1-2. Ahamiẹn uwẹ bha sẹ sẹ ọria nọn ha mianmẹn, bezẹle nọn bha da khẹke nin egbe lọ uwẹ? (Fẹ adudu nọn ribhi odalo ọle ghe.)

 AHAMIẸN uwẹ mhọnlẹn bhi ọkhọle nin uwẹ rẹ mianmẹn, emhin nọn mhẹn uwẹ wo zẹ nin uwẹ lu. Uwẹ be muegbe nin uwẹ rẹ lu iriọ nian? Ahamiẹn uwẹ rẹọbhọ ghe uwẹ muegbe, sẹyẹ, ene ewanlẹn re obọ bhọ nin uwẹ rẹ mianmẹn, hẹi si egbe re ikeke rẹ mianmẹn bhi usikoko nọn vade. Uwẹ dẹ miẹn emhin esili ne bunbun bhi oga nọnsi Jehova sade uwẹ lu iriọ.

² Bhi obọ nọnkẹle, ọria be sẹ ka taman uwẹ ghe nin uwẹ ha lu rẹ alo beji uwẹ ha da sẹ ọnọn ha mianmẹn? La uwẹ be tobuwẹ lẹn ọnan? Ahamiẹn iriọ nọn hẹi ji egbe lọ uwẹ. Uwẹ dẹ sabọ lu re alo yẹ sẹ ọnọn ha mianmẹn, aharẹmiẹn ọwanlẹn la obhokhan uwẹ khin.

3. Be okpea ọkpa nọn wẹnna bhi ẹgua ọsi Ẹtiopia nọọn Philip le? Inọnta nela ki zegbere? (Acts 8: 36, 38)

³ Tie Acts 8:36, 38. Okpea ọkpa nọn wẹnna bhi ẹgua ọsi Ẹtiopia da nọọn Philip yọle: “Be ha ki zẹ mẹn bha mianmẹn?” Ọne okpea da ha guanọ nin ọle mianmẹn, ọkpakinọn ọle be gene muegbe nin ọle rẹ mianmẹn?

4. Be ọne okpea nọn wẹnna bhi ẹgua ọsi Ẹtiopia rẹ rẹman yẹ ghe ọle wo muegbe nin ọle rẹ ha luẹ emhin?

⁴ Ọne ọkpea nọn wẹnna bhi ẹgua ọsi Ẹtiopia “da yo iJerusalẹm dọ ga bhi enin.” (Acts 8:27) Asabọmiẹn ọle wo ha ga beji ibhokhan iJu rẹ ga arẹmiẹn ọle iyi obhokhan iJu. Edandan iribhọ ghe, ọle wo luẹ ẹmhọn Jehova bhi obọ Baibo nan rẹ urolo Hibru gbẹn. Ọrẹyiriọ, ọle da wo ha guanọ nin ọle luẹ ba ebi ọle ka lẹn. Ẹghe nin Philip rẹ miẹn ọne okpea nan bhi uwedẹ, be ọle  kere ghe ọle lu? Ọle da ha tie ọta akhasẹ ọsi Ẹzaya. (Acts 8:28) Ebale oriọn ne kaka wo khọnan. Ọ iyi emhin ne lẹkhẹ ọkpa ọne okpea nan wo ha guanọ nin ọle lẹn, sokpan ọle yẹ wo ha guanọ nin ọle lẹn emhin ne dinmhin.

5. Be ọne okpea nọn na bhi Ẹtiopia vae lu rẹji ebi ọle luẹle?

⁵ Okpọria ọne okpea nan ha khin bhi odotọ Candace nin Esọn ọsi Ẹtiopia. Ọne okpea nan hi ọnọn ha “gbẹloghe afe bi ua ọsi ọne esọn.” (Acts 8:27) Bhiriọ ọle dẹ wo ha mhọn ẹsọn ne bunbun nin ọle miẹn. Ọrẹyiriọ, ọle da yẹ re ẹghe ọbhi otọ rẹ ha ga Jehova. Ọle bha wo gheghe luẹ ene ẹmhọanta; ọle da yẹ re obọ rẹkhan emhin nin ọle luẹ. Ọle da na bhi Ẹtiopia ha khian uwa oga nọn ribhi Jerusalẹm beji ọle ha da dọ ga Jehova bhi enin. Ọne okhian nan sabọ rẹ gbe ọle ẹghe bi igho, ọkpakinọn, ọle da sẹyẹ dọnmhegbe beji ọle ha da dọ ga Jehova bhi enin arẹmiẹn ọ ida lẹkhẹ nanlẹn.

6-7. Be ọne okpea nọn na bhi Ẹtiopia vae rẹ ha ziẹn oyẹẹ nin ọle mhọn da Jehova yẹ?

⁶ Ọne okpea nọn na bhi Ẹtiopia vae da luẹ ẹmhọanta kẹkẹ bhi obọ Philip. Ọkpa bhi ene ẹmhọanta nin ọle luẹ hi, Jesu hi ọne Mezaya. (Acts 8:34, 35) Ọne okpea nan da wo ha ghọnghọn rẹ lẹn ebi Jesu lu nanlẹn. Be ọle ki lu yẹ beji ọle ki lẹn ọnan? Ọle ha rẹ ji emhin nin ọle sẹ luẹ da sẹ ọle, ọkpakinọn ọle bha lu iriọ. Ọle da ziẹn oyẹẹ nin ọle mhọn da Jehova bi Ọmọn nọnsọle. Ọle da zẹ nin ọle rẹ mianmẹn, beji ọle ha da ha yi ọkpa bhi ene rẹkhan Jesu Kristi. Philip ki daghe ọle ghe ọne okpea nan wo muegbe, ọle da gbe ọle ruẹ bhi amẹn.

⁷ Ahamiẹn uwẹ re egbe khọkhọ ọne okpea nan nọn na bhi Ẹtiopia vae, uwẹ dẹ yẹ sabọ muegbe rẹ mianmẹn. Uwẹ ki yẹ dọ sabọ yọle: “Be ha ki zẹ mẹn bha mianmẹn?” Bha ji mhan zilo nyan emhin nin uwẹ ha sabọ lu beji ọne okpea nin yẹ lu. Ọle da wo ha luẹ emhin yẹ re obọ rẹkhan emhin nin ọle luẹ. Sẹyẹ, ọle da wo ha ziẹn oyẹẹ nin ọle mhọn da Osẹnobulua.

8. Be John 17:3 yọle nin uwẹ lu?

⁸ Tie John 17:3. Ene ọta nin Jesu tale be rẹkpa uwẹ rẹ zẹ nin uwẹ rẹ ha luẹ Baibo? Ene ọta nan sẹ wo rẹkpa ene bunbun bhi ẹwẹ mhan rẹ ha luẹ Baibo. Ọkpakinọn, Jesu be re ene ọta nan rẹ taman mhan ghe nin mhan wo ha luẹ emhin? Ehe. Ẹghe iribhọ nin mhan ha rẹ zobọ bhọ rẹ ha luẹ ẹmhọn Osẹnobulua nin Jehova. (Eccl.3:11) Mhan dẹ wo ha luẹ emhin rẹ sẹbhi ighegheghe. Beji mhan ha rẹ ha luẹ ẹmhọn Jehova, iriọ mhan ha rẹ manman ha sikẹ ọle.—Ps. 73:28.

9. Be ọkhẹke nin mhan lu sade mhan luẹ ene ikuẹkuẹ emhin ne ribhi Baibo fo?

⁹ Ahamiẹn mhan ho nin mhan luẹ ẹmhọn Jehova, iman-emhin ne lẹkhẹ bhi Baibo mhan ka rẹ munhẹn. Bhi ilẹta nin Pọl nin odibo gbẹn ji ibhokhan Hibru, ọle da tie ene iman-emhin  nan “ikuẹkuẹ emhin.” Ọle bha ha rẹ ẹlo gbe ene “iman-emhin ne khere-khere” a, ọkpakinọn ọle da re ele khọkhọ amẹn-inyẹn nan re nin ọmọn nyẹn. (Heb. 5:12; 6:1) Ọkpakinọn, ọle da yẹ taman ene Kristiẹn nin ele ha luẹ ba ene ikuẹkuẹ emhin nin ele ka luẹ, bi nin ele yẹ ha luẹ ene ẹmhọanta ne dinmhin ne ribhi Baibo. Ọ be ghọn uwẹ rẹ ha luẹ ene emhin ne dinmhin ne ribhi Baibo? Uwẹ be muegbe rẹ wo ha luẹ ba ele? Uwẹ be muegbe rẹ wo ha luẹ ẹmhọn Jehova bi iho nọnsọle?

10. Bezẹle nọn da nọghọ ẹbho eso rẹ ha luẹ emhin?

¹⁰ Ọ nọghọ ene bunbun bhi ẹwẹ mhan rẹ ha luẹ emhin. Uwẹ kii? Uwẹ be luẹ ebi a rẹ tie ebe yẹ, yẹ luẹ emhin nọnsẹn bhi isiku? Uwẹ be sọnyẹnmhẹn bhi emhin nin uwẹ luẹ, yẹ manman miẹn emhin luẹ bhọ? La uwẹ rẹọbhọ ghe uwẹ ida sabọ miẹn emhin luẹ bhi ebi uwẹ tie? Ahamiẹn iriọ nọn, lẹn sẹbhọ ghe ọ iyi uwẹ ọkpa ribhi ọne idia nan. Ọkpakinọn, Jehova dẹ sabọ rẹkpa uwẹ. Jehova gbamhin, sẹyẹ ọria iribhọ nọn man emhin sẹ bii ọle.

11. Be Jehova rẹ rẹman yẹ ghe ọle hi “Ọman-emhin Nọn Ke Okhun Nẹ”?

¹¹ Jehova da tie egbe ọle ‘Ọman-emhin Nọn Ke Okhun Nẹ nọnsẹmhan.’ (Isa. 30:20, 21) Ọman-emhin nọn lẹn emhin, nọn mhọn ẹkẹ-ẹjẹjẹ, nọn yẹ mhọn iziẹngbe Jehova khin. Ebe ha mhẹn ene ọle man ele emhin bhi egbe ọle guanọ. (Ps. 130:3) Sẹyẹ, ọle iguanọ nin mhan lu emhin nin ahu mhan ida sabọ gbe. Yere ghe, ọle man ẹrere nọnsẹmhan. Ẹsele nọn mhẹn an wo khọnan. (Ps. 139:14) Jehova man mhan bhi uwedẹ nọn ha rẹ ha ghọn mhan rẹ ha luẹ emhin. Aman nọn man mhan guanọ nin mhan wo ha luẹ emhin rẹ ha khian ighegheghe, yẹ wo ha sọnyẹnmhẹn bhọ. Bhiriọ emhin ẹwanlẹn nọn nin mhan rẹ wo ha luẹ ẹmhọanta ne ribhi Baibo nian. (1 Pet. 2:2) Ha mhọn emhanmhan nin uwẹ ha rẹ ha tie Baibo, uwẹ ha yẹ re obọ rẹkhan ọne emhanmhan. (Josh. 1:8) Jehova dẹ rẹkpa uwẹ rẹ ha sọnyẹnmhẹn bhi ebe nin uwẹ tie, yẹ rẹkpa uwẹ rẹ manman ha luẹ ẹmhọn ọlẹn.

12. Bezẹle nọn da khẹke nin mhan luẹ ẹmhọn iẹnlẹn nọnsi Jesu bi iwẹnna oga nọnsọle bhi iluẹmhin Baibo nọnsẹmhan?

¹² Ha ria eria nyan ẹmhọn iẹnlẹn nọnsi Jesu bi iwẹnna oga nọnsọle ẹghe rebhe. Ahamiẹn mhan re egbe khọkhọ Jesu, ọ ki rẹkpa mhan rẹ ha ga Jehova nọnsẹn, manman nọn bhi ọne ẹghe ọkakale nan. (1 Pet. 2:21) Jesu da ji edibo nesọle lẹn ghe ele dẹ miẹn ọkakale kẹkẹ. (Luke 14:27, 28) Ọrẹyiriọ, ọle da ha mhọnlẹn bhi ọkhọle ghe edibo nesọle dẹ sẹyẹ sun rẹkhan Jehova beji ọle yẹ lu. (John 16:33) Luẹ ẹmhọn iẹnlẹn nọnsi Jesu, uwẹ ha yẹ mhanmhanlẹn nin uwẹ rẹ ha re egbe khọkhọ ọle ukpẹdẹ-ukpẹdẹ.

13. Be ọkhẹke nin uwẹ wo ha bhii Jehova lẹ? Bezẹle?

¹³ Ilẹn-emhin ọkpa bha wo sẹ. Ọkpakinọn emhin ọkpa nọn zẹle nin mhan ha da ha mhọn ilẹn-emhin hi, ọ rẹkpa mhan rẹ lẹn Jehova nọnsẹn. Ọ yẹ rẹkpa mhan rẹ manman hoẹmhọn ọlẹn, yẹ ha mhọn urẹọbhọ da ọle. (1 Cor. 8:1-3) Beji uwẹ ha rẹ ha luẹ ẹmhọn ọlẹn, ha bhii Ọle nin ọle rẹkpa uwẹ rẹ manman ha mhọn urẹọbhọ. (Luke 17:5) Ọ wo ti ọle bhọ rẹ wanniẹn erọnmhọn ne sẹ inian. Urẹọbhọ ọsaje nin uwẹ dọ ha mhọn ranmhude emhin nin uwẹ luẹ bhi Baibo, dẹ rẹkpa uwẹ rẹ ha lu re alo.—Jas. 2:26.

14. Be Pita nin odibo rẹ rẹman ebi ọ lu uhọnmhọn emhin sẹ yẹ nin mhan rẹ ha lu rẹkhan ebi mhan luẹ? (Yẹ fẹ ifoto ghe.)

¹⁴ Pita nin odibo da tẹmhọn ebi ọ rẹ manman lu uhọnmhọn emhin yẹ nin ene rẹkhan Jesu rẹ ha lu rẹkhan emhin nin ele luẹ. Ọle da tẹmhọn okha ọsi Noa bhi Baibo. Jehova da taman Noa ghe ọle dẹ re okpamẹn rẹ fuẹn ẹbho ne imhẹn an ne nyẹnlẹn bhi ẹghe nọnsọle. Noa bi azagba-uwa nọnsọle ida miuhọnmhọn nin ele rẹ  gheghe lẹn ghe okpamẹn vade. Lẹn sẹbhọ ghe “ẹghe nan rẹ ha kanọ ọne okọ” ọkuẹsẹ ọne okpamẹn vae Pita ha tẹmhọnlẹn. (1 Pet. 3:20) Noa bi azagba-uwa nọnsọle da noo ebi ele lẹn rẹji Jehova rẹ wẹnna, ele da kanọ udede okọ. (Heb. 11:7) Pita da re ebi Noa lu rẹ khọkhọ imianmẹn ẹghe nin ọle rẹ gbẹn yọle: “Inian imianmẹn yẹ diabe ọnan. Ọne imianmẹn nan sẹyẹ wo miẹn bha fan nian.” (1 Pet. 3:21) Bhiriọ, mhan dẹ sabọ re iwẹnna nin uwẹ lu nian rẹ muegbe ọbhi otọ khẹ imianmẹn rẹ khọkhọ iwẹnna nin Noa bi azagba-uwa nọnsọle lu bhi ikpe ne bunbun rẹ bọn ọne okọ. Be ọkhẹke nin uwẹ lu nin uwẹ rẹ muegbe khẹ imianmẹn?

15. Be ọria ha rẹ rẹman yẹ ghe, ọle gene fidenọ?

¹⁵ Emhin ọhẹnhẹn nọn khẹke nin mhan lu hi, nin mhan rẹ fidenọ bhi emhin ebe nesẹmhan. (Acts 2:37, 38) Ọria nọn gene fidenọ dẹ fikeke gbe emhin ne imhẹn nin ọle ka rẹ ha lu. Uwẹ be sẹ rẹban emhin nọn hi ki rẹ khin nọn iyẹẹ Jehova, bọsi nin ọria rẹ ha nyẹn iẹnlẹn isankan, noo itaba, sin isika, la zẹ ọkhọbhunun, la ta ọta ne imhẹn? (1 Cor. 6:9, 10; 2 Cor. 7:1; Eph. 4:29) Ahamiẹn uwẹ bha sẹ rẹban ene emhin nan, dọnmhegbe rẹ lu iriọ. Taman ọnọn man uwẹ Baibo, la ewanlẹn bhi agbotu nin ele rẹkpa uwẹ. Ahamiẹn usẹn nọn deba ene biẹ ọle nyẹnlẹn uwẹ khin, wo ha taman ele nin ele rẹkpa uwẹ rẹ sabọ rẹban ene emhin ne imhẹn nan ne ha sabọ si uwẹ re ikeke rẹ mianmẹn.

16. Be ọkhẹke nin mhan lu sade mhan guanọ nin mhan ha ga Jehova ẹghe rebhe?

¹⁶ Ọ yẹ wo manman khẹke nin uwẹ ha lu emhin ne ha re uwẹ ha ga Osẹnobulua ẹghe rebhe. Ọkpa bhi ene emhin hi, nin uwẹ rẹ ha yo ikolo oga yẹ re ewanniẹn ọbhi inọnta. (Heb. 10:24, 25) Ahamiẹn a re obọ bhọ nin uwẹ rẹ ha tẹmhọn Osẹnobulua, dọnmhegbe rẹ wo ha lu ọle ẹghe rebhe. Beji uwẹ ha rẹ manman ha tẹmhọn Osẹnobulua, iriọ uwẹ ha yẹ rẹ manman ha sọnyẹnmhẹn bhọ. (2 Tim. 4:5) Ahamiẹn usẹn nọn deba ene biẹ ọle nyẹnlẹn uwẹ khin, nọọn egbe ẹ, ‘Ẹghe-ẹghe ene biẹ mẹn be rẹ ye mẹn re nin mẹn yo ikolo oga, la deba bhi inẹbho? La mẹn be tobọmẹn lu ọle? Uwẹ da tobuwẹ ha lu ene emhin nan, uwẹ rẹman Jehova ghe uwẹ mhọn urẹọbhọ bi oyẹẹ da ọle. Sẹyẹ, emhin nin ọle lu nin uwẹ ti uwẹ bhọ. Enan hi emhin nin uwẹ lu rẹ ga Osẹnobulua. Ele hi ẹsele nin uwẹ re nanlẹn. (2 Pet. 3:11; Heb. 13:15) Ẹsele rebhe nin mhan re ọkhọle nọnsẹmhan re nin  Jehova ti ọle bhọ. (Yẹ fẹ 2 Corinthians 9:7 ghe.) Mhan lu ene emhin nan, ranmhude ọ re mhan ghọnghọn rẹ ha lu eka nin mhan ha sabọ lu nin Jehova.

17-18. Ikpẹ nela ha manman rẹkpa uwẹ rẹ lu re alo beji uwẹ ha da sabọ mianmẹn? Be ọ ha rẹ rẹkpa uwẹ yẹ? (Proverbs 3:3-6)

¹⁷ Beji uwẹ ha rẹ ha lu re alo nin uwẹ da sabọ mianmẹn, uwẹ dẹ kuẹlo da ọnọghọ kẹkẹ. Ẹbho eso sabọ rẹ ha zuọzuọ uwẹ ranmhude emhin ọgbọn nin uwẹ dọ rẹọ ọi; ele bhọ sabọ rẹ ha kpokpo uwẹ. (2 Tim. 3:12) Beji uwẹ ha rẹ ha dọnmhegbe rẹ rẹban emhin ne imhẹn nin uwẹ guẹle, ẹgheso uwẹ sabọ yẹ rẹ ke egbe uwẹ rẹ ghe uwẹ lu ele. Egbe sabọ rẹ lọ uwẹ, la ha khọẹkẹ ranmhude uwẹ bha sabọ lu ebi uwẹ ho nin uwẹ lu. Be ha rẹkpa uwẹ rẹ sẹyẹ rẹtẹ? Oyẹẹ nin uwẹ mhọn da Jehova.

¹⁸ Ikpẹ esili oyẹẹ nin uwẹ mhọn da Jehova khin. Ọle hi ikpẹ nọn ke okhun nẹ nin uwẹ mhọn. (Tie Proverbs 3:3-6.) Oyẹẹ nọn ziẹn nin uwẹ mhọn da Osẹnobulua dẹ rẹkpa uwẹ rẹ sabọ ziẹngbe ọnọghọ. Baibo kẹ wo tẹmhọn ahoẹmhọn-egbe nọn ibeghe nin Jehova mhọn da eguọmhandia nesọle. Ọne ahoẹmhọn-egbe nọn ibeghe nin ọle mhọnlẹn zẹle nin ọle ida fikeke gbe eguọmhandia nesọle, la zobọ bhọ rẹ ha hoẹmhọn ele. (Ps. 100:5) Jehova man uwẹ bhi uwedẹ nin uwẹ ha rẹ ha re egbe khọkhọ ọle. (Gen. 1:26) Be uwẹ ha rẹ sabọ re egbe khọkhọ Jehova yẹ bhi uwedẹ nin ọle rẹ re ahoẹmhọn-egbe nọn ibeghe man?

19. Be uwẹ ha rẹ manman rẹman yẹ ghe emhin nin Jehova lu nin uwẹ ti uwẹ bhọ? (Galatians 2:20)

¹⁹ Emhin nin uwẹ ha ka lu rẹ rẹman ghe uwẹ mhọn ahoẹmhọn-egbe nọn ibeghe hi, nin uwẹ rẹ ha gbe ekhuẹnmhẹn. (1 Thess. 5:18) Ha nọọn egbe ẹ ukpẹdẹ-ukpẹdẹ, ‘Be Jehova rẹ re oyẹẹ man mẹn yẹ?’ Dọnmhegbe ha khuẹnmhẹn Jehova bhi erọnmhọn nesẹ, yẹ sounun bhi emhin nin ọle sẹ lu nin uwẹ. Lẹn sẹbhọ ghe, Jehova lu emhin esili kẹkẹ nin uwẹ tobuwẹ ranmhude ọle hoẹmhọn uwẹ. Pọl nin odibo yẹ lẹn ghe Jehova hoẹmhọnlẹn. (Tie Galatians 2:20.) Nọọn egbe ẹ, ‘Mẹn be guanọ nin mẹn yẹ re ọne oyẹẹ nan man ọlẹn?’ Oyẹẹ nin uwẹ mhọn da Jehova dẹ rẹkpa uwẹ rẹ wo ha ziẹngbe ekpokpo bi edọnmhẹn. Ọ dẹ yẹ rẹkpa uwẹ rẹ ha ga Jehova ẹghe rebhe, nin uwẹ rẹ ha rẹman Aba uwẹ ukpẹdẹ-ukpẹdẹ ghe uwẹ hoẹmhọn ọlẹn.

20. Be uwẹ ha lu rẹ re egbe guẹ nin Jehova? Bezẹle nin ọnan da manman lu uhọnmhọn emhin?

²⁰ Beji ẹghe ha rẹ ha gbera, oyẹẹ nin uwẹ  mhọn da Jehova ki re uwẹ nan erọnmhọn kpataki ji ọle rẹ re egbe guẹ nanlẹn. Yere ghe uwẹ ha re egbe guẹ nin Jehova, uwẹ ki ha mhọn ọne isẹhoa nin uwẹ rẹ ha nyẹnlẹn nanlẹn rẹ sẹbhi ighegheghe. Ahamiẹn uwẹ re egbe guẹ nin Jehova, uwẹ ve ghe uwẹ dẹ wo ha ga ọle khian aharẹmiẹn emhin mhẹn la ọ imhẹn. Ọ iyi ẹghe-ẹghe uwẹ ha rẹ ha ve ọne ive nan. Bhi ọsi ẹmhọanta, emhin kpataki mhan zẹ rẹ lu sade mhan re egbe guẹ nin Jehova. Ria ẹmhọn nan ghe: Uwẹ dẹ wo ha zẹ emhin ne bunbun nin uwẹ ha lu bhi iẹnlẹn, eso bhọ dẹ wo ha mhẹn, ọkpakinọn uwẹ ida zẹ ọnọn mhẹn gbera ọne uwẹ ha rẹ re egbe guẹ nin Jehova. (Ps. 50:14) Esu dẹ wo ha guanọ nin ọle wẹghẹ oyẹẹ nin uwẹ mhọn da Aba uwẹ a, beji a ha da miẹn uwẹ bha yẹ sun rẹkhan Jehova. Hiẹ re otọ nanlẹn rẹ lu iriọ. (Job 27:5) Oyẹẹ nọn ziẹn nin uwẹ mhọn da Jehova dẹ rẹkpa uwẹ rẹ mun ive nin uwẹ vele nin uwẹ rẹ ga ọle sẹ, yẹ wo manman ha sikẹ Aba uwẹ nọn ribhi okhun.

21. Bezẹle nin mhan ha da sabọ yọle ghe ọria ha mianmẹn fo bha rẹman ghe, ọle dẹ zobọ bhọ rẹ ha lu re alo, sokpan umunhẹn ọnan khin?

²¹ Uwẹ ha ki re egbe guẹ nin Jehova fo, taman ewanlẹn ne ribhi agbotu nọnsẹ ghe uwẹ ho nin uwẹ mianmẹn. Wo ha yere ghe, uwẹ ha mianmẹn fo, ọ bha rẹman ghe uwẹ dẹ zobọ bhọ rẹ ha lu re alo, sokpan umunhẹn sẹ khọnan. Ọnan rẹman ghe uwẹ dẹ re ẹdagbọn iẹnlẹn nọnsẹ rẹ ha ga Jehova. Bhiriọ, ziẹn oyẹẹ nin uwẹ mhọn da Aba uwẹ nian. Ha mhọn emhanmhan ne ha rẹkpa uwẹ ha ziẹn oyẹẹ nin uwẹ mhọn da Jehova ukpẹdẹ-ukpẹdẹ. Ene emhanmhan nan dẹ rẹkpa uwẹ rẹ mianmẹn. Ọne ukpẹdẹ nin dẹ wo mhẹn bhi ẹlo a. Ọkpakinọn, umunhẹn ọnan sẹ khin. Bhiriọ, wo ji oyẹẹ nin uwẹ mhọn da Jehova bi Ọmọn nọnsọle wo ha ziẹn bhọ!