Ahamiẹn mhan tie Baibo, ọ dẹ ha mhẹn nin mhan rẹ gua otọ eji mhan tie fẹghe nin mhan da miẹn emhin oriọn bhọ. Ọkpakinọn, be imhan ha rẹ sabọ manman ha miẹn emhin oriọn yẹ bhi eji mhan tie?

Manman gua otọ eji uwẹ tie bhi Baibo. Bhi ọsi ijiẹmhin, dọnmhegbe rẹ lẹn ọria nọn gbẹn ebe Baibo nin uwẹ tie, ọne a gbẹn ọlẹn je, bi ẹghe nan rẹ gbẹn ọlẹn. Ọ dẹ yẹ ha mhẹn sade mhan fẹ idia nin ẹbho nan gbẹn ọlẹn je ha ye, emhin ne sunu ọkuẹsẹ a gbẹn ọlẹn, bi ebi ene ẹbho ki rẹ lu emhin yẹ beji a gbẹn ọlẹn ji ele fo.

Uwẹ sabọ rẹ nọọn egbe ẹ inọnta eso ne ha rẹkpa uwẹ rẹ ria eria nyan ebi uwẹ tiele. Inọnta bii, ‘Be emhin dia ẹbho nan tẹmhọnlẹn bhi ọne ulọnlẹn nan yẹ bhi egbe? Ikpẹ nela ele ha mhọnlẹn? Bezẹle nọn da khẹke nin mẹn re egbe khọkhọ ele, la re egbe nẹ bhi emhin nin ele lu?’

Noo emhin nin uwẹ luẹ bhọ bhi inẹbho, la bhi uwedẹ nin uwẹ rẹ ne ẹbho lu emhin. Uwẹ ha lu iriọ, uwẹ ki rẹman ghe ọria nọn mhọn ẹwanlẹn uwẹ khin, ranmhude Baibo yọle ghe, “ọria nọn hi ki rẹ khin nọn wanlan dẹ re obọ rẹkhan ene emhin nan.”—Ps. 107:43.

• Ebi Uwẹ Ha Sabọ Lu: Gbẹlokotọ bhi ebi a rẹ ne emhin nin mhan luẹ bhi Baibo dagbare yẹ bhi ọne obọle natiọle Emhin Ne Ghanlẹn Ne Ribhi Baibo, bhi ikolo nan do bhi ẹkẹ uzana. A mhanmhan inọnta ọbhi ọne obọle nan nin mhan ha sabọ ha nọọn egbe mhan le, emhin nin mhan ha sabọ ria eria nyan, bi ifoto nin mhan ha da sabọ miẹn emhin luẹ.