BHI ẹghe ẹdẹlẹ, okpea nọn ho nọn re okhuo, la azagba-uwa nọnsọle ki zẹ igho nan mun ọbhi okhuo uhọnmhọn nin azagba-uwa ọsi ọne okhuo, sade ene azagba-uwa veva re obọ ọbhi ọne ibọdọ bi ireokhuo. A sabọ rẹ miẹn ghe, emhin ne ghanlẹn, elanmhẹn, la igho a ha ha rẹ re ọne okhuo. Ẹgheso, ọne ọria dẹ miẹnsọn fo ọkuẹsẹ a re ọne okhuo nanlẹn. Ebe sẹ inian sunu ji Jacob. Ọle da re obọ ọbhọ nin ọle rẹ miẹnsọn nin aba Rachel na bhi ikpe ihinlọn ọkuẹsẹ a re Rachel nanlẹn bhi amhẹn. (Gen. 29:17, 18, 20) Bezẹle nan da ha mun igho okhuo bhi uhọnmhọn?

Ọria ọkpa natiọle Carol Meyers nọn fẹ otọ Baibo ghe da yọle: “A ha mun igho okhuo bhi uhọnmhọn, ene biẹ ọne ọmọn sabọ rẹ noo ọne igho rẹ lu ilọnmhọn nin ọne ọmọn ha rẹ deba ele lu. Ọnan dẹ wo manman rẹkpa bhi azagba-uwa nan da mun ugbo.” Ọne igho nan mun okhuo bhi uhonmhọn sabọ yẹ rẹ re azagba-uwa ọsi ọne okpea bi ọsi ọne okhuo manman sikẹ egbe nọnsẹn. Ene azagba-uwa nan sabọ ranmhude ọnan ha rẹkpa egbe sade ele ribhi ọnọghọ. Yẹ rẹ deba ọnan, igho nan mun okhuo bhi uhọnmhọn rẹman ghe, ọne okhuo dẹ kẹ bọ ọdọ, yẹ sibhi isi aba ọle re bu ọdọ ọle.

Igho nan mun okhuo bhi uhọnmhọn bha rẹman ghe a khiẹn ọne ọmọn. Ebe natiọle Ancient Israel​—Its Life and Institutions yọle: “Igho la emhin ebhebhe nan noo rẹ re okhuo bhi otọ Izrẹl ki diabe ghe, azagba-uwa ọsi ọne okhuo khiẹn ọne ọmọn. Ọkpakinọn, inian igho nin ele mun okhuo bhi uhọnmhọn diabe igho nan ha nin azagba-uwa nọnsi ọne okhuo ranmhude nin ele rẹ re ọmọn nin ele, ọ iyi ranmhude ele khiẹn ọne ọmọn.”

Bhi agbaẹbho eso ẹlẹnan, ẹbho yẹ wo mun igho okhuo bhi uhọnmhọn. Ahamiẹn Kristiẹn khian re ọmọn nin ọdọ, ọkhẹke nin ele rẹman ẹbho ghe eria ne re ẹwanlẹn lu emhin ele khin. Ele ida ha yọle nan muno otọ bi okhun re. (Phil. 4:5; 1 Cor. 10:32, 33) Bhiriọ, ele ki rẹman ghe ele imhọn ẹlobhọ la hoẹmhọn igho. (2 Tim. 3:2) Yẹ rẹ deba ọnan, ahamiẹn Kristiẹn bha yọle nan mun igho nọn kpọnọ re, ọne okpea nọn ha re ọne okhuo ida yọle ghe, nan si ọne ibọdọ bi ireokhuo ke odalo ọkuẹsẹ ọle miẹn ọne igho nan yọle nin ọle mun re. La, ọne okpea nọn ha re ọne okhuo ida ha guanọ nin ọle zobọ bhi iwẹnna ọkanẹfan ọsi ẹghe rebhe nin ọle lu, ranmhude ọle ho nin ọle re ẹghe rebhe ha wẹnna beji ọle ha da miẹn igho nan yọle nin ọle mun re.

Bhi agbaẹbho eso, uhi ribhọ rẹji eka igho nan ha mun okhuo bhi uhọnmhọn. Ahamiẹn iriọ a lu bhi agbaẹbho nọnsẹ, ọ dẹ ha mhẹn nin ene biẹ imọn re obọ rẹkhan ene uhi nan. Bezẹle? Ranmhude Baibo taman iKristiẹn ghe, nin ele ha “degbere nin ene gbẹloghe.” Sẹyẹ, nin ele ha re obọ rẹkhan uhi ne bha gbe uhi nesi Osẹnobulua a.​—Rom. 13:1; Acts 5:29.