1. Be ẹmhọn iJehova dia iDavid yẹ bhi egbe? Be ọnan re ọle ha mhọn ọhubhudu rẹ lu?

DAVID nin Ojie da gbẹn yọle: “Jehova kpọnọ gbe. Ọle ogẹn khẹke nẹ.” (Ps. 145:3) Ọle hoẹmhọn iJehova. Ọne oyẹẹ nan da re ọle ha mhọn ọhubhudu rẹ gẹn Osẹnobulua bhi ẹkẹ agbotu. (Ps. 22:22; 40:5) Edandan iribhọ ghe, uwẹ sẹyẹ wo hoẹmhọn iJehova. Uwẹ yẹ re obọ bhi ebi David tale yọle: “Ogẹn hi ọsi uwẹ rẹ ha khian ighegheghe, Eo Jehova nin Osẹnobulua ọsi Izrẹl nan aba mhan.”—1 Chron. 29:10-13.

2. (a) Be imhan rẹ gẹn iJehova yẹ? (b) Ọnọghọ nela ibhio mhan eso kuẹlo da? Be imhan ha ka luẹ?

² Uwedẹ ọkpa nin mhan rẹ gẹn iJehova ẹlẹnan hi, sade mhan re ewanniẹn ọbhi inọnta bhi ikolo oga nesẹmhan. Ọkpakinọn, ọnan bha lẹkhẹ nin eso bhi ẹwẹ ibhio mhan nin ikpea bi ikhuo. Ele rẹ ha guanọ nin ele re ewanniẹn ọbhi inọnta bhi ikolo oga, ọkpakinọn, ofẹn ki ha mun ele. Be ele ha rẹ sabọ khọn ọne ọnọghọ nan yẹ? Be hi emhin eso nin mhan rebhe ha lu nọn ha sabọ rẹkpa mhan rẹ ha re ewanniẹn ọbhi inọnta nọnsẹn? Ọkuẹsẹ mhan re ewanniẹn ọbhi ene inọnta nin, bha ji mhan sẹ ka tẹmhọn emhin enẹn nọn zẹle nin mhan da re ewanniẹn ọbhi inọnta bhi ikolo oga.

3-5. (a) Beji mhan kere bhi Hebrews 13:15, bezẹle nin mhan da re ewanniẹn ọbhi inọnta bhi ikolo oga? (b) Oko be nọn ghe ewanniẹn nọnsẹmhan rebhe dẹ diabe abọkpa? Re otọle man.

³ Udede ekpẹn iJehova mun nin mhan rebhe rẹ ha gẹn ọlẹn. (Ps. 119:108) Ewanniẹn nin mhan re ọbhi inọnta bhi ikolo oga deba bhi ogẹn nin mhan re zọese ji Jehova. Ọria soso ida ne mhan zẹ ọne izọese nan. (Tie Hebrews 13:15.) Jehova be guanọ nan miẹn ghe izọese, la ewanniẹn ọsi ọdeọde bhi ẹwẹ mhan ha yi abọkpa? Eye!

⁴ Jehova lẹn ghe, ikpẹn-obọ rebhe iyi abọkpa. Bhiriọ, emhin nin mhan sabọ rẹ zọese ji ọle manman ti ọle bhọ. Ria ẹmhọn izọese kẹkẹ nin ọle ka miẹn bhi obọ ibhokhan Izrẹl. Ibhokhan Izrẹl eso ribhọ ne sabọ re ẹbhe la oghogho rẹ zọese. Ọkpakinọn, obhioguele  sabọ re afianmhẹn zọese, ọ sabọ rẹ ha yi idulu eva, la enekhukhu eva. Ahamiẹn ghe, ibhokhan Izrẹl yẹ ribhọ ne bha miẹn igho rẹ dẹ afianmhẹn, Jehova dẹ yẹ miẹn ele obọ ọkpa ọsi ephah oṣi ọka la izẹ la emhin ne dia iriọ. Ọkpakinọn ọ ki ha yi ọnan nọ sun, ranmhude ọnin hi ọnọn mhẹn nẹ nọn ribhọ. (Lev. 5:7, 11) Ọka nan nọ ighan, ọrẹyiriọ, ọne izọese nan sẹyẹ ti Jehova bhọ, sokpan a nọ ọle sun.

⁵ Osẹnobulua nọnsẹmhan bha sẹ fidenọ. Osẹ ọsi ifuẹkẹ ọle sẹyẹ khin. Ahamiẹn mhan re ewanniẹn ọbhi inọnta, Jehova bha yọle ghe, ahamiẹn uwedẹ nin mhan rẹ talọ bha mhẹn bhi ehọ bọsi Apollos, la, ọ bha sẹbhi ọkhọle ọsi eria bọsi Paul, uhọnmhọn ribhi otọ. (Acts 18:24; 26:28) Ebi Jehova guanọ hi, nin mhan re ewanniẹn nọn mhẹn nẹ nin mhan mhọnlẹn ọbhi inọnta—beji ahu mhan sẹle. Uwẹ be yẹ ye ọne okhuo nọn iyẹ mhọn ọdọ re, nọn ne ikpigho eva rẹ zọese ji Jehova? Jehova manman hoẹmhọn ọlẹn, ranmhude, ahu nọnsọle rebhe ọ rẹ re emhin re.—Luke 21:1-4.

6. (a) Beji mhan kere bhi Hebrews 10:24, 25, be ewanniẹn ọsi ẹbho ha rẹ sabọ re obọ so uwẹ yẹ? (b) Be uwẹ ha rẹ rẹman yẹ ghe, ewanniẹn nin eria re ọbhi inọnta bhi ikolo oga gene ti uwẹ bhọ?

⁶ Mhan re ewanniẹn nin mhan re ọbhi inọnta rẹ re izebhudu nin egbe. (Tie Hebrews 10:24, 25.) Ọ wo ti mhan rebhe bhọ rẹ ha họn ewanniẹn kẹkẹ bhi ikolo oga. Ewanniẹn nọn lẹkhẹ nin obhokhan ta dagbare bhi ẹkẹ ọkhọ gene sẹ mhan ọnyẹnmhen. Ọ manman ti mhan bhọ rẹ daghe eghọnghọn nin ọria mhọnlẹn sade ọle ta emhin ọgbọn nin ọle wo la luẹ. Ewanniẹn ọsi eso wo sẹ mhan ọnyẹnmhẹn, ranmhude izebhudu nin ele rẹ re ewanniẹn ọbhi inọnta, arẹmiẹn ẹkhọ lu ele, la ọ bha sẹ bue nin ele munhẹn ha luẹ urolo nọnsẹmhan. (1 Thess. 2:2; ftn.) Be imhan ha rẹ rẹman yẹ ghe, ebi ele lu ti mhan bhọ? A ha do ikolo fo, mhan sabọ rẹ tuẹ ele obulu bhi ewanniẹn nọnsele. Uwedẹ ọbhebhe nin mhan ha yẹ rẹ rẹman ghe, ebi ele lu ti mhan bhọ hi, sade imhan bhọ yẹ re ewanniẹn ọbhi inọnta. Bhiriọ, mhan ki yẹ sabọ ha re izebhudu nin ẹbho bhi ikolo oga, beji ele yẹ rẹ re izebhudu nin mhan.—Rom. 1:11, 12.

7. Elele nela mhan miẹn bhọ sade mhan re ewanniẹn ọbhi inọnta?

⁷ Ọmhẹn nọnsẹmhan nọn sade mhan re ewanniẹn ọbhi inọnta. (Isa. 48:17) Be ọ rẹ yi iriọ yẹ? Ọhẹnhẹn, ahamiẹn mhan mhọn bhi ọkhọle ghe, mhan dẹ re ewanniẹn ọbhi inọnta, ọ ki manman re imhan ha mhọn ọhubhudu rẹ muegbe ikolo oga nọnsẹn. Ahamiẹn mhan muegbe nọnsẹn, ọnan ki manman re imhan lẹn  otọ iBaibo dinmhin. Beji mhan ha rẹ ha lẹn otọ iBaibo dinmhin, iriọ mhan ha rẹ manman sabọ ha noo ebi mhan luẹ bhi iẹnlẹn nọnsẹmhan. Ọzeva, mhan ki sabọ manman sọnyẹnmhẹn bhi ọne ikolo, ranmhude mhan deba bhi ọne izilo. Ọzea, ranmhude ghe mhan manman wẹnna ọbhọ mhan kuẹ re ewanniẹn ọbhi inọnta, mhan ki ha ye ebi mhan tale re.

8-9. (a) Beji a rẹman bhi Malachi 3:16, be uwẹ riale ewanniẹn nin mhan re ọbhi inọnta dia iJehova yẹ bhi egbe? (b) Ọnọghọ nela eso ha sabọ yẹ ha mhọnlẹn?

⁸ Mhan re udu nọnsi Jehova ghọnghọn sade mhan tẹmhọn urẹọbhọ nọnsẹmhan. Mhan lẹn ghe Jehova ka mhan ehọ, ghe ọ manman ti ọle bhọ sade mhan dọnmhegbe nin mhan rẹ re ewanniẹn ọbhi inọnta bhi ikolo oga. (Tie Malachi 3:16.) Mhan ha dọnmhegbe kaka nin mhan rẹ re ọle ha ghọnghọn, ọle ki nan erọnmhọn nin mhan. Ọnin rẹman ghe, ebi mhan lu ti ọle bhọ.—Mal. 3:10.

⁹ Mhan ki kere ghe, emhin ne mhẹn ne bunbun ribhọ nọn zẹle nin mhan ha da ha re ewanniẹn ọbhi inọnta bhi ikolo oga. Ọrẹyiriọ, ofẹn sabọ ha mun ẹbho eso rẹ niẹn obọ okhun. Ahamiẹn iriọ nọn rẹji uwẹ, hẹi ji egbe lọ uwẹ. Ji mhan fẹ adia eso bi ijiẹmhin eso ghe bhi Baibo, deba emhin eso nin mhan ha sabọ lu, nọn ha rẹkpa mhan rebhe rẹ ha dọnmhegbe nin mhan rẹ wanniẹn ọta bhi ikolo oga.

10. (a) Ọnọghọ nela ene bunbun bhi ẹwẹ mhan mhọnlẹn? (b) Ahamiẹn ofẹn mun uwẹ rẹ re ewanniẹn ọbhi inọnta, ikpẹ nela ọnan ha sabọ rẹman ghe uwẹ mhọnlẹn?

¹⁰ Ukpudu be hian uwẹ sade uwẹ ho nin uwẹ niẹn obọ okhun wanniẹn ọta bhi ikolo oga? Ọ ha yi iriọ, ọ iyi uwẹ ọkpa ọ sẹ sunu je. Emhin nin uwẹ ha lu nin uwẹ ha rẹ khọn ọne ọnọghọ nan hi, lẹn ebezẹle nin ofẹn da mun uwẹ. Uwẹ be riale ghe, uwẹ dẹ yelea ebi uwẹ ho nin uwẹ ta, la uwẹ dẹ ta ọnọn iyi ọle? Uwẹ be kpokpo egbe ghe, ewanniẹn nin uwẹ ha re ọbhi ọta ida mhẹn sẹ bọsi enekẹle. Bhi ọsi ẹmhọanta, ọ ha yi ene emhin nan re ofẹn mun uwẹ, ọ rẹman ghe, ọria nọn mhọn idegbere uwẹ khin, ọria nọn rẹọbhọ ghe, eria nekẹle mhẹn gbera ọle. Jehova hoẹmhọn eria ne mhọn ene ikpẹ nan. (Ps. 138:6; Phil. 2:3) Ọkpakinọn, Jehova sẹyẹ guanọ nin uwẹ ha gẹn ọlẹn yẹ  re izebhudu nin ibhio mhan nin ikpea bi ikhuo bhi ikolo oga. (1 Thess. 5:11) Ọle hoẹmhọn uwẹ. Ọ dẹ re izebhudu nin uwẹ guanọ nin uwẹ.

11. Emhin eso nela mhan miẹn bhi Baibo ne ha sabọ rẹkpa mhan?

¹¹ Bha ji mhan fẹ adia eso ghe bhi Baibo. Baibo yọle ghe, imhan rebhe dunun bhi ọta ẹghe-ẹghe. (Jas. 3:2) Jehova lẹnmhin ghe, ọ bha gba nin mhan soso, iriọ yẹ hi ibhio mhan nin ikpea bi ikhuo. (Ps. 103:12-14) Azagba-uwa ọkpa mhan rebhe khin bhi ẹkẹ agbotu. Ele gene hoẹmhọn mhan. (Mark 10:29, 30; John 13:35) Ele lẹnmhin ghe, ẹgheso, ewanniẹn nin mhan re ọbhi inọnta iwo debhọ nọnsẹn beji ọ rẹ yẹẹ mhan.

12-13. Be imhan miẹn luẹ bhi ijiẹmhin ọsi Nehemiah bi Jonah?

¹² Zilo nyan ijiẹmhin eso bhi Baibo ne ha sabọ rẹkpa uwẹ rẹ khọn ofẹn nin uwẹ mhọnlẹn. Ọkpa bhọ hi Nehemiah. Ẹgua ọsi ojie nọn manman mhọn ahu ọle da ha wẹnna. Ẹghe nin Nehemiah rẹ họn ghe, a dunmhun igeti bi ogba nọn nega iJerusalem sotọ, ọle bha ghọnghọn. (Neh. 1:1-4) Riale ebi udu nọnsọle rẹ tin fia yẹ, ẹghe nin one ojie rẹ nọọn ọlẹn ebezẹle nin ọle ida ghọnghọn. Nehemiah da jẹje bhii ji Jehova ọle kuẹ wanniẹn ọne ojie. Ewanniẹn nin ọne ojie re nin Nehemiah da manman ha yi urẹkpa rẹji ẹbho nesi Jehova. (Neh. 2:1-8) Ọria ọbhebhe hi Jonah. Ẹghe nin Jehova rẹ je ọle nin ọle dọ wewe uhọnmhunje nọnsi Jehova man ibhokhan iNineveh, ọ da ranmhude ofẹn nẹgbe ha khian ije ọbhebhe. (Jonah 1:1-3) Ọkpakinọn, Jehova da rẹkpa iJonah rẹ ha khian iNineveh dọ wewe uhọnmhunje nọnsọle. Ọta nin ọle taman ibhokhan iNineveh da gene wo rẹkpa ele. (Jonah 3:5-10) Ebi mhan luẹ bhi ijiẹmhin ọsi Nehemiah hi, ọkhẹke nin mhan ha bhii fo mhan kuẹ wanniẹn ọta. Ebi mhan luẹ bhi ijiẹmhin ọsi Jonah hi, Jehova dẹ sabọ rẹkpa mhan rẹ ga ọle, aharẹmiẹn emhin ribhọ nọn manman re ofẹn mun mhan. Riale, agbotu soso be ribhọ nọn ha re ofẹn mun ọria sẹ bọsi agbaẹbho ọsi Nineveh?

¹³ Emhin eso nela uwẹ ha lu ne ha sabọ rẹkpa uwẹ rẹ ha re ewanniẹn ọbhi inọnta nọnsẹn bhi ikolo oga? Ji mhan zilo nyan eso.

14. Bezẹle nin mhan ha da muegbe ikolo oga nọnsẹn? Ẹghela mhan ha sabọ rẹ muegbe ikolo oga?

¹⁴ Muegbe ikolo oga rebhe ọbhi otọ. Uwẹ ha mhanmhan ebi uwẹ ha ta, yẹ muegbe ọle nọnsẹn, uwẹ ki ha mhọn ọne izebhudu rẹ re ewanniẹn ọbhi inọnta. (Prov. 21:5) Ẹmhọanta nọn ghe, emhanmhan kẹkẹ imhan rebhe mhọnlẹn nin mhan rẹ muegbe ikolo oga. Okhuo ọkpa natiọle Eloise, nọn iyẹ mhọn ọdọ, nọn ki wanre gbera ikpe 80 wo kẹ munhẹn bhi ẹkẹ uzana ha muegbe ikolo ọsi iluẹmhin ọsi Ọne Ọkhẹughe. Ọ yọle: “Ikolo manman sẹ mẹn ọnyẹmhẹn sade imẹn ka muegbe ọle ọbhi otọ.” Okhuo ọbhebhe natiọle Joy, nọn mhọn iwẹnna nin ọle lu ẹghe rebhe mhọn ẹghe nin ọle rẹ muegbe ikolo ọsi iluẹmhin ọsi Ọne Ọkhẹughe bhi ẹdẹ iSaturday. Ọ yọle: “Ọ wo lẹkhẹ nin mẹn rẹ yere ebi mẹn luẹle sade ọ bha sẹ bue nin mẹn luẹ ọle.” Ọwanlẹn ọkpa natiọle Ike, nọn manman mhọn iwẹnna ne bunbun bhi obọ, nọn yẹ lu iwẹnna ọkanẹfan yọle: “Imẹn kere ghe, mẹn ha fẹkẹ noo obhi ẹghe khere rẹ luẹ emhin eka igba ne bunbun bhi ẹkẹ uzana,  ọle mhẹn mẹn bhi egbe nẹ ghe, mẹn noo ẹghe nọn bunbun isukpa rẹ luẹ emhin ne bunbun.”

15. Be uwẹ ha rẹ muegbe ikolo oga ọbhi otọ yẹ nọnsẹn?

¹⁵ Be a rẹ muegbe ikolo nọnsẹn yẹ? Uwẹ kuẹ munhẹn ha luẹ emhin, ka bhii ji Jehova nin ọle re ẹlinmhin nọn khiale nin uwẹ. (Luke 11:13; 1 John 5:14) Uwẹ ha bhii ji Jehova fo, re obhi ẹghe khere re ghe ebi uwẹ da luẹ rebhe nega. Ria eria nyan ọne uhọnmhọn-ọta nọn mun ebi uwẹ da luẹ mhọnlẹn, bi uhọnmhọn-ọta ne ribhi odotọle. Fẹ ẹkpẹti kẹkẹ bi adudu ne ribhọ ghe nọnsẹn. Uwẹ ha ki ha luẹ uduọle-uduọle vade, dọnmhegbe tie iBaibo ne ribhọ. Ria eria nyan emhin ne ribhi ọne uduọle, manman nọn eji uwẹ ho nin uwẹ nan wanniẹn ọta. Beji uwẹ rẹ muegbe nọnsẹn, iriọ uwẹ ha rẹ manman miẹn elele bhọ, iriọ ọ ha yẹ rẹ lẹkhẹ nin uwẹ rẹ re ewanniẹn ọbhi inọnta.—2 Cor. 9:6.

16. Emhin nela agbotu ne nin mhan rẹ ha luẹ emhin? Be a rẹ noo ele yẹ?

¹⁶ Noo JW Library app, Watchtower Library, Watchtower ONLINE LIBRARY bi emhin ne dia iriọ rẹ luẹ emhin, sade ebe nin uwẹ ha rẹ luẹ emhin ribhi enin bhi urolo nin uwẹ zẹ. Rẹ na bhi obọ agbotu nọnsọle, Jehova ne emhin ne bunbun nin mhan, ne ha sabọ rẹkpa mhan rẹ ha noo ifoni bi tablẹti rẹ muegbe ikolo oga. Bhi JW Library^® app, mhan dẹ sabọ danlodi ebe nin mhan ha rẹ luẹ emhin ọbhi ẹkẹ ifoni la tablẹti nọnsẹmhan. Mhan ki re ọne ebe nọn ribhi ẹkẹ ifoni la tablẹti ha luẹ emhin, la mhan tie ọle, la khue ọ nan khue nọn ribhọ bhi eji ọ hi ki rẹ khin, la bhi ẹghe nọn hi ki rẹ khin. Eso noo JW Library app rẹ luẹ emhin bhi ẹghe nan rẹ koahu a bhi isi iwẹnna, la bhi isiku, la sade ele khian ije ree. Watchtower Library bi Watchtower ONLINE LIBRARY^™ wo re ọle lẹkhẹ nan rẹ guanọ otọ emhin bhi ẹkẹ uhọnmhọn-ọta nin mhan ho nin mhan lẹn nọnsẹn.

17. (a) Bezẹle nin uwẹ ha da muegbe ewanniẹn ne bunbun ọbhi otọ? (b) Be uwẹ miẹn luẹ bhi ọne ividio natiọle Kiẹn Ọmọẹ iJehova—Muegbe Nuwẹ Rẹ Re Ewanniẹn Ọbhi Inọnta?

¹⁷ Dọnmhegbe muegbe ewanniẹn ọsi inọnta ne bunbun ọbhi otọ. Bezẹle? Ranmhude, asabọmiẹn a ida tie ẹ bhi ẹghe nin uwẹ wo rẹ niẹn obọ okhun rebhe. Eria nekẹle dẹ yẹ niẹn obọ okhun bhi ẹghe nin uwẹ rẹ niẹn obọ okhun. Ọnọn sun ọne ikolo sabọ rẹ tie ọkpa bhi ẹwẹ ele. Ranmhude nan hẹi le ẹghe, asabọmiẹn ọnọn sun ọne ikolo bha re otọ nin ọrebhe rẹ ta emhin nin ele mhọn bhi ọkhọle. Bhiriọ, hẹi ji ẹkẹ khọ ẹ sade ọle bha kẹ tie ẹ. Hẹi ji egbe lọ ẹ sẹyẹ. Ahamiẹn uwẹ muegbe ewanniẹn ne bunbun ọbhi otọ, uwẹ dẹ miẹn isẹhoa ne bunbun rẹ re ewanniẹn ọbhi inọnta. Uwẹ sabọ muegbe ọbhi otọ nin uwẹ re tie iBaibo. Ọkpakinọn, yẹ muegbe nin uwẹ rẹ dọnmhegbe noo ikpọta nesẹ rẹ re ewanniẹn ọbhi inọnta. *

18. Bezẹle nọn bha da khẹke nin uwẹ ji ewanniẹn nọnsẹ taan gbe?

¹⁸ Hẹi ji ewanniẹn nọnsẹ taan gbe. Ewanniẹn nọn bha taan, nọn yẹ lẹkhẹ, ọle re izebhudu nin  ẹbho nẹ. Bhiriọ, hẹi ji ewanniẹn nọnsẹ taan gbe. Ọ sabọ rẹ taan sẹbhi ukhiọnmhẹn ihuẹnlo la ọ gbera khere. (Prov. 10:19; 15:23) Ahamiẹn ọ ki ree ẹ nin uwẹ mọn da re ewanniẹn ọbhi inọnta bhi ikolo, ẹsọn ribhi nin uwẹ ha miẹn—re ijiẹmhin nọn mhẹn ọbhi otọ, hẹi ji ewanniẹn nọnsẹ ha taan gbe. Ahamiẹn uwẹ noo ẹghe nọn taan gbe re ha ta ẹmhin ne bunbun, enekẹle ki ha riale ghe, ele ida sabọ guẹ ebi a rẹ re ewanniẹn ọbhi inọnta beji uwẹ rẹ guẹ. Ewanniẹn nọn bha taan gbe sẹyẹ re otọ nin ẹbho ne bunbun rẹ talọ bhi ikolo. Ahamiẹn uwẹ a ka wo tie, wo re ewanniẹn nọn lẹkhẹ ọbhi ọne inọnta beji ọ wo khin tee. Hẹi wo re usukpa ta emhin rebhe ne ribhi ọne uduọle. Ahamiẹn a zilo nyan emhin kpataki nọn ribhi ọne uduọle fo, uwẹ sabọ rẹ talọ nyan emhin ebhebhe nin uwẹ yẹ daghe bhi ọne uduọle.—Fẹ ọne ẹkpẹti ghe nọn yọle “ Be Imẹn Ha Wanniẹn?”

19. Be ọnọn sun ọne ikolo ha rẹ rẹkpa uwẹ yẹ? Be ọkhẹke nin uwẹ lu?

¹⁹ Ji ọnọn sun ọne ikolo lẹn uduọle nin uwẹ da guanọ nin uwẹ re ewanniẹn ọbhi inọnta tee. Ahamiẹn uwẹ dẹ lu ọnan, ọkhẹke nin uwẹ kẹ taman ọnọn sun ọne ikolo ọkuẹsẹ ikolo munhẹn. Ọne ẹghe ha sẹ, tuabe niẹn obọ okhun nọnsẹn beji ọnọn sun ọne ikolo ha rẹ daghe uwẹ.

20. Be ikolo oga rẹ diabe ebale nin imọẹ kugbe le yẹ?

²⁰ Ha ghe ikolo oga bọsi ebale nin imọẹ ne hoẹmhọn egbe kugbe ha le. Ahamiẹn imọẹ ẹ eso bhi ẹkẹ agbotu tie uwẹ nin uwẹ vae dọ deba ele le ebale, nin ele da yọle ghe, nin uwẹ guanọ obhi ebale khere rere, be uwẹ ha lu yẹ? Uwẹ sabọ rẹ ha kpokpo egbe. Ọkpakinọn, uwẹ dẹ lu eka nin obọ nọnsẹ sẹle, uwẹ dẹ guanọ ebale nin uwẹ lẹn ghe ọ dẹ yẹẹ ọrebhe rẹ le. Jehova nọn tie mhan vae bhi ikolo wo mun ebale ne bunbun ọbhi otọ khẹ mhan. (Ps. 23:5; Matt. 24:45) Ọ gene wo ti ọle bhọ sade mhan re obhi emhin khere mhọn bhi obọ vae, ọne obọ mhan sẹle. Bhiriọ muegbe nọnsẹn, uwẹ ha yẹ dọnmhegbe rẹ re ewanniẹn ọbhi ọta beji uwẹ ha sabọ lu sẹ. Uwẹ ha lu iriọ, uwẹ ki kiẹn ọnọn vare dọ le ebale bhi okhun itebu nọnsi Jehova, nọn sẹyẹ re emhin re nin ọle miẹn gha nin ẹbho bhi ẹkẹ agbotu.