1. Emhin nela Jehova lu nin uwẹ?

BE UWẸ rẹ dọ kiẹn ọkpa bhi Esali Jehova yẹ? Asabọmiẹn obọ ene biẹ uwẹ, ene ibha ko wẹnna, la ene ibha ko yo isiku uwẹ da ka họn ẹmhọn Osẹnobulua. A sabọ yẹ miẹn Esali Jehova vae dọ taman uwẹ bhi uwa. (Mark 13:10) Akizẹbue, ọria da noo ahu bi ẹghe nọnsọle rẹ deba uwẹ luẹ iBaibo. Beji uwẹ ki rẹ ha luẹ iBaibo, uwẹ da dọ manman hoẹmhọn iJehova. Uwẹ da yẹ dọ lẹn ghe, ọle yẹ hoẹmhọn ẹn. Iriọ uwẹ rẹ dọ luẹ ẹmhọanta yẹ kiẹn ọkpa bhi edibo nesi Jesu. Ranmhude ọnan, uwẹ mhọn ọne ikhuaẹloghe rẹ nyẹnlẹn bhi ighegheghe. (John 6:44) Edandan iribhọ ghe, ọ wo ti uwẹ bhọ ghe Jehova noo ọria rẹ man uwẹ ẹmhọanta ne ribhi Baibo, yẹ zẹ uwẹ nin uwẹ dọ ha yi ọguọmhandia nọnsọle.

2. Be imhan ha zilo nyan bhi ọne uhọnmhọn-ọta nan?

² Beji a miẹn ghe mhan dọ luẹ ẹmhọanta yẹ kiẹn ọkpa bhi Esali Jehova, mhan yẹ mhọn ọne isẹhoa nin mhan rẹ rẹkpa ẹbho kiẹn Esali Jehova. Ọ sabọ rẹ ha lẹkhẹ nin mhan rẹ ha tẹmhọn Osẹnọbulua rẹ na bhi uwa rẹ sẹbhi uwa. Sokpan, ọ sabọ ha nọghọ mhan rẹ ha man ẹbho iBaibo. Ahamiẹn inian ọ dia rẹji uwẹ, lẹn sẹbhọ ghe, emhin nan ha zilo nyan bhi ọne uhọnmhọn-ọta nan dẹ rẹkpa uwẹ. Mhan dẹ zilo nyan ebe re ọne ọhubhudu nin mhan rẹ rẹkpa ẹbho kiẹn edibo nesi Jesu. Mhan dẹ yẹ zilo nyan emhin eso ne re ọle nọghọ mhan rẹ ha man ẹbho iBaibo. Bha ji mhan ka zilo nyan ebezẹle nọn da khẹke nin mhan tẹmhọn Osẹnobulua man ẹbho yẹ man ele iBaibo.

3. Bezẹle nin mhan da tẹmhọn Osẹnobulua?

³ Ẹghe nin Jesu rẹ ha ribhi ọne otọ nan, ọle da taman ene rẹkhan ọlẹn emhin eva nin ele ha lu rẹji iwẹnna itẹmhọn Osẹnobulua.  Ọhẹnhẹn, ọle da taman ele nin ele tẹmhọn Agbejele nọnsi Osẹnobulua man ẹbho. Ọle da yẹ taman ele ebi ele ha rẹ lu ọle yẹ. (Matt. 10:7; Luke 8:1) Bhi ọsi ijiẹmhin, ọle da taman ele ebi ele ha lu yẹ sade ẹbho ka ele ehọ, bi ebi ele ha lu yẹ sade ẹbho bha ka ele ehọ. (Luke 9:​2-5) Jesu da yọle ghe, edibo nesọle dẹ wewe ẹmhọn Agbejele na bhi ije rebhe, rẹ sẹbhọ ghe, ọ ki ha yi ọsali rẹji agbaẹbho rebhe. (Matt. 24:14; Acts 1:8) Aharẹmiẹn ẹbho ka ehọ la ele bha ka ehọ, ọ sẹyẹ khẹke nin ele tẹmhọn Agbejele nọnsi Osẹnobulua man ẹbho, bi ebi ọne Ejele ha lu.

4. Rẹ deba nan rẹ ha tẹmhọn Osẹnobulua, emhin ọbhebhe nela ọkhẹke nin mhan lu beji Matthew 28:​18-20 rẹman?

⁴ Be bhọ emhin ọzeva nin Jesu taman edibo nesọle rẹji iwẹnna itẹmhọn Osẹnobulua? Jesu da taman edibo nesọle ghe, nin ele man ẹbho ne muegbe rẹ luẹ emhin nin ele re obọ rẹkhan emhin rebhe nin ọle rẹ gbe uhi nin ele. Ẹbho eso sabọ rẹ ha riale ghe, Kristiẹn bhi ore nin ọhẹnhẹn Jesu mun ọne ẹsọn nan. Ẹmhọanta be khọnan? Eye. Jesu da rẹman ghe, a dẹ miẹn ọne ẹsọn kpataki nan sẹbhi ọkpẹnlẹn ọsi ọne agbọn nan. (Tie Matthew 28:​18-20.) Asabọmiẹn ẹghe nin Jesu rẹ zegbere man edibo nesọle ne bun gbera itue 500 ọle rẹ ta ọnan. (1 Cor. 15:6) Bhi imianlo nin Jesu rẹman John, ọle da rẹman ghe, ọle guanọ nin edibo nesọle rebhe rẹkpa ẹbho luẹ ẹmhọn iJehova.​—Rev. 22:17.

5. Beji Paul tale bhi 1 Corinthians 3:​6-9, be iwẹnna itẹmhọn Osẹnobulua nin mhan lu, bi Baibo nin mhan man ẹbho le rẹ diẹn kugbe yẹ?

⁵ Paul nin odibo da re iwẹnna nan rẹ re ẹbho kiẹn edibo rẹ khọkhọ emhin nan kọ, nin ọle rẹ rẹman ghe, mhan dẹ lu gbera nan rẹ gheghe kọ ikpẹ. Ọle da taman iKristiẹn ne ha ribhi Corinth yọle: “Mẹn kọ emhin, Apollos da ha sa amẹn ọbhọ . . . Ugbo nọnsi Osẹnobulua nin ọle sẹyẹ gbẹloghe, ọle bha khin.” (Tie 1 Corinthians 3:​6-9.) Ranmhude ugbo nọnsi Osẹnobulua man da wẹnna, mhan iwo gheghe kọ ikpẹ zọbọ. Ọkpakinọn, mhan yẹ gbe amẹn khakha ọle, yẹ fẹ ebi ọ rẹ ha wanre yẹ. (John 4:35) Mhan lẹn sẹbhọ ghe, Jehova re ebi mhan kọ wanre.

6. Emhin nela ọkhẹke nin mhan rẹkpa ene imhan man ele iBaibo rẹ lu?

⁶ Ẹbho “ne muegbe nin ele rẹ nyẹnlẹn bhi uwedẹ nin ele ha da miẹn aribhọ ọsi ighegheghe” mhan guanọ. (Acts 13:48) Nin mhan da sabọ rẹkpa ẹbho ne sẹ inian kiẹn edibo nesi Jesu, ọkhẹke nin mhan rẹkpa ele rẹ (1) lẹn otọ emhin nin ele luẹ, (2) miẹn emhin nin ele luẹ ọbhi egbe, bi (3) ha re obọ rẹkhan emhin nin ele luẹ bhi Baibo. (John 17:3; Col. 2:​6, 7; 1 Thess. 2:13) Ọrebhe bhi ẹkẹ agbotu dẹ sabọ rẹkpa ẹbho nin mhan man ele iBaibo, sade ele re oyẹẹ man ele yẹ gbe obokhian nin ele ẹghe nin ele ha rẹ vae bhi ikolo oga nesẹmhan. (John 13:35) Obhio mhan nọn man ọria Baibo sabọ rẹ noo ahu, bi ẹghe nọnsọle rẹ rẹkpa ọria nin ọle man ọle iBaibo rẹ ne obọ sibhi emhin ne imhẹn nin ọle guẹ re. (2 Cor. 10:​4, 5) Ọ sabọ re uki ne bunbun ọkuẹsẹ mhan sabọ rẹkpa ọria fi emhin eso denọ, ọkuẹsẹ ọle sẹ ọria nọn ha mianmẹn. Ọkpakinọn, ọle dẹ wo miẹn elele sade ọle lu rẹkhan emhin nin ọle luẹ.

7. Bezẹle nin mhan da tẹmhọn Osẹnobulua yẹ re ẹbho kiẹn edibo?

⁷ Bezẹle nin mhan da tẹmhọn Osẹnobulua yẹ re ẹbho kiẹn edibo? Emhin ọhẹnhẹn nọn zẹle hi, mhan hoẹmhọn iJehova. Mhan rẹman ghe, mhan hoẹmhọn Osẹnobulua sade mhan dọ ha tẹmhọn ọlẹn man ẹbho yẹ re ele kiẹn edibo. (1 John 5:3) Ranmhude oyẹẹ nin uwẹ mhọn da Osẹnobulua, ọle zẹle nin uwẹ da dọ ha tẹmhọn ọlẹn man ẹbho. Iriọ a ha da miẹn ọnan bha lẹkhẹ nin uwẹ rẹ lu. Ẹghe nin uwẹ rẹ dọ tẹmhọn Osẹnobulua bhi ọsi ọhẹnhẹn, ofẹn be ha mun  uwẹ? Asabọmiẹn! Sokpan, uwẹ lẹnmhin ghe, ọne ẹsọn nan iJesu yọle nin uwẹ lu. Bhiriọ, uwẹ da hẹnmhọn nin Jesu. Asabọmiẹn beji ẹghe ki rẹ ha gbera, ọ da wo ha lẹkhẹ nin uwẹ rẹ ha lu iwẹnna itẹmhọn Osẹnobulua. Bhi ejayenan nian, be ọ dia uwẹ yẹ bhi egbe nin uwẹ rẹ ha man ẹbho iBaibo? Ofẹn be mun uwẹ sade uwẹ ria ẹmhọn ọlẹn? Iriọ a ha da miẹn. Ọkpakinọn, uwẹ ha bhii Jehova nin ọle rẹkpa uwẹ nin ofẹn hẹi yẹ mun uwẹ rẹ man ọria iBaibo, ọle ki rẹkpa uwẹ lu iriọ.

8. Beji Mark 6:34 rẹman, emhin ọbhebhe nela ha sabọ re imhan dọ ha man ẹbho iBaibo?

⁸ Oyẹẹ nin mhan mhọn da ẹbho emhin ọzeva nọn zẹle nin mhan da tẹmhọn Osẹnobulua. Bhi ọsi ijiẹmhin, ẹghe ọkpa ribhọ nin egbe rẹ wo manman lọ Jesu bi edibo nesọle, ranmhude ele ki zẹ manman tẹmhọn Osẹnobulua. Ele da ha guanọ eji ele ha da koahua. Ọkpakinọn, usun ẹbho da bu ele re. Ranmhude itohan nin Jesu ha mhọn da ele, ọle da munhẹn ha man ele emhin ne bunbun. (Tie Mark 6:34.) Arẹmiẹn egbe lọ ọle, ọle da sẹyẹ ha man ene ẹbho emhin. Bezẹle? Ranmhude, ọle lẹn ebi emhin dia ele yẹ bhi egbe. Ọle da ha guanọ nin ọle rẹkpa ele ranmhude ọle lẹnmhin ghe, ele loya yẹ guanọ ebe ha re iruduba nin ele. Ẹlẹnan nian, aharẹmiẹn ọ diabe ẹbho wo ghọnghọn bhi iẹnlẹn, ele wo mhọn ọnọghọ kẹkẹ yẹ guanọ iruduba. Ele wo diabe ihuan ne yulua, ne bha miẹn ọsun-ohuan nọn ha dia ele. Paul nin odibo da yọle ghe, ẹbho ne sẹ inian bha lẹn Osẹnobulua. Sẹyẹ, ele imhọn ikhuaẹloghe. (Eph. 2:12) Ele ribhi “uwedẹ nọn khian ugbekhuelo.” (Matt. 7:13) Ahamiẹn mhan ria ẹmhọn ẹbho ne bha sẹ lẹn Osẹnobulua ne ribhi agọ nọnsẹmhan, oyẹẹ bi ẹkẹ-ẹjẹjẹ nin mhan mhọn da ele ki re imhan ha guanọ nin mhan rẹkpa ele. Uwedẹ nọn mhẹn nẹ nin mhan ha rẹ rẹkpa ele hi, sade mhan deba ele ha luẹ iBaibo.

9. Beji Philippians 2:13 rẹman, be iJehova ha rẹ sabọ rẹkpa uwẹ yẹ?

⁹ Ofẹn sabọ ha mun uwẹ rẹ taman ọria ghe, uwẹ dẹ dọ ha man ọle iBaibo, ranmhude uwẹ lẹnmhin ghe, ọ dẹ gbe uwẹ ẹghe nin uwẹ rẹ ha muegbe ọbhi otọ rẹ man ọle iBaibo. Ahamiẹn inian ọ dia uwẹ bhi egbe, taman iJehova bhi erọnmhọn. Taman ọlẹn nin ọle rẹkpa uwẹ ha mhọn ọne ọkhọle nin uwẹ rẹ guanọ ọria nin uwẹ ha man ọle iBaibo. (Tie Philippians 2:13.) John nin odibo da taman mhan ghe, Jehova dẹ họn erọnmhọn ne diẹn mun iho Nọnsọle. (1 John 5:​14, 15) Bhiriọ, lẹn sẹbhọ ghe, Jehova dẹ rẹkpa uwẹ nin uwẹ da ha mhọn ọne ọkhọle rẹ man ọria iBaibo.

10-11. Emhin nela ha sabọ de imhan idobolo rẹ ha man ẹbho iBaibo?

¹⁰ Mhan lẹnmhin ghe, emhin kpataki nọn nin mhan rẹ ha man ẹbho iBaibo. Ọkpakinọn, emhin eso sabọ rẹ re ọle ha nọghọ mhan nin mhan rẹ lu eka nin mhan ho nin mhan lu rẹ re ẹbho kiẹn edibo. Bha ji mhan zilo nyan eso bhi ene emhin nan, bi ebi mhan ha rẹ sabọ khọn ele miotọ yẹ.

¹¹ Ọ sabọ ha nọgho mhan rẹ lu eka nin mhan ho nin mhan lu ranmhude idia nin mhan ye. Bhi ọsi ijiẹmhin, ibhio mhan eso dọmanlẹn, ele yẹ mhọn emianmhẹn nin ele ne daan. Ahamiẹn idia nọn sẹ inian uwẹ ye, ọkhẹke nin uwẹ ye ebi mhan luẹ re bhi ẹghe emianmhẹn natiọle COVID-19. Mhan da dọ kere ghe, mhan dẹ sabọ ha noo ifoni la kọmputa rẹ man ẹbho iBaibo. Bhiriọ, uwẹ dẹ sabọ na bhi uwa nọnsẹ ha man ọria iBaibo, aharẹmiẹn uwẹ bha diọbhi uwa nọnsọle. Emhin ọbhebhe yẹ ribhọ nọn zẹle nin ọne uwedẹ nan da mhẹn. Ẹbho eso guanọ nan dọ ha man ele iBaibo, ọkpakinọn, ibhio mhan ida miẹn ele ne zilo ẹghe nin ele ha rẹ dagbare bhi inẹbho. Ọrẹyiriọ, uwẹ dẹ sabọ ne ele zilo bhi Baibo ọsi ewewiẹ la ọsasọn. Uwẹ dẹ be sabọ ne ọria zilo bhi Baibo bhi ene ẹghe nan? Ọsasọn Jesu rẹ man Nicodemus emhin,  ranmhude ọne ẹghe nan Nicodemus rẹ miẹn otọ.​—John 3:​1, 2.

12. Be re imhan lẹn ghe, mhan dẹ sabọ ha yi ọria nọn sabọ man emhin nọnsẹn?

¹² Mhan sabọ ha riale ghe mhan ida sabọ man ọria Baibo ranmhude mhan bha manman lẹn emhin sẹ. Ahamiẹn inian ọ dia uwẹ bhi egbe, fẹ emhin ea ne ha sabọ rẹkpa uwẹ rẹọbhọ ghe, uwẹ dẹ sabọ man ọria iBaibo. Ọhẹnhẹn, Jehova yọle ghe, uwẹ sẹ ọria nọn ha man ọria iBaibo. (2 Cor. 3:5) Ọzeva, Jesu nan re ahu nan bhi otọ bi okhun yọle ghe, nin uwẹ dọ man ọria emhin. (Matt. 28:18) Ọzea, ibhio ẹ nin bha ko ga dẹ sabọ rẹkpa uwẹ. Uwẹ dẹ sabọ mun udu nyan iJehova nin ọle rẹkpa uwẹ beji Jesu lu. (John 8:28; 12:49) Rẹ deba ọnin, uwẹ sabọ rẹ taman obhio mhan nọn sun usun nin uwẹ deba dagbare bhi inẹbho, la ọkanẹfan nọn guẹ ebi a rẹ man emhin yẹ nin ọle rẹkpa uwẹ. Uwẹ sabọ yẹ rẹ taman obhio mhan nọn guẹ ebi a rẹ tẹmhọn Osẹnobulua yẹ nin ọle rẹkpa uwẹ. Emhin ọkpa nọn ha manman rẹkpa uwẹ rẹ guẹ ebi a rẹ man emhin nọnsẹn yẹ hi, sade uwẹ deba ọkpa bhi ene ibhio mhan nan dọ man ọria iBaibo.

13. Bezẹle nọn da khẹke nin mhan guẹ uwedẹ ọgbọn nin mhan rẹ lu iwẹnna itẹmhọn Osẹnobulua?

¹³ Ọ sabọ ha nọghọ mhan rẹ ha noo emhin ọgbọn bi uwedẹ ọgbọn nin mhan rẹ tẹmhọn Osẹnobulua. Uwedẹ nin mhan rẹ man ẹbho iBaibo fidenọ. Ọkuẹsẹ mhan dọ noo ebe natiọle Sọnyẹnmhẹn bhi Ighegheghe! rẹ dọ man ọria iBaibo, ọkhẹke nin mhan ka muegbe ọbhi otọ. Rẹ deba ọnin, mhan ki yẹ man ọne ọria iBaibo bhi uwedẹ nọn dikẹ bhi ebi mhan ka rẹ lu ọle khẹ. Mhan iyẹ tie ebe gbe. Ọkpakinọn, mhan noo ẹghe nọn taalẹn rẹ zilo nyan eji mhan tiele. Mhan manman noo ividio bi JW Library^® rẹ man ọria iBaibo. Ahamiẹn uwẹ bha guẹ ebi a rẹ noo ene emhin nan yẹ, taman ọria nọn guẹ ebi a rẹ noo ele yẹ nin ọle rẹkpa uwẹ. Ranmhude ebi mhan ne eria guẹle ikẹ si mhan bhi egbe re, ọ sabọ ha nọghọ imhan rẹ guẹ ene uwedẹ ọgbọn nan. Ọkpakinọn, Jehova bi ibhio mhan dẹ sabọ rẹkpa uwẹ rẹ guẹ ebi a rẹ noo ene uwedẹ ọgbọn nan yẹ, rẹ sẹbhọ ghe, ọ ki ha ghọn uwẹ rẹ ha man ẹbho iBaibo. Obhio mhan nọn lu iwẹnna ọkanẹfan da yọle ghe, ọne uwedẹ ọgbọn nan rẹ luẹ emhin nan, “re ọria nan man ọlẹn iBaibo, bi ọnọn man ọria iBaibo ghọnghọn.”

14. Be ọkhẹke nin mhan ha yere sade mhan tẹmhọn Osẹnobulua bhi agọ nin ẹbho ida kẹ ka mhan ẹho? Ọta izebhudu nela mhan miẹn bhi 1 Corinthians 3:​6, 7?

¹⁴ Asabọmiẹn agọ nọn bha da lẹkhẹ nan rẹ munhẹn ha man ẹbho Baibo mhan da nyẹnlẹn. Ọ iyẹẹ ẹbho eso rẹ ha re ehọ bhi uhọnmhunje nin mhan wewe. Be ha rẹkpa mhan rẹ rẹọbhọ ghe, ele dẹ ka mhan ehọ ẹdẹ ọkpa? Yere ghe, idia nin ẹbho ye wo re ẹjẹje fidenọ bhi ẹghe ọkakale nin mhan da ha nyẹnlẹn. Bhiriọ, ẹbho ne ika ka mhan ehọ khẹ sabọ rẹ dọ ha ka mhan ehọ. (Matt. 5:3) Eria ne ika ne ebe nesẹmhan khẹ ki ka nan dọ ha man ele iBaibo. (Matt. 9:38) Mhan yẹ lẹn ghe, Jehova hi ọnọn je mhan nin mhan dọ tẹmhọn ọlẹn man ẹbho. (Matt. 9:38) Ọle guanọ nin mhan wo ha tẹmhọn ọlẹn man ẹbho yẹ man ele emhin. Ọkpakinọn, ọle hi ọnọn ha si ele re nin ele dọ ga ọle. (1 Cor. 3:​6, 7) Emhin eghọnghọn nọn ghe, arẹmiẹn mhan imhọn ẹbho nin mhan man ele iBaibo nian, Jehova dẹ nan erọnmhọn nin mhan ranmhude mhan dọnmhegbe ha tẹmhọn ọlẹn man ẹbho, ọ iyi ranmhude eka ebe nin mhan sabọ ne nin ẹbho, la eka ẹbho nin mhan man ele iBaibo. *

15. Be ọ dia iJehova bhi egbe yẹ sade ọria ka nan ha man ọlẹn iBaibo yẹ lu rẹkhan ebi ọle luẹ?

¹⁵ Ọ re iJehova ghọnghọn sade ẹbho miẹn ẹmhọanta ọbhi egbe, yẹ ha taman ẹbho  ẹmhọanta nin ele luẹle. (Prov. 23:​15, 16) Ọ dẹ wo re ọle ha ghọnghọn sade ọle daghe ẹbho nesọle re ọhubhudu tẹmhọn ọlẹn. Bhi ọsi ijiẹmhin, arẹmiẹn emianmhẹn natiọle COVID-19 wo ha ribhọ bhi ukpe iwẹnna oga ọsi ukpe 2020, ibhio mhan da dọnmhegbe man ẹbho ne bun sẹbhi 7,705,765 Baibo. Ranmhude ọnan, ẹbho ne bun sẹbhi 241,994 da re egbe guẹ nin Jehova yẹ mianmẹn. Ene ẹbho nan ne la mianmẹn ki yẹ man ẹbho iBaibo, yẹ re ele kiẹn edibo. (Luke 6:40) Edandan iribhọ ghe, mhan re iJehova ghọnghọn sade mhan man ẹbho iBaibo yẹ re ele kiẹn edibo.

16. Emhanmhan nela mhan ha sabọ ha mhọnlẹn?

¹⁶ Nan rẹ re ẹbho kiẹn edibo iyi iwẹnna nọn lẹkhẹ. Ọkpakinọn, Jehova dẹ sabọ rẹkpa mhan man ẹbho emhin nin ele dọ hoẹmhọn ọlẹn. Mhan dẹ be sabọ ha mhọn ọlẹn bhi emhanmhan nin mhan rẹ ha man ọria iBaibo aharẹmiẹn otuọnkpa nọn? Ọ dẹ han mhan ilo elele nọn ha nabhọre sade mhan noo isẹhoa nin mhan miẹn rebhe rẹ nọọn ọria si ọ dẹ yẹẹ ọle nin mhan rẹ dọ deba ọle ha luẹ iBaibo. Mhan ha mhọn ọlẹn bhi ọkhọle ghe, Jehova dẹ rẹkpa mhan sade mhan dọnmhegbe.

17. Be emhin ha dia mhan yẹ bhi egbe sade mhan mhọn ọria nin mhan man ọlẹn iBaibo?

¹⁷ Udede isẹhoa nọn rẹji mhan ghe, mhan tẹmhọn Osẹnobulua man ẹbho yẹ man ele ẹmhọanta ne ribhi Baibo. Ọne iwẹnna nan gene re imhan ghọnghọn. Paul nin odibo nọn rẹkpa ẹbho ne bunbun bhi Thessalonica kiẹn edibo da tẹmhọn ebi emhin dia ọle yẹ bhi egbe ẹghe nin ọle rẹ yọle: “Be bhọ hi ikhuaẹloghe la eghọnghọn la ukparu ọsi ọnyẹnmhẹn nin mhan mhọnlẹn bhi odalo ọsi Jesu nin Ebeanlẹn mhan bhi ẹghe nin ọle ha rẹ vae? Ọ bhọ ibe yi bha? Ibha gene hi uyi bi eghọnghọn nọnsẹmhan.” (1 Thess. 2:​19, 20; Acts 17:​1-4) Beji ọ dia iPaul bhi egbe, iriọ ọ wo yẹ dia rẹji ibhio mhan ne bunbun ẹlẹnan. Obhio mhan nin okhuo natiọle Stéphanie nin ọle bi ọdọ ọle rẹkpa ẹbho ne bunbun mianmẹn da yọle: “Emhin ọbhebhe ire eghọnghọn re gbera nan rẹ rẹkpa ẹbho re egbe guẹ nin Jehova yẹ mianmẹn.”