1-2. Be kẹ sunu sade ẹbho ho nin ele mianmẹn? Be imhan ha zilo nyan bhi ọne uhọnmhọn-ọta nan?

 UWẸ sẹ ka daghe usun ẹbho ne ho nin ele mianmẹn khẹ? Ahamiẹn iriọ nọn, edandan iribhọ ghe uwẹ sẹ ka họn ebi ele rẹ re ọkhọ rebhe rẹ wanniẹn inọnta eva nan nọọn ele le ọkuẹsẹ ele mianmẹn, yẹ daghe ebi ẹbho bhi azagba-uwa nọnsele, bi imọẹ ele rẹ ha ghọnghọn yẹ. Ẹghe nin ene ẹbho nan ha rẹ dagbare bhi amẹn, uwẹ ki daghe ebi ẹbho rẹ ha gbobọ yẹ, bi eghọnghọn nọn re ele bhi ẹlo. Uzana-uzana ẹbho ne bunbun rẹ re egbe guẹ nin Jehova yẹ mianmẹn.

² Uwẹ kii? Ahamiẹn uwẹ riale nin uwẹ rẹ mianmẹn, lẹn sẹbhọ ghe ọria kpataki uwẹ khin bhi ọne agbọn Esu nan, nọn ho nin ọle ga Jehova. (Ps. 14:1, 2) Aharẹmiẹn obhokhan la ọwanlẹn uwẹ khin, lẹn sẹbhọ ghe uwẹ a gbẹn ọne uhọnmhọn-ọta nan nan. Ọkpakinọn, ene ki ka mianmẹn fo bhi ẹwẹ mhan yẹ wo guanọ nin ele ha ziẹn ọhubhudu nin ele mhọn rẹ ha ga Jehova. Bhiriọ, bha ji mhan zilo nyan emhin ea bhi ẹwẹ emhin ne bunbun ne zẹle nin mhan da ho nin mhan ha ga Jehova.

3. Bezẹle nin eguọmhandia nesi Jehova da hoẹmhọn ẹmhọanta bi ikhiakhiale? (Psalm 119:128, 163)

³ Jehova da taman ẹbho nesọle nin ele hoẹmhọn ẹmhọanta. (Zech. 8:19) Jesu da taman ene rẹkhan ọlẹn nin ele ha khu ọbhi ikhiakhiale. (Matt. 5:6) Ọnan rẹman ghe ọkhẹke nọn manman ha hu mhan bhi udu rẹ ha lu emhin ne gbale, emhin ne mhẹn, bi emhin ne khiale bhi ẹlo nọnsi Osẹnobulua. Uwẹ be hoẹmhọn ẹmhọanta bi ikhiakhiale? Mhan rẹọbhọ ghe uwẹ wo hoẹmhọn ele. Ohoghe iyẹẹ uwẹ, sẹyẹ, uwẹ he emhin ne imhẹn bi emhin ne  bha gba. (Tie Psalm 119:128, 163.) Esu nọn gbẹloghe ọne agbọn nan, ọle ọria nọn bha ohoghe re egbe khọkhọ. (John 8:44; 12:31) Ọkpa bhi emhin nin Esu guanọ hi, nin ọle rẹ riia elin nọn khiale nọnsi Osẹnobulua nin Jehova a. Rẹ na bhi ẹghe nin Esu rẹ sọtẹ bhi ogba ọsi Idẹn ọle mọn da bha Osẹnobulua ohoghe. Ọle dọnmhegbe nin ọle rẹ ha rẹ ẹbho riale ghe ọria nọn khu ọsi egbe ọle ọkpa, nọn bha ohoghe, nọn bha ho nin emhin ne mhẹn sẹ eria obọ Jehova khin. (Gen. 3:1, 4, 5) Ohoghe nin Esu bha Jehova le wo yẹ ha re ẹbho riale ghe ọria ọbe Jehova khin. Ahamiẹn eria zẹ ghe ele ida hoẹmhọn ẹmhọanta, Esu dẹ sabọ si ele ọbhọ rẹ ha lu emhin kẹkẹ ne imhẹn, bi emhin ne bha gba.—Rom. 1:25-31.

4. Be Jehova rẹ rẹman yẹ ghe Osẹ ọsi ẹmhọanta ọle khin? (Yẹ fẹ ifoto ghe.)

⁴ Jehova hi Osẹ ọsi ẹmhọanta, sẹyẹ, ọle wo man ọrebhe ne hoẹmhọn ọlẹn ọne ẹmhọanta. (Ps. 31:5) Ọne ẹmhọanta nan ọle rẹ rẹkpa ẹbho beji a ha da miẹn Esu bha sabọ hiẹ ele. Jehova yẹ man eguọmhandia nesọle nin ele ha yi eria ne khiale, bi eria ne ta ẹmhọanta. Ọnan rẹkpa ele rẹ ha mhọn ọkhọle nọn lọre, yẹ mhọn ekpẹn bhi egbe. (Prov. 13:5, 6) Ọle sẹ be lu ọnan nin uwẹ beji uwẹ rẹ luẹ Baibo? Beji uwẹ rẹ luẹ ẹmhọn Jehova, uwẹ dọ kere ghe uwedẹ nesọle mhẹn eria bhi egbe nẹ, sẹyẹ, ọle mhẹn uwẹ bhi egbe nẹ. (Ps. 77:13) Bhiriọ uwẹ guanọ nin uwẹ ha lu emhin ne khiale bhi ẹlo nọnsi Jehova. (Matt. 6:33) Uwẹ guanọ nin ẹbho lẹn ẹmhọanta, sẹyẹ, uwẹ ho nin uwẹ rẹman ghe ebi Esu tale rẹji Jehova, ohoghe nọn. Be uwẹ ha rẹ sabọ lu ọnan yẹ?

5. Be uwẹ ha rẹ rẹman yẹ ghe uwẹ hoẹmhọn ẹmhọanta bi ikhiakhiale?

⁵ Uwẹ dẹ sabọ nyẹn iẹnlẹn nọnsẹ bhi uwedẹ nọn ha rẹ rẹman ghe: “uwẹ bha re obọ bhi ohoghe nesi Esu, uwẹ hoẹmhọn ẹmhọanta, Jehova uwẹ guanọ nọn ha gbẹloghe uwẹ, sẹyẹ uwẹ guanọ nin uwẹ ha lu emhin ne khiale bhi ẹlo nọnsọle.” Be uwẹ ha rẹ sabọ lu ene emhin nan yẹ? Uwẹ ki re egbe guẹ nin Jehova bhi erọnmhọn yẹ dọ mianmẹn, nin uwẹ rẹ rẹman ẹbho ghe uwẹ ki ka re egbe guẹ nanlẹn fo. Bhiriọ, oyẹẹ nin uwẹ mhọn da ẹmhọanta bi ikhiakhiale ki ha yi emhin nọn zẹle nin uwẹ da ho nin uwẹ mianmẹn.

6. Beji Psalm 45:4 rẹman, be bhọ emhin esili ne re uwẹ hoẹmhọn Jesu Kristi?

⁶ Bezẹle nin uwẹ da hoẹmhọn Jesu Kristi? Bha ji mhan fẹ emhin esili eso ghe ne zẹle bhi Psalm 45:4. (Tiọle.) Jesu wo hoẹmhọn ẹmhọanta, ọle mhọn idegbere, yẹ lu emhin ne khiale. Ahamiẹn  uwẹ hoẹmhọn ẹmhọanta bi emhin ne khiale, ọ rẹman ghe uwẹ yẹ hoẹmhọn Jesu Kristi. Ria ẹmhọn ebi Jesu rẹ re izebhudu rẹ rẹman yẹ ghe ọle hoẹmhọn ẹmhọanta bi emhin ne gbale. (John 18:37) Be Jesu rẹ rẹman yẹ ghe ọle mhọn idegbere?

7. Be manman yẹẹ uwẹ bhi uwedẹ nin Jesu rẹ re idegbere man?

⁷ Jesu da rẹ uwedẹ nin ọle rẹ lu emhin rẹ rẹman ghe ọle mhọn idegbere. Bhi ọsi ijiẹmhin, ọle da re ogen rebhe ji Aba ọle, ọ iyi egbe ọle. (Mark 10:17, 18; John 5:19) Be uwedẹ nin Jesu rẹ ha re idegbere man dia uwẹ yẹ bhi egbe? Ọi be re uwẹ guanọ nin uwẹ hoẹmhọn Ọmọn nọnsi Osẹnobulua yẹ rẹkhan ọlẹn? Tee. Bezẹle nin Jesu da mhọn idegbere? Ranmhude ọle hoẹmhọn Aba ọle, yẹ re egbe khọkhọ Aba ọle nọn mhọn idegbere. (Ps. 18:35; Heb. 1:3) Ọnan bha be re uwẹ hoẹmhọn Jesu, nọn wo ha re egbe khọkhọ ikpẹ nesi Jehova?

8. Bezẹle nin mhan da ghọnghọn ghe Jesu hi Ojie mhan?

⁸ Mhan hoẹmhọn Jesu nin Ojie mhan, ranmhude ọle hi ọnọn khẹke nọn ha gbẹloghe. Jehova tobọle man Ọmọn nọnsọle emhin, yẹ zẹ ọle nin ọle ha gbẹloghe. (Isa. 50:4, 5) Ria ẹmhọn uwedẹ Jesu rẹ re oyẹẹ man mhan. (John 13:1) Ranmhude Jesu hi Ojie mhan, ọ dẹ ha mhẹn nin mhan manman hoẹmhọn ọlẹn. Jesu yọle ghe eria ne hoẹmhọn ọlẹn hi imọẹ ọle, sẹyẹ ele re obọ rẹkhan uhi nesọle nin ele rẹ rẹman ghe ele hoẹmhọn ọlẹn. (John 14:15; 15:14, 15) Udede ekpẹn nọn nin mhan rẹ ha yi ọmọẹ Jesu nọn Ọmọn nọnsi Jehova!

9. Be imianmẹn ọsi Kristi bi ọsi ene rẹkhan ọlẹn rẹ khọ egbe yẹ?

⁹ Ọkpa bhi uhi nin Jesu gbe nin ene rẹkhan ọlen hi, nin ele mianmẹn. (Matt. 28:19, 20) Ọle re ọne ijiẹmhin ọbhi otọ. Bhi uwedẹ eso, imianmẹn nọnsọle da dikẹ bhi ọsi ene rẹkhan ọle. (Fẹ ọne ẹkpẹti ghe nọn yọle “ Ebi Imianmẹn ọsi Jesu bi ọsi Ene Rẹkhan Ọlẹn Rẹ Dikẹ Yẹ.”) Ọkpakinọn, imianmẹn ọsi Jesu bi ọsi ene rẹkhan ọlẹn mhọn ebi ele rẹ khọ egbe yẹ bhi uwedẹ eso. Jesu da mianmẹn nin ọle rẹ rẹman ghe ọle ho nin ọle re iẹnlẹn nọnsọle rẹ lu iho nọnsi Aba ọle. (Heb. 10:7) Iriọ yẹ nọn, ene rẹkhan Kristi mianmẹn nin ele rẹ rẹman ẹbho ghe ele rẹ egbe ele guẹ nin Jehova. Sẹyẹ, iho nọnsi Osẹnobulua ele ki re iẹnlẹn nọnsele ha lu, ọ iyi ọsi egbe ele. Bhiriọ ele lu rẹkhan ijiẹmhin nọnsi Jesu.

10. Bezẹle nọn khẹke nin oyẹẹ nin uwẹ mhọn da Jesu re uwẹ mianmẹn?

¹⁰ Uwẹ rẹọbhọ ghe Jesu hi ukpọmọn ọkpa sẹsẹ nọnsi Jehova nin ọle zẹ nin ọle ha gbẹloghe mhan. Uwẹ lẹn ghe Jesu mhọn idegbere yẹ re egbe khọkhọ Aba ọle bhi uwedẹ nọn gbale. Uwẹ dọ luẹ ghe ọle re ebale nin ẹbho nin ohamhẹn ha gbe, re ikoudure nin ẹbho nin egbe lọle, yẹ hinmhin ene khọnmhọn. (Matt. 14:14-21) Uwẹ yẹ daghe ebi ọle rẹ sun agbotu nọnsọle yẹ ẹlẹnan. (Matt. 23:10) Sẹyẹ, uwẹ lẹn ghe ọle dẹ lu ọnọn gbera ọnan bhi ẹghe odalo bhi Agbejele nọnsi Osẹnobulua. Be uwẹ ha rẹ rẹman yẹ ghe uwẹ hoẹmhọn Jesu Kristi? Uwẹ ki ha re egbe khọkhọ ọle. (John 14:21) Uwẹ dẹ sabọ lu ọnan sade uwẹ re egbe guẹ nin Jehova yẹ mianmẹn.

11. Be bhọ emhin kpataki nọn zẹle nin uwẹ da ho nin uwẹ mianmẹn? Bezẹle nọn da yi iriọ?

¹¹ Be bhọ emhin kpataki nọn zẹle nin uwẹ da ho nin uwẹ mianmẹn? Jesu da rẹman uhi nọnsi Osẹnobulua nọn kokhun nẹ ẹghe nin ọle rẹ yọle: “Uwẹ dẹ re udu rebhe, egbe rebhe, ọkhọle rebhe, bi ahu rebhe rẹ hoẹmhọn Jehova nin Osẹnobulua nọnsẹ.” (Mark 12:30) Ene ọta nan be rẹman ebi uwẹ hoẹmhọn Osẹnobulua sẹ yẹ?

12. Bezẹle nin uwẹ da hoẹmhọn Jehova? (Yẹ fẹ ifoto ghe.)

¹² Emhin ne bunbun ribhọ ne ha re mhan hoẹmhọn Jehova. Bhi ọsi ijiẹmhin, uwẹ dọ luẹ ghe “obọ [ọle] iẹnlẹn na vae.” Sẹyẹ, ọle hi ọnọn re “ẹsele ne mhẹn rebhe bi ẹsele ne gbale rebhe” nin ọria. (Ps. 36:9; Jas. 1:17) Emhin rebhe ne  mhẹn nin mhan rẹ sọnyẹnmhẹn bhi iẹnlẹn ẹlẹnan, obọ Osẹnobulua nọn ze emhin bhi obọ, nọn yẹ mhọn oyẹẹ ele na vae.

13. Bezẹle nin izọese nọnsi Jesu da yi ẹsele nọn kokhun nẹ?

¹³ Ẹsele nọn khua nin Jehova re nin mhan izọese nọnsi Jesu khin. Bezẹle nin mhan da ta iriọ? Ria ẹmhọn ebi Jehova bi Ọmọn nọnsọle rẹ manman sikẹ egbe yẹ. Jesu da yọle: “Ọne Aba hoẹmhọn mẹn” sẹyẹ “mẹn hoẹmhọn [ọne] Aba.” (John 10:17; 14:31) Ranmhude nin ele rẹ gbe ikpe ne bunbun kugbe, ikolu nin ele mhọn wo manman ziẹn. (Prov. 8:22, 23, 30) Ria ẹmhọn ebi ọ ha rẹ manman ba Osẹnobulua bhi egbe yẹ, nin ọle rẹ ji Ọmọn nọnsọle da loya yẹ yu. Jehova hoẹmhọn uwẹ bi eria nekẹle sẹbhọ ghe, ọle da muegbe nin ọle rẹ re Ọmọn nin ọle manman hoẹmhọnlẹn rẹ zọese beji uwẹ bi ẹbho nekẹle ha da sabọ nyẹnlẹn rẹ sẹbhi ighegheghe. (John 3:16; Gal. 2:20) Ọnan hi emhin kpataki nọn re mhan hoẹmhọn Osẹnobulua.

14. Be bhọ emhin nọn mhẹn nẹ nin uwẹ ha sabọ zẹ rẹ lu bhi iẹnlẹn?

¹⁴ Oyẹẹ nin uwẹ mhọn da Jehova wo ha ziẹn ọbhọ nin uwẹ rẹ dọ luẹ emhin ne bunbun rẹji ọle. Bhiriọ uwẹ guanọ nin uwẹ manman sikẹ ọle nian bi rẹ dọ sẹbhi ighegheghe. Uwẹ dẹ sabọ lu ọnan. Ọle guanọ nin mhan re ọkhọle nọnsọle ha ghọnghọn. (Prov. 23:15, 16) Ọ iyi unun ọkpa mhan ha rẹ gheghe ta ọnan, sokpan mhan ki lu rẹkhan ebi mhan tale. Uwedẹ nin uwẹ rẹ nyẹn iẹnlẹn nọnsẹ dẹ rẹman si uwẹ gene hoẹmhọn  Jehova. (1 John 5:3) Ọnan hi emhin nọn mhẹn nẹ nin uwẹ ha sabọ zẹ rẹ lu bhi iẹnlẹn.

15. Be uwẹ ha rẹ rẹman yẹ ghe uwẹ hoẹmhọn Jehova?

¹⁵ Be uwẹ ha rẹ rẹman yẹ ghe uwẹ hoẹmhọn Jehova? Ebi uwẹ ha ka lu hi, uwẹ ki nan erọnmhọn kpataki rẹ re egbe guẹ nin Osẹnobulua ọsi ẹmhọanta. (Ps. 40:8) Uwẹ ha ki re egbe guẹ nin Jehova fo, uwẹ ki dọ mianmẹn nin uwẹ rẹ rẹman ẹbho ghe uwẹ ki ka re egbe guẹ nanlẹn. Beji mhan ka tẹmhọnlẹn bhi ọne uhọnmhọn-ọta nan, ukpẹdẹ eghọnghọn, bi ukpẹdẹ nin uwẹ ida yelea ghẹdẹ, ọle ukpẹdẹ nin uwẹ da mianmẹn khin bhi iẹnlẹn nọnsẹ. Uwẹ ki munhẹn ha nyẹn iẹnlẹn ọsọgbọn nin Jehova, ọ iyẹ yi egbe uwẹ. (Rom. 14:8; 1 Pet. 4:1, 2) Ọnan sabọ rẹ diabe emhin kpataki nin uwẹ ha zẹ rẹ lu. Ọkpakinọn, emhin kpataki gene khọnan. Ọ dẹ re isẹhoa nin uwẹ rẹ ha nyẹn iẹnlẹn nọn mhẹn an. Be ọ rẹ yi iriọ yẹ?

16. Beji Psalm 41:12 rẹman, be Jehova ha rẹ re ihaosa nin ẹbho ne wo ha re iẹnlẹn nọnsele rẹ ga ọle?

¹⁶ Ọria iribhọ nọn ze emhin bhi obọ sẹ bii Jehova. Emhin nọn hi ki rẹ khin nin uwẹ re nin Jehova, ọle dẹ wo re ọnọn gbera ọnin nin uwẹ. (Mark 10:29, 30) Arẹmiẹn ọne agbọn Esu nan nọn imhẹn mhan da nyẹnlẹn, ọle dẹ rẹkpa uwẹ rẹ ha mhọn iẹnlẹn nọn mhẹn an, nin emhin soso iribhọ nan ha rẹ sabọ khọkhọ ọle. Ukpọkhere khọnan bhi emhin nin ọle ha lu nin uwẹ. Ọ bha khẹke nin ọne uwedẹ nan nin uwẹ zẹ nin uwẹ rẹ ga Jehova kpẹn sade uwẹ mianmẹn fo. Uwẹ dẹ sabọ ha ga Aba ẹ nin uwẹ hoẹmhọnlẹn rẹ sẹbhi ighegheghe. Oyẹẹ nin uwẹ bi ọle ko mhọnlẹn dẹ wo ha ziẹn ọbhọ. Sẹyẹ, uwẹ dẹ sabọ ha nyẹnlẹn beji Jehova yẹ rẹ nyẹnlẹn—ọnin hi rẹ sẹbhi ighegheghe.—Tie Psalm 41:12.

17. Be uwẹ ha sabọ re nin Jehova nin ọle ika mhọnlẹn?

¹⁷ Ahamiẹn uwẹ re egbe guẹ nin Jehova yẹ mianmẹn, uwẹ ki ha mhọn ọne isẹhoa nin uwẹ rẹ re emhin nọn manman ghan nin Jehova nin Aba ẹ. Ọle wo re emhin ne mhẹn rebhe, bi emhin rebhe ne re uwẹ ha sọnyẹnmhẹn nin uwẹ. Bhiriọ uwẹ dẹ yẹ sabọ re emhin nin Osẹnobulua nọn nyan otọ bi okhun ika mhọnlẹn khẹ nanlẹn—ọnin hi, nin uwẹ rẹ muegbe rẹ re iẹnlẹn nọnsẹ rẹ ha ga ọle. (Job 1:8; 41:11; Prov. 27:11) Ọnan hi uwedẹ nọn mhẹn nẹ nin uwẹ ha rẹ nyẹn iẹnlẹn nọnsẹ. Edandan iribhọ ghe, oyẹẹ nin uwẹ  mhọn da Jehova hi emhin nọn manman zẹ nin uwẹ da ho nin uwẹ mianmẹn.

18. Inọnta nela uwẹ ha sabọ nọọn egbe uwẹ le?

¹⁸ Bhi ejayenan nian, be uwẹ ha tayẹ sade a nọọn uwẹ yọle, Uwẹ dẹ mianmẹn? Bhi ọsi ẹmhọanta, uwẹ ọkpa ha sabọ re ewanniẹn ọbhi ọne inọnta nan. Ọ dẹ ha mhẹn sade uwẹ nọọn egbe ẹ ọne inọnta nan, ‘Bezẹle nin mẹn da si egbe re ikeke?’ (Acts 8:36) Ye ene emhin ea re nin mhan zilo nyan. Ọhẹnhẹn, uwẹ hoẹmhọn ẹmhọanta bi ikhiakhiale. Nọọn egbe ẹ, ‘Mẹn be khuaẹloghe ẹghe nin ẹbho rebhe ha rẹ ha ta ẹmhọanta, yẹ lu emhin ne khiale?’ Ọzeva, uwẹ hoẹmhọn Jesu Kristi. Nọọn egbe ẹ, ‘Mẹn be guanọ nin Ọmọn nọnsi Osẹnobulua ha yi Ojie nọnsẹmhẹn, yẹ guanọ nin mẹn rẹkhan ijiẹmhin nọnsọle?’ Ọzea nọn kokhun nẹ hi, uwẹ hoẹmhọn Jehova. Nọọn egbe ẹ, ‘Mẹn be guanọ nin mẹn re ọkhọle nọnsi Jehova ha ghọnghọn beji mẹn ha rẹ ha ga ọle bii Osẹnobulua nọnsẹmhẹn?’ Ahamiẹn ehe hi ewanniẹn nọnsẹ rẹji ene inọnta nan, bezẹle nin uwẹ bha ki da sẹ mianmẹn? Bezẹle nin uwẹ da si egbe re ikeke?—Acts 16:33.

19. Bezẹle nọn bha da khẹke nin uwẹ ha si egbe re ikeke rẹ mianmẹn? Rẹ ijiẹmhin ọbhọ. (John 4:34)

¹⁹ Ahamiẹn uwẹ si egbe re ikeke nin uwẹ rẹ mianmẹn, fẹ ọne arẹkhọkhọ nan ghe nin Jesu noo. (Tie John 4:34.) Jesu da re ebale khọkhọ nan rẹ ha lu iho nọnsi Aba ọle. Bezẹle? Ebale mhẹn bhi egbe. Jesus lẹn ghe emhin rebhe nin Jehova yọle nin mhan lu mhẹn mhan bhi egbe. Jehova bha guanọ nin mhan lu emhin soso nọn ha si ikuan-egbe ji mhan. Iho nọnsi Jehova rẹji uwẹ be deba nin uwẹ rẹ mianmẹn? Ehe. (Acts 2:38) Bhiriọ, uwẹ dẹ sabọ rẹọbhọ ghe uwẹ dẹ miẹn elele, sade uwẹ re obọ rẹkhan ọne uhi nin uwẹ rẹ mianmẹn. Ahamiẹn uwẹ isi egbe re ikeke nin uwẹ rẹ le ebale nọn mhẹn bhi unun, bezẹle nin uwẹ ki da si egbe re ikeke rẹ mianmẹn?

20. Be imhan ha zilo nyan bhi uhọnmhọn-ọta nọn ki sẹ ọle bhi egbe?

²⁰ Bezẹle nin uwẹ da si egbe re ikeke? Ẹbho ne bunbun sabọ rẹ yọle: “Mẹn bha sẹ muegbe.” Bhi ọsi ẹmhọanta emhin nọn mhẹn nẹ nin uwẹ ha sabọ zẹ rẹ lu hi, nin uwẹ rẹ re egbe guẹ nin Jehova yẹ mianmẹn. Bhiriọ, lẹn sẹbhọ ghe, emhin nin uwẹ ha re ẹghe ọbhi otọ rẹ muegbe ọle, noo ahu nọnsẹ ọi, yẹ manman ria eria nyan khọnan. Ọkpakinọn, ahamiẹn uwẹ mhọn ọnọn ọkhọle nin uwẹ rẹ mianmẹn, be uwẹ ha sabọ lu nian rẹ muegbe ọbhi otọ? Mhan dẹ re ewanniẹn ọbhi ọne inọnta nan bhi uhọnmhọn-ọta nọn ki sẹ ọle bhi egbe.