1-2. Elele nela ọria ha miẹn sade ọle mianmẹn fo?

 EMHIN eghọnghọn nọn nin ọria rẹ mianmẹn yẹ dọ deba azagba-uwa nọnsi Jehova. Ẹbho ne ki ka mianmẹn fo dẹ wo rẹọbhi ọne ọta nin Devid ta bhi ẹghe nin ọle rẹ yọle: “Eghọnghọn hi ọsi ọria nin uwẹ zẹle, nin uwẹ yẹ si re nọn dọ ha nyẹnlẹn bhi ẹgodo nọnsẹ.”—Ps. 65:4.

² Ọ i yi ọria nọn hi ki rẹ khin Jehova tie vae bhi azagba-uwa nọnsọle. Beji mhan ka tẹmhọnlẹn bhi uhọnmhọn-ọta nọn gbera, ẹbho ne guanọ nin ele deba ọle ha mhọn ikolu nọn ziẹnlẹn, ele ọle re sikẹ egbe. (Jem. 4:8) Uwẹ ha re egbe guẹ nin Jehova yẹ mianmẹn, uwẹ ki wo dọ sikẹ ọle bhi uwedẹ kpataki. Uwẹ dẹ sabọ ha mhọnlẹn bhi ọkhọle ghe uwẹ ha mianmẹn fo, ọle dẹ ‘tuje okhun an biri erọnmhọn nyan uwẹ rẹ sẹbhọ ghe, uwẹ i da yẹ ha guanọ emhin soso.’—Mal. 3:10; Jer. 17:​7, 8.

3. Be ọkhẹke nin Kristiẹn nọn re egbe guẹ nin Jehova yẹ mianmẹn ha lu? (Ecclesiastes 5:​4, 5)

³ Umunhẹn imianmẹn khin. Ahamiẹn uwẹ mianmẹn fo, uwẹ dẹ wo dọnmhegbe nin uwẹ rẹ re obọ rẹkhan ive nin uwẹ ve nin uwẹ rẹ ha ga Jehova, aharẹmiẹn uwẹ kuẹlo da ekpokpo, la emhin dọnmhẹn urẹọbhọ nọnsẹ. (Tie Ecclesiastes 5:​4, 5.) Ranmhude ọkpa bhi edibo nesi Jesu uwẹ khin, uwẹ dẹ dọnmhegbe nin uwẹ rẹ manman ha re egbe khọkhọ Jesu, yẹ ha re obọ rẹkhan uhi nesọle. (Mat. 28:​19, 20; 1 Pita. 2:21) Ọne uhọnmhọn-ọta nan dẹ rẹkpa uwẹ rẹ lẹn ebi uwẹ ha rẹ lu iriọ yẹ.

SẸYẸ WO HA SUN RẸKHAN JESU AHARẸMIẸN UWẸ KUẸLO DA EDỌNMHẸN BI EKPOKPO

4. Uwedẹ nela edibo nesi Jesu ha rẹ mun “oran-iloya” nọnsele? (Luk 9:23)

⁴ Hẹi ha riale ghe uwẹ ha mianmẹn fo emhin dẹ wo lẹkhẹ nin uwẹ bhi iẹnlẹn. Jesu bhọ da yọle ghe, edibo nesọle dẹ mun “oran-iloya”  nọnsele. Bhi ọsi ẹmhọanta “ukpẹdẹ-ukpẹdẹ” ele bhọ ha rẹ ha lu ọnan. (Tie Luk 9:23.) Jesu ki be re ọnan rẹman ghe edibo nesọle dẹ wo ha loya khian? Eye. Ebi ọle gheghe ha ta hi, rẹ gbera elele nin edibo nesọle ha miẹn, ele dẹ yẹ wo kuẹlo da ọnọghọ kẹkẹ. Asabọmiẹn eso bhi ene ọnọghọ i da zẹwẹ lẹkhẹ.—2 Tim. 3:12.

5. Elele nela Jesu yọle ghe ẹbho ne fikekegbe emhin eso beji ele ha da sabọ ha ga Jehova ha miẹn?

⁵ Asabọmiẹn uwẹ ki ka kuẹlo da ekpokpo bhi obọ azagba-uwa nọnsẹ, la uwẹ bhọ fikekegbe emhin eso beji uwẹ ha da sabọ mun ẹmhọn Agbejele kalo bhi iẹnlẹn. (Mat. 6:33) Ahamiẹn iriọ nọn, ha mhọnlẹn bhi ọkhọle ghe Jehova i da yele ẹsọn nin uwẹ miẹn nanlẹn an. (Hib. 6:10) Asabọmiẹn ọta nin Jesu ta bhọ munhẹn ha munsẹ fo bhi egbe uwẹ. Jesu da yọle: “Ọria nọn hi ki rẹ khin nọn zẹ uwa nọnsọle obọ, la ibhio ọle nin ikpea, la ibhio ọle nin ikhuo, la inẹn ọlẹn, la aba ọle, la imọn nesọle, la ugbo nọnsọle, ranmhude elin nọnsẹmhẹn, bi ranmhude ọne ọta nọn mhẹn, ọle dẹ miẹn elele igba iyisẹn bhi ọne ore nan nian—ọle dẹ miẹn uwa, ibhio nin ikpea, ibhio nin ikhuo, inẹn, imọn, ugbo, bhi ẹkẹ ekpokpo. Ọle dẹ yẹ miẹn iẹnlẹn ighegheghe bhi agbọn nọn vade.” (Mak 10:​29, 30) Bhi ọsi ẹmhọanta, elele nin uwẹ sẹ miẹn nian bhọ kpọnọ gbera emhin nọn hi ki rẹ khin nin uwẹ fikekegbe.—Ps. 37:4.

6. Bezẹle nọn ha da khẹke nin uwẹ sẹyẹ ha khọn “emhin nin egbe guanọ” aharẹmiẹn uwẹ mianmẹn fo?

⁶ Uwẹ dẹ sẹyẹ ha nin ene “emhin nin egbe guanọ” dan aharẹmiẹn uwẹ mianmẹn fo. (1 Jọni 2:16) Ọnan dẹ wo ha sunu ranmhude ọria nọn bha gba nan uwẹ sẹyẹ khin. Asabọmiẹn ẹgheso emhin dẹ dia uwẹ bhi egbe beji ọ dia Pọl nin odibo bhi egbe. Ọle da gbẹn yọle: “Bhi ẹkẹ ọkhọle nọnsẹmhẹn, uhi nọnsi Osẹnobulua wo manman ti mẹn bhọ. Ọkpakinọn, mẹn da kere ghe, uhi ọbhebhe ri mẹn bhi egbe, nọn ne uhi nọn ri mẹn bhi ẹkẹ ọkhọle ha dan. Ọne uhi nan hi olukhọ nọn ri mẹn bhi egbe, ọle wo ha dia mẹn.” (Rom 7:​22, 23) Ẹmhọn egbe uwẹ sabọ rẹ lọ uwẹ ranmhude uwedẹ nin iria-eria ne i mhẹn ha rẹ ha na uwẹ bhi ọkhọle. Ọkpakinọn, uwẹ da ha ria ẹmhọn ive nin uwẹ ve beji uwẹ ha re egbe guẹ nin Jehova, ọ ki rẹkpa uwẹ rẹ khọn ene iria-eria. Bhi ọsi ẹmhọanta, ive nin uwẹ ve nin uwẹ rẹ ga Jehova dẹ wo ha rẹkpa uwẹ sade uwẹ kuẹlo da edọnmhẹn. Be ọ ha rẹ sabọ rẹkpa uwẹ yẹ?

7. Be ọ ha rẹ rẹkpa uwẹ yẹ rẹ ha sun rẹkhan Jehova sade uwẹ re egbe guẹ nanlẹn?

⁷ Uwẹ da re egbe guẹ nin Jehova fo, ọ i yi egbe uwẹ uwẹ da yẹ ha nyẹnlẹn nan. Ọnan rẹman ghe uwẹ zẹ nin uwẹ rẹ rẹban emhin nin egbe uwẹ guanọ, bi emhin nin uwẹ khu ọi nin uwẹ lẹnmhin ghe ele i ti Jehova bhọ. (Mat. 16:24) Bhiriọ, uwẹ ha kuẹlo da edọnmhẹn, uwẹ i yẹ da dọ ha riia ẹghe a rẹ ria ẹmhọn ebi uwẹ ha lu, ranmhude uwẹ ki ka lẹn ebi uwẹ ha lu fo—ọnin hi, nin uwẹ rẹ sun rẹkhan Jehova. Uwẹ ki wo muegbe ghe ebi ti Jehova bhọ uwẹ da ha lu. Uwẹ ha lu iriọ, inian ọ diabe ghe uwẹ re egbe khọkhọ Jobu. Arẹmiẹn ọle wo kuẹlo da ọkakale ne bha lẹkhẹ, ọle da taman egbe ọle yọle: “Mẹn dẹ re ọkhọ nọnsẹmhẹn rebhe ha mhọn asun-rẹkhan!”—Job 27:5.

8. Be ọ ha rẹ rẹkpa uwẹ yẹ rẹ re egbe nẹ bhi edọnmhẹn sade uwẹ wo ha ria ẹmhọn ive nin uwẹ ve beji uwẹ re egbe guẹ nin Jehova?

⁸ Ahamiẹn uwẹ wo ha ria ẹmhọn ive nin uwẹ ve beji uwẹ re egbe guẹ nin Jehova, ọ ki re ọne ahu nin uwẹ rẹ re egbe nẹ bhi edọnmhẹn nọn hi ki rẹ khin. Bhi ọsi ijiẹmhin, uwẹ i da dọ ha re egbe gbe okhuo ọria la ọdọ ọria, ranmhude uwẹ lẹnmhin ghe emhin ne sẹ iriọ bha gba. Ahamiẹn uwẹ bha re otọ nin iria-eria ne i mhẹn rẹ na uwẹ bhi ọkhọle, uwẹ i da dọ ha guanọ ebi uwẹ ha rẹ ne ele sibhọ re yẹ. Bhiriọ, uwẹ i da dọ lu emhin bhi uwedẹ nin ẹbho ne i mhẹn rẹ lu emhin.—Prov. 4:​14, 15.

9. Be ọ ha rẹ rẹkpa uwẹ yẹ rẹ mun ẹmhọn Jehova kalo sade uwẹ wo ha ria ẹmhọn ive nin uwẹ ve beji uwẹ re egbe guẹ nanlẹn?

⁹ Be uwẹ ha lu yẹ sade uwẹ miẹn iwẹnna nọn i  da re ẹghe nin uwẹ rẹ ha yo ikolo oga? Edandan i ribhọ ghe uwẹ lẹn ebi uwẹ ha lu, ranmhude ọkuẹsẹ a re ọne iwẹnna nin uwẹ, uwẹ ki ka taman egbe uwẹ fo ghe uwẹ i da lu iwẹnna nọn sẹ iriọ. Bhiriọ, uwẹ i da dọ ha riale ghe uwẹ dẹ sabọ ha lu ọne iwẹnna yẹ mun ẹmhọn Jehova kalo bhi iẹnlẹn. Uwẹ da ha ria eria nyan uwedẹ nin Jesu rẹ muegbe rẹ wo ha lu ebe ti Aba ọle bhọ, ọ dẹ rẹkpa uwẹ rẹ rẹban emhin nọn hi ki rẹ khin nọn i da re Osẹnobulua nin uwẹ re egbe guẹ nan ha ghọnghọn.—Mat. 4:10; Jọni 8:29.

10. Be Jehova ha rẹ rẹkpa uwẹ yẹ rẹ sabọ “ha rẹkhan” Jesu sade uwẹ mianmẹn fo?

¹⁰ Bhi ọsi ẹmhọanta, ekpokpo bi edọnmhẹn nin uwẹ miẹn re ọne isẹhoa nin uwẹ rẹ wo “ha rẹkhan” Jesu. Beji uwẹ ha rẹ ha lu iriọ, lẹn sẹbhọ ghe Jehova dẹ wo ha rẹkpa uwẹ. Baibo yọle: “Osẹnobulua dẹ mun ọta nọnsọle sẹ. Ọle ida ji bha da miẹn edọnmhẹn nin bha ida sabọ ziẹngbe ọle. Bha ha miẹn edọnmhẹn bhi egbe, ọle ki rẹkpa bha rẹ sabọ ziẹngbe ọle.”—1 Kọr. 10:13.

EBI MHAN HA RẸ SABỌ WO HA RẸKHAN JESU YẸ

11. Uwedẹ nọn mhẹn nẹ nela mhan ha rẹ wo sabọ ha rẹkhan Jesu? (Yẹ fẹ ifoto ghe.)

¹¹ Ọkhọ rebhe Jesu rẹ wo ga Jehova, sẹyẹ, ẹghe rebhe ọle rẹ wo ha nan erọnmhọn ji ọle. (Luk 6:12) Bhi ọsi ẹmhọanta, uwedẹ ọkpa nọn mhẹn nẹ nin uwẹ ha rẹ sabọ ha rẹkhan Jesu sade uwẹ mianmẹn fo hi, nin uwẹ rẹ ha lu emhin ne ha re uwẹ manman sikẹ Jehova. Baibo yọle: “Uwedẹ nọn hi ki rẹ khin nin mhan da sẹ lu re alo, bha ji mhan wo re obọ iriọ.” (Fil. 3:16) Bhi ẹghe rẹ sẹ ẹghe, uwẹ dẹ ha họn okha ọsi ibhio mhan nin ikpea bi ikhuo ne zegbere beji ele ha da sabọ manman ha lu iwẹnna oga. Asabọmiẹn ene ibhio mhan nan yo Isiku ọsi Ene Tẹmhọn Agbejele, la dọ ha tẹmhọn Osẹnobulua bhi bhi eji a da manman guanọ urẹkpa. Ahamiẹn uwẹ dẹ sabọmhin, ọ dẹ ha mhẹn nin uwẹ rẹ ha mhọn emhanmhan nọn sẹ iriọ. Ẹbho nesi Jehova wo guanọ uwedẹ kẹkẹ nin ele rẹ ha lu iwẹnna oga. (Iwẹnna 16:9)  Ọkpakinọn, a ha ki miẹn idia nin uwẹ ye bha re otọ nin uwẹ rẹ lu iriọ kii? Hẹi ha riale ghe uwẹ bha mhẹn sẹ bii ẹbho ne lu ọle. Ha mhọnlẹn bhi ọkhọle ghe ebi Jehova guanọ bhi obọ mhan hi, nin mhan rẹ ziẹngbe sẹbhi ọkpẹnlẹn. (Mat. 10:22) Yere ghe ọ manman re Jehova ghọnghọn sade uwẹ dọnmhegbe rẹ ha lu beji ahu nọnsẹ gbe bhi oga nọnsọle. Uwedẹ kpataki wo khọnan nin uwẹ ha rẹ sabọ ha rẹkhan Jesu sade uwẹ mianmẹn fo.—Ps. 26:1.

12-13. Be ọkhẹke nin uwẹ lu ahamiẹn uwẹ i yẹ sọnyẹnmhẹn bhi emhin nin uwẹ ka lu khẹ rẹ ga Jehova? (1 Kọrint 9:​16, 17) (Yẹ fẹ ọne ẹkpẹti ghe nọn yọle, “ Sẹyẹ Wo Ha Re Ọne Unẹ.”)

¹² Be ọkhẹke nin uwẹ lu sade uwẹ kere ghe ọ i yẹ yi ọkhọle rebhe uwẹ rẹ nan erọnmhọn, la uwẹ i yẹ sọnyẹnmhẹn bhi iwẹnna itẹmhọn Osẹnobulua? Be ọkhẹke nin uwẹ lu ahamiẹn uwẹ i yẹ sọnyẹnmhẹn bhi Baibo nin uwẹ tie beji uwẹ ka rẹ sọnyẹnmhẹn bhọ khẹ? Ahamiẹn emhin ne sẹ inian sunu ji uwẹ sade uwẹ mianmẹn fo, hẹi ha riale ghe Jehova i yẹ re ẹlo esili ghe uwẹ. Ranmhude ọ bha gba nin uwẹ, ẹghe dẹ ha ribhọ nọn i da rẹ ha ghọn uwẹ rẹ lu ene emhin nan. Ahamiẹn uwẹ kere ghe inian emhin dia uwẹ yẹ bhi egbe, ria eria nyan ijiẹmhin ọsi Pọl nin odibo. Arẹmiẹn ọle wo ha dọnmhegbe nin ọle rẹ re egbe khọkhọ Jesu, ọle lẹnmhin ghe ẹghe dẹ ha ribhọ nọn i da rẹ manman ha ghọn ọle rẹ lu ebi ọle ho nin ọle lu. (Tie 1 Kọrint 9:​16, 17.) Ọle da yọle: “Aharẹmiẹn ghe ranmhude oko nọn zẹle nin mẹn da lu ọle, ẹsọn nọn khua a yẹ mun mẹn bhi obọ.” Ebi Pọl ha re ọnan ta hi, ọle i da zobọ bhọ rẹ ha lu ilọnmhọn oga, arẹmiẹn ẹghe wo ha ribhọ nin ọle bha rẹ ha mhọn ọne ọhubhudu rẹ lu iriọ.

¹³ Ẹlẹnan nian yẹ, ọ bha khẹke nin mhan re ebi emhin dia mhan yẹ bhi egbe rẹ zẹ ebi mhan ha lu. Wo muegbe rẹ ha lu emhin ne mhẹn aharẹmiẹn ọ i ri uwẹ bhi ọkhọle rẹ lu iriọ. Ahamiẹn uwẹ wo dọnmhegbe ha lu emhin ne mhẹn, asabọmiẹn beji ẹghe ha rẹ ha gbera, ebi emhin ka rẹ  dia uwẹ bhi egbe ki dọ fidenọ. Ọkuẹsẹ ọne ẹghe nin, wo dọnmhegbe ha luẹ Baibo, ha yo ikolo oga, ha yo inẹbho, yẹ nan erọnmhọn. Ene emhin nan dẹ rẹkpa uwẹ rẹ wo ha rẹkhan Jesu sade uwẹ mianmẹn fo. Uwẹ ha dọnmhegbe ha lu ene emhin nan ẹghe rebhe, ọ dẹ yẹ rẹkpa ibhio uwẹ nin bha ko ga rẹ wo ha lu iriọ.—1 Tẹsẹ. 5:11.

“BHA WO HA FẸ EGBE BHA GHE”

14. Emhin nela ọkhẹke nin uwẹ ha fẹghe ẹghe rebhe? Bezẹle? (2 Kọrint 13:5)

¹⁴ Ọ dẹ ha mhẹn nin uwẹ rẹ ha fẹ egbe uwẹ ghe ẹghe rebhe sade uwẹ mianmẹn fo. (Tie 2 Kọrint 13:5.) Bhi ẹghe rẹ sẹ ẹghe, ọ dẹ ha mhẹn nin uwẹ rẹ ha fẹghe si uwẹ nan erọnmhọn ukpẹdẹ-ukpẹdẹ, si uwẹ luẹ Baibo, si uwẹ yo ikolo oga, yẹ dagbare bhi inẹbho. Dọnmhegbe rẹ guanọ uwedẹ kẹkẹ nin uwẹ ha rẹ ha lu ene emhin nan beji ele ha da manman ha ti uwẹ bhọ. Bhi ọsi ijiẹmhin, uwẹ sabọ rẹ nọọn egbe uwẹ ene inọnta nan: ‘Imẹn dẹ be sabọ tẹmhọn iman-emhin ne lẹkhẹ ne ribhi Baibo man ẹbho? Uwedẹ ebhebhe be ribhọ nin mẹn ha rẹ sabọ manman ha sọnyẹnmhẹn bhi iwẹnna itẹmhọn Osẹnobulua? Ebi mẹn guanọ tee mẹn be taman Jehova bhi erọnmhọn, sẹyẹ mẹn be re ọne erọnmhọn rẹ rẹman ghe ọle ọkpa mẹn mun udu nyan? Mẹn be yo ikolo oga ẹghe rebhe? Mẹn be manman kaehọ nọnsẹn bhi ikolo oga gbera ọnikhẹ, yẹ manman re ewanniẹn ọbhi inọnta?’

15-16. Be uwẹ miẹn luẹ bhi ebe sunu ji obhio mhan nin okpea rẹji nan rẹ ha re egbe nẹ bhi edọnmhẹn?

¹⁵ Ọ dẹ yẹ ha mhẹn nin uwẹ rẹ ha fẹ eji uwẹ da wẹghẹ ghe. Obhio mhan nin okpea natiọle Robert da re okha nọnsọle rẹ re ọnan man. Ọle da yọle: “Ẹghe nin mẹn rẹ ha ribhi ikpe 20, mẹn da ha mhọn iwẹnna nin mẹn ha re ẹgheso lu. Ẹdọkpa beji mhan zobọ, ọmanmhẹn nin mhan ko wẹnna da yọle nin mẹn dọ tuẹ ọle bhi uwa. Ọle da yọle ghe imhan veva ọkpa da ha ribhi uwa, ghe mhan dẹ wo ‘sọnyẹnmhẹn bhi ọne ẹghe.’ Bhi ọsi ọhẹnhẹn, ewanniẹn nin mẹn re nanlẹn bha ziẹn sẹ. Akizẹbue, mẹn da taman ọlẹn ghe, imẹn i da vae, yẹ ji ọle lẹn ebezẹle.” Robert bha deọbhi ọne edọnmhẹn nan, sẹyẹ emhin nọn mhẹn wo khọnan. Ọle ki ria eria nyan ebe sunu beji akizẹbue, ọle da kere ghe ọle ha rẹ lu nọnsẹn gbera beji ọle lu. Ọle da yọle: “Mẹn bha wo re ẹjẹje taman ọlẹn eye, beji Josẹf rẹ wo re ẹjẹje nẹ sẹbhi eji okhuo Pọtifa ha ye re. (Gen. 39:​7-9) Bhi ọsi ẹmhọanta, uwedẹ nọn rẹ nọghọ mẹn rẹ taman ọlẹn eye da wo han mẹn ilo. Ọne emhin nan nọn sunu da rẹkpa mẹn rẹ lẹn ghe ọkhẹke nin mẹn ziẹn ikolu nin mẹn bi Jehova ko mhọnlẹn.”

¹⁶ Bọsi Robert, mhan dẹ miẹn elele bhọ sade mhan dọnmhegbe ha fẹghe ebi mhan rẹ lu emhin  yẹ. Aharẹmiẹn uwẹ sabọ khọn edọnmhẹn, ọ sẹyẹ khẹke nin uwẹ nọọn egbe ẹ ọne inọnta nan: ‘Eka ẹghe ọ re mẹn le ọkuẹsẹ mẹn sabọ zẹ emhin nọn mhẹn rẹ lu?’ Hẹi ji ọ re egbe lọ ẹ sade uwẹ dọ kere ghe ọ mhọn eji ọ da kẹ uwẹ re. Ji ọ re uwẹ ha ghọnghọn nin uwẹ rẹ dọ sabọ lẹn eji uwẹ da wẹghẹ. Taman Jehova eji uwẹ da wẹghẹ, sẹyẹ, dọnmhegbe ha lu emhin ne ha rẹkpa uwẹ rẹ ha re obọ rẹkhan uhi nesọle.—Ps. 139:​23, 24.

17. Be emhin nọn sunu ji Robert rẹ rẹso elin nọnsi Jehova yẹ?

¹⁷ Emhin ọbhebhe yẹ ribhọ nin mhan miẹn luẹ bhi okha ọsi Robert. Ọle da yọle: “Ẹghe nan ki rẹ miẹn ghe mẹn bha vae bhi uwa ọsi ọne ọmanmhẹn, ọle da taman mẹn yọle, ‘Uwẹ bha deọbhi ufi nin mẹn rẹ ke khẹ ẹ!’ Mẹn ki da nọọn ọlẹn ebi ọle re ọle ta. Ọle da yọle ghe, ọmọẹ ọle ọkpa nọn ka rẹ ha yi Ọsali Jehova taman ọlẹn ghe, Esali Jehova rebhe ne yi usẹn i re obọ rẹkhan emhin nin ele man, sẹyẹ, ele ha miẹn isẹhoa rẹ lu emhin ebe bhi ẹkhokho ele dẹ wo lu ọle. Bhiriọ, ọle da taman ọne ọmọẹ ọle ghe, ọle dẹ dọnmhẹn mẹn fẹghe nin ọle rẹ lẹn si ẹmhọanta nọn. Ọ da wo rẹ mẹn ha ghọnghọn ghe mẹn lu emhin nọn re ogẹn ji Jehova.”

18. Be uwẹ muegbe rẹ ha lu aharẹmiẹn uwẹ mianmẹn fo? (Yẹ fẹ ọne ẹkpẹti ghe nọn yọle, “ Uhọnmhọn-ọta Eva Ne Ha Wo Ti Uwẹ Bhọ Rẹ Dọ Tie.”)

¹⁸ Uwẹ ha re egbe guẹ nin Jehova yẹ mianmẹn, uwẹ re ọle rẹman ghe uwẹ wo muegbe nin uwẹ rẹ ha gẹn elin nọnsọle aharẹmiẹn emhin lẹkhẹ, la ọ bha lẹkhẹ. Ha mhọnlẹn bhi ọkhọle ghe, Jehova lẹn edọnmhẹn kẹkẹ nin uwẹ kuẹlo da, bi ebi uwẹ sẹ rẹ dọnmhegbe yẹ rẹ re egbe nẹ bhi ele. Ọle dẹ nan erọnmhọn nin uwẹ nin uwẹ rẹ wo ha sun rẹkhan ọlẹn. Ha mhọnlẹn bhi ọkhọle ghe ọle dẹ re ẹlinmhin nọn khiale nọnsọle rẹ rẹkpa uwẹ rẹ wo ha sun rẹkhan ọlẹn. (Luk 11:​11-13) Bhi ahu nọnsi Jehova, uwẹ dẹ wo sabọ ha khian rẹkhan Jesu sade uwẹ mianmẹn fo.