Ene ọta, “uwẹ dẹ gbega ele” nọn ribhi Psalm 12:7 be ha talọ ji “eria nan denyẹnyẹn” nan sounun ọlẹn bhi ulọnlẹn nọnzi 5, la “ọta nesi Jehova” nọn ribhi ulọnlẹn nọnzi 6 a be re ọle ha talọ je?

Ebi a tẹmhọnlẹn bhi ọne uhọnmhọnlẹn rẹkpa mhan rẹ lẹn ghe ẹbho a ha talọ je.

Bhi Psalm 12:​1-4, mhan da tie ghe, “ẹbho ne mhọn asun-rẹkhan i yẹ ribhi agbọn.” Bhi ejayenan nian, bha ji mhan fẹ Psalm 12:​5-7 ghe nan da nọọn ọne inọnta nin mhan zilo ọle bhi ọne uhọnmhọn-ọta nan. Enin yọle:

Ebi Osẹnobulua ha lu nin “eria nan denyẹnyẹn,” ọle ribhi ulọnlẹn nọnzi 5. Ọle da yọle ghe ọle dẹ hinmhin ele.

Ulọnlẹn nọnzi 6 da yọle ghe, “ọta nesi Jehova khiamhin; inian ele diabe siliva nan rẹ na eranlẹn.” Ẹbho nesi Jehova ne wo ha sun rẹkhan ọlẹn wo rẹọbhi ene ọta nan.—Ps. 18:30; 119:140.

Bhi ejayenan nian, bha ji mhan zilo nyan Psalm 12:7. Enin yọle: “Eo Jehova, uwẹ dẹ gbega ele; uwẹ dẹ gbega ọdeọde bhi ẹwẹ ele bhi obọ ọne ore nan rẹ dọ sẹbhi ighegheghe.” Be a re “ele” nan tẹmhọnlẹn bhi ọne ulọnlẹn nan ha talọ je?

Ranmhude “ọta nesi Jehova” a tẹmhọnlẹn bhi ulọnlẹn nọnzi 6 ọkuẹsẹ a sounun bhi “ele” bhi ulọnlẹn nọnzi 7, ẹbho eso sabọ rẹ ha yọle ghe, ọne “ele” nan tẹmhọnlẹn mundia nin ọta nesi Osẹnobulua. Mhan lẹnmhin ghe, Osẹnobulua sẹ wo gbega Baibo beji a ha da miẹn ghe ẹbho bha sabọ gbe ọle khuelo.—Isa. 40:8; 1 Pita 1:25.

Ọrẹyiriọ, ẹmhọanta ebi a tẹmhọnlẹn bhi ulọnlẹn nọnzi 5 yẹ khin. Jehova sẹ wo gbega “eria nan denyẹnyẹn” bi ene ibhioguele, sẹyẹ, ọle dẹ wo ha lu iriọ khian. —Job 36:15; Ps. 6:4; 31:​1, 2; 54:7; 145:20.

Bhiriọ, be a re “ele” nan tẹmhọnlẹn bhi ulọnlẹn nọnzi 7 ha talọ je?

Mhan ha gbẹlokotọ bhi ebi a tẹmhọnlẹn bhi ọne uhọnmhọnlẹn nan bhi psalm, mhan ki dọ kere ghe, ẹbho a re ọne ukpọta “ele” ha talọ je.

Bhi Psalm 12:​1, Devid da tẹmhọn “ẹbho ne mhọn asun-rẹkhan,” nin eria ne i mhẹn ha bha ohoghe man. Bhi ọne ebe ọsi Psalm sẹyẹ, Jehova da yọle ghe, ọle dẹ re obọ mun eria ne ha bha ọne ohoghe nan. Ọne uhọnmhọnlẹn nan bhi psalm ji mhan lẹn ghe, mhan dẹ sabọ mun udu nyan Osẹnobulua, ghe ọle dẹ khọn nin ẹbho nesọle ranmhude ọta nọnsọle khiamhin.

Bhiriọ, ebi ulọnlẹn nọnzi 7 ha ta hi, Jehova dẹ gbega “ele,” ne yi, ene ẹbho nin eria ne i mhẹn si ikuan-egbe je.

Ọne “ele” nan noo bhi enan, ọle a yẹ noo bhi ọne ulọnlẹn nan bhi Baibo kẹkẹ nan gbaẹkẹ ọle bhi urolo ọsi Hibru. Bhi Baibo ọhẹnhẹn nan na bhi urolo Hibru zedu ọle diọbhi urolo Grik, a da noo “imhan” igbaeva bhi ọne ulọnlẹn nọnzi 7. Ẹbho ne wo ha sun rẹkhan Jehova nin ẹbho ne i mhẹn ha re obọ oya mun, ele a ha re ọle talọ je. Obọle nọn kike bhi ulọnlẹn nọnzi 7 da yọle ghe, “ọdeọde bhi ẹwẹ” eria ne sun rẹkhan Osẹnobulua dẹ miẹn ugbega “bhi obọ ọne ore nan,” ọnin hi, bhi obọ eria ne wo ha lu olukhọ. (Ps. 12:​7, 8) Bhi Baibo nan zedu ọle diọbhi Aramaic, “ele” a yẹ noo bhi obọle nin ọhẹnhẹn bhi ọne ulọnlẹn nan. Enin da yọle: “Uwẹ nin EBEANLẸN mhan dẹ gbega ene khiale, uwẹ dẹ gbega ele bhi obọ ọne ore nan nọn i mhẹn rẹ sẹbhi ighegheghe.” Ọnan hi emhin ọbhebhe nọn re mhan rẹọbhọ ghe, ọ i yi ọta nọnsi Osẹnobulua a ha tẹmhọnlẹn bhi Psalm 12:7.

Ranmhude ọnan, mhan dẹ sabọ yọle ghe, ọne ulọnlẹn nan re ikhuaẹloghe nin “ẹbho ne mhọn asun-rẹkhan,” ọnin hi, nin Osẹnobulua rẹ khọn nin ele.