Ẹlẹnan nian, Kristiẹn noo ifoni rẹ nọọn ẹmhọn ene ribhi azagba-uwa nọnsele, bi ibhio ele nin ele ko ga. Ọrẹyiriọ, ọkhẹke nin ele ha mhọn ọne adia nan bhi ọkhọle sade ele noo foni: “Ọria nọn wanlan ha daghe okhẹnan vade, ọle ki nẹko. Ọkpakinọn ọria nọn iwanlan ki sẹyẹ ha khian, bhiriọ ọle ki loya nọn ribhọ.”​—Prov. 27:12.

Ranmhude Jehova guanọ nin ọle gbega mhan, ọle da yọle ghe, nin mhan hẹi ha ne eria nan khu bhi agbotu muobọ, la ẹbho ne wewe iman-emhin ohoghe nẹga bi ene si iwa-egbea re. (Rom. 16:17; 1 Cor. 5:11; 2 John 10, 11) Sẹyẹ, asabọmiẹn ẹbho eso nin mhan ko ga ire obọ rẹkhan adia ne ribhi Baibo. (2 Tim. 2:​20, 21) Mhan fẹ enan rebhe ghe fo ọkuẹsẹ mhan deba ọria ha muobọ. Ọkpakinọn, ọ bha lẹkhẹ nan rẹ re inian gbẹlokotọ sade mhan ne ẹbho muobọ bhi intanẹti.

Bhiriọ, ahamiẹn mhan guanọ nin mhan deba usun nin ẹbho ne bunbun ye bhi intanẹt, ọkhẹke nin mhan nọọn egbe mhan ọne inọnta nan: ‘Mẹn be lẹn unan ọria nin ọdeọde ne ribhi ọne usun nan khin?’ Ibhio mhan eso ne deba usun nin ẹbho ne bunbun ye bhi intanẹt wo miẹn okhẹnan kẹkẹ. Gene-gene, ọria ida sabọ lẹn ọrebhe ne ribhi usun ahamiẹn ẹbho ne manman bun ribhi ọne usun. Mhan ida sabọ lẹn ene sẹyẹ ribhi oga bhi ẹwẹ ele, la ene de sibhọ re. Psalm 26:4 yọle: “Mẹn ideba eria-eku muobọ. Ene re unan eria nin ele gene khin nẹko, mẹn siegbe nin ele.” Ọnan bha be rẹman ghe, ẹbho nin mhan lẹnlẹn ọkpa ọkhẹke nin mhan ha deba muobọ bhi intanẹti?

Aharẹmiẹn ẹbho bha bun bhi usun nin mhan deba, ọ yẹ khẹke nin mhan mhọn ẹwanlẹn bhi eka ẹghe nin mhan gbe rẹ deba ẹbho muobọ bhi enin, bi emhin nin ẹbho ne ribhi enin zilo ọle. Paul da re adia nin Timothy ghe, nin ọle mhọn ẹwanlẹn bhi obọ ẹbho ne tẹmhọn ọria bhi ikeke, bi ene talọ ọbhi ẹmhọn nọn bha rẹtẹ ele. (1 Tim. 5:13) Ẹlẹnan nian, ọ wo lẹkhẹ nin ẹbho rẹ ha lu ene emhin nan bhi intanẹt.

Ọria nọn mun oga mhọn nọnsẹn ida ha deba ẹbho re unun riia ọria a. Sẹyẹ, ọle ida ha ta ọta ẹkhokho dagbare, la re ehọ ọbhọ sade ọria ọbhebhe tale. (Ps. 15:3; Prov. 20:19) Ọle ida ha ta ọta nin ẹbho re umẹn bi maggi ọi nẹga, la ọta nin ọle ida sabọ fẹghe si ẹmhọanta nọn. (Eph. 4:25) Agbotu noo jw.org bi JW Broadcasting^® rẹ ji mhan họn emhin nẹ khẹke nin mhan họn. Mhan dẹ sabọ mun udu nyan ebi ele zẹ ọle egbe dagbare bhi enin.

Ibhio mhan eso noo intanẹti rẹ khiẹn emhin, ele re ọle dẹ emhin, yẹ noo ọle rẹ tie ẹbho ne guanọ iwẹnna. Ọne uwedẹ nan nin ele rẹ noo ọle rẹ do ẹki bha rẹtẹ ẹmhọn oga nọnsẹmhan. Bhiriọ, ọ bha khẹke nin mhan ha re ẹmhọn agbotu rẹ khu igho. Ọnan deba uwedẹ nin mhan ha rẹ rẹman ghe mhan bha “hoẹmhọn igho.”​—Heb. 13:5.

Ọ be khẹke nin mhan ha noo intanẹti rẹ bhii ẹbho nin ele zẹ igho rẹ rẹkpa ibhio mhan ne ribhi ọnọghọ la nin emhin idunmhuri sunu je? Ẹmhọanta nọn ghe, ranmhude mhan hoẹmhọn ibhio mhan, mhan wo muegbe rẹ ha rẹkpa ele. (Jas. 2:​15, 16) Ọkpakinọn, ahamiẹn mhan dọnmhegbe rẹ na bhi intanẹti ha bhii nan rẹkpa ibhio mhan, ọnan sabọ rẹ re ọle nọghọ ene ewanlẹn bhi agbotu, la iBẹtẹ rẹ mun emhanmhan nin ele mhọnlẹn rẹ rẹkpa ele sẹ. (1 Tim. 5:​3, 4, 9, 10, 16) Ọria soso iribhi ẹwẹ mhan nọn ho nin ọle rẹman ẹbho ghe, a zẹ ọle nin ọle ha gbẹloghe ibhio mhan.

Emhin ne ha re ogẹn ji Jehova, ele mhan guanọ nin mhan ha lu. (1 Cor. 10:31) Bhiriọ, ahamiẹn uwẹ guanọ nin uwẹ noo intanẹti rẹ deba ẹbho ha muobọ, ka ria eria nyan okhẹnan ne ha sabọ nabhọre, uwẹ ha yẹ gbẹlokotọ nọnsẹn.