Ẹmhọn ọfure Jesu ha wewe. Ọkpakinọn, ọle da taman edibo nesọle yọle: “Hẹi riale mẹn vae dọ re ọfure re bhi ọne otọ nan; agbada mẹn re re, ọ iyi ọfure. Mẹn vae dọ si iwa-egbea re bhi ẹwẹ okpea bi aba ọle, ọmọn-okhuo bi inẹn ọlẹn, okhuo bi inẹn ọdọ ọle.” (Matt. 10:34, 35) Be Jesu re ene ọta nan ta?

Jesu bha ha guanọ nin iwa-egbea ha ribhi azagba-uwa. Ọkpakinọn, ọle lẹnmhin ghe iman-emhin nesọle dẹ sabọ si iwa-egbea re bhi azagba-uwa eso. Bhiriọ, ọkhẹke nin ẹbho ne guanọ nin ele kiẹn edibo nesi Jesu, yẹ mianmẹn, lẹn sẹbhọ ghe, ẹgheso, ebi ele zẹ rẹ lu ida ti ene ribhi azagba-uwa nọnsele bhọ. Ẹgheso, ọdọ ele, amhẹn ele, la ẹbho bhi azagba-uwa nọnsele, sabọ rẹ ha kpokpo ele, yẹ re ọle ha nọghọ ele rẹ re obọ rẹkhan iman-emhin nesi Jesu.

Baibo taman iKristiẹn ghe, nin ele “bi eria rebhe koko [ha] ribhi ọfure.” (Rom. 12:18) Ọkpakinọn, iman-emhin nesi Jesu dẹ diabe agbada bhi azagba-uwa eso. Ọnan sunu sade ọria ọkpa bhi azagba-uwa miẹn iman-emhin nesi Jesu ọbhi egbe; sokpan, enekẹle bha ka miẹn ọlẹn ọbhi egbe. Ọnan ha sunu, ibhio ọne ọria nọn luẹ Baibo ki re egbe ele kiẹn eghian nọnsọle.—Matt. 10:36.

Ẹgheso, edibo nesi Jesu ne nyẹnlẹn bhi azagba-uwa nin ọrebhe ida ga Jehova, ki kuẹlo da idia ne ha dọnmhẹn ahoẹmhọn-egbe nin ele mhọn da Jehova bi Jesu. Bhi ọsi ijiẹmhin, ibhio ele ne iga Jehova sabọ rẹ ha sua ele ọbhọ nin ele deba ele lu iluemhin nin ele lu. Ele ha kuẹlo da edọnmhẹn nọn sẹ inian, họla ele ha lu ebe ti ọle bhọ? Jesu da yọle: “Ọria nọn ki rẹ khin nọn hoẹmhọn aba ọle la inẹn ọlẹn gbera mẹn bha sẹ ọne a ha tie mun mẹn.” (Matt. 10:37) Jesu bha re ọnan tale ghe, nin ẹbho rẹ kiẹn edibo nesọle, ele ida yẹ manman hoẹmhọn ene biẹ ele. Sokpan, ọle re ọnan rẹ ha man ele, ebi ele ha mun kalo bhi iẹnlẹn nọnsele. Ahamiẹn eria bhi azagba-uwa nọnsẹmhan kpokpo mhan ranmhude mhan ga Jehova, mhan sẹyẹ wo ha hoẹmhọn ele. Sokpan, mhan lẹn sẹbhọ ghe, oyẹẹ nin mhan mhọn da Jehova ke okhun nẹ.

Edandan iribhọ ghe, ọ manman ba bhi egbe sade eria bhi azagba-uwa mhan kpokpo mhan. Ọrẹyiriọ, ọkhẹke nin edibo nesi Jesu ye ọta nesọle re nọn yọle: “Sẹyẹ, ọria soso nọn bha ka mun eran iloya nọnsọle, yẹ rẹkhan mẹn, bha sẹ ọnan ha tie mun mẹn.” (Matt. 10:38) Mhan dẹ yẹ sabọ yọle ghe, Kristiẹn ghe ekpokpo nin ele miẹn bhi azagba-uwa bii oya nin edibo nesi Jesu ha muegbe rẹ ziẹngbe ọle. Ọkpakinọn, ele yẹ mhọnlẹn bhi ọkhọle ghe, ranmhude uwedẹ esili nin ele rẹ ha nyẹnlẹn, ene ribhi azagba-uwa nọnsele dẹ fi ọkhọle denọ, yẹ dọ luẹ ẹmhọanta.—1 Pet. 3:1, 2.