ỌNE ukpọta nan zedu ọle diọbhi “awẹnẹwẹnẹ” bhi New World Translation dẹ sabọ mundia nin unan awẹnẹwẹnẹ kẹkẹ. (Iwẹnna 8:28, 29, 38) Ọkpakinọn, ọ diabe awẹnẹwẹnẹ nin ọne obhokhan Ẹtiopia na ọi kpọnọ nẹ ọne a rẹ yo okhọnlẹn, la ọne a rẹ gbe igemu. Bha ji mhan fẹ emhin eso ghe ne re imhan ta iriọ.

Ihe nọn khua ọne okpea nan ye, sẹyẹ ọne okhian nin ọle yo wo manman ree. “Ihe nọn khua ọne okpea nan [ha] ye bhi eguare ọsi Kandesi nin esọn ọsi Ẹtiopia. Ọle hi ọnọn gbẹloghe afe bi ua ọsi ọne esọn.” (Iwẹnna 8:27) Agbaẹbho ọsi Sudan, bi obọ ọsi saot bhi agbaẹbho ọsi Egypt nian, ka rẹ deba agbaẹbho ọsi Ẹtiopia bhi ẹghe ẹdẹlẹ. Asabọmiẹn ọ i yi awẹnẹwẹne ukpọkpa ọne okpea noo bhi ọne okhian nan. Sẹyẹ asabọmiẹn, ọle dẹ ne emhin eso rẹkhan egbe ranmhude ọne okhian wo manman ree. Ọkpa bhi awẹnẹwẹnẹ nan ha noo rẹ muno ẹbho bhi ẹghe ẹdẹlẹ hi, ọnọn mhọn iwili enẹn nan rẹ muno ihẹ. Ebe ọkpa nọn zilo nyan ebe ọsi Iwẹnna da yọle: “Awẹnẹwẹnẹ nọn sẹ inian wo gene ji a rẹ mun ihẹ ne bunbun, ọ re okhian fu bhi egbe, sẹyẹ, ọ re ọle lẹkhẹ nin ẹbho rẹ yo okhian non manman ree.”

Ebe ọne okpea nọn na bhi Ẹtiopia vae ha tie beji Filip bu ọle re. Beji Baibo rẹman, “Filip da runẹ ke ọne awẹnẹwẹnẹ re, ọle da họn ghe ọne okpea tie ebe ọsi Ẹzaya nin akhasẹ.” (Iwẹnna 8:30) Udede awẹnẹwẹnẹ nan rẹ yo okhian imanman sabọ runẹ. Ranmhude uwedẹ nọn rẹ fẹkẹ khian zẹle nin ọne okpea da sabọ ha tie ebe bhi ẹkẹ ọle. Ọle yẹ zẹ nin Filip da sabọ re oẹ khu ọle kere.

Ọne okpea “da taman Filip nọn nabhi ẹkẹ ọne awẹnẹwẹnẹ.” (Iwẹnna 8:31) Ọria i dotua sade ọle noo awẹnẹwẹnẹ nan rẹ gbe igemu, sokpan mundia ọle mundia. Ọkpakinọn, ọnan rẹ yo okhian mhọn eji ọria sabọ dotua i. Ọnan zẹle nin Filip bi ọne okpea da miẹn eji ele da dotua.

Ranmhude ebi ebe ọsi Iwẹnna uhọnmhọnlẹn nọnzi 8 rẹkpa mhan rẹ lẹn, bi ebi emhin kẹkẹ nan gua otọle kere rẹman, udede awẹnẹwẹnẹ nọn dikẹ bhi ọne a rẹ gbe igemu, la ọnan noo rẹ yo okhọnlẹn, ọle a ki drọ ọbhi ebe nesẹmhan nian nin ọne okpea ha hẹn.