Bezẹle nin ọne okpea nọn rẹ khẹke nọn re Rutu bhi amhẹn da yọle ghe, ọle ha re Rutu ọ dẹ si ozughu ọbhi emhin uku nesọle? (Ruth 4:1, 6)

Bhi ẹghe ẹdẹlẹ, ahamiẹn okpea nọn re okhuo yu sokpan ọle imhọn ọmọn, inọnta eso ribhọ ne da zegbere. Inọnta bii: Be ha sunu ji otọ nin ọle mhọn? Elin nọnsọle dẹ be wo yulua sẹsẹsẹ? Uhi nin Jehova na bhi obọ Mozis gbe nin ibhokhan Izrẹl re ewanniẹn ọbhi ene inọnta nan.

Be ha sunu ji otọ ọsi okpea nọn yu, la okpea nọn khiẹn otọ nọnsọle ranmhude ọle bha miẹn rẹ lu? Obhio ọle, la ọria ọbhebhe bhi azagba-uwa nọnsọle dẹ sabọ le ọne otọ bhi uku. Rẹji ọnan khiẹn, obhio ọle la ọria bhi azagba-uwa nọnsọle dẹ sabọ dẹ ọne otọ fikiere. Bhiriọ, ọne otọ ki sẹyẹ ha yi ọsi ọne azagba-uwa.—Lev. 25:23-28; Num. 27:8-11.

Be ọne uhi tale beji a ha da miẹn ghe elin ọsi ọne okpea nọn yu ida wo yulua sẹsẹsẹ? Ọne uhi da yọle ghe, nin obhio ọne okpea nọn yu re okhuo ọle beji ọ rẹ sunu bhi egbe ọsi Rutu. Bhiriọ, ọne okhuo ki sabọ biẹ imọn nin ọne okpea nan ha tie elin ọsi ọne okpea nọn yu mun, yẹ ne emhin nesọle bhi uku. Ọne emhanmhan nọn mhẹn an nan dẹ yẹ wo rẹkpa ọne okhuo rẹ miẹn ebi ọle ha rẹ ha gbẹloghe egbe.—Deut. 25:5-7; Matt. 22:23-28.

Mhan fẹ ọnan ghe bhi idia ọsi Naomi. Ọle da bọ okpea natiọle Ẹlimẹlẹk. Beji ọdọ ọle bi imọn ikpea eva nesọle ki yu, ọria bha yẹ ha ribhọ nọn ha gbẹloghe ọle. (Ruth 1:1-5) Beji ele ki fikiere bhi Juda, Naomi da taman Rutu nin okhuo ọmọn nọnsọle nin ọle taman Boaz nin ọle dẹ ọne otọ fikiere. Ọria bhi azagba-uwa ọsi Ẹlimẹlẹk Boaz ha khin. (Ruth 2:1, 19, 20; 3:1-4) Ọkpakinọn, Boaz da dọ lẹn sẹbhọ ghe, ọria ọbhebhe ribhi azagba-uwa nọnsele nin Baibo bha ta elin nọnsọle nin ọnan khẹke. Bhiriọ, ọle hi ọnọn sẹ ọle egbe nin ọle rẹ tare si ọle dẹ ọne otọ fikiere.—Ruth 3:9, 12, 13.

Bhi ọsi ọhẹnhẹn, ọne okpea nan nin Baibo bha sounun elin ọlẹn muegbe nin ọle rẹ rẹkpa. (Ruth 4:1-4) Ọle lẹnmhin ghe ọ dẹ gbe ọle igho nin ọle rẹ sabọ dẹ ọne otọ fikiere. Ọle yẹ lẹn ghe Naomi ida yẹ sabọ biẹ ọmọn nọn ha le otọ ọsi Ẹlimẹlẹk bhi uku. Bhiriọ, otọ osi Ẹlimẹlẹk ki dọ kiẹn otọ nọnsọle. Ọnan da wo diabe emhin nin ọne okpea ha da manman miẹn elele.

Ọkpakinọn, ọne okpea nan da fi ọkhọle denọ beji ọle lẹn ghe ọ dẹ khẹke nin ọle re Rutu bhi amhẹn. Ọle da yọle: “Mẹn ida sabọ dẹ ọle kiere, ranmhude ọ dẹ sabọ si ozughu ọbhi emhin uku nọnsẹmhẹn.” (Ruth 4:5, 6) Bezẹle nin ọle da fi ọkhọle denọ?

Ahamiẹn ọne okpea nan la ọria ọbhebhe re Rutu bhi amhẹn, nin Rutu da biẹ ọmọn okpea, ọne ọmọn ki le otọ ọsi Ẹlimẹlẹk bhi uku. Be ọnan ha rẹ sabọ si ozughu ọbhi emhin uku ọsi ọne okpea nan yẹ? Baibo bha taman mhan. Ọkpakinọn bha ji mhan fẹ emhin eso ghe.

• Ọhẹnhẹn, igho nin ọle ha zẹ rẹ dẹ ọne otọ fikiere ki diabe igho nan riia, ranmhude ọne otọ ida ha yi ọsọle. Ọmọn okpea nin Rutu ha biẹ ha le ọne otọ bhi uku.

• Ọzeva, ọle ki da ha gbẹloghe Naomi bi Rutu.

• Ọzea, ahamiẹn ọne okpea nan ka mhọn imọn khẹ, sẹyẹ nin Rutu da biẹ ba ọle, ene imọn rebhe ki da kugbe gha emhin nesọle.

• Ọzenẹn, ahamiẹn ọne okpea nan ika mhọn ọmọn soso khẹ, ọmọn nin Rutu ha biẹ ki le otọ ọsi Ẹlimẹlẹk bi otọ nọnsọle bhi uku. Bhiriọ, ọle ha ki yu, otọ nọnsọle ki dọ kiẹn ọsi ọmọn nan tie elin ọsi Ẹlimẹlẹk mun, ọ iyi ọsọle. Ọne okpea nan bha guanọ nin emhin uku nesọle yulu ọle ranmhude ọle ho nin ọle rẹkpa Naomi. Ọle da yọle nin Boaz nọn ki sẹ ọle bhi egbe dẹ ọne otọ fikiere. Boaz da lu ọnan ranmhude ọle ho nin ọle rẹkpa ọne okpea nọn yu beji a ha da miẹn elin nọnsọle bha yulua sẹsẹsẹ.—Ruth 4:10.

Ẹmhọn uku bi elin hi emhin nọn wo manman rẹtẹ ọne okpea nan. Ọsi egbe ọle ọkpa ọle wo ha khu. Arẹmiẹn ọne okpea nan wo manman dọnmhegbe beji a ha da miẹn elin nọnsọle bha yulua, ọkpakinọn ẹlẹnan nian mhan bhọ bha lẹn ọne elin. Ọle da mun isẹhoa nin ọle rẹ ha mhọnlẹn fia nin Boaz, nin ọle ha rẹ ha yi ọkpa bhi aba odede nọnsi Jesu Kristi. Ebe na bhi emhin nin ọne okpea nan lu re bha zẹwẹ ha mhẹn hiehie, nin ọle bha rẹ ka rẹkpa ẹbho ne guanọ urẹkpa ranmhude nin ọle rẹ ha khu ọsi egbe ọle ọkpa!—Matt. 1:5; Luke 3:23, 32.