1. Be imhan ha lu rẹ re Jehova ha ghọnghọn?

 JI A man yọle ghe uwẹ re emhin nọn mhẹn an, nọn mhọn-ose rẹ lu ẹsele nin ọria nọnsẹ. Ọ dẹ wo manman ba uwẹ bhi egbe sade ọne ọria khue ọne emhin ọbhi ẹkpẹti, ọle bha noo ọle. Ọkpakinọn, ahamiẹn ọne ọria khuẹnmhẹn uwẹ, yẹ munhẹn ha noo ọne emhin nin uwẹ rẹ lu ẹsele nanlẹn, ọ dẹ wo re uwẹ ha ghọnghọn. Be bhọ mhan tẹmhọnlẹn? Jehova da re Ọmọn nọnsọle rẹ zọese nin mhan ranmhude ọle hoẹmhọn mhan. Ọ dẹ wo re ọle ha ghọnghọn sade mhan rẹman ghe, ẹsele nin ọle lu nin mhan bi oyẹẹ nin ọle mhọn da mhan ti mhan bhọ.—Jọni 3:16; Rom 5:​7, 8. 

 2. Be imhan ha zilo nyan bhi ọne uhọnmhọn-ọta nan?

² Beji ẹghe ha rẹ ha gbera, asabọmiẹn ọne izọese i yẹ da ha ti mhan bhọ bii ọnikhẹ. Ọnan ha sunu, ọ ki diabe ghe mhan khue ọne ẹsele nọn mhẹn an nin Osẹnobulua re nin mhan ọbhi ẹkẹ ẹkpẹti, bọsi ghe mhan bha yẹ họ nin mhan daghe ọle, la ha ria ẹmhọnlẹn. Beji a ha da miẹn emhin nọn sẹ inian bha sunu, ọkhẹke nin mhan wo ha ria ẹmhọn ẹsele nin Osẹnobulua bi Jesu lu nin mhan. Ọne uhọnmhọn-ọta nan dẹ rẹkpa mhan rẹ lu iriọ. Mhan dẹ tẹmhọn elele nin mhan miẹn bhi ọne izọese nian, bi elele nin mhan ha miẹn bhọ bhi ẹghe odalo. Mhan dẹ yẹ luẹ ebi mhan ha rẹ rẹman yẹ ghe, oyẹẹ nin Jehova mhọn da mhan ti mhan bhọ, manman nọn bhi ọne ẹghe Ayere Ọsi Uyumhin Nọnsi Jesu nan.

ELELE NIN MHAN MIẸN BHI IZỌESE ỌSI JESU NIAN

 3. Uwedẹ ọkpa nela mhan rẹ miẹn elele bhi izọese nọnsi Jesu nian?

³ Mhan wo ha miẹn elele bhi izọese ọsi Jesu fo. Bhi ọsi ijiẹmhin,  ranmhude izọese nọnsi Jesu zẹle nin Jehova da re olukhọ nọnsẹmhan bọ mhan. Arẹmiẹn ọ i yi oko ghe Osẹnobulua dẹ rẹhunmhan mhan, ọle wo muegbe nin ọle rẹ lu iriọ. Ọria ọkpa nọn gbẹn ebe ọsi Psalm da gẹn Jehova, ranmhude uwedẹ nin Jehova rẹ rẹhunmhan. Ọle da yọle: “Ranmhude uwẹ nin Jehova, uwẹ mhẹnmhin. Uwẹ yẹ muegbe nin uwẹ rẹ rẹhunmhan.”—Ps. 86:5; 103:​3, 10-13.

 4. Hela Jehova re Jesu zọ ese nan? (Luk 5:32; 1 Timoti 1:15)

⁴ Ẹbho eso sabọ rẹ ha riale ghe, ele bha sẹ ọria nin Jehova ha re olukhọ nọnsele rẹhunmhan. Ẹmhọanta nọn ghe, imhan soso bha sẹ ọria nin Jehova ha rẹhunmhan. Pọl nin odibo bhọ da yọle ghe, ọle bha “sẹ ọria nan ha ka ba ene etuegbe.” Ọrẹyiriọ, ọle da yọle: “Ifuẹkẹ nọn khua nin Osẹnobulua mhọn da mẹn, ọle zẹle nin mẹn da yi ebi mẹn khin ẹlẹnan.” (1 Kọr. 15:​9, 10) Mhan ha fidenọ, Jehova ki rẹbọ mhan. Bezẹle? Ranmhude ọle hoẹmhọn mhan, ọ i yi ranmhude mhan sẹ eria nin ọle ha rẹhunmhan. Ahamiẹn ghe ọkhọle nọnsẹ gbe uwẹ asan, ranmhude uwẹ riale ghe Jehova i da sabọ rẹhunmhan olukhọ nọnsẹ, yere ghe ọ i yi ranmhude eria ne khiale zẹle nin Jehova da je Jesu re nọn dọ yu nin mhan. Sokpan, ranmhude eria ne lu emhin ebe zẹle nin ọle da lu iriọ—eria ne kiọya ọbhi olukhọ nọnsele yẹ fidenọ.—Tie Luk 5:32; 1 Timoti 1:15.

 5. Oko be nọn ghe Jehova dẹ re itohan man mhan? Re otọle man.

⁵ Aharẹmiẹn ọ ki bue nin mhan mọn da ga Jehova, ọ bha khẹke nin mhan ha riale ghe emhin nọn khẹke nọn nin Jehova rẹ ha re itohan nọnsọle man mhan. Ọnan bha rẹman ghe uwedẹ kẹkẹ nin mhan sẹ rẹ ga Jehova i ti ọle bhọ. (Hib. 6:10) Ẹseọhẹ, ọle izọese ọsi Ọmọn nọnsọle khin. Ọ i yi ihaosa nin ọle re nin mhan bhi ẹsọn nin mhan miẹn nanlẹn. Ọ bha khẹke nin mhan ha riale ghe, ranmhude ẹsọn nin mhan miẹn nin Jehova, ọle zẹle nin ọle da mhọn itohan da mhan. Ahamiẹn mhan riale iriọ, ọ ki diabe ghe, Jesu wo gheghe yu fia.—Yẹ fẹ Galesha 2:21.

 6. Bezẹle nin Pọl da wo ha wẹnna kaka bhi oga nọnsi Jehova?

⁶ Pọl lẹnmhin ghe, ọ i yi ẹsọn nin ọle miẹn ha re Jehova mhọn itohan da ọle. Bhiriọ, be ki zẹ nin ọle da sẹyẹ ha wẹnna kaka bhi oga nọnsi Jehova? Ranmhude, ọle guanọ nin ọle rẹman ghe, itohan bi ifuẹkẹ nin Jehova mhọn da ọle ti ọle bhọ. (Ẹfẹ. 3:7) Bọsi Pọl, mhan i ga Jehova ranmhude ghe mhan guanọ nin ọle re itohan man mhan. Sokpan, mhan lu iriọ nin mhan rẹ rẹman ghe, itohan nin ọle mhọn da mhan ti mhan bhọ.

 7. Uwedẹ ọbhebhe nela mhan rẹ miẹn elele bhi izọese nọnsi Jesu nian? (Rom 5:1; Jemis 2:23)

⁷ Elele ọbhebhe nin mhan miẹn bhi izọese nọnsi Jesu nian, ọle hi nin mhan rẹ sabọ deba Jehova ha mhọn ikolu. a Beji mhan ka zilo ọle bhi uhọnmhọn-ọta nọn gbera, mhan bha deba Osẹnobulua ha mhọn ikolu bhi ẹghe nan rẹ biẹ mhan. Ọkpakinọn, ranmhude izọese nọnsi Jesu, mhan da dọ sabọ “deba Osẹnobulua ha ribhi ọfure”, yẹ sikẹ ọle.—Tie Rom 5:1; Jemis 2:23.

 8. Bezẹle nin mhan ha da ha khuẹnmhẹn Jehova bhi isẹhoa nin mhan mhọn rẹ ha nan erọnmhọn je ọle?

⁸ Isẹhoa nin mhan mhọn rẹ ha nan erọnmhọn ji Jehova, ọle uwedẹ ọkpa nin mhan rẹ sabọ sikẹ ọle. Ọ i yi erọnmhọn nin mhan kugbe nan bhi ikolo oga nesẹmhan ọkpa Jehova họn. Ọle yẹ họn erọnmhọn nin ọdeọde bhi ẹwẹ mhan nan je ọle. Erọnmhọn sabọ re ọkhọle nọnsẹmhan dere. Ọkpakinọn, ọ i yi ọnin ọkpa ọ lu nin mhan, ọ yẹ re ikolu nin mhan bi Osẹnobulua ko mhọnlẹn ziẹn ọbhọ. (Ps. 65:2; Jem. 4:8; 1 Jọni 5:14) Ẹghe  rebhe Jesu rẹ wo ha nan erọnmhọn beji ọle ribhi ọne otọ nan, ranmhude ọle lẹnmhin ghe, erọnmhọn dẹ re ikolu nin ọle bi Aba ọle ko mhọn ha ziẹn ọbhọ, sẹyẹ, Jehova dẹ ka ọle ehọ. (Luk 5:16) Ọ wo manman ti mhan bhọ ghe, ranmhude izọese ọsi Jesu, mhan dẹ sabọ kiẹn imọẹ Jehova, yẹ nan erọnmhọn je ọle.

ELELE NIN MHAN HA MIẸN BHI IZỌESE NỌNSI JESU BHI ẸGHE ODALO

 9. Elele nela mhan ha miẹn bhi izọese nọnsi Jesu bhi ẹghe odalo?

⁹ Elele nela mhan ha miẹn bhi izọese nọnsi Jesu bhi ẹghe odalo? Mhan dẹ miẹn iẹnlẹn ọsi ighegheghe. Ẹbho ne bunbun riale ghe ọnan i da sabọ sunu, ranmhude ọ ki ree nin ẹbho mọn da yuno. Jehova bha rẹ man mhan nin mhan ha yu. Sade Adam bha mhọn akan-ehọ da Osẹnobulua nọn, ọria soso i rẹ ha yu. Aharẹmiẹn mhan riale ghe emhin nọn i da sabọ sunu nọn nin ọria rẹ nyẹnlẹn bhi ighegheghe, ọkhẹke nin mhan ha mhọnlẹn bhi ọkhọle ghe, izọese nọnsi Jesu dẹ sabọ re ọle sunu.—Rom 8:32.

10. Ikhuaẹloghe nela enanzẹle bi usun ihuan nekẹle mhọnlẹn?

¹⁰ Arẹmiẹn ẹghe odalo mhan ha da miẹn iẹnlẹn ọsi ighegheghe, Jehova guanọ nin mhan wo ha ria ẹmhọn ọlẹn nian. Enanzẹle khuaẹloghe ẹghe nin ele ha rẹ deba Jesu ha gbẹloghe bhi okhun. (Arẹm. 20:6) Bhi obọ nọnkẹle, usun ihuan nekẹle khuaẹloghe ẹghe nin ele ha rẹ nyẹnlẹn bhi otọ-ọfubhegbe, nin ọbalọ bi akhiẹ i da ha ye. (Arẹm. 21:​3, 4) Ahamiẹn ọkpa bhi ene ha nyẹnlẹn bhi ọne otọ nan uwẹ khin, hẹi ha riale ghe elele ọsi ene ha nyẹnlẹn bhi okhun mhẹn nẹ ọsẹ. Ranmhude Jehova man mhan nin mhan ha nyẹnlẹn bhi ọne otọ nan. Uwẹ dẹ wo ha ghọnghọn beji uwẹ ha rẹ ha nyẹnlẹn bhi ọne otọ nan!

11-12. Emhin esili nela mhan ha sabọ ha khuaẹloghe rẹji ẹghe odalo? (Yẹ fẹ ene ifoto ghe.)

¹¹ Re ọkhọle riale ebi iẹnlẹn nọnsẹ ha diayẹ bhi Agbọn Ọfubhegbe. Uwẹ i yẹ da ha kpokpo egbe ba ẹmhọn emianmhẹn bi uu. (Isa. 25:8; 33:24) Jehova ki re emhin esili rebhe nọn hi ki rẹ khin nin uwẹ guanọ nin uwẹ. Be ha yẹẹ uwẹ rẹ lu bhi agbọn ọsọgbọn nọn vade? Ọ dẹ be yẹẹ uwẹ rẹ  luẹ ẹmhọn elanmhẹn kẹkẹ, ebi a rẹ so illo yẹ, bi ebi a rẹ drọ yẹ? Bhi agbọn ọsọgbọn, a dẹ guanọ ẹbho ne sabọ bọn uwa, bi ene sabọ mun ugbo. A dẹ yẹ wo guanọ ẹbho ne da ha lu emhin nan rẹ miẹnsọn kẹkẹ, ẹbho ne sabọ nyẹn ebale, ẹbho ne ha sabọ mun ugbo, yẹ gbẹloghe ọle. (Isa. 35:1; 65:21) Ranmhude ghe uwẹ dẹ nyẹnlẹn bhi ighegheghe, uwẹ dẹ miotọ rẹ luẹ iwẹnna-obọ nọn hi ki rẹ khin nọn ghọn ẹ.

¹² Ọ dẹ wo re imhan ha ghọnghọn rẹ gbe obokhian nin eria nan ha riọ kpanọ bhi uu! (Iwẹn. 24:15) Ria ebi uwẹ ha rẹ ha ghọnghọn yẹ beji uwẹ ha rẹ ha luẹ ẹmhọn emhin kẹkẹ nin Jehova manlẹn. (Ps. 104:24; Isa. 11:9) Ọnọn ki mhẹn nẹ hi, mhan i yẹ da ha lu emhin ebe. Mhan ki wo re ọkhọle nọn furẹ ha ga Jehova. Uwẹ dẹ be mun ọne isẹhoa nin uwẹ rẹ nyẹnlẹn bhi ighegheghe fia ranmhude “ọlẹnlẹnbhegbe ọsi obhi ẹghe khere nan miẹn bhi olukhọ”? (Hib. 11:25) Eye! Lẹn sẹbhọ ghe, elele nin uwẹ ha miẹn bhi ẹghe odalo mhẹn gbera emhin nọn hi ki rẹ khin nin uwẹ fikekegbe nian. Yere ghe, mhan i da wo ha khẹ agbọn ọsọgbọn rẹ ha khian, ọ dẹ gene vae. Ene ive nan rebhe dẹ sẹ mhan obọ ranmhude nin Jehova rẹ hoẹmhọn mhan, yẹ re Ọmọn nọnsọle rẹ zọese nin mhan.

RẸMAN JEHOVA GHE IZỌESE ỌSI ỌMỌN NỌNSỌLE TI UWẸ BHỌ

13. Be imhan ha rẹ rẹman yẹ ghe ebi Jehova lu nin mhan ti mhan bhọ? (2 Kọrint 6:1)

¹³ Be imhan ha rẹ rẹman Jehova yẹ ghe izọese ọsi Ọmọn nọnsọle ti mhan bhọ? Ọle hi nin mhan rẹ mun oga nọnsọle kalo bhi iẹnlẹn nọnsẹmhan. (Mat. 6:33) Bhi ọsi ẹmhọanta, Jesu yu nin mhan, “beji a ha da miẹn ọrebhe ne nyẹnlẹn ki ha nyẹnlẹn nanlẹn. Ele i da yẹ ha nyẹnlẹn nin egbe ele.” (2 Kọr. 5:15) Bhi ọsi ẹmhọanta, Jehova sẹ wo mhọn ifuẹkẹ da mhan, yẹ rẹhunmhan olukhọ nọnsẹmhan. Ahamiẹn mhan lu eka nin mhan ha sabọ lu rẹ ga ọle, mhan ki rẹman ọlẹn ghe, ebi ọle lu nin mhan ti mhan bhọ.—Tie 2 Kọrint 6:1.

14. Be imhan ha rẹ rẹman yẹ ghe mhan lu rẹkhan adia nin Jehova re nin mhan?

¹⁴ Mhan dẹ yẹ sabọ rẹman Jehova ghe oyẹẹ nin ọle mhọn da mhan ti mhan bhọ, sade mhan re obọ rẹkhan adia nin ọle re nin mhan. Be imhan ha rẹ lu iriọ yẹ? Ahamiẹn mhan ho nin mhan zẹ emhin nin mhan ha lu, mhan ki ka ria ẹmhọn ebi Jehova ghe ọne emhin yẹ. Bhi ọsi ijiẹmhin, ahamiẹn mhan ho nin mhan lẹn ebi mhan ha yo isiku sẹ yẹ, la unan iwẹnna nin mhan ha lu, mhan ki ria ẹmhọn ebi Jehova guanọ nin mhan lu. (1 Kọr. 10:31; 2 Kọr. 5:7) Ahamiẹn mhan re urẹọbhọ nọnsẹmhan man, emhin esili ki nabhọre. Urẹọbhọ nin mhan mhọn da Jehova, bi ikolu nin mhan ko mhọnlẹn ki ha ziẹn ọbhọ. Ikhuaẹloghe nin mhan mhọnlẹn ki sẹ yẹ deziẹn.—Rom. 5:​3-5; Jem. 2:​21, 22.

15. Be imhan ha lu bhi ẹghe Ayere Ọsi Uyumhin Nọnsi Jesu nin mhan rẹ rẹman ghe, izọese nọnsọle ti mhan bhọ?

¹⁵ Uwedẹ ọbhebhe sẹ yẹ ribhọ nin mhan ha rẹ rẹman ghe oyẹẹ nin Jehova rẹman mhan ti mhan bhọ. Ọle hi nin mhan rẹ noo ọne ẹghe ọsi Ayere nan rẹ rẹman Jehova ghe, izọese nọnsi  Jesu ti mhan bhọ. Mhan dẹ dọnmhegbe nin mhan rẹ tie ẹbho ne dọ deba mhan bhi ọne iluemhin nan. (1 Tim. 2:4) Taman ẹbho nin uwẹ tiele ebe ha sunu bhi ọne iluemhin. Ọ dẹ ha mhẹn nin uwẹ rẹ re ene ividio nan ne ribhi jw.org man ele. Ene ividio hi, Bezẹle Nin Jesu Da Yu? bi Ye Uyumhin Nọnsi Jesu Re. Ọkhẹke nin ene ewanlẹn dọnmhegbe rẹ tie eria ne i yẹ sasa bhi oga vae bhi ọne iluemhin. Ọ dẹ wo re Jehova, Jesu, ene ẹhi, bi imhan ha ghọnghọn sade ẹbho ne rẹ zobọ bhọ rẹ ha ga Jehova fikiere! (Luk 15:​4-7) Rẹ deba ibhio mhan ne vae, ọkhẹke nin mhan yẹ tuẹ eria ọgbọn ne vae, manman nọn ibhio mhan nọn ki buẹ nin ele vae bhi ikolo oga. Ọ wo khẹke nin mhan gbe obokhian nin ele rebhe fẹẹ.—Rom 12:13.

16. Bezẹle nọn da khẹke nin mhan manman lu iwẹnna itẹmhọn Osẹnobulua bhi ẹghe Ayere Ọsi Uyumhin Nọnsi Jesu?

¹⁶ Uwedẹ ọbhebhe nin mhan ha rẹ rẹman ghe izọese ọsi Jesu Kristi ti mhan bhọ hi, nin mhan rẹ manman dagbare bhi iwẹnna itẹmhọn Osẹnobulua, yẹ lu iwẹnna oga kẹkẹ bhi ẹghe nan ha rẹ lu Ayere Ọsi Uyumhin Nọnsi Jesu. Beji mhan ha rẹ manman ha lu iwẹnna itẹmhọn Osẹnobulua, iriọ mhan ha rẹ ha daghe ebi Osẹnobulua rẹ rẹkpa mhan yẹ. Bhiriọ, urẹọbhọ nin mhan mhọn da ọle ki manman deziẹn. (1 Kọr. 3:9) Dọnmhegbe rẹ tie ije kẹkẹ bhi Baibo nan ha tie bhi ẹghe Ayere, nan mhanmhan ọbhi Ha Luẹ IBaibo Ukpẹdẹ-ukpẹdẹ bi ebe ọsi ikolo. Uwẹ sabọ re ene ije kẹkẹ nan bhi Baibo rẹ lu iluẹmhin Baibo nọnsẹ.

17. Be bhọ manman ti Jehova bhọ? (Fẹ ọne ẹkpẹti ghe nọn mhọn uhọnmhọn-ọta nọn yọle, “ Uwedẹ Kẹkẹ Nin Mhan Ha Rẹ Rẹman Ghe Oyẹẹ Nin Jehova Mhọn Da Mhan Ti Mhan Bhọ.”)

¹⁷ Asabọmiẹn ranmhude idia nin uwẹ ye, uwẹ i da sabọ lu ene emhin rebhe nan tẹmhọnlẹn bhi ọne uhọnmhọn-ọta nan. Ọrẹyiriọ, lẹn sẹbhọ ghe, Jehova i re eka nin uwẹ sabọ lu rẹ khọkhọ ebi ẹbho ebhebhe lu. Ebi ọle ghe hi, ebezẹle nin uwẹ da lu eka nin uwẹ sabọ lu. Ọle daghe oyẹẹ nin uwẹ mhọn da ọle. Ọ manman ti ọle bhọ rẹ daghe ọle ghe, izọese ọsi Ọmọn nọnsọle ti uwẹ bhọ.—1 Sam. 16:7; Mak 12:​41-44.

18. Bezẹle nọn da khẹke nin mhan ji ebi Jehova bi Jesu lu nin mhan ha ti mhan bhọ?

¹⁸ Izọese nọnsi Jesu zẹle nin Jehova da rẹhunmhan olukhọ nọnsẹmhan. Ọle yẹ zẹ nin mhan da deba ọle ha mhọn ikolu, yẹ mhọn ọne ikhuaẹloghe rẹ nyẹnlẹn bhi ighegheghe. Ọ wo khẹke nin mhan ha rẹman Jehova ẹghe rebhe ghe, oyẹẹ nin ọle mhọn da mhan, nin ọle rẹ lu ene ẹsele nan nin mhan ti mhan bhọ. (1 Jọni 4:19) Bha ji mhan yẹ wo ha rẹman Jesu ghe, oyẹẹ nin ọle mhọn da mhan, nin ọle rẹ re iẹnlẹn nọnsọle rẹ zọese nin mhan ti mhan bhọ.—Jọni 15:13.