Iwẹnna ọkpa nin ibhokhan iLevi ne iyi ohẹn ha lu hi, iwẹnna nin mhan ha sabọ tiọle iwẹnna ọsi unakpa. Ọnọn mun ọkalo bhi uwa oga, ọle hi ọnọn ha sun ele. Obhokhan iJew natiọle Philo, da tẹmhọn iwẹnna ọsi ene ibhokhan iLevi nan yọle: “A da ne eso ọbhọ nin ele ha gbega unuro nan rẹkhan nabhi ẹkẹ uwa oga. A da ne eso ọbhọ nin ele ha gbega eji a da ga Osẹnobulua (sanctuary) bhi uwa oga, beji a da miẹn ghe, ọria soso nọn bha khẹke ida nabhọ. A da yẹ ne eso ọbhọ nin ele ha khian nẹga uwa oga ẹghe rẹ sẹ ẹghe, asọn bi odanmẹn.”

Ene iSanhedrin wo ha mhọn ọne ahu rẹ ha noo ene unakpa nan. Ene ibhokhan iLevi nan, ele ọkpa ibhokhan iRome re obọ nan nin ele ha noo emhin okhọnlẹn.

Okpea ọkpa natiọle Joachim Jeremias, nọn fẹ otọ iBaibo ghe da tale ghe, ẹghe nin ẹbho rẹ dọ mun iJesu khue, Jesu da nọọn ele ebezẹle nin ele bha da mun ọlẹn bhi uwa oga ẹghe nin ọle rẹ ha man emhin bhi enin. (Matt. 26:55) Ọne okpea da gbotọle fanọn an ghe, sade ọ iyi unakpa ne ha ribhi uwa oga vae dọ mun iJesu nọn, Jesu irẹ nọọn ele ọne inọnta nin. Ọne okpea da yẹ tale ghe, eso bhi ẹwẹ ene unakpa nan ekhẹn iPharisee ka yẹ je nin ele dọ mun iJesu ẹghe nọn gbera. (John 7:32, 45, 46) Akizẹbue, a da yẹ je ele bi ọnọn sun ele, nin ele dọ mun edibo nesi Jesu vae bhi Sanhedrin. Asabọmiẹn ele hi ene yẹ sua iPaul sibhi uwa oga re.—Acts 4:1-3; 5:17-27; 21:27-30.