1. Be bhọ re ẹghe nin mhan da nyẹnlẹn ẹlẹnan nian dikẹ?

ẸGHE nin mhan da ha nyẹnlẹn ẹlẹnan wo manman dikẹ. Beji Baibo tale, Jehova koko “usun ẹbho ne bunbun . . . ne nanbhi otọ rebhe, agbaẹbho rebhe, bi urolo rebhe dagbare” kugbe. Ene ẹbho nin ọle koko kugbe nan ki wo manman bun ẹlẹnan, e bun gbera ẹbo elẹnlẹn (8,000,000). Ene ẹbho nan re oga nin Osẹnobulua asọn bi odanmhẹn. (Rev. 7:9, 15; Isa. 60:22) A bha sẹ ka miẹn ẹghe nin ẹbho ne hoẹmhọn Osẹnobulua bi eria sẹ rẹ dinian bun khẹ.

2. Be bhọ eria ne iga Osẹnobulua hoẹmhọnlẹn? (Fẹ adudu nọn ribhi eji mhan da munhẹn ghe.)

² Baibo yẹ tale ghe, ẹlẹnan nian, ẹbho iyẹ da ha mhọn ahoẹmhọn-egbe nọn khẹke, ghe ene iga Osẹnobulua dẹ dọ hoẹmhọn egbe ele ọkpa. Paul nin odibo da gbẹn yọle: “Lẹn sẹbhọ ghe, ẹghe ọkike . . . , eria ki ha hoẹmhọn egbe ele ọkpa, ele ki ha hoẹmhọn igho, . . . nin ẹbho rẹ ha hoẹmhọn Osẹnobulua, ele ki ha hoẹmhọn ọmhẹn bhi egbe.” (2 Tim. 3:1-4) Ọiyi ahoẹmhọn-egbe nọn dia inian Kristian mhọn, o wo dikẹ. Ẹbho ne khu ọsi egbe ele ọkpa ida sabọ miẹn eghọnghọn. Bhi ọsi ẹmhọanta, ahoẹmhọn-egbe nọn dia inian, ọle re ọne agbọn nan manman kaka ẹlẹnan.

3. Be bhọ mhan ha luẹ bhi ọne uhọnmhọn-ọta nan? Bezẹle nin mhan a da luẹ ọle?

 ³ Paul lẹn sẹbhọ ghe, ọne ahoẹmhọn-egbe nin eria ne iga Osẹnobulua mhọnlẹn, dẹ dọ ha yi okhẹnan rẹji Kristiẹns. Bhiriọ ọle da taman ele nin ele “si egbe kie” bhi ẹwẹ eria ne mhọn ahoẹmhọn-egbe nọn bha khẹke. (2 Tim. 3:5) Ọkpakinọn, mhan ida sabọ miẹn ghe mhan bha deba ele mun obọ hiehie. Bhiriọ, be bhọ mhan ha rẹ sabọ si egbe kie bhi ọne uwedẹ iẹnlẹn nọn bha gba nin ẹbho ne nega mhan rẹ nyẹnlẹn yẹ, beji mhan ha da sabọ re Osẹnobulua ha ghọnghọn? Bha ji mhan luẹ ẹmhọn ebi ahoẹmhọn-egbe ọsaje rẹ dikẹ bhi ọ nan tẹmhọnlẹn bhi 2 Timothy 3:​2-4 yẹ. Bhiriọ, mhan ki sabọ ha mhọn ahoẹmhọn-egbe nọn khẹke, nọn ha re ukhọnmhin bi eghọnghọn nin mhan bhi iẹnlẹn.

4. Be imhan rẹ lẹn yẹ ghe ọiyi emhin ọbe sade mhan hoẹmhọn egbe mhan beji ọkhẹke?

⁴ Paul da yọle, “eria ki ha hoẹmhọn egbe ele ọkpa.” Emhin ọbe nọn sade mhan hoẹmhọn egbe mhan? Hiehie, ọ bhọ khẹke nin mhan hoẹmhọn egbe nọnsẹmhan. Jehova man mhan bhi uwedẹ nin mhan ha rẹ sabọ hoẹmhọn egbe nọnsẹmhan. Jesu da yọle: “Hoẹmhọn ibo ẹ beji uwẹ rẹ hoẹmhọn egbe ẹ.” (Mark 12:31) Sade mhan bha hoẹmhọn egbe mhan, mhan ida sabọ hoẹmhọn ibo mhan. Baibo yẹ tale ghe nin “ene ọdọ hoẹmhọn amhẹn ele beji ele rẹ hoẹmhọn egbe nọnsele. Okpea nọn hoẹmhọn amhẹn ọlẹn, egbe nọnsọle ọ hoẹmhọnlẹn, ranmhude okpea soso iribhọ nọn he egbe nọnsọle, ọkpakinọn, ọle wo le ebale bhi egbe yẹ gbẹloghe egbe.” (Eph. 5:28, 29) Bhiriọ, ọiyi emhin ọbe sade mhan hoẹmhọn egbe mhan beji ọkhẹke.

5. Be bhọ uwẹ ha rẹ khọkhọ eria ne manman hoẹmhọn egbe ele ọkpa yẹ?

⁵ Ahoẹmhọn-egbe nin ẹbho mhọn da egbe ele nan tẹmhọnlẹn bhi 2 Timothy 3:2, ọiyi ọ nọn khẹke in mhan ha mhọnlẹn. Ọnin iyi ahoẹmhọn-egbe ọsaje. Eria ne hoẹmhọn egbe ele ọkpa ki ha ghe egbe ele bọsi ẹbho ne kpọnọ gbera ẹbho nekẹle rebhe. (Tie Romans 12:3.) Ọsi egbe ele ọkpa ele khu bhi iẹnlẹn nọnsele. Ẹmhọn ẹbho nekẹle bha manman rẹtẹ ele. Ahamiẹn emhin bha khian nọnsẹn, ele ki re ọle ha sin ẹbho nekẹle, ele ida riale ele mhọn obọ bhọ. Ebe ọkpa da re eria ne hoẹmhọn egbe ele ọkpa khọkhọ elanmhẹn natiọle hedgehog. Inian ọne elanmhẹn diabe ọkhan. Ilọn ne fu ribhi udu bi ẹkẹ nọnsọle. Ọ ha khire, a ida yẹ daghe ilọn ne fu ne ribhi ẹkẹ bi udu nọnsọle, bhiriọ, ọ ki zẹ igbẹn ne ribhi ikeke nọnsọle re. Eria ne diriọ ria ẹmhọn egbe ele ọkpa igene ghọnghọn.

6. Elele nela a miẹn bhọ sade a hoẹmhọn Osẹnobulua?

⁶ Eria ne guanọ otọ Baibo fẹ ghe yọle ghe, ene hoẹmhọn egbe ele ọkpa Paul ka tẹmhọnlẹn, ranmhude ọnan re ẹbho mhọn ikpẹ nekẹle nin ọle yẹ tẹmhọnlẹn. Ẹbho ne hoẹmhọn Osẹnobulua iyiriọ. Ikpẹ nin ele mhọn wo dikẹ. Baibo diẹn ahoẹmhọn-egbe ọsaje mun eghọnghọn, ọfure, iziẹngbe, ifuẹkẹ, umhẹnmhin, urẹọbhọ, ọkhọle nọn fu bi imuegbe bhi ibẹẹ. (Gal. 5:22, 23) Ọria nọn gbẹn illo ọkpa bhi ebe nọnsi Psalm bhi Baibo da yọle: “Eghọnghọn hi ọsi ẹbho nin Jehova yi Osẹnobulua nọnsele!” (Ps. 144:15) Osẹnobulua nọn ghọnghọn, ọle iJehova khin. Bhiriọ, ẹbho ne ga ọle yẹ mhọn ọne eghọnghọn nan. Sẹyẹ, ene ga iJehova bha diabe eria ne hoẹmhọn egbe ele ọkpa, ne wo guanọ emhin nin ele ha miẹn ọria le. Ene ga iJehova wo zẹ egbe ele dagbare rẹ rẹkpa ẹbho nekẹle.—Acts 20:35.

7. Inọnta eso nela ọkhẹke nin mhan nọọn egbe mhan le rẹ fẹ oyẹẹ nin mhan mhọn da Osẹnobulua ghe?

⁷ Be bhọ mhan ha rẹ lẹn yẹ si ahoẹmhọn-egbe nin mhan mhọn da egbe mhan kpọnọ gbera ahoẹmhọn-egbe nin mhan mhọn da Osẹnobulua? Fẹ adia nọn ribhi Philippians 2:3, 4 ghe, nọn yọle: “Hẹi re itẹn-abọ la okpẹhio lu emhin soso. Ọkpakinọn, ha re idegbere lu emhin. Ha riale ghe, ẹbho nekẹle mhẹn  gbera uwẹ. Iriọ uwẹ ha sẹyẹ rẹ ha gbẹlokotọ, ọiyi bhi ọmhẹn nọnsi uwẹ ọkpa, sokpan, yẹ gbẹlokotọ bhi ọmhẹn ọsi eria nekẹle.” Ọkhẹke nin mhan nọọn egbe mhan: ‘Mhẹn rẹkhan ọne adia nan bhi iẹnlẹn nọnsẹmhẹn? Mhẹn gene situa nin mhẹn rẹ lu iho nọnsi Osẹnobulua? Mhẹn dọnmhegbe nin mhẹn rẹ rẹkpa ibhio mhẹn bhi agbotu bi ene imhẹn miẹn sade mhẹn tẹmhọn Osẹnobulua? Bhi ọsi ẹmhọanta, ọbha lẹkhẹ nin mhan rẹ ha zẹ egbe mhan dagbare rẹ rẹkpa ẹbho, sokpan, mhan ha dọnmhegbe yẹ situa bhọ, mhan dẹ sabọ lu ọle. Bhiriọ, mhan ki miẹn eghọnghọn nọn khua ranmhude mhan lẹnmhin ghe Osẹnobulua re obọ bhi ebi mhan lu.

8. Be bhọ eso sẹ lu ranmhude oyẹẹ nin ele mhọn da Osẹnobulua?

⁸ Ranmhude oyẹẹ nin ele mhọn da iJehova, eso zi iwẹnna nọn manman kpọnọ obọ, beji ele a da manman miẹn ẹghe rẹ ha ga iJehova. Ericka nọn nyẹnlẹn bhi United States, dọkitọ ọle ha khin. Ọle bha ha khu ọbhọ nin ọle rẹ ha ribhi ihe nọn khua bhi ọne iwẹnna nan. Ọle da zẹ nin ọle rẹ ha lu iwẹnna ọkanẹfan. Ọle bi ọdọ ọle sẹ ko ga bhi agbaẹbho ne bunbun. Ọkizẹbue, Ericka da yọle: “Isẹlo-bhi-emhin nin mhan miẹn bhọ ẹghe nin mhan rẹ rẹkpa ene zẹ urolo ọbhebhe, bi imọe nin mhan ki ha mhọnlẹn wo manman rẹ mhan ha ghọnghọn bhi iẹnlẹn. Mhẹn sẹyẹ lu iwẹnna idọkitọ, ọkpakinọn, ranmhude mhẹn manman miẹn ẹghe rẹ ha rẹkpa ẹbho sikẹ Osẹnobulua, bi rẹ ha rẹkpa bhi ẹkẹ agbotu, mhẹn wo miẹn eghọnghọn nọn khua bhi iẹnlẹn.”

9. Bezẹle nin ihoẹmhọn igho ida sabọ re eghọnghọn re?

⁹ Paul da yẹ gbẹn yọle ghe, ẹbho “ki ha hoẹmhọn igho.” Ikpe eso ne gbera, ọkanẹfan ọkpa bhi Ireland da ha tẹmhọn Osẹnobulua man okpea ọso. Ọne okpea da di obọ bhi ẹkpa ne igho eso dagbare, re ẹgbọ yọle: “Ọne igho nan, ọle osẹnobulua nọnsẹmhẹn!” Arẹmiẹn ọiyi ẹbho rebhe ha sabọ ta ọta nọn sẹnian, ẹbho ne hoẹmhọn igho bi emhin nin igho ha sabọ dẹ ki vuọn ọne agbọn nan ẹlẹnan. Baibo da gbe uhi mhan yọle: “Ọnọn hoẹmhọn siliva, siliva nọn mhọnlẹn ida miẹn ẹghe nọn ha rẹ khọn ọlẹn, la nin igho nin ọnọn hoẹmhọn ẹfe miẹn bhi iwẹnna a rẹ dọ khọn ọlẹn.” (Eccl. 5:10) Ene eria nan, ebi ele ha rẹ ha khuan igho ba ọne ele ka mhọnlẹn, ọle ọkpa ele ria ẹmhọnlẹn ẹghe rebhe. Ele a ki manman ha situa nin ele rẹ ha mhọn ọlẹn, ele ki ha miẹn ọbalọ kẹkẹ bhi egbe.—1 Tim. 6:9, 10.

10. Be Agur tale rẹji ẹmhọn ẹfe bi a bha miẹn rẹ lu?

¹⁰ Bhi ọsi ẹmhọanta, mhan rebhe noo igho. Ọ sabọ gbega mhan bhi uwedẹ eso. (Eccl. 7:12) Ọria dẹ be sabọ ha ghọnghọn, a ha rẹ miẹn ọle bha manman fe? Ehe! (Tie Ecclesiastes 5:12.) Agur nin ọmọn ọsi Jakeh da yọle: “Hẹi ji obọ gbe mhẹn, hẹi ji mhẹn fe. Wo ji mhẹn ha le ebale nọn sẹ mhẹn bhi egbe.” Mhan lẹn ebezẹle nin ọle bha da guanọ nin obọ wo gbe ọle sẹsẹsẹ. Beji ọle rẹ gbe otọle fanọn an, ọle bha guanọ nin ọle dọ ha ra, ranmhude, ọnan dẹ re itọn sin elin nọnsi Osẹnobulua. Be ki zẹ nin ọle bha da guanọ ẹfe? Ọle da yẹ yọle: “Nin mhẹn hẹi dọ khọn sẹbhọ ghe, mhẹn ye uwẹ a. Mhẹn ki dọ ha yọle: ‘Họla hi Jehova?’” (Prov. 30:8, 9) Asabọ miẹn uwẹ lẹn ẹbho eso ne mun udu nyan ẹfe nọnsele gbera Jehova.

11. Be bhọ Jesu tale rẹji ẹmhọn igho?

¹¹ Ẹbho ne hoẹmhọn igho ida sabọ lu emhin nọn tii Osẹnobulua bhọ. Jesu da tale ghe: “Ọria soso ida sabọ ga ebeanlẹn eva. Ọ dẹ he ukpọkpa, hoẹmhọn ọnọnkẹle. La ọ ki sun rẹkhan ukpọkpa, ha re ẹlo gbe ọnọnkẹle a. Uwẹ ida sabọ ha yi igbọn nọnsi Osẹnobulua sẹyẹ ha yi igbọn nọnsi ẹfe.” Ọ da yẹ yọle: “Hẹi yẹ ne emhin ne ghanlan nesẹ ya bhi ọne otọ nan, eji emhin nọn diabe atutubhiẹbhiẹ bi umọntọnmhin ha da le ọle kua, bi eji oyi ha da nanbhi uwa ra ele. Ha ne emhin ne ghanlan ya nin egbe ẹ bhi okhun, eji emhin nọn diabe atutubhiẹbhiẹ la umọntọnmhin bha ha da sabọ le ọle kua, eji oyi bha ha da sabọ nanbhi uwa ra ele.”—Matt. 6:19, 20, 24.

12. Mhan ha de obọ re bhi iẹnlẹn, be bhọ ọnan ha rẹ sabọ rẹkpa mhan rẹ ha ga Osẹnobulua yẹ? Sounu bhi ijẹmhin nọn re ọnan man.

 ¹² Ẹbho ne bunbun dọ khian kere ghe, ele ha de obọ re bhi iẹnlẹn, ele ki ha ghọnghọn, ele ki sẹyẹ manman miẹn ẹghe rẹ ha ga iJehova. Jack nọn nyẹnlẹn bhi United States da khiẹn udede uwa nọnsọle bi ẹki nọnsọle, beji ọle ha rẹ miẹn ẹghe rẹ deba okhuo ọle ha lu iwẹnna ọkanẹfan. Ọle da yọle: “Ọbha zẹwẹ lẹkhẹ nin mhan rẹ khiẹn uwa bi emhin eso nin mhan ha mhọnlẹn. Bhi ẹkẹ ikpe ne bunbun, mhẹn ha rẹ sẹbhi uwa sade mhẹn zobọ bhi iwẹnna, mhẹn ida ha ghọnghọn hiehie ranmhude ọnọghọ kẹkẹ nin mhẹn miẹn bhi isi iwẹnna. Ọkpakinọn, ẹghe rebhe okhuo mhẹn rẹ ghọnghọn ranmhude iwẹnna ọkanẹfan nin ọle ha lu. Okhuo mhẹn ki ha taman mhẹn, ‘ọwanlẹn nọn kokhun nẹ mhẹn wẹnna nan!’ Beji mhẹn ki yẹ deba ha lu iwẹnna ọkanẹfan nian, ọwanlẹn ọkpa imhan veva ki ko wẹnna nan, Jehova tobọle.”

13. Inọnta eso nela ha sabọ rẹkpa mhan rẹ lẹn uwedẹ nin mhan rẹ ghe igho?

¹³ Ewanniẹn nin mhan ha re bhi ene inọnta nan dẹ rẹkpa mhan lẹn uwedẹ nin mhan rẹ ghe igho yẹ: ‘Uwedẹ iẹnlẹn nọnsẹmhẹn be rẹman ghe, mhẹn rẹọbhọ ebi Baibo tale bhi ẹmhọn igho? Ebi mhẹn ha rẹ khu igho yẹ mhẹn be mun kalo bhi iẹnlẹn nọnsẹmhẹn? Igho bi ebi igho sabọ dẹ mhẹn be hoẹmhọnlẹn gbera ikolu nin mhẹn bi Jehova bi ẹbho nekẹle ko mhọnlẹn? Mhẹn gene mun udu nyan iJehova ghe ọle dẹ rẹkpa mhẹn ha mhọn emhin nin mhẹn gene guanọ bhi iẹnlẹn?’ Mhan lẹn sẹbhọ ghe Jehova ida hiẹ ọria soso nọn mun udu nyan ọlẹn.—Matt. 6:33.

14. Jehova be guanọ nin mhan hẹi re egbe re ahoho hiehie?

¹⁴ Beji Baibo tale, ẹbho wo dọ “hoẹmhọn ọmhẹn bhi egbe” ẹlẹnan. Ọiyi ọbe sade mhan hoẹmhọn egbe mhan la sade mhan guanọ igho beji ọkhẹke. Bhiriọ, mhan ha yẹ re egbe re ahoho beji ọkhẹke, ọiyi emhin ọbe. Jehova bha yọle nin mhan hẹi re egbe re ahoho hiehie, la nin mhan rẹban emhin rebhe ne ha sabọ rẹ mhan ha sọnyẹmhẹn bhi iẹnlẹn. Baibo taman mhan ghe: “Ha khian, dọ re eghọnghọn le ebale nọnsẹ, yẹ re ọkhọle ọnyẹnmhẹn da anyọn nọnsẹ.”—Eccl. 9:7.

15. Iregbe re ahoho nela a tẹmhọnlẹn bhi 2 Timothy 3:⁠4?

¹⁵ Iregbe re ahoho nin 2 Timothy 3:4 tẹmhọnlẹn hi, iregbe re ahoho nọn bha diẹn mun adia nọnsi Osẹnobulua. Baibo bha yọle bhi enin ghe, ene ẹbho dẹ hoẹmhọn iregbe re  ahoho gbera Osẹnobulua. Ọ yọle: ‘nin ẹbho rẹ ha hoẹmhọn Osẹnobulua, ele ki ha hoẹmhọn ọmhẹn bhi egbe.’ Ọnan rẹman ghe, ele ida hoẹmhọn Osẹnobulua hiehie. Okpea ọkpa nọn manman tie ebe da gbẹn yọle: “Ọne ulọnlẹn nan bhi Baibo bha yọle ene eria dẹ yẹ hoẹmhọn Osẹnobulua. Ọ yọle ele bha hoẹmhọn Osẹnobulua hiehie.” Adia nọn khua ọnan khin rẹji eria ne mun iregbe re ahoho kalo bhi iẹnlẹn nọnsele! Eria nin enan yọle ghe, e dẹ “hoẹmhọn ọmhẹn bhi egbe,” ele hi eria ne ji onyọnyọn ọsi ọne agbọn na hiẹ ele.—Luke 8:14.

16, 17. Ijiẹmhin nela Jesu re bhi otọ bhi ẹmhọn iregbe re ahoho?

¹⁶ Jesu re ẹghe bhi otọ rẹ ha regbe re ahoho. Ọrẹyiriọ, ọiyi iregbe re ahoho Jesu wo ha re iẹnlẹn nọnsọle khu. Baibo taman mhan ghe Jesu yo iluemhin ọsi ibọdọ bi ire-okhuọ, bi iluemhin ọbhebhe nin ebale da manman wo kpọa. (John 2:1-10; Luke 5:29) Bhi ọne iluemhin ọsi ibọdọ bi ire-okhuo, Jesu da re amẹn kiẹn anyọn, ranmhude anyọn nọn ha ribhi otọ ho nin ọ fo. Ẹghe ọbhebhe, ẹbho eso da ha re unun ji iJesu ranmhude ghe, ọle da anyọn yẹ le ebale.—Luke 7:33-36

¹⁷ Ọrẹyiriọ, ọiyi iregbe re ahoho Jesu wo ha re iẹnlẹn nọnsọle khu. Jehova ọle mun kalo, ọle da yẹ ha zegbe dagbare rẹ rẹkpa ẹbho. Ọle da ziẹngbe uu, nin mhan nin eria da sabọ miẹn iẹnlẹn ọsi ighegheghe. Jesu da taman eria ne rẹkhan ọlẹn: “Eghọngọn hi ọsi bha sade ẹbho khọẹkẹ bha, bi sade ele kpokpo bha, bi sade ele ta ọta ne imhẹn bha bhi egbe yẹ re ohoghe sin bha ranmhude imhẹn. Bha ha duje bha ha yẹ ji eghọnghọn gbe bha udu a, ranmhude ihaosa nọnsẹbha nọn ribhi okhun bhi ẹlinmhin manman kpọnọ. Iriọ ele ka yẹ rẹ kpokpo ene akhasẹ ne ka nyẹnlẹn bhi ẹghe nọn gbera.”—Matt. 5:11, 12.

18. Inọnta eso nela ha rẹkpa mhan rẹ lẹn si iregbe re ahoho mhan ki mun kalo nẹ bhi iẹnlẹn?

¹⁸ Be bhọ mhan ha rẹ fẹghe yẹ si iregbe re ahoho mhan ki mun kalo? Nin mhan nọọn egbe mhan ene inọnta nan: ‘iregbe re ahoho mhẹn mun kalo gbera ikolo oga bi itẹmhọn Osẹnobulua? Mhẹn dẹ sabọ fi ikeke gbe emhin eso ranmhude oga nọnsi iJehova? Mhẹn kuẹ zẹ uwedẹ nin mhẹn ha rẹ regbe re ahoho, mhẹn ka ria eria nyan ebi Jehova ghe ọle yẹ? Sade mhan ho nin mhan rẹman ghe mhan gene hoẹmhọn Osẹnobulua, ọiyi emhin nin mhan lẹn ghe Osẹnobulua hele ọkpa mhan ha rẹban. Ọkhẹke nin mhan yẹ rẹban emhin ne bha mun mhan ẹlo kore fo nọnsẹn, nin mhan ha fẹghe si ele gene yẹẹ Osẹnobulua.—Tie Matthew 22:37, 38.

19. Hela ene eria ne ida sabọ miẹn eghọnghọn?

¹⁹ Ọ ki sẹbhi ikpe Uli ehan (6,000) nin mhan nin eria mọn wo loya ha vade. Ọkpakinọn, ọne agbọn Esu nan bu ọkpẹnlẹn nọnsọle. Ẹbho ne hoẹmhọn egbe ele ọkpa, igho, bi iregbe re ahoho bhi uwede nọn bha khẹke, ele ki wo vuọn ọne agbọn nan. Ene eria nan, ọsi egbe ele, bi emhin nin ele ha miẹn bhi obọ, ọle ọkpa emhin nin ele wo re iẹnlẹn nọnsele khu. Eria ne sẹriọ ida sabọ miẹn eghọnghọn bhi iẹnlẹn. Hela ha sabọ miẹn eghọnghọn bhi iẹnlẹn? Ọnọn gbẹn illo ọkpa bhi ebe nọnsi Psalm bhi Baibo da yọle: “Eghọnghọn hi ọsi ọne ọria, nin Osẹnobulua ọsi Jacob yi urẹkpa nọnsọle, nọn mhọn ikhuaẹloghe rẹ da iJehova nin Osẹnobulua nọnsọle.”—Ps. 146:5.

20. Be uwẹ sẹ rẹ miẹn eghọnghọn bhi oyẹẹ nin uwẹ mhọn da iJehova yẹ?

²⁰ Esali Jehova wo gene hoẹmhọn iJehova, ukpukpe mhan rẹ bun ọbhọ. Ọnan rẹman ghe Agbejele nọnsi Osẹnobulua munhẹn fo, ghe ọ dẹ kẹ mun erọnmhọn ne bunbun sẹ bhi ọne otọ nan. Mhan a lu iho nọnsi Osẹnobulua, mhan ki miẹn eghọnghọn ọsaje nọn ida fo, ranmhude mhan lẹn ghe, ebi mhan lu re eghọnghọn ji iJehova. Eria ne hoẹmhọn iJehova dẹ miẹn eghọnghọn nọn ida fo ghe! Bhi uhọnmhọnlẹn nọn ki sẹ ọle egbe nian, mhan dẹ luẹ ẹmhọn ikpe esọ nin ẹbho mhọn ranmhude ele hoẹmhọn egbe ele ọkpa. Mhan ki yẹ zilo nyan ikẹkẹ nọn ribhi ene ikpe nan, bi ikpe nin ene ga iJehova mhọnlẹn.