1. Be bhọ hi iho nọnsi Jehova ẹlẹnan?

 IHO nọnsi Osẹnobulua nọn ẹlẹnan, nan rẹ tẹmhọn Agbejele na bhi ọne otọ agbọn nan rebhe. (Mark 13:10; 1 Tim. 2:3, 4) Iwẹnna ọsi Jehova khọnan. Sẹyẹ, ọ manman lu uhọnmhọn emhin sẹbhọ ghe, ọle da zẹ Ọmọn nọnsọle nin ọle hoẹmhọnlẹn nin ọle ha dia ọne iwẹnna. Mhan dẹ sabọ rẹọbhọ ghe, ranmhude Jesu hi ọnọn dia mhan, a dẹ sabọ lu iwẹnna itẹmhọn Osẹnobulua sẹbhi ẹghe nin Jehova rẹyi ọkuẹsẹ ọkpẹnlẹn vae.—Matt. 24:14.

2. Be imhan ha zilo nyan bhi ọne uhọnmhọn-ọta nan?

² Bhi ọne uhọnmhọn-ọta nan, mhan dẹ daghe ebi Jesu rẹ ha noo “ọguọmhandia nọn wanlan nan gbaẹkẹ ọle” nọnsọle, rẹ re ebale oriọn nin mhan, yẹ noo ele rẹ rẹkpa mhan lu iwẹnna itẹmhọn Osẹnobulua. (Matt. 24:45) Mhan dẹ yẹ daghe ebi ọdeọde bhi ẹwẹ mhan ha sabọ lu rẹ re iyobọ nin Jesu, bi ọne ọguamhandia nan gbaẹkẹ ọle.

3. Ahu nela a re nin Jesu?

³ Jesu hi ọnọn sun iwẹnna itẹmhọn Osẹnobulua nin mhan lu. Be re imhan rẹọbhi ọnan? Ọ bha sẹ bue gbe ọkuẹsẹ Jesu fikie ha khian okhun, ọle da deba eso bhi edibo nesọle ne sun rẹkhan ọlẹn zilo bhi uke oke bhi Galili. Ọle da taman ele yọle: “A re ahu rebhe nin mẹn bhi otọ bi okhun.” Gbẹlokotọ bhi ebi ọle kie ta. Ọle da yọle: “Bha ha khian dọ re ẹbho kiẹn edibo bhi agbaẹbho rebhe.” (Matt. 28:18, 19) Bhiriọ, rẹ deba emhin nekẹle, a re ọne ahu nin Jesu rẹ ha sun iwẹnna itẹmhọn Osẹnobulua nin mhan lu.

4. Bezẹle nin mhan ha da sabọ rẹọbhọ ghe, Jesu sẹyẹ dia iwẹnna itẹmhọn Osẹnobulua nin mhan lu?

⁴ Jesu da yọle ghe, a dẹ lu iwẹnna itẹmhọn Osẹnobulua,  yẹ re ẹbho kiẹn edibo bhi otọ ọne agbọn nan rebhe. Sẹyẹ, ọle da yọle ghe, ọle dẹ nin ene rẹkhan ọlẹn dia “rẹ na bhi ene ikpẹdẹ rebhe rẹ dọ sẹbhi ọkpẹnlẹn ọsi ọne agbọn nan.” (Matt. 28:20) Ene ọta nan rẹman ghe, Jesu dẹ ha dia iwẹnna itẹmhọn Osẹnobulua rẹ sẹbhi ẹghe nọnsẹmhan.

5. Be imhan rẹ ha deba mun ebe ribhi Psalm 110:3 sẹ yẹ?

⁵ Jesu bha ha kpokpo egbe ghe, a ida miẹn ẹbho rẹ lu iwẹnna itẹmhọn Osẹnobulua bhi ẹghe ọkike ọsi ọne agbọn nan. Ọle lẹn sẹbhọ ghe, ọne ọta akhasẹ nan gbẹn ọbhi ebe ọsi Psalm nan dẹ munsẹ nọn yọle: “Ẹbho nesẹ dẹ tobele zegbere bhi ukpẹdẹ nin eyokhọnlẹn nesẹ ha rẹ muegbe okhọn.” (Ps. 110:3) Ahamiẹn uwẹ deba ha tẹmhọn Osẹnobulua, uwẹ wo ha re iyobọ nin Jesu riọ, bi ọne ọguọmhandia nan gbaẹkẹ ọle. Sẹyẹ, uwẹ yẹ dẹba ha mun ọne ọta akhasẹ nan sẹ. Iwẹnna itẹmhọn Osẹnobulua nin mhan lu wo ha lu re alo. Ọkpakinọn, ọnọghọ eso ribhọ.

6. Ọnọghọ ọkpa nela ẹbho ne tẹmhọn Osẹnobulua kuẹlo da ẹlẹnan?

⁶ Ekpokpo hi ọnọghọ ọkpa nin ene tẹmhọn Osẹnobulua miẹn. Ẹbho ne de sibhi oga re, ene mun ọkalo bhi otuẹ, bi ekhẹn ahinmhin-ibo taman ẹbho ne bunbun ohoghe rẹji iwẹnna itẹmhon Osẹnobulua nin mhan lu. Ahamiẹn ene ribhi azagba-uwa mhan, ẹbho nin mhan lẹnlẹn, bi ẹbho nin mhan ko wẹnna rẹọbhi ọne ohoghe nan, ele sabọ rẹ ha sua mhan ọbhọ nin mhan zobọ bhọ rẹ ha ga Jehova, bi nin mhan hẹi yẹ ha tẹmhọn Osẹnobulua. Bhi agbaẹbho eso, eghian mhan sabo rẹ ha denyẹnyẹn mhan yẹ ha kpokpo mhan, la mun ibhio mhan khue, yẹ bhọ je ele ha khian ighan. Ọnan bha han mhan ilo hiehie, ranmhude Jesu yọle: “Agbaẹbho rebhe ki he bha ranmhude elin nọnsẹmhẹn.” (Matt. 24:9) Ọne uwedẹ nan nin ẹbho rẹ he mhan rẹman ghe, Jehova re ẹlo esili ha ghe mhan. (Matt. 5:11, 12) Esu hi ọnọn noo ene ẹbho nan rẹ kpokpo mhan. Ọkpakinọn, Jesu manman mhọn ahu gbera Esu! Ranmhude iyobọ nin Jesu re nin mhan, mhan wo sabọ ha tẹmhọn Agbejele nọnsi Osẹnobulua man ẹbho bhi agbaẹbho rebhe. Bha ji mhan fẹ ebezẹle nin mhan da ta iriọ.

7. Be uwẹ daghe nọn rẹman ghe ebi a gbẹn ọbhi Revelation 14:6, 7 wo ha munsẹ?

⁷ Ọnọghọ ọbhebhe nin mhan miẹn sade mhan tẹmhọn Osẹnobulua hi, urolo kẹkẹ nin ẹbho zẹ. Bhi imianlo nin Jesu rẹ nin John nin odibo miẹn, Jesu da yọle ghe, bhi ẹghe nọnsẹmhan, mhan dẹ sabọ ha tẹmhọn Agbejele nọnsi Osẹnobulua, arẹmiẹn ẹbho izẹ urolo ọkpa. (Tie Revelation 14:6, 7.) Be ọ rẹ yi iriọ yẹ? Mhan re isẹhoa nin ẹbho ne bunbun nin ele rẹ họn ẹmhọn Agbejele. Ẹlẹnan, ẹbho bhi ọne otọ agbọn nan rebhe sabọ tie ebe nesẹmhan bhi wẹbsaiti nọnsẹmhan natiọle jw.org, ranmhude ele dagbare bhi urolo ne bun gbera 1,000. Otu nọn sun oga da yẹ re obọ ọbhọ nan rẹ zedu ebe nọnsẹmhan natiọle Sọnyẹnmhẹn bhi Ighegheghe! nin mhan rẹ man ẹbho Baibo, diọbhi urolo ne gbera 700. Nin ene yehọ da yẹ sabọ ha miẹn ebale oriọn, a da lu ene ebale oriọn dagbare bhi ividio nin ele. Sẹyẹ, a da ne ebe nesẹmhan dagbare bhi braille nin ẹbho ne idaghe. Mhan wo ha daghe ebi ọta akhasẹ ne ribhi Baibo rẹ ha munsẹ yẹ. Ẹbho “ne na bhi agbaẹbho bi urolo kẹkẹ vae” wo ha luẹ ebi ele ha rẹ ha “zẹ urolo nọn khiale” ọsi ẹmhọanta ne  ribhi Baibo yẹ. (Zech. 8:23; Zeph. 3:9) Mhan sabọ ha lu enan rebhe ranmhude Jesu hi ọnọn dia mhan.

8. Elele nela sẹ na bhi iwẹnna itẹmhọn Osẹnobulua nin mhan lu re?

⁸ Ẹlẹnan, ẹbho ne bun gbera 8,000,000 ne ribhi agbaẹbho ne bun sẹbhi 240 ribhi agbotu nọnsi Jehova. Sẹyẹ, ukpe-ukpe ẹbho ne bunbun rẹ mianmẹn. Ọrẹyiriọ, ebe lu uhọnmhọn emhin gbera eka itue nin mhan khin hi, ikpẹ esili nin ene ẹbho nan ne la kiẹn edibo dọ ha mhọnlẹn. (Col. 3:8-10) Ene bunbun da zobọ bhi ilọnmhọn oghẹ nin ele rẹ ha lu, ohu nọn re ele. Sẹyẹ, ele bha yẹ ha zọn ọria soso, la re unun ha riia ọria a ranmhude agbaẹbho nin ọle na vae. Ọta akhasẹ nan gbẹn ọbhi Isaiah 2:4 wo ha munsẹ. Ele bha yẹ ‘kie dọ ha luẹ okhọn.’ Beji mhan ha rẹ ha dọnmhegbe nin mhan rẹ ha re obọ rẹkhan uhi nesi Jehova, mhan ki rẹkpa ẹbho rẹ ha vae bhi agbotu nọnsọle. Sẹyẹ, mhan ki rẹman ghe, mhan rẹkhan Jesu Kristi nọn sun mhan. (John 13:35; 1 Pet. 2:12) Ọnan bha wo gheghe tobọle sunu, Jesu hi ọnọn rẹkpa mhan.

9. Beji Matthew 24:45-47 rẹman, be Jesu yọle ọ dẹ sunu bhi ẹghe ọkike ọsi ọne agbọn nan?

⁹ Tie Matthew 24:45-47. Jesu da yọle ghe, bhi ẹghe ọkike ọsi ọne agbọn nan, ọle dẹ zẹ “ọguọmhandia nọn wanlan nan gbaẹkẹ ọle,” nọn ha re ebale oriọn nin mhan. Bhiriọ, ọne ọguọmhandia nan dẹ wo wẹnna kaka bhi ẹghe nọnsẹmhan. Iriọ wo gene nọn ẹlẹnan. Jesu noo obhi usun khere ọsi ikpea bhi enanzẹle rẹ re ebale oriọn nin ẹbho nesi Osẹnobulua, bi ẹbho ne mhọn ọne ọhubhudu rẹ luẹ ẹmhọn Osẹnobulua, bhi ẹghe nọn khẹke. Ene ikpea nan ighe egbe ele bii ebeanlẹn ọsi ibhio mhan. (2 Cor. 1:24) Sokpan, ele lẹnmhin ghe, Jesu Kristi hi ‘ọkakulo bi ọnọn re ẹbho nesọle khian.’—Isa. 55:4.

10. Ebe nela bhi ẹwẹ ebe nesẹmhan nan rẹman bhi ifoto rẹkpa uwẹ rẹ dọ ga Jehova?

 ¹⁰ Rẹ na bhi ukpe 1919 ha vade, ọle ọne ọguọmhandia nan gbaẹkẹ ọle rẹ wo ha zẹ ebe kẹkẹ dagbare, ne rẹkpa ẹbho ne mhọn ọne ọhubhudu rẹ luẹ ẹmhọn Osẹnobulua, rẹ miẹn ọne isẹhoa rẹ luẹ ẹmhọanta ne ribhi Baibo. Bhi ukpe 1921, ọne ọguọmhandia nan gbaẹkẹ ọle da zẹ ebe natiọle The Harp of God dagbare, nọn ha rẹkpa ẹbho ne mhọn ọne ọhubhudu rẹ luẹ ẹmhọn Osẹnobulua rẹ luẹ emhin eso bhi Baibo. Beji ẹghe ki rẹ ha gbera, agbotu da zẹ ebe kẹkẹ dagbare. Ebe nela rẹkpa uwẹ rẹ lẹn Aba mhan nọn ribhi okhun yẹ hoẹmhọn ọlẹn? Ọ be yi “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Emhin Nela Mhan Ha Miẹn Luẹ Bhi Baibo?, la ebe nọnsẹmhan nan wo la re dagbare natiọle, Sọnyẹnmhẹn bhi Ighegheghe!? A da ne ene ebe nan rebhe dagbare, beji ele ha da rẹkpa mhan rẹ re ẹbho kiẹn edibo. Sẹyẹ, ele da wo ha yi ebi mhan ha guanọ bhi ẹghe nan rẹ ne ele dagbare.

11. Bezẹle nọn da khẹke nin mhan rebhe manman ha luẹ ẹmhọn Jehova, yẹ luẹ Baibo?

¹¹ Ọ iyi ẹbho ne la munhẹn ha luẹ Baibo ọkpa ọkhẹke ne manman lẹn otọ Baibo nọnsẹn, bi ẹmhọn Jehova. Ọkhẹke nin mhan rebhe yẹ ha lu iriọ. Paul nin odibo da gbẹn yọle: “Ebale nọn zeze, ọle ẹbho ne wanre le.” Ọle da yẹ yọle ghe, ahamiẹn mhan re obọ rẹkhan ebi mhan luẹ bhi Baibo, ọ dẹ rẹkpa mhan rẹ “lẹn ikẹkẹ bhi emhin ne mhẹn bi emhin ne imhẹn.” (Heb. 5:14) Ọ bha lẹkhẹ nan rẹ re obọ rẹkhan uhi nesi Jehova ẹlẹnan, ranmhude ẹbho ne bunbun wo ha nyẹn iẹnlẹn esankan. Ọkpakinọn, Jesu lu ọle beji mhan ha da luẹ emhin ne ha rẹkpa mhan ziẹn urẹọbhọ nọnsẹmhan. Ẹkẹ Baibo mhan da luẹ ene emhin nan. Jesu dia ọne igbọn nan gbaẹkẹ ọle rẹ re ebale oriọn nin mhan.

12. Bọsi Jesu, be imhan rẹ ha mun ekpẹn nin elin nọnsi Osẹnobulua yẹ?

 ¹² Bọsi Jesu, mhan wo manman mun ekpẹn nin elin nọnsi Osẹnobulua. (John 17:6, 26) Bhi ọsi ijiẹmhin, bhi ukpe 1931, a da ha tie mhan Esali Jehova. A da re ọne elin nan dagbare bhi ẹkẹ Baibo. Nin mhan rẹ lu iriọ, mhan da rẹman ghe, elin nọnsi Osẹnobulua manman lu uhọnmhọn emhin rẹji mhan, ghe mhan guanọ nan lẹn mhan mun elin nọnsi Aba mhan nọn ribhi okhun. (Isa. 43:10-12) Sẹyẹ, rẹ na bhi uki ọsi Ọtoba bhi ọne ukpe nin ha vade, ọle a rẹ munhẹn ha gbẹn ọne elin nan ọbhi odalo ọsi Ebe Ọkhẹughe. Rẹ deba ọnan, a re elin nọnsi Osẹnobulua ọbhi eje kẹkẹ nọn khẹke nọn ha ye bhi New World Translation of the Holy Scriptures. Ọnan wo dikẹ bhi otuẹ kikẹ ne re elin nọnsi Jehova kie bhi Baibo ne bunbun nin ele zedu ọle.

13. Be re uwẹ rẹọbhọ ghe Jesu noo “ọguọmhandia nọn wanlan nan gbaẹkẹ ọle” ẹlẹnan? (John 6:68)

¹³ Jesu noo “ọguọmhandia nọn wanlan nan gbaẹkẹ ọle” rẹ tuẹn oga nọn khiale okhun bhi ọne uke otọ nan. Be ọ dia uwẹ yẹ bhi egbe nin uwẹ rẹ ha ribhi agbotu nọnsi Jehova? Iriọ a ha da miẹn ọ yẹ wo dia uwẹ bhi egbe beji ọ dia Pita nin odibo bhi egbe nọn taman Jesu yọle: “Họ bhọ mhan da bu? Uwẹ mhọn ọta nọn re aribhọ ọsi ighegheghe re.” (John 6:68) Ejela mhan ha rẹ ha ye ẹlẹnan sade mhan bha vae bhi agbotu nọnsi Jehova? Jesu noo ọne agbotu nan rẹ rẹkpa mhan rẹ miẹn emhin rebhe ne ha re imhan sun rẹkhan Osẹnobulua. Ọle yẹ man mhan emhin, beji mhan ha da sabọ manman ha lu iwẹnna itẹmhọn Osẹnobulua nọnsẹn. Sẹyẹ, ọle yẹ rẹkpa mhan rẹ mun “akpa ọsọgbọn yọ,” beji mhan ha da ha lu emhin ne ha ti Jehova bhọ.—Eph. 4:24.

14. Elele nela uwẹ miẹn nin uwẹ rẹ ha ribhi agbotu nọnsi Jehova bhi ẹghe emianmhẹn COVID-19?

 ¹⁴ Jesu re adia nọn ha rẹkpa mhan nin mhan bhi ẹghe ọkakale. Mhan da wo daghe elele kẹkẹ ne nabhọre bhi adia nin ọle ne nin mhan bhi ẹghe nin emianmhẹn COVID-19 rẹ munhẹn. Beji ẹbho ne bunbun bhi ọne agbọn nan bha rẹ lẹn ebi ele ha lu yẹ, Jesu da lu ọle nin mhan ha miẹn adia ne ha gbega mhan. A da taman mhan ghe, nin mhan re emhin rẹ ha gugu unun bi ihue, sade mhan ribhi eji ẹbho da manman bun. Sẹyẹ, a da yẹ taman mhan nin mhan ha si egbe bhi eji ẹbho ye. A da yẹ taman ene ewanlẹn nin ele ha nin ibhio mhan bhi agbotu talọ ẹghe rebhe. Sẹyẹ, nin ele lẹn ebi ibhio mhan guanọ ne ha gbega iẹnlẹn nọnsele, yẹ re ele sikẹ Jehova. (Isa. 32:1, 2) Mhan yẹ miẹn adia bi ikoudure bhi ebi Otu Nọn Sun Oga ji mhan lẹn.

15. Adia nela a re nin mhan rẹji uwedẹ nan rẹ ha do ikolo oga nesẹmhan, yẹ tẹmhọn Osẹnobulua bhi ẹghe emianmhẹn COVID-19? Be nabhọre?

¹⁵ Bhi ẹghe emianmhẹn COVID-19, mhan da yẹ miẹn adia rẹji ebi mhan ha rẹ ha do ikolo oga nesẹmhan yẹ, bi ebi mhan ha yẹ rẹ ha lu iwẹnna itẹmhọn Osẹnobulua yẹ. Ẹjẹje, mhan da wo munhẹn ha noo intanẹt rẹ do ikolo oga, bi usikoko nesẹmhan. Mhan da yẹ wo munhẹn ha noo ifoni bi ilẹta rẹ lu iwẹnna itẹmhọn Osẹnobulua. Jehova da wo nan erọnmhọn ọbhi ene uwedẹ nan nin mhan ha noo. Bẹtẹ ne bunbun da yọle ghe, ene munhẹn vae dọ ha ga Jehova bhi eji ele ye, wo ha bun ọbhọ. Bhi ọsi ẹmhọanta, ibhio mhan ne bunbun wo miẹn emhin kikẹ nọn ti ele bhọ bhi iwẹnna itẹmhọn Osẹnobulua bhi ọne ẹghe nan.—Fẹ ọne ẹkpẹti ghe nọn yọle “ Jehova Nan Erọnmhọn bhi Iwẹnna Itẹmhọn Osẹnobulua Nin Mhan Lu.”

16. Be imhan ha sabọ ha mhọn bhi ọkhọle?

¹⁶ Eso sabọ rẹ ha riale ghe, uwedẹ nin agbotu rẹ re emhin khian bhi ẹghe emianmhẹn COVID-19 sia kaka gbe. Ọkpakinọn, beji ẹghe ki rẹ ha gbera, mhan da dọ kere ghe, ẹwanlẹn wo ribhi uwedẹ nin agbotu rẹ yọle nin mhan rẹ ha lu emhin. (Matt. 11:19) Beji mhan ha rẹ ha ria eria nyan uwedẹ oyẹẹ nin Jesu rẹ ha sun ẹbho nesọle, mhan ki dọ ha mhọnlẹn bhi ọkhọle ghe, ebe hi ki rẹ sunu bhi ẹghe odalo, Jehova bi Jesu nin Ọmọn nọnsọle nin ọle hoẹmhọnlẹn dẹ ne imhan dia.—Tie Hebrews 13:5, 6.

17. Be ọ dia uwẹ bhi egbe yẹ nin Jesu rẹ ha sun uwẹ?

¹⁷ Ọ wo manman ti mhan bhọ ghe, Jesu hi ọnọn sun mhan! Mhan ribhi agbotu nan ida zọn egbe ranmhude eji ọria na vae, urolo nin ele zẹ, la uwedẹ nin ele rẹ lu emhin. Agbotu yẹ wo man mhan emhin bhi Baibo, bi ebi mhan ha rẹ ha lu iwẹnna itẹmhọn Osẹnobulua yẹ. A yẹ man mhan ebi mhan ha lu, beji mhan da sabọ ha lu emhin ne ti Osẹnobulua bhọ. Sẹyẹ, mhan yẹ wo luẹ ebi mhan ha rẹ ha hoẹmhọn egbe mhan yẹ. Mhan wo mhọn emhin ne ha rẹ mhan ha hio, ranmhude Jesu hi ọnọn sun mhan!