BHI ẹdẹ Wẹnẹzde, Jẹnuare 18, 2023, a da re emhin kpataki nọn khẹke nin mhan lẹn ọbhi jw.org. A da ji mhan lẹn ghe, a re ibhio mhan nin Gage Fleegle bi Jeffrey Winder kiẹn Otu Nọn Sun Oga ọsi Esali Jehova. Ọ reele nin ene ibhio mhan nan mọn da ga Jehova nọnsẹn.

Obọ ọsi wẹst bhi Pennsylvania, U.S.A., ọle a da biẹ obhio mhan nin Fleegle. Ẹkẹ agbotu ene biẹ ọle da bẹẹ ọle wanre. Beji ọle ribhi usẹn, ene biẹ ọle da diọbhi eji bha manman tan ẹlo a nan da guanọ urẹkpa bhi iwẹnna itẹmhọn Osẹnobulua. Ọ bha ree gbe, ọle da mianmẹn bhi Novẹmba 20, 1988.

Ẹghe rebhe ene biẹ Fleegle rẹ ha taman ọlẹn nin ọle ria ẹmhọn iwẹnna oga ọsi ẹghe rebhe. Ele kẹ wo re uwa nọnsele nin efẹotughe bi ibhio mhan ne ga bhi Bẹtẹ dia. Ọnan da rẹkpa obhio mhan nin Fleegle rẹ daghe ebi ene ibhio mhan nan rẹ ghọnghọn yẹ. Ọ bha bue gbe beji ọle mianmẹn fo, ọle da munhẹn ha lu iwẹnna ọkanẹfan ọsi ẹghe rebhe bhi Sẹtẹmba 1, 1989. Ikpe eva ki gbera, ọle da mun emhanmhan nin ọle ha mhọn beji ọle ribhi ikpe 12 sẹ. Ọne emhanmhan hi, nin ọle rẹ dọ ha ga bhi Bẹtẹ. Ọle da munhẹn ha ga bhi Bẹtẹ nọn ribhi Brooklyn bhi Ọtoba 1991.

Bhi Bẹtẹ, obhio mhan nin Fleegle da re ikpe elẹnlẹn wẹnna bhi eji a da printi ebe nesẹmhan ọkuẹsẹ a re ọle diọbhi Ọfisi Nọn Mhọn Obọ bhi Iwẹnna Itẹmhọn Osẹnobulua (Service Department). Bhi ọne ẹghe nan, ọle da re ikpe eso rẹ ga bhi agbotu nan da zẹ urolo Russia. Bhi 2006, ọle da re obhio mhan nin okhuo natiọle Nadia bhi amhẹn, ele veva da ko ha ga bhi Bẹtẹ. Ele wo ko ga bhi agbotu nan da zẹ urolo ọsi Portuguese, sẹyẹ ọ ki gbera ikpe igbe nian nin ele mọn da ga bhi agbotu nan da zẹ urolo ọsi Spanish. Obhio mhan nin Fleegle ki sẹ wẹnna bhi Ọfisi Nọn Mhọn Obọ bhi Iwẹnna Itẹmhọn Osẹnobulua bhi ikpe ne bunbun, a da yọle nin ọle dọ ha wẹnna bhi ọfisi ọsi Otu Nọn Mhọn Obọ bhi Iman-emhin. Akizẹbue, a da yọle nin ọle dọ ha wẹnna bhi ọfisi ọsi Otu Nọn Mhọn Obọ bhi Iwẹnna Itẹmhọn Osẹnobulua. Bhi Mach 2022, a da re ọle kiẹn ọkpa bhi ene rẹkpa Otu Nọn Mhọn  Obọ bhi Iwẹnna Itẹmhọn Osẹnobulua ọsi Otu Nọn Sun Oga.

Eji a tiọle Murrieta, California bhi U.S.A, ọle a da bẹẹ obhio mhan nin Winder wanre. Ẹkẹ agbotu ene biẹ ọle da bẹẹ ọle wanre, ọle da mianmẹn bhi Mach 29, 1986. Bhi uki nọn rẹkhan ọlẹn, ọle da mhanmhanlẹn nin ọle rẹ lu iwẹnna ọkanẹfan ọsi ẹgheso. Ọle da wo manman sọnyẹnmhẹn bhọ rẹ sẹbhọ ghe, ọle da ha ho nin ọle wo ha lu ọle khian. Ọle ki sẹ lu iwẹnna ọkanẹfan ọsi ẹgheso bhi ẹkẹ uki ne bunbun, ọle da munhẹn ha lu iwẹnna ọkanẹfan ọsi ẹghe rebhe bhi Ọtoba 1, 1986.

Beji obhio mhan nin Winder ribhi usẹn, ọle da dọ tuẹ ibhio ọle eva nin ikpea ne mẹn ọlẹn ne ha ga bhi Bẹtẹ bhi ọne ẹghe nan. Ọne Bẹtẹ nin ọle rẹnẹ yo da re ọle ha guanọ nin ọle dọ ha ga bhi Bẹtẹ sade ọle ki wanre. Bhi Mee 1990, a da tiọle nin ọle dọ ha ga bhi Bẹtẹ nọn ribhi Wallkill.

Obhio mhan nin Winder wo wẹnna bhi ije kẹkẹ bhi Bẹtẹ. Ọle da wẹnna bhi Ọfisi Ne Mhọn Obọ Bhi Ene Khiẹn-Khiẹn Bẹtẹ Yẹ Re Ọle Ọi Nọnsẹn, Ọfisi Ọsi Ene Gbẹloghe Ugbo bi Ọfisi Natiọle Bẹtẹ Ọfisi. Bhi 1997, ọle da re obhio mhan nin Angela bhi amhẹn. Rẹ na ẹghenin ha vade ele veva mọn da ga bhi Bẹtẹ. Bhi 2014, a da yọle nin ele diọbhi Bẹtẹ nọn ribhi Warwick. Bhi enin, obhio mhan nin Winder da deba ha wẹnna bhi Bẹtẹ nọn ke okhun nẹ nan ha bọn. Bhi 2016, ele da diọbhi Watchtower Educational Center nọn ribhi Patterson. Bhi enin, obhio mhan nin Winder da ha wẹnna bhi Ọfisi Ne Mhọn Obọ Bhi Vidio nesẹmhan. Ikpe enẹn ki gbera, ele da fikie diọbhi Warwick. Bhi enin, a da yọle nin ọle dọ ha wẹnna bhi ọfisi ọsi Otu Nọn Mhọn Obọ bhi Ene Ga bhi Bẹtẹ. Bhi Mach 2022, a da re ọle kiẹn ọkpa bhi ene rẹkpa Otu Nọn Mhọn Obọ bhi Ene Ga bhi Bẹtẹ ọsi Otu Nọn Sun Oga.

Mhan bhii nin Jehova manman nan erọnmhọn nin ene ikpea nan beji ele rẹ manman ha wẹnna kaka bhi ẹmhọn Agbejele.—Ẹfẹ. 4:8.