1. Be bhọ ọta ọkpa nan rẹman bhi usikoko nan do bhi 1935 rẹ rẹso elasẹre ọkpa yẹ?

ELASẸRE ọkpa nọn wanre sẹbhi ikpe 18 da mianmẹn bhi ukpe 1926. Bible Student * ene biẹ ọle ha khin. Imọn isẹn ele khin bhi azagba-uwa, imọn ikpea ea bi imọn ikhuo eva. Ene biẹ ele wo bẹẹ ele rebhe wanre nin ele ha ga iJehova yẹ re egbe khọkhọ iJesu. Ukpe-ukpe, ọne elasẹre nan ki deba ha le ekala yẹ da anyọn nan rẹ lu Ayere ọsi Uyumhin Nọnsi Jesu, ranmhude inian ekhẹn Bible Student rebhe ha lu ọle ẹghenin. Ọkpakinọn, ẹghe nin ọle rẹ kaehọ ọta kpataki nin obhio mhan nin J. F. Rutherford rẹman bhi 1935, nọn yọle “Ene Usun Ẹbho Ne Bunbun (The Great Multitude),” ikhuaẹloghe nọnsọle da fidenọ. Usikoko nọn nẹ nan do bhi Washington, D.C., U.S.A, ọle Rutherford da re ọne ọta nan man. Iman-emhin ọsọgbọn nela a zẹ ọle egbe dagbare bhi ọne usikoko nan?

2. Be bhọ obhio mhan nin Rutherford gbotọle fanọn an bhi ọta nin ọle rẹman?

² Bhi ọne ọta, obhio mhan nin Rutherford da tẹmhọn eria nin usun ẹbho nan sounun ọlẹn bhi Revelation 7:9 mundia nan. Ọkuẹsẹ a re ọne ọta nan man, mhan da ka rẹọbhọ ghe, ẹbho nan ha ne ha khian okhun arẹmiẹn urẹọbhọ nọnsele bha manman ziẹn, ele ọne usun ẹbho nan mundia nan. Obhio mhan nin Rutherford da re iBaibo gbotọle fanọn an ghe, ene usun ẹbho nan bha deba ẹbho nan ha zẹ nin ele dọ nyẹnlẹn bhi okhun, ghe ele mundia nin usun ihuan nekẹle * nesi Jesu, ne ha miuhọnmhọn  bhi ekpokpo nọn khua yẹ nyẹnlẹn bhi ọne otọ nan bhi ighegheghe. (Rev. 7:14) Jesu yọle: “Imẹn yẹ mhọn ihuan ebhebhe, ne iribhi ọne usun nan. Mẹn dẹ yẹ ne ele re. Ele dẹ ka mẹn ehọ. Ele rebhe ki dọ kiẹn usun ihuan ọkpa, ọsun-ohuan ọkpa.” (John 10:16) Ẹbho ne mhọn urẹọbhọ nọn ziẹnlẹn ne yẹ ga iJehova nọnsẹn, ọle ene ihuan nekẹle nan mundia nan. Sokpan, ọne otọ nan ele ha da nyẹnlẹn bhi ighegheghe. (Matt. 25:​31-33, 46) Bha ji mhan fẹghe ebi ọne iman-emhin nan rẹ fi iẹnlẹn ọsi ẹbho ne bunbun ne ga iJehova denọ yẹ, rẹ sẹbhi ọne elasẹre nin mhan ka tẹmhọn ọlẹn.​—Ps. 97:11; Prov. 4:18.

3-4. Ẹghe nan rẹ do usikoko nan do bhi ukpe 1935 fo, be bhọ ibhio mhan ne bunbun ki dọ lẹn rẹji ikhuaẹloghe nọnsele?

³ Eghọnghọn nọn khua ene ibhio mhan wo ha ye bhi ọne usikoko ẹghe nin obhio mhan nin Rutherford rẹ taman ele yọle: “Huẹan, ọrebhe ne lẹnmhin ghe ele mhọn ọne ikhuaẹloghe rẹ nyẹnlẹn bhi ọne otọ nan kpanọ mundia.” Obhio mhan ọkpa nọn ha ribhi ọne usikoko da yọle: “A ha wa ẹbho rebhe ne vae bhi ọne usikoko ọbhi ijianlẹn eva, ẹbho ne kpanọ mundia bun gbera obọ ọkpa bhọ.” Ene ẹbho ki kpanọ mundia fo, obhio mhan nin Rutherford da yọle: “Ghọle! Ọne usun ẹbho ne bunbun!” Bhiriọ, ọrebhe da wo manman ha gbabọ. Ene ibhio mhan ne kpanọ mundia da dọ lẹn sẹbhọ ghe, Osẹnobulua bha sẹ re ẹlinmhin nọn khiale rẹ zẹ ele nin ele dọ nyẹnlẹn bhi okhun. Ukpẹdẹ nọn rẹkhan ẹdẹ nin obhio mhan nin Rutherford re ọne ọta man, ibhio mhan ne bun sẹbhi 840, ele mianmẹn. Ene bunbun bhi ẹwẹ ele da ha yi ene mhọn ikhuaẹloghe rẹ nyẹnlẹn bhi ọne otọ nan bhi ighegheghe.

⁴ Obhio mhan nin Rutherford ki re ọne ọta man fo, ọne elasẹre nin mhan ka sounun ọlẹn, bi ibhio mhan ne bunbun ebhebhe, bha yẹ ha deba le ekala yẹ da anyọn nan rẹ lu Ayere ọsi Uyumhin Nọnsi Jesu. Obhio mhan ọkpa da yọle: “Ayere nan do bhi ukpe 1935, ọle mẹn le ekala yẹ da anyọn nan rẹ lu ọle sẹ. Mẹn da dọ lẹn sẹbhọ ghe, Jehova bha sẹ re ẹlinmhin nọn khiale nọnsọle rẹ zẹ mẹn deba ene ha dọ nyẹnlẹn bhi okhun. Sokpan, iruduba nin mẹn mhọnlẹn hi, nin mẹn rẹ nyẹnlẹn bhi ọne otọ nan bhi ighegheghe, yẹ deba re ọle kiẹn otọ ọfubhegbe.” Ọkhọle nọn sẹ inian ibhio mhan ne bunbun yẹ wo ha mhọnlẹn. (Rom. 8:​16, 17; 2 Cor. 1:​21, 22) Rẹ na ẹghenin ha vade, ene mhọn ikhuaẹloghe rẹ nyẹnlẹn bhi ọne otọ nan wo ha bun ọbhọ. Ele sẹyẹ wo rẹkpa enanzẹle ne kẹre bhi ọne otọ nan rẹ miẹnsọn nan mun nin ele.

5. Ẹlo nela Jehova rẹ ghe ẹbho ne zobọ bhọ rẹ ha le ọne ekala, yẹ da bhi ọne anyọn nan rẹ lu Ayere ọsi Uyumhin nọnsi Jesu?

⁵ Ukpe 1935 ki gbera fo, ẹlo nela Jehova ki rẹ ha ghe eria ne zobọ bhọ rẹ ha le ekala yẹ da ọne anyọn bhi Ayere ọsi Uyumhin Nọnsi Jesu? Ẹlẹnan nian, ẹlo nela Jehova rẹ ghe obhio mhan nọn zobọ bhọ rẹ ha le ekala yẹ da anyọn nan rẹ lu Ayere ọsi Uyumhin Nọnsi Jesu, ranmhude, ọle dọ kere ghe Jehova bha sẹ re ẹlinmhin nọn khiale rẹ zẹ ọle? (1 Cor. 11:28) Ẹbho ne bunbun le bhi ọne ekala yẹ da bhi ọne anyọn, ranmhude, ọ bha mun ele ẹlo kore si a zẹ ele la si a bha gene zẹ ele. Ahamiẹn eria ne sẹ inian rẹman ghe ele dobọ ha le ọle, yẹ zobọ bhọ, Jehova ki sẹyẹ miẹn ele ọbhi egbe, yẹ ka ele ba usun ne ha nyẹnlẹn bhi ọne otọ nan bhi ighegheghe, sade ele bha zobọ bhi oga nọnsọle. Arẹmiẹn ele iyẹ le bhi ọne ekala yẹ da bhi ọne anyọn nan rẹ lu Ayere ọsi Uyumhin Nọnsi Jesu, ọkhẹke nin ele sẹyẹ wo ha yo, nin ele rẹ rẹman ghe ebi Jehova bi Jesu lu ti ele bhọ.

6. Be bhọ iJesu taman ene ẹhi nin ele hẹi sẹ lu?

⁶ Beji a miẹn ghe ekpokpo nọn khua sire, ọkhẹke nin mhan zilo nyan ebi Revelation uhọnmhọnlẹn 7 tale rẹji Kristiẹn nanzẹle bi usun ihuan nekẹle. Ọnan dẹ sabọ re izebhudu nin mhan. Bhi ọne iBaibo nin, Jesu da taman ene ẹhi ghe, nin ele hẹi sẹ mun ugbekhuelo re bhi ọne otọ nan, ghe nin ele mundia nin Jehova ka zẹ ene ọle ha ne ha khian okhun fo. (Rev. 7:​1-4) Enanzẹle dẹ deba iJesu gbẹloghe bii ojie bi ohẹn bhi okhun. (Rev. 20:6) Jehova, Jesu bi ene ẹhi dẹ wo ha ghọnghọn rẹ daghe ghe, ikhuaẹloghe ọsi enanzẹle sẹ ele obọ.

7. Beji a gbẹn ọbhi Revelation 7:​9, 10, be bhọ John daghe bhi imianlo? Be ele ki ha lu? (Fẹ adudu nọn ribhi odalo ọne ebe nan ghe.)

⁷ Ẹghe nin John rẹ daghe usun ọsi enanzẹle fo bhi imianlo, ọle da yẹ daghe usun ọsi ẹbho ebhebhe ne bunbun ne miuhọnmhọn bhi okhọn Armageddon. Ene usun nan veva nin ọle daghe wo dikẹ. Usun nin ọle kie daghe bun gbera usun ọsi enanzẹle nin ọle ka daghe rẹ sẹbhọ ghe, a ida sabọ ka eka ẹbho ne ribhi ọne usun nan. (Tie Revelation 7:​9, 10.) Ele da mun ukpọn nọn fua yọ. Ọnan rẹman ghe, ele bha ji ọne agbọn Esu nan da re itọn ele bhi egbe. Sẹyẹ, ọ rẹman ghe ele wo sun rẹkhan Osẹnobulua bi Jesu Kristi. (Jas. 1:27) Ele da ha so yọle ghe, ele miẹn umiẹnfan ranmhude ebi Jehova bi Jesu nin ohuan nọnsi Osẹnobulua lu nin ele. Ele da yẹ muno ikpilamẹn mhọn bhi obọ. Ọnan rẹman ghe, ele wo re eghọnghọn miẹn iJesu ọbhi egbe bii Ojie nin Jehova re mundia.​—Yẹ fẹ John 12:​12, 13 ghe.

8. Be bhọ Revelation 7:​11, 12 taman mhan rẹji ọrebhe ne ribhi okhun?

⁸ Tie Revelation 7:​11, 12. Be bhọ ọrebhe ne ribhi okhun ki lu yẹ ẹghe nin ele rẹ daghe ene usun ẹbho nan? Bhi ọne imianlo, John da daghe ghe, ele da wo ha ghọnghọn yẹ gẹn Osẹnobulua ẹghe nin ele rẹ daghe ene usun ẹbho nan. Ọnan rẹman ghe, ọrebhe bhi okhun dẹ wo ha ghọnghọn ẹghe nin ene usun ẹbho ne bunbun ha rẹ miuhọnmhọn bhi ekpokpo nọn khua.

9. Be bhọ ene usun ẹbho ne bunbun lu ẹlẹnan nian beji Revelation 7:​13-15 rẹman?

⁹ Tie Revelation 7:​13-15. John da yọle ghe, ene usun ẹbho nan, “re aranlẹn ọsi ọne ohuan rẹ họ ukpọn nọnsele khia nọn da ha fua.” Ọnan rẹman ghe, ọkhọle nọn khiale ele mhọnlẹn, ghe Jehova re ẹlo esili ghe ele. (Isa. 1:18) Kristiẹn ne re egbe guẹ nin Jehova yẹ mianmẹn ele khin. Ele mhọn urẹọbhọ nọn ziẹnlẹn da izọese nọnsi Jesu. Ele yẹ deba iJehova mhọn ikolu nọn ziẹnlẹn. (John 3:36; 1 Pet. 3:21) Ranmhude ọnan, ẹlo esili Jehova rẹ ghe ele, bhiriọ, ele sabọ re oga nọn khiale ji ọle asọn bi odanmhẹn bhi ọne otọ nan. Ẹlẹnan nian, ele wo mun Agbejele nọnsi Osẹnobulua kalo bhi iẹnlẹn. Ele re ọyaya lu iwẹnna itẹmhọn Osẹnobulua na bhi ọne otọ agbọn nan rebhe yẹ re ẹbho kiẹn edibo nesi Jesu.​—Matt. 6:33; 24:14; 28:​19, 20.

10. Iruduba nela ene usun ẹbho ne bunbun nan mhọnlẹn? Ive nela ele khuaẹloghe?

¹⁰ Ene usun ẹbho ne bunbun nan ne miuhọnmhọn bhi ekpokpo nọn khua mhọn iruduba ghe, Osẹnobulua dẹ wo ha gbẹloghe ele. Ebi John yẹ daghe rẹman ghe ẹmhọanta ọnan khin. John da yọle “ọnọn dotua bhi ọne ojukhuo ki taan ibọkpọ nọnsọle a rẹ gue ele.” Ive nin ene ẹbho nan mọn da khuaẹloghe ki munsẹ. Ọne ive hi, “[Osẹnobulua] dẹ gbo amẹn eviẹ rebhe si ele bhi ẹlo re. Uu ida yẹ ha ribhọ, la akhiẹ, la ukpuru eviẹ, la ọbalọ.”​—Rev. 21:​3, 4.

11-12. (a) Beji Revelation 7:​16, 17 rẹman, elele nela khẹ ene usun ẹbho ne bunbun bhi ẹghe odalo? (b) Be usun ihuan nekẹle ha sabọ lu ẹghe iluemhin ọsi Ayere ọsi Uyumhin Nọnsi Jesu? Bezẹle nin ele da lu iriọ?

¹¹ Tie Revelation 7:​16, 17. Ẹlẹnan nian, eso bhi ẹwẹ ene ga iJehova miẹn ọnọghọ  ranmhude ele bha miẹn rẹ lu, bi ranmhude okhọnlẹn nọn de. Eso yẹ ribhọ nan mun khue ranmhude urẹọbhọ nọnsele. Ọrẹyiriọ, ene mhọn ikhuaẹloghe rẹ nyẹnlẹn bhi ọne otọ nan yẹ wo ghọnghọn ranmhude ele lẹn sẹbhọ ghe, ọne agbọn nan ha kpẹn, ebale ọsaje bi ebale oriọn dẹ wo kpọa nin ele. Ẹghe nin Jehova ha rẹ fuẹn ọne agbọn Esu nan an, ọle dẹ gbega ene mhọn ikhuaẹloghe rẹ nyẹnlẹn bhi ọne otọ nan nin ọne ugbekhuelo hẹi sẹ ele bhi egbe. Jesu dẹ gbega ene ha miuhọnmhọn bhi ekpokpo nọn khua nin ele da sabọ miẹn iẹnlẹn ọsi ighegheghe. Ene usun ẹbho ne bunbun ne ha miuhọnmhọn bhi ekpokpo nọn khua mhọn isẹhoa kpataki. Ọne isẹhoa hi, asabọmiẹn ele ida yu hiehie. Ele ọkpa mhọn ọne isẹhoa nan bhi ẹwẹ ẹbho rebhe ne ki sẹ nyẹnlẹn bhi ọne otọ nan.​—John 11:26.

¹² Ene da nyẹnlẹn bhi ọne otọ nan mhọn ikhuaẹloghe nọn mhẹn nọn ha re ele ha khuẹnmhẹn iJehova bi Jesu. Arẹmiẹn Jehova bha zẹ ele nin ele dọ nyẹnlẹn bhi okhun, ọle sẹyẹ wo hoẹmhọn ele beji ọle rẹ hoẹmhọn enanzẹle. Enanzẹle bi ene ihuan nekẹle, dẹ wo sabọ ha re ogẹn ji Jehova bi Jesu. Uwedẹ ọkpa nin ele ha rẹ sabọ lu ọnan hi, sade ele yo iluemhin ọsi Ayere ọsi Uyumhin Nọnsi Jesu.

13-14. Bezẹle nọn da khẹke nin ọrebhe ha yo iluemhin ọsi Ayere ọsi Uyumhin Nọnsi Jesu?

¹³ Ji a man yọle ghe, a wa ẹbho rebhe ne vae bhi iluemhin ọsi Ayere ọsi Uyumhin Nọnsi Jesu ọbhi usun kẹkẹ. Ahamiẹn itue 1,000, ele ribhi ene usun nan kẹkẹ, otuọnkpa nọn le ọne ekala yẹ da ọne anyọn, ọle da ha ribhi usun eso, sokpan usun nekẹle ida ha mhọnlẹn hiehie. Ọnan rẹman ghe, agbotu ne bunbun ẹlẹnan nian imhọn ọria soso bhi ẹwẹ ele nọn le ọne ekala yẹ da ọne anyọn. Ọnan rẹkpa mhan rẹ lẹn ghe, ene mhọn ikhuaẹloghe rẹ nyẹnlẹn bhi ọne otọ nan bhi ighegheghe, ele bun nẹ bhi ẹwẹ ene vae bhi iluemhin ọsi Ayere ọsi Uyumhin Nọnsi Jesu ẹlẹnan. Bezẹle nin ele da yo ọne iluemhin nan? Nin mhan rẹ miẹn ọne ewanniẹn, bha ji mhan fẹ ọne ijiẹmhin nan ghe: Ahamiẹn ọmọẹ ẹ ho nin ọle lu iluemhin ọsi ibọdọ bi iriokhuo, ọ dẹ yẹẹ uwẹ rẹ yo. Bezẹle? Ranmhude uwẹ ho nin uwẹ re iyobọ nin ele yẹ rẹman ele ghe uwẹ hoẹmhọn ele. Iriọ yẹ nọn rẹji ihuan nekẹle. Ele yo iluemhin ọsi Ayere ọsi Uyumhin nọnsi Jesu nin ele rẹ re iyobọ nin Jesu bi enanzẹle, yẹ rẹman ele ghe ele hoẹmhọn ele. Emhin  ọbhebhe nọn zẹle nin ele da yo ọne iluemhin nan hi, ele ho nin ele rẹman ghe izọese nọnsi Jesu ti ele bhọ, ranmhude ọne izọese zẹle nin ele ha da sabọ miẹn iẹnlẹn ọsi ighegheghe bhi ọne otọ nan.

¹⁴ Emhin kpataki ọbhebhe nọn zẹle nin ihuan nekẹle da vae bhi iluemhin ọsi Ayere ọsi Uyumhin Nọnsi Jesu hi, ele guanọ nin ele re obọ rẹkhan uhi nin Jesu gbele. Ẹghe nin Jesu rẹ mun ọne iluemhin nan gbọ, ọle da taman etuegbe nesọle yọle: “Bha ha lu ọnan rẹ ye mẹn re.” (1 Cor. 11:​23-26) Ene ihuan nekẹle dẹ sẹyẹ wo ha yo iluemhin ọsi Ayere ọsi uyumhin nọnsi Jesu rẹ sẹbhi ẹghe nin enanzẹle rebhe ha rẹ kpanọ ha khian okhun fo. Bhi ọsi ẹmhọanta, ene ihuan nekẹle wo re ọyaya tie ẹbho rebhe nin ele dọ deba yo ọne iluemhin nan.

15. Be imhan ha rẹ sabọ re ogẹn ji Osẹnobulua bi Jesu yẹ sade a lu iluemhin ọsi Ayere ọsi Uyumhin Nọnsi Jesu?

¹⁵ Mhan mhọn isẹhoa rẹ nan erọnmhọn ji Osẹnobulua yẹ so illo rẹ gẹn ọlẹn bi Jesu Kristi, sade mhan lu iluemhin ọsi Ayere ọsi Uyumhin nọnsi Jesu. Ọne ukpe nan, uhọnmhọn-ọta nan ha rẹman bhi ọne iluemhin yọle, “Rẹman Ghe Emhin Nin Osẹnobulua bi Jesu Lu Nin Uwẹ Ti Uwẹ Bhọ!” Ọne ọta nan dẹ rẹkpa mhan rẹ manman ha mhọn ọtibhọ da iJehova bi Jesu ranmhude ebi ele lu nin mhan. Beji a ha rẹ ha gha ọne ekala bi anyọn nẹga, mhan rebhe ki miẹn isẹhoa rẹ ha ria eria nyan ebi ele mundia nan. Ọne ekala mundia nin egbe nọnsi Jesu, ọne anyọn da mundia nin aranlẹn nọnsọle. Mhan ki yẹ sabọ yere ghe, Jehova je Ọmọn nọnsọle nin ọle dọ yu nin mhan nin mhan da sabọ miẹn iẹnlẹn ọsi ighegheghe. (Matt. 20:28) Ọrebhe ne hoẹmhọn Aba mhan nọn ribhi okhun bi Ọmọn nọnsọle dẹ wo ha guanọ nin ele vae bhi ọne iluemhin nan.

16. Uwedẹ nela enanzẹle bi ene ihuan nekẹle rẹ yi ọkpa?

¹⁶ Jehova wo manman hoẹmhọn enanzẹle bi ene ihuan nekẹle. Ẹlo nọn ghanlẹn ọle rẹ wo ghe ene usun nan veva, ranmhude, aranlẹn ọsi Ọmọn nọnsọle ọle rẹ dẹ ele nin ele ha yi ẹbho nesọle. Ikhuaẹloghe nin ele mhọn, ọle ọkpa emhin nọn dikẹ bhi ẹwẹ ele. Ọkhẹke nin ele rebhe sun rẹkhan Jehova bi Jesu Kristi. (Ps. 31:23) Yere ghe, Jehova dẹ re ẹlinmhin nọn khiale nọnsọle nin ọria, aharẹmiẹn ẹwẹ enanzẹle ọle ye, la ẹwẹ ene da nyẹnlẹn bhi ọne otọ nan bhi ighegheghe.

17. Be bhọ enanzẹle ne sẹyẹ ribhi otọ khuaẹloghe?

¹⁷ A bha biẹ enanzẹle bi ikhuaẹloghe nin ele mhọnlẹn. Osẹnobulua hi ọnọn re ọne ikuaẹloghe nan nin ele. Ele wo ria ẹmhọn ọne ikhuaẹloghe nan nin ele mhọn. Ele yẹ wo nan erọnmhọn nin ebi ele khuaẹloghe sẹ ele obọ. Sẹyẹ, arẹmiẹn ele bha lẹn ebi ọ diayẹ sade ọria mhọn egbe ẹlinmhin, ele wo re ọtibhọ khẹ ẹghe  nin ele ha rẹ ha khian okhun. (Phil. 3:​20, 21; 1 John 3:2) Ele yẹ wo re ọtibhọ khẹ ẹghe nin ele ha rẹ bu iJehova, Jesu, ene ẹhi bi enanzẹle nekẹle ne ki ribhi okhun fo, nin ele da dọ deba ele ha nyẹnlẹn bhi enin.

18. Emhin nela ene ihuan nekẹle khuaẹloghe?

¹⁸ Ene ihuan nekẹle wo khuaẹloghe ẹghe nin ele ha rẹ nyẹnlẹn bhi ọne otọ nan bhi ighegheghe. Ọnan hi emhin nin ọrebhe guanọ. (Eccl. 3:11) Ele wo re ọtibhọ khẹ ọne ẹghe nin ele ha rẹ re ọne otọ nan kiẹn ogba ọfubhegbe. Ẹghenin, ebale ki kpọa, ọrebhe ki yẹ ha mhọn uwa nọnsele. Sẹyẹ, ọrebhe ki ha mhọn imọn nin egbe gba nan. (Isa. 65:​21-23) Bhi ọne ẹghe nan, ọrebhe ki sabọ ha rẹnẹ yo ije kẹkẹ bhi ọne otọ nan nin ele dọ daghe emhin nin Jehova manlẹn. Emhin bii elanmhẹn kẹkẹ, oke kẹkẹ bi ẹdẹ kẹkẹ. Sẹyẹ, ọ ti ele bhọ rẹ lẹn ghe, ọne ẹghe ha sẹ, ikolu nin ele bi Jehova ko mhọnlẹn ki ha ziẹn ọbhọ ukpẹdẹ-ukpẹdẹ.

19. Isẹhoa nela iluemhin ọsi Ayere ọsi Uyumhin Nọnsi Jesu re nin mhan rebhe? Ẹghela a ha rẹ lu ọne iluemhin nan bhi ọne ukpe nan?

¹⁹ Ikhuaẹloghe nọn mhẹn an Jehova wo re nin ene ga ọle. (Jer. 29:11) Iluemhin ọsi Ayere ọsi Uyumhin Nọnsi Jesu wo re isẹhoa nin ọdeọde bhi ẹwẹ mhan rẹ re ogẹn ji Jehova bi Jesu Kristi bhi emhin nin ele lu nin mhan. Ikolo nin mhan do rẹ lu ọne iluemhin nan, ọle hi ikolo nọn ke okhun nẹ bhi ẹwẹ ikolo rebhe nin mhan do ukpe-ukpe. Ọne ukpe nan, ẹdẹ iSaturday, March 27, 2021, ọle a ha rẹ lu ọne iluemhin nan sade oẹnlẹn defia fo ọsemuan. Idia kẹkẹ ẹbho ne bunbun ha da lu ọne iluemhin nan bhi ọne ukpe nan. Eso dẹ miẹn isẹhoa rẹ yo ranmhude a ikpokpo ele bhi agbaẹbho nọnsele. Sẹyẹ, eso dẹ yẹ lu ọle arẹmiẹn ele ribhi ẹkẹ ekpokpo. Eso yẹ ribhọ ne da lu ọne iluemhin nan bhi ẹkẹ ighan. Ọkpakinọn, lẹn sẹbhọ ghe, Jehova bi ọrebhe ne ribhi okhun daghe mhan bhi eji ọ hi ki rẹ khin nin mhan da lu ọne iluemhin nan. Mhan nan erọnmhọn ghe, nin mhan rebhe sabọ sọnyẹnmhẹn bhi iluemhin ọsi Ayere ọsi Uyumhin nọnsi Jesu bhi ọne ukpe nan.