1-2. (a) Be emhin ha dia mhan bhi egbe yẹ sade mhan ria eria nyan ebi Jesu ta bi ebi ọle lu? (b) Be imhan ha zilo nyan bhi ọne uhọnmhọn-ọta nan?

 AHAMIẸN ọria nin mhan hoẹmhọn ọlẹn yu, ọ wo manman ba mhan bhi egbe. Bhi ọsi ọhẹnhẹn, ọ sabọ rẹ manman ha ba mhan bhi egbe sade mhan ria ẹmhọn ene ikpẹdẹ nin ọle gbe kike ọkuẹsẹ ọle yu, manman nọn sade ọle loya ọkuẹsẹ ọle yu. Ọrẹyiriọ, a ha ki zẹ bue, mhan sabọ rẹ dọ munhẹn kikie ha ghọnghọn sade mhan ria ẹmhọn emhin nin ọle man mhan le, la emhin nin ọle lu, la emhin nin ọle ta rẹ re izebhudu nin mhan, la rẹ re mhan ha jiẹ.

² Iriọ yẹ nọn rẹji mhan. Ọ ba mhan bhi egbe sade mhan tie uwedẹ nin Jesu rẹ loya yẹ yu. Bhi ẹghe Ayere ọsi Uyumhin Nọnsi Jesu, mhan re ẹghe ọbhi otọ nin mhan rẹ ria eria nyan ebi izọese nọnsọle rẹ manman lu uhọnmhọn emhin yẹ. (1 Cor. 11:24, 25) Ọrẹyiriọ, ọ manman re imhan ghọnghọn sade mhan ria eria nyan emhin rebhe nin Jesu tale, yẹ lu ẹghe nin ọle rẹ ha ribhi ọne otọ nan. Mhan yẹ miẹn ikoudure sade mhan ria eria nyan ebi ọle lu nian, bi ebi ọle ha lu nin mhan bhi ẹghe odalo. Ahamiẹn mhan ria eria nyan ene emhin nan, bi oyẹẹ nin ọle mhọn da mhan, ọ dẹ sabọ re imhan ha ho nin mhan lu emhin kẹkẹ nin mhan rẹ rẹman ghe, ebi ọle lu nin mhan ti mhan bhọ, beji mhan ha daghe bhi ọne uhọnmhọn-ọta nan.

3. Emhin kẹkẹ nele zẹle nin mhan ha da ji izọese nọnsi Jesu ha ti mhan bhọ?

³ Ọ re imhan ghọnghọn sade mhan ria eria nyan uwedẹ nin Jesu rẹ nyẹnlẹn bi uu nọnsọle. Ẹghe nin Jesu rẹ ha ribhi ọne otọ nan, ọle da man ẹbho emhin esili kẹkẹ nin Agbejele nọnsi Osẹnobulua ha lu. Emhin nin Baibo tale rẹji izọese nọnsi Jesu, bi emhin esili  kẹkẹ nin mhan da miẹn ranmhude ọne izọese wo manman ti mhan bhọ. Ọne izọese wo manman ti mhan bhọ ranmhude ọ re ọne isẹhoa nin mhan rẹ deba Jehova bi ọle ha mhọn ikolu nọn ziẹnlẹn. Ẹbho ne mhọn urẹọbhọ da izọese nọnsi Jesu yẹ mhọn ọne ikhuaẹloghe nin ele rẹ nyẹnlẹn bhi ighegheghe, yẹ miẹn ẹbho nin ele hoẹmhọnlẹn ne yu. (John 5:28, 29; Rom. 6:23) Mhan bha miẹn emhin soso nin mhan lu nọn zẹle nan da ne ene emhin esili nan nin mhan. Sẹyẹ, mhan ida sabọ ha Osẹnobulua bi Jesu osa bhi emhin nin ele lu nin mhan. (Rom. 5:8, 20, 21) Ọkpakinọn, mhan dẹ sabọ rẹman ele ebi emhin nin ele lu nin mhan rẹ manman ti mhan bhọ yẹ. Uwedẹ nela?

4. Be Mary Magdalene rẹ rẹman yẹ ghe, emhin nin Jesu lu nanlẹn ti ọle bhọ? (Fẹ ifoto ghe.)

⁴ Bha ji mhan fẹ ijiẹmhin ọsi okhuo ọkpa ghe nọn yi obhi Ju natiọle Mary Magdalene. Ọle da wo manman ha loya ranmhude ẹlinmhin ebe ihinlọn ne ha kpokpo ọle. Ọ dẹ dia ọle bhi egbe ghe, ọria soso iribhọ nọn ha sabọ rẹkpa ọle. Bhiriọ, riale ebi ọ ha rẹ wo manman ti ọle bhọ yẹ ẹghe nin Jesu rẹ khu ene ẹlinmhin ebe sibhi ọle bhi egbe re. Ranmhude ebi Jesu lu nanlẹn manman ti ọle bhọ, ọle da dọ kiẹn odibo nọnsọle, yẹ noo ẹghe nọnsọle, ahu bi emhin nin ọle mhọn rẹ re iyobọ nanlẹn bhi iwẹnna oga nin ọle ha lu. (Luke 8:1-3) Arẹmiẹn emhin nin Jesu lu nin Mary manman ti ọle bhọ, asabọmiẹn ọle bha lẹn ghe, Jesu dẹ lu ọnọn gbera ọnan nanlẹn bhi ẹghe odalo. Ọle dẹ re iẹnlẹn nọnsọle rẹ zọese nin eria, beji a ha da miẹn “ọrebhe ne mhọn urẹọbhọ da [ọle]” ki sabọ miẹn iẹnlẹn ighegheghe. (John 3:16) Sẹyẹ, Mary da wo sun rẹkhan Jesu nin ọle rẹ rẹman ghe, emhin nin ọle lu nanlẹn wo ti ọle bhọ. Ẹghe nin Jesu rẹ ha loya bhi okhun oran nan khan ọlẹn ọi, Mary da mundia sikẹ ọle ranmhude ẹmhọn Jesu wo rẹtẹ ọle, yẹ ha guanọ nin ọle re ikoudure nin ẹbho ne vae. (John 19:25) Jesu ki yu fo, Mary bi ikhuo eva nekẹle da ne emhin ne vin-ohin nan rẹ mun olinmhin egbe re bhi eji a da re Jesu tọ. (Mark 16:1, 2) Jehova da manman nan erọnmhọn nin Mary ranmhude nin ọle rẹ sun rẹkhan Jesu. Mary da miẹn Jesu yẹ nanlẹn talọ ẹghe nan rẹ  riọ ọle kpanọ fo. Ikpeta bhi edibo nesi Jesu ọkpa miẹn ọne isẹhoa nan.—John 20:11-18.

5. Be imhan ha rẹ rẹman yẹ ghe emhin rebhe nin Jehova bi Jesu lu nin mhan ti mhan bhọ?

⁵ Mhan dẹ yẹ sabọ rẹman ghe emhin rebhe nin Jehova bi Jesu lu nin mhan ti mhan bhọ sade mhan noo ẹghe nọnsẹmhan, ahu bi igho rẹ rẹkpa iwẹnna oga nin mhan lu. Bhi ọsi ijiẹmhin, mhan dẹ sabọ zegbere nin mhan rẹ deba bọn uwa oga nesẹmhan, yẹ ha re ele ọi nọnsẹn.

6. Bezẹle nin mhan ha da sabọ yọle ghe, ẹsele izọese nọnsi Jesu khin rẹji ọdeọde bhi ẹwẹ mhan?

⁶ Mhan ha ria eria nyan ebi Jehova bi Jesu rẹ manman hoẹmhọn mhan yẹ, mhan ki yẹ ha guanọ nin mhan hoẹmhọn ele fikie. (1 John 4:10, 19) Mhan dẹ manman hoẹmhọn ele sade mhan lẹn sẹbhọ ghe, Jesu yu nin mhan tobọmhan. Pọl nin odibo lẹnmhin ghe ẹmhọanta ọnan khin, yẹ rẹman ghe emhin nin ele lu nanlẹn wo manman ti ọle bhọ ẹghe nin ọle rẹ gbẹn ji ibhokhan Galatia yọle: “Ọmọn nọnsi Osẹnobulua . . . hoẹmhọn mẹn, yẹ yu nin mẹn.” (Gal. 2:20) Ranmhude Jesu yu nin mhan, Jehova si uwẹ kẹ egbe beji uwẹ ha da sabọ kiẹn ọmọẹ ọlẹn. (John 6:44) Ọ bha be manman re uwẹ ha ghọnghọn nin uwẹ rẹ lẹn ghe Jehova daghe emhin nọn mhẹn bhi egbe uwẹ, yẹ ha udede osa beji uwẹ ha da sabọ kiẹn ọmọẹ ọlẹn? Ọnan bha be re oyẹẹ nin uwẹ mhọn da Jehova bi Jesu ha ziẹn ọbhọ? Bhiriọ, ọkhẹke nin mhan nọọn egbe mhan, ‘Be ọne oyẹẹ nan ha re imẹn lu?’

7. Beji a rẹman bhi ifoto, be imhan rebhe ha rẹ sabọ rẹman yẹ ghe mhan hoẹmhọn Jehova bi Jesu? (2 Corinthians 5:14, 15; 6:1, 2)

⁷ Oyẹẹ nin mhan mhọn da Osẹnobulua bi Jesu re imhan re oyẹẹ man ẹbho nekẹle. (Tie 2 Corinthians 5:14, 15; 6:1, 2.) Uwedẹ ọkpa nin mhan rẹ re oyẹẹ mhan hi, sade mhan re ọyaya rẹ ha tẹmhọn Osẹnobulua. Mhan ki ne ẹbho rebhe nin mhan miẹn talọ. Mhan ida yọle ghe, imhan ida tẹmhọn Osẹnobulua man ọria ranmhude eji ọle na vae. Sẹyẹ, mhan tẹmhọn Osẹnobulua  man ọrebhe, aharẹmiẹn ele fele yẹ yo isiku, la ele bha fe, la ele bha yo isiku. Ahamiẹn mhan tẹmhọn Osẹnobulua man ọrebhe nin mhan miẹn, mhan ki ha lu iho nọnsi Osẹnobulua, ranmhude iho nọnsọle hi, “nin unan ẹbho rebhe miuhọnmhọn, yẹ dọ ha mhọn ilẹnmhin nọn gbale ọsi ẹmhọanta.”—1 Tim. 2:4.

8. Be imhan ha rẹ sabọ re oyẹẹ man ibhio mhan nin mhan ko ga yẹ?

⁸ Mhan yẹ rẹman ghe mhan hoẹmhọn Osẹnobulua bi Jesu sade mhan re oyẹẹ man ibhio mhan nin mhan ko ga. (1 John 4:21) Mhan ki ji ẹmhọn ele da rẹtẹ mhan, yẹ rẹkpa ele sade ele kuẹlo da ọnọghọ. Mhan ki re ikoudure nin ele sade ọria nin ele hoẹmhọn ọlẹn yu, rẹnẹ ji ele sade ele khọnmhọn, yẹ dọnmhegbe lu ebi mhan ha sabọ lu rẹ re izebhudu nin ele sade egbe lọ ele. (2 Cor. 1:3-7; 1 Thess. 5:11, 14) Mhan ki wo ha nan erọnmhọn ji ele ranmhude mhan lẹnmhin ghe, “ubhimhin ọsi okpea nọn khiale manman mhọn ahu.”—Jas. 5:16.

9. Uwedẹ ọbhebhe nela mhan ha rẹ sabọ rẹman ghe mhan hoẹmhọn ibhio mhan?

⁹ Mhan yẹ rẹman ghe mhan hoẹmhọn ibhio mhan sade mhan dọnmhegbe kaka rẹ deba ele ha ribhi ọfure. Mhan ki dọnmhegbe rẹ re egbe khọkhọ Jehova bhi uwedẹ nin ọle rẹ rẹhunmhan. Ahamiẹn Jehova muegbe nin ọle rẹ ji Ọmọn nọnsọle da yu ọbhi olukhọ nesẹmhan, mhan ida be muegbe nin mhan rẹ rẹhunmhan ibhio mhan sade ele lu olukhọ da mhan? Ọ bha khẹke nin mhan diabe ọne igbọn nọn imhẹn nin Jesu tẹmhọnlẹn bhi okha ọkpa nin ọle gbele. A bhọ rẹ miẹn ebeanlẹn ọlẹn gbe udede osa nin ọle mhọn ọle le kua fo, ọle bha ka rẹhunmhan igbọn bii ọle nọn mhọn ọle obhi osa khere. (Matt. 18:23-35) Ahamiẹn uwẹ bi obhio mhan bhi agbotu ko mhọn ẹmhọn, uwẹ dẹ be sabọ bu ọle nin bha ko ta ọne ẹmhọn ọbhi ekpẹn ọkuẹsẹ uwẹ yo Ayere ọsi Uyumhin Nọnsi Jesu? (Matt. 5:23, 24) Uwẹ ha lu iriọ, uwẹ ki rẹman ghe uwẹ manman hoẹmhọn Jehova bi Jesu.

10-11. Be ene ewanlẹn ha rẹ rẹman yẹ ghe ele hoẹmhọn Jehova bi Jesu? (1 Peter 5:1, 2)

¹⁰ Be ene ewanlẹn bhi agbotu ha rẹ rẹman yẹ ghe ele hoẹmhọn Jehova bi Jesu? Uwedẹ kpataki nin ele ha rẹ lu ọnan hi, sade ele gbẹloghe ihuan nesi Jesu. (Tie 1 Peter 5:1, 2.) Jesu da re ọnan man Pita nin ọkpa bhi ene etuegbe. Ẹghe nin Pita ki rẹ tale igba ea fo ghe, ọle bha lẹn Jesu, iriọ a ha da miẹn, ọle dẹ wo manman ha mhọn ọne ọkhọle nin ọle kie rẹ rẹman ghe, ọle wo hoẹmhọn Jesu. Jesu ki riọkpanọ fo bhi uu, ọle da nọọn Pita yọle: “Simon ọmọn nọnsi John uwẹ hoẹmhọn mẹn?” Mhan dẹ sabọ rẹọbhọ ghe Pita dẹ wo lu emhin nọn ki rẹ khin, nin ọle rẹ rẹman Jesu nin ebeanlẹn ọlẹn ghe, ọle wo hoẹmhọn ọlẹn. Jesu da taman Pita yọle: “Sun ikuẹkuẹ ihuan nesẹmhẹn.” (John 21:15-17) Sẹyẹ, Pita da wo noo ẹdagbọn iẹnlẹn nọnsọle nọn kẹre rebhe rẹ re ẹkẹ-ẹjẹjẹ rẹ ha gbẹloghe ihuan nesi ebeanlẹn ọlẹn nin Jesu, nin ọle rẹ rẹman ghe ọle wo hoẹmhọn ọlẹn.

¹¹ Ene ewanlẹn, bhi ẹghe Ayere ọsi Uyumhin Nọnsi Jesu, be ibha ha rẹ rẹman yẹ ghe, ọta nin Jesu taman Pita wo lu uhọnmhọn emhin rẹji bha? Ibha dẹ rẹman ebi bha manman hoẹmhọn Jehova bi Jesu sẹ yẹ, sade bha re ẹghe ọbhi otọ ẹghe-ẹghe nin bha rẹ ha re izebhudu nin ibhio mhan, yẹ manman dọnmhegbe rẹ rẹkpa ene zẹ Jehova obọ rẹ fikie bu ọle re. (Ezek. 34:11, 12) Bha dẹ yẹ sabọ dọnmhegbe nin bha rẹ rẹkpa ẹbho nin mhan man ele Baibo, bi ẹbho ne vae bhi ọne Ayere bhi ọsi ọhẹnhẹn. Bha dọnmhegbe rẹ gbe ọbokhian nin ele, ranmhude ele dẹ yẹ sabọ dọ kiẹn edibo nesi Jesu.

12. Bezẹle nin ene ọta nin Jesu ta ọne ukpasọn ọkuẹsẹ ọle yu ha da re izebhudu nin mhan sade mhan ria eria nyan ọlẹn? (John 16:32, 33)

¹² Ọne ukpasọn ọkuẹsẹ Jesu yu, ọle da taman edibo nesọle yọle: “Bhi ẹkẹ ọne agbọn nan, ibha  mhọn idobolo. Ọkpakinọn, bha ha mhọn izebhudu! Imẹn khọn ọne agbọn nan miotọ.” (Tie John 16:32, 33.) Be rẹkpa Jesu rẹ re izebhudu man ẹghe nin eghian ọlẹn rẹ ha kpokpo ọle, yẹ sun rẹkhan Jehova sẹbhi ukpẹdẹ uu? Ọle da mun udu nyan Jehova. Ranmhude Jesu lẹnmhin ghe, ẹbho ne rẹkhan ọlẹn dẹ yẹ kuẹlo da ekpokpo nọn sẹ iriọ, ọle da taman Aba ọle nin ọle gbẹloghe ele. (John 17:11) Bezẹle nin ọnan ha da re izebhudu nin mhan? Ranmhude Jehova mhọn ahu gbera oghian mhan nọn hi ki rẹ khin. (1 John 4:4) Ọle daghe emhin rebhe. Mhan rẹọbhọ ghe, mhan ha mun udu nyan Jehova, ọle dẹ rẹkpa mhan rẹ sabọ khọn ofẹn ne mun mhan, yẹ re izebhudu man.

13. Be Josẹf nọn na bhi Arimatia vae rẹ re izebhudu man yẹ?

¹³ Bha ji mhan fẹ ijiẹmhin ọsi Josẹf nọn na bhi Arimatia vae. Ibhokhan iJu wo manman ha mun ekpẹn nanlẹn. Ọle deba ẹbho ne ribhi Sanhẹdrin, nọn yi ikotu ọsi ibhokhan iJu nọn ke okhun nẹ. Ọrẹyiriọ, Josẹf wo re izebhudu man ẹghe nin Jesu rẹ ha lu iwẹnna oga bhi ọne otọ nan. Joni da yọle ghe odibo nọnsi Jesu ọle ha khin. Sokpan, ọle da ha lu ọle bhi ẹkhokho ranmhude ofẹn ibhokhan iJu ne ha mun ọlẹn. (John 19:38) Arẹmiẹn ẹmhọn Agbejele nin Jesu ha wewe wo ti Josẹf bhọ, ọle bha ho nin ẹbho nekẹle lẹn ghe ọle mhọn urẹọbhọ da Jesu. Iriọ a ha da miẹn ọle da ha mun ofẹn ghe, ẹbho ida yẹ ha mun ekpẹn nanlẹn, sade ele lẹn sẹbhọ ghe ọkpa bhi edibo nesi Jesu ọle khin. Ọkpakinọn, Baibo ji mhan lẹn ghe, Jesu ki yu fo, Josẹf “da re izebhudu bu iPilate dọ taman ọlẹn nọn mun ekuegbe nọnsi Jesu nanlẹn.” (Mark 15:42, 43) Bhi ejayenan nian, Josẹf bha yẹ ha yi odibo nọnsi Jesu bhi ẹkhokho.

14. Be ọkhẹke nin uwẹ lu ahamiẹn ofẹn eria mun uwẹ?

¹⁴ Ofẹn eria be sẹ ka mun uwẹ khẹ bọsi Josẹf? Ẹkhọ be lo uwẹ ẹgheso nin uwẹ rẹ taman ẹbho ghe ọkpa bhi Esali Jehova uwẹ khin bhi isiku, la bhi isi iwẹnna? Uwẹ be ha si egbe re ikeke nin uwẹ rẹ deba ha tẹmhọn Osẹnobulua, la nin uwẹ rẹ mianmẹn ranmhude uwẹ a kpokpo egbe ghe, uwẹ bha lẹn ẹlo nin ẹbho ha rẹ ha ghe uwẹ? Hẹi ji emhin ne sẹ inian re uwẹ miẹn ghe uwẹ bha lu emhin nin uwẹ lẹnmhin ghe ele gbale. Re ọkhọle rebhe nan erọnmhọn ji Jehova. Taman ọlẹn nin ọle re ọne izebhudu nin uwẹ rẹ lu iho nọnsọle. Beji uwẹ ha rẹ ha daghe ebi Jehova rẹ ha wanniẹn erọnmhọn nesẹ yẹ, uwẹ ki ha ziẹn ọbhọ, yẹ manman ha mhọn izebhudu.—Isa. 41:10, 13.

15. Ẹghe nin Jesu rẹ zegbere man edibo nesọle fo, be eghọnghọn nin ele ha mhọnlẹn re ele lu? (Luke 24:52, 53)

¹⁵ Ọ da wo manman ba ene edibo bhi egbe ẹghe nin Jesu rẹ yu. Riale uwẹ ribhi idia nin ele  ye. Ọ iyi ọmọẹ nin ele manman hoẹmhọn ọlẹn ọkpa yu. Sokpan, ọ da yẹ dia ele ghe ele iyẹ mhọn iruduba. (Luke 24:17-21) Ọrẹyiriọ, ẹghe nin Jesu rẹ zegbere man ele, ọle da re ẹghe ọbhi otọ rẹ rẹkpa ele lẹn ebi ọle rẹ mun ọta akhasẹ nọn ribhi Baibo sẹ yẹ. Ọle da yẹ mun ẹsọn kpataki nin ele miẹn. (Luke 24:26, 27, 45-48) Beji Jesu ki fikie ha khian okhun fo beji ikpẹdẹ 40 gbera, ene edibo bha yẹ ha lu akhiẹ, sokpan ele da wo manman ha ghọnghọn. Ele da wo manman ha ghọnghọn ranmhude ele lẹnmhin ghe, Jesu nyẹnlẹn, sẹyẹ ọle dẹ rẹkpa ele rẹ miẹn ọne ẹsọn nin ọle mun nin ele miẹn. Eghọnghọn nin ele ha mhọnlẹn da wo re ele situa ha gẹn Jehova.—Tie Luke 24:52, 53; Acts 5:42.

16. Be imhan ha rẹ sabọ re egbe khọkhọ edibo nesi Jesu yẹ?

¹⁶ Be imhan ha rẹ sabọ re egbe khọkhọ edibo nesi Jesu yẹ? Mhan dẹ sabọ ha mhọn eghọnghọn nọn nabhọre sade mhan ga Jehova, ọ iyi bhi ẹghe Ayere ọsi Uyumhin Nọnsi Jesu ọkpa, sokpan rẹ na bhi ọne ukpe rebhe. Ọnan rẹman ghe mhan dẹ mun ẹmhọn Agbejele kalo bhi iẹnlẹn nọnsẹmhan. Bhi ọsi ijiẹmhin, ibhio mhan ne bunbun fi ẹghe nin ele rẹ wẹnna denọ, beji ele ha da sabọ ha dagbare bhi inẹbho, ha yi ikolo oga, yẹ ha lu oga azagba-uwa ẹghe rebhe. Eso bhọ zẹ nin ele hẹi ha khu afe bi ua, nin ẹbho nekẹle ghe bii emhin ne khẹke, beji ele ha da sabọ manman ha rẹkpa bhi agbotu, la dọ rẹkpa bhi eji ibhio mhan bha da manman bun. Arẹmiẹn ọkhẹke nin mhan ha mhọn iziẹngbe beji mhan ha da sabọ ha ga Jehova khian, ọle ve ghe ọle dẹ manman nan erọnmhọn nin mhan ahamiẹn mhan mun ẹmhọn Agbejele kalo bhi iẹnlẹn nọnsẹmhan.—Prov. 10:22; Matt. 6:32, 33.

17. Be uwẹ muegbe nin uwẹ rẹ lu bhi ọne ẹghe Ayere ọsi Uyumhin Nọnsi Jesu nan? (Fẹ ifoto ghe.)

¹⁷ Mhan wo ha khuaẹloghe ẹghe nin mhan ha rẹ lu Ayere ọsi Uyumhin Nọnsi Jesu bhi ẹdẹ Tiuzde Epre 4. Ọrẹyiriọ, hẹi mundia khẹ ẹghenin ọkuẹsẹ uwẹ ria eria nyan iẹnlẹn nọnsi Jesu, uyumhin nọnsọle bi oyẹẹ nin ọle bi Jehova rẹman mhan. Noo isẹhoa nin uwẹ hi ki rẹ miẹn rẹ ria eria nyan ene emhin nan, bhi ọne ẹghe rebhe nan ha rẹ lu ọne Ayere. Bhi ọsi ijiẹmhin, re ẹghe ọbhi otọ nin uwẹ rẹ tie emhin ne sunu nan gbẹn ọbhi Appendix B12 bhi New World Translation nọn yọle: “The Final Week of Jesus’ Life on Earth,” uwẹ ha yẹ ria eria nyan ele. Beji uwẹ ha rẹ ha tie ọle, guanọ ijeso bhi Baibo ne ha ziẹn ọtibhọ nin uwẹ mhọn, oyẹẹ, izebhudu bi eghọnghọn. Bhiriọ, dọnmhegbe rẹ ria ẹmhọn uwedẹ kẹkẹ nin uwẹ ha rẹ sabọ rẹman ghe, emhin nin Jehova bi Jesu lu nin uwẹ ti uwẹ bhọ. Uwẹ dẹ sabọ ha mhọn ọlẹn bhi ọkhọle ghe, emhin rebhe nin uwẹ lu nin uwẹ rẹ ye Jesu re bhi ọne ẹghe Ayere ọsi Uyumhin nọnsọle nan dẹ ti ọle bhọ.—Rev. 2:19.