1, 2. Iluemhin nela mhan da lu bhi 2018 nọn ha manman si ẹbhọ kokore? Bezẹle nọn da sabọ si ẹbho ne bunbun kokore? (Fẹ adudu nọn ribhi eji a da munhẹn ghe.)

BHI ukpẹdẹ ọkpa nyan ọgban bhi uki ọsi March, bhi ukpe 2018 (March 31, 2018), ẹghe nin oẹnlẹn ha ki rẹ ha defia, Esali Jehova bi ẹbho nin ele tiele ki sikoko nin ele da lu iluemhin ọsi Ayere ọsi Uyumhin Nọnsi Jesu. Ọne ukpẹdẹ nin, ẹbho ne manman bunbun ki sikoko nin ele lu ọne iluemhin nan. Ukpukpe, ọne iluemhin nan, ọle ki sẹ si ẹbho ne bunbun kokore nẹ bhi ọne otọ agbọn nan rebhe.

² Mhan lẹnmhin ghe ọ dẹ wo ha tii Jehova bi Jesu bhọ, sade ele daghe ẹbho sikoko bhi ije kẹkẹ nin ele rẹ lu ọne iluemhin nan, bhi ọne ukpẹdẹ nin. Baibo ji mhan lẹn ghe, usun ẹbho ne bunbun nin ọria soso ida sabọ ka, ne nanbhi otọ rebhe, urolo rebhe, bi agbaẹbho rebhe vae, dẹ reso yọle: “Obọ Osẹnobulua nọn dotua bhi ọne ojukhuo, bi obọ ọne ohuan, ọle umiẹnfan nọnsẹmhan nan vae.”  (Rev. 7:9, 10) Emhin nọn tii mhan bhọ nọn ghe, ọne iluemhin nan gene wo re ogẹn nọn sẹbhi inian ji Jehova bi Jesu!

3. Inọnta eso nela ọne iluẹmhin nan ha wanniẹn?

³ Inọnta eso nin ọne iluẹmhin nan ha wanniẹn hi: (1) Be bhọ mhan ha rẹ muegbe khẹ ọne iluemhin nan yẹ nin mhan da sabọ miẹn elele bhọ? (2) Be bhọ ọne iluemhin nan rẹ ziẹn okugbe nọnsẹmhan yẹ? (3) Be bhọ ọdeọde bhi ẹwẹ mhan ha sabọ lu nin mhan rẹ ha tuẹn okugbe nọnsẹmhan okhun? (4) A dẹ be miẹn Ayere ọsi Uyumhin Nọnsi Jesu na ha lu kike? Ẹghela a ha rẹ lu ọle?

4. Bezẹle nọn da yi emhin kpataki nin mhan rẹ dọnmhegbe rẹ yo ikolo ọsi ọne Ayere nan, aharẹmiẹn mhan ribhi ọnọghọ?

⁴ Ha ria eria nyan ebezẹle nọn da yi emhin kpataki nan rẹ lu ọne Ayere nan. Yere ghe ikolo oga nin mhan yo, uwedẹ ọkpa nin mhan rẹ ga Jehova nọn. IJehova bi Jesu daghe ọle sade mhan manman dọnmhegbe nin mhan rẹ yo ọne ikolo nọn kokhun nẹ nan. Mhan guanọ nin ele daghe ọle ghe, mhan dẹ yẹ yo ọne ikolo nan aharẹmiẹn mhan ribhi ọnọghọ, sokpan ọne ọnọghọ bha nẹ mhan obọ. Mhan ha rẹman ghe, nan rẹ ha yo ikolo oga, emhin kpataki nọn rẹji mhan, ọnan dẹ deba emhin nọn ha re iJehova gbẹn elin mhan bhi ebe ọsi Ayere nọnsọle—ebe ọsi aribhọ—ebe nin ọle rẹ gbẹn elin ọsi ẹbho ne ha miẹn aribhọ ọsi ighegheghe.—Mal. 3:16; Rev. 20:15.

5. Ọne iluemhin ọsi Ayere a ki ha sire, be imhan a rẹ ha dọnmhegbe mhan fẹ ghe yẹ, si mhan sẹyẹ ribhi oga?

⁵ Ọne iluemhin ọsi Ayere a ki ha sire, ọkhẹke nin mhan manman ha re ẹghe bhi otọ rẹ nan erọnmhọn beji mhan rẹ ha ria ẹmhọn ukolu nin mhan bi Jehova ko mhọnlẹn. (Tie 2 Corinthians 13:5.) Be imhan ha rẹ lu ọnin yẹ? Mhan ki ha dọnmhegbe mhan fẹ ghe si mhan sẹyẹ ribhi oga. Be imhan ha rẹ dọnmhegbe mhan fẹ ghe yẹ? Nọọn egbe ẹ ene inọnta nan: ‘Mhẹn bhọ genẹ rẹọbhọ ghe agbotu nin Jehova rẹ lu iho nọnsọle bhi ọne otọ nan mhẹn gene ye? Mhẹn bhọ gene lu eka nin mhẹn ha sabọ lu rebhe, nin mhẹn rẹ deba lu ọne iwẹnna itẹmhọn Osẹnobulua nan? Uwedẹ iẹnlẹn nọnsẹmhẹn be rẹman ghe mhẹn rẹọbhọ ghe, ẹghe ọkike ọsi ọne agbọn nan mhan ki ye, ghe a dẹ kẹ fuẹn ọne agbọn ọsi Ojuu nan an? Urẹọbhọ nin mhẹn mhọn da iJehova bi Jesu be sẹyẹ deziẹn beji ọ ha ye ẹghe nin mhẹn rẹ la gbegberuẹ bhi amẹn?’ (Matt. 24:14; 2 Tim. 3:1; Heb. 3:14) Mhan a ha ria eria nyan ene inọnta nan, ọnan ki rẹkpa mhan rẹ ha lẹn ọria nin mhan gene khin.

6. (a) Be imhan ha rẹ sabọ miẹn iẹnlẹn ọsi ighegheghe yẹ? (b) Be ọbhio mhan ọkpa nọn yi ọkpa bhi ene ewanlẹn rẹ muegbe khẹ ọne Ayẹre nan yẹ? Be imhan ha rẹ sabọ regbe khọkhọ ọle yẹ?

⁶ Ha tie ebe nesẹmhan ne tẹmhọn Ayere ọsi uyumhin nọnsi Jesu, uwẹ a yẹ ha ria eria nyan emhin nin uwẹ tiele. (Tie John 3:16; 17:3.) Mhan ha lẹn Jehova nọnsẹn, yẹ ha re urẹọbhọ nin mhan mhọn da iJesu man, ọle ọkpa mhan ha da sabọ miẹn iẹnlẹn ọsi ghegheghe. Nin uwẹ rẹ muegbe khẹ ọne iluemhin nan, mhanmhan uhọnmhọn-ọta eso bhi otọ, nin uwẹ ha rẹ luẹ emhin nọn ha manman rẹkpa uwẹ rẹ sikẹ iJehova bi Jesu. Bhi ikpe ne bunbun nian, obhio mhan nọn yi ọkpa bhi ene ewanlẹn da wo ha koko uhọnmhọn-ọta kẹkẹ kugbe, ne tẹmhọn ọne Ayere, bi oyẹẹ nin Jehova bi Jesu mhọn da mhan. Iluemhin ọsi ọne Ayere a ki ha sire, ọle ki denegbe ha tie ene uhọnmhọn-ọta nan, yẹ ria eria nyan ebezẹle ọne iluemhin nan da yi emhin kpataki. Ẹghe rẹsi ẹghe, ọle ki ha koko ba ene uhọnmhọn-ọta nan. Ọne obhio mhan nan da dọ kere ghe, ranmhude ọle kikie tie ene uhọnmhọn-ọta nan bi eji a taman mhan nin mhan tie bhi Baibo rẹ muegbe khẹ Iluemhin ọsi ọne Ayere, ọ da re ọle ha luẹ emhin ọgbọn ukpukpe. Ọle da yẹ dọ kere ghe ikolu nin ọle bi Jehova ko mhọnlẹn wo deziẹn bhọ ukpukpe. Iluẹmhin nọn dia inian dẹ sabọ rẹkpa uwẹ rẹ mun oyẹẹ bi ekhuẹnmhẹn nin uwẹ mhọn da iJehova bi Jesu ziẹn, bhiriọ,  asabọ rẹmiẹn ọ dẹ yẹ rẹkpa uwẹ rẹ manman miẹn elele bhi ọne iluemhin ọsi Ayere ọsi Uyumhin Nọnsi Jesu.

7. (a)  Be bhọ Jesu bhii Aba ọle bhi erọnmhọn ọne ọsasọn nin ọle mun ọne Ayere nan gbọ? (b) Be bhọ rẹman ghe Jehova wanniẹn erọnmhọn nọnsi Jesu?

⁷ Ọne ọsasọn nin Jesu mun ọne Ayere nan gbọ, ọle da nan erọnmhọn rẹ bhii Aba ọle ghe, nin etuegbe nesọle ha mhọn okugbe, nin ele kugbe beji ọle bi Aba ọle rẹ ko kugbe. (Tie John 17:20, 21.) Jehova wo gene wanniẹn ọne erọnmhọn ọsi ọmọn nọnsọle. Ranmhude, ẹlẹnan nian, ẹbho ne bunbun ki dọ rẹọbhọ ghe Jehova gene je ọmọn nọnsọle re bhi ọne otọ nan. Ọne Ayere nan, ikolo kpataki nọn, ọ re okugbe ọsi Esali Jehova man. Ẹbho ne nanbhi agbaẹbho bi urolo kẹkẹ vae, ele koko kugbe bhi ije kẹkẹ bhi ọne otọ agbọn nan rebhe, beji ele ha da kugbe ga. Bhi agbaẹbho eso, ẹbho ne nanbhi ije kẹkẹ vae, ele isabọ diriọ koko kugbe bhi oga. Bhiriọ, emhin nọn ti Jehova bi Jesu bhọ nọn, nin mhan rẹ ha mhọn okugbe bhi ẹwẹ mhan.

8. Uhọnmhunje nela iJehova je Ezekiel nọn taman ibhokhan Izrẹl rẹji okugbe?

⁸ Okugbe nin ene ga iJehova mhọn bha han mhan ilo, Jehova ka tale bhi otọ ghe iriọ ọ da dia. Bha ji mhan luẹ ẹmhọn uhọnmhunje nin ọle re nin Ezekiel rẹji ukpokpo eva nan gba kugbe. Ukpokpo “ọsi Judah” bi ukpokpo “ọsi Joseph.” (Tie Ezekiel 37:15-17.) “Inọnta Nin Ẹria Ne Tie Ebe Nesẹmhan Nọọn” nọn ribhi Ọne Ọkhẹughe ọsi July 2016 da yọle: “Jehova da re uhọnmhunje ọsi ikhuaẹloghe nin Ezekiel, ghe agbaẹbho ọsi Izrẹ dẹ ha mhọn okugbe ẹghe nin ele ha rẹ fikie vae bhi otọ nanrẹ vive nin ele. Ọne uhọnmhunje yẹ mundia nin okugbe nin ene ga iJehova da ha mhọnlẹn bhi ẹghe ọkike.”

9. Be bhọ ọta akhasẹ ọsi Ezekiel rẹ munsẹ yẹ ukpukpe sade a lu Ayere ọsi uyumhin nọnsi Jesu?

⁹ Rẹ nanbhi 1919 ha vade, Jehova da wo fẹkẹ ha dia enanzẹle, sẹyẹ ha si ele koko. Enanzẹle, ele ukpokpo “ọsi Judah” mundia nan. Ene da nyẹnlẹn bhi ọne otọ nan, ele ukpokpo “ọsi Joseph” mundia nan. Beji enanzẹle bi ene da nyẹnlẹn bhi ọne otọ nan rẹ dọ ha ga kugbe, ele da dọ kiẹn usun ihuan ọkpa. (John 10:16; Zech. 8:23) Jehova da vive ghe ọle dẹ ku ene ukpokpo veva nan kugbe rẹ kiẹn ọkpa bhi obọ nọnsọle. (Ezek. 37:19) Ẹlẹnan nian, ene usun nan veva koko ga kugbe bhi odotọ ugbẹloghe ọsi Jesu kristi. Jesu Kristi, ọle akhasẹ tiọle David nin ọguọmhandia ọsi Osẹnobulua. (Ezek. 37:24, 25) Ọne okugbe nan nin Ezekiel tẹmhọnlẹn, a wo daghe ọle ukpukpe, beji enanzẹle bi usun “ihuan nekẹle” rẹ koko kugbe lu Ayere ọsi uyumhin nọnsi Jesu! Be bhọ ọdeọde bhi ẹwẹ mhan ha sabọ lu nin mhan rẹ tuẹn okugbe nọnsẹmhan okhun?

10. Be imhan ha rẹ sabọ ha tuẹn okugbe nọn ribhi ẹwẹ mhan okhun yẹ?

¹⁰ Uwedẹ ọkpa nin mhan ha rẹ sabọ tuẹn okugbe nọnsẹmhan okhun, ọle hi sade mhan mhọn idegbere. Ẹghe nin Jesu rẹ ribhi ọne otọ nan, ọle da taman etuegbe nesọle ghe, nin ọdeọde bhi ẹwẹ ele ha mhọn idegbere. (Matt. 23:12) Mhan ha degbere, mhan ida ha mhọn okpẹhio beji ọ ye bhi ọne agbọn nan ẹlẹnan. Idegbere dẹ yẹ rẹkpa mhan rẹ sabọ deuhọnmhọnre nin ene ewanlẹn ne ribhi ẹkẹ agbotu. Mhan ha diriọ de uhọnmhọnre nin ele, yẹ ha họn ẹmhọn nin ele, ọnan ki re okugbe nọn ribhi ẹkẹ agbotu ha tuẹn okhun. Idegbere manman yẹẹ Osẹnobulua. Ọle he ẹbho ne mhọn okpẹhio, ọkpakinọn, ọle mhọn ifuẹkẹ da ene degbere.—1 Pet. 5:5.

11. Mhan da ha zilo nyan ebi ọne eka bi ọne anyọn mundia nan, be ọnan ha rẹ sabọ tuẹn okugbe nọnsẹmhan okhun yẹ?

¹¹ Uwedẹ ọzeva nin mhan ha rẹ sabọ tuẹn okugbe nọnsẹmhan okhun hi, sade mhan ria eria nyan ebi ọne eka bi anyọn nan noo bhi ọne Ayere mundia nan. Ọkuẹsẹ ẹdẹnin, bi bhi ọne  ukpasọn nin, manman ria eria nyan ebi ọne eka nan bha re emhin gua, bi ọne anyọn nọn gian mundia nan. (1 Cor. 11:23-25) Ọne eka mundia nin egbe nin olukhọ soso iye nin Jesu rẹ zọese nin mhan. Ọne anyọn mundia nin aranlẹn nin Jesu gbe kua nin mhan. Ghe mhan gheghe lẹn ọnan bha wo sẹ. Yere ghe, izọese nọnsi Jesu, ọle a sẹ rẹ re oyẹẹ man bhi uwedẹ nọn kpọnọ nẹ. Ọhẹnhẹn, oyẹẹ nin Jehova mhọn da mhan, nọn rọle ji ọmọn nọnsọle re, nọn dọ yu nin mhan. Ọzeva, oyẹẹ nin Jesu mhọn da mhan, nọn rọle zegbere dọ yu nin mhan. Mhan da ha ria ẹmhọn oyẹẹ nin ele mhọn da mhan, ọnan ki rẹkpa mhan rẹ hoẹmhọn ele. Oyẹẹ nin mhan bi ene imhan ko ga mhọn da iJehova, inian ọ diabe ukpiri nọn diẹn mhan rebhe kugbe, nọn tuẹn okugbe nọnsẹmhan okhun.

12. Be iJesu rẹ rẹman yẹ bhi ijẹmhin nọn ribhi Matthew 18:23-34 ghe, Jehova guanọ nin mhan ha rẹhunmhan?

¹² Uwedẹ ọzea nin mhan ha rẹ sabọ tuẹn okugbe nọnsẹmhan okhun, ọle hi sade mhan rẹhunmhan ẹbho ne lu mhan emhin ebe. Mhan da ha rẹhunmhan ẹbho ne rahiẹ mhan, mhan ki ha rẹman ghe uyumhin nọnsi Jesu wo tii mhan bhọ. Ranmhude ọne uyumhin zẹle Osẹnobulua da rẹhunmhan mhan ẹlẹnan. Fẹ ijẹmhin ọkpa ghe nin Jesu tẹmhọnlẹn bhi Matthew 18:23-34. Nọọn egbe ẹ: Mhẹn be re obọ rẹkhan emhin nin Jesu man mhan le? Mhẹn be re iziẹngbe rẹ nin ibhio mhan lu emhin? Mhẹn be dọnmhegbe nin mhẹn rẹ lẹn otọ ebezẹle nin ele da lu emhin nin ele lu? Mhẹn be muegbe nin mhẹn rẹ rẹhunmhan ẹbho ne rahiẹ mhẹn? Bhi ọsi ẹmhọanta, olukhọ eso wo gene khọ gbera enekẹle. Sẹyẹ, eso ribhọ nọn manman nọghọ imhan rẹ rẹhunmhan. Ọrẹyiriọ, ijẹmhin nin Jesu tẹmhọnlẹn rẹman mhan ebi Osẹnobulua guanọ nin mhan lu. (Tie Matthew 18:35.) Jesu wo re otọle man mhan ghe, mhan bha da rẹhunmhan ibhio mhan, ahamiẹn ghe, ọ ribhi ahu nọnsẹmhan nin mhan rẹ rẹhunmhan ele, Aba mhan nọn ribhi okhun ida yẹ rẹhunmhan mhan. Ọnan sẹ emhin nin mhan ha ria eria nyan. Mhan dẹ sabọ gbega okugbe nọnsẹmhan yẹ tuẹn ọlẹn okhun, sade mhan rẹhunmhan ẹbho beji Jesu man mhan le.

13. Mhan ha khu ọbhi ọfure, be ọ ha rẹ sabọ tuẹn okugbe nọnsẹmhan okhun yẹ?

¹³ Mhan da ha rẹhunmhan ẹbho, mhan ki rẹman ghe mhan khu bhi ọfure. Ye adia nọnsi  Paul nin odibo re, ghe, nin mhan ha khu ọbhọ nin mhan rẹ ha mhọn okugbe bi ọfure bhi ẹkẹ agbotu. (Eph. 4:3) Beji ọne ẹghe nan ha rẹ lu ọne Ayere rẹ ha sire, bi bhi ọne ukpẹdẹ ọsi ọne Ayere tee, manman ha ria eria nyan uwedẹ nin uwẹ rẹ nin ẹbho lu emhin. Nọọn egbe ẹ: ‘Mhẹn be rẹman ghe ọria nọn igbanọ ẹmhọn bhi ẹkẹ mhẹn khin? A ha rẹmiẹn ọria lu mhẹn emhin ebe, mhẹn be dọnmhegbe nin mhẹn rẹ khu bhi ọfure?’ Inọnta kpataki nọn khẹke nin mhan ria eria nyan bhi ọne ẹghe nan khenan.

14. Be imhan ha rẹ rẹman yẹ ghe, mhan ranmhude oyẹẹ mhọn iziẹngbe sade ibhio mhan dobọ bhi egbe mhan?

¹⁴ Uwedẹ ọzenẹn nin mhan ha rẹ sabọ tuẹn okugbe nọnsẹmhan okhun, ọle hi sade mhan re egbe khọkhọ iJehova nin Osẹnobulua ọsi ahoẹmhọn-egbe. (1 John 4:8) Ọiyi emhin nọn diale nin mhan rẹ ha yọle, “Sokpan mhẹn hoẹmhọn ene imhan ko ga, ọiyi oko ghe emhin nin ele lu dẹ ha tii mhẹn bhọ. A ha yọle nan sikoko, a bha yọle nan simanman”! Mhan a ha mhọn emhin nọn dia iriọ bhi ọkhọle, mhan bha yẹ re obọ rẹkhan adia nọnsi Paul, ẹghe nin ọle rẹ yọle ghe, nin mhan ranmhude oyẹẹ ha mhọn iziẹngbe sade ibhio mhan dobọ bhi egbe mhan (Eph. 4:2) Yaman bhọ ghe ọle bha wo yọle nin mhan ha ziẹngbe idobọ ọsi ibhio mhan. Sokpan, ọ yọle nin mhan ha lu iriọ ranmhude oyẹẹ. Kẹkẹ wo ribhọ ene emhin eva nan. Bhi agbotu nesẹmhan kẹkẹ, eria kẹkẹ nin Jehova tatie ne dọ ga ọle, ele ribhọ. (John 6:44) Ranmhude Jehova hoẹmhọn ele, ọle zẹle nin ọle da si ele kẹ egbe. Bhiriọ, imhan ha ki be yọle mhan bha sabọ hoẹmhọn ele? Bha ji mhan ha re oyẹẹ man beji Jehova taman mhan!—1 John 4:20, 21.

15. Be imhan rẹ lẹn yẹ ghe a dẹ miẹn Ayere nọn kike?

¹⁵ Ẹghe vade nin mhan ha rẹ lu Ayere nọn kike. Be imhan rẹ lẹn yẹ? Bhi ebe nin ọhẹnhẹn nin Paul gbẹn ji ibhokhan Corinthians, Paul da talọ rẹji enanzẹle, ghe, beji ele a rẹ ha lu Ayere ọsi Uyumhin Nọnsi Jesu ukpukpe, iriọ ele a rẹ ha “wewe uyumhin nọnsi Ebeanlẹn mhan, ọkuẹsẹ ọle vae.” (1 Cor. 11:26) Ọne uvade ọsi Jesu nin Paul tẹmhọnlẹn nan, da dọ diẹn mun ọne Jesu tobọle tẹmhọnlẹn bhi akhasẹ ọsi ọkpẹnlẹn ọsi ọne agbọn nan. Rẹji ekpokpo nọn khua nọn vade Jesu da tale: “Iyaman ọsi Ọmọn nọnsi okpea dẹ zegbere bhi okhun, agbaẹbho rebhe ne ribhi ọne otọ nan ki ha kiẹ egbe bhi ọbalọ nọnsele, ele ki daghe Ọmọn nọnsi okpea vade bhi adudu amẹn, bhi ẹkẹ ahu bi ọghọ. Ọle [Jesu] ki re akala nọn manman ro khue rẹ je ẹhi nesọle dagbare, ele ki dọ si enanzẹle nesọle koko sibhi obọ ene ahoho enẹn re, rẹ nanbhi obọ nin oẹnlẹn da hẹn re rẹ dọ sẹbhi eji ọ da defia.” (Matt. 24:29-31) Ẹghe nin enanzẹle ne kẹre bhi ọne otọ nan ha rẹ kpanọ ha khian okhun fo, ọle ọne usikoko ọsi enanzẹle nan da rẹ sunu. Ekpokpo nọn khua ha ki munhẹn fo, ọkuẹsẹ a khọn okhọn ọsi Armageddon, ọle ọnan da rẹ sunu. Bhiriọ, ene itue uli bhi ijian enẹn nyan egbọ ihinlọn (144,000) rebhe ki deba Jesu khọn ene ijie rebhe ọsi ọne agbọn nan miotọ. (Rev. 17:12-14) Ayere nin mhan ha lu kike ọkuẹsẹ enanzẹle ne kẹre kuẹ kpanọ ha khian okhun, ọle da ha yi Ayere nọn kike, ranmhude, Jesu ki ‘vae’ fo.

16. Bezẹle nọn da khẹke nin mhan dọnmhengbe nin mhan rẹ vae bhi Ayere ọsi Uyumhin Nọnsi Jesu nan ha lu bhi ọne ukpe nan?

¹⁶ Bha ji mhan dọnmhegbe nin mhan rẹ vae bhi Ayere nan ha lu bhi ikpẹdẹ ọkpa nyan ọgban bhi uki ọsi March, bhi ukpe 2018 (March 31, 2018), ranmhude mhan dẹ miẹn elele bhọ. Bha ji mhan yẹ ha bhii Jehova nọn rẹkpa mhan rẹ sabọ ha tuẹn okugbe nọnsi ẹbho nesọle okhun! (Tie Psalm 133:1.) Bha hẹi yelea ghe, ẹghe vade nin mhan ha rẹ lu Ayere ọkike. Ọne ẹghe nin kuẹ sẹ, bha ji mhan dọnmhegbe rẹ ha ribhi enin sade a lu ọne Ayere ọsi Uyumhin Nọnsi Jesu, bha yẹ ji mhan ha mhọn ọtibhọ dai okugbe nin mhan miẹn bhọ.