Baibo rẹman ghe, ẹghe nin Jesu rẹ mianmẹn bhi ukpe 29 C.E. ọle rẹ kiẹn Ojohẹn. Be bhọ iBaibo rẹ re ọnan man yẹ? Ẹghe nin Jesu rẹ mianmẹn, ọle da rẹman ghe ọle muegbe rẹ re iẹnlẹn nọnsọle rẹ lu iho nọnsi Osẹnobulua. Ọnan da wo diabe ghe ọle re iẹnlẹn nọnsọle rẹ zọese bhi uki ojukhuo-izọese. (Gal. 1:4; Heb. 10:​5-10) Beji a miẹn emhin kpataki ojukhuo khin bhi ẹkẹ uwa oga, mhan dẹ sabọ yọle ghe uwa oga ọsi oriọn munhẹn ẹghe nin Jesu rẹ mianmẹn fo. Uwa oga ọsi oriọn mundia nin emhanmhan rebhe nin Jehova mhọnlẹn nin mhan rẹ ha ga ọle bhi uwedẹ nọn gbale ranmhude uyumhin nin Jesu yu nin mhan.​—Matt. 3:​16, 17; Heb. 5:​4-6.

Ọkhẹke nin ojohẹn ha ribhi ọne uwa oga ọsi oriọn nan. Bhiriọ, Osẹnobulua da re ẹlinmhin nọn khiale rẹ zẹ iJesu nin ọle ha yi Ojohẹn. (Acts 10:​37, 38; Mark 1:​9-11) Be imhan rẹ lẹn yẹ ghe Jesu kiẹn Ojohẹn ọkuẹsẹ ọle yu yẹ riọ kpanọ ha khian okhun? Ijiẹmhin ọsi Aaron nin ojohẹn bi ene ha yi ojohẹn ẹghe nin Aaron rẹ yu fo dẹ sabọ rẹkpa mhan wanniẹn ọne inọnta nin.

Uhi nin Osẹnobulua na bhi obo iMoses gbe da tale ghe, ojohẹn ọkpa ha sabọ nabhi eje Khia Nẹ bhi uwa oga. A da re ukpọn rẹ wa eje Khia Nẹ bi eje Khiale a. Ẹghe nan rẹ lu iluemhin ọsi Ukpẹdẹ Izọese ọkpa Ojohẹn ha sabọ gbera ọne ukpọn diọbhi eje Khia Nẹ. (Heb. 9:​1-3, 6, 7) Mhan dẹ sabọ yọle ghe, beji Jehova rẹ zẹ Aaron bi eria nekẹle nin ele ha yi ojohẹn ọkuẹsẹ ele sabọ gbera ọne ukpọn nabhi eje Khia Nẹ, iriọ ọle yẹ rẹ re iJesu kiẹn Ojohẹn ọkuẹsẹ ọle yu yẹ riọ kpanọ ha khian okhun. Bhiriọ, ọle ki sabọ gbera “ukpọn nan rẹ wa uwa oga a, nọn mundia nin efun nọnsọle.” (Heb. 10:20) Ọnan zẹle nin Paul nin odibo da yọle ghe, Jesu dẹ vae bii Ojohẹn, ghe ọle dẹ na “uwa oga nọn kpọnọ nẹ gbera, nọn yẹ khia nẹ, nan bha re obọ bọn.” Okhun, ọle Paul ha tẹmhọnlẹn bhi enan.​—Heb. 9:​11, 24.

Ẹghela a rẹ mun akovẹn ọsọgbọn gbọ? Ẹghe nin Jesu rẹ yu fo yẹ riọkpanọ ha khian okhun, ọle da lu emhin nọn ha re Osẹnobulua re obọ ọbhi akovẹn ọsọgbọn nin ọle deba edibo nesọle ve. Be bhọ ene emhin nin Jesu lu?

Ọhẹnhẹn, Jesu da bu iJehova. Ọle ki sẹ bhi odalo iJehova, ọle da mun izọese ọsi iẹnlẹn nọnsọle nanlẹn. Jesu ki lu enan fo, Jehova da miẹn izọese ọsi iẹnlẹn nọnsọle ọbhi egbe. Enan rebhe sunu fo ọkuẹsẹ ọne akovẹn ọsọgbọn munhẹn.

Baibo bha taman mhan ẹghe nọn khin tee nin Jehova rẹ miẹn izọese ọsi iẹnlẹn nọnsi Jesu ọbhi egbe. Bhiriọ, mhan ida wo sabọ ta ẹghe nin ọne akovẹn ọsọgbọn rẹ munhẹn tee. Sokpan, mhan lẹnmhin ghe ọ ki ha yi ikpẹdẹ igbe ọkuẹsẹ iluemhin ọsi Pentecost munhẹn, ọle iJesu rẹ ha khian okhun. (Acts 1:3) Bhi ẹkẹ ene ikpẹdẹ igbe nan, ọle iJesu rẹ mun izọese ọsi iẹnlẹn nọnsọle nin Jehova. Jehova da miẹn ọne izọese ọbhi egbe. (Heb. 9:12) Mhan lẹnmhin ghe ẹmhọanta khọnan ranmhude ebe sunu bhi ukpẹdẹ iluemhin ọsi Pentecost bhi ukpe 33 C.E. (Acts 2:​1-4, 32, 33) Enan rebhe wo rẹman ghe ọne akovẹn ọsọgbọn munhẹn fo ẹghenin.

Nin mhan rẹ gba ọne ẹmhọn nan ukpẹ, ẹghe nin Jehova rẹ miẹn izọese ọsi iẹnlẹn nọnsi Jesu ọbhi egbe fo, ọle akovẹn ọsọgbọn rẹ munhẹn ha wẹnna. Jesu hi Ojohẹn nọn rẹkpa mhan bhii Jehova.​—Heb. 7:25; 8:​1-3, 6; 9:​13-15.