1. Be yẹẹ ẹbho ne bunbun rẹ ha lu ẹlẹnan?

 ẸLẸNAN nian, ọ wo yẹẹ ẹbho ne bunbun rẹ ha re egbe ele man. Bhi ọsi ijiẹmhin, ẹbho eso kẹ wo diọbhi intanẹt dọ ha re egbe man, yẹ re ebi ele mhọn rẹ dẹgbọ. Sokpan, ikpeta ẹbho re ogẹn, la uyi ji Jehova. Bhi ọne uhọnmhọn-ọta nan, mhan dẹ zilo nyan ebi a re ọle ta nan rẹ re uyi ji Jehova, bi ebe ha rẹ mhan lu iriọ. Mhan dẹ yẹ luẹ ebi mhan ha rẹ sabọ re uyi nọn khẹke Osẹnobulua nanlẹn yẹ, bi ebi ọle ha rẹ re uyi nin egbọle yẹ bhi ẹghe odalo.

BE A RE ỌLE TA NAN RẸ RE UYI JI JEHOVA?

 2. Be Jehova rẹ re uyi nọnsọle man yẹ bhi oke ọsi Sanai? (Yẹ fẹ adudu nọn ribhi odalo ọle ghe.)

² Be bhọ hi uyi? Bhi Baibo, a ha yọle ghe a re “uyi” nin ọria, ọ rẹman nan rẹ manman mun ekpẹn nin ọne ọria, yẹ ghe ọle bii okpọria. Ẹghe nin Jehova rẹ fan ibhokhan Izrẹl fia fo bhi otọ Ijipt, ọle da re uyi nọnsọle man. Fẹ ebi ọle rẹ lu iriọ yẹ: Ibhokhan Izrẹl da sikoko bhi otọ oke ọsi Sanai nin ele ka Osẹnobulua ehọ. Beji ele rẹ ribhi enin, ijerebhe da wo so ebiuki a. Osukpa, ọne oke da mun lueghe, ọ da ha kpa eranlẹn kua, anyan da ha nyan, avan da de. A da yẹ ha họn usomhin ọsi akala nọn manman ha rolo. (Ex. 19:​16-18; 24:17; Ps. 68:8) Ọne uwedẹ nan nin Jehova rẹ re ahu nọnsọle man, dẹ wo kiẹn emhin ọnyunun an rẹji ibhokhan Izrẹl bhi ọne ukpẹdẹ nin.

 3. Be a re ọle ta nan rẹ re uyi ji Jehova?

 ³ Imhan nin eria dẹ be yẹ sabọ re uyi ji Jehova? Ehe! Uwedẹ ọkpa nin mhan ha rẹ sabọ lu iriọ hi, sade mhan taman ẹbho ikpẹ esili nesi Jehova bi ebi ọle rẹ manman mhọn ahu yẹ. Mhan dẹ yẹ sabọ re uyi ji Jehova sade mhan khuẹnmhẹn ọlẹn bhi emhin nin ọle re ahu nin mhan rẹ lu. (Isa. 26:12) Ijiẹmhin esili Devid nin Ojie wo khin bhi ọne ẹmhọn nan. Ọle wo ha re uyi ji Jehova. Bhi ẹghe ọkpa, Devid da nan erọnmhọn ji Osẹnobulua bhi isira ibhokhan Izrẹl rebhe. Bhi ọne erọnmhọn, ọle da yọle: “Eo Jehovah, uwẹ nyan ikhuale, ukpọnọmhin, ose, oriri bi ahu ojie, ranmhude, uwẹ nyan emhin rebhe ne ribhi ọne otọ nan bi okhun.” Ọle ki nan ọne erọnmhọn fo, ọrebhe bhi agbotu da re ogẹn ji Jehova.—1 Chron. 29:​11, 20.

 4. Be Jesu rẹ re ogẹn ji Jehova yẹ?

⁴ Ẹghe nin Jesu rẹ ha ribhi ọne otọ nan, ọle da wo ha re uyi ji Aba ọle bhi emhin ọhan-ilo nin ọle ha lu. Ọle da ji ẹbho lẹn ghe, Aba ọle hi ọnọn re ahu nanlẹn rẹ ha lu ene emhin ọhan-ilo nan. (Mak 5:​18-20) Jesu yẹ re ebi ọle tale rẹji Aba ọle, bi uwedẹ nin ọle rẹ ne ẹbho lu emhin rẹ re uyi ji Jehova. Bhi ẹghe ọkpa nin Jesu rẹ ha man emhin bhi sinagọg, ọle da re egbe dan okhuo ọkpa nin ẹlinmhin ebe ha re obọ oya mun bhi ẹkẹ ikpe 18. Ọne ẹlinmhin ebe da manman re ọne okhuo kuẹnre, rẹ sẹbhọ ghe, ọle i sabọ niẹn egbe a. Emianmhẹn oya wo khọnan! Ohan ọne okhuo da wo ha to Jesu, bhiriọ, ọle da khian bu ọle, yẹ taman ọlẹn yọle: “Okhuo, imẹn re egbe dan ẹn bhi emianmhẹn nin uwẹ a khọnmhọn.” Jesu da re obọ nyan ọne okhuo, bhiriọ, ọle da wo niẹn egbe a, yẹ “munhẹn ha re ogẹn ji Osẹnobulua” nin Ọle rẹ re egbe dan ọlẹn. (Luk 13:​10-13) Ebi Jesu lu nin ọne okhuo nan da wo re ọle ha gẹn Jehova. Iriọ ọ yẹ khẹke nin mhan ha lu.

BEZẸLE NIN MHAN DA RE UYI JI JEHOVA?

 5. Bezẹle nin mhan da mun ekpẹn nin Jehova?

⁵ Mhan re uyi nin Jehova nin mhan rẹ manman mun ekpẹn nanlẹn. Mhan mhọn emhin ne bunbun ne ha rẹ mhan ha mun ekpẹn nin Jehova. Ọle hi Osẹ nọn mhọn ahu nẹ, egbe i gbo lọ ọle. (Ps. 96:​4-7) Emhin nin ọle manlẹn rẹman ghe, ọle manman mhọn ẹwanlẹn. Ọle hi ọnọn man mhan, yẹ ne emhin nin mhan ha rẹ ha nyẹnlẹn nin mhan. (Arẹm. 4:11) Ọle mhọn asun-rẹkhan. (Arẹm. 15:4) Emhin rebhe nin ọle lu kiọnlẹn, sẹyẹ, ọle wo mun ive nesọle sẹ. (Josh. 23:14) Ọnan bhọ zẹle nin Jerimaya nin akhasẹ da ta ọnan rẹji Jehova, ọle da yọle: “Bhi ẹwẹ ene wanlan rebhe bhi ene agbaẹbho bi bhi ejele nọnsele kẹkẹ, ọria soso i ribhọ nọn diabe uwẹ”! (Jer. 10:​6, 7) Gene-gene, mhan mhọn emhin ne bunbun ne ha rẹ mhan ha mun ekpẹn nin Aba mhan nọn ribhi okhun. Ọ gene wo khẹke nin mhan ha mun ekpẹn nin Jehova. Ọ sẹyẹ wo khẹke nin mhan hoẹmhọn ọlẹn.

 6. Bezẹle nin mhan da hoẹmhọn Jehova?

⁶ Mhan re uyi nin Jehova ranmhude mhan wo manman hoẹmhọn ọlẹn. Jehova mhọn ikpẹ esili kẹkẹ ne rẹ mhan hoẹmhọn ọlẹn. Ọle mhọn itohan bi ẹkẹ-ẹjẹjẹ. (Ps. 103:13; Isa. 49:15) Ọ ba ọle bhi egbe sade mhan loya. (Zech. 2:8) Ọle re ọle lẹkhẹ nin mhan rẹ sabọ ha yi imọẹ ọle. (Ps. 25:14; Iwẹn. 17:27) Ọle mhọn idegbere; “ọle debhẹre ghe otọ bi okhun, yẹ si ene mhọn idegbere kpanọ bhi otọ re.” (Ps. 113:​6, 7) Họla i da ha ho nin ọle re uyi nin Osẹnobulua nọnsẹmhan nọn khua?—Ps. 86:12.

 7. Isẹhoa nela imhan mhọnlẹn?

⁷ Mhan re uyi ji Jehova ranmhude mhan guanọ nin ẹbho lẹn ọlẹn nọnsẹn. Ẹbho ne bunbun bha lẹn ẹmhọanta rẹji Jehova. Bezẹle? Ranmhude, Esu re ohoghe nin ọle bha Jehova le rẹ re ọkhọle ọsi ẹbho ne bunbun gbin.  (2 Kọr. 4:4) Esu re ẹbho ne bunbun rẹọbhọ ghe, Jehova to gbe, ghe ẹmhọn mhan bha rẹtẹ ọle, sẹyẹ ghe, ọle hi ọnọn mhọn obọ bhi iloya ne bunbun ne ribhi ọne agbọn nan. Ọkpakinọn, mhan lẹnmhin ghe ọnan i yi ẹmhọanta. Mhan mhọn ọne isẹhoa rẹ ji ẹbho lẹn ẹmhọanta rẹji Osẹnobulua, yẹ re uyi ji ọle. (Isa. 43:10) Psalm 96 wo tẹmhọn uwedẹ kẹkẹ nin mhan ha rẹ re uyi ji Jehova. Beji mhan ha rẹ ha zilo nyan ulọnlẹn eso bhi ọne Baibo nan, ria eria nyan uwedẹ eso nin uwẹ ha rẹ sabọ re uyi nọn khẹke Jehova nanlẹn.

BE IMHAN HA RẸ SABỌ RE UYI NỌN KHẸKE JEHOVA NANLẸN YẸ?

 8. Uwedẹ ọkpa nela mhan ha rẹ sabọ gẹn Jehova? (Psalm 96:​1-3)

⁸ Tie Psalm 96:​1-3. Mhan dẹ sabọ re ebi mhan ta rẹji Jehova rẹ re ogẹn ji ọle. Ene ulọnlẹn nin mhan tiele nan yọle nin ẹbho nesi Jehova “so illo ji Jehova” rẹ “gẹn elin ọlẹn,” nin ele ha “wewe ọne ọta nọn mhẹn ọsi umiẹnfan nọnsọle,” bi nin ele “ha wewe uyi nọnsọle bhi ẹwẹ ene agbaẹbho.” Uwedẹ kẹkẹ nin mhan ha rẹ sabọ re ebi mhan ta rẹ gẹn Aba mhan nọn ribhi okhun khọnan. Eguọmhandia nesi Jehova bhi ore ne gbera wo noo isẹhoa nin ele ha mhọnlẹn rẹ rẹkpa ẹbho lẹn unan ọria nin Jehova khin. (Dan. 3:​16-18; Iwẹn. 4:29) Be imhan ha rẹ sabọ re egbe khọkhọ ele yẹ?

9-10. Be uwẹ miẹn luẹ bhi okha ọsi Angelena? (Yẹ fẹ ifoto ghe.)

⁹ Bha ji mhan fẹ ebe sunu ji obhio mhan nin okhuo natiọle Angelena a ghe nọn nyẹnlẹn bhi United States. Ọle da wo re izebhudu tẹmhọn Osẹnobulua bhi eji ọle da wo la miẹn iwẹnna. Ẹghe ọkpa, a da tie ọle bi ẹbho eso ne wo la mun ọne iwẹnna hẹn vae bhi ikolo ọkpa. A da yọle ele dẹ tẹmhọn egbe ele man egbe bhi ọne ikolo. Angelena da mhanmhan ifoto eso nin ọle ha rẹman. Ene ifoto dẹ rẹman eghọnghọn nin ọle miẹn ranmhude nin ọle rẹ yi ọkpa bhi Esali Jehova. Ọkuẹsẹ ẹghe nin ọle ha rẹ talọ, okpea ọkpa nin ele ko wẹnna da munhẹn ha tẹmhọn egbe ọle. Ọne okpea da yọle ghe, ọkpa bhi Esali Jehova ọle rẹ ka khin. Ọle da ha tẹmhọn ebe i mhẹn rẹji Esali Jehova bi iman-emhin nesele. Angelena da yọle: “Ukpudu da wo ha hian mẹn. Ọkpakinọn mẹn da ki nọọn egbe mẹn yọle; ‘Mẹn dẹ be khi obọ nin ọria re ohoghe ha riia Jehova elin an? La mẹn dẹ be rẹkpa ẹbho rẹ lẹn ẹmhọanta rẹji ọle?’”

¹⁰ Ọne okpea nin ele ko wẹnna ki talọ fo, Angelena da jẹje nan erọnmhọn bhi ẹkẹ ọkhọle.  Ọle da re ẹkẹ nọn fu taman ọne okpea yọle: “Esali Jehova aba mẹn bi inẹn mẹn khin, ọle mẹn yẹ khin rẹ dọ sẹbhi ẹlẹnan.” Ijerebhe da wo re osukpa fi ahiẹ a. Ọrẹyiriọ, Angelena da wo yẹ ku egbe ọi. Ọle da re ene ifoto nin ọle mun bhi usikoko kẹkẹ nesẹmhan man ele, yẹ re ẹwanlẹn bi ekpẹn rẹ taman ele ebi ọle rẹọ i. (1 Pita 3:15) Be ki nabhọre? Ẹghe nin Angelena ki rẹ talọ fo, ọkhọle ọsi ọne okpea da wo dere. Ọne okpea da yọle ghe ọle wo ha sọnyẹnmhẹn bhi oga ẹghe nin ọle rẹ ha yi ọkpa bhi Esali Jehova. Angelena da yọle: “Ọkhẹke nin mhan rẹkpa ẹbho rẹ lẹn ẹmhọanta rẹji Jehova.” Udede ekpẹn wo nọn nin mhan rẹ ha lu iriọ! Mhan dẹ yẹ sabọ gẹn Jehova yẹ re uyi ji ọle, sade ẹbho re ohoghe rẹ riia elin nọnsọle a.

11. Be bhọ eguọmhandia nesi Osẹnobulua sẹ rẹ re obọ rẹkhan adia nọn ribhi Psalm 96:8 yẹ?

¹¹ Tie Psalm 96:8. Mhan dẹ sabọ re ebi mhan mhọnlẹn rẹ gẹn Jehova. Kristiẹn ọsaje sẹ wo re ọne uwedẹ nan re ogẹn ji Jehova. (Prov. 3:9) Bhi ọsi ijiẹmhin, ibhokhan Izrẹl da re igho bi emhin nin ele mhọnlẹn rẹ rẹkpa bọn uwa oga, yẹ ha re ọle ọi nọnsẹn. (2 Ki. 12:​4, 5; 1 Chron. 29:​3-9) Eso bhi edibo nesi Jesu, da re emhin nin ele mhọnlẹn rẹ rẹkpa Jesu bi etuegbe nesọle. (Luk 8:​1-3) Kristiẹn bhi ore nin ọhẹnhẹn yẹ wo zẹ emhin bhi obọ rẹ rẹkpa ibhio ele. (Iwẹn. 11:​27-29) Ẹlẹnan nian, mhan dẹ yẹ sabọ re ọgẹn ji Jehova sade mhan re ọkhọle rebhe ze emhin bhi obọ rẹ rẹkpa agbotu.

12. Be igho nin mhan re ọbhi ẹkpẹti ha rẹ sabọ re ogẹn ji Jehova yẹ? (Yẹ fẹ ifoto ghe.)

¹² Bha ji mhan fẹ ijiẹmhin ọkpa nọn rẹman ebi mhan ha rẹ sabọ re ogẹn ji Jehova yẹ sade mhan zẹ emhin bhi obọ. Bhi ukpe 2020, a da ha ribhi ẹghe okale bhi otọ Zimbabwe. Ranmhude ọne okale bha kẹ sibhi otọ re, ukhunmhun da rẹ gbono ẹbho ne bunbun an. Ọne ukhunmhun da yẹ rẹso obhio mhan nin okhuo natiọle Prisca. Emhin rẹ dia inian, Prisca da yẹ wo ha dagbare bhi iwẹnna itẹmhọn Osẹnobulua ẹdẹ Wẹnẹzde bi Fraide. Ọle da yẹ wo ha lu iriọ bhi ẹghe nan rẹ kọ emhin bhi ugbo. Ẹbho da ha jẹ ọle ghe, nin ọle rẹ dọ miẹnsọn bhi ugbo, ọle dọ ha tẹmhọn Osẹnobulua. Ele ki ha taman ọlẹn yọle: “Ohanmhẹn dẹ gbe uwẹ a.” Ọkpakinọn, obhio mhan nin Prisca ki taman ele yọle: “Jehova bha sẹ fikekegbe eguọmhandia nesọle khẹ.”‏ Ọ bha sẹ bue gbe nin ọnan sunu, ebale nin agbotu munọ ji ibhio mhan nin emhin sunu je da sẹ ọle obọ. Igho nin mhan re ọbhi ẹkpẹti, ọle a rẹ rẹkpa ibhio  mhan ne sẹ inian. Ọne emhin nan nọn sunu da manman rẹso ediake nesi Prisca, bhiriọ, ele da taman ọlẹn yọle: “Osẹnobulua bha sẹ fikekegbe uwẹ khẹ, bhiriọ, mhan guanọ nin mhan luẹ ẹmhọn ọlẹn.” Itue ihinlọn bhi ediake nesọle da munhẹn ha yo ikolo oga.

13. Be uwedẹ nin mhan rẹ nyẹnlẹn ha rẹ sabọ re ogẹn ji Jehova yẹ? (Psalm 96:9)

¹³ Tie Psalm 96:9. Mhan dẹ sabọ re uwedẹ nin mhan rẹ nyẹnlẹn re ogẹn ji Jehova. Ọ wo ha yi emhin nọn khẹke nin ene ohẹn ne ha ga bhi uwa oga nọnsi Jehova rẹ ha kpe egbe ele a sade ele vae bhi uwa oga. (Ex. 40:​30-32) Ọ yẹ khẹke nin mhan ha yi eria ne khiale. Ọ i yi egbe nọnsẹmhan ọkpa mhan da ha kpe a, ọ yẹ khẹke nin mhan rẹban emhin nin Jehova hele. (Ps. 24:​3, 4; 1 Pita 1:​15, 16) Ọkhẹke nin mhan dọnmhegbe rẹ “kuọ unan ọria nin [mhan] ka rẹ ha khin” mun fia, ọnin hi, uwedẹ nọn i mhẹn nin mhan rẹ nyẹnlẹn yẹ lu emhin. Mhan ha yẹ “kiẹn unan ọria ọsọgbọn,” ọnin hi, nin mhan rẹ ha ria eria yẹ lu emhin bhi uwedẹ nọn ha ti Jehova bhọ, sẹyẹ, mhan ki ha re egbe khọkhọ ọle bhi ikpẹ esili nin ọle mhọnlẹn. (Kol. 3:​9, 10) Jehova dẹ sabọ rẹkpa ọria nọn lu emhin ebe nọn kaka rẹ sabọ kiẹn unan ọria ọsọgbọn.

14. Be uwẹ miẹn luẹ bhi okha ọsi Jack? (Yẹ fẹ ifoto ghe.)

¹⁴ Bha ji mhan fẹ okha ọsi Jack ghe. Ọle wo dijiẹ bhi emhin ebe rẹ sẹbhọ ghe, a da ha tie ọle Ọne Ẹlinmhin Ebe. Ranmhude emhin ebe kẹkẹ nin ọle lu, govamẹnt da yọle ghe, ele dẹ gbe ọle a. Beji Jack ha khẹ ẹghe nan ha rẹ gbe ọle a, ọle da deba obhio mhan ọkpa nọn ha rẹnẹ vae bhi ọne ighan luẹ Baibo. Arẹmiẹn ọle wo manman dijiẹ bhi emhin ebe, ọle da sabọ rẹban uwedẹ nọn i mhẹn nin ọle rẹ ha nyẹnlẹn. Bhiriọ, akizẹbue, ọle da mianmẹn. Ọne ukpẹdẹ ki sẹ nan ha rẹ gbe Jack a, eso bhi ene gbẹloghe onighan da ha viẹ, ele bha rẹ ho nin ọle yu ranmhude ọle ki wo dọ fidenọ. Ọkpa bhi ene gbẹloghe onighan da yọle: “Jack rẹ hi ọria nọn khọ nẹ bhi onighan ne ribhi enan. Sokpan, bhi ejayenan nian, ọle wo dọ kiẹn ọria esili.” Uzana ọkpa ki gbera, beji a gbe Jack a fo, ibhio mhan nin ikpea ne vae bhi ọne ighan dọ ha deba ene onighan do ikolo, da miẹn onighan ọkpa nọn vae bhi ọne ikolo bhi ọsi ọhẹnhẹn. Bezẹle nin ọle da vae bhi ọne ikolo? Uwedẹ nin Jack rẹ fidenọ, ọle rẹso ọle. Bhiriọ, ọle da vae bhi ọne ikolo beji ọle ha da lẹn ebi ọle ha lu nin ọle da sabọ ha ga Jehova. Bhi ọsi ẹmhọanta, uwedẹ nin mhan rẹ nyẹnlẹn dẹ  sabọ re ogẹn ji Aba mhan nọn ribhi okhun!—1 Pita 2:12.

BE JEHOVA HA RẸ RE UYI NIN EGBỌLE YẸ BHI ẸGHE ODALO?

15. Be Jehova ha rẹ re uyi nin egbọle yẹ bhi ẹghe odalo? (Psalm 96:​10-13)

¹⁵ Tie Psalm 96:​10-13. Ene ulọnlẹn ne kike bhi ebe ọsi Psalm 96 da rẹman ghe, Ojie nọn bhuohiẹn bhi uwedẹ nọn gbale Jehova khin. Be Jehova ha rẹ re uyi nin egbọle yẹ bhi ẹghe odalo? Bhi ẹghe nin ọle ha rẹ bhu ọne agbọn nan ohiẹn ọle ha rẹ lu ọnan. Bhi ẹghe nọn bha yẹ ree gbe nian, ọle ki fuẹn Babilọn Nọn Khua a ranmhude nọn rẹ re itọn sin elin nọn khiale nọnsọle. (Arẹm. 17:​5, 16; 19:​1, 2) Asabọmiẹn ẹbho eso dẹ dọ deba mhan ha ga Jehova sade ele daghe ebi a rẹ fuẹn Babilọn Nọn Khua a yẹ. Sẹyẹ, bhi okhọn Amagẹdọn, Jehova ki fuẹn ọne agbọn Esu nan an. Ọle ki fuẹn ẹbho a ne nanlẹn ha suan, ne yẹ re ohoghe riia ọle elin an. Ọkpakinọn, ọle ki re umiẹnfan nin ẹbho ne hoẹmhọn ọlẹn, ne hẹnmhọn nanlẹn, ne yẹ ha re ogẹn bi uyi ji elin nọnsọle. (Mak 8:38; 2 Tẹsẹ. 1:​6-10) Jehova dẹ kpe elin nọnsọle khia fo sẹsẹsẹ bhi ẹghe nin edọnmhẹn nọn kike ha rẹ gbera, sade Jesu gbẹloghe fo bhi ikpe uli. (Arẹm. 20:​7-10) Bhi ọne ẹghe nin, “ilẹnmhin ọsi uyi nọnsi Jehova dẹ gba ọne otọ nan rebhe beji amẹn rẹ gba okpẹdẹ.”—Hab. 2:14.

16. Be uwẹ ki muegbe rẹ lu nian? (Yẹ fẹ ifoto ghe.)

¹⁶ Ọ dẹ wo manman mhẹn an, bhi ẹghe nin ọrebhe ne nyẹnlẹn bhi ọne otọ nan ha rẹ ha re uyi bi ogẹn nọn khẹke elin nọnsi Jehova nanlẹn! Sokpan, ọkuẹsẹ ọne ẹghe nin, ọ dẹ wo ha mhẹn nin mhan rẹ ha noo isẹhoa nin mhan mhọn rẹ gẹn elin nọnsi Jehova. Nin mhan rẹ lẹn ebi ọ manman lu uhọnmhọn-emhin sẹ yẹ nin mhan rẹ ha re ogẹn ji Jehova, ọle zẹle nin Otu Nọn Sun Oga da zẹ Psalm 96:8 nọn ha yi uhọnmhọn-ọta ọsi ukpe 2025. Enin yọle: “Re uyi nọn khẹke elin nọnsi Jehova nanlẹn.”