Baibo ji mhan lẹn ghe Jehova sabọ lẹn ebe ha sunu bhi ẹghe odalo. (Isa. 45:21) Ọkpakinọn ọ bha taman mhan ebi Jehova rẹ lu ọle yẹ, ẹghe nin ọle rẹ lu ọle, la eka emhin nin ọle zẹ rẹ lẹn. Bhiriọ, ọ bha khẹke nin mhan dọ ha kpokpo egbe ba ẹmhọn emhin rebhe nin Jehova lẹnlẹn. Ọrẹyiriọ, bha ji mhan zilo nyan emhin eso nin mhan lẹnlẹn.

Jehova dẹ sabọ lu emhin nọn hi ki rẹ khin nọn ghọn ọlẹn, ọkpakinọn ọ i yi emhin rebhe ọle zẹ rẹ lu. Ranmhude Jehova manman wanlan, ọle dẹ sabọ tẹmhọn emhin nọn hi ki rẹ khin nọn ha sunu bhi ẹghe odalo. (Rom 11:33) Ọkpakinọn, ranmhude ọle lu emhin ọbhi oleghe, ọle sabọ rẹ zẹ nin ọle hẹi lẹn emhin ne ha sunu bhi ẹghe odalo.—Fẹ Isaiah 42:14 ghe.

Jehova wo mun iho nọnsọle sẹ. Be ọnan rẹ diẹn mun ọne ahu nin ọle mhọn nin ọle rẹ sabọ lẹn ebe ha sunu bhi ẹghe odalo yẹ? Isaiah 46:10 yọle: “Rẹ na bhi ẹghe ọhẹnhẹn mẹn da tare ebi emhin da dia yẹ, rẹ na bhi ẹghe ẹdẹlẹ mẹn rẹ ta emhin ne bha sẹ sunu. Mẹn yọle, ‘Ebi mẹn tale dẹ munsẹ, mẹn dẹ yẹ lu emhin nọn ghọn mẹn.’”

Emhin ọkpa nọn zẹle nin Jehova da sabọ ta ebe ha sunu bhi ẹghe odalo hi, ọle mhọn ọne ahu nin ọle rẹ re emhin sunu. Jehova i ka tuabe dọ fẹghe ebi emhin ha diayẹ bhi ẹghe odalo nin ọle rẹ lẹn ebi emhin ha rẹ sunu yẹ, beji ọria nọn ghe tẹlẹvisiọn rẹ mun emhin nin ọle ghe diọbhi odalo nin ọle rẹ lẹn ebi ọ ha rẹ kpẹn yẹ. Ọkpakinọn, Jehova sabọ tare ẹghe nin ọle guanọ nin emhin rẹ sunu, sẹyẹ Ọle ki re ọle sunu sade ẹghe nin ọle rẹyi sẹ.—Ex. 9:5, 6; Mat. 24:36; Iwẹnna 17:31.

Ọnan zẹle nin Baibo da noo ikpọta bii, lu ọle, re ọle sunu, bi “mhanmhanlẹn” rẹ tẹmhọn emhin nin Jehova rẹyi ghe ọle dẹ lu bhi ẹghe odalo. (2 Ki. 19:25; ftn.; Isa. 46:11) Ọria nọn noo ekẹn rẹ man emhin a noo ene ikpọta nan rẹ talọ je bhi urolo nan rẹ gbẹn Baibo. (Jer. 18:4) Beji ọria nọn man akhe rẹ noo ekẹn rẹ man akhe nọn mhọn-ose, iriọ Jehova yẹ rẹ noo emhin nọn hi ki rẹ khin, la fi emhin denọ nin ọle rẹ mun iho nọnsọle sẹ.—Ẹfẹ. 1:11.

Jehova i sua ẹbho ọbhọ rẹ lu ebi ọle guanọ. Ọle i mhanmhanlẹn ọbhi otọ ebi ọria ha dọ kiẹn bhi agbọn, la sua ọria esili ọbhọ rẹ dọ lu emhin nọn ha si uu ji ọle. Ọle ji ọrebhe da tobele zẹ ebi ele ha re iẹnlẹn nọnsele lu. Sẹyẹ ọle man ẹbho uwedẹ nọn mhẹn nẹ nin ele rẹ ha nyẹnlẹn.

Bha ji mhan fẹ ijiẹmhin eva ghe. Ọne ọhẹnhẹn hi, emhin nọn sunu ji ibhokhan Nenivẹ. Jehova da yọle ghe, ọle dẹ dunmhun ọne agbaẹbho a ranmhude uwedẹ nin ele rẹ ha lu emhin ebe. Ele ki fidenọ, Jehova “da fi ọkhọle denọ bhi ọkakale nin ọle rẹ yọle ghe ọle dẹ si ji ele, ọle bha yẹ si ọle ji ele.” (Jonah 3:1-10) Uwedẹ nin ele rẹ tobele fidenọ beji a sekha nin ele zẹle nin Jehova da fi ọkhọle denọ.

Ijiẹmhin nọnzi eva hi, ọta akhasẹ nan tale rẹji okpea ọkpa natiọle Sairọs. Jehova da yọle ghe, ọne okpea nan hi ọnọn ha fan ibhokhan Izrẹl fia bhi imun nin ele ye, sẹyẹ ọne okpea dẹ re obọ ọbhọ nan rẹ kie bọn uwa oga nọnsi Jehova. (Isa. 44:26–45:4) Sairọs nin Ojie ọsi Pẹsia da wo gene mun ọne ọta akhasẹ nan sẹ. (Ezra 1:1-4) Ọrẹyiriọ, Sairọs bha ha ga Jehova. Arẹmiẹn Jehova wo noo Sairọs rẹ mun ọta akhasẹ nin ọle ta sẹ, ọle bha sua ọle ọbhọ rẹ dọ ga ọle, sokpan, ọle da re otọ nanlẹn rẹ tobọle zẹ ọnọn ọle ha ga.—Prov. 21:1.

Eso bhi emhin nin Jehova ka fẹghe khọnan ọkuẹsẹ ọle tare ebe ha sunu bhi ẹghe odalo. Bhi ọsi ẹmhọanta, ọria i ribhọ nọn ha sabọ wo gene lẹn otọ uwedẹ nin Jehova rẹ lu emhin. (Isa. 55:8, 9) Ọrẹyiriọ, emhin eso nin Jehova re otọle man rẹkpa mhan rẹ manman rẹọbhọ ghe, ọle dẹ wo ha lu emhin nọn gbale, rẹ dọ sẹbhi emhin nin ọle tale rẹji ẹghe odalo.