1-2. (a) Ẹghela mhan kẹ rẹ manman ria ẹmhọn ọria nọnsẹmhan nọn yu? (b) Be iJesu mun gbọ ọne ukpasọn ọkuẹsẹ ọle yu?

 AHARẸMIẸN ọ ki ree nin ọria nọnsẹmhan yu, mhan sẹyẹ ye ọle re. Ukpẹdẹ nin ọle yu, ọle mhan rẹ manman ria ẹmhọn ọle nẹ.

² Ukpe-ukpe ẹbho ne bunbun bhi ọne otọ agbọn nan rebhe rẹ lu Ayere ọsi Uyumhin Nọnsi Jesu. (1 Pet. 1:8) Bhi ọne ẹghe nan, mhan ki sikoko ye Jesu re nọn re iẹnlẹn nọnsọle rẹ miẹn mhan fan bhi obọ olukhọ bi uu. (Matt. 20:28) Bhi ọsi ẹmhọanta, Jesu guanọ nin edibo nesọle ha ye uyumhin nọnsọle re. Ọne ukpasọn ọkuẹsẹ Jesu yu, ọle da mun iluemhin kpataki gbọ. Ọle da yọle: “Bha ha lu ọnan rẹ ha ye mẹn re.”​—Luke 22:19.

3. Be imhan ha zilo nyan bhi ọne uhọnmhọn-ọta nan?

³ Bhi ẹwẹ eria ne vae bhi Ayere ọsi Uyumhin Nọnsi Jesu, ikpeta ẹbho bhi ẹwẹ ele ọkpa mhọn ọne ikhuaẹloghe rẹ dọ nyẹn bhi okhun. Ọkpakinọn, ẹbho ne bunbun ne mhọn ikuaẹloghe rẹ nyẹn bhi ọne otọ nan yẹ vae. Bhi ọne uhọnmhọn-ọta nan, mhan dẹ zilo nyan ebezẹle nọn da yẹẹ ene usun eva nan rẹ ha yo Ayere ọsi Uyumhin Nọnsi Jesu ukpe-ukpe.  Mhan dẹ yẹ zilo nyan elele nin mhan miẹn sade mhan yo. Bha ji mhan ka zilo nyan ebezẹle nin enanzẹle da yo.

4. Bezẹle nin enanzẹle da le ọne ibrẹdi yẹ da ọne anyọn sade a lu Ayere ọsi Uyumhin Nọnsi Jesu?

⁴ Ukpe-ukpe enanzẹle ne yo Ayere ọsi Uyumhin Nọnsi Jesu rẹ le ọne ibrẹdi yẹ da bhi ọne anyọn. Bezẹle nin ele da le ọne ibrẹdi yẹ da bhi ọne anyọn? Nin mhan rẹ lẹn, bha ji mhan fẹ ebe sunu ọne ukpasọn nọn kike ọkuẹsẹ a gbe iJesu a. A ki le ebale ọsi iluemhin Anagbera fo, Jesu da mun Ayere ọsi uyumhin nọnsọle gbọ. Ọle da gha ọne ibrẹdi bi ọne anyọn nin etuegbe 11 nesọle ne sun rẹkhan ọlẹn, yẹ taman ele nin ele da ọne anyọn yẹ le ọne ibrẹdi. Jesu da taman ele ẹmhọn akovẹn eva. Ene akovẹn hi, akovẹn ọsọgbọn bi akovẹn ọsi Agbejele. * (Luke 22:​19, 20, 28-30) Ene akovẹn nan da tuje uwedẹ a nin etuegbe nesọle, bi ikpeta ẹbho nekẹle rẹ dọ kiẹn ojie bi ohẹn bhi okhun. (Rev. 5:10; 14:1) Enanzẹle ne kẹre bhi ọne otọ nan, ne yẹ ribhi ene akovẹn nan ọkpa ha sabọ le bhi ọne ibrẹdi, yẹ da bhi ọne anyọn nan rẹ lu Ayere ọsi Uyumhin Nọnsi Jesu.

5. Be enanzẹle lẹn rẹji ikuaẹloghe nan re nin ele?

⁵ Emhin ọbhebhe nọn zẹle nin enanzẹle da guanọ nin ele yo Ayere ọsi Uyumhin Nọnsi Jesu hi, ọ re isẹhoa nin ele rẹ ha ria eria nyan ikhuaẹloghe nin ele mhọn. Iruduba nọn mhẹn, ọle iJehova re nin ele. Ẹghe nin ele ha rẹ ha nyẹnlẹn bhi okhun, ele ida yẹ ha yu la ha mhọn egbe nọn wea. Ele bi enanzẹle nekẹle dẹ deba Jesu gbẹloghe bhi okhun. Ọnọn ke okhun nẹ bhọ hi, ele dẹ ha ribhi odalo Osẹnobulua nin Jehova. (1 Cor. 15:​51-53; 1 John 3:2) Enanzẹle lẹn sẹbhọ ghe, okhun ele ha da miẹn ene ive nan rebhe. Ọkpakinọn, nin ọne ive nan da sabọ sẹ ele obọ, ọkhẹke nin ele sun rẹkhan iJehova sẹbhi ẹdẹ uu. (2 Tim. 4:​7, 8) Ọ manman re enanzẹle ghọnghọn sade ele ria eria nyan ikuaẹloghe nin ele mhọn rẹ dọ nyẹn bhi okhun. (Titus 2:13) Ene ihuan nekẹle bhọ kii? (John 10:16) Emhin eso nela zẹle nin ele da yo Ayere ọsi Uyumhin Nọnsi Jesu?

6. Bezẹle nin ihuan nekẹle da yo Ayere ọsi Uyumhin Nọnsi Jesu ukpe-ukpe?

⁶ Ihuan nekẹle yo Ayere ọsi Uyumhin Nọnsi Jesu, ọ iyi ranmhude ele guanọ nin ele le bhi ọne ibrẹdi yẹ da bhi ọne anyọn. Sokpan, ọ re ele ghọnghọn rẹ ha ribhi enin. Bhi ukpe 1938, ọle ẹghe ọhẹnhẹn nan rẹ tie ẹbho ne da nyẹn bhi ọne otọ nan nin ele dọ deba lu Ayere ọsi Uyumhin Nọnsi Jesu. Watchtower ọsi March 1, 1938 da yọle: “Ọ dẹ wo ha mhẹn nin [ihuan nekẹle] rẹ vae bhi iluemhin Ayere ọsi Uyumhin Nọnsi Jesu yẹ re ẹlo rẹkhan ebi a lu. . . . Ọ khẹke nin ele wo ha ghọnghọn bhi ọne ẹghe nan, ranmhude, ẹghe eghọnghọn nọn.” Beji ọ rẹ ti ẹbho bhọ rẹ vae bhi ibọdọ bi ireokhuo nan da tie ele, iriọ ọ yẹ rẹ re ihuan nekẹle ghọnghọn rẹ vae bhi Ayere ọsi Uyumhin Nọnsi Jesu.

7. Bezẹle nọn da ti ihuan nekẹle bhọ rẹ ha kaehọ ọta nan rẹman bhi Ayere ọsi Uyumhin Nọnsi Jesu?

⁷ Ihuan nekẹle yẹ ria eria nyan ikhuaẹloghe nọnsele. Ọ wo yẹẹ ele rẹ ha kaehọ ọta nan ha rẹman bhi Ayere ọsi Uyumhin Nọnsi Jesu. Ranmhude, ọta nan rẹman bhi ọne ukpẹdẹ nin tẹmhọn ebi Jesu bi itue 144,000 ha lu nin ene da nyẹn bhi ọne otọ nan, bhi ẹghe nin ele ha rẹ Gbẹloghe bhi Ukpe Uli. Bhi odotọ ugbẹloghe ọsi Jesu Kristi, enanzẹle dẹ rẹkpa re ọne otọ nan kiẹn otọ ọfubhegbe.  Sẹyẹ, ele ki rẹkpa ẹbho ne hẹnmhọn nin Osẹnobulua rẹ kiẹn eria ne gbale. Ọ dẹ wo re eria ne bunbun ne vae bhi Ayere ọsi Uyumhin Nọnsi Jesu ha ghọnghọn, beji ele ha rẹ ha ria eria nyan ive kẹkẹ ne ribhi Baibo, bọsi ene ribhi Isaiah 35:​5, 6; 65:​21-23; bi Revelation 21:​3, 4. Beji ele ha rẹ ha ghe egbe ele bi ẹbho nin ele hoẹmhọnlẹn bhi agbọn ọsọgbọn nọn vade, ikhuaẹloghe nin ele mhọn da ẹghe odalo ki ha ziẹn ọbhọ. Sẹyẹ, ọ ki ha hu ele bhi udu rẹ ha ga iJehova.​—Matt. 24:13; Gal. 6:9.

8. Emhin ọbhebhe nela zẹle nin ihuan nekẹle da yo Ayere ọsi Uyumhin Nọnsi Jesu?

⁸ Bha ji mhan fẹ emhin ọbhebhe ghe nọn zẹle nin ihuan nekẹle da yo Ayere ọsi Uyumhin Nọnsi Jesu. Ele guanọ nin ele re iyobọ nin enanzẹle yẹ rẹman ele ghe ele hoẹmhọn ele. Baibo yọle ghe, enanzẹle bi ene da nyẹnlẹn bhi ọne otọ nan dẹ ko ha lu emhin kugbe. Be ọ rẹ yi iriọ yẹ? Bha ji mhan fẹ ijiẹmhin eso ghe.

9. Be ẹmhọn enanzẹle dia ihuan nekẹle bhi egbe yẹ beji ọta akhasẹ nọn ribhi Zechariah 8:23 rẹman?

⁹ Tie Zechariah 8:23. Ọne akhasẹ nọn ribhi ọne iBaibo nan, wo rẹman ebi ẹmhọn enanzẹle dia ihuan nekẹle bhi egbe yẹ. Ene ikpọta “obhi Jew” bi “bha” mundia nin usun ọkpa​—enanzẹle ne yẹ ribhi ọne otọ nan. (Rom. 2:​28, 29) Ene “ikpea igbe ne na bhi agbaẹbho bi urolo kẹkẹ vae” mundia nin ihuan nekẹle. Ele “fiobọ mun” rẹman ghe, ele sun rẹkhan enanzẹle yẹ deba ele ha ga iJehova. Ranmhude ọnan, ọne ukpasọn nan lu Ayere ọsi Uyumhin Nọnsi Jesu, ene ihuan nekẹle ki deba enanzẹle yo, nin ele rẹ rẹman ghe ele ko lu emhin kugbe.

10. Be iJehova lu rẹ mun ọta akhasẹ nọn ribhi Ezekiel 37:​15-19, 24, 25 sẹ?

¹⁰ Tie Ezekiel 37:​15-19, 24, 25. Jehova mun ọta akhasẹ nọn ribhi ọne iBaibo nan sẹ, beji ọle rẹ lu ọle nin enanzẹle bi ihuan nekẹle ko ha mhọn okugbe nọn manman ziẹn. Ọne ọta akhasẹ tẹmhọn ukpokpo eva. Ene mhọn ikuaẹloghe rẹ nyẹnlẹn bhi okhun diabe ukpokpo “ọsi Judah” (ulin-uwa nan da ha zẹ ijie ne ha gbẹloghe bhi otọ Izrẹl.) Sẹyẹ, ene mhọn ikuaẹloghe rẹ nyẹnlẹn bhi ọne otọ nan diabe ukpokpo “ọsi Ephraim.” * Jehova dẹ ku ene ukpokpo nan kugbe nin ele da ha yi “ukpokpo ọkpa.” Ọnan rẹman ghe, ele ga kugbe bhi odotọ Jesu Kristi nin Ojie nọnsele. Ukpe-ukpe enanzẹle bi ene ihuan nekẹle rẹ kugbe lu Ayere ọsi Uyumhin Nọnsi Jesu bọsi “ihuan ọkpa” bhi odotọ “ọsun-ohuan ọkpa.”​—John 10:16.

11. Uwedẹ kpataki nela “ene ohuan” nan tẹmhọnlẹn bhi Matthew 25:​31-36, 40 rẹ re iyobọ nin enanzẹle?

¹¹ Tie Matthew 25:​31-36, 40. “Ene ihuan” nin Jesu tẹmhọnlẹn mundia nin ẹbho ne khiale bhi ẹghe ọkike ọsi ọne agbọn nan, ne mhọn ọne ikuaẹloghe rẹ nyẹnlẹn bhi ọne otọ nan. Ele yẹ ene ihuan nekẹle. Ele wo ha re iyobọ nin enanzẹle ne yẹ ribhi ọne otọ nan, bhi uwedẹ nin ele rẹ ha rẹkpa ele bhi iwẹnna itẹmhọn Osẹnobulua, yẹ re ẹbho kiẹn edibo.​—Matt. 24:14; 28:​19, 20.

12-13. Uwedẹ ebhebhe nela ene ihuan nekẹle rẹ re iyobọ nin enanzẹle?

¹² Uzana eso ọkuẹsẹ a lu Ayere ọsi Uyumhin Nọnsi Jesu, ihuan nekẹle ki re iyobọ nin enanzẹle bhi uwedẹ nin ele rẹ tie ẹbho vae bhi ọne Ayere ukpe-ukpe. (Fẹ ọne ẹkpẹti ghe nọn yọle “ Uwẹ Be Ha Muegbe Khẹ Ayere ọsi Uyumhin Nọnsi Jesu?”) Ene ihuan nekẹle yẹ rẹkpa lu emhanmhan ne khẹke beji a ha da miẹn ghe, agbotu kẹkẹ nin ele ye bhi otọ  agbọn nan rebhe ki sabọ lu ọne Ayere, aharẹmiẹn ọria ribhi agbotu nọnsele nọn le ọne ibrẹdi yẹ da ọne anyọn, la ọ iribhọ. Ọ wo ti ihuan nekẹle bhọ rẹ rẹkpa enanzẹle bhi ene uwedẹ nan. Ene ihuan nan lẹnmhin ghe, Jesu ghe emhin nin ele lu rẹ rẹkpa enanzẹle bọsi ghe, ọle ele lu ọle nan.​—Matt. 25:​37-40.

¹³ Emhin ebhebhe nela zẹle nin enanzẹle bi ihuan nekẹle da yo Ayere ọsi Uyumhin Nọnsi Jesu?

14. Uwedẹ nela Jehova bi Jesu rẹ manman re oyẹẹ man mhan?

¹⁴ Oyẹẹ nin Jehova bi Jesu mhọn da mhan wo manman ti mhan bhọ. Jehova sẹ wo re oyẹẹ nọnsọle man mhan bhi uwedẹ ne bunbun. Ọkpakinọn, uwedẹ nọn kpọnọ nẹ nin ọle sẹ rẹ re oyẹẹ man mhan hi, nin ọle rẹ je Ọmọn nọnsọle nin ọle manman hoẹmhọnlẹn dọ loya, yẹ yu nin mhan. (John 3:16) Mhan yẹ lẹn sẹbhọ ghe, ranmhude Jesu manman hoẹmhọn mhan zẹle nin ọle da zegbere dọ yu nin mhan. (John 15:13) Mhan ida sabọ ha Jehova bi Jesu osa bhi oyẹẹ nin ele mhọn da mhan. Ọkpakinọn, mhan dẹ sabọ re uwedẹ nin mhan rẹ nyẹnlẹn ukpẹdẹ-ukpẹdẹ rẹ rẹman ele ghe, oyẹẹ nin ele mhọn da mhan ti mhan bhọ. (Col. 3:15) Sẹyẹ, mhan yo Ayere ọsi Uyumhin Nọnsi Jesu nin mhan da sabọ ria eria nyan oyẹẹ nin ele mhọn da mhan, yẹ rẹman ele ghe mhan hoẹmhọn ele.

15. Bezẹle nin izọese nọnsi Jesu da wo manman ghan bhi ẹlo ọsi enanzẹle bi ihuan nekẹle?

¹⁵ Izọese ọsi Jesu wo manman ti mhan bhọ. (Matt. 20:28) Ọne izọese wo manman ghan bhi ẹlo ọsi enanzẹle, ranmhude ọle zẹle nin ele da mhọn ọne isẹhoa rẹ dọ nyẹnlẹn bhi okhun. Ranmhude urẹọbhọ nin ele mhọn da izọese ọsi Jesu, Jehova da tie ele eria ne khiale, yẹ re ele kiẹn imọn nesọle. (Rom. 5:1; 8:​15-17, 23) Ọne izọese wo yẹ ti ihuan nekẹle bhọ. Ranmhude urẹọbhọ nin ele mhọn da izọese nọnsi Jesu, ele dọ kiẹn eria ne khia bhi ẹlo ọsi Osẹnobulua. Sẹyẹ, ele sabọ ha re oga nọn khiale ji Osẹnobulua, yẹ mhọn ọne iruduba rẹ miuhọnmhọn bhi ekpokpo nọn khua. (Rev. 7:​13-15) Uwedẹ ọkpa nin enanzẹle bi ihuan nekẹle rẹ rẹman ghe, izọese nọnsi Jesu ti ele bhọ hi, sade ele vae bhi Ayere ọsi Uyumhin Nọnsi Jesu ukpe-ukpe.

16. Emhin ọbhebhe nela zẹle nin mhan da yo Ayere ọsi Uyumhin nọnsi Jesu?

¹⁶ Emhin ọbhebhe nọn zẹle nin mhan da lu Ayere ọsi Uyumhin Nọnsi Jesu hi, ranmhude mhan guanọ nin mhan hẹnmhọn nin Jesu. Aharẹmiẹn okhun mhan ha da nyẹnlẹn la ọne otọ nan nọn, ọdeọde bhi ẹwẹ mhan guanọ nin ọle re obọ rẹkhan ebi Jesu tale bhi ọne ukpasọn nin ọle mun ọne Ayere gbọ. Ọle da yọle: “Bha ha lu ọnan rẹ ye mẹn re.”​—1 Cor. 11:​23, 24.

17. Be Ayere ọsi Uyumhin nọnsi Jesu rẹ rẹkpa mhan rẹ manman sikẹ iJehova yẹ?

¹⁷ Mhan manman sikẹ iJehova. (Jas. 4:8) Beji mhan sẹ luẹ, iluemhin Ayere ọsi Uyumhin nọnsi Jesu re isẹhoa nin mhan rẹ ha ria ẹmhọn ikuaẹloghe nin Jehova re nin mhan, yẹ ria eria nyan oyẹẹ nọn khua nin ọle mhọn da mhan. (Jer. 29:11; 1 John 4:​8-10) Ahamiẹn mhan ria ẹmhọn ikuaẹloghe nin mhan mhọnlẹn, bi oyẹẹ nọn ida fo ghẹdẹ nin Osẹnobulua mhọn da mhan, ọnan ki ziẹn oyẹẹ nin mhan mhọn da iJehova, bi ikolu nin mhan bi ọle ko mhọnlẹn.​—Rom. 8:​38, 39.

18. Ahamiẹn mhan ria eria nyan ijiẹmhin nọnsi Jesu, be ọ ha rẹ mhan lu?

 ¹⁸ Ọ re imhan re egbe khọkhọ iJesu. (1 Pet. 2:21) Ikpẹdẹ eso ọkuẹsẹ a lu Ayere ọsi Uyumhin nọnsi Jesu, ije eso bhi Baibo ne tẹmhọn ebe sunu bhi uzana nin Jesu gbe kikẹ bhi ọne otọ nan, uyumhin bi ariọkpanọ nọnsọle, ọle mhan tie. Sẹyẹ, ọne ọsemuan nan lu ọne Ayere, mhan ki kaehọ ọta nọn ye mhan re ebi Jesu rẹ manman hoẹmhọn mhan yẹ. (Eph. 5:2; 1 John 3:16) Ẹghe nin mhan ha rẹ ha tie ijiẹmhin ọsi Jesu nọn rẹman ghe, ọle wo gene hoẹmhọn mhan, yẹ ria eria nyan ọlẹn, ọ ki re imhan ha guanọ nin mhan re egbe khọkhọ ọle.​—1 John 2:6.

19. Be ọkhẹke nin mhan lu nin mhan da sẹyẹ ha yi ọmọẹ Osẹnobulua?

¹⁹ Ọ ki re ọle ha ghọn mhan nin mhan hẹi zobọ bhọ rẹ ha yi ọmọẹ iJehova. (Jude 20, 21) Mhan dẹ sabọ ha yi ọmọẹ Osẹnobulua, sade mhan hẹnmhọn nanlẹn, kpe elin nọnsọle khia, yẹ lu ebe ti ọle bhọ. (Prov. 27:11; Matt. 6:9; 1 John 5:3) Iluemhin Ayere ọsi Uyumhin nọnsi Jesu, rẹkpa mhan nyẹnlẹn ukpẹdẹ-ukpẹdẹ bhi uwedẹ nin mhan ha rẹ rẹman iJehova ghe, mhan guanọ nin mhan ha yi ọmọẹ ọle rẹ sẹbhi ighegheghe!

20. Emhin eso nela zẹle nin mhan da yo Ayere ọsi Uyumhin nọnsi Jesu?

²⁰ Aharẹmiẹn okhun mhan ha da nyẹnlẹn la ọne otọ nan nọn, emhin ne bunbun ribhọ ne zẹle nin mhan ha da yo Ayere ọsi Uyumhin nọnsi Jesu. Ukpe-ukpe nin mhan rẹ si egbe koko nin mhan lu ọne iluemhin nan, uyumhin ọsi ọria nin mhan hoẹmhọnlẹn mhan yere​—uyumhin ọsi Jesu Kristi. Ọnọn ke okhun nẹ bhọ hi, ọ yẹ rẹkpa mhan ria ẹmhọn oyẹẹ nọn khua nin Jehova mhọn da mhan, nin ọle rẹ re Ọmọn nọnsọle zọese nin mhan. Bhi ọne ukpe nan, ọsemuan ẹdẹ iFriday, April 15, 2022, ọle a ha lu Ayere ọsi Uyumhin nọnsi Jesu. Ranmhude mhan hoẹmhọn iJehova bi Ọmọn nọnsọle, emhin soso iribhọ nọn ha zẹ mhan bha yo Ayere ọsi Uyumhin nọnsi Jesu bhi ọne ukpẹdẹ nan lu ọle.