Jehova guanọ nin itue eva ne bọ egbe ha ghọnghọn yẹ ha mhọn ikolu nọn ziẹnlẹn rẹ ha khian. (Matt. 19:​4-6) Ahamiẹn uwẹ muegbe nin uwẹ rẹ bọ ọdọ la re okhuo, be uwẹ ha rẹ miẹn ọria esili bọ la re bhi amhẹn yẹ? Ranmhude iJehova man mhan, ọle lẹn ebe ha sabọ re eghọnghọn re bhi ibọdọ bi ire-okhuo nọnsẹmhan. Bhiriọ, mhan ha re obọ rẹkhan adia nin ọle ne nin mhan, mhan ki ha ghọnghọn. Bha ji mhan fẹ eso bhi ene adia nan ghe.

Ọkhẹke nin mhan ka lẹn ọnan rẹji egbe mhan: “Ọkhọle ọsi ọria ki sẹ hiẹ ọria gbera emhin rebhe. Ọnọghọmhin nan rẹ dia ọle ọbhi uwedẹ.” (Jer. 17:9) Ahamiẹn ọria nọn ho nin ọle bọ ọdọ la re okhuo munhẹn ha zẹ ọshọ, egbe sabọ rẹ mun ọlẹn sẹbhọ ghe, ọle ida yẹ ha ghe emhin bhi uwedẹ nọn khẹke. Eria ha lọnmhọn egbe ranmhude egbe mun ele, asabọmiẹn ele ha bọ egbe fo, ele ida ha ghọnghọn. (Prov. 28:26) Ọnan zẹle nọn ida yi emhin ẹwanlẹn nin itue eva ne wo la miẹn egbe rẹ munhẹn ha taman egbe ebi emhin dia ele yẹ bhi egbe, la ha ve ive nin egbe ọkuẹsẹ ele manman lẹn egbe nọnsẹn.

Proverbs 22:3 yọle: “Ọria nọn wanlan ha daghe emhin nọn ha si ikuan-egbe re, ọle ki nẹko. Ọria nọn imhọn ewanlẹn ha rẹ daghe ikuan-egbe, ọle ki sẹyẹ ji uhọnmhọn bhọ. Ọle ki yẹ loya nọn ha nabhọre.” Okhẹnan nela ha sabọ nabhọre sade mhan noo iwẹbsaiti nin ẹbho noo rẹ zẹ ọshọ? Ọ ba bhi egbe a ghe, ẹbho eso da miẹn eriọbhe bhi intanẹt yẹ munhẹn zẹ ele bhi ọshọ. Akizẹbue, ele da dọ lẹn sẹbhọ ghe, ọne ọria nin ele zẹ ọle ọshọ bhi intanẹt hiẹ ele. Eria ọbe ne man ha lu bii eria ne mhẹn sẹ mun ẹbho eso lu yẹ miẹn ele igho nọnsele. Ẹgheso, eso bhi ene eria ọbe nan ki ha bha ohoghe ghe Esali Jehova ele khin.

Bha yẹ ji mhan zilo nyan okhẹnan ọbhebhe. Wẹbsaiti eso nan rẹ zẹ ọshọ ribhọ nin ẹbho rẹ tare ẹbho ne ha sabọ zẹ egbe bhi ọshọ yẹ bọ egbe. Ọrẹyiriọ, ebe rẹman ghe ọnan wo wẹnna nin ẹbho iribhọ. Ọ ida ha yi emhin ẹwanlẹn nan rẹ mun udu tẹ wẹbsaiti nin eria tobele lu rẹ guanọ ọdọ la okhuo nin ele ha lọnmhọn. Ẹghe iribhọ nin emhin nin eria mhanmhan ọbhi kọmputa ha rẹ mhẹn gbera adia ne ribhi Baibo. Prov. 1:7; 3:​5-7.

Adia nọn ribhi Proverbs 14:15 yọle: “Ọnọn bha lẹn ejaye, ọle ọkpa rẹọbhi emhin rebhe, Ọkpakinọn ọnọn mhọn ẹwanlẹn ria eria nyan emhin rebhe.” Ọkuẹsẹ mhan zẹ ọria nin mhan ha bọ la re, ọkhẹke nin mhan ka lẹn ọne ọria nọnsẹn. Ọkpakinọn, ọ dẹ nọghọ mhan rẹ lẹn ọria nọnsẹn ahamiẹn intanẹt mhan da miẹn ọne ọria. Aharẹmiẹn uwẹ lẹn emhin  rẹji ọne ọria, la ibha ko gbe ẹghe rẹ ne egbe talọ, uwẹ dẹ be gene sabọ yọle ghe uwẹ lẹn ọne ọria nọnsẹn? Ẹghe nin ẹbho eso ne zẹ egbe bhi ọshọ bhi intanẹt rẹ miẹn egbe, ele da wo delinlẹn ranmhude emhin nin ele daghe.

Ọkpa bhi eria ne gbẹn ebe nọnsi psalm da yọle: “Mẹn ideba eria-eku muobọ. Ene re unan eria nin ele gene khin nẹko, mẹn siegbe nin ele.” (Ps. 26:4) Ẹbho ne bunbun riale ghe, ọ iyi emhin ọbe nin ọria rẹ bha ohoghe bhi intanẹt. Ele itaman ẹbho unan ọria nin ele gene khin ranmhude ele guanọ nin ẹbho hoẹmhọn ele. Asabọmiẹn ele ida re emhin ne imhẹn nin ele guẹ man. Ọkhẹke nin mhan ria ẹmhọn ewanniẹn rẹji ene inọnta nan: Ahamiẹn ẹbho yọle ghe Esali Jehova ele khin bhi intanẹt, ele be gene mianmẹn? Ele be deziẹn bhi oga? Ẹbho nan mun ekpẹn nan bhi agbotu ele be khin? Ẹbho nan ha sabọ ne lu imọẹ ele be khin la imọẹ ne imhẹn? (1 Cor. 15:33; 2 Tim. 2:​20, 21) Beji Baibo rẹman, ọria nan ha sabọ bọ la re bhi amhẹn ọle be khin? Ọkhẹke nin uwẹ lẹn ewanniẹn rẹji ene inọnta nan. Ọkpakinọn, ọ ida lẹkhẹ nin uwẹ rẹ miẹn ewanniẹn rẹji ene inọnta nan, sade uwẹ bha lẹn Esali Jehova ne lẹn ọne ọria ne talọ. (Prov. 15:22) Bhi ọsi ẹmhọanta, ọria nọn hoẹmhọn iJehova ida ha guanọ nin ọle lọnmhọn ọria nọn iga iJehova.​—2 Cor. 6:14; 1 Cor. 7:39.

Ranmhude okhẹnan ne nabhọre sade mhan noo intanẹt rẹ guanọ ọria nin mhan ha lọnmhọn, ọ dẹ ha mhẹn sade mhan noo uwedẹ ọbhebhe nin mhan ha rẹ guanọ ọria nin mhan ha lọnmhọn. Ejela uwẹ ha da sabọ miẹn ọria nin uwẹ ha bọ la re bhi amhẹn? Ahamiẹn mhan sabọ miẹn isẹhoa rẹ sikoko, mhan dẹ sabọ miẹn ẹbho bhi ikolo oga la usikoko kẹkẹ nesẹmhan, bi eji ebhebhe nin ibhio mhan da sikoko.

Ahamiẹn mhan bha sabọ sikoko bọsi ẹghe emianmhẹn natiọle COVID-19, mhan dẹ sabọ noo ifoni la kọmputa nesẹmhan. Bhiriọ, mhan ki miẹn isẹhoa rẹ miẹn ibhio mhan ne bha sẹ bọ ọdọ la re okhuo. Uwẹ dẹ daghe uwedẹ nin ele rẹ re ọta man bi uwedẹ nin ele rẹ re ewanniẹn ọbhi inọnta bhi ikolo oga. (1 Tim. 6:​11, 12) Ibha veva sabọ rẹ noo eji a tiọle breakout room bhi Zoom rẹ zilo, sade a zobọ bhi ikolo. Ahamiẹn mhan noo ifoni la kọmputa rẹ deba ibhio mhan re egbe re ahoho, mhan ki gbẹlokotọ daghe ebi ọria nin ẹmhọn ọlẹn yẹẹ mhan rẹ deba ẹbho nekẹle lu emhin yẹ. Bhiriọ, ọnan ki rẹkpa mhan lẹn unan ọria nin ọle gene khin. (1 Pet. 3:4) Beji ẹghe ha rẹ ha gbera, uwẹ ki sabọ lẹn si emhanmhan ọkpa ibha veva ko mhọnlẹn. Uwẹ ki yẹ lẹn si ibha veva dẹ sabọ bọ egbe.

Ahamiẹn ẹbho re obọ rẹkhan adia ne ribhi iBaibo rẹ guanọ ọria nin ele ha lọnmhọn, ele dẹ sabọ ha ghọnghọn bhi ibọdọ bi ire-okhuo nọnsele. Ọta nọn ribhi Proverbs 18:22 ki yẹ munsẹ bhi egbe ele. Enin yọle: “Ọria nọn miẹn amhẹn esili [la ọdọ] miẹn emhin nọn mhẹn, sẹyẹ, ọle [la amhẹn] miẹn erọnmhọn bhi obọ iJehova.”