Nin mhan rẹ sabọ lu ebe ti Jehova bhọ, ọkhẹke nin mhan ha mhọn urẹọbhọ. Ọrẹyiriọ, Baibo yọle ghe ‘ọ i yi ẹbho rebhe mhọn urẹọbhọ da Osẹnobulua.’ (2 Tẹsẹ. 3:2) “Eria ne imhẹn” ne ha kpokpo Pọl nin odibo, ele ọle ha talọ je ẹghe nin ọle rẹ ta ene ọta nan. Ọkpakinọn, ọ i yi ene ẹbho nan ọkpa emhin nin ọle tale rẹji ẹmhọn urẹọbhọ rẹtẹ. Ẹbho eso bha ho nin ele rẹọbhọ ghe Osẹnobulua hi Aman Nọn Man Emhin, arẹmiẹn emhin ne bunbun ribhọ nọn ha re ele rẹọbhọ. (Rom 1:20) Eso ebhebhe rẹọbhọ ghe Osẹnobulua ribhọ, ọkpakinọn, ọ i yi urẹọbhọ nọn sẹ inian ọkpa ọkhẹke nin ele ha mhọn beji emhin nin ele lu ha da ha ti Jehova bhọ.

Ọkhẹke nin mhan rẹọbhọ ghe Jehova gene ribhọ, sẹyẹ ọle hi ọnọn “re ihaosa” nin eria ne mhọn urẹọbhọ nọn ziẹn. (Hib. 11:6) Obọ ọkpa urẹọbhọ khin bhi ikpẹ ọsi ẹlinmhin nọn khiale nọnsi Osẹnobulua. Nin mhan rẹ sabọ ha mhọn ọne ẹlinmhin nọn khiale, ọkhẹke nin mhan ha bhii Jehova nin ọle re ọle nin mhan. (Luk 11:​9, 10, 13) Uwedẹ ọbhebhe nin mhan ha rẹ sabọ ha mhọn ọlẹn hi, nin mhan rẹ ha tie Baibo nan rẹ ẹlinmhin nọn khiale gbẹn. Sẹyẹ, mhan ki ha ria eria nyan ebi mhan tiele, yẹ dọnmhegbe ha re obọ rẹkhan ọlẹn. Ẹghenin, ẹlinmhin nọnsi Jehova ki ha dia iẹnlẹn nọnsẹmhan, ọ ki rẹkpa mhan rẹ sabọ ha mhọn urẹọbhọ nọn da ha ti Osẹnobulua bhọ.