UHỌNMHỌN-ỌTA NỌNZI 24
Jehova Muegbe Nin Ọle Rẹ Rẹhunmhan
“Uwẹ nin Jehova, uwẹ mhẹnmhin. Uwẹ yẹ muegbe nin uwẹ rẹ rẹhunmhan; uwẹ manman mhọn ahoẹmhọn-egbe nọn ibeghe da ẹbho ne so tie uwẹ.”—PS. 86:5.
ILLO 42 Erọnmhọn Ọsi Ene Ga Osẹnobulua
EBI MHAN DA LUẸ a
1. Be Solomọn nin Ojie taman mhan bhi Ecclesiastes 7:20?
SOLOMỌN nin Ojie da yọle: “Ọria soso iribhi ọne otọ nan nọn wo lu emhin esili ẹghe rebhe, nọn ilu khọlọ.” (Eccl. 7:20) Ẹmhọanta wo khọnan! Eria olukhọ mhan rebhe khin. (1 John 1:8) Bhiriọ, mhan guanọ nin Osẹnobulua bi eria ha rẹhunmhan mhan.
2. Be ọ dia yẹ bhi egbe sade ọmọẹ mhan rẹhunmhan mhan?
2 Edandan iribhọ ghe uwẹ yẹ ye ẹghe ọkpa re, nin uwẹ rẹ lu emhin nọn re ẹkẹ khọ ọmọẹ ẹ nin bha manman sikẹ egbe. Uwẹ da ha guanọ nin bha kie ha yi imọẹ. Bhiriọ, uwẹ da dọ re ẹkẹ-ata rẹ bhii ọle. Be emhin dia uwẹ bhi egbe yẹ, ẹghe nin ọmọẹ ẹ rẹ re ọkhọle rebhe rẹ rẹhunmhan uwẹ? Egbe bha be fu uwẹ re? Ehe, uwẹ da yẹ ha ghọnghọn!
3. Be imhan ha zilo nyan bhi ọne uhọnmhọn-ọta nan?
3 Mhan guanọ nin Jehova ha yi Ọmọẹ nọn sikẹ mhan nẹ. Ọkpakinọn, mhan ta ọta la lu emhin ne bha yẹẹ ọle ẹgheso. Be ha re imhan rẹọbhọ ghe Jehova muegbe nin ọle rẹ rẹhunmhan mhan? Be re uwedẹ nin Jehova rẹ rẹhunmhan dikẹ bhi uwedẹ nin mhan rẹ rẹhunmhan? Sẹyẹ, họla Osẹnobulua rẹhunmhan?
JEHOVA MUEGBE NIN ỌLE RẸ RẸHUNMHAN
4. Bezẹle nin mhan ha da sabọ rẹọbhọ ghe Jehova muegbe nin ọle rẹ rẹhunmhan mhan?
4 Ọta nọnsi Osẹnobulua ji mhan lẹn ghe, Jehova muegbe nin ọle rẹ rẹhunmhan mhan. Ẹghe nin Jehova rẹ khọkhọ egbe ọle man Mozis bhi oke ọsi Sanai, ọle da na obọ ẹhi taman ọlẹn yọle: “Jehova, Jehova, Osẹnobulua nọn mhọn itohan bi ẹkẹ-ẹjẹjẹ, nin ukpohu ikẹ re, nọn manman mhọn ahoẹmhọn-egbe nọn ibeghe, Osẹ ọsi ẹmhọanta, nọn re ahoẹmhọn-egbe nọn ibeghe man ẹbho ne bunbun, nọn rẹhunmhan idobọ, olukhọ bi emhin ebe.” (Ex. 34:6, 7) Osẹ nọn mhọn ẹkẹ-ẹjẹjẹ bi itohan Jehova khin, nọn muegbe ẹghe rebhe rẹ rẹhunmhan ẹbho ne re ẹkẹ-ata fidenọ bhi olukhọ nọnsele.—Neh. 9:17; Ps. 86:15.
Jehova lẹn emhin rebhe ne sunu bhi iẹnlẹn nọnsẹmhan, ne re imhan kiẹn unan eria nin mhan khin (Fẹ uduọle nọnzi 5 ghe)
5. Beji Psalm 103:13, 14 rẹman, be Jehova lu ranmhude nin ọle rẹ manman lẹn eria nọnsẹn?
5 Ranmhude Jehova hi ọnọn man mhan, ọle lẹn emhin rebhe rẹ da mhan. Riale ghe! Ọle lẹn emhin rebhe rẹji ọdeọde bhi ọne otọ nan. (Ps. 139:15-17) Bhiriọ, ọle dẹ sabọ daghe emhin ne bha gba rebhe nin mhan le bhi uku bhi obọ ene biẹ mhan. Ọle bhọ yẹ lẹn emhin ne sunu ji mhan ne re imhan kiẹn unan eria nin mhan khin. Be Jehova lu ranmhude ọle manman lẹn mhan nọnsẹn? Ọle da mhọn itohan da mhan.—Ps. 78:39; tie Psalm 103:13, 14.
6. Be Jehova rẹ rẹman yẹ ghe ọle muegbe nin ọle rẹ rẹhunmhan mhan?
6 Jehova ka rẹman ghe ọle muegbe nin ọle rẹ rẹhunmhan. Ọle lẹnmhin ghe, ranmhude emhin nin Adamu nin okpea nin ọhẹnhẹn lu, mhan rebhe da dọ kiẹn eria olukhọ, yẹ ha yu. (Rom. 5:12) Emhin soso iribhọ nin mhan ha sabọ lu beji a ha da miẹn ghe, imhan la ẹbho nekẹle ida yẹ ha yi eria olukhọ, yẹ ha yu. (Ps. 49:7-9) Ọrẹyiriọ, Osẹnobulua nọnsẹmhan nọn mhọn oyẹẹ da re ẹkẹ-ẹjẹjẹ man, yẹ lu ọle beji a ha da miẹn ghe, mhan ida yẹ ha yi eria olukhọ, la ha yu. Be ọle lu? John 3:16 da yọle ghe, Jehova da je ukpọmọn ọkpa sẹsẹ nọnsọle re, nin ọle dọ yu nin mhan. (Matt. 20:28; Rom. 5:19) Jesu da yu ọbhi olukhọ nọnsẹmhan, beji a ha da miẹn ghe ọria nọn hi ki rẹ khin nọn mhọn urẹọbhọ da ọle ida yẹ ha yi ọria olukhọ, la ha yu. (Heb. 2:9) Ọ dẹ wo manman ba Jehova bhi egbe rẹ daghe Ọmọn nin ọle manman hoẹmhọnlẹn, yu uyumhin oya. Bhi ọsi ẹmhọanta, Jehova ida rẹ ji Ọmọn nọnsọle da yu, sade ọle bha muegbe nin ọle rẹ rẹhunmhan mhan.
7. Ẹbho eso nela bhi Baibo Jehova rẹhunmhan?
7 Ijiẹmhin ọsi ẹbho ne bunbun ribhi Baibo nin Jehova rẹhunmhan olukhọ nọnsele. (Eph. 4:32) Ọria nela vae bhi ọkhọle nọnsẹ? Iriọ a da miẹn uwẹ ria ẹmhọn Manasẹ nin Ojie. Ọne okpea nan wo manman lu emhin ebe ne kaka da Jehova. Ọle da ha mun ọkalo bhi oga ohoghe. Ọle da ha gbono imọn nesọle a, yẹ re ele ze ji osẹ ohoghe kẹkẹ. Ọle bhọ da yẹ dọ kanọ ẹbọ mun fiọbhi uwa oga nọnsi Jehova. Baibo da yọle ghe, ọle da wo manman lu emhin ọbe rẹ rahiẹ Jehova. (2 Chron. 33:2-7) Ọrẹyiriọ, ẹghe nin Manasẹ rẹ re ọkhọle rebhe rẹ fidenọ, Jehova da rẹhunmhan ọlẹn. Osẹnobulua bhọ da re ọne isẹhoa nanlẹn rẹ kie kiẹn ojie. (2 Chron. 33:12, 13) Asabọmiẹn Devid nin Ojie yẹ vae bhi ọkhọle nọnsẹ nọn lu emhin ebe ne kaka da Jehova, rẹ sẹbhọ ghe ọle da gboghẹ yẹ gbugbele. Ọrẹyiriọ, ẹghe nin Devid rẹ miẹnkue ghe ọle lu emhin ọbe, yẹ re ọkhọle rebhe fidenọ, Jehova da yẹ rẹhunmhan ọlẹn. (2 Sam. 12:9, 10, 13, 14) Gene-gene, mhan dẹ sabọ rẹọbhọ ghe Jehova muegbe nin ọle rẹ rẹhunmhan. Sẹyẹ, beji mhan ha luẹ kere, mhan dẹ daghe ebi uwedẹ nin Jehova rẹ rẹhunmhan rẹ dikẹ bhi uwedẹ nin eria rẹ rẹhunmhan.
UWEDẸ NIN JEHOVA RẸ RẸHUNMHAN NỌN RE ỌLE DIKẸ BHI ỌSI ERIA
8. Ranmhude Jehova hi Ọbhohiẹn nọn mhẹn nẹ, be ọ rẹ rẹso uwedẹ nin ọle rẹ rẹhunmhan yẹ?
8 Jehova hi “Ọbhohiẹn ọsi ọne otọ nan rebhe.” (Gen. 18:25) Ọkhẹke nin ọbhohiẹn nọn mhẹn manman lẹn ebi uhi ta rẹji ẹmhọn nin ọle ha talọ ọi. Iriọ yẹ nọn rẹji Jehova. Arẹmiẹn Ọbhohiẹn nọnsẹmhan ọle khin, ọle yẹ ọnọn yẹ Gbuhi nin mhan. (Isa. 33:22) Gbera Jehova, ọria soso iribhọ nọn manman lẹn ikẹkẹ bhi ẹwẹ emhin nọn mhẹn bi emhin nọn imhẹn. Emhin ọbhebhe nela ọkhẹke nin ọbhohiẹn nọn mhẹn yẹ lẹn? Ọkhẹke nin ọle lẹn otọ emhin rebhe ne sunu ọkuẹsẹ ọle bhohiẹn. Bhiriọ, mhan dẹ sabọ yọle ghe Jehova hi Ọbhohiẹn nọn mhẹn nẹ, ranmhude ọle lẹn otọ emhin ne sunu rebhe.
9. Emhin nela Jehova ka fẹ ọkuẹsẹ ọle zẹ nin ọle rẹ rẹhunmhan ọria?
9 Jehova wo dikẹ bhi ẹwẹ eria ne bhohiẹn, ranmhude, ọle wo lẹn emhin rebhe ne sunu. (Gen. 18:20, 21; Ps. 90:8) Ọle bha diabe eria ne noo ebi ele daghe, bi ebi ele họn rẹ bhohiẹn. Ọle wo lẹn ebi isiku nin ọria yo, ebi ọle luẹ bhi obọ ene biẹ ọle, eji ọle da nyẹnlẹn, ebi emhin dia ọle yẹ bhi egbe, bi si egbe daan ọlẹn la egbe bha daan ọlẹn, rẹ rẹso emhin nin ọle lu yẹ. Jehova yẹ daghe ebe ribhi ọkhọ nọnsi ọria. Ọle yẹ wo lẹn ebe re ọria lu emhin nin ọle lu. Emhin soso iribhọ nin Jehova idaghe. (Heb. 4:13) Bhiriọ, ahamiẹn Jehova rẹhunmhan ọria, ọle lu iriọ ranmhude ọle lẹn emhin rebhe ne sunu ji ọle.
Jehova lu emhin bhi uwedẹ nọn gbale, ọle ilu eku. Sẹyẹ, ọria ida sabọ re emhin nanlẹn bhi ikeke beji ọle ha da bhohiẹn nanlẹn (Fẹ uduọle nọnzi 10 ghe)
10. Bezẹle nin mhan ha da sabọ yọle ghe uwedẹ nọn gbale Jehova rẹ bhohiẹn? (Deuteronomy 32:4)
10 Uwedẹ nọn gbale Jehova rẹ bhohiẹn. Ọle ilu eku. Ọle ire ebi ọria diayẹ, ebi ọle fe sẹ yẹ, ebi a hẹnmhọn ọlẹn sẹ yẹ, la ranmhude emhin kẹkẹ nin ọle guẹle rẹ rẹhunmhan. (1 Sam. 16:7; Jas. 2:1-4) Ọria soso iribhọ nọn ha sabọ sua Jehova ọbhọ rẹ lu emhin nọn hi ki rẹ khin. La, re emhin nanlẹn bhi ikeke beji ọle ha da bhohiẹn nanlẹn. (2 Chron. 19:7) Ọle ire ebi emhin dia ọle yẹ bhi egbe rẹ bhohiẹn. (Ex. 34:7) Edandan iribhọ ghe, Jehova hi Ọbhohiẹn nọn mhẹn nẹ, ranmhude, ọle lẹn emhin rebhe rẹji mhan, bi idia nin mhan ye.—Tie Deuteronomy 32:4.
11. Be re uwedẹ nin Jehova rẹ rẹhunmhan dikẹ bhi uwedẹ nin eria rẹ rẹhunmhan?
11 Ẹbho ne gbẹn obọ Baibo nan re urolo Hibru gbẹn lẹnmhin ghe, uwedẹ nin Jehova rẹ rẹhunmhan dikẹ bhi uwedẹ nin eria rẹ rẹhunmhan. Bhi idia eso, ele noo ukpọta Hibru nin ebe ọkpa yọle ghe, “a noo ọne ukpọta rẹ tẹmhọn uwedẹ nin Jehova rẹ rẹhunmhan eria olukhọ. A inoo ọne ukpọta rẹ tẹmhọn uwedẹ nọn bha manman gba nin eria rẹ rẹhunmhan ẹbho nekẹle.” Jehova ọkpa mhọn ọne ahu rẹ rẹhunmhan ọria sẹsẹsẹ, nọn lu emhin ebe nọn fidenọ. Be nabhọre sade Jehova rẹhunmhan mhan?
12-13. (a) Elele nela ọria miẹn sade Jehova rẹhunmhan ọlẹn? (b) Be Jehova ghe emhin ebe nin mhan lu yẹ sade ọle rẹhunmhan imhan fo?
12 Ahamiẹn mhan rẹọbhọ ghe Jehova rẹhunmhan imhan, egbe ki fu mhan re. Mhan ki yẹ ha mhọn ọkhọle nọn khiale. Mhan ida sabọ miẹn ene emhin nan bhi obọ eria sade ele rẹhunmhan mhan. Sokpan, obọ Jehova ọkpa. (Acts 3:19) Ahamiẹn Jehova rẹhunmhan imhan, ọle ki lu ọle beji mhan ha da kie deba ọle ha mhọn ikolu. Sẹyẹ, ọ ki diabe mhan bha sẹ ka lu ọne emhin ebe khẹ.
13 Jehova ha rẹhunmhan mhan fo, ọle ida yẹ ha re ọne ẹlo nin rẹ ghe mhan, la re oya nin mhan ranmhude ọne emhin ebe nin mhan lu. (Isa. 43:25; Jer. 31:34) Jehova ki manman si olukhọ nesẹmhan ree sibhi eji mhan ye re, “beji eji oẹnlẹn da hẹnre rẹ manman ree bhi eji ọ da defia.” b (Ps. 103:12) Mhan ha ria eria nyan uwedẹ nin Jehova rẹ rẹhunmhan mhan, ọ ki re imhan ha khuẹnmhẹn ọlẹn, yẹ mun ekpẹn nanlẹn. (Ps. 130:4) Ọkpakinọn, họla Jehova ha rẹhunmhan?
HỌLA JEHOVA HA RẸHUNMHAN?
14. Be imhan sẹ luẹ rẹji ebezẹle nin Jehova ha da rẹhunmhan ọria, la ọle ida rẹhunmhan ọlẹn?
14 Beji mhan sẹ luẹ, ọ iyi emhin ebe nin ọria lu manman kaka, la ọ bha manman kaka ha rẹman si Jehova dẹ rẹhunmhan ọlẹn. Sẹyẹ, mhan luẹ ghe Jehova noo ilẹnmhin nọnsọle, bọsi Aman nọn man mhan, Ọnọn Gbuhi nin mhan, bi Ọbhohiẹn rẹ zẹ si ọle dẹ rẹhunmhan ọria. Ọkpakinọn, emhin kẹkẹ nela Jehova ka fẹghe ọkuẹsẹ ọle zẹ nin ọle rẹ rẹhunmhan ọria, la nin ọle hẹi rẹhunmhan ọlẹn?
15. Beji Luke 12:47, 48 rẹman, emhin ọkpa nela Jehova fẹghe ọkuẹsẹ ọle zẹ si nin ọle rẹhunmhan ọria?
15 Emhin ọkpa nin Jehova fẹghe hi, si ọne ọria taan ẹlo a lu emhin ọbe nin ọle lu. Jesu da gbotọ ọnan fanọn an bhi Luke 12:47, 48. (Tie ọle.) Ahamiẹn ọria mhanmhanlẹn nin ọle rẹ dọ lu emhin nọn imhẹn—emhin nin ọle lẹnmhin ghe Jehova bha re obọ ọi, ọle da yẹ dọ lu ọle—emhin ebe nọn kaka ọle lu riọ. Jehova sabọ rẹ zẹ nin ọle hẹi rẹhunmhan ọria nọn sẹ iriọ. (Mark 3:29; John 9:41) Ọrẹyiriọ, mhan dẹ sabọ miẹnkue ghe, ẹgheso, mhan lẹnmhin ghe emhin nin mhan lu bha gba. Mhan be mhọn iruduba ghe a dẹ rẹhunmhan mhan? Ehe! Ranmhude emhin ọbhebhe yẹ ribhọ nin Jehova fẹghe sade ọle zẹ si nin ọle rẹhunmhan mhan.
Mhan dẹ sabọ ha mhọnlẹn bhi ọkhọle ghe, Jehova dẹ rẹhunmhan mhan sade mhan re ọkhọle rebhe fidenọ (Fẹ uduọle nọnzi 16 bi 17 ghe)
16. Be a re ọle ta nin ọria rẹ kiọya ọbhi emhin ọbe nin ọle lu? Bezẹle nọn da khẹke nin mhan kiọya ọbhi emhin ọbe nin mhan lu sade mhan ho nin Jehova rẹhunmhan mhan?
16 Emhin ọbhebhe nin Jehova fẹghe hi, si ọria nọn lu emhin ebe gene kiọya ọbhi emhin ebe nin ọle lu. Be a re ọle ta nin ọria rẹ kiọya ọbhi emhin ọbe? Ọ mundia nin, “nin ọria rẹ fi ọkhọle nọnsọle, uwedẹ nin ọle rẹ lu emhin, la emhanmhan nesọle denọ.” Ọ yẹ mundia nin, nin ọria rẹ ji emhin ebe nin ọle lu manman ba ọle bhi egbe, la ranmhude nin ọle bha rẹ lu emhin esili ne khẹke nin ọle ha rẹ lu. Ọ iyi emhin ebe nin ọria nọn kiọya ọbhi emhin ọbe lu ọkpa ba ọle bhi egbe. Sokpan, nin ọle rẹ ji ikolu nin ọle bi Jehova ko mhọnlẹn da wẹghẹa, nọn re ọle lu ene emhin ọbe nin ọle lu, yẹ ba ọle bhi egbe. Yere ghe, Manasẹ bi Devid nin Ojie da lu emhin ebe ne kaka; ọrẹyiriọ, Jehova da rẹhunmhan ele ranmhude nin ele rẹ re ọkhọle rebhe kiọya ọbhi emhin ebe nin ele lu. (1 Ki. 14:8) Bhi ọsi ẹmhọanta, Jehova rẹhunmhan imhan sade ọle daghe mhan gene kiọya ọbhi emhin ọbe nin mhan lu. Sokpan, ọ iyi nin mhan rẹ kiọya ọbhi emhin ọbe nesẹmhan ọkpa ọkhẹke nin mhan lu. Ọkhẹke nin mhan muegbe rẹ fidenọ bhi uwedẹ nin mhan rẹ lu emhin. c Ọnan re imhan vae bhi emhin ọbhebhe nin Jehova fẹghe ọkuẹsẹ ọle rẹhunmhan mhan.
17. Be a re ọle ta nin ọria rẹ fidenọ bhi ebe nin ọle lu? Bezẹle nọn da khẹke nin mhan lu iriọ ahamiẹn mhan bha guanọ nin mhan kie dọ lu emhin ọbe nin mhan lu? (Isaiah 55:7)
17 Emhin ọbhebhe kpataki nin Jehova yẹ fẹghe hi, si ọria fidenọ bhi emhin ebe nin ọle lu. Nin ọria rẹ fidenọ bhi emhin ebe nin ọle lu rẹman ghe, ọle dẹ fi uwedẹ nọn imhẹn nin ọle ka rẹ ha nyẹnlẹn denọ, dọ munhẹn ha nyẹnlẹn bhi uwedẹ nin Jehova guanọ. (Tie Isaiah 55:7.) Ọne ọria ki fi ọkhọle nọnsọle denọ, beji ọle ha da ha ria eria bhi uwedẹ nin Jehova guanọ. (Rom. 12:2; Eph. 4:23) Ọle ki muegbe rẹ rẹban iria-eria, bi uwedẹ ne imhẹn nin ọle ka rẹ ha lu emhin. (Col. 3:7-10) Bhi ọsi ẹmhọanta, urẹọbhọ nin mhan mhọn da izọese nọnsi Jesu, ọle hi emhin kpataki nọn zẹ nin Jehova da rẹhunmhan mhan, yẹ kpe mhan khia bhi olukhọ. Jehova dẹ rẹhunmhan imhan ranmhude ọne izọese nin, sade ọle daghe mhan wo gene ha dọnmhegbe kaka nin mhan rẹ fi uwedẹ nin mhan rẹ ha nyẹnlẹn denọ.—1 John 1:7.
RẸỌBHỌ GHE JEHOVA DẸ RẸHUNMHAN UWẸ
18. Be imhan sẹ luẹ rẹji uwedẹ nin Jehova rẹ rẹhunmhan?
18 Bha ji mhan re unun na bhi emhin kpataki eso nin mhan zilo nyan. Jehova hi ọnọn sẹ rẹhunmhan nẹ bhi ọne agbọn nan rebhe. Bezẹle nin mhan da ta iriọ? Ọhẹnhẹn, ọle wo muegbe ẹghe rebhe nin ọle rẹ rẹhunmhan. Ọzeva, ọle lẹn emhin rebhe rẹji mhan. Sẹyẹ, ọle hi ọnọn ha sabọ tare si mhan gene fidenọ, la mhan bha gene fidenọ. Ọzea, ahamiẹn Jehova rẹhunmhan mhan, ọle ida kie ye ọne emhin ọbe re. Ọ ki dia ọle ghe, mhan bha sẹ ka lu ọne emhin ọbe khẹ. Ọnan ki re imhan ha mhọn ọkhọle nọn khiale, yẹ re ọle ha re ẹlo esili ghe mhan.
19. Arẹmiẹn ọ bha gba nin mhan fo, sẹyẹ, mhan dẹ wo ha dobọ, bezẹle nin mhan ha da sabọ ha ghọnghọn?
19 Bhi ọsi ẹmhọanta, mhan dẹ wo ha dobọ ẹgheso, ranmhude ọ bha gba nin mhan fo. Ọrẹyiriọ, mhan dẹ miẹn ikoudure bhi ọta nan gbẹn ọbhi Insight on the Scriptures, Volume 2, apapale 771 nọn yọle: “Jehova mhọn itohan. Sẹyẹ, ọle yẹ lẹnmhin ghe eguọmhandia nesọle wẹghẹ. Bhiriọ, ranmhude ọ bha gba nin ele, ele yẹ dobọ, ọ bha khẹke nin ele ji ọnan ha ba ele bhi egbe ẹghe rebhe. (Ps 103:8-14; 130:3) Ele dẹ sabọ ha ghọnghọn sade ele wo ha dọnmhegbe rẹ ha nyẹnlẹn rẹkhan uwedẹ nesi Osẹnobulua. (Php 4:4-6; 1Jo 3:19-22).” Ọta ikoudure wo khọnan!
20. Be imhan ha zilo nyan bhi uhọnmhọn-ọta nọn ki sẹ ọle bhi egbe?
20 Ọ wo ti mhan bhọ ghe Jehova muegbe nin ọle rẹ rẹhunmhan mhan sade mhan gene fidenọ bhi emhin ọbe nin mhan lu. Be imhan ha yẹ rẹ re egbe khọkhọ Jehova yẹ bhi uwedẹ nin ọle rẹ rẹhunmhan? Be uwedẹ nin mhan rẹ rẹhunmhan rẹ khọ uwedẹ nin Jehova rẹ rẹhunmhan yẹ? Sokpan, uwedẹ nela ọ rẹ dikẹ? Bezẹle nọn da lu uhọnmhọn emhin nin mhan rẹ lẹn ikẹkẹ nọn ribhọ? Uhọnmhọn-ọta nọn ki sẹ ọle bhi egbe dẹ re ewanniẹn ọbhi ene inọnta nan.
ILLO 45 Ene Emhin Nin Mẹn Ria Ẹmhọnlẹn
a Jehova da ji mhan lẹn bhi Baibo ghe, ọle muegbe nin ọle rẹ rẹhunmhan ẹbho ne re ọkhọle rebhe fidenọ bhi emhin ebe nin ele lu. Ọrẹyiriọ, ẹgheso mhan sabọ ha riale mhan bha sẹ eria nin ọle ha rẹhunmhan. Bhi ọne uhọnmhọn-ọta nan, mhan dẹ zilo nyan ebezẹle nin mhan ha da sabọ rẹọbhọ ghe, Osẹnobulua wo muegbe nin ọle rẹ rẹhunmhan mhan, sade mhan gene fidenọ bhi emhin ebe nin mhan lu.
b Fẹ ebe natiọle Draw Close to Jehovah ghe, uhọnmhọnlẹn 26, apapale 9.
c ỌTA NAN RE OTỌLE MAN NỌNSẸN: “Nin ọria rẹ kiọya ọbhi emhin ọbe nin ọle lu” mundia nin, nin ọria rẹ fi ọkhọle nọnsọle denọ, yẹ ji uwedẹ nin ọle ka rẹ ha nyẹnlẹn khẹ, emhin ne imhẹn nin ọle lu, la emhin nin ọle bha lu ne khẹke nin ọle lu, da manman ba ọle bhi egbe. Ọria ha gene kiọya ọbhi emhin ọbe nin ọle lu, ọ ki re ọle fi uwedẹ iẹnlẹn nọnsọle denọ.
