1. Be enebiọmọn guanọ nin imọn nesele?

 ENEBIỌMỌN, mhan lẹnmhin ghe ọ ghọn bha rẹ rẹkpa imọn nesẹbha rẹ dọ lẹn Jehova, yẹ hoẹmhọn ọlẹn. Ọkpakinọn, mhan isabọ daghe Osẹnobulua. Bhiriọ, be uwẹ ha rẹ sabọ rẹkpa imọn nesẹ rẹ ha ghe Osẹnobulua bii ọmọẹ, yẹ rẹ sabọ sikẹ ọle?—Jas. 4:8.

2. Be enebiọmọn ha rẹ sabọ rẹkpa imọn nesele rẹ luẹ ẹmhọn ikpẹ nesi Jehova yẹ?

² Uwedẹ kpataki nin enebiọmọn ha rẹ sabọ rẹkpa imọn nesele rẹ sikẹ Jehova hi, nin ele rẹ ha man ele Baibo. (2 Tim. 3:14-17) Ọrẹyiriọ, Baibo yẹ tẹmhọn uwedẹ ọbhebhe nin ene ibhokhan ha rẹ sabọ luẹ ẹmhọn Jehova. Bhi ebe ọsi Proverbs, a da tẹmhọn aba nọn ye ọmọn nọnsọle re ghe, nin ọle hẹi re ẹlo gbera ikpẹ nesi Jehova nin mhan daghe bhi emhin nin ọle manlẹn. (Prov. 3:19-21) Mhan dẹ zilo nyan uwedẹ eso nin enebiọmọn ha rẹ sabọ noo emhin Jehova manlẹn rẹ rẹkpa imọn nesele rẹ lẹn unan ọria nin Jehova khin.

3. Urẹkpa nela ọkhẹke nin enebiọmọn re nin imọn nesele?

³ Baibo yọle ghe “arẹmiẹn a isabọ daghe Osẹnobulua, rẹ na bhi ẹghe nan rẹ man ọne agbọn nan ha vade, eria sabọ daghe ikpẹ nesọle . . . bhi ebi ọle manlẹn.” (Rom. 1:20) Enebiọmọn, asabọmiẹn ọ yẹẹ bha rẹ deba imọn nesẹbha ha gbẹ ẹghe kugbe bhi ole. Noo ene ẹghe nan rẹ rẹkpa imọn nesẹ rẹ daghe ikpẹ nesi Jehova bhi ene emhin nin ọle manlẹn. Bha ji mhan fẹ ebi enebiọmọn ha sabọ luẹ bhi uwedẹ nin Jesu rẹ noo emhin nin Jehova manlan rẹ man ẹbho emhin yẹ.

4. Be Jesu rẹ noo emhin nin Jehova manlẹn rẹ man edibo nesọle emhin yẹ? (Luke 12:24, 27-30)

 ⁴ Mhan fẹ ebi Jesu rẹ noo emhin nin Osẹnobulua manlẹn rẹ man emhin yẹ. Bhi ẹghe ọkpa, ọle da taman edibo nesọle nin ele gbẹlokotọ bhi ene akhuankhuan bi ene aroro. (Tie Luke 12:24, 27-30.) Jesu ha rẹ sabọ noo unan afianmhẹn ọbhebhe, la aroro nin edibo nesọle bha manman lẹn. Ọkpakinọn ọle bha lu iriọ, ọle da noo afianmhẹn bi aroro nin edibo nesọle manman lẹn nọnsẹn. Asabọmiẹn edibo nesi Jesu daghe ene akhuankhuan tinọ bhi okhun, sẹyẹ ene aroro wo sọnọn re. Uwẹ dẹ sabọ re ọkhọle muno ebi Jesu rẹ niẹn obọ ji ene emhin nan yẹ beji ọle ha talọ? Be ọle ki lu yẹ beji ọle sounun bhi ene emhin nan fo? Ọle da re ọle man edibo nesọle ebi Aba ele nọn ribhi okhun rẹ zẹ emhin bhi obọ yẹ, bi ebi ọle rẹ re ifuẹkẹ man yẹ. Ọnan rẹman ghe, Jehova dẹ re ebale nin eguọmhandia nesọle, yẹ rẹkpa ele rẹ miẹn ebi ele ha yọ beji ọle lu da ene akhuankhuan bi ene aroro.

5. Emhin eso nela Jehova manlẹn nin enebiọmọn ha sabọ noo rẹ man imọn nesele ẹmhọn ọlẹn?

⁵ Enebiọmọn, bha dẹ be re egbe khọkhọ Jesu bhi uwedẹ nin ọle rẹ man emhin? Uwẹ sabọ rẹ tẹmhọn elanmhẹn, la aroro nọn manman ti uwẹ bhọ man ọmọn nọnsẹ. Beji uwẹ ha rẹ ha lu iriọ, dọnmhegbe rẹ re ikpẹ nesi Jehova nin ene emhin nan rẹman man ele. Uwẹ sabọ rẹ taman ọmọn nọnsẹ nin ọle taman ẹn elanmhẹn la aroro nọn manman ti ọle bhọ. Uwẹ ha noo emhin ne manman ti ọle bhọ nin Osẹnobulua manlẹn rẹ tẹmhọn ikpẹ nesọle man ọlẹn, asabọmiẹn ọ dẹ re ọle manman ka uwẹ ehọ.

6. Be imhan ha sabọ miẹn luẹ bhi ebi inẹn Christopher lu?

⁶ Enebiọmọn dẹ ka re ẹghe ọbhi otọ rẹ dọ gua otọ elanmhẹn la aroro fo ọkuẹsẹ ele noo ọle rẹ man imọn nesele emhin? Ọ iyi oko ghe ele dẹ ka lu iriọ. Jesu bha dọ ha gbotọle fanọn an ebi akhuankhuan rẹ le ebale yẹ, la ebi ene aroro rẹ wanre yẹ. Bhi ọsi ẹmhọanta, asabọmiẹn ẹgheso, ọ dẹ ha yẹẹ ọmọn nọnsẹ rẹ manman lẹn otọ emhin nin Osẹnobulua manlẹn. Ọ ha rẹ ha yi iriọ, ẹgheso, obhi emhin khere nin uwẹ ha taman ele, bi inọnta nọn lẹkhẹ nin uwẹ ha nọọn ele le dẹ sabọ rẹkpa ele rẹ lẹn ebi uwẹ man ele le. Mhan fẹ emhin nin obhio mhan natiọle Christopher luẹ ẹghe nin ọle rẹ ribhi obhokhan nin ọle sẹyẹ yere. Ọle da yọle: “Inẹn mẹn ki ta obhi emhin khere man mẹn bi ibhio mẹn, beji emhin nin Osẹnobulua manlẹn ne nẹga mhan ha da ha ti mhan bhọ. Bhi ọsi ijiẹmhin, ahamiẹn mhan ribhi egbegbe oke, ọle sabọ rẹ yọle: ‘Ghe ebi ọne oke nan rẹ kpọnọ yẹ, yẹ mhọn-ose a. Ọnan bha be rẹman ghe Osẹ nọn lu emhin ọhan-ilo Jehova khin?’ Ahamiẹn mhan ribhi egbegbe okpẹdẹ, ọle sabọ rẹ yọle: ‘Fẹ ebi okpẹdẹ rẹ ha fi-yo fi-re yẹ, ọnan bha be rẹman ghe Osẹnobulua manman mhọn ahu?’ ” Christopher da yọle: “Ene obhi emhin nan nin inẹn mhan ha ta wo manman rẹso mhan.”

7. Be uwẹ ha rẹ sabọ man imọn nesẹ yẹ rẹ ha ria eria nyan emhin nin Jehova manlẹn?

⁷ Beji imọn nesẹ ha rẹ ha wanre, uwẹ sabọ rẹ taman ele nin ele manman ha gbẹlokotọ bhi ene emhin nin Osẹnobulua manlẹn, ele ha yẹ gbẹlokotọ bhi ikpẹ nesi Jehova nin ene emhin rẹman. Uwẹ sabọ rẹ sounun bhi emhin ọkpa nin Jehova manlẹn, uwẹ ha yẹ nọọn imọn nesẹ yọle: “Be ọnan man uwẹ le rẹji Jehova?” Ewanniẹn nin ele ha re uwẹ bhọ sabọ rẹ han uwẹ ilo.—Matt. 21:16.

8. Isẹhoa nela enebiọmọn bhi otọ Izrẹl ha mhọnlẹn sade ele khian bhi uwedẹ?

⁸ Jehova da taman enebiọmọn bhi otọ Izrẹl ghe, nin ele ha man imọn nesele ẹmhọn Jehova sade ele khian bhi uwedẹ. (Deut. 11:19) Ukhuo kẹkẹ na eje bha manman taan ẹlo a bhi otọ Izrẹl. Ahamiẹn ọria na ene ukhuo nan gbera, ọle dẹ miẹn unan elanmhẹn kẹkẹ, afianmhẹn bi aroro kẹkẹ bhọ. Beji azagba-uwa ne ribhi otọ Izrẹl ha rẹ ha na ene ukhuo nan gbera, ọ ki re isẹhoa nin enebiọmọn ele rẹ ha man imọn nesele emhin nin Jehova manlẹn. Asabọmiẹn ibha ne biẹ imọn yẹ mhọn isẹhoa ne sẹ inian nin bha rẹ ha noo emhin  nin Jehova manlẹn rẹ man imọn nesẹbha emhin. Bha ji mhan fẹ ebi ẹbho eso ne biẹ ọmọn sẹ rẹ lu ọnan yẹ.

9. Be uwẹ ha sabọ miẹn luẹ bhi obọ Punitha bi Katya?

⁹ Inẹn ọkpa natiọle Punitha nọn nyẹnlẹn bhi eje manman taan ẹlo a bhi otọ India da yọle: “Mhan ha dọ tuẹ ibhokhan mhan ne nyẹnlẹn bhi eje bha manman taan ẹlo a, mhan ki noo ọne isẹhoa nan rẹ re emhin nin Jehova manlẹn rẹ man imọn nesẹmhẹn ẹmhọn ọlẹn. Mẹn riale ghe, imọn nesẹmhẹn ha vae bhi enan, ọle ele da sabọ manman luẹ ẹmhọn emhin nin Jehova manlẹn gbera bhi eji mhan da nyẹnlẹn nọn wo manman taan ẹlo a.” Enebiọmọn, bha yere ghe imọn nesẹbha ida yelea ghẹdẹ ẹghe nin bha deba ele gbe bhi eje manman mhọn-ose a. Katya nin obhio mhan nin okhuo nọn na bhi Moldova vae da yọle: “Ẹghe nin mẹn sẹyẹ wo yere beji mẹn ha ribhi obhokhan hi, ẹghe nin mẹn deba ene biẹ mẹn gbe bhi eje bha manman taan ẹlo a. Mẹn manman wo khuẹnmhẹn ele nin ele rẹ na bhi egbe obhokhan man mẹn le nin mẹn ha gbẹlokotọ bhi ene emhin nin Jehova manlẹn, yẹ ha gbẹlokotọ bhi ikpẹ nesọle nin ene emhin rẹman.”

10. Be enebiọmọn ha sabọ lu sade ọ bha lẹkhẹ nin ele rẹ diọbhi eje bha manman taan ẹlo a? (Fẹ ọne ẹkpẹti ghe nọn yọle “ Emhin Ne Ha Sabọ Rẹkpa Enebiọmọn.”)

¹⁰ A ha ki miẹn ọ bha fo uwẹ rẹ diọbhi eje bha manman taan ẹlo a kii? Amol nọn yẹ nyẹnlẹn bhi India da yọle: “Bhi eji mẹn da nyẹnlẹn, enebiọmọn manman wo re ẹghe nọn tanlẹn rẹ wẹnna, bhiriọ ele imiẹn ẹghe. Sẹyẹ, ọ manman gbe igho nan rẹ diọbhi eje bha manman taan ẹlo a. Ọkpakinọn mhan dẹ yẹ sabọ daghe emhin nin Jehova manlẹn sade mhan yo eje mhọn-ose a, la debhi egbe ole a ha fẹ ene emhin nin Jehova manlẹn ghe, yẹ gbẹlokotọ bhi ikpẹ nesọle nin ene emhin rẹman.” Uwẹ ha gbẹlokotọ nọnsẹn, uwẹ dẹ sabọ daghe emhin nin Jehova manlẹn bhi eji uwẹ da nyẹnlẹn nin uwẹ ha sabọ rẹman imọn nesẹ. (Ps. 104:24) Asabọmiẹn uwẹ dẹ daghe afianmhẹn, emhin kẹkẹ ne tinọn, eran, aroro bi emhin kẹkẹ ebhebhe. Obhio mhan natiọle Karina nọn na bhi Germany vae da yọle: “Ene aroro manman ti  inẹn bhọ. Bhiriọ, beji mẹn ribhi obhokhan, ọle ki ha re aroro kẹkẹ ne manman mhọn-ose man mẹn ẹghe-ẹghe nin mhan rẹ ko dagbare.” Enebiọmọn, bha dẹ yẹ sabọ noo ene vidio bi ebe kẹkẹ ne tẹmhọn emhin nin Osẹnobulua manlẹn nin agbotu zẹ ọle egbe dagbare rẹ man imọn nesẹbha emhin. Bhi ọsi ẹmhọanta, ebi idia nọnsẹ hi ki rẹ dia yẹ, uwẹ dẹ sabọ rẹkpa imọn nesẹ rẹ ha gbẹlokotọ bhi ene emhin nin Osẹnobulua manlẹn. Bhi ejayenan nian, bha ji mhan zilo nyan ikpẹ nesi Jehova eso nin uwẹ ha sabọ tẹmhọnlẹn man imọn nesẹ.

11. Be enebiọmọn ha rẹ sabọ rẹkpa imọn nọnsele rẹ lẹn ghe Jehova mhọn oyẹẹ?

¹¹ Nin uwẹ rẹ sabọ rẹkpa imọn nesẹ rẹ lẹn ghe Jehova mhọn oyẹẹ, uwẹ sabọ rẹ tẹmhọn uwedẹ nin elanmhẹn kẹkẹ rẹ re ẹkẹ-ẹjẹjẹ gbẹloghe imọn nesele man ele. (Matt. 23:37) Uwẹ sabọ rẹ tẹmhọn emhin kẹkẹ nin mhan rẹ sọnyẹnmhẹn nin Jehova manlẹn man ele. Karina nin mhan ka tẹmhọnlẹn da yọle: “Imẹn bi inẹn mẹn ha ko ha khian nẹga, ọle ki taman mẹn nin mẹn ha gbẹlokotọ bhi uwedẹ nin ene aroro rẹ dikikẹ yẹ, bi ebi ose nin ele mhọn rẹ rẹman yẹ ghe Jehova mhọn oyẹẹ. Ikpe ne bunbun rẹ gbera, mẹn yẹ wo gbẹlokotọ bhi ene aroro, uwedẹ nin ele rẹ dikikẹ, uwedẹ nan rẹ mhanmhan ele, bi alo nin ele mhọn. Ele wo ye mẹn re ebi Jehova rẹ manman hoẹmhọn mhan yẹ.”

12. Be enebiọmọn ha rẹ sabọ rẹkpa imọn nesele rẹ daghe ẹwanlẹn nọnsi Osẹnobulua yẹ? (Psalm 139:14) (Yẹ fẹ ifoto ghe.)

¹² Rẹkpa imọn nesẹ rẹ daghe ẹwanlẹn nọnsi Osẹnobulua. Jehova mhọn ẹwanlẹn nẹ mhan rebhe. (Rom. 11:33) Bhi ọsi ijiẹmhin, uwẹ sabọ rẹ taman ọmọn nọnsẹ uwedẹ nin amẹn rẹ na bhi otọ diọbhi okhun dọ kiẹn adudu amẹn bhi enin, bi uwedẹ nin ahoho rẹ mun ọne amẹn fi-yo fi-re yẹ bhi okhun. (Job 38:36, 37) Uwẹ sabọ yẹ rẹ taman ele uwedẹ ohan-ilo nin Jehova rẹ man egbe ọsi eria. (Tie Psalm 139:14.) Bha ji mhan fẹ ebi aba natiọle Vladimir rẹ lu ọnan yẹ. Ọle da yọle: “Ẹdọkpa, ọmọn okpea nọnsẹmhan da dere bhi ikẹnkẹn yẹ kuan. Ikpẹdẹ eso ki gbera, ọne itẹ da rie. Mẹn bi okhuo mẹn da gbotọle fanọn an man ọle ghe, Jehova man egbe nọnsẹmhan bhi uwedẹ nan ha da miẹn ghe, mhan ha gbitẹ, ọ ki tobọle rie. Mhan da yẹ ji ọle lẹn ghe, ọnan isabọ sunu bhi emhin nin eria manlẹn. Bhi ọsi ijiẹmhin, ahamiẹn ọria re moto miẹn acidẹnt nin ọne moto da dunmhun an, ahamiẹn a bha hẹnhẹn ọlẹn, iriọ ọ da wo ha ye. Ọne ijiẹmhin nan da rẹkpa ọmọn nọnsẹmhan rẹ daghe ẹwanlẹn nọnsi Jehova.”

13. Be enebiọmọn ha rẹ sabọ rẹkpa imọn nesele rẹ daghe ahu nọnsi Osẹnobulua yẹ? (Isaiah 40:26)

¹³ Jehova yọle nin mhan khua ẹlo ghe okhun, mhan ha yẹ ria eria nyan ebi ahu nọnsọle rẹ mun ene ahiẹnhiẹn mhọn bhi okhun yẹ. (Tie Isaiah 40:26.) Uwẹ sabọ rẹ taman imọn nesẹ nin ele khua ẹlo okhun, ele ha yẹ ria eria nyan ebi ele daghe. Fẹ ebi obhio mhan nin okhuo natiọle Tingting nọn na bhi Taiwan vae tale rẹji ẹghe nin ọle rẹ ha ribhi obhokhan. Ọle da yọle: “Imẹn bi inẹn mẹn ha ko rẹnẹ diọbhi ije ebhebhe, mhan ki wo sabọ ha daghe ahiẹnhiẹn ne ribhi okhun ọsasọn nọnsẹn, ranmhude ukpa ne manman bhala ne vuọn eje taan ẹlo a iribhi enan. Bhi ọne ẹghe nan, mẹn da wo ha kpokpo egbe si mẹn dẹ sabọ sun rẹkhan Jehova, ranmhude ibo mẹn nin mhan ko yo isiku da wo rẹ ọle ha nọghọ mẹn rẹ ha sun rẹkhan Jehova. Inẹn mẹn da taman mẹn nin mẹn ria ẹmhọn ahu nin Jehova rẹ man ene ahiẹnhiẹn, mẹn ha yẹ ha mhọn ọlẹn bhi ọkhọle ghe ọle dẹ sabọ re ọne ahu nan nin mẹn rẹ ziẹngbe edọnmhẹn nọn hi ki rẹ khin. Beji mẹn ki gbẹlokotọ bhi ene emhin nin Jehova manlẹn bhi ọne okhian nin mhan yo, ọ da rẹkpa mẹn rẹ manman lẹn Jehova nọnsẹn. Mẹn da wo kie manman muegbe nin mẹn rẹ ha ga ọle.”

14. Be enebiọmọn ha rẹ sabọ noo emhin nin Osẹnobulua manlẹn rẹ rẹkpa imọn nesele rẹ lẹn ghe Osẹ ọsi eghọnghọn Jehova khin?

¹⁴ Emhin nin Jehova manlẹn rẹman ghe Osẹ ọsi eghọnghọn ọle khin, sẹyẹ ọle ho nin mhan ha ghọnghọn. Ekhẹn azemhinre dọ gua otọle kere ghe, ene elanmhẹn khẹnmhin, rẹ dọ sẹbhi ene afianmhẹn bi ehẹn. (Job 40:20) Uwẹ sẹ ka daghe ọle khẹ ghe imọn nesẹ jiẹ beji ele rẹ ghe elanmẹn khiẹn? Asabọmiẹn ele sẹ ka daghe obhi ẹbhe san-yo san-re, la ibhi awa ne khọnlẹn. Ẹghe nin uwẹ ha rẹ kie daghe imọn nesẹ jiẹ ranmhude uwedẹ nin elanmhẹn rẹ khiẹnlẹn, re ọle ji ele lẹn ghe Osẹ ọsi eghọnghọn mhan ga.—1 Tim. 1:11.

15. Be ha rẹkpa enebiọmọn rẹ sabọ lẹn ebe re imọn nesele bhi ọkhọle? (Proverbs 20:5) (Yẹ fẹ ifoto ghe.)

¹⁵ Ẹgheso, ọ sabọ rẹ ha nọghọ enebiọmọn rẹ lẹn ebe ele ha rẹ lu emhin yẹ, beji imọn nesele ha da sabọ tẹmhọn ọkakale nin ele kuẹlo da man ele. Ahamiẹn ọne idia nan uwẹ ye, ọ dẹ khẹke nin uwẹ ne imọn nesẹ lu emhin bhi uwedẹ nọn ha rẹ re ele ta ebi re ele ọkhọle man ẹn. (Tie Proverbs 20:5.) Ọ lẹkhẹ nin enebiọmọn eso rẹ lu ọnan sade ele deba imọn nesele sọnyẹnmhẹn bhi ene  emhin nin Jehova manlẹn. Bezẹle nin ọnan da rẹkpa ele? Emhin ọkpa nọn zẹle hi, emhin imanman ribhọ nọn de ele bi imọn nesele idobolo bhi ọne ẹghe nan. Aba ọkpa natiọle Masahiko nọn na bhi Taiwan vae da yẹ tẹmhọn emhin ọbhebhe. Ọle da yọle: “Mhan ha deba imọn nesẹmhan dagbare bhi ole, dọ khian nẹga bhi oke la diọbhi egbe ẹdẹ, ọ rẹkpa ele rẹ de ọkhọle re. Ọnan rẹkpa mhan rẹ ne ele zilo beji mhan ha da sabọ lẹn ebe re ele bhi ọkhọle.” Katya nin mhan ka tẹmhọnlẹn da yọle: “Mẹn ha zobọ bhi isiku, inẹn mẹn ki re mẹn dagbare diọbhi ogba nọn wo mhọn-ose a. Bhi ọne eje lọre nan, ọ ki wo lẹkhẹ nin mẹn rẹ deba inẹn mẹn zilo ebe sunu ji mẹn bhi isiku bi ebe kpokpo mẹn bhi ọkhọle.”

16. Be azagba-uwa ha rẹ sabọ noo emhin nin Jehova manlẹn rẹ re egbe re ahoho yẹ?

¹⁶ Azagba-uwa dẹ yẹ sabọ noo emhin nin Jehova manlẹn rẹ ko re egbe re ahoho. Ọnan rẹkpa ele rẹ manman sikẹ egbe. Baibo yọle ghe, ẹghe ribhọ “nan rẹ jiẹ,” bi “ẹghe nan rẹ gbe-ikhiẹn.” (Eccl. 3:1, 4) Jehova man emhin kẹkẹ nin mhan bhi ọne otọ nan nin mhan ha sabọ noo rẹ ha re egbe re ahoho. Ọ yẹẹ azagba-uwa ne bunbun rẹ ha rẹnẹ diọbhi eje eso beji ele ha da dọ miẹn emhin kẹkẹ nin Osẹnobulua manlẹn. Ọ yẹẹ ele rẹ rẹnẹ diọbhi eje bha manman taan ẹlo a, eje oke wo manman vuọn, bi egbe ẹdẹ nọn wo mhọn-ose. Ọ yẹẹ ibhokhan eso rẹ ha khiẹnlẹn bhi ogba nọn wo mhọn-ose a, rẹ ha ghe ene elanmhẹn, la rẹ ha gua ẹdẹ. Emhin ne bunbun wo ribhọ nin Jehova manlẹn nin mhan ha rẹ sabọ re egbe re ahoho sade mhan khian dagbare.

17. Bezẹle nọn da khẹke nin enebiọmọn ha rẹkpa imọn nesẹle rẹ ha sọnyẹnmhẹn bhi emhin nin Osẹnobulua manlẹn?

¹⁷ Bhi agbọn ọsọgbọn nọn vade, enebiọmọn bi imọn nọnsẹle dẹ manman sọnyẹnmhẹn bhi ene emhin nin Jehova manlẹn gbera ọne ele lu nian. Ẹghenin, mhan ida yẹ ha mun ofẹn ene elanmhẹn, sẹyẹ ele ida ha mun ofẹn mhan. (Isa. 11:6-9) Mhan ki miẹn isẹhoa rẹ sọnyẹnmhẹn bhi emhin nin Jehova manlẹn rẹ sẹbhi ighegheghe. (Ps. 22:26) Enebiọmọn, bha hẹi mundia ha khẹ ọne ẹghe nin ọkuẹsẹ bha munhẹn ha man imọn nesẹbha ebi ele ha rẹ ha sọnyẹnmhẹn bhi ene emhin nin Jehova manlẹn. Beji uwẹ ha rẹ ha noo emhin nin Jehova manlẹn rẹ man imọn nesẹ ẹmhọn ọlẹn, asabọmiẹn ele dẹ dọ rẹọbhi emhin nin Devid nin Ojie tale ẹghe nin ọle rẹ yọle: “Eo Jehova, . . . iwẹnna soso iribhọ nan ha rẹ sabọ khọkhọ ọsẹ.”—Ps. 86:8.