UHỌNMHỌN-ỌTA NỌNZI 2
ILLO 132 Jehova Ku Mhan Gbe
Ene Ọdọ, Bha Hoẹmhọn Ikhuo Bha Yẹ Ha Mun Ekpẹn Ele Bhi Egbe
“Ibha nin ọdọ, . . . bha ha mun ekpẹn [ikhuo bha] bhi egbe.”—1 PITA 3:7.
EBI A HA LUẸ BHỌ
Ebi ọdọ ha rẹ rẹman yẹ ghe ọle hoẹmhọn okhuo ọle yẹ mun ekpẹn ọle bhi egbe bhi uwedẹ nin ọle rẹ nanlẹn talọ, yẹ nanlẹn lu emhin.
1. Bezẹle nin Jehova da mun ibọdọ bi ireokhuo gbọ?
“OSẸNOBULUA ọsi eghọnghọn” Jehova khin, bhiriọ ọle yẹ guanọ nin mhan ha ghọnghọn. (1 Tim. 1:11) Ọle sẹ wo lu ẹsele ne bunbun nin mhan beji mhan ha da sabọ sọnyẹnmhẹn bhi iẹnlẹn. (Jem. 1:17) Ọkpa bhi ene ẹsele nan hi emhanmhan ọsi ibọdọ bi ireokhuo. Okpea bi okhuo ne bọ egbe ve nin egbe ele ghe ele dẹ hoẹmhọn egbe, yẹ ha mun ekpẹn nin egbe. Ahamiẹn okhuo bi ọdọ wo ha ziẹn oyẹẹ nọn ribhi ẹwẹ ele, ele ki wo manman ha ghọnghọn bhi iẹnlẹn.—Prov. 5:18.
2. Be ibọdọ bi ireokhuo ọsi ẹbho ne bunbun diayẹ ẹlẹnan?
2 Ọ ba bhi egbe a ghe, okhuo bi ọdọ ne bunbun ẹlẹnan i yẹ ye ive nin ele ve nin egbe re bhi ukpẹdẹ nin ele bọ egbe. Ranmhude ọnan, ele i ghọnghọn. Ebi agbotu ọkpa natiọle World Health Organization tale rẹman ghe, ọdọ ne bunbun ẹlẹnan gbe ikhuo ele, ta ọta ebe ele bhi egbe, yẹ lu ele khọlọ bhi uwedẹ ne bunbun. Ọdọ nọn lu emhin nọn sẹ inian sabọ rẹ ha lu okhuo ọle nọnsẹn bhi ole, sokpan, ọle ki ha re obọ oya mun ọlẹn bhi uwa. Ọdọ ne bunbun ẹlẹnan ghe ifoto la ividio ọsi ẹbho ne banọn an. Ọnan i re okhuo ele ghọnghọn hiehie, sẹyẹ ọ sabọ rẹ re ele ha riale ghe ọdọ ele bha yẹ hoẹmhọn ele.
3. Bezẹle nin ọdọ eso da re obọ oya mun ikhuo ele?
3 Be bhọ ha sabọ re okpea ha lu okhuo ọle khọlọ? Asabọmiẹn aba ọle yẹ wo ha lu okhuo ọle khọlọ, bhiriọ, ọle da ha riale ghe, ọ i yi emhin ebe nin okpea rẹ ha lu okhuo ọle khọlọ. Ikpea eso yẹ wo lu ikhuo ele khọlọ, ranmhude iriọ ikpea rẹ lu ikhuo khọlọ bhi agbaẹbho nọnsele. Ene ikpea nan sabọ rẹ ha riale ghe, ele ha fi bhi ẹlo, ọle ele ha rẹ sabọ rẹman ikhuo ele ghe, okpea ele khin. Bhi obọ nọnkẹle, a bha man ikpea eso ebi ele ha rẹ ha mun egbe ele ọbhi ibẹẹ yẹ sade emhin mhọn ebi ọ dia ele yẹ bhi egbe, bi sade ẹkẹ khọ ele. Ranmhude ẹghe-ẹghe ikpea eso rẹ ghe ifoto la ividio ọsi ẹbho ne banọn an, ọ re ele riale ghe ebi re ikhuo lu hi, nan rẹ gheghe ne ele nowẹ. Rẹ deba ọnan, niuz ọkpa da rẹman ghe, rẹ na bhi ẹghe emhianmhẹn KOVID-19 ha vade, ọdọ ne bunbun kie wo ha lu ikhuo ele khọlọ gbera ọnikhẹ. Ọkpakinọn, emhin soso i ribhọ nọn ha zẹ nin okpea ha da ha re ọbọ oya mun okhuo ọle.
4. Emhin nela ọ da khẹke nin ene ọdọ da mhọn ẹwanlẹn? Bezẹle?
4 Ọkhẹke nin ikpea ne ga Jehova mhọn ẹwan nin ele hẹi dọ ha ghe ikhuo ele bhi uwedẹ nọn bha gba nin ọne agbọn nan rẹ ghe ikhuo. a Bezẹle? Emhin ọkpa nọn zẹle hi, emhin nin ọria ria ẹmhọn ọlẹn re ọle lu ebi ọle lu. Pọl nin odibo da sekha nin Kristiẹn nan zẹle ne ribhi Rom ghe nin ele “hẹi yẹ ha re egbe khọkhọ ọne agbọn nan bhi uwedẹ nin ele rẹ lu emhin.” (Rom 12:1, 2) Ẹbho ne ribhi agbotu nọn ribhi Rom bhọ yi Kristiẹn fo bhi ikpe ne bunbun ọkuẹsẹ Pọl gbẹn ọne ilẹta nan ji ele. Ọrẹyiriọ, ebi Pọl gbẹn ji ele wo rẹman ghe, ẹbho eso bhi ọne agbotu yẹ wo ha lu emhin bhi uwedẹ nin ọne agbọn nan rẹ lu emhin, yẹ ria eria bhi uwedẹ nin ele rẹ ria eria. Ọnin zẹle nin Pọl da taman ele nin ele fi uwedẹ nin ele rẹ lu emhin bi uwedẹ nin ele rẹ ria eria denọ. Ebi Pọl tale yẹ wo rẹtẹ ene ọdọ ne ga Jehova ẹlẹnan. Ọ ba bhi egbe a ghe, eso yẹ wo lu emhin bhi uwedẹ nin ọne agbọn nan rẹ lu emhin, yẹ re obọ oya mun ikhuo ele. b Be Jehova guanọ nin ọdọ rẹ ha ne okhuo ọle lu emhin yẹ? Ewanniẹn rẹji ọne inọnta nan ribhi Baibo nọn mun ọne uhọnmhọn-ọta nan mhọn.
5. Beji 1 Pita 3:7 rẹman, be ọkhẹke nin ọdọ rẹ ha ne okhuo ọle lu emhin yẹ?
5 Tie 1 Pita 3:7. Jehova yọle nin ọdọ ha mun ekpẹn okhuo ọle bhi egbe. Ọdọ nọn mun ekpẹn okhuo ọle bhi egbe re oyẹẹ bi ẹkẹ-ẹjẹjẹ ne okhuo ọle lu emhin. Bhi ọne uhọnmhọn-ọta nan, mhan dẹ zilo nyan ebi ọdọ ha rẹ sabọ ha mun ekpẹn okhuo ọle bhi egbe yẹ. Ọkpakinọn, bha ji mhan ka zilo nyan emhin eso nin ọdọ lu nọn rẹman ghe, ọle bha hoẹmhọn okhuo ọle yẹ mun ekpẹn ọle bhi egbe.
RẸBAN EMHIN NỌN HI KI RẸ KHIN NỌN HA BA OKHUO Ẹ BHI EGBE
6. Be ọ dia Jehova yẹ bhi egbe sade ọdọ gbe okhuo ọle? (Kolose 3:19)
6 Ọ bha khẹke nin ọdọ ha gbe okhuo ọle. Jehova he ọria nọn hi ki rẹ khin nọn hoẹmhọn okhọnlẹn. (Ps. 11:5) Ọ i zẹwẹ yẹẹ Jehova hiehie sade ọdọ gbe okhuo ọle. (Mal. 2:16; tie Kolose 3:19.) Beji 1 Pita 3:7 nọn mun ọne uhọnmhọn-ọta nan mhọn rẹman, ahamiẹn ọdọ bha lu okhuo ọle nọnsẹn, ọle ki riia ikolu nin ọle bi Jehova ko mhọnlẹn an. Asabọmiẹn Jehova bhọ i yẹ da họn erọnmhọn nesọle.
7. Beji Ẹfẹsọs 4:31, 32 rẹman, ọta nela ọkhẹke nin ene ọdọ rẹban? (Yẹ Fẹ “Ọta Nan Re Otọle Man Nọnsẹn” ghe.)
7 Ọ bha khẹke nin ọdọ ha vanhiẹn mun okhuo ọle, la ha ghunmhun ọlẹn. Ikpea eso wo re ohu ne ikhuo ele talọ, yẹ ta ọta nọn ha ba ele bhi egbe. Ọkpakinọn, Jehova he ọria nọn hi ki rẹ khin nọn mhọn ẹkẹkhọmhin, okpohu, ọria nọn vanhiẹn, bi ọria nọn ghunmhun ihẹn. c (Tie Ẹfẹsọs 4:31, 32.) Ọle họn emhin rebhe. Uwedẹ nin ọdọ rẹ ne okhuo ọle talọ bhi ole, rẹ dọ sẹbhi uwa manman wo rẹtẹ Jehova. Ahamiẹn okpea wo ha re ohu ne okhuo ọle talọ, ọle ki riia ikolu nin ọle bi okhuo ọle ko mhọnlẹn an, rẹ dọ sẹbhi ọne ọle bi Osẹnobulua ko mhọn.—Jem. 1:26.
8. Be ọ dia Jehova bhi egbe yẹ sade ọria ghe ifoto la ividio ọsi eria ne banọn an? Bezẹle?
8 Ọ bha khẹke nin ọdọ ha ghe ifoto la ividio ọsi ẹbho ne banọn an. Be ọ dia Jehova bhi egbe yẹ nan rẹ ha ghe ifoto la ividio ọsi eria ne banọn an? Ọ i yẹẹ Jehova hiehie. Bhiriọ, ọdọ nọn ghe ifoto la ividio ọsi eria ne banọn an riia ikolu nin ọle bi Jehova ko mhọnlẹn an, sẹyẹ, ọle bha mun ekpẹn okhuo ọle bhi egbe. d Jehova guanọ nin ọdọ sun rẹkhan okhuo ọle bhi uwedẹ nin ọle rẹ lu emhin bi bhi uwedẹ nin ọle rẹ ria eria. Jesu da yọle ghe, okpea nọn wo ha ghe okhuo ọbhebhe yẹ ria ẹmhọn ebi ọle ha rẹ nanlẹn nowẹ yẹ nanlẹn nowẹ fo “bhi ẹkẹ ọkhọle” nọnsọle. e—Mat. 5:28, 29.
9. Bezẹle nọn i da yẹẹ Jehova sade ọdọ sua okhuo ọle ọbhọ rẹ nanlẹn nowẹ bhi uwedẹ nọn i yẹẹ ọle?
9 Ọ bha khẹke nin ọdọ sua okhuo ọle ọbhọ rẹ lu emhin nin ọle bha ho nin ọle lu bhi ẹghe nin ele rẹ ne egbe ele nowẹ. Ọdọ eso sua ikhuo ele ọbhọ rẹ ne ele nowẹ bhi uwedẹ nọn i da yẹẹ ọne okhuo, la bhi uwedẹ nọn ha re ọkhọle ha kpokpo ọne okhuo. Ọne uwedẹ nan nin ene ikpea nan rẹ lu emhin i zẹwẹ yẹẹ Jehova hiehie. Jehova guanọ nin okpea hoẹmhọn okhuo ọle, re ifuẹke nanlẹn ha lu emhin, yẹ ji ebi emhin dia ọne okhuo bhi egbe yẹ da rẹtẹ ọle. (Ẹfẹ. 5:28, 29) Ahamiẹn okpea nọn ga Jehova sua okhuo ọle ọbhọ fo rẹ nanlẹn nowẹ bhi uwedẹ nọn i yẹẹ ọle kii? La ọle re ọbọ oya mun okhuo ọle, la ọle ghe ifoto la ividio ọsi ẹbho ne banọn an? Be ha rẹkpa ọle rẹ sabọ fi uwedẹ nin ọle rẹ lu emhin bi uwedẹ nin ọle rẹ ria eria denọ?
EBI ỌDỌ HA RẸ SABỌ RẸBAN UWEDẸ NỌN I MHẸN NIN ỌLE RẸ LU EMHIN
10. Be ene ọdọ ha rẹ sabọ re egbe khọkhọ Jesu yẹ?
10 Be ha sabọ rẹkpa ọdọ nin ọle hẹi ha re obọ oya mun okhuọ ọle, yẹ sua ọle ọbhọ rẹ nanlẹn nowẹ bhi uwedẹ nọn bha yẹẹ ọle? Ọkhẹke nin ọle re egbe khọkhọ Jesu. Arẹmiẹn Jesu bha re okhuo, ijiẹmhin esili ọle re ọbhi otọ bhi uwedẹ nin ọle rẹ ha ne edibo nesọle lu emhin. Ọdọ dẹ yẹ sabọ re egbe khọkhọ ọle bhi uwedẹ nin ọle rẹ ne okhuo ọle lu emhin. (Ẹfẹ. 5:25) Bhi ọsi ijiẹmhin, bha ji mhan zilo nyan ebi ene ọdọ ha sabọ miẹn luẹ bhi uwedẹ nin Jesu rẹ ne etuegbe nesọle lu emhin bi uwedẹ nin ọle rẹ ne ele talọ.
11. Be Jesu rẹ ne etuegbe nesọle lu emhin yẹ?
11 Ekpẹn bi ẹkẹ-ẹjẹjẹ Jesu rẹ ne etuegbe nesọle lu emhin. Ẹghe bha ha ribhọ nin Jesu rẹ ha to mun ele, la ha lu ele khọ. Arẹmiẹn ebeanlẹn ele Jesu ha khin, ọle bha ha ne ele talọ bhi uwedẹ nọn ha rẹ re ofẹn ha mun ele, la nọn ha rẹman ghe ele wẹghẹa. Ọkpakinọn, ọle da re idegbere ga ele. (Jọni 13:12-17) Ọle da taman edibo nesọle yọle: “Luẹ bhi obọ imẹn, ranmhude, imẹn mhọn idegbere bi ẹkẹ nọn fu. Ibha dẹ miẹn ọfubhegbe.” (Mat. 11:28-30) Jesu wo ha mhọn ẹkẹ nọn fu. Ọria nọn mhọn ẹkẹ nọn fu i yi ọria nọn wẹghẹ. Ọkpakinọn, ọle mhọn ọne ahu nin ọle rẹ sabọ mun egbe ọle ọbhi ibẹẹ. Ọle wo de ọkhọle re sade ẹbho re ẹkẹ khọ ọle. Ọle i ji ebi emhin dia ọle yẹ bhi egbe re ọle lu emhin nọn bha gba.
12. Be Jesu rẹ ne ẹbho talọ yẹ?
12 Jesu da re ọta nin ọle ta rẹ ko ẹbho udu re, yẹ re izebhudu nin ele. Ọle bha ha re ohu ne ẹbho ne rẹkhan ọlẹn talọ. (Luk 8:47, 48) Ẹghe nin ẹbho ne ha kpokpo ọle rẹ ha ghunmhun ọlẹn, yẹ guanọ nin ele re ẹkẹ khọ ọle, “ọle bha ghunmhun ele haosa.” (1 Pita 2:21-23) Ẹgheso Jesu ki huẹan, beji a ha da miẹn ọle bha dọ ha re ohu ne ẹbho talọ. (Mat. 27:12-14) Ijiẹmhin esili wo khọnan nin Jesu re ọbhi otọ nin ene ọdọ!
13. Beji Matiu 19:4-6 rẹman, be ọdọ ha rẹ sabọ “sun rẹkhan okhuo ọle” yẹ? (Yẹ fẹ ifoto ghe.)
13 Jesu da taman ene ọdọ ghe, nin ele sun rẹkhan ikhuo ele. Ọle da ta ebi Aba ọle ka ta bhi ẹghe nin ọle rẹ yọle ghe nin ọdọ “sun rẹkhan okhuo ọle.” (Tie Matiu 19:4-6.) Ọne ukpọta Grik nan zedu ọle diọbhi “sun rẹkhan” mundia nin, nin emhin rẹ sun-gban. Bhiriọ, ọkhẹke nin oyẹẹ nọn ribhi ẹwẹ okhuo bi ọdọ ziẹn sẹbhọ ghe, ọ ki diabe a sun ele gban. Ranmhude ọnan, ọkpa bhi ẹwẹ ele ha lu emhin nọn ba ọnọnkẹle bhi egbe, ele veva ha yẹ loya bhọ. Okpea nọn re iriọ hoẹmhọn okhuo ọle i da dọ ha ghe ifoto la ividio ọsi ẹbho ne banọn an. Ẹjẹje ọle ha rẹ denọ ẹlo “sibhi emhin ne bha kiọnlẹn re.” (Ps. 119:37) Bọsi Jobu, ọle dẹ taman egbe ọle ghe, ọle i da dọ ha ghe okhuo ọbhebhe bhi uwedẹ nọn bha gba.—Job 31:1.
Ọdọ nọn wo ha sun rẹkhan okhuo ọle i da ka ghe ifoto la ividio ọsi ẹbho ne banọn an (Fẹ uduọle nọnzi 13 ghe) g
14. Emhin kẹkẹ nela ọkhẹke nin ọdọ nọn re obọ oya mun okhuo ọle lu, beji ọle ha da sabọ hẹnhẹn ikolu nin ọle bi okhuo ọle ko mhọn, bi ọne ọle bi Jehova ko mhọn?
14 Okpea nọn gbe okhuo ọle yẹ ta ọta ebe ọle bhi egbe, dẹ wo lu emhin ne bunbun nin ọle rẹ hẹnhẹn ikolu nin ọle bi okhuo ọle ko mhọn, bi ọne ọle bi Jehova ko mhọn. Be bhọ ene emhin kẹkẹ nọn khẹke nin ọle lu? Ọhẹnhẹn, ọkhẹke nin ọle ka miẹnkue ghe ọle lu emhin ebe. Jehova daghe emhin rebhe nin ọle lu bi ọta rebhe nin ọle ta. (Ps. 44:21; Eccl. 12:14; Hib. 4:13) Ọzeva, ọkhẹke nin ọle zobọ bhọ rẹ ha re obọ oya mun okhuo ọle, yẹ fi uwedẹ nin ọle rẹ lu emhin denọ. (Prov. 28:13) Ọzea, ọkhẹke nin ọle dọ bhii okhuo ọle bi Jehova nin ele rẹhunmhan ọlẹn. (Iwẹn. 3:19) Ọkhẹke nin ọle bhii Jehova nọn rẹkpa ọle rẹ fidenọ, nọn rẹkpa ọle rẹ sabọ ha ria eria nọnsẹn, talọ nọnsẹn yẹ lu emhin bhi uwedẹ nọn yẹẹ Jehova. (Ps. 51:10-12; 2 Kọr. 10:5; Fil. 2:13) Ọzenẹn, ọkhẹke nin ọle re obọ rẹkhan ebi ọle nan bhi erọnmhọn, ọle ha yẹ rẹban okhọnlẹn bi ọta ne bha gba nin ọle ta. (Ps. 97:10) Ọzisẹn, ọkhẹke nin ọle dọ guanọ urẹkpa bhi obọ ene ewanlẹn bhi ẹkẹ agbotu. (Jem. 5:14-16) Ọzehan, ọkhẹke nin ọle ha mhọn emhanmhan nọn ha rẹkpa ọle nin ọle hẹi dọ ha lu ene emhin nan bhi ẹghe odalo. Ọ yẹ khẹke nin ọdọ nọn ghe ifoto la ividio ọsi ẹbho ne banọn an re obọ rẹkhan ene emhin ehan nan nin mhan zilo ọle. Jehova dẹ nan erọnmhọn nanlẹn bhi uwedẹ nin ọle rẹ ha dọnmhegbe rẹ fi uwedẹ nin ọle rẹ lu emhin denọ. (Ps. 37:5) Ọ i yi nin ọdọ rẹ rẹban uwedẹ nọn bha gba nin ọle rẹ lu emhin ọkpa ọkhẹke nin ọle lu. Ọkhẹke nin ọle yẹ ha mun ekpẹn okhuo ọle bhi egbe, yẹ re oyẹẹ man ọlẹn. Be ọle ha rẹ sabọ lu ọnan yẹ?
EBI ỌDỌ HA RẸ SABỌ HA MUN EKPẸN OKHUO ỌLE BHI EGBE YẸ
15. Be ọdọ ha rẹ rẹman yẹ ghe ọle hoẹmhọn okhuo ọle?
15 Rẹman okhuo ẹ ghe uwẹ hoẹmhọn ọlẹn. Ibhio mhan nin ikpea eso ne wo ha ghọnghọn bhi ibọdọ bi ireokhuo nọnsele, lu emhin ukpẹdẹ-ukpẹdẹ nin ele rẹ rẹman ikhuo ele ghe ele hoẹmhọn ele. (1 Jọni 3:18) Ọdọ dẹ sabọ lu emhin eso rẹ rẹman okhuo ọle ghe ọle hoẹmhọn ọlẹn. Emhin bii, nin ọle rẹ mun ọle obọ mhọn, la mun ọlẹn dede. Ọle dẹ sabọ gbẹn ebe ji ọle bhi ifoni rẹ taman ọlẹn yọle, “Ẹlo ẹ nyan mẹn” la ọle sabọ nọọn ọlẹn yọle, “Ọne egbe?” Ọle dẹ yẹ sabọ ha gbẹn ilẹta ji ọle ẹghe-ẹghe rẹ taman ọle ebi ọle hoẹmhọn ọlẹn sẹ yẹ. Ọdọ ha lu ene emhin nan, ọle ki rẹman ghe ọle mun ekpẹn okhuo ọle bhi egbe. Ọ ki yẹ rẹman ghe ọle ziẹn ibọdọ bi ireokhuo nọnsele.
16. Bezẹle nọn da khẹke nin ọdọ ha khuẹnmhẹn okhuo ọle?
16 Ji okhuo ẹ lẹn ghe ọle ghan bhi ẹlo ẹ. Ọdọ nọn hoẹmhọn okhuo ọle nọn yẹ mun ekpẹn ọle bhi egbe, dẹ ha rẹman okhuo ọle ghe okhuo ọle ghan bhi ẹlo nọnsọle, ọle ki yẹ ha lu emhin nọn ha re okhuo ọle ha hio. Uwedẹ ọkpa nin ọne okpea ha rẹ lu ọnan hi, nin ọle rẹ ha gbe ekhuẹnmhẹn nin okhuo ọle bhi emhin rebhe nin okhuo ọle lu rẹ rẹkpa ọle. (Kol. 3:15) Ọdọ ha gene re ẹkẹata ha gẹn okhuo ọle, ọ ki wo re ọne okhuo ha ghọnghọn. Ahamiẹn Ọdọ taman okhuo ọle ẹghe-ẹghe emhin kẹkẹ nin ọle hoẹmhọnlẹn bhi egbọle, ọ ki wo rẹman ọne okhuo ghe ọdọ ọle hoẹmhọn ọlẹn, yẹ mun ekpẹn ọle bhi egbe. Udu ọle ki sotọ.—Prov. 31:28.
17. Be ọdọ ha rẹ rẹman yẹ ghe ọle mun ekpẹn okhuo ọle bhi egbe?
17 Ha re ifuẹkẹ bi ekpẹn ne okhuo ẹ lu emhin. Ọdọ nọn hoẹmhọn okhuo ọle, dẹ ha mun okhuo ọle bii ẹkẹn-ọkhọ. Ọle dẹ ha ghe okhuo ọle bii ẹsele nọn ghanlẹn nọn na bhi obọ Jehova vae. (Prov. 18:22; 31:10) Bhiriọ, ọle ki re ifuẹkẹ bi ekpẹn rẹ ha nanlẹn lu emhin, rẹ dọ sẹbhi ẹghe nin ele rẹ ne gbe ele nowẹ. Ọle i da ha sua okhuo ọle ọbhọ rẹ nanlẹn nowẹ bhi uwedẹ nọn bha yẹẹ ọne okhuo, la nọn ha re ọkhọle ha kpokpo ọne okhuo. f Sẹyẹ, rẹji ọne ọdọ tobọle, ọ bha khẹke nin ọle lu ebe ha kpokpo ọle bhi ọkhọle bhi ẹghe nin ele rẹ negbe nowẹ.—Iwẹn. 24:16.
18. Be ọkhẹke nin ene ọdọ wo muegbe rẹ ha lu? (Yẹ fẹ ọne ẹkpẹti ghe nọn yọle, “ Uwedẹ Enẹn Nin Uwẹ Ha Rẹ Rẹman Ghe Ọdọ Nọn Mun Ekpẹn Okhuo Ọle Bhi Egbe Uwẹ Khin.”)
18 Ene ọdọ, bha lẹn sẹbhọ ghe Jehova manman wo ghọnghọn nin bha rẹ ha hoẹmhọn ikhuo bha, yẹ mun ekpẹn ele bhi egbe bhi uwedẹ nin bha rẹ ne ele talọ bi uwedẹ nin bha rẹ ne ele lu emhin. Wo muegbe nin uwẹ rẹ ha mun ekpẹn okhuo ẹ bhi egbe. Nin uwẹ rẹ sabọ lu ọnan, dọnmhegbe rẹ rẹban ene emhin ne ha ba ọle bhi egbe, uwẹ ha yẹ re ifuẹkẹ, ekpẹn bi oyẹẹ rẹ ha nanlẹn lu emhin. Uwẹ ha lu iriọ, uwẹ ki ha rẹman okhuo ẹ ghe uwẹ hoẹmhọn ọlẹn, sẹyẹ, ọle ghan bhi ẹlo nọnsẹ. Ahamiẹn uwẹ wo ha hoẹmhọn okhuo ẹ yẹ mun ekpẹn ọle bhi egbe, uwẹ ki sabọ gbega ikolu nin uwẹ bi Jehova ko mhọnlẹn, ọnin bhọ ebe lu uhọnmhọn-emhin nẹ.—Ps. 25:14.
ILLO 131 “Emhin Nin Osẹ Diẹn Kugbe”
a Ene ọdọ, dọnmhegbe tie ọne uhọnmhọn-ọta nan nọn yọle, “Uwẹ Be Nin Ikhuo Lu Emhin Beji Jehova Rẹ Nin Ele Lu Emhin?” bhi ebe Ọkhẹughe ọsi Jẹnuare 2024.
b Ahamiẹn ọdọ ẹ la okhuo ẹ sẹ ka gbe uwẹ khẹ, ọne uhọnmhọn-ọta nan dẹ sabọ rẹkpa uwẹ nọn yọle, “Help for Victims of Domestic Abuse” nọn ribhi obọle natiọle, “Uhọnmhọn-ọta Ebhebhe”, usun ọsi uhọnmhọn-ọta kẹkẹ bhi jw.org bi JW Library®.
c ỌTA NAN RE OTỌLE MAN NỌNSẸN: Ọne ukpọta “ihẹn” yẹ mundia nin nan rẹ ha ta ọta ne bha gba ọria bhi egbe rẹ ghunmhun ọlẹn, la re ọne ọria ha re ẹlo nọn i mhẹn ghe egbọle. Ọ yẹ mundia nin nan rẹ ha taman ọria ẹghe rebhe emhin nin ọle lu nọn bha yẹẹ mhan. Bhiriọ, ọta nọn hi ki rẹ khin nin ọdọ taman okhuo ọle nọn ba ọle bhi egbe, la nin ọle rẹ ghunmhun okhuo ọle, ihẹn nọn.
d Fẹ ọne uhọnmhọn-ọta nan ghe nọn yọle: “Pornography Can Shatter Your Marriage” bhi jw.org bi JW Library.
e Ọne uhọnmhọn-ọta nọn yọle: “Be Uwẹ Ha Lu Yẹ Sade Ọdọ Ẹ, La Amhẹn Ẹn Dọ Ha Ghe Ividio Ọsi Ẹbho Ne Banọan?” bhi ebe Ọkhẹughe ọsi Ọgọst 2023, dẹ sabọ rẹkpa okhuo nin ọdọ ọle ghe ifoto la ividio ọsi eria ne banọn an.
f Baibo bha tẹmhọn uwedẹ nọn khẹke, la nọn bha khẹke nin okhuo bi ọdọ rẹ ha ne gbe ele nowẹ. Okhuo bi ọdọ ne ga Jehova ha tobele zẹ ebi ele ha lu yẹ bhi idia nọn sẹnian nọn ha rẹman ghe ele re ogẹn ji Jehova, nọn ha yẹ re ele veva ha ghọnghọn yẹ mhọn ọkhọle nọn khiale. Bhi ọsi ẹmhọanta, ọ bha khẹke nin okhuo bi ọdọ dọ ha deba ẹbho zilo ẹmhọn ebi ele rẹ ne gbe ele nowẹ yẹ.
g EMHIN NAN RẸMAN BHI IFOTO: Okpea ọkpa nọn i yi Ọsali Jehova sua obhio mhan nin okpea ọbhọ bhi isi iwẹnna, nin ọle rẹ ghe ifoto ọsi eria ne banọn an bhi ebe nin ọle re mhọn.
