ẸBHO nin Jehova noo rẹ gbẹn Baibo noo ikpọta nan ka noo bhi ijeso bhi Baibo bhi ebe nin ele gbẹn. Beji a ka rẹ wo noo ọle, iriọ ele yẹ rẹ wo noo ọle tee. Bha ji mhan fẹ emhin ea ghe nọn re ele lu iriọ:

Ẹghe nan rẹ gbẹn ene ẹmhọn. Bhi ẹghe ẹdẹlẹ, ọ i yi ọdeọde bhi otọ Izrẹl ha mhọn ebe uhi. Ẹghe-ẹghe nin ele rẹ siegbe koko bhi uwa oga a rẹ tie ọne ebe uhi man ele. (Deut. 31:10-12) Asabọmiẹn beji a rẹ tiọle man ele, emhin eso dẹ ha ribhọ nọn da ha de ele idobolo ranmhude uwedẹ nin ẹbho rẹ manman bun. Sẹyẹ ẹghe nọn tanlẹn ele mundia na. (Neh. 8:2, 3, 7) Bhi idia nọn sẹ iriọ, ọ dẹ ha mhẹn nan rẹ kie tie ẹmhọn kpataki nan ho nin ele lẹn man ele, beji ele ha da yere rẹ re obọ rẹkhan ọlẹn. Sẹyẹ ọnan ki rẹkpa ele rẹ ye emhin eso re ne manman lu uhọnmhọn emhin, bọsi, uhi nesi Osẹnobulua.—Lev. 18:4-22; Deut. 5:1.

Uwedẹ nan rẹ gbẹn ene ẹmhọn. Ijeso ribhi Baibo nan gbẹn bii illo, bọsi ebe ọsi Psalms, Song of Solomon, bi Lamentations. Ẹgheso, ahamiẹn a gbẹn illo, a sabọ rẹ noo ikpọta nan ka noo bhi ẹkẹ ọne illo bhi ije ebhebhe, beji ẹbho ha da ye emhin kpataki ne ribhi ọne illo re. Bhi ọsi ijiẹmhin, bha ji mhan fẹ ikpọta eso ghe nan noo bhi Psalm 115:9-11. Enin yọle: “Eo ibhokhan Izrẹl, bha mun udu nyan Jehova; ọle hi urẹkpa bi ugue nọnsele. Eo uwa ọsi Erọn, bha mun udu nyan Jehova; ọle hi urẹkpa bi ugue nọnsele. Ibha ne mun ofẹn Jehova, bha mun udu nyan Jehova, ọle hi urẹkpa bi ugue nọnsele.” Uwedẹ nan rẹ noo ukpọta ọkpa igba ne bunbun dẹ rẹkpa ẹbho ne so ọne illo rẹ ye ẹmhọn kpataki ne ribhọ re.

Ebezẹle nan da noo ene ẹmhọn. Ẹgheso, ẹbho ne gbẹn Baibo noo ikpọta nin ele ka noo, nin ele rẹ rẹman ebi emhin nin ele tẹmhọnlẹn lu uhọnmhọn emhin sẹ yẹ. Bhi ọsi ijiẹmhin, ẹghe nin Jehova rẹ taman ibhokhan Izrẹl nin ele hẹi le aranlẹn, ọle da taman Mozis nin ọle taman ele igba ne bunbun ebezẹle nọn bha da khẹke nin ele le ọle. Jehova da ha guanọ nin ibhokhan Izrẹl lẹn ghe, aranlẹn hi iẹnlẹn. (Lev. 17:11, 14) Akizẹbue, beji ene etuegbe bi ene ewanlẹn ne ribhi Jerusalẹm ki ha tẹmhọn emhin eso ne khẹke nin Kristiẹn rẹban beji emhin nin ele lu ha da ha ti Osẹnobulua bhọ, ele da gbo yọle nin Kristiẹn rẹban aranlẹn.—Iwẹnna 15:20, 29.

Arẹmiẹn a kie ha ta ebi a ka ta bhi ijeso bhi Baibo, ọ bha rẹman ghe iriọ Jehova wo guanọ nin mhan ha lu. Bhi ọsi ijiẹmhin, Jesu tobọle da yọle: “Ahamiẹn bha nan erọnmhọn, bha hẹi kie ha ta ebi bha ka ta.” (Mat. 6:7) Ọle da tẹmhọn emhin eso ne khẹke nin mhan ha bhii bhi erọnmhọn ne diẹn mun iho nọnsi Osẹnobulua. (Mat. 6:9-13) Arẹmiẹn ọ bha khẹke nin mhan ha ta ukpọta ọkpa beji mhan rẹ nan erọnmhọn, ọ bha dọbe sade mhan kie dọ taman Osẹnobulua ebi mhan ka taman ọlẹn bhi erọnmhọn.—Mat. 7:7-11.

Mhan wo dọ daghe ebezẹle nin Jehova da ji ẹbho ne gbẹn Baibo da noo ikpọta nan ka noo. Uwedẹ ọkpa khọnan nin Jehova nin Ọman-emhin Nọn Khua nọnsẹmhan rẹ man mhan emhin beji mhan ha da miẹn elele bhọ.—Isa. 48:17, 18.