-uwa nọn mhẹn lẹnmhin ghe, ọkhẹke nin ọle ha zẹ emhin ne mhẹn nin azagba-uwa nọnsọle. Sokpan, ọnan iyi emhin nọn lẹkhẹ nin ọle rẹ lu ẹghe rebhe. Ọrẹyiriọ, ọle dọnmhegbe rẹ lu ọle. Ọ iyi ebi emhin dia ọle yẹ bhi egbe ọle wo ghe rẹ lẹn ebi ọle ha zẹ nin azagba-uwa nọnsọle. Sokpan, ọle ji Jehova da rẹkpa ọle lẹn ebi ọle ha zẹ. * (Prov. 2:6, 7) Bhiriọ, elele nin azagba-uwa nọnsọle ha miẹn ọle mun kalo, ọ iyi ọne ọle ha miẹn.—Phil. 2:4.
21. Be imhan ha zilo nyan bhi uhọnmhọn-ọta nọn ki sẹ ọle bhi egbe?
21 Ẹsọn nọn khua Jehova wo mun nin ọdafẹn-uwa. Jehova dẹ nọọn ele ebi ele rẹ miẹn ọne ẹsọn yẹ. Ọkpakinọn, ahamiẹn ọdafẹn-uwa re egbe khọkhọ iJehova bi Jesu, ọle ki sabọ ha yi ọdafẹn-uwa nọn mhẹn. Ahamiẹn okhuo yẹ miẹnsọn nin Osẹnobulua mun nanlẹn bhi azagba-uwa, ọne azagba-uwa ki wo ha ghọnghọn. Ẹlo nela ọkhẹke nin okhuo rẹ ha ghe ihe nin ọdọ ọle ye bhi azagba-uwa? Ọnọghọ nela ọle ha sabọ miẹn? Uhọnmhọn-ọta nọn ki sẹ ọle bhi egbe dẹ re ewanniẹn ọbhi ene inọnta nan.
ILLO 16 Khuẹnmhẹn IJehova Nọn Re IJesu Kiẹn Ojie
^ udu ọle 5 Okpea ha re okhuo, ọle ki ha yi ọdafẹn ọsi ọne azagba-uwa. Bhi ọne uhọnmhọn-ọta nan, mhan dẹ luẹ ebi Jehova rẹ mhanmhan azagba-uwa nọnsọle yẹ, ebezẹle nin ọle da re iriọ mhanmhanlẹn, bi ebi ikpea ha sabọ miẹn luẹ bhi ijiẹmhin nọnsi Jehova bi Jesu. Bhi uhọnmhọn-ọta nọnzi eva, mhan dẹ zilo nyan ebi okpea bi okhuo ha miẹn luẹ bhi ijiẹmhin nọnsi Jesu, bi ijiẹmhin eso ne ribhi Baibo. Bhi uhọnmhọn-ọta nọnzi ea, mhan dẹ luẹ ebi ikpea ha rẹ ha noo ihe nin ele ye yẹ bhi ẹkẹ agbotu.
^ udu ọle 7 Ẹbho wo re ọle man bhi ifimu bi ebe ne bunbun ghe, okpea sabọ rẹ re obọ oya mun okhuo ọle, ghe ọle mhọn ọne ahu nin ọle rẹ ha gbe ọle. Ọnan deba ebe re ẹbho riale ghe, ọ iyi emhin ebe sade okpea denyẹnyẹn okhuo ọle.
^ udu ọle 20 Nin uwẹ rẹ luẹ emhin ebhebhe ne ha rẹkpa uwẹ zẹ emhin ne mhẹn, fẹ ọne uhọnmhọn-ọta ghe nọn yọle, “Make Decisions That Honor God,” bhi Watchtower ọsi April 15, 2011, apapale 13-17.
