UHỌNMHỌN-ỌTA NỌNZI 4
ILLO 30 Jehova Hi Osẹ Mẹn, Aba Mẹn, bi Ọmọẹ Mẹn
Jehova Wo Hoẹmhọn Uwẹ
“Ọne Aba tobọle hoẹmhọn bha.”—JỌNI 16:27.
EBI A HA LUẸ BHỌ
Ebi oyẹẹ nin Jehova mhọn da mhan ha rẹ re imhan sikẹ ọle, re imhan ha mhọn ogbega, ebi ọ ha rẹ re ọle gbẹloghe mhan, yẹ ko mhan udu re.
1. Be vae bhi ọkhọle nọnsẹ sade uwẹ ria ẹmhọn Jehova?
UWẸ sẹ ka ria ẹmhọn ebi Jehova diayẹ khẹ? Be vae bhi ọkhọle nọnsẹ sade uwẹ nan erọnmhọn ji ọle? Arẹmiẹn a i sabọ daghe Jehova, Baibo khọkhọ ọle bhi uwedẹ kẹkẹ. Baibo da tiọle “ovuẹn bi ugue” bi “eranlẹn nọn ha sabọ tuẹ emhin a sẹsẹsẹ.” (Ps. 84:11; Hib. 12:29) Ẹzikiẹ da tẹmhọn ebi Jehova diayẹ beji ọle daghe ọle bhi ojukhuo nọnsọle bhi imianlo. Ọle da yọle ghe, inian ọle diabe udo natiọle safaya, ẹlọnmhọn nọn wo ha fi wanlan-wanlan, bi ele nọn wo ha gbe-ukpa. (Ezek. 1:26-28) Ene uwedẹ eso nan nan rẹ tẹmhọn Jehova sabọ re imhan manman ha mun ekpẹn nanlẹn, la re imhan ha re egbe nẹ bhi eji ọle ye.
2. Be ha sabọ re ọle ha nọghọ ẹbho eso rẹ sikẹ Jehova?
2 Ranmhude mhan i sabọ daghe Jehova, ọ sabọ rẹ ha nọghọ mhan rẹ rẹọbhọ ghe ọle hoẹmhọn mhan. Ẹbho eso riale ghe Jehova i da sabọ hoẹmhọn ele ranmhude ọkakale kẹkẹ nin ele sẹ miẹn bhi iẹnlẹn. Asabọmiẹn aba ele bha re oyẹẹ man ele. Jehova lẹn ebi emhin nọn sẹ inian dia mhan yẹ bhi egbe, bi ebi ọ rẹ rẹso mhan yẹ. Beji ọ ha da lẹkhẹ nin mhan rẹ sabọ sikẹ ọle, ọle da re Baibo rẹ rẹkpa mhan rẹ lẹn unan ọria nin ọle khin.
3. Bezẹle nọn da khẹke nin mhan luẹ ẹmhọn oyẹẹ nọnsi Jehova?
3 Oyẹẹ, ọle ukpọta nọn re otọle man unan ọria nin Jehova gene khin. Baibo yọle ghe, “Osẹnobulua hi oyẹẹ.” (1 Jọni 4:8) Oyẹẹ re ọle lu emhin rebhe nin ọle lu. Oyẹẹ nọnsi Osẹnobulua manman wo ziẹn, rẹ sẹbhọ ghe Ọle re ọle man eria ne bha hoẹmhọn ọlẹn. (Mat. 5:44, 45) Bhi ọne uhọnmhọn-ọta nan mhan dẹ zilo nyan ẹmhọn Jehova bi oyẹẹ nọnsọle. Beji mhan ha rẹ manman ha luẹ ẹmhọn Jehova, iriọ mhan ha rẹ manman ha hoẹmhọn ọlẹn.
JEHOVA MANMAN HOẸMHỌN MHAN
4. Be oyẹẹ nin Jehova mhọn da mhan dia uwẹ yẹ bhi egbe? (Yẹ fẹ ifoto ghe.)
4 “[Jehova] tobọle hoẹmhọn bha.” (Jọni 16:27) Bhi Baibo, Jehova da re egbe ọle khọkhọ inẹn nọn manman mhọn oyẹẹ. (Isa. 66:12, 13) Ria ẹmhọn inẹn nọn re uwedẹ oyẹẹ rẹ gbẹloghe ọmọn nin ọle mun bhi obọ. Ọle ki re ekpẹn-ekpẹn mun ọlẹn ọbhi uke egbe, yẹ re uru nọn lọre rẹ fẹkẹ ha nanlẹn talọ. Ahamiẹn ọne ọmọn viẹ la mhọn eji ba ọle, ọle ki dọnmhegbe re ebi ọle guanọ nanlẹn. Ahamiẹn mhan ribhi ọbalọ, mhan dẹ sabọ ha mhọn ọne izebhudu ghe Jehova dẹ re oyẹẹ man mhan. Ọkpa bhi eria ne gbẹn ebe ọsi Psalm da yọle: “Ẹghe nin ahu rẹ ha fo mẹn bhọ ranmhude ikpokpo-egbe, uwẹ da re izebhudu nin mẹn yẹ ko mẹn udu re.”—Ps. 94:19.
“Beji inẹn rẹ ko ọmọn nọnsọle udu re, iriọ mẹn ha rẹ ha ko bha udu re” (Fẹ uduọle nọnzi 4 ghe)
5. Be ahoẹmhọn-egbe nọn i beghe nin Jehova mhọn ha re ọle lu nin uwẹ?
5 Ahoẹmhọn-egbe nin Jehova mhọn i beghe. (Ps. 103:8) Ọle i fikeke gbe mhan sade mhan lu emhin nọn bha gba. Ibhokhan Izrẹl wo fikeke gbe Jehova igba ne bunbun. Ọkpakinọn, ele ha kiọya ọbhi emhin ọbe nin ele lu, yẹ zobọ bhọ rẹ ha lu ọle, ọle ki gbo re oyẹẹ nọn i beghe nọnsọle man ele. Bhi ọsi ijiẹmhin, ọle da taman ele ghe: “Ranmhude uwẹ wo ghan bhi ẹlo mẹn, a da mun ekpẹn uwẹ bhi egbe. Mẹn wo hoẹmhọn uwẹ.” (Isa. 43:4, 5) Osẹnobulua yẹ wo mhọn unan oyẹẹ nọn sẹ inian da mhan ẹlẹnan. Mhan dẹ sabọ ha mhọnlẹn bhi ọkhọle ghe, ọle dẹ wo ha re ọne oyẹẹ nan man mhan. Jehova i fikeke gbe mhan aharẹmiẹn mhan lu emhin ebe nọn manman kaka. Mhan ha fidenọ yẹ fikie bu ọle re, mhan ki kere ghe ọle sẹyẹ wo hoẹmhọn mhan. Ọle ve ghe, ọle dẹ ‘re ọkhọle rebhe rẹ rẹhunmhan mhan.’ (Isa. 55:7) Baibo yọle ghe Jehova ha rẹhunmhan mhan, egbe ki fu mhan re.—Iwẹnna 3:19.
6. Be Zechariah 2:8 man mhan le rẹji Jehova?
6 Tie Zechariah 2:8. Ranmhude Jehova hoẹmhọn mhan, ebi emhin dia mhan yẹ bhi egbe rẹtẹ ọle, sẹyẹ ọle muegbe nin ọle rẹ gbega mhan. Ọ ba ọle bhi egbe sade mhan ribhi ọkakale. Ranmhude ọnan, mhan dẹ sabọ taman ọlẹn bhi erọnmhọn yọle: “Gbega mẹn beji uwẹ ha rẹ gbega omẹn-ẹlo nọnsẹ.” (Ps. 17:8) Emhin nin mhan i zẹwẹ rẹ khiẹn hiehie, ọle ẹlo khin. Bhiriọ, nin Jehova rẹ re imhan khọkhọ omẹn-ẹlo nọnsọle, inian ọ diabe ọle yọle, ‘Ọnọn hi ki rẹ khin nọn re obọ so bha, ibha nin ẹbho nesẹmhẹn, re obọ so emhin nọn manman lu uhọnmhọn emhin rẹji mẹn.’
7. Be ọkhẹke nin mhan lu beji mhan ha da sabọ rẹọbhọ ghe Jehova hoẹmhọn mhan?
7 Jehova guanọ nin uwẹ lẹn ghe ọle hoẹmhọn uwẹ. Ọkpakinọn, ọle lẹnmhin ghe emhin nin mhan sẹ miẹn bhi iẹnlẹn dẹ sabọ re imhan ha riale si ọle dẹ gene sabọ hoẹmhọn mhan. La, asabọmiẹn mhan kuẹlo da ọkakale nian nọn re imhan ha mhọn edandan si Jehova gene hoẹmhọn mhan. Be ha rẹkpa mhan rẹ sabọ rẹọbhọ ghe Osẹnobulua hoẹmhọn mhan? Ọle hi, nin mhan rẹ luẹ ẹmhọn ebi Jehova rẹ re oyẹẹ man Jesu, enanzẹle, bi mhan rebhe yẹ.
EBI JEHOVA RẸ RE OYẸẸ NỌNSỌLE MAN YẸ
8. Be re Jesu rẹọbhọ ghe Aba ọle hoẹmhọn ọlẹn?
8 Jehova bi Jesu sẹ ko gbe ẹghe kugbe nẹ bhi ọne agbọn nan. Bhi ene ikpe ne bunbun nin ele gbe kugbe, ele da dọ manman sikẹ egbe, yẹ ha mhọn oyẹẹ nọn dinmhin da egbe. Beji Matiu 17:5 rẹman, Jehova wo tale dagbare ghe ọle hoẹmhọn Jesu. Ọle ha rẹ wo sabọ yọle, ‘Ọnan hi ọne mẹn re obọ nan.’ Ọkpakinọn, ọle da ha ho nin mhan lẹn ebi ọle hoẹmhọn Jesu sẹ yẹ, bhiriọ, ọle da yọle, “Ọmọn nọnsẹmhẹn khọnan nin imẹn hoẹmhọnlẹn.” Ẹmhọn Jesu wo manman ha ti Jehova bhọ, manman nọn nin ọle rẹ ka nin ọle rẹ re iẹnlẹn nọnsọle zọese nin eria. (Ẹfẹ. 1:7) Jesu bha ha mhọn edandan si Aba ọle gene hoẹmhọn ọlẹn. Ọle da re izebhudu rẹ tale igba ne bunbun ghe, Aba ọle hoẹmhọn ọlẹn.—Jọni 3:35; 10:17; 17:24.
9. Be Jehova rẹ rẹman yẹ ghe ọle hoẹmhọn enanzẹle? Re otọle man. (Rom 5:5)
9 Jehova yẹ wo ji enanzẹle lẹn ghe ọle hoẹmhọn ele. (Tie Rom 5:5.) Ebi ọne ulọnlẹn nan ha tẹmhọnlẹn bhi urolo nan rẹ gbẹn Baibo tee hi, oyẹẹ nin Jehova mhọn da enanzẹle wo manman ziẹn. A bhọ dẹ sabọ re ọne oyẹẹ rẹ khọkhọ ẹdẹ nọn wo ha nẹ. Ọnan wo rẹman ebi Jehova hoẹmhọn enanzẹle sẹ yẹ. Enanzẹle lẹn sẹbhọ ghe Osẹnobulua hoẹmhọn ele. (Jud 1) Jọni nin odibo da rẹman ebi ọne oyẹẹ nan dia ele bhi egbe yẹ, ẹghe nin ọle rẹ gbẹn yọle: “Sẹ ghe ebi ọne Aba rẹ hoẹmhọn mhan yẹ! Ọle da lu ọle nan ha tie mhan imọn nesọle.” (1 Jọni 3:1) Enanzẹle ọkpa Jehova be hoẹmhọnlẹn? Eye, Jehova sẹ wo rẹman ghe ọle hoẹmhọn mhan rebhe.
10. Emhin nela ke okhun nẹ nin Jehova lu rẹ rẹman ghe ọle hoẹmhọn uwẹ?
10 Uwedẹ nela ke okhun nẹ nin Jehova rẹ rẹman ghe ọle hoẹmhọn mhan? Ọle hi, nin ọle rẹ je Jesu re nin ọle dọ yu nin mhan. Ọnan hi uwedẹ nọn ke okhun nẹ nan sẹ rẹ re oyẹẹ man bhi ọne agbọn nan. (Jọni 3:16; Rom. 5:8) Jehova da ka nin Ọmọn nọnsọle nin ọle manman hoẹmhọnlẹn rẹ dọ yu nin eria, beji ọle ha da sabọ re emhin ebe nọnsele rẹhunmhan ele, yẹ re ọne isẹhoa nin ele rẹ dọ kiẹn imọẹ ọle. (1 Jọni 4:10) Beji mhan ha rẹ manman ha ria eria nyan ebi ọ re Jehova bi Jesu le rẹ miẹn mhan fan, iriọ mhan ha rẹ manman dọ lẹn otọ ebi ele hoẹmhọn ọdeọde bhi ẹwẹ mhan sẹ yẹ. (Gal. 2:20) Ọ i yi nin Jehova rẹ rẹman ghe ọle bhuohiẹn bhi uwedẹ nọn gbale zẹle nin ọle da ji Jesu dọ yu nin mhan, sokpan oyẹẹ re Ọle lu ọle. Nin Jehova rẹ re Ọmọn nọnsọle nin ọle manman hoẹmhọnlẹn rẹ zọese nin mhan, ọ rẹman ghe ọle hoẹmhọn mhan. Jehova da ka nin Jesu rẹ loya yẹ yu nin mhan.
11. Be imhan miẹn luẹ bhi Jeremiah 31:3?
11 Beji mhan sẹ zilo ọle, mhan dọ kere ghe, Jehova i gheghe mhọn oyẹẹ da mhan, sokpan ọle re ọle man. (Tie Jeremiah 31:3.) Ranmhude Jehova hoẹmhọn mhan zẹle nin ọle da si mhan kẹ egbe. (Fẹ Deuteronomy 7:7, 8 ghe.) Emhin soso, la ọria soso i ribhọ nọn ha sabọ ne mhan sibhi ọne oyẹẹ nan re. (Rom. 8:38, 39) Be ọne oyẹẹ nan dia uwẹ yẹ bhi egbe? Tie Psalm 23 nin uwẹ daghe ebi oyẹẹ nin Jehova ha mhọn da Devid dia ọle bhi egbe yẹ, bi ebi ọ ha sabọ dia mhan rebhe bhi egbe yẹ.
BE OYẸẸ NIN JEHOVA MHỌN DA UWẸ DIA UWẸ BHI EGBE YẸ?
12. Be imhan ha sabọ yọle Psalm 23 guanọ nin mhan lẹn?
12 Tie Psalm 23:1-6. Bhi Psalm 23, Devid da tẹmhọn emhin ne re ọle rẹọbhọ ghe Jehova hoẹmhọn ọlẹn, sẹyẹ Ọle gbẹloghe ọle. Ọle da yẹ tẹmhọn ikolu nọn ziẹn nin ọle bi Ọnọn Sun Ọlẹn nin Jehova ko mhọn. Devid da ha mhọn ugbega nin ọle rẹ ji Jehova da ha dia ọle, bi nin ọle rẹ re ọkhọle rebhe mun udu nyan ọlẹn. Devid lẹnmhin ghe Jehova dẹ wo ha re oyẹẹ man ọlẹn bhi ẹdagbọn iẹnlẹn nọnsọle rebhe. Be re ọle ha mhọn izebhudu nọn sẹ inian?
13. Be re Devid rẹọbhọ ghe Jehova dẹ wo ha gbẹloghe ọle?
13 “A ida miẹn mẹn bha miẹn ebi mẹn guanọ.” Ranmhude Jehova wo ha ne emhin rebhe nin Devid guanọ nanlẹn, ọle da miẹn emhin rẹ ha gbẹloghe egbe. Devid yẹ lẹn sẹbhọ ghe, Jehova wo re ẹlo esili ha ghe ọle, sẹyẹ imọẹ ele ko khin. Ọnin zẹle nin ọle da ha mhọn ọne izebhudu ghe, ebe hi ki rẹ sunu bhi ẹghe odalo, Jehova dẹ wo ha gbẹloghe ọle. Ranmhude Devid rẹọbhọ ghe Jehova hoẹmhọn ọlẹn, sẹyẹ ọle dẹ ha ne ebe ọle guanọ nanlẹn, ọle bha dọ ha kpokpo egbe. Ọle da ha ghọnghọn yẹ ji emhin nin ọle mhọn khọn ọlẹn.—Ps. 16:11.
14. Sounun bhi ijiẹmhin ọsi ebi Jehova ha rẹ sabọ re uwedẹ oyẹẹ gbẹloghe mhan yẹ.
14 Jehova wo gbẹloghe mhan, manman nọn sade ọkakale sunu ji mhan bhi iẹnlẹn. Obhio mhan natiọle Claire a nọn sẹ ga bhi Bẹtẹ bhi ebe gbera ikpe 20 bha lẹn ebi ọle ha rẹ rẹkpa azagba-uwa nọnsọle yẹ beji ọkakale kẹkẹ wo ha sunu ji ele. Aba ọle da ha khọnmhọn emianmhẹn stroke, a da khu obhio ọle nin okhuo bhi agbotu, obhi ẹki nin azagba-uwa nọnsọle rẹ ha lu bha yẹ ha do, sẹyẹ ele bha yẹ ha mhọn uwa. Be Jehova rẹ re oyẹẹ man ele yẹ, yẹ gbẹloghe ele? Claire da yọle: “Jehova wo gbẹloghe azagba-uwa nọnsẹmhẹn. Ukpẹdẹ bha ha ribhọ nin ọle bha rẹ re ebale ọsi ukpẹdẹ nin ele. Igba ne bunbun, uwedẹ nin Jehova rẹ gbẹloghe ele bhọ gbera beji mẹn rẹ ha mhọn bhi ọkhọle! Mẹn wo ria eria nyan ebi Jehova rẹ rẹkpa mhan yẹ, sẹyẹ, mẹn i da yelea ghẹdẹ ebi ọle rẹ re oyẹẹ man mhan yẹ. Uwedẹ nin Jehova rẹ rẹkpa mhan bhi ọne ẹghe nan wo rẹkpa mẹn rẹ re eghọnghọn ha ga Jehova khian aharẹmiẹn mẹn ribhi ọkakale.”
15. Be re egbe fu Devid re? (Yẹ fẹ ifoto ghe.)
15 “Ọle re ọfubhegbe nin mẹn.” Egbe wo lọ Devid ẹgheso ranmhude ene ọkakale bi ọnọghọ nin ọle ha kuẹlo da. (Ps. 18:4-6) Ọrẹyiriọ, egbe da wo fu ọle re ranmhude uwedẹ nin Jehova rẹ ha re oyẹẹ man ọlẹn, yẹ gbẹloghe ọle. Jehova da dia Devid nin ọmọẹ ọle nin ahu fo ọle bhọ diọbhi “eji ilumhun nọn fu bhi egbe ye” bi “eji a da manman miẹn amẹn.” Ranmhude ọnan Devid da miẹn ahu yẹ sabọ re eghọnghọn ha ga Jehova khian.—Ps. 18:28-32.
Oyẹẹ nin Jehova mhọn da Devid bi uwedẹ nin ọle rẹ gbẹloghe ọle da re egbe fu ọle re, arẹmiẹn ọle ribhi ọkakale (Fẹ uduọle nọnzi 15 ghe)
16. Be oyẹẹ ọsi Jehova sẹ rẹ re egbe fu uwẹ re yẹ?
16 Ẹlẹnan nian sẹyẹ, “ahoẹmhọn-egbe nọn ibeghe nọnsi Jehova zẹle nin mhan bha sẹ da fuẹn an” beji mhan rẹ kuẹlo da ọkakale. (Lam. 3:22; Kol. 1:11) Bha ji mhan fẹ ijiẹmhin ọsi obhio mhan nin Rachel ghe. Ahu da wo fo ọle bhọ beji ọdọ ọle zẹ ọle bi Jehova obọ bhi ẹghe emianmhẹn KOVID-19. Be Jehova lu rẹ rẹkpa ọle? Rachel da yọle: “Jehova da wo lu ọle nin ẹbho ha re oyẹẹ man mẹn. Ọle da ne imọẹ nin mẹn ne wo deba mẹn ha gbẹghe, ha muno ebale ji mẹn, ha gbẹn ebe ji mẹn, yẹ re Baibo ko mẹn udu re. Ene imọẹ mẹn nan da wo re mẹn ha ghọnghọn, yẹ ye mẹn re ghe Jehova wo ha gbẹloghe mẹn. Ẹghe rebhe mẹn rẹ khuẹnmhẹn Jehova nin ọle rẹ re udede azagba-uwa ne re inian re oyẹẹ man nin mẹn.”
17. Bezẹle nin “ofẹn emhin soso” bha da ha mun Devid?
17 “Ofẹn emhin soso imun mẹn, ranmhude uwẹ ne mẹn dia.” Ẹghe rebhe iẹnlẹn ọsi Devid rẹ ha ribhi okhẹnan, sẹyẹ ọle wo ha mhọn eghian ne manman mhọn ahu. Ọrẹyiriọ, oyẹẹ nin Jehova mhọn da ọle da re ọle ha mhọn ogbaga. Devid da dọ lẹn sẹbhọ ghe Jehova wo ne ọle dia bhi idia nọn ki rẹ khin nin ọle ye. Ọnan da re izebhudu nanlẹn. Bhiriọ, ọle da sabọ yọle: “[Jehova] hinmhin mẹn bhi emhin rebhe ne ha re ofẹn mun mẹn.” (Ps. 34:4) Arẹmiẹn emhin gene ribhọ ne re ofẹn ha mun Devid, ọle da sabọ khọn ele ranmhude ọle lẹnmhin ghe Jehova hoẹmhọn ọlẹn.
18. Nin uwẹ rẹ lẹn ghe Jehova hoẹmhọn uwẹ, be ọ ha rẹ rẹkpa uwẹ yẹ sade emhin re ofẹn mun uwẹ?
18 Nin mhan rẹ lẹn ghe Jehova hoẹmhọn mhan, be ọ rẹ rẹkpa mhan yẹ sade mhan ribhi ọkakale nọn re ofẹn ha mun mhan? Obhio mhan natiọle Susi nọn lu iwẹnna ọkanẹfan da tẹmhọn ebi egbe dia ọle bi ọdọ yẹ, ẹghe nin ọmọn okpea nọnsele rẹ tobọle gbe egbe a. Ọle da yọle: “Emhin ọhanabẹ nọn sẹ inian da sunu ji ọria bhi iẹnlẹn, ọ manman wo rẹso ọne ọria. Ofẹn ki ha mun uwẹ ghe ọkakale ebhebhe dẹ yẹ sunu. Ọkpakinọn, oyẹẹ nọnsi Jehova wo rẹkpa mhan rẹ ha mhọn ogbaga.” Rachel nin mhan ka tẹmhọn ọlẹn da yọle: “Asọn ọkpa beji mẹn wo manman ha lu akhiẹ, ha kpokpo egbe yẹ mun ofẹn, mẹn da wo viẹ bu Jehova bhi erọnmhọn. Uwedẹ nin egbe mẹn rẹ wo lọre beji mẹn rẹ nan ọne erọnmhọn da rẹkpa mẹn rẹ lẹn ghe Jehova ko mẹn udu re, yẹ mun mẹn ziẹn beji inẹn lu da ọmọn nọnsọle. Bhiriọ, owe da re mẹn. Mẹn i da ye ọne ẹghe nan ghẹdẹ.” Obhio mhan natiọle Tasos nọn yi ọwanlẹn bhi agbotu, da gbe ikpe enẹn bhi ighan ranmhude nin ọle bha rẹ ka deba eyokhọnlẹn. Be Jehova rẹ re oyẹẹ man ọlẹn yẹ, yẹ gbẹloghe ọle? Ọle da yọle: “Jehova da ne ebi mẹn ha rẹ ha gbẹloghe egbe nin mẹn gbera beji mẹn rẹ ha mhọn bhi ọkhọle. Ọnan da rẹkpa mẹn rẹ rẹọbhọ ghe mẹn dẹ sabọ re ọkhọ rebhe mun udu nyan ọlẹn. Sẹyẹ, Jehova da re ẹlinmhin nọn khiale nọnsọle rẹ rẹkpa mẹn rẹ sabọ ha ghọnghọn arẹmiẹn emhin bha lẹkhẹ bhi ighan. Ọnan da rẹkpa mẹn rẹ lẹn ghe beji mẹn ha rẹ manman ha sikẹ Jehova, iriọ mẹn ha rẹ manman ha miẹn oyẹẹ nọnsọle bhi egbe. Bhiriọ, mẹn da munhẹn ha lu ọkanẹfan ọsi ẹghe rebhe beji mẹn yẹ ribhi ighan.”
WO HA SIKẸ OSẸNOBULUA NỌNSẸ NIN OSẸ ỌSI OYẸẸ
19. (a) Nin mhan rẹ lẹn ghe Osẹnobulua hoẹmhọn mhan, be ọ ha rẹ sabọ rẹso emhin nin mhan bhii bhi erọnmhọn yẹ? (b) Ọnela rẹso uwẹ nẹ bhi ene uwedẹ nan rẹ tẹmhọn oyẹẹ nọnsi Jehova? (Fẹ ọne ẹkpẹti ghe nọn yọle “ Ẹmhọn Ne Rẹkpa Mhan Rẹ Lẹn Ebi Oyẹẹ Nọnsi Jehova Ziẹn Sẹ Yẹ.”)
19 Ene isẹlobhemhin kẹkẹ nin mhan zilo ọle bhi ọne uhọnmhọn-ọta nan rẹman ghe, Jehova nin “Osẹnobulua ọsi oyẹẹ ri mhan bhi ikeke! (2 Kọr. 13:11) Ẹmhọn ọdeọde bhi ẹwẹ mhan rẹtẹ ọle. Mhan rẹọbhọ ghe ọle dẹ wo ha re ahoẹmhọn-egbe nọn i beghe nọnsọle man mhan. (Ps. 32:10) Beji mhan ha rẹ manman ha ria eria nyan ebi Jehova sẹ rẹ re oyẹẹ man mhan yẹ, mhan ki wo dọ manman daghe ọle ghe, ọle gbẹloghe mhan, ọnan ki re imhan ha sikẹ ọle. Mhan dẹ sabọ bu ọle bhi erọnmhọn, yẹ taman ọlẹn ebi mhan rẹ guanọ oyẹẹ nọnsọle bhi egbe yẹ. Mhan dẹ sabọ taman ọlẹn emhin rebhe ne kpokpo mhan bhi ọkhọle, yẹ ha mhọn ọne izebhudu ghe, ọle lẹn ebi emhin dia mhan yẹ, sẹyẹ ọle muegbe nin ọle rẹ rẹkpa mhan.—Ps. 145:18, 19.
20. Be oyẹẹ nin Jehova mhọnlẹn rẹ re imhan sikẹ ọle yẹ?
20 Beji ọ rẹ yẹẹ mhan rẹ ha gha eranlẹn sade ulinlin fi, iriọ ọ rẹ yẹẹ mhan rẹ ha sikẹ Jehova ranmhude oyẹẹ nọnsọle. Oyẹẹ nọnsi Jehova wo manman ziẹn, iriọ ọ yẹ rẹ fu bhi egbe. Bhiriọ, miẹn oyẹẹ nọnsi Jehova ọbhi egbe. Ji ọne oyẹẹ re uwẹ taman ọlẹn yọle, Jehova, “mẹn hoẹmhọn [uwẹ]”!—Ps. 116:1.
BE UWẸ HA RẸ WANNIẸN ENE INỌNTA NAN YẸ?
-
Be uwẹ ha rẹ tẹmhọn oyẹẹ nọnsi Jehova yẹ?
-
Bezẹle nin uwẹ ha da sabọ rẹọbhọ ghe Jehova manman hoẹmhọn uwẹ?
-
Be oyẹẹ nọnsi Jehova dia uwẹ bhi egbe yẹ?
ILLO 108 Oyẹẹ Nin Osẹnobulua Mhọn Da Mhan
a Elin ọbhebhe a mun hẹ eso bhọ