UHỌNMHỌN-ỌTA NỌNZI 3
ILLO 35 Lẹn Emhin Ne Khẹke
Zẹ Ebe Ha Ti Jehova Bhọ
“Nan rẹ mun ofẹn Jehova hi umunhẹn ọsi ẹwanlẹn. Sẹyẹ, nan rẹ lẹn Ọnọn Khia Nẹ hi nan rẹ lẹn otọ emhin.”—PROV. 9:10.
EBI A HA LUẸ BHỌ
Mhan dẹ zilo nyan ebi ilẹnmhin bi ilẹn-otọ emhin ha rẹ rẹkpa mhan yẹ rẹ ha zẹ ebe ha ti Jehova bhọ.
1. Emhin nela nọghọ mhan rebhe rẹ lu ẹgheso?
UKPẸDẸ-UKPẸDẸ mhan rẹ zẹ ebi mhan ha lu. Emhin eso wo lẹkhẹ nin mhan rẹ zẹ, emhin bii, ebale nin mhan ha le, bi ẹghe nin mhan ha rẹ dọ nowẹ. Sokpan, eso i lẹkhẹ nin mhan rẹ zẹ. Eso bhi emhin nin mhan zẹ rẹ lu sabọ rẹ rẹso oga nin mhan re ji Jehova, ẹbho nesẹmhan, eghọnghọn nọnsẹmhan. Ọ dẹ yẹ rẹman si mhan dẹ ha mhọn egbe nọn danlẹn. Mhan ho nin mhan zẹ emhin nọn ha re imhan bi azagba-uwa nọnsẹmhan ha ghọnghọn. Ọnọn ke okhun nẹ hi, nin mhan rẹ zẹ emhin nọn ha re Jehova ha ghọnghọn.—Rom 12:1, 2.
2. Emhin nela uwẹ ha lu nin uwẹ da sabọ zẹ ebe ha ti Jehova bhọ?
2 Uwẹ dẹ sabọ zẹ ebe ha ti Jehova bhọ sade uwẹ (1) lẹn otọ ọne ẹmhọn nọnsẹn, (2) dọ fẹ ebi Jehova ghe ọne ẹmhọn yẹ, bi (3) sade uwẹ fẹ ọnọn mhẹn nẹ bhi emhin nin uwẹ ho nin uwẹ zẹ rẹ lu. Mhan dẹ zilo nyan ene emhin ea nan bhi ọne uhọnmhọn-ọta nan. Mhan dẹ yẹ zilo nyan ebi mhan ha rẹ sabọ ha noo ẹwanlẹn yẹ beji mhan ha da sabọ ha zẹ ebe ha ti Jehova bhọ.—Prov. 2:11.
LẸN OTỌ ỌNE ẸMHỌN NỌNSẸN
3. Sounun bhi ijiẹmhin nọn rẹman ebezẹle nọn da khẹke nin uwẹ lẹn otọ ẹmhọn fo ọkuẹsẹ uwẹ zẹ ebi uwẹ ha lu.
3 Emhin ọkpa nọn ha rẹkpa uwẹ rẹ zẹ emhin nọn gbale hi, nin uwẹ rẹ gua otọ ọne ẹmhọn nọnsẹn. Bezẹle nọn da khẹke nin mhan lu ọnan? Bha ji mhan fẹ ọne ijiẹmhin nan ghe. Nan man yọle ghe ọria bu dọkitọ dọ taman ọlẹn ghe egbe bha dan ọlẹn. Ọne idọkitọ dẹ be wo munhẹn ha gbẹloghe ọle? Eye! Ọle dẹ ka nọọn ọlẹn inọnta eso yẹ fẹ ọle egbe ghe beji ọle ha da lẹn ebi ọle ha rẹ gbẹloghe ọle yẹ. Iriọ yẹ nọn, mhan dẹ yẹ sabọ zẹ emhin nọn gbale rẹ lu sade mhan ka fẹ otọ ọne ẹmhọn ghe nọnsẹn. Be imhan ha rẹ sabọ lu iriọ yẹ?
4. Beji Proverbs 18:13 rẹman, be uwẹ ha lu beji uwẹ ha da sabọ lẹn otọ ẹmhọn nọnsẹn? (Yẹ fẹ ifoto ghe.)
4 Uwẹ dẹ sabọ lẹn otọ ẹmhọn nọnsẹn sade uwẹ nọọn ọta. Bhi ọsi ijiẹmhin, nan man yọle ghe ọria tie uwẹ bhi iluemhin ọkpa. Ọkuẹsẹ uwẹ zẹ si uwẹ dẹ yo, ọkhẹke nin uwẹ lẹn emhin eso rẹji ọne iluemhin. Ahamiẹn uwẹ bi ọne ọria bha re iriọ sikẹ egbe, la uwẹ bha lẹn ebi a ha rẹ lu emhin yẹ bhi enin, ọ dẹ ha mhẹn nin uwẹ rẹ nọọn ọlẹn inọnta eso ne dia inian: “Ẹghela a ha rẹ lu ọne iluemhin? Ijela a ha da lu ọle? Ẹbho dẹ be manman ha bun? Họla ha re emhin khian bhi enin? Hela vade? Emhin nela a ha lu bhi enin? A dẹ be gha anyọn nọn mun bhi enin?” Ewanniẹn nin ọle ha re nin uwẹ dẹ rẹkpa uwẹ rẹ zẹ emhin nọn mhẹn rẹ lu.—Tie Proverbs 18:13.
Nọọn inọnta beji uwẹ ha da lẹn otọ ọne ẹmhọn nọnsẹn (Fẹ uduọle nọnzi 4 ghe) a
5. Be ọkhẹke nin uwẹ lu sade uwẹ lẹn otọ ẹmhọn fo?
5 Ọnọn ki sẹ ọle bhi egbe hi, nin uwẹ rẹ ria eria nyan ewanniẹn nan re nin uwẹ. Bhi ọsi ijiẹmhin, be uwẹ ha lu yẹ sade uwẹ kere ghe ẹbho eso ne vade ọne iluemhin i re obọ rẹkhan adia ne ribhi Baibo? Be uwẹ ha lu yẹ sade uwẹ lẹn sẹbhọ ghe, anyọn nọn mun dẹ wo manman ha ribhọ, sẹyẹ ọdeọde ha tobọle da beji ọ rẹ ghọn ọlẹn? Uwẹ ha riale nọnsẹn, uwẹ ki kere ghe ọne iluemhin dẹ sabọ dọ kiẹn idujie ọsi ẹbibi. (1 Pita 4:3) Sẹyẹ, be uwẹ ha lu yẹ sade uwẹ kere ghe, ẹghe nan ha rẹ yo ikolo oga la inẹbho a ha rẹ lu ọne iluemhin? Ahamiẹn uwẹ ria eria nyan ene inọnta nan fo, ọ dẹ rẹkpa uwẹ rẹ lẹn ebi uwẹ ha zẹ rẹ lu nọn ha ti Jehova bhọ. Beji uwẹ ki lẹn ebi uwẹ ha rẹ re ọne ẹmhọn khian yẹ nian, emhin ọbhebhe yẹ ribhọ nọn khẹke nin uwẹ lu. Ọle hi, nin uwẹ rẹ lẹn ebi Jehova ghe ọne ẹmhọn yẹ.—Prov. 2:6.
FẸ EBI JEHOVA GHE ỌNE ẸMHỌN YẸ
6. Beji Jemis 1:5 rẹman, bezẹle nọn da khẹke nin mhan bhii Jehova nọn rẹkpa mhan?
6 Bhii Jehova nọn rẹkpa uwẹ rẹ lẹn ebi ọle ghe ọne ẹmhọn yẹ. Jehova ve ghe ọle dẹ re ẹwanlẹn nin mhan rẹ lẹn ebi mhan ha zẹ rẹ lu nọn ha ti ọle bhọ. Bhi ọsi ẹmhọanta, ọle wo re ọne ẹwanlẹn nin mhan, “ranmhude ọle manman zẹ emhin bhi obọ, ọle igbe ọria okan.”—Tie Jemis 1:5.
7. Be imhan ha rẹ sabọ lẹn ebi Jehova ghe ọne ẹmhọn yẹ? Re ijiẹmhin ọbhọ.
7 Ahamiẹn uwẹ bhii Jehova fo nin ọle re ẹwanlẹn nin uwẹ rẹ lẹn ebi uwẹ ha lu yẹ, dọnmhegbe rẹ lẹn ebi ọle ho nin uwẹ lu. Fẹ ọne ijiẹmhin nan ghe. Ahamiẹn uwẹ bibi odẹ beji uwẹ rẹ khian okhian, uwẹ dẹ nọọn ọria nin uwẹ miẹn nọn man uwẹ odẹ. Ọkpakinọn, uwẹ dẹ be kpanọ zẹ ọle obọ ọkuẹsẹ ọle re ewanniẹn nin uwẹ? Eye, uwẹ dẹ mundia ka ọle ehọ beji uwẹ ha da sabọ lẹn eji uwẹ ha rẹkhan. Iriọ yẹ nọn, ahamiẹn uwẹ bhii Jehova fo nin ọle re ẹwanlẹn nin uwẹ rẹ lẹn ebi uwẹ ha lu, dọnmhegbe rẹ lẹn ewanniẹn nin ọle ha re nin uwẹ. Nin uwẹ rẹ sabọ lu iriọ, dọ guanọ uhi bi adia bhi Baibo ne rẹtẹ ọne ẹmhọn. Bhi ọsi ijiẹmhin, ahamiẹn uwẹ riale si uwẹ dẹ yo ọne iluemhin nan da tie uwẹ, ọ dẹ ha mhẹn nin uwẹ rẹ dọ fẹ ebi Baibo tale rẹji idujie ọsi ẹbibi bi ikolu ne i mhẹn. Ọ dẹ yẹ ha mhẹn nin uwẹ rẹ dọ luẹ ẹmhọn ebezẹle nọn da khẹke nin uwẹ mun ẹmhọn Agbejele kalo bhi iẹnlẹn nọnsẹ gbera emhin nọn hi ki rẹ khin.—Mat. 6:33; Rom 13:13; 1 Kọr. 15:33.
8. Be uwẹ ha lu yẹ sade uwẹ guanọ urẹkpa rẹji ebi uwẹ ho nin uwẹ lu? (Yẹ fẹ ifoto ghe.)
8 Rẹ deba nin uwẹ rẹ tie Baibo, ọ dẹ ha mhẹn ẹgheso nin uwẹ rẹ taman ẹbho nin ele rẹkpa uwẹ bhi ọne ẹmhọn. Uwẹ dẹ sabọ miẹn urẹkpa bhi obọ obhio mhan nin okpea la okhuo nọn mhọn isẹlobhemhin. Uwẹ dẹ yẹ manman miẹn elele sade uwẹ dọ tobuwẹ gua otọ ọne ẹmhọn fẹghe. Uwẹ dẹ miẹn emhin ne ha rẹkpa uwẹ bhi ebe nesẹmhan. Ebe bọsi, Research Guide for Jehovah’s Witnesses bi Adia Ne Ribhi Ebenọnkhiale Ne Ha Sabọ Rẹkpa Mhan Bhi Iẹnlẹn. Ebi ọkhẹke nin uwẹ ha mhọn bhi ọkhọle hi: nin uwẹ rẹ sabọ zẹ emhin ne ha ti Jehova bhọ.
Ria eria nyan ebi Jehova ghe ọne ẹmhọn yẹ (Fẹ uduọle nọnzi 8 ghe) b
9. Be imhan ha rẹ sabọ lẹn yẹ ghe emhin nin mhan zẹ rẹ lu dẹ ti Jehova bhọ? (Ẹfẹsọs 5:17)
9 Be mhan ha rẹ sabọ lẹn yẹ ghe ebi mhan zẹ rẹ lu dẹ ti Jehova bhọ? Emhin ọhẹnhẹn nin mhan ha ka lu hi, nin mhan rẹ lẹn Jehova nọnsẹn. Baibo yọle ghe, “nan rẹ lẹn Ọnọn Khia Nẹ hi nan rẹ lẹn otọ emhin.” (Prov. 9:10) Nin mhan rẹ gene lẹn unan ọria nin Jehova khin, ọ dẹ ha mhẹn nin mhan rẹ lẹn ikpẹ nesọle, iho nọnsọle, ebe yẹẹ ọle bi ebe i yẹẹ ọle. Nọọn egbe ẹ, ‘Be ebi mẹn lẹnlẹn rẹji Jehova ha rẹ sabọ rẹkpa mẹn rẹ zẹ ebe ha ti ọle bhọ yẹ?’—Tie Ẹfẹsọs 5:17.
10. Bezẹle nọn da manman khẹke nin mhan mun ẹmhọn Jehova kalo gbera ebi azagba-uwa nọnsẹmhan guanọ nin mhan lu?
10 Ranmhude ghe mhan ho nin mhan lu ebe ti Jehova bhọ, ebi mhan ha zẹ rẹ lu ẹgheso dẹ sabọ re ẹkẹ khọ ẹbho ne manman sikẹ mhan. Bhi ọsi ijiẹmhin, aba bi inẹn ne mhọn emhin esili bhi ọkhọle rẹ da ọmọn nọnsele sabọ rẹ yọle ghe, okpea nọn manman mhọn igho, la nọn ha sabọ ha igho uhọnmhọn nọn kpọnọ ọmọn okhuo nọnsele ha bọ, aharẹmiẹn ghe ọne okpea i manman lu nọnsẹn bhi oga. Ẹmhọanta nọn ghe ele guanọ ọria nọn ha sabọ ha gbẹloghe ọmọn nọnsele. Ọkpakinọn, ahamiẹn ọmọn nọnsele bọ ọria nọn sẹ iriọ, họla ha ki ha gbẹloghe ọle bhi uwedẹ oriọn? Be Jehova ghe ọne ẹmhọn nan yẹ? Ewanniẹn rẹji ọne inọnta nan ribhi Matiu 6:33. Enin yọle ghe nin Kristiẹn wo ha “khu ọbhi Agbejele nọnsi Osẹnobulua.” Arẹmiẹn mhan manman mun ekpẹn nin ene biẹ mhan bi ene ribhi idunmhun nọnsẹmhan, ebi ọkhẹke nin mhan ha mun kalo hi, nin mhan rẹ ha lu ebe ha ti Jehova bhọ.
FẸ ỌNỌN MHẸN NẸ GHE BHI EBI UWẸ HO NIN UWẸ ZẸ RẸ LU
11. Be ẹmhọn nọn ribhi Filipai 1:9, 10 ha rẹ rẹkpa mhan yẹ rẹ lẹn ebi mhan ha zẹ rẹ lu?
11 Ahamiẹn uwẹ miẹn adia fo bhi Baibo ne ha rẹkpa uwẹ rẹ zẹ ebi uwẹ ha lu, ria eria nyan ọnọn mhẹn nẹ bhi ẹwẹ ele. (Tie Filipai 1:9, 10) Ilẹn-otọ emhin nin uwẹ mhọn ha rẹkpa uwẹ rẹ lẹn ebe ha sabọ nabhi ọne uwẹ ho nin uwẹ zẹ bhi ẹwẹ ele re. Ọ lẹkhẹ nin mhan rẹ zẹ ebi mhan ha lu ẹgheso, ọkpakinọn bhi ẹghe nekẹle, ọ i wo re iriọ lẹkhẹ. Ilẹn-otọ-emhin ha rẹkpa uwẹ rẹ zẹ ebi uwẹ ha lu aharẹmiẹn uwẹ ribhi idia nọn manman kaka.
12-13. Be ilẹn-otọ-emhin ha rẹ sabọ rẹkpa uwẹ yẹ rẹ zẹ iwẹnna nọn i da de idobolo ọbhi oga nin uwẹ re ji Jehova?
12 Ji a man yọle ghe, uwẹ guanọ iwẹnna nin uwẹ ha rẹ ha gbẹloghe azagba-uwa nọnsẹ. Uwẹ da miẹn iwẹnna eva ne bha dọbe nin Kristiẹn ha sabọ lu. Bhiriọ uwẹ da dọ fẹ emhin kẹkẹ ghe rẹji ene iwẹnna, bọsi ẹghe nan rẹ yo ele, ebi ele ree sẹ yẹ bhi eji uwẹ ye, bi emhin ebhebhe ne dia inian. Uwẹ ki lu enan rebhe fo, uwẹ da zẹ ọkpa bhọ. Asabọmiẹn ọne uwẹ zẹ yẹẹ uwẹ nẹ, la asabọmiẹn igho nan ha bhọ hu nẹ. Sokpan, emhin ebhebhe yẹ ribhọ nọn khẹke nin uwẹ ria eria nyan.
13 Bhi ọsi ijiẹmhin, ọne iwẹnna dẹ be re otọ nin uwẹ rẹ ha yo ikolo oga? Ọ dẹ be re otọ nin uwẹ rẹ deba azagba-uwa nọnsẹ ha gbẹghe kugbe, la re ẹghe nin uwẹ rẹ ha rẹkpa ele bhi uwedẹ oriọn? Inọnta ne sẹ inian dẹ rẹkpa uwẹ rẹ ha lu “emhin ne lu uhọnmhọn-emhin nẹ”, nọn yi nin uwẹ rẹ mun ẹmhọn oga bi ẹmhọn azagba-uwa nọnsẹ kalo gbera emhin nọn hi ki rẹ khin. Bhiriọ, uwẹ ki sabọ zẹ ebe ha ti Jehova bhọ.
14. Be ilẹn-otọ-emhin bi oyẹẹ ha rẹ rẹkpa mhan yẹ nin mhan hẹi wẹghẹ urẹọbhọ ọsi ẹbho a?
14 Ilẹn-otọ emhin dẹ rẹkpa mhan rẹ fẹ otọ ebi mhan zẹ rẹ lu ghe, beji a ha da miẹn mhan bha dọ “lu emhin nọn ha wẹghẹ urẹọbhọ ọsi eria ọbhebhe a.” (Fil. 1:10) Emhin nọn khẹke nin mhan ha mhọn bhi ọkhọle khọnan sade mhan zẹ ukpọn nin mhan ha yọ la uwedẹ nin mhan ha rẹ muegbe. Bhi ọsi ijiẹmhin, asabọmiẹn ukpọn ribhọ nọn manman yẹẹ mhan rẹ yọ. Sokpan, mhan dẹ yẹ yọ ọle sade ọ dẹ ha khọ ẹbho bhi ẹlo? Ilẹn-otọ-emhin dẹ rẹkpa mhan rẹ zẹ ukpọn nin mhan ha yọ nọn i da khọ ẹbho bhi ẹlo. Oyẹẹ nin mhan mhọn da ẹbho dẹ re mhan miẹn ghe mhan bha ha ria ẹmhọn egbe mhan ọkpa, ọ dẹ yẹ re mhan lu emhin ọbhi oleghe. (1 Kọr. 10:23, 24, 32; 1 Tim. 2:9, 10) Bhiriọ mhan ki sabọ rẹman ghe, mhan hoẹmhọn ẹbho, yẹ mun ekpẹn nin ele.
15. Emhin nela uwẹ ha lu nọn ha rẹkpa uwẹ rẹ mun emhanmhan nin uwẹ mhọn sẹ?
15 Ahamiẹn uwẹ ho nin uwẹ zẹ ebi uwẹ ha lu, ka ria eria nyan ebe ha rẹkpa uwẹ rẹ sabọ mun ọne emhanmhan sẹ. Jesu yọle ghe nin mhan ka “lolo eka nọn ha gbe.” (Luk 14:28) Ọnan rẹman ghe, uwẹ dẹ ka ria ẹmhọn eka ẹghe, igho bi ahu nọn ha gbe uwẹ le ọkuẹsẹ uwẹ sabọ mun ọne emhanmhan sẹ. Ẹgheso, ọ dẹ ha mhẹn nin uwẹ rẹ ka dọ deba azagba-uwa nọnsẹ zilo ọle, nin uwẹ rẹ lẹn ebi ọdeọde ha sabọ lu rẹ rẹkpa uwẹ rẹ mun ọne emhanmhan sẹ. Bezẹle nọn da khẹke nin uwẹ lu iriọ? Ọnan sabọ re uwẹ fi emhin eso denọ bhi ebi uwẹ ka rẹ zẹ, la re uwẹ miẹn uwedẹ ọbhebhe nọn mhẹn nẹ nin uwẹ ha rẹ sabọ mun ọne emhanmhan sẹ. Uwẹ ha tẹmhọn emhanmhan nọnsẹ man azagba-uwa nọnsẹ, yẹ ka ele ehọ, ele ki muegbe nin ele rẹ re iyobọ nin uwẹ rẹ sabọ mun ọne emhanmhan sẹ.—Prov. 15:22.
ZẸ EMHIN NỌN HA KIỌNLẸN NIN UWẸ
16. Be bhọ ha sabọ rẹkpa uwẹ rẹ zẹ emhin nọn ha kiọnlẹn nin uwẹ? (Yẹ fẹ ọne ẹkpẹti ghe nọn yọle “ Ebi Mhan Ha Rẹ Sabọ Ha Zẹ Emhin Ne Ha Ti Jehova Bhọ Yẹ.”)
16 Ahamiẹn uwẹ re obọ rẹkhan ene emhin nan nin mhan sẹ zilo ọle, uwẹ dẹ sabọ zẹ emhin nọn gbale rẹ lu. Ahamiẹn uwẹ fẹ otọ ẹmhọn ghe nọnsẹn, yẹ guanọ adia ne ha sabọ rẹkpa uwẹ rẹ zẹ ebi uwẹ ha lu, uwẹ ki sabọ zẹ ebe ha ti Jehova bhọ. Uwẹ ha lu iriọ fo, uwẹ ki bhii Jehova nọn rẹkpa uwẹ nin emhanmhan nọnsẹ da kiọnlẹn.
17. Emhin kpataki nela ha sabọ rẹkpa uwẹ rẹ zẹ emhin nọn mhẹn rẹ lu?
17 Aharẹmiẹn uwẹ sẹ ka zẹ emhin ne kiọnlẹn nin uwẹ bhi ẹghe nọn gbera khẹ, hẹi mun udu nyan ẹwanlẹn nọnsẹ, la ebi uwẹ lẹn. Bhii Jehova nin ọle re ẹwanlẹn nin uwẹ. Ọle ọkpa ha sabọ re ilẹnmhin bi ilẹn-otọ-emhin ọsaje nin uwẹ. Bhiriọ, uwẹ ki ha wanlan. (Prov. 2:1-5) Jehova dẹ sabọ rẹkpa uwẹ rẹ zẹ ebe ha ti ọle bhọ.—Ps. 23:2, 3.
ILLO 28 Kiẹn Ọmọẹ IJehova
