1. Ẹghela enanzẹle rebhe ha rẹ gba bhi okhun?

 BHI ikpe ne bunbun ne gbera, ẹbho nesi Jehova da ha riale, ‘Ẹghela a ha rẹ ne enanzẹle ne kẹre bhi ọne otọ nan ha khian okhun?’ Khẹ-khẹ, mhan da rẹ ha riale ghe, asabọmiẹn eso bhi enanzẹle dẹ deba mhan ha ribhi otọ ọfubhegbe bhi obhi ẹghe khere sade a khọn okhọn Amagẹdọn fo. Ọkpakinọn, bhi Watchtower ọsi Julai 15, 2013, mhan da luẹ ghe ene kẹre bhi enanzẹle ne sẹyẹ ribhi ọne otọ nan dẹ ha khian okhun fo ọkuẹsẹ okhọn Amagẹdọn munhẹn.—Mat. 24:31.

2. Inọnta nela ha sabọ zegbere? Be imhan ha zilo nyan bhi ọne uhọnmhọn-ọta nan?

² Ọkpakinọn, ibhio mhan eso sabọ rẹ ha mhọn inọnta eso. Ele sabọ rẹ ha riale: Be ha ki sunu ji usun ihuan nekẹle ne sẹyẹ wo ha sun-rẹkhan Jehova bhi ẹghe “ekpokpo nọn khua”? (Jọni 10:16; Mat. 24:21) Eso bhi ẹwẹ mhan sabọ rẹ ha kpokpo egbe ghe, ele i da yẹ miẹn ene da ha rẹkpa ele, la dia ele sade enanzẹle khian okhun fo. Bha ji mhan zilo nyan okha eva bhi Baibo nọn ha sabọ re ele re inian ha ria eria. Mhan ki yẹ zilo nyan ebezẹle nọn bha da khẹke nin mhan ha kpokpo egbe.

EMHIN NELA I DA SUNU JI IHUAN NEKẸLE?

3-4. Be ẹbho eso ha sabọ ha ria? Bezẹle?

³ Ẹbho eso bhọ sabọ rẹ ha riale ghe, usun ihuan nekẹle dẹ zobọ bhọ rẹ ha ga Jehova sade Otu Nọn Sun Oga nin mhan miẹn adia bhi obọ nọnsele i yẹ ribhi ọne otọ nan. Asabọmiẹn okha eso nan tẹmhọnlẹn bhi Baibo re ele re iriọ ha ria eria. Bha ji mhan fẹ ijiẹmhin eva ghe. Ọhẹnhẹn hi, okha ọsi Jehoada nin Ojohẹn bi Jehoash. Jehoada wo ha sun-rẹkhan Osẹnobulua. Ọle bi okhuo ọle nin Jehoshabiat da gbega obhi ọmọn natiọle Jehoash, yẹ rẹkpa ọle rẹ dọ ha yi ọria nọn mhẹn, bi ojie nọn sun-rẹkhan Jehova. Jehoash wo ha ga Jehova nọnsẹn, yẹ lu  emhin ne mhẹn beji Jehoada ribhi agbọn. Jehoada ki yu, Jehoash da munhẹn ha lu emhin ebe. Ọle da munhẹn ha ka ekhaẹmhọn ne i ga Jehova ehọ, yẹ zobọ bhọ rẹ ha ga Jehova.—2 Chron. 24:2, 15-19.

⁴ Ijiẹmhin nọnzi eva hi, ebe sunu ji Kristiẹn bhi ore nọnzi eva. Jọni nọn kẹre bhi edibo nesi Jesu wo ha yi ijiẹmhin esili rẹji Kristiẹn ne bunbun bhi ẹghe ẹdẹlẹ, ọle yẹ wo rẹkpa ele rẹ ha sun-rẹkhan Jehova. (3 Jọni 4) Beji etuegbe nekẹle nesi Jesu lu, Jọni yẹ wo dọnmhegbe rẹ rẹkpa Kristiẹn bhi ẹghe ẹdẹlẹ rẹ re egbe nẹ bhi iman-emhin ọsi ẹbho ne de sibhi oga re. (1 Jọni 2:18; fẹ study note ne ribhi 2 Tẹsẹ. 2:7.) Ẹghe nin Jọni ki rẹ yu fo, ẹbho ne bunbun bhi agbotu da munhẹn ha re ehọ ọbhi iman-emhin ọsi ẹbho ne de sibhi oga re. Ọ bha bue gbe, ẹbho da munhẹn ha man iman-emhin ohoghe bhi ene agbotu, yẹ ha lu emhin nin Jehova he.

5. Be ọ bha khẹke nin ene ijiẹmhin eva nin mhan zilo ọle re imhan ha mhọn bhi ọkhọle?

⁵ Ene ijiẹmhin veva nan ki be rẹman ghe, inian emhin ha yẹ dia rẹji ene ihuan nekẹle sade enanzẹle ne kẹre ki khian okhun fo? Ẹbho nesi Jehova dẹ be fikekegbe emhin nan man ele le beji Jehoash lu, la ele dẹ be de sibhi oga re beji Kristiẹn bhi ore nọnzi eva lu? Ele i da lu iriọ! Mhan mhọn ọne izebhudu ghe, enanzẹle ha rẹ kpanọ, ene ihuan nekẹle dẹ sẹyẹ wo ha ga Jehova. Be re imhan mhọn izebhudu nọn sẹ iriọ?

ẸBHO NESI JEHOVA DẸ SẸYẸ WO HA GA ỌLE BHI UWEDẸ NIN ỌLE GUANỌ

6. Ẹghe ea nela mhan da zilo nyan nian?

⁶ Bezẹle nin mhan ha da sabọ ha mhọn ọne izebhudu ghe, mhan dẹ wo ha ga Jehova khian bhi uwedẹ nin ọle guanọ aharẹmiẹn mhan dẹ kuẹlo da ọkakale bhi ẹghe odalo? Mhan mhọn ọne izebhudu nan ranmhude ebi Baibo tale rẹji ẹghe nin mhan da nyẹnlẹn. Ọne ẹghe nan wo dikẹ bhi ẹghe ọsi ibhokhan Izrẹl, bi ọsi ene Kristiẹn bhi ore nọnzi eva. Bhiriọ bha ji mhan zilo nyan ene ẹghe ea nan: (1) Ẹghe ọsi ibhokhan Izrẹl, (2) ẹghe nin etuegbe nesi Jesu rẹ yu fo, bi (3) ẹghe nọnsẹmhan, nọn yi “ẹghe nan ha rẹ hẹnhẹn emhin rebhe.”—Iwẹnna 3:21.

7. Bhi ẹghe ọsi ibhokhan Izrẹl, bezẹle nin eria ne ga Jehova nọnsẹn bha da ha kpokpo egbe bhi ẹghe nin ene ẹbho bi ene ijie rẹ ha lu emhin ebe?

⁷ Ẹghe ọsi ibhokhan Izrẹl. Ọkuẹsẹ Mozis yu, ọle da taman ibhokhan Izrẹl yọle: “Mẹn lẹnmhin ghe, imẹn ha yu fo, ibha dẹ dọ ha lu emhin ebe, sẹyẹ, ibha i da lu rẹkhan ene emhin nin mẹn rẹ gbuhi nin ibha.” (Deut. 31:29) Mozis da yẹ sekha nin ele ghe, ele ha fikekegbe Jehova, a dẹ mun ele ha khian imun. (Deut. 28:35, 36) Ene ọta nan nin Mozis ta be gene munsẹ? Ehe. Ikpe ne bunbun ki gbera beji Mozis yu, ijie kẹkẹ ne ha gbẹloghe bhi otọ Izrẹl da wo ha lu emhin ebe, yẹ sua ẹbho ọbhọ rẹ ha lu iriọ. Ranmhude ọnan Jehova da re otọ nin ele rẹ loya, sẹyẹ ọle bha yẹ ji ojie soso da gbẹloghe bhi otọ Izrẹl. (Ezek. 21:25-27) Ọkpakinọn, ibhokhan Izrẹl ne wo ha sun-rẹkhan Jehova ki daghe ebi ọta nọnsi Osẹnobulua rẹ munsẹ yẹ, ọ da wo kie manman re izebhudu nin ele rẹ ha ga ọle.—Isa. 55:10,11.

8. Ọ be khẹke nọn han mhan ilo ghe, Kristiẹn ne bunbun bha yẹ ha ga Jehova bhi ore nọnzi eva? Re otọle man.

⁸ Ẹghe nin etuegbe nesi Jesu rẹ yu fo. Ọ be han imhan ilo ghe iman-emhin ohoghe wo gba agbotu beji etuegbe nesi Jesu yu fo? Eye. Jesu ka tale ghe iman-emhin ohoghe dẹ manman gba ije rebhe. (Mat. 7:21-23; 13:24-30, 36-43) Pọl, Pita bi Jọni nin odibo wo rẹman bhi ebe nin ele gbẹn ghe, ọta akhasẹ nin Jesu ta wo munhẹn ha munsẹ bhi ẹghe nọnsele. (2 Tẹsẹ. 2:3, 7; 2 Pit. 2:1; 1 Jọni 2:18) Nọn ki rẹ dọ sẹbhi ore nọnzi eva, iman-emhin ohoghe da wo  gba agbotu. Oga ohoghe da zegbere, sẹyẹ ele da dọ deba Babilọn Nọn Khua, nọn yi oga ohoghe rebhe ne ribhi ọne otọ nan. Ọnan da gbo kie mun ọta akhasẹ nọnsi Jesu sẹ.

9. Be ẹghe nọnsẹmhan rẹ dikẹ yẹ bhi ọsi ibhokhan Izrẹl bi ọsi Kristiẹn bhi ore nọnzi eva?

⁹ “Ẹghe nan ha rẹ hẹnhẹn emhin rebhe.” Ẹghe nin mhan da nyẹnlẹn ẹlẹnan wo dikẹ bhi ọsi ibhokhan Izrẹl. Ọ yẹ wo dikẹ bhi ọsi ore nọnzi eva, nọn yi ẹghe nin iman-emhin ohoghe rẹ gba ije rebhe. Be a tie ẹghe nin mhan da nyẹnlẹn nian? Mhan kẹ wo tiọle “ẹghe ọkike” ọsi ọne agbọn Esu nan. (2 Tim. 3:1) Ọkpakinọn, Baibo ji mhan lẹn ghe, ẹghe ọbhebhe nọn kpọnọ gbera ọne mhan da nyẹnlẹn nian, nọn ha yẹ tan gbera ọle yẹ munhẹn bhi ẹghe nan rẹ nabhi ẹghe ọkike ọsi ọne agbọn nan. Ọne ẹghe nan dẹ sẹbhi ẹghe nin Agbejele nọnsi Osẹnobulua ha rẹ re ẹbho kiẹn eria ne gbale, yẹ re ọne otọ nan kiẹn otọ ọfubhegbe. Ọne ẹghe nan Baibo tiọle “ẹghe nan ha rẹ hẹnhẹn emhin rebhe.” (Iwẹnna 3:21) Ukpe 1914, ọle ọne ẹghe nan munhẹn. Be bhọ sunu bhi ọne ẹghe nan? Ọne ẹghe nan a re Jesu kiẹn Ojie ọsi Agbejele nọnsi Osẹnobulua. Bhiriọ, Jehova da gbo kie ha mhọn ọria nin ọle re mundia nọn ha gbẹloghe, nọn na bhi ulin-uwa ọsi Devid vae. Ọkpakinọn, ọ i yi ọnin ọkpa Jehova lu. Ọ bha bue gbe, ọle da rẹkpa eguọmhandia nesọle rẹ sabọ kie dọ ha ga ọle bhi uwedẹ nọn ọle guanọ! (Isa. 2:2-4; Ezek. 11:17-20) Ẹghe dẹ be kie ha ribhọ nan ha rẹ miẹn ghe a bha yẹ ha ga Jehova bhi uwedẹ nin ọle guanọ?

10. (a) Be Baibo tale rẹji oga ẹmhọanta bhi ẹghe nọnsẹmhan? (Isaiah 54:17) (b) Bezẹle nin ene ọta akhasẹ nan da ko mhan udu re?

¹⁰ Tie Isaiah 54:17. Ria ẹmhọn ọne ọta akhasẹ nan ghe nọn yọle: “Emhin okhọn soso iribhọ nan lu ranmhude uwẹ nọn ha wẹnna hiehie!” Ene ọta nan wo ha munsẹ ẹlẹnan. Ene ẹmhọn ne ribhi Isaiah 54:13, 14, yẹ wo ha munsẹ bhi ọne ẹghe nọnsẹmhan nan. Enin yọle: “Jehova dẹ man imọn nesẹ emhin, sẹyẹ, imọn nesẹ dẹ manman ha mhọn ọfure. Uwẹ dẹ wo manman deziẹn bhi ikhiale. . . . Emhin soso i ribhọ nọn ha re ofẹn ha mun uwẹ, sẹyẹ emhin soso i ribhọ nọn ha re uwẹ ha guọ, ranmhude ele i da sẹ eji uwẹ ye.” Esu tobọle nọn yi “osẹ ọsi ọne ore nan” bhọ i da sabọ re ọkpẹnlẹn ọbhi iwẹnna nin ẹbho nesi Jehova lu rẹ man ẹbho ẹmhọn Ọlẹn. (2 Kọr. 4:4) A wo kie mun oga ẹmhọanta gbọ, sẹyẹ, ẹghe i da yẹ kie ha ribhọ nan ha rẹ miẹn ghe a bha yẹ ha ga Jehova bhi uwedẹ nin ọle guanọ. Oga ẹmhọanta dẹ wo ha ribhọ rẹ sẹbhi ighegheghe. Emhin okhọn soso i ribhọ nan lu ranmhude mhan nọn ha wẹnna hiehie!

 BE HA KI SUNU?

11. Be re imhan rẹọbhọ ghe a i da fikekegbe ene usun ihuan nekẹle sade enanzẹle khian okhun?

¹¹ Be ha sunu sade a ne enanzẹle ha khian okhun fo? Yere ghe Jesu hi ọnọn sun mhan, sẹyẹ, ọle hi ọnọn sun agbotu. Jesu bhọ da yọle: “Otuọnkpa hi Ọnọn rẹ ibha khian. Ọnan hi Kristi.” (Mat. 23:10) Ẹghe i ribhọ nin Jesu nin Ojie nọnsẹmhan ha rẹ zobọ bhọ rẹ ha gbẹloghe ene rẹkhan ọlẹn. Beji a miẹn ghe Jesu tobọle re emhin khian, emhin i ribhọ nọn ha re ofẹn ha mun ene rẹkhan ọlẹn ne ribhi ọne otọ nan. Bhi ọsi ẹmhọanta, mhan bha lẹn emhin rebhe rẹji ebi Jesu ha rẹ sun ẹbho nesọle yẹ bhi ọne ẹghe nin. Bhiriọ, bha ji mhan zilo nyan ijiẹmhin eso ghe bhi Baibo ne ha sabọ re izebhudu nin mhan.

12. Be Jehova rẹ gbẹloghe ẹbho nesole yẹ (a) beji Mozis yu fo? (b) beji a mun iwẹnna ọbhebhe nin Ẹlaija? (Yẹ fẹ ifoto ghe.)

¹² Ọkuẹsẹ ibhokhan Izrẹl nabhi ọne otọ nan ve ive ọle nin ele, Mozis da yu. Be ki sunu ji ẹbho nesi Osẹnobulua? Jehova be zobọ bhọ rẹ ha rẹkpa ẹbho nesọle beji Mozis ki yu fo? Eye. Ẹghe bha ha ribhọ nin Jehova rẹ fikekegbe ele bhi ene ẹghe nin ele rẹ ha sun rẹkhan ọlẹn. Ọkuẹsẹ Mozis yu, Jehova da taman ọlẹn nin ọle zẹ Josua nin ọle ha sun ẹbho nesọle. Ọ reele nin Mozis mọn da man Josua emhin ọkuẹsẹ ọne ẹghe nan. (Ex. 33:11; Deut. 34:9) Rẹ deba ọnin, ikpea ne bunbun ebhebhe yẹ wo ha ribhọ ne ha sun ene ẹbho—ene ha sun ẹbho ne bun sẹbhi uli, ene ha sun ẹbho ne bun sẹbhi iyisẹn, ene ha sun ẹbho ne bun sẹbhi igbe nyan egbọ eva, bi ene ha sun ẹbho ne bun sẹbhi igbe. (Deut. 1:15) A wo ha gbẹloghe ẹbho nesi Osẹnobulua nọnsẹn. Mhan yẹ wo miẹn ijiẹmhin nọn sẹnian bhi egbe Ẹlaija. Ọle wo wẹnna kaka bhi ẹkẹ ikpe ne bunbun rẹ rẹkpa ibhokhan Izrẹl rẹ ha ga Jehova. Akizẹbue, Jehova da yọle nin ọle dọ ha ga bhi Juda. (2 Ki. 2:1; 2 Chron. 21:12) Jehova ki be fikekegbe ẹbho ne ha ga ọle nọnsẹn bhi otọ Izrẹl beji Ẹlaija kpanọ? Eye. Ọkuẹsẹ ọne ẹghe nan, ọ reele nin Ẹlaija mọn da man Ẹlaisha emhin. Rẹ deba ọnin, imọn ọsi ene akhasẹ yẹ wo ha ribhọ nan ha man ele emhin rẹji ebi a ha rẹ ha re emhin khian yẹ. (2 Ki. 2:7) Bhiriọ, ikpea ne bunbun ne ga nọnsẹn wo ha ribhọ ne da ha sun ẹbho nesi Osẹnobulua. Jehova da wo ha mun emhanmhan nọnsọle sẹ, yẹ wo ha gbẹloghe ene ga ọle nọnsẹn.

13. Ọta izebhudu nela mhan miẹn bhi Hibru 13:5b? (Yẹ fẹ ifoto ghe.)

¹³ Rẹji ebi mhan luẹle, be uwẹ riale ọ dẹ sunu sade enanzẹle ne kẹre bhi ọne otọ nan kpanọ ha khian okhun fo? Ọ bha khẹke nin mhan ha  kpokpo egbe. Baibo ji mhan lẹn ghe, Jehova i da fikekegbe ẹbho nesọle ne ribhi ọne otọ nan ghẹdẹ. (Tie Hibru 13:5b.) Bọsi Mozis bi Ẹlaija, usun khere bhi enanzẹle ne re agbotu khian ẹlẹnan lẹn ebi ọ lu uhọnmhọn emhin sẹ yẹ nan rẹ ha man ẹbho emhin. Bhi ikpe ne bunbun nian, ibhio mhan ne ga bhi ihe ọsi Otu Nọn Sun Oga wo ha man ikpea eso bhi ẹwẹ usun ihuan nekẹle ebi a rẹ re emhin khian yẹ. Bhi ọsi ijiẹmhin, ele wo mhanmhan isiku kẹkẹ nan rẹ man ene ewanlẹn bhi agbotu emhin, ene ọfẹotughe, Ene Sun Bẹtẹ, ewanlẹn bhi Bẹtẹ bi ẹbho ebhebhe. Otu Nọn Sun Oga wo tobọle ha man ene rẹkpa ele bhi usun kẹkẹ nọnsele emhin. Ene rẹkpa ele nan wo ha miẹnsọn ne bunbun bhi agbotu nọnsi Jehova nian. A wo mun ele egbe ọbhi otọ rẹ sabọ ha miẹn ọne ẹsọn nan rẹ gbẹloghe ihuan nesi Jesu.

14. Emhin kpataki nela a ho nan zẹ ọle egbe dagbare bhi ebi mhan zilo ọle?

¹⁴ Ọnan hi emhin kpataki nin mhan ho nin mhan re dagbare bhi ebi mhan tẹmhọnlẹn: Ahamiẹn a ne ene kẹre bhi enanzẹle ha khian okhun fo bhi ẹghe nin ekpokpo nọn khua ha rẹ ha bu ọkpẹnlẹn, ẹbho nesi Jehova bhi ọne otọ nan dẹ sẹyẹ wo ha ga ọle nọnsẹn. Mhan wo khuẹnmhẹn Jesu bhi uwedẹ nin ọle rẹ ha sun mhan, ranmhude onan, ẹbho nesi Osẹnobulua dẹ wo sabọ ha ga ọle khian nọnsẹn. Bhi ọsi ẹmhọanta, Gọgi ọsi Megọgi nọn yi agbaẹbho ne kugbe dẹ ha kpokpo ẹbho nesi Osẹnobulua bhi ọne ẹghenin. (Ezek. 38:18-20) Ọkpakinọn, ele i da sabọ khọn miotọ bhi ọne ẹghe ekpokpo nin. Sẹyẹ, ele i da sabọ rẹ ẹbho nesi Osẹnobulua miẹn ghe ele bha yẹ ha ga Jehova. Jehova dẹ wo gene miẹn ẹbho nesọle fan. Bhi imianlo, Jọni nin odibo da daghe “usun ẹbho ne bunbun” ne yi ihuan nekẹle ọsi Jesu. A da ji Jọni lẹn ghe, ene “usun ẹbho ne bunbun,” ele “hi ene ẹbho ne miuhọnmhọn bhi ekpokpo nọn khua.” (Arẹm. 7:9, 14) Bhi ọsi ẹmhọanta, Jehova dẹ gbega ene usun ihuan nekẹle!

15-16. Beji Arẹman 17:14 rẹman, be enanzẹle da ha lu bhi ẹghe okhọn Amagẹdọn? Bezẹle nọn da yi emhin ikoudure?

¹⁵ Ọrẹyiriọ, ẹbho eso sabọ yẹ rẹ ha riale: ‘Be enanzẹle da ha lu sade ele kpanọ bhi ọne otọ  nan fo?’ Baibo wo re ewanniẹn ọbhi ọne inọnta nan. Ọ ji mhan lẹn ghe ene gbẹloghe bhi ọne agbọn nan “dẹ ne ọne Ohuan khọnlẹn,” ọkpakinọn, ele i da miuhọnmhọn. Baibo yẹ ji mhan lẹn ghe: ‘[Ọne Ohuan] dẹ khọn ele miotọ.’ Hela da rẹkpa ọle rẹ khọn miotọ? Ọne Baibo yẹ re ewanniẹn ọbhọ. Ọ da yọle, “ene Osẹnobulua zẹle” bi ene “sun rẹkhan ọlẹn.” (Tie Arẹman 17:14.) Hela hi ene ẹbho nan? Enanzẹle nan riọ kpanọ ha khian okhun. Bhiriọ, ẹghe nan ha rẹ ne ene kẹre bhi enanzẹle ha khian okhun sade ekpokpo nọn khua bu ọkpẹnlẹn, ẹsọn ọhẹnhẹn nin ele ha ka miẹn hi, nin ele rẹ dọ khọnlẹn. Iwẹnna kpataki wo khọnan! Eso bhi enanzẹle wo guẹ ebi a rẹ khọn yẹ ọkuẹsẹ ele dọ kiẹn Esali Jehova. Eyokulo eso rẹ ka ha khin. Ele ki dọ kiẹn Kristiẹn, ele da luẹ ebi a rẹ nin ẹbho nyẹnlẹn yẹ bhi ọfure. (Gal. 5:22; 2 Tẹsẹ. 3:16) Ele da zobọ bhọ rẹ ha khọnlẹn. A ha ki riọ ele kpanọ ha khian okhun fo, ele ki deba Jesu bi ẹhi ne khiale nesọle khọn okhọn nọn kike nan ha rẹ fuẹn eghian nesi Osẹnobulua a.

¹⁶ Ria ẹmhọn ọnan ghe! Eso bhi enanzẹle ne ribhi ọne otọ nan ẹlẹnan ki wanre, sẹyẹ ele bha yẹ ziẹn. Ọkpakinọn, a ha riọ ele kpanọ ha khian okhun fo, ele ki wo manman dọ ha mhọn ahu, yẹ kiẹn ẹlinmhin ne i da yu ghẹdẹ. Ele ki deba Jesu nin okakulo nọnsele khọn miotọ. A ha ki khọn okhọn Amagẹdọn fo, ele ki deba Jesu fẹkẹ ha rẹ eria kiẹn eria nọn gba nan. Edandan i ribhọ ghe, bhi ọne ẹghe nan nin ele ha rẹ ha ribhi okhun, ele dẹ wo sabọ lu emhin esili kẹkẹ nin ibhio ele bhi ọne otọ nan, gbera ọne ẹghe nọn bha rẹ gba nin ele.

17. Be imhan rẹ lẹn yẹ ghe eguọmhandia nesi Osẹnobulua rebhe dẹ miuhọnmhọn bhi ẹghe okhọn Amagẹdọn?

¹⁷ Ọkpa bhi usun ihuan nekẹle uwẹ be khin? Ọ ha yi iriọ, be uwẹ riale ọ dẹ khẹke nin uwẹ lu bhi ẹghe okhọn Amagẹdọn? Ebe khẹke nin uwẹ lu khọnan: Mun udu nyan Jehova, yẹ re obọ rẹkhan adia nọnsọle. Be ọnan ha sabọ ha khin? Baibo da yọle: “Nabhi ẹkẹ ugha nesẹ, uwẹ ha khue odẹ nesẹ. Nẹko bhi obhi ẹghe khere ọkuẹsẹ ohu nọnsẹmhẹn lọre.” (Isa. 26:20) Eguọmhandia nesi Osẹnobulua bhi ọne otọ nan bi okhun dẹ miuhọnmhọn bhi ọne ẹghe nin. Bọsi Pọl nin odibo, mhan mhọn ọne izebhudu ghe, “emhin iribhọ nọn ha zẹ Osẹnobulua bha yẹ hoẹmhọn mhan . . . ugbẹloghe ida sabọ, emhin ne sunu nian la ene ha sunu bhi ẹghe odalo ida sabọ.” (Rom 8:38, 39) Ha yere ẹghe rebhe ghe, Jehova hoẹmhọn uwẹ, sẹyẹ ẹghe i ribhọ nin ọle ha rẹ fikekegbe uwẹ!