1-2. Be ha sabọ rẹkpa mhan rẹ lẹn ebi emhin dia Jehova bhi egbe yẹ bhi ẹghe nan rẹ riia ọle elin an?

 RIA ẹmhọn ọnan ghe: Nan man yọle ghe ọria nọn manman sikẹ uwẹ dọ ha ta ọta ebe uwẹ bhi egbe. Ọkpakinọn, uwẹ lẹnmhin ghe ohoghe ọle bha, ọrẹyiriọ, ẹbho eso da rẹọbhi ebi ọle ta. Ọ bhọ da khọ sẹbhọ ghe, ele da ha wewe ọne ohoghe nẹga, sẹyẹ ẹbho ebhebhe da yẹ wo ha rẹọbhọ. Be ọnan ha dia uwẹ yẹ bhi egbe? Ọ dẹ wo manman ba uwẹ bhi egbe sade uwẹ ria ẹmhọn uwedẹ nan rẹ riia uwẹ elin an, bi ebi ọ ha dia ẹbho ne họn bhi egbe yẹ.—Prov. 22:1.

² Ọne ijiẹmhin nan rẹkpa mhan rẹ lẹn ebi emhin dia Jehova bhi egbe yẹ ẹghe nan rẹ riia ọle elin an. Ẹhi ọkpa da dọ bha ọle ohoghe man Ivi. Ivi da wo rẹọbhọ. Ọne ohoghe nan da re Adamu bi Ivi sọtẹ da Jehova, sẹyẹ ọ da si olukhọ bi uu ji eria. (Gen. 3:1-6; Rom 5:12) Ohoghe nin Esu bha bhi ogba ọsi Idẹn si ọkakale kẹkẹ ne ribhi ọne agbọn nan ẹlẹnan. Ọkakale bii, okhọnlẹn, uu, bi ozughu nọn vuọn ije rebhe. Edandan i ribhọ ghe ọne ohoghe nan nin Esu bha, bi emhin kẹkẹ ne nabhọre wo manman ba Jehova bhi egbe. Ọrẹyiriọ, Jehova bha dọ ha kiẹ egbe. Bhi ọsi ẹmhọanta, ọle sẹyẹ hi “Osẹnobulua ọsi eghọnghọn.”—1 Tim. 1:11.

3. Isẹhoa nela mhan mhọn?

³ Mhan rebhe mhọn ọne isẹhoa nin mhan rẹ deba ha kpe elin nọnsi Jehova khia. Uwedẹ ọkpa nin mhan ha rẹ lu ọnan hi, nin mhan rẹ re obọ rẹkhan ọne uhi nọn yọle: “Bha gẹn elin nọnsi Jehova.” (Ps. 113:1) Mhan gẹn elin nọnsi Jehova sade mhan ta emhin esili rẹji ọle man ẹbho. Uwẹ dẹ be deba ha gẹn elin nọnsi  Jehova? Bha ji mhan zilo nyan emhin ea kpataki ne ha re imhan re ọkhọle rebhe ha gẹn elin nọnsi Osẹnobulua.

Ọ RE JEHOVA GHỌNGHỌN SADE MHAN GẸN ELIN NỌNSỌLE

4. Bezẹle nọn da re Jehova ghọnghọn sade mhan gẹn ọlẹn? Re ijiẹmhin man. (Yẹ fẹ ifoto ghe.)

⁴ Mhan re Aba mhan nọn ribhi okhun ghọnghọn sade mhan gẹn elin nọnsọle. (Ps. 119:108) Ọnan ki be rẹman ghe inian Osẹnobulua nọn ke okhun nẹ diabe eria nọn bha gba nan ne guanọ nan ha gẹn ele, nin ele rẹ lẹn sẹ ghe ele lu nọnsẹn? Eye. Bha ji mhan fẹ ọne ijiẹmhin nan ghe. Obhokhan ọmanmhẹn da dọ dede aba ọle yẹ yọle, “Aba nọn mhẹn sẹbii uwẹ i ribhi ọne agbọn nan.” Ọne emhin nan nin ọne ọmọn lu da wo manman ti ọne aba bhọ. Mhan ki dẹ ranmhude ọnan yọle ghe, aba nọn guanọ ogẹn bhi obọ ọmọn nọnsọle beji ọle ha da lẹn ghe ọle lu nọnsẹn ọne aba nan khin? Eye. Mhan lẹnmhin ghe aba nọn manman hoẹmhọn ọmọn nọnsọle ọne aba nan khin. Sẹyẹ uwedẹ nin ọmọn nọnsọle rẹ re oyẹẹ man ọlẹn, yẹ ta ọta esili man ọlẹn wo manman ti ọle bhọ. Ọne aba lẹnmhin ghe, ọne ọmọn ha re inian wanre, ọ dẹ sabọ re ọne ọmọn ha ghọnghọn. Iriọ yẹ nọn, ọ wo re Jehova nin Aba mhan nọn ke okhun nẹ ghọnghọn sade mhan gẹn ọlẹn.

5. Ohoghe nela Esu bha? Be imhan rẹman sade mhan gẹn elin nọnsi Osẹnobulua?

⁵ Ahamiẹn mhan gẹn Aba mhan nọn ribhi okhun, mhan ki ha re ọle rẹman ghe ohoghe emhin nin Esu tale rẹji ọdeọde bhi ẹwẹ mhan khin. Esu yọle ghe ọria soso i ribhọ nọn ha sabọ sun rẹkhan Osẹnobulua sotọ. Rẹji ọle, mhan dẹ fikekegbe Jehova sade mhan kuẹlo da ọnọghọ. Ọle yẹ yọle ghe, mhan rebhe dẹ zobọ bhọ rẹ ha ga Jehova sade mhan kere ghe mhan i da miẹn elele bhọ. (Job 1:9-11; 2:4) Ọkpakinọn, Jobu da rẹman ghe ọbhahoghe Esu khin. Uwẹ kii? Mhan rebhe mhọn ọne isẹhoa nin mhan rẹ ha kpe elin nọnsi Aba mhan khia, yẹ lu ebe ti ọle bhọ. Mhan dẹ sabọ lu ọnan sade mhan re ọkhọle rebhe rẹ wo ha sun rẹkhan ọlẹn. (Prov. 27:11) Udede ekpẹn ọnan khin rẹji mhan.

6. Be imhan ha rẹ sabọ re egbe khọkhọ Devid nin Ojie bi ene Livai yẹ? (Nehemiah 9:5)

⁶ Oyẹẹ nin ẹbho ne ga Osẹnobulua mhọn da ọle re ele re ọkhọle rebhe ha gẹn elin nọnsọle. Devid nin Ojie da gbẹn yọle: “Mẹn dẹ gẹn Jehova; mẹn dẹ re egbe nọnsẹmhẹn rebhe rẹ gẹn elin nọn khiale nọnsọle.” (Ps. 103:1) Devid lẹnmhin ghe mhan da ha gẹn elin nọnsi Jehova, inian ọ yẹ diabe ghe mhan gẹn Jehova tobọle. Elin nọnsi Jehova mundia nin unan ọria nin ọle gene khin. Bhiriọ, elin nọnsọle ye  mhan ẹmhọn ikpẹ nesọle re, bi iwẹnna ọhan-ilo kẹkẹ nesọle. Devid wo ha guanọ nin ọle kpe elin nọnsi Aba ọle khia, yẹ ha gẹn ọlẹn. Ọle da ha guanọ nin ọle re emhin rebhe nin ọle mhọn rẹ ha gẹn ọlẹn. Iriọ ene Livai yẹ lu. Ele da mun ọkalo bhọ rẹ ha gẹn Jehova. Ele da re idegbere rẹ yọle ghe, ọta soso i ribhọ nin ele ha ta nọn ha sẹ nin ele rẹ gẹn elin nọn khiale nọnsi Jehova. (Tie Nehemiah 9:5.) Edandan i ribhọ ghe uwedẹ nin ele rẹ re ọkhọle rebhe ha gẹn Jehova wo re ọle ha ghọnghọn.

7. Be imhan ha rẹ sabọ ha gẹn elin nọnsi Jehova yẹ bhi inẹbho bi bhi iẹnlẹn ukpẹdẹ-ukpẹdẹ?

⁷ Mhan yẹ wo gẹn Jehova ẹlẹnan sade mhan tẹmhọn ọlẹn bhi uwedẹ nọn ha rẹ rẹman ghe, mhan hoẹmhọn ọlẹn, sẹyẹ emhin nin ọle lu nin mhan ti mhan bhọ. Emhin kpataki nọn khẹke nin mhan ha mhọn bhi ọkhọle sade mhan ribhi inẹbho hi, nin mhan rẹ rẹkpa ẹbho sikẹ Jehova, yẹ rẹkpa ele rẹ ha re ẹlo esili ghe Aba mhan nin Osẹ ọsi oyẹẹ beji mhan yẹ lu. (Jem. 4:8) Ọ wo yẹẹ mhan rẹ ha taman ẹbho ebi Baibo tale rẹji Jehova. Ọ yẹẹ mhan rẹ ha tẹmhọn ikpẹ nesọle man ẹbho. Ikpẹ bii, oyẹẹ, ahu, ẹwanlẹn, ibhuohiẹn nọn gbale nọnsọle, bi ikpẹ ebhebhe nesọle. Uwedẹ ọbhebhe nin mhan rẹ gẹn Jehova yẹ re ọle ghọnghọn hi, sade mhan dọnmhegbe re egbe khọkhọ ọle. (Ẹfẹ. 5:1) Mhan da ha lu iriọ, mhan ki rẹman ghe mhan dikẹ bhi ẹwẹ ẹbho nekẹle bhi ọne agbọn Esu nan. Ẹbho sabọ rẹ dọ daghe ọle ghe uwedẹ ikẹ mhan rẹ lu emhin, sẹyẹ ele ki ha ho nin ele lẹn ebezẹle. (Mat. 5:14-16) Beji mhan rẹ nin ele lu emhin ukpẹdẹ-ukpẹdẹ, ọ sabọ rẹ re isẹhoa nin mhan rẹ gbotọle fanọn an man ele ebezẹle nin mhan da lu emhin bhi uwedẹ nin mhan rẹ lu emhin. Ọnan sabọ rẹ re eria ne mhọn ọkhọle esili dọ ha ga Jehova. Ahamiẹn mhan gẹn Jehova bhi ene uwedẹ nan, mhan ki re ọkhọle nọnsọle ha ghọnghọn.—1 Tim. 2:3, 4.

Ọ RE JESU GHỌNGHỌN SADE MHAN GẸN ELIN NỌNSI JEHOVA

8. Be Jesu rẹ mun ọkalo bhọ yẹ rẹ ha gẹn elin nọnsi Jehova?

⁸ Ọria soso i ribhi otọ la bhi okhun nọn lẹn Jehova sẹbii Jesu. (Mat. 11:27) Jesu wo hoẹmhọn Aba ọle, sẹyẹ ọle da mun ọkalo bhọ rẹ ha gẹn elin nọnsọle. (Jọni 14:31) Bhi ọne erọnmhọn nin ọle nan bhi ọne ukpasọn ọkuẹsẹ ọle yu, ọle da tẹmhọn emhin nọn lu uhọnmhọn emhin nẹ nin ọle lu bhi ọne otọ nan. Ọle da yọle: “Mẹn rẹkpa ele rẹ lẹn elin nọnsẹ.” (Jọni 17:26) Be Jesu rẹ lu ọnan yẹ?

9. Okha nela Jesu noo rẹ tẹmhọn unan ọria nin Aba ọle khin?

⁹ Ọ i yi elin nọnsi Osẹnobulua nin Jehova ọkpa Jesu rẹkpa ẹbho rẹ lẹn. Ene ibhokhan Ju nin Jesu ha man ele emhin ka lẹn elin nọnsi Osẹnobulua. Ọkpakinọn, Jesu da mun ọkalo bhọ rẹ ha rẹkpa ẹbho rẹ lẹn ọria nin Jehova gene khin. (Jọni 1:17, 18) Bhi ọsi ijiẹmhin, obọ Baibo nan rẹ urolo Hibru gbẹn da rẹman ghe Jehova manman mhọn itohan bi ẹkẹ-ẹjẹjẹ. (Ex. 34:5-7) Jesu da re ijiẹmhin ọsi ọne ọmọn-nọn-fuẹn-uku bi ọsi aba ọle rẹ re otọ ene ikpẹ nan man nọnsẹn. Ahamiẹn mhan tie ẹmhọn ebi ọne aba rẹ lu emhin yẹ bhi ẹghe nin ọle rẹ daghe ọmọn nọnsọle nọn ki fidenọ, “beji ọle sẹyẹ vade bhi odalo vuun,” uwedẹ nin ọle rẹ runẹ bu ọle, mun ọlẹn dede yẹ re ọkhọle rebhe rẹhunmhan ọlẹn, ọ ki rẹkpa mhan rẹ daghe ebi Jehova rẹ manman mhọn ẹkẹ-ẹjẹjẹ bi itohan yẹ. (Luk 15:11-32) Jesu wo gene re unan ọria nin Aba ọle khin man.

10. (a) Be imhan rẹ lẹn yẹ ghe Jesu wo ha noo elin nọnsi Aba ọle, sẹyẹ ọle ho nin ẹbho ha lu iriọ? (Mak 5:19) (Yẹ fẹ ifoto ghe.) (b) Be ọle guanọ nin mhan ha lu ẹlẹnan?

¹⁰ Jesu be yẹ guanọ nin ẹbho ha noo elin nọnsi Aba ọle? Ehe. Eria eso ne mun ọkalo bhi oga bhi ẹghe nọnsi Jesu da ha riale ghe, ọ i yi emhin ekpẹn nan rẹ ha sounun bhi elin nọnsi  Osẹnobulua. Ọkpakinọn, Jesu bha ji ọne iman-emhin nan nọn bha gba re ọle miẹn ghe ọle bha yẹ ha tẹmhọn elin nọnsi Osẹnobulua man ẹbho. Ria ẹmhọn ẹghe nin Jesu rẹ hinmhin okpea ọkpa nin ẹlinmhin ebe ha kpokpo bhi agbaẹbho ọsi Gẹrasa. Ofẹn da ha mun ẹbho ne ribhi enin rẹ sẹbhọ ghe, ele da taman Jesu nin ọle kpanọ. Bhiriọ, Jesu da kpanọ. (Mak 5:16, 17) Ọrẹyiriọ, Jesu da sẹyẹ ha guanọ nin ẹbho lẹn elin nọnsi Jehova bhi enin. Bhiriọ, ọle da taman ọne okpea nin ọle hinmhin nọn dọ taman ẹbho ebi Jehova lu nanlẹn, ọ i yi ebi ọle lu nanlẹn. (Tie Mak 5:19.) a Iriọ ọle yẹ guanọ nin mhan ha lu ẹlẹnan. Ọle guanọ nin mhan wewe elin ọsi Aba ọle man ẹbho bhi ọne otọ agbọn nan rebhe! (Mat. 24:14; 28:19, 20) Mhan ha lu ọnọn khẹke mhan, mhan ki re Jesu nin Ojie nọnsẹmhan ha ghọnghọn.

11. Be Jesu taman ene rẹkhan ọlẹn nin ele ha bhii ọi? Bezẹle nin ọnan da manman lu uhọnmhọn emhin? (Ezekiel 36:23)

¹¹ Jesu lẹnmhin ghe iho nọnsi Jehova hi, nin ọle rẹ kpe elin nọnsọle khia bhi itọn rebhe nan rẹ sin ọlẹn. Ọnin zẹle nin Jesu da man ene rẹkhan ọlẹn nin ele re inian ha bhii: “Aba mhan nọn ribhi okhun, ji ẹbho rebhe kpe elin nọnsẹ khia.” (Mat. 6:9) Jesu lẹnmhin ghe ọnan hi ẹmhọn nọn ke okhun nẹ nọn rẹtẹ eria rebhe. (Tie Ezekiel 36:23.) Ọria i ribhi otọ la bhi okhun nọn sẹ dọnmhegbe rẹ kpe elin nọnsi Jehova khia sẹbii Jesu. Ọrẹyiriọ, emhin ebe nela eghian Jesu yọle ghe ọle lu bhi ẹghe nan rẹ mun ọlẹn? Ele da yọle ghe ọle re unun riia elin nọnsi Osẹnobulua a. Jesu lẹnmhin ghe emhin ebe i ribhọ nọn khọ sẹbhi nan rẹ re unun riia elin nọn khiale nọnsi Aba ọle a. Ọle da wo ha kpokpo egbe ranmhude inian ọ ki dọ diabe ghe, ranmhude ọle re unun je Osẹnobulua zẹle nin ẹbho da ho nin ele mun ọlẹn yẹ gbe ọle a. Asabọmiẹn ọnan zẹle nin ọle da “manman ha ribhi ọbalọ” bhi ene ẹghe ọkuẹsẹ a mun ọlẹn.—Luk 22:41-44.

12. Uwedẹ nọn ke okhun nẹ nela Jesu rẹ kpe elin nọnsi Aba ọle khia?

¹² Jesu da ziẹngbe ezuọzuọ, ugbemhin bi ọrẹsin nin ọle rẹ sabọ kpe elin nọnsi Aba ọle khia. Jesu lẹn sẹ ghe, a bha miẹn ẹghe nin ọle bha rẹ hẹnmhọn nin Aba ọle; bhiriọ, emhin soso i ribhọ nọn ha re ẹkhọle ha lo ọle. (Hib. 12:2) Jesu yẹ lẹn ghe Esu hi ọnọn ha noo ene  ẹbho rẹ kpokpo ọle bhi ọne ẹghe nan. (Luk 22:2-4; 23:33, 34) Esu rẹ ha guanọ nin ọle re Jesu miẹn ghe ọle bha yẹ ha sun rẹkhan Aba ọle. Ọkpakinọn, ọ bha fo Esu! Jesu da rẹman ghe udede ọbhahoghe Esu khin, sẹyẹ Jehova mhọn eguọmhandia ne mhọn asun-rẹkhan—eria ne ha gene sun rẹkhan ọlẹn aharẹmiẹn ele kuẹlo da ọkakale nọn bha lẹkhẹ.

13. Be uwẹ ha rẹ sabọ re Ojie nọnsẹ ha ghọnghọn yẹ?

¹³ Uwẹ be ho nin uwẹ re Jesu nin Ojie nọnsẹ ha ghọnghọn? Ọ ha yi iriọ, wo ha gẹn elin nọnsi Jehova, ha rẹkpa ẹbho rẹ lẹn ọria nin Jehova gene khin. Uwẹ ha lu iriọ, uwẹ ki ha re egbe khọkhọ Jesu. (1 Pita 2:21) Bọsi Jesu, uwẹ ki wo re Jehova ha ghọnghọn, uwẹ ki yẹ rẹman ghe ọbhahoghe Esu nọn nin Jehova suan khin!

MHAN RẸKPA ẸBHO RẸ MIUHỌNMHỌN SADE MHAN GẸN ELIN NỌNSI JEHOVA

14-15. Emhin esili kẹkẹ nela ha sabọ sunu sade mhan rẹkpa ẹbho rẹ luẹ ẹmhọn Jehova?

¹⁴ Mhan rẹkpa ẹbho rẹ miuhọnmhọn sade mhan gẹn elin nọnsi Jehova. Be ọ rẹ yi iriọ yẹ? Bhi ọsi ẹmhọanta, Esu ‘re ọkhọle nọnsi ẹbho gbi.’ (2 Kọr. 4:4) Ranmhude ọnan, ele dọ rẹọbhi ohoghe rebhe nin Esu bha. Ohoghe bii, Osẹnobulua i ribhọ, mhan i da sabọ sikẹ ọle, ẹmhọn eria bha zẹwẹ rẹtẹ ọle, ọria ọbe ọle khin, sẹyẹ ọle dẹ mun eria ọbe ọbhi uwa eranlẹn rẹ dọ sẹbhi ighegheghe. Ranmhude Esu ho nin ọle riia Jehova elin an beji a ha da miẹn ọ bha ha ghọn ẹbho rẹ sikẹ ọle zẹle nin ọle da bha ene ohoghe nan. Ọkpakinọn, iwẹnna itẹmhọn Osẹnobulua nin mhan lu mhan rẹ zagha iwẹnna nesi Esu a. Mhan man ẹbho ẹmhọanta rẹji Aba mhan nin Jehova, nin mhan rẹ re ogẹn ji elin nọn khiale nọnsọle. Be ki nabhọre?

¹⁵ Ẹmhọanta ne ribhi Baibo manman mhọn ahu. Emhin esili kẹkẹ nabhọre sade mhan man ẹbho ẹmhọn Jehova bi unan ọria nin ọle gene khin. Beji mhan rẹ man ele Baibo, ele ki sabọ dọ daghe iman-emhin ohoghe nin Esu rẹ khian. Ele ki yẹ dọ daghe ikpẹ esili kẹkẹ nin Aba mhan nin Jehova mhọn, beji mhan yẹ rẹ daghe ele. Ọ manman wo han ele ilo sade ele dọ luẹ ẹmhọn ahu nin Jehova mhọnlẹn. (Isa. 40:26) Ọ ko ele udu re sade ele dọ luẹ ẹmhọn uwedẹ nọn gbale nin Jehova rẹ lu emhin. (Deut. 32:4) Ele wo miẹn emhin luẹ bhi ẹwanlẹn nọnsọle. (Isa. 55:9; Rom 11:33) Sẹyẹ ọ ko ele udu re sade ele dọ lẹn ghe Jehova tobọle hi oyẹẹ. (1 Jọni 4:8) Beji ele ha rẹ  manman ha sikẹ Jehova, iriọ ikhuaẹloghe nin ele mhọn nin ele rẹ nyẹn bhi ọne otọ nan bhi ighegheghe ha rẹ ha ziẹn ọbhọ. Udede isẹhoa mhan mhọn rẹ rẹkpa ẹbho rẹ sikẹ Aba mhan nin Jehova! Mhan da ha lu iriọ, Jehova ki ha ghe mhan bii “ene deba [ọle] wẹnna.”—1 Kọr. 3:5, 9.

16. Be ọ rẹ rẹso ẹbho eso yẹ beji ele dọ lẹn ghe Osẹnobulua mhọn elin? Re ijiẹmhin ọbhọ.

¹⁶ Mhan sabọ rẹ re elin nọnsi Jehova rẹ munhẹn nin ẹbho ha zilo. Ọnan ọkpa sẹsẹ sabọ rẹ re ọria nọn mhọn ọkhọle esili rẹ munhẹn ha luẹ ẹmhọn Jehova. Bhi ọsi ijiẹmhin, oga nan i da noo Baibo a da bẹẹ obhokhan ọmanmhẹn natiọle Aaliyah b wanre. Ọkpakinọn, uwedẹ nin ele rẹ ga bha ha yẹẹ ọle, sẹyẹ ọle bha rẹọbhọ ghe ọ dẹ rẹkpa ọle rẹ sikẹ Osẹnobulua. Emhin rebhe da wo fidenọ beji ọle deba Esali Jehova ha luẹ Baibo. Ọle da munhẹn ha ghe Osẹnobulua bii ọmọẹ ọle. Ọ da wo han ọle ilo beji ọle kere ghe a re elin nọnsi Osẹnobulua sibhi Baibo ne bunbun re, sẹyẹ elin-ovan bii, Ebẹanlẹn a ki re ọbhi ihe ọsi ọne elin. Elin nọnsi Jehova nin ọle dọ luẹ ẹmhọn ọlẹn re emhin fidenọ bhi iẹnlẹn nọnsọle. Bhi ọne ẹghe nan, ọle da re eghọnghọn yọle: “Ọmọẹ mẹn nọn sikẹ mẹn nẹ mhọn elin.” Be ki na bhi ọnan re? Ọle da yọle: “Ọkhọle nọnsẹmhẹn wo lọre nian, sẹyẹ, ọ wo re mẹn ha ghọnghọn nin mẹn rẹ dọ luẹ ẹmhọn elin nọnsi Jehova.” Bha ji mhan yẹ fẹ ijiẹmhin ọsi okpea ọkpa ghe natiọle Steve. Azagba-uwa nan da wo manman re obọ rẹkhan oga ọsi ibhokhan Ju a da bẹẹ ọle wanre, sẹyẹ ọle sabọ khue ilo. Ẹmhọn oga soso i zẹwẹ ti ọle bhọ ranmhude uwedẹ nin ele rẹ re ikpunun ga. Ọkpakinọn, ẹghe nin inẹn ọlẹn rẹ yu, ọle da ka nin ọle rẹ dotua kaehọ beji Ọsali Jehova ọkpa ha man ọria Baibo. Ọ da wo manman rẹso ọle beji ọle dọ lẹn sẹbhọ ghe Osẹnobulua mhọn elin. Ọle da yọle: “Mẹn bha rẹ lẹn Osẹnobulua mhọn elin. Ọne ẹghe nan hi ẹghe ọhẹnhẹn nin mẹn rẹ lẹn ghe Osẹnobulua ribhọ, sẹyẹ mẹn dẹ sabọ sikẹ ọle. Ọne ẹghe nan mẹn rẹ dọ lẹn ghe mẹn mhọn Ọmọẹ.”

17. Bezẹle nin uwẹ da muegbe rẹ wo ha gẹn elin nọnsi Jehova? (Yẹ fẹ ifoto ghe.)

¹⁷ Uwẹ be tẹmhọn elin nọnsi Jehova man ẹbho sade uwẹ ribhi inẹbho? Uwẹ be rẹkpa ẹbho rẹ lẹn unan ọria nin Jehova khin? Uwẹ da ha lu iriọ, ọ ki rẹman ghe uwẹ gẹn elin nọnsi Osẹnobulua. Hẹi ji egbe lọ uwẹ rẹ ha gẹn elin nọn khiale nọnsi Jehova beji uwẹ rẹ rẹkpa ẹbho rẹ lẹn unan ọria nin ọle khin. Uwẹ ha lu iriọ, uwẹ ki rẹkpa ẹbho rẹ miuhọnmhọn. Sẹyẹ, uwẹ ki ha re egbe khọkhọ Jesu Kristi nin Ojie nọnsẹ. Ọnọn ke okhun nẹ hi, uwẹ ki ha re Aba ẹ nin Jehova ghọnghọn. Wo dọnmhegbe ha “gẹn elin [nọnsọle] rẹ dọ sẹbhi ighegheghe”!—Ps. 145:2.