UHỌNMHỌN-ỌTA NỌNZI 3
ILLO 124 Bha Ji Mhan Ha Mhọn Asun-rẹkhan
Jehova Dẹ Rẹkpa Uwẹ Bhi Ẹghe Ọkakale
“[Jehova] ki mun bha ziẹn.”—1 PITA 5:10.
EBI A HA LUẸ BHỌ
Mhan dẹ zilo nyan ebi mhan ha sabọ lu rẹ miẹn urẹkpa nọnsi Jehova bhi ẹghe ọkakale.
1-2. Ọkakale eso nela eguọmhandia nesi Jehova kuẹlo da?
EMHIN nan bha re ẹlo ọ i ne sunu sabọ wo re osukpa fi iẹnlẹn nọnsẹmhan denọ. Bhi ọsi ijiẹmhin, obhio mhan nin okpea natiọle Luis a da dọ kere ghe ọle mhọn emianmhẹn kansa. Dọkitọ nọnsọle da taman ọlẹn ghe uki eso ọle ki da gbe bhi agbọn. Monika bi ọdọ ọle wo manman re ẹghe nọnsele ha lu iwẹnna oga kugbe. Ẹdọkpa, Monika da dọ lẹn kere ghe ọ reele nin ọdọ ọle nọn yi ọwanlẹn bhi agbotu mọn da do lu emhin ebe bhi ẹkhokho. Ọ da khẹke nin obhio mhan nin okhuo nọn bha sẹ bọ ọdọ natiọle Olivia kpanọ sibhi uwa nọnsọle re ranmhude udede efi nọn vade. Ẹghe nin ọle ki rẹ fikie vae, ọle da kere ghe ọne efi dunmhun ọlẹn uwa a. Osukpa iẹnlẹn ọsi ene ẹbho nan rebhe rẹ wo fidenọ sẹsẹsẹ. Emhin nin uwẹ bha re ẹlo ọ i sẹ ka sunu ji uwẹ khẹ nọn wo re osukpa fi iẹnlẹn nọnsẹ denọ?
2 Eguọmhandia nesi Jehova wo kuẹlo da ọkakale kẹkẹ ne sunu ji ọrebhe, yẹ khọnmhọn emianmhẹn nin ọrebhe ne dan. Asabọmiẹn mhan yẹ wo kuẹlo da ekpokpo bhi obọ eria ne bha hoẹmhọn mhan. Arẹmiẹn Jehova i wo re uwedẹ ọhan-ilo lu ọle nin ọkakale hẹi sẹ mhan bhi egbe, ọle ve ghe ọle dẹ wo ha rẹkpa mhan. (Isa. 41:10) Ranmhude urẹkpa nọnsi Jehova, mhan dẹ sabọ ha ghọnghọn, sabọ zẹ emhin ne mhẹn rẹ lu, yẹ sabọ sun rẹkhan ọlẹn arẹmiẹn mhan ribhi ọkakale nọn bha zẹwẹ lẹkhẹ. Bhi ọne uhọnmhọn-ọta nan, mhan dẹ zilo nyan uwedẹ enẹn nin Jehova rẹ rẹkpa mhan bhi ẹghe ọkakale. Mhan dẹ yẹ zilo nyan ebi mhan ha lu rẹ sabọ miẹn urẹkpa nọn na obọ ọle vae.
JEHOVA DẸ GBEGA UWẸ
3. Ahamiẹn mhan ribhi ẹkẹ ọnọghọ nọn bha lẹkhẹ, be ha sabọ ha nọghọ mhan rẹ lu?
3 Ọnọghọ nọn ribhọ. Ọ i lẹkhẹ nin mhan rẹ sabọ ha ria eria nọnsẹn, la rẹ sabọ zẹ emhin nọn mhẹn rẹ lu sade mhan manman ha kuẹlo da ọkakale. Bezẹle? Ranmhude ọkhọle i sotọ bhi ọne ẹghe nan. Emhin kẹkẹ nin mhan ria bhi ọkhọle sabọ rẹ gbe mhan ahu sotọ. Ọ sabọ rẹ diabe ghe, mhan bha yẹ lẹn ebi mhan lu bhi obọ, la lẹn ebi mhan ha lu yẹ. Bha ji mhan fẹ ebi egbe dia ene ibhio mhan eva nin ikhuo nin mhan ka tẹmhọnlẹn yẹ beji ele ribhi ọkakale. Olivia da yọle: “Beji ọne efi dunmhun mẹn uwa fo, mẹn bha yẹ lẹn ebi mẹn ha lu yẹ, sẹyẹ ahu da wo fo mẹn bhọ.” Monika da ta ọnan rẹji ebi ọdọ ọle lu, ọle da yọle: “Mẹn bha rẹ riale ghe ọdọ mẹn dẹ sabọ lu emhin nọn sẹ iriọ. Ọ da wo diabe ghe a diọ ọghae mẹn bhi udu. Ọ bha yẹ fo mẹn rẹ ha miẹnsọn ọsi ukpẹdẹ-ukpẹdẹ. Mẹn bha rẹ re ẹlo ọbhi emhin nọn sẹ inian.” Be Jehova ve ọle dẹ lu nin mhan sade emhin gbe mhan ahu sotọ?
4. Beji Filipai 4:6, 7 rẹman, be Jehova ve ọle dẹ lu nin mhan?
4 Ebi Jehova rẹ rẹkpa mhan yẹ. Ọle ve ghe ọle dẹ re ebi Baibo tiọle “ọfure nọn na obọ Osẹnobulua vae” nin mhan. (Tie Filipai 4:6, 7.) Ọfure nan tẹmhọnlẹn bhi enan mundia nin ọkhọle nọn lọre nin mhan mhọn, nin mhan rẹ deba Jehova ha mhọn ikolu nọn manman ziẹn. Beji Baibo rẹman, ọria i sabọ lẹn otọ ọne ọfure nan. Ọ gbera emhin nin mhan ha sabọ gene lẹn otọle. Ọ sẹ ka sunu ji uwẹ khẹ ghe, ọkhọle nọnsẹ wo re osukpa lọre beji uwẹ manman nan erọnmhọn ji Jehova fo? Ranmhude Jehova re ‘ọfure nọn na obọ ọle vae’ nin uwẹ zẹle ọnan sunu ji uwẹ.
5. Be ọfure nọn na obọ Osẹnobulua vae rẹ gbega ọkhọle bi iria-eria nọnsẹmhan yẹ?
5 Ọne ulọnlẹn nan bhi Baibo da yẹ yọle ghe, ọfure nọnsi Osẹnobulua “ki gbega ọkhọle nọnsẹbha bi eria nin bha ria.” Ukpọta Grik nan zedu ọle diọbhi “gbega,” a noo ọle rẹ tẹmhọn eyokhọnlẹn ne gbega agbaẹbho beji a ha da miẹn ẹbho bha sabọ mun okhọn nabhọ. Ofẹn i mun ẹbho ne nyẹnlẹn bhi agbaẹbho nọn sẹ inian, ranmhude ele lẹnmhin ghe ene eyokhọnlẹn gbega ele. Iriọ yẹ nọn, ahamiẹn ọfure nọn na obọ Osẹnobulua vae gbega ọkhọle bi iria-eria nọnsẹmhan, mhan i da ha ha-yo-ha-re, ranmhude mhan lẹnmhin ghe mhan mhọn ugbega. (Ps. 4:8) Bọsi Hana, aharẹmiẹn idia nin mhan ye bha wo re osukpa fidenọ, mhan dẹ yẹ sabọ ha mhọn ọfure. (1 Sam. 1:16-18) Ahamiẹn mhan mhọn ọkhọle nọn lọre, ọ ki lẹkhẹ nin mhan rẹ sabọ ha ria eria nọnsẹn, yẹ rẹ sabọ zẹ emhin ne mhẹn rẹ lu.
Wo ha nan erọnmhọn rẹ dọ sẹbhi ẹghe nin “ọfure nọn na obọ Osẹnobulua vae” ha rẹ gbega ọkhọle bi iria eria nọnsẹ (Fẹ uduọle nọnzi 4 rẹ sẹbhi 6 ghe)
6. Be ọkhẹke nin mhan lu nin mhan rẹ sabọ miẹn ọfure nọn na obọ Osẹnobulua vae? (Yẹ fẹ ifoto ghe.)
6 Ebe ọkhẹke nin mhan lu. Ahamiẹn emhin kpokpo mhan bhi ọkhọle, mhan ki bhii Jehova nọn rẹkpa mhan. Mhan wo ha bhii ji ọle rẹ dọ sẹbhi ẹghe nin ọkhọle nọnsẹmhan ha rẹ lọre. (Luk 11:9; 1 Tẹsẹ. 5:17) Luis nin mhan ka tẹmhọnlẹn da tẹmhọn ebe rẹkpa ọle bi okhuo ọle nin Ana rẹ sabọ ziẹngbe, beji a taman ọlẹn ghe uki eso ọle ki da gbe bhi agbọn. Ọle da yọle: “Bhi idia nọn sẹ inian, ọ i zẹwẹ lẹkhẹ nin ọria rẹ sabọ zẹ ebe gbale bhi ẹmhọn uwedẹ nan ha rẹ gbẹloghe ọle, bi bhi ẹmhọn ebhebhe ne dia iriọ. Ọkpakinọn, erọnmhọn hi emhin nọn rẹkpa mhan rẹ sabọ ha mhọn ọfure bhi ọne ẹghe nan nọn bha zẹwẹ lẹkhẹ.” Luis bi okhuo ọle da yọle ghe, ele wo manman bhii ji Jehova igba ne bunbun nọn rẹkpa ele rẹ ha mhọn ọfure bi ọkhọle nọn lọre, bi nọn re ẹwanlẹn nin ele rẹ sabọ zẹ emhin nọn mhẹn rẹ lu. Ele wo gene miẹn urẹkpa nọnsi Jehova bhi egbe. Ahamiẹn uwẹ kuẹlo da ọkakale, manman ha nan erọnmhọn ji Jehova. Bhiriọ, uwẹ ki miẹn ọfure nọn na obọ ọle vae. Ọne ọfure ki gbega ọkhọle bi iria-eria nọnsẹ.—Rom. 12:12.
JEHOVA DẸ MUN UWẸ ZIẸN
7. Be emhin ha sabọ dia mhan yẹ bhi egbe sade mhan ribhi ọkakale?
7 Ọnọghọ nọn ribhọ. Ahamiẹn mhan kuẹlo da ọkakale, ebi emhin dia mhan yẹ bhi egbe, uwedẹ nin mhan rẹ ria eria, bi uwedẹ nin mhan rẹ lu emhin sabọ rẹ wo dikẹ bhi ọnikhẹ. Bhi ọne ẹghe nan, iria-eria kẹkẹ sabọ rẹ wo re osukpa ha na mhan bhi ọkhọle. Ọnan emhin nọn sunu ji Ana nin mhan ka tẹmhọnlẹn beji ọdọ ọle nin Luis yu fo. Ọle da yọle: “Ahamiẹn ahiẹ wo hiẹ mun mẹn, mẹn ki munhẹn ha tohan egbe mẹn. Sẹyẹ, ohu ki wo ha re mẹn ghe ọle yu.” Ẹghe ebhebhe, ọ ki wo dia Ana bhi egbe ghe ọle ọkpa ki khian, sẹyẹ, ohu da ha re ọle beji ọle ki dọ ha mhanmhan emhin nin ọdọ ọle rẹ ka ne ọle ha lu khẹ. Ẹgheso, egbe ki wo dia ọle hẹghẹ ranmhude nin ahu i yẹ rẹ ri ọle bhọ. Bẹ Jehova rẹ rẹkpa mhan yẹ sade egbe i yẹ ri mhan bhọ?
8. Beji 1 Pita 5:10 rẹman, be Jehova yọle ọle dẹ lu nin mhan?
8 Ebi Jehova rẹ rẹkpa mhan yẹ. Ọle ji mhan lẹn ghe ọle dẹ mun mhan ziẹn. (Tie 1 Pita 5:10.) Ahamiẹn efi manman ha fi bhi ẹdẹ, ọ dẹ sabọ re okọ nọn ribhi ẹkẹ ọle ha fi-yo-fi-re. Nin ọne okọ rẹ sabọ nin ọne ahoho hinmhin egbe, emhin ribhọ nan lu bhi obọ veva ọsi okọ ne bunbun, nin ọria nọn gua ọle ha sabọ taan diọbhi ẹkẹ ẹdẹ. Ọne emhin ki rẹkpa ọne okọ beji a ha da miẹn ọ bha yẹ manman ha fi-yo-fi-re. Sẹyẹ, ofẹn i da yẹ manman ha mun ene ribhi ẹkẹ ọle gbe, ranmhude ele lẹnmhin ghe emhin i da sunu ji ele. Ahamiẹn okọ khian diọbhi odalo, ọle ọne emhin nan lu ọbhọ da manman wẹnna nẹ. Iriọ yẹ nọn, Jehova dẹ rẹkpa mhan rẹ sabọ deziẹn sade mhan sẹyẹ dọnmhegbe ha ga ọle aharẹmiẹn mhan ribhi ẹkẹ ọkakale.
Noo ene emhin kẹkẹ nin mhan rẹ luẹ Baibo dinmhin rẹ mun egbe uwẹ ziẹn (Fẹ uduọle nọnzi 8 bi 9 ghe)
9. Be ene emhin kẹkẹ nin mhan rẹ luẹ Baibo dinmhin ha rẹ rẹkpa uwẹ yẹ rẹ sabọ deziẹn? (Yẹ fẹ ifoto ghe.)
9 Ebe ọkhẹke nin mhan lu. Ahamiẹn ọkakale nin uwẹ ye manman re egbe lọ ẹ, dọnmhegbe rẹ ha nan erọnmhọn ji Jehova, ha yo ikolo oga bi inẹbho. Bhi ọsi ẹmhọanta, asabọmiẹn uwẹ i da yẹ sabọ ha lu ene emhin nan beji uwẹ rẹ lu ele khẹ. Ọkpakinọn, yere ghe, Jehova bha yọle nin uwẹ lu gbera beji ahu nọnsẹ sẹ. (Yẹ fẹ Luk 21:1-4 ghe.) Rẹ deba ene emhin nan nin mhan ka tẹmhọnlẹn, re ẹghe ọbhi otọ rẹ tobuwẹ ha luẹ emhin, yẹ ha ria eria nyan ọlẹn. Bezẹle nọn da khẹke nin uwẹ lu iriọ? Ranmhude Jehova noo agbotu nọnsọle rẹ ze ebe bi vidio kẹkẹ egbe dagbare, ne ha rẹkpa mhan rẹ sabọ deziẹn bhi ẹghe ọkakale. Nin uwẹ rẹ miẹn emhin ne ha rẹkpa ẹ, dọ noo emhin ne rẹkpa mhan rẹ luẹ Baibo dinmhin bhi urolo nọnsẹ. Emhin bii JW Library®, Watch Tower Publications Index, bi Research Guide for Jehovah’s Witnesses. Monika nin mhan ka tẹmhọnlẹn da yọle ghe, ahamiẹn ọne emhin nọn sunu gbo ho nọn re ọle ha lu akhiẹ, ọle ki dọ guanọ emhin eso ne ha rẹkpa ọle bhi ene emhin ne rẹkpa mhan rẹ luẹ Baibo dinmhin. Bhi ọsi ijiẹmhin, ọle ki gbẹn ọne ukpọta “ohu” (anger) ọbhi ẹho nan rẹ guanọ emhin bhọ. Ẹghe ọbhebhe, ọle ki gbẹn “ọrẹ” (betrayal) la “asun-rẹkhan” (loyalty) ọbhọ. Ọle ki ha tie ene emhin ne zegbere bhọ ọkuẹsẹ ẹghe nin ọkhọle nọnsọle ha rẹ lọre. Ọle da yọle: “Ọkhọle nọnsẹmhẹn nọn bha rẹ ka sotọ, ki wo dọ dere beji mẹn rẹ tiọle. Ọ ki wo diabe Jehova ko mẹn udu re. Beji mẹn rẹ fẹkẹ re inian tiọle, mẹn da dọ kere ghe, Jehova wo lẹn ebi emhin dia mẹn yẹ, sẹyẹ, ọle wo ha rẹkpa mẹn.” Urẹkpa nọn sẹ inian nọn na obọ Jehova vae, dẹ rẹkpa uwẹ rẹ sabọ deziẹn rẹ dọ sẹbhi ẹghe nin ọkhọle nọnsẹ ha rẹ lọre.—Ps. 119:143, 144.
JEHOVA DẸ RẸKPA UWẸ
10. Be egbe ha sabọ dia mhan yẹ sade emhin nọn manman kaka sunu ji mhan?
10 Ọnọghọ nọn ribhọ. Ahamiẹn emhin nọn manman kaka sunu ji mhan, asabọmiẹn ẹdẹ eso dẹ ha ribhọ nin egbe ha rẹ manman lọ mhan, sẹyẹ, nọn i da rẹ ha ghọn mhan rẹ lu emhin soso. Mhan sabọ rẹ dọ diabe ọrunẹ nọn ka rẹ wo guẹ ebi a rẹ manman runẹ yẹ, nọn ki dọ ha re ukpokpo tẹ ranmhude ghe ọle kuan. Ọ sabọ rẹ dọ ha nyọn mhan bhi egbe rẹ ha miẹnsọn ne i nọghọ mhan rẹ miẹn khẹ, la asabọmiẹn ọ i da yẹ ha ghọn mhan rẹ lu emhin eso ne ka ti mhan bhọ khẹ rẹ lu. Bọsi Ẹlaija, ọ sabọ rẹ dia mhan bhi egbe ghe, ọ i da fo mhan rẹ kpanọ, ghe nin mhan fẹkẹ wo nowẹ. (1 Ki. 19:5-7) Be Jehova ve ghe ọle dẹ lu nin mhan sade egbe lọ mhan?
11. Uwedẹ ọbhebhe nela Jehova rẹ rẹkpa mhan? (Psalm 94:18)
11 Ebi Jehova rẹ rẹkpa mhan yẹ. Ọle vẹ ghe ọle dẹ rẹkpa mhan. (Tie Psalm 94:18.) Beji ọrunẹ nọn kuan rẹ guanọ urẹkpa rẹ sabọ ha khian nẹga, asabọmiẹn ọ dẹ khẹke nin mhan guanọ urẹkpa beji mhan ha da sabọ ha sasa bhi oga. Ghe ebi Jehova guanọ nin mhan lẹn bhi ẹghe nọn sẹ inian, ọle da yọle: “Imẹn nin Jehova nin Osẹnobulua nọnsẹ, imẹn mun uwẹ obọbera mhọnlẹn, Imẹn hi ọnọn taman uwẹ yọle, ‘Hẹi ji ofẹn mun uwẹ.’” (Isa. 41:13) Devid nin Ojie wo miẹn urẹkpa nọn sẹ inian bhi egbe. Ẹghe nin ọle rẹ kuẹlo da ọkakale, sẹyẹ, eghian ọlẹn kpokpo ọle, ọle da taman Jehova yọle: “Obọbera nọnsẹ wo ha rẹkpa mẹn.” (Ps. 18:35) Ọkpakinọn, be Jehova rẹ re ọne urẹkpa nan nin mhan yẹ?
Miẹn urẹkpa ọsi azagba-uwa nọnsẹ, ọsi imọẹ ẹ, bi ọsi ene ewanlẹn ọbhi egbe (Fẹ uduọle nọnzi 11 rẹ sẹbhi 13 ghe)
12. Họla Jehova ha sabọ noo rẹ rẹkpa mhan sade egbe lọ mhan?
12 Ibhio mhan nin mhan ko ga, ele Jehova kẹ noo rẹ rẹkpa mhan. Bhi ọsi ijiẹmhin, ẹghe ọkpa beji egbe lọ Devid, ọmọẹ ọle nin Jonatan da rẹnẹ ji ọle yẹ re izebhudu bi ikoudure nanlẹn. (1 Sam. 23:16, 17) Iriọ Jehova yẹ lu bhi egbe Ẹlaija, ọle da noo Ẹlaisha rẹ re iyobọ nanlẹn. (1 Ki. 19:16, 21; 2 Ki. 2:2) Ẹlẹnan nian, Jehova sabọ rẹ noo ọria bhi azagba-uwa nọnsẹmhan, imọẹ mhan, la ọwanlẹn bhi agbotu rẹ rẹkpa mhan. Ọkpakinọn, ahamiẹn emhin manman gbe mhan ahu sotọ, mhan sabọ rẹ ha ho nin mhan wo ha ribhi ọsẹmhan. Emhin nọn sunu ji ọrebhe khọnan. Ọkpakinọn, be imhan ha lu rẹ sabọ miẹn urẹkpa nọnsi Jehova?
13. Be ọkhẹke nin mhan lu rẹ sabọ miẹn urẹkpa nọnsi Jehova bhi egbe? (Yẹ fẹ ifoto ghe.)
13 Ebe ọkhẹke nin mhan lu. Dọnmhegbe rẹ khọn ọne ọkhọle nin uwẹ rẹ ha siegbe kie bhi eji ẹbho ye. Ahamiẹn mhan siegbe kie bhi eji ẹbho ye, mhan sabọ rẹ dọ ha ria ẹmhọn egbe mhan ọkpa bi ọkakale nin mhan ye. Ọnan sabọ rẹ re mhan zẹ emhin ne bha gba rẹ lu. (Prov. 18:1) Bhi ọsi ẹmhọanta, mhan rebhe guanọ ẹghe nin mhan ha rẹ ha ribhọ ọsẹmhan ẹgheso, manman nọn sade emhin nọn kaka sunu ji mhan. Ọkpakinọn, ahamiẹn mhan dọ ha ribhi ọsẹmhan bhi ẹkẹ ẹghe nọn manman tan, asabọmiẹn mhan i yẹ da miẹn urẹkpa nin Jehova ha noo ẹbho rẹ re nin mhan. Ebi emhin hi ki rẹ nyọn uwẹ bhi egbe sẹ yẹ bhi ẹghe ọkakale, miẹn urẹkpa ọsi azagba-uwa nọnsẹ, ọsi imọẹ ẹ, bi ọsi ene ewanlẹn ọbhi egbe. Ha ghe ele bii uwedẹ nin Jehova rẹ rẹkpa uwẹ.—Prov. 17:17; Isa. 32:1, 2.
JEHOVA DẸ KO UWẸ UDU RE
14. Emhin eso nela ha sabọ re mhan ha mun ofẹn?
14 Ọnọghọ nọn ribhọ. Ẹgheso mhan sabọ rẹ kuẹlo da ọkakale nọn ha wo re ofẹn ha mun mhan. Bhi Baibo, eguọmhandia nesi Osẹnobulua da tẹmhọn ẹghe nin ele rẹ ha ribhi ọkakale, bi ẹghe nin ele rẹ ha guọ ranmhude eghian ele, la ọkakale ebhebhe. (Ps. 18:4; 55:1, 5) Ẹlẹnan nian mhan sabọ rẹ ha kuẹlo da ekpokpo bhi isiku, bhi isi iwẹnna, bhi azagba-uwa nọnsẹmhan, la bhi obọ ene gbẹloghe. Ofẹn bhọ sabọ rẹ ha mun mhan ghe mhan dẹ yu, ranmhude emianmhẹn nin mhan khọnmhọn. Bhi ẹghe nọn sẹ inian, mhan sabọ rẹ dọ diabe obhi ọmọn nọn i sabọ tobọle lu emhin soso. Be Jehova rẹ rẹkpa mhan yẹ bhi ẹghe nọn sẹ inian?
15. Izebhudu nela Psalm 94:19 re nin mhan?
15 Ebi Jehova rẹ rẹkpa mhan yẹ. Ọle re izebhudu nin mhan, yẹ ko mhan udu re. (Tie Psalm 94:19.) Ọne Baibo nan dẹ sabọ re mhan ria ẹmhọn obhokhan nin ofẹn wo ha mun, nọn bha yẹ sabọ wẹ ranmhude uwedẹ nin avan rẹ manman ha de. Mhan re ọkhọle muno ọlẹn ghe, aba ọle bu ọle re, mun ọlẹn ọbhi uke egbe rẹ dọ sẹbhi ẹghe nin owe ha rẹ re ọle. Arẹmiẹn ọne avan yẹ ha de, ofẹn bha yẹ ha mun ọne ọmọn, sẹyẹ ọle bha yẹ ha kpokpo egbe, ranmhude aba ọle mun ọlẹn mhọn. Ahamiẹn mhan ribhi idia nọn re ofẹn ha mun mhan, asabọmiẹn mhan dẹ ha guanọ nin Aba mhan nọn ribhi okhun mun mhan kokore, rẹ dọ sẹbhi ẹghe nin ọkhọle nọnsẹmhan ha rẹ lọre. Be imhan ha rẹ sabọ miẹn ikoudure nọn sẹ inian yẹ bhi obọ Jehova?
Re otọ nin Aba ẹ nọn ribhi okhun rẹ re Baibo ko uwẹ udu re (Fẹ uduọle nọnzi 15 bi 16 ghe)
16. Be imhan ha lu nin mhan rẹ sabọ miẹn ikoudure nọn na obọ Jehova vae? (Yẹ fẹ ifoto ghe.)
16 Ebe ọkhẹke nin mhan lu. Deba Jehova ha gbẹghe ẹghe rebhe. Nin uwẹ rẹ lu ọnan, ha nan erọnmhọn yẹ tie Ọta nọnsọle. (Ps. 77:1, 12-14) Ahamiẹn inian uwẹ lu ẹghe rebhe, emhin ọhẹnhẹn nọn ha vae uwẹ bhi ọkhọle sade uwẹ ribhi ọkakale hi, nin uwẹ rẹ dọ guanọ urẹkpa bhi obọ Aba ẹ nọn ribhi okhun. Taman Jehova emhin ne re ofẹn mun uwẹ bi emhin ne kpokpo uwẹ bhi ọkhọle. Uwẹ ha yẹ re otọ nanlẹn rẹ ko uwẹ udu re beji uwẹ ha rẹ ha tie Ọta nọnsọle. (Ps. 119:28) Uwẹ sabọ rẹ dọ kere ghe ijeso ribhi Baibo nọn ha sabọ manman re ikoudure nin uwẹ sade ofẹn mun uwẹ. Bhi ọsi ijiẹmhin, uwẹ sabọ rẹ miẹn ikoudure bhi ebe ọsi Job, Psalms, Proverbs, bi ẹmhọn nin Jesu tale nan gbẹn ọbhi Matiu uhọnmhọnlẹn nọnzi 6. Beji uwẹ ha rẹ ha nan erọnmhọn ji Jehova yẹ tie Ọta nọnsọle, uwẹ ki miẹn ikoudure nọn na obọ ọle vae.
17. Izebhudu nela mhan ha sabọ ha mhọnlẹn?
17 Mhan dẹ sabọ ha mhọn ọne izebhudu ghe, Jehova dẹ wo ha rẹkpa mhan sade mhan ribhi ọkakale. Ẹghe i ribhọ nin ọle ha rẹ zẹ mhan obọ. (Ps. 23:4; 94:14) Jehova ve ghe ọle dẹ gbega mhan, mun mhan ziẹn, rẹkpa mhan, yẹ ko mhan udu re. Rẹji Jehova, Isaiah 26:3 da yọle: “Uwẹ dẹ gbega ẹbho ne mun udu tẹ uwẹ; uwẹ ki re ọfure nọn ida fo ghee nin ele, ranmhude uwẹ ele mun udu tẹ.” Bhiriọ, mun udu nyan Jehova, uwẹ ha yẹ lu eka nin uwẹ ha sabọ lu rẹ miẹn urẹkpa nọnsọle ọbhi egbe. Uwẹ ha lu iriọ, uwẹ ki sabọ miẹn ahu aharẹmiẹn uwẹ ribhi ẹkẹ ọnọghọ.
BE UWẸ HA RẸ WANNIẸN ENE INỌNTA NAN YẸ?
-
Ẹghela mhan ha rẹ sabọ manman ha guanọ urẹkpa nọnsi Jehova?
-
Uwedẹ enẹn nela Jehova rẹ rẹkpa mhan bhi ẹghe ọkakale?
-
Be imhan ha lu nin mhan rẹ sabọ miẹn urẹkpa nọnsi Jehova?
ILLO 12 Jehova Hi Osẹ Nọn Kpọnọ Nẹ
a Elin ọbhebhe a mun hẹ eso bhọ.