AGỌ nọn bha kpọnọn gbe bhi Guatemala, ọle Yomara bi ibhio ọle nin ikpea natiọle Marcelo bi Hiver da nyẹnlẹn. Yomara da deba Esali Jehova ha luẹ Baibo. Akizẹbue, ibhio ọle nin ikpea da yẹ deba ọle bhi ọne iluẹmhin. Ọkpakinọn, ọnọghọ ọkpa da ha ribhọ. Ele rebhe ruẹlo. Sẹyẹ ele iguẹ tie braille. Bhiriọ, ọria nọn man ele emhin ki ha tie ebe nin ele rẹ luẹ emhin, bi Baibo kikẹ ne ribhi ọne ebe man ele.

Ọ da yẹ ha nọghọ ele rẹ ha yo ikolo oga. Ọ dẹ re ele ihuẹnlo 40 rẹ khian sẹ bhi Kindọn Họọ nọn maman sikẹ ele. Sokpan, ele ọkpa ida sabọ khian sẹ bhọ. Ọkpakinọn, ibhio mhan bhi agbotu da mhanmhanlẹn nin ele rẹ ha mun ele yo ikolo oga nesẹmhan rebhe. Ele ki munhẹn ha lu arẹman nan lu bhi ikolo oga bhi ẹkẹ uzana, ibhio mhan da ha rẹkpa ele rẹ lẹn ọne arẹman ọbhi uhọnmhọn, beji ele ha sabọ re ọle man.

Bhi Mee 2019, a da munhẹn ha do ikolo oga nesẹmhan bhi agọ nọnsele. Ẹghenin, okhuo bi ọdọ ne lu iwẹnna ọkanẹfan ọsi ẹghe rebhe da diọ ọbhi ọne agọ. Arẹmiẹn ọne okhuo bi ọdọ bha lẹn ebi a rẹ tie braille, la gbẹn ọlẹn yẹ, ele da ha guanọ nin ele man ene ibhio mhan nan ebi a rẹ gbẹn ọle yẹ, la tie ọle. Ele da diọbhi eji a da ne ebe ya dọ ne ebe ọsi braille beji ele ha da luẹ ọle, yẹ ha man ẹbho ebi ele ha rẹ sabọ ha noo ọle yẹ.

Uki eso ki gbera, ene ibhio ea nan da dọ sabọ ha tie braille. Ọnan da sabọ rẹkpa ele ha lu re alo bhi oga. a Bhi ejayenan nian, ọkanẹfan ọsi ẹghe rebhe Yomara, Marcelo, bi Hiver ki khin. Ọkpa bhi ene zẹ sikẹ ene ewanlẹn Marcelo ki khin nian. Ele wo mhọn ẹsọn nin ele lu bhi oga nọnsi Jehova uzana-uzana. Ele wo ha re oyaya ga Jehova rẹsẹbhọ ghe, ene sikẹ ele da yẹ ha mhọn ọne oyaya nan.

Urẹkpa nin ibhio mhan re nin ene ibhio ea nan wo manman ti ele bhọ. Yomara da yọle: “Rẹ na ẹghe ọhẹnhẹn nin mhan rẹ miẹn Esali Jehova, ele wo ha re oyẹẹ nọn khẹke nin Kristiẹn ha mhọnlẹn man mhan.” Marcelo da yọle: “Mhan mhọn imọẹ esili bhi agbotu nọnsẹmhan. Sẹyẹ, mhan yẹ deba ibhio mhan ne ribhi ọne otọ agbọn nan rebhe ne re oyẹẹ man.” Yomara bi ibhio ọle nin ikpea wo ha khuaẹloghe ẹghe nin ele ha rẹ daghe ebi Jehova ha rẹ re ọne otọ nan kiẹn otọ ọfubhegbe yẹ.—Ps. 37:10, 11; Isa. 35:5.