1-2. Hela ha sabọ rẹkpa ene a man ele iBaibo nin ele da sabọ lu re alo yẹ mianmẹn?

OBHIO MHAN natiọle Amy nọn nyẹnlẹn bhi Fiji da yọle: “Emhin nin mẹn luẹ bhi Baibo da wo ha yẹẹ mẹn ranmhude mẹn lẹnmhin ghe ẹmhọanta ele khin. Sokpan, mẹn ki ha deba ibhio mhan bhi agbotu muobọ, ọle mẹn da sabọ ha fidenọ bhi iẹnlẹn yẹ lu re alo nin mẹn da sabọ mianmẹn. Ijiẹmhin ọsi Amy rẹman ghe, ọ dẹ lẹkhẹ nin ene imhan man ele iBaibo rẹ lu re alo nin ele da sabọ mianmẹn sade ene ribhi agbotu rẹkpa ele.

² Ọdeọde bhi ẹwẹ mhan dẹ sabọ rẹkpa ene luẹ iBaibo nin ele da sabọ vae dọ deba agbotu nọnsi Jehova. (Eph. 4:16) Obhio mhan natiọle Leilani, nọn lu iwẹnna ọkanẹfan bhi Vanuatu da yọle: “Ẹbho tale ghe, ọrebhe kugbe bẹẹ ọmọn. Mẹn riale iriọ yẹ nọn sade a ho nan rẹkpa ọria kiẹn odibo nọnsi Jesu. Obọ ọsi ọrebhe ọ ye nan rẹ rẹkpa ọria vae bhi oga ọsi ẹmhọanta.” Ene ribhi azagba-uwa, imọẹ bi ene man-emhin bhi isiku, ele ko rẹkpa obhokhan rẹ wanre nọnsẹn. Uwedẹ nin ele rẹ lu ọnan hi; ele ki ha re ibhude nin ọne obhokhan, yẹ man ọle emhin ne khẹke nin ọle lẹn. Iriọ yẹ nọn rẹji ene imhan man ele iBaibo. Ọrebhe bhi agbotu dẹ sabọ ha re ibhude bi izebhudu nin ele. Ele dẹ yẹ sabọ ha re ijiẹmhin esili man ele nin ele da sabọ lu re alo yẹ mianmẹn.​—Prov. 15:22.

3. Be uwẹ miẹn luẹ bhi ọta nin Ana, Dorin, bi Leilani tale?

³ Bezẹle nọn da khẹke nin mhan ha re otọ nin ibhio mhan nekẹle rẹ ha rẹkpa ẹbho nin mhan man ele iBaibo? Bha ji mhan fẹghe ebi obhio mhan nin Ana tale. Moldova ọle da lu iwẹnna ọkanẹfan kpataki. Ọle da yọle: “Ọ iyi emhin nọn lẹkhẹ nin ọnọn man ọria iBaibo ọkpa rẹ sabọ rẹkpa ọne ọria rẹ sabọ khọn ọnọghọ nin ọle miẹn.” Obhio mhan ọbhebhe natiọle Dorin, nọn yẹ lu iwẹnna  ọkanẹfan kpataki bhi Moldova da yọle: “Ẹgheso, ibhio mhan ki ta ọta nin mẹn imhọn bhi ọkhọle hiehie man ene imẹn man ele iBaibo, ene ọta nan ki wo rẹso ele bhi ọkhọle.” Leilani da yẹ yọle: “Oyẹẹ nin mhan rẹman ene imhan man ele iBaibo, dẹ sabọ rẹkpa ele lẹn ghe, ẹbho nesi Jehova mhan gene khin.”​—John 13:35.

4. Be imhan ha zilo nyan bhi ọne uhọnmhọn-ọta nan?

⁴ Uwẹ sabọ ha nọọn egbe ẹ yọle: “Be imẹn ha rẹ sabọ rẹkpa ọnọn luẹ iBaibo yẹ, aharẹmiẹn ọ iyi mẹn hi ọnọn man ọle iBaibo?” Bha ji mhan fẹghe ebi mhan ha lu yẹ sade man rẹkhan obhio mhan dọ man ọria iBaibo, bi ebi mhan ha lu yẹ sade ọle munhẹn ha vae bhi ikolo oga. Mhan ki yẹ zilo nyan ebi ewanlẹn bhi agbotu ha rẹ sabọ rẹkpa ene imhan man ele iBaibo yẹ, nin ele da sabọ lu re alo yẹ mianmẹn.

5. Be ọkhẹke nin uwẹ ha mhọn bhi ọkhọle sade uwẹ rẹkhan obhio mhan dọ man ọria iBaibo?

⁵ Obọ ọsi ọria nọn man ọria iBaibo ọ ye nin ọle rẹ rẹkpa ọne ọle man ọle iBaibo rẹ lẹn ọta nọnsi Osẹnobulua. Ahamiẹn uwẹ rẹkhan obhio mhan dọ man ọria iBaibo, lẹn sẹbhọ ghe, uwẹ rẹkhan ọlẹn nin uwẹ da sabọ rẹkpa ọle. (Eccl. 4:​9, 10) Bhiriọ, be uwẹ ha lu nin uwẹ da sabọ rẹkpa ọle?

6. Be imhan ha rẹ sabọ re obọ rẹkhan adia nọn ribhi Proverbs 20:18 yẹ sade mhan rẹkhan obhio mhan dọ man ọria iBaibo?

⁶ Muegbe ọbhi otọ, ọkuẹsẹ uwẹ rẹkhan obhio mhan dọ man ọria iBaibo. Taman ọne obhio mhan nin ọle tẹmhọn ọne ọria nin ọle khian dọ man ọle iBaibo man uwẹ khere. (Tie Proverbs 20:18.) Uwẹ sabọ rẹ nọọn ọlẹn yọle: “Be uwẹ lẹnlẹn rẹji ọne ọria nan? Uhọnmhọn-ọta nela uwẹ ha man ọle le? Be bhọ uwẹ guanọ nin ọle luẹ bhi ọne uhọnmhọn-ọta nan? Emhin soso be ribhọ nin uwẹ iguanọ nin mẹn ta, yẹ lu bhi eji ọne ọria ye? Be imẹn ha rẹ sabọ rẹkpa ọle yẹ nin ọle da sabọ lu re alo?” Arẹmiẹn ọne obhio mhan ida taman uwẹ emhin rebhe rẹji ọne ọria nin ọle man ọle iBaibo, lẹn sẹbhọ ghe, ene ọle ha taman uwẹ dẹ rẹkpa uwẹ lẹn ebi uwẹ ha rẹ rẹkpa ọne ọria yẹ. Obhio mhan natiọle Joy nọn lu iwẹnna imissiọnari wo ne ibhio mhan zilo sade ele rẹkhan ọlẹn dọ man ọria emhin. Ọle da yọle: “Ọnan re ẹmhọn ọne ọria nin mẹn man ọle iBaibo ti obhio mhan bhọ. Sẹyẹ, ọ yẹ rẹkpa ọle rẹ lẹn ebi ọle ha ta sade mhan man ọne ọria emhin.”

7. Bezẹle nọn da khẹke nin uwẹ muegbe ọbhi otọ sade uwẹ ho nin uwẹ rẹkhan obhio mhan dọ man ọria iBaibo?

⁷ Ahamiẹn obhio mhan tie ẹ nin uwẹ dọ deba ọle dọ man ọria emhin, ọkhẹke nin uwẹ ka muegbe ọne uhọnmhọn-ọta nin ele ha zilo ọle ọbhi otọ. (Ezra 7:10) Obhio mhan nin Dorin nin mhan ka tẹmhọn ọlẹn da yọle: “Ọ manman ti mẹn bhọ sade obhio mhan nọn ha rẹkhan mẹn dọ man ọria emhin muegbe ọbhi otọ. Ọnan dẹ rẹkpa ọle rẹ lẹn ebi ọle ha ta nọn ha rẹkpa ọne ọria nan man ọle emhin.” Rẹ deba ọnan, ọne ibha man ọle emhin ki lẹn ghe ibha wo muegbe ọbhi otọ. Ọnan ki ha yi ijiẹmhin esili nin ọle ha re egbe khọkhọ. Aharẹmiẹn ghe uwẹ bha  sabọ manman muegbe ọne iluẹmhin ọbhi otọ, dọnmhegbe rẹ lẹn emhin kpataki ne ribhi ọne uhọnmhọn-ọta.

8. Be uwẹ ha lu nin erọnmhọn nin uwẹ nan da sabọ rẹkpa ọnọn luẹ iBaibo?

⁸ Ranmhude emhin kpataki nọn nan rẹ nan erọnmhọn sade a man ọria iBaibo, ọkhẹke nin uwẹ ria ẹmhọn ebi uwẹ ha taman iJehova sade ọria nin uwẹ rẹkhan taman uwẹ nin uwẹ nan erọnmhọn. Bhiriọ, uwẹ ki sabọ ta emhin ne ha rẹkpa ọne ọria bhi ọne erọnmhọn. (Ps. 141:2) Hanae nọn nyẹnlẹn bhi Japan sẹyẹ wo yere erọnmhọn nin ọria nọn rẹkhan ọnọn man ọle iBaibo nanlẹn. Ọle da yọle: “Ọne erọnmhọn nin ọle nanlẹn da wo rẹkpa mẹn rẹ lẹn ghe, ikolu nọn ziẹnlẹn ọle bi Jehova ko mhọnlẹn. Bhiriọ, mẹn da ha guanọ nin mẹn diabe ọle. Ọ da wo ti mẹn bhọ rẹ họn ghe, ọle sounun bhi elin mẹn bhi ọne erọnmhọn.”

9. Beji James 1:19 rẹman, be uwẹ ha rẹ sabọ rẹkpa obhio mhan nin uwẹ rẹkhan dọ man ọria iBaibo yẹ?

⁹ Ha rẹkpa obhio mhan nin uwẹ rẹkhan dọ man ọria emhin. Obhio mhan nin Omamuyovbi, nọn lu iwẹnna ọkanẹfan kpataki bhi Nigeria da yọle: “Ọ dẹ ha mẹn sade uwẹ re ẹlo rẹkhan ebi a ta ahamiẹn uwẹ rẹkhan obhio mhan dọ man ọria emhin. Ọkhẹke nin uwẹ talọ ọbhi ebi a zilo ọle, sokpan hẹi talọ gbe, ranmhude ọne obhio mhan nin uwẹ rẹkhan, ọle mhọn obọ bhi ọne iman-emhin.” Be uwẹ ha rẹ lẹn ẹghe nọn rẹ khẹke nin uwẹ rẹ talọ ọbhi emhin nan zilo ọle? Sẹyẹ, be uwẹ ha rẹ talọ ọbhọ yẹ? (Prov. 25:11) Ha gbehọkotọ nọnsẹn sade ọne obhio mhan nin uwẹ rẹkhan bi ọria nin ọle man ọle emhin ko zilo. (Tie James 1:19.) Uwẹ ha lu iriọ, uwẹ ki sabọ lẹn ẹghe nọn rẹ khẹke nin uwẹ rẹ talọ ọbhi ebi ele zilo ọle. Sokpan, ria eria nyan ebi uwẹ ho nin uwẹ ta nọnsẹn ọkuẹsẹ uwẹ tale. Ọ bha khẹke nin uwẹ talọ gbe. Ọ bha yẹ khẹke nin uwẹ gbọta ọne obhio mhan bhi unun, la nin uwẹ mun ọta ikẹ re nọn bha rẹtẹ ebi ele zilo ọle. Ọkpakinọn, talọ ọbhi ọne ẹmhọn khere, uwẹ ha yẹ noo arẹkhọkhọ la inọnta rẹ gbotọ ebi ele zilo ọle fanọn an. Ẹgheso, uwẹ sabọ rẹ ha riale ghe, uwẹ imhọn ebi uwẹ ha ta ọbhi ebi a zilo ọle. Ọrẹyiriọ, uwẹ ha khuẹnmhẹn ọne ọria nọn luẹ emhin yẹ rẹman ọlẹn ghe, ẹmhọn ọlẹn ti uwẹ bhọ, ọle ki sabọ ha lu re alo.

10. Be okha nọnsẹ ha rẹ sabọ rẹkpa ọria nan man ọle iBaibo yẹ?

¹⁰ Gbe okha nọnsẹ man ele. Ahamiẹn okha nọnsẹ dẹ sabọ rẹkpa ọne ọria nọn luẹ emhin, taman ọlẹn ebi uwẹ rẹ khọn ọnọghọ ọkpa miotọ yẹ, ebi uwẹ rẹ vae bhi oga ẹmhọanta yẹ, la ebi Jehova sẹ rẹ rẹkpa uwẹ bhi iẹnlẹn yẹ? (Ps. 78:​4, 7) Asabọmiẹn okha nọnsẹ dẹ sabọ rẹkpa ọne ọria nọn luẹ iBaibo. A sabọ yẹ miẹn ọ dẹ ziẹn urẹọbhọ nọnsọle, la ọ dẹ re izebhudu nanlẹn rẹ sabọ ha lu re alo nin ọle da sabọ mianmẹn. Sẹyẹ, asabọmiẹn ọ dẹ rẹkpa ọle lẹn ebi ọle ha lu nin ọle da sabọ khọn ọnọghọ nin ọle miẹn. (1 Pet. 5:9) Obhio mhan ọkpa natiọle Gabriel, nọn lu iwẹnna ọkanẹfan bhi Brazil da yere ebi okha ọsi ibhio mhan rẹ rẹkpa ọle yẹ ẹghe nin ọle rẹ ha luẹ Baibo. Ọle da yọle: “Ẹghe nin mẹn rẹ họn okha ọsi  ibhio mhan, ọ da rẹ mẹn lẹn ghe, Jehova lẹn ọnọghọ kẹkẹ nin mhan miẹn. Beji a miẹn ele sabọ khọn ọnọghọ nin ele miẹn miotọ, mẹn dẹ yẹ sabọ khọn ene imẹn miẹn miotọ.”

11-12. Bezẹle nọn da khẹke nin mhan ha gbe obokhian nin ene a man ele iBaibo ne vae bhi ikolo ga?

¹¹ Ahamiẹn ọria nọn luẹ iBaibo guanọ nin ọle sabọ lu re alo sẹbhi ọria nọn ha sabọ mianmẹn, ọkhẹke nin ọle wo ha vae bhi ikolo oga dọ ha luẹ emhin. (Heb. 10:​24, 25) Asabọmiẹn obhio mhan nọn man ọle iBaibo hi ọnọn ha tie ọle vae bhi ikolo oga bhi ọsi ọhẹnhẹn. Ahamiẹn ọle vae bhi ikolo oga, ọkhẹke nin mhan rebhe re izebhudu nanlẹn nin ọle da wo ha vae. Ọkpakinọn, uwedẹ nela mhan ha rẹ sabọ lu ọnan?

¹² Ha re ọkhọle rebhe gbe obokhian nin ele sade ele vae bhi ikolo oga. (Rom. 15:7) Ahamiẹn mhan re ọkhọle rebhe gbe obokhian nin ẹbho nin mhan man ele iBaibo sade ele vae bhi ikolo oga, ọ ki ha yẹẹ ele rẹ gbo kie vae. Ọkhẹke nin uwẹ bu ọle re gbe obokhian nanlẹn, uwẹ ha yẹ re ọle man ibhio mhan kẹkẹ. Sokpan, hẹi lu ọle bhi uwedẹ nọn ha re ẹkhọle ha lo ọle. Hẹi ha riale ghe obhio mhan ọbhebhe ka miẹn ọlẹn ọbhi egbe fo. Asabọmiẹn obhio mhan nọn man ọle emhin bhọ bha sẹ lẹn ghe ọle vae, la ọle mhọn ẹsọn ebhebhe nin ọle lu bhi obọ. Miẹn ọne ọria ọbhi egbe, uwẹ ha ka ọle ehọ sade ọle talọ. Be ha nabhọre sade uwẹ miẹn ọlẹn ọbhi egbe nọnsẹn? Bha ji mhan fẹ ijiẹmhin nọnsi Dmitrii ghe, nọn mianmẹn bhi ẹghe nọn bha sẹ ree gbe nian, nọn yẹ ribhi ihe ọsi ene zẹ sikẹ ewanlẹn. Ọle ki ha tẹmhọn ẹghe nin ọle rẹ vae bhi ikolo oga bhi ọsi ọhẹnhẹn, ọle da yọle: “Obhio mhan ọkpa ki daghe ghe ofẹn mun mẹn rẹ nabhi ẹkẹ iKindọn Họọ, ọle da bu mẹn re yẹ rẹkhan mẹn nabhi ẹkẹ ọle. Ẹbho ne bunbun da wo vae dọ tuẹ mẹn. Ọnan da wo han mẹn ilo. Ọnan da wo re ikolo oga ha ti mẹn bhọ rẹ sẹbhọ ghe, mẹn da ha guanọ nan ha do ikolo oga ẹdẹdẹ. Mẹn bha sẹ miẹn eji a da re inian lu emhin khẹ.”

13. Be ijiẹmhin esili nọnsẹ ha rẹ sabọ rẹso ene imhan man ele iBaibo yẹ?

¹³ Ha re ijiẹmhin esili man ele. Ijiẹmhin esili nọnsẹ dẹ sabọ rẹkpa ene imhan man ele iBaibo rẹ lẹn ghe, ele miẹn oga ẹmhọanta. (Matt. 5:16) Vitalii nọn lu iwẹnna ọkanẹfan bhi Moldova da yọle: “Ẹghe nin mẹn ki rẹ dọ lẹn ebi ene ribhi agbotu rẹ nyẹnlẹn yẹ, ebi ele rẹ ria eria yẹ, bi ebi ele rẹ lu emhin yẹ, mẹn da dọ rẹọbhọ ghe, Esali Jehova hi ene ribhi oga ẹmhọanta.”

14. Be ijiẹmhin nọnsẹ ha rẹ sabọ rẹkpa ọria yẹ nin ọle da ha lu re alo bhi oga nọnsi Jehova?

¹⁴ Ọkhẹke nin ọria nin mhan man ọle iBaibo ha re obọ rẹkhan emhin nin ọle luẹ nin ọle da sabọ sẹ ọria nọn ha mianmẹn. Ọnan iyi emhin nọn lẹkhẹ. Ọkpakinọn, ahamiẹn ọle daghe uwedẹ nin mhan rẹ re obọ rẹkhan adia ne ribhi Baibo, ọ ki ha ti ọle bhọ rẹ re egbe khọkhọ mhan. (1 Cor. 11:1) Bha ji mhan fẹghe ijiẹmhin ọsi obhio mhan nin Hanae nin mhan ka sounun ọlẹn. Ọle da yọle:  “Ibhio mhan bhi agbotu wo ha re obọ rẹkhan ene emhin nin mẹn ha luẹ. Ijiẹmhin nọnsele da wo rẹkpa mẹn lẹn ebi a rẹ re izebhudu nin ọria yẹ, ebi a rẹ rẹhunmhan ọria yẹ, bi ebi a rẹ re oyẹẹ man yẹ. Ene ibhio mhan ire unun rẹ riia ibo ele a. Ọ da wo ha ti mẹn bhọ rẹ re egbe khọkhọ ele.”

15. Be Proverbs 27:17 rẹ rẹkpa mhan lẹn ghe, ọkhẹke nin mhan ha deba ene imhan man ele iBaibo muobọ, ahamiẹn ele munhẹn ha vae bhi ikolo oga?

¹⁵ Ha deba ele lu imọe. Beji ọne ọria ha rẹ ha vae bhi ikolo oga, sẹyẹ wo ji ẹmhọn ọlẹn ha ti uwẹ bhọ. (Phil. 2:4) Dọnmhegbe si ọle kẹ egbe nin uwẹ da manman lẹn ọlẹn nọnsẹn. Uwẹ sabọ rẹ taman ọlẹn ghe, ọ ti uwẹ bhọ rẹ ha daghe uwedẹ nin ọle rẹ lu re alo. Uwẹ sabọ rẹ nọọn ọlẹn ẹmhọn iluẹmhin Baibo nọnsọle, ẹmhọn azagba-uwa nọnsọle bi ẹmhọn iwẹnna nọnsọle. Sokpan, hẹi nọọn ọlẹn inọnta nọn ha re ẹkhọle ha lo ọle. Ahamiẹn ibha re inian ko zilo, ibha ki sabọ sikẹ egbe. Bhiriọ, uwẹ ki sabọ rẹkpa ọle ha lu re alo nin ọle da sabọ mianmẹn. (Tie Proverbs 27:17.) Iwẹnna ọkanẹfan, ọle Hanae ki lu nian. Ẹghe nin ọle rẹ ha tẹmhọn ẹghe nin ọle rẹ munhẹn ha vae bhi ikolo oga, ọle da yọle: “Mẹn ki dọ ha mhọn imọẹ bhi agbotu, ikolo oga nan yo da wo kie manman ha ti mẹn bhọ. Mẹn ki sẹyẹ dọnmhegbe rẹ yo aharẹmiẹn egbe lọ mẹn. Ọ ti mẹn bhọ rẹ ha deba ene imọẹ ọsọgbọn nan muobọ. Ọnan da wo rẹkpa mẹn rẹ sabọ rẹban ikolu ọsi eria ne iga iJehova. Ọ da wo ha yẹẹ mẹn rẹ manman sikẹ Jehova bi ibhio mhan bhi agbotu. Bhiriọ, mẹn da muegbe nin mẹn rẹ mianmẹn.”

16. Uwedẹ ọbhebhe nela mhan ha rẹ sabọ rẹkpa ene a man ele iBaibo ne munhẹn ha vae bhi ikolo ga?

¹⁶ Beji ọria nan man ọle iBaibo ha rẹ ha fidenọ bhi iẹnlẹn, rẹkpa ọle rẹ lẹn ghe ọkpa bhi ibhio mhan bhi agbotu ọle ki khin. Mhan dẹ sabọ lu ọnan sade mhan si ele kẹ egbe. (Heb. 13:2) Obhio mhan natiọle Denis nọn nyẹnlẹn bhi Moldova ki ha tẹmhọn ẹghe nan rẹ ha man ọle iBaibo, ọle da yọle: “Ẹghe ne bunbun, ọle ibhio mhan wo rẹ tie mẹn bi okhuo mẹn nin mhan dọ deba ele re egbe re ahoho. Ele ki wo ha tẹmhọn ebi Jehova sẹ rẹ rẹkpa ele yẹ bhi iẹnlẹn. Ọnan da wo re izebhudu nin mhan. Uwedẹ nin ene ibhio mhan wo rẹ ha si mhan kẹ egbe da rẹ mhan ha mhọn ọlẹn bhi ọkhọle ghe, mhan muegbe nin mhan rẹ ga iJehova, ranmhude iẹnlẹn nọnsẹmhan dẹ wo mhẹn an sade mhan lu iriọ.” A ha ki re obọ ọbhọ nin ọne ọria nọn luẹ Baibo ha deba mhan yo inẹbho, uwẹ sabọ rẹ ha tie ọle rẹkhan egbe ẹgheso. Obhio mhan natiọle Diego nọn na bhi Brazil vae da yọle: “Ibhio mhan ne bunbun wo tie mẹn nin mẹn rẹkhan ele yo inẹbho. Ọnan wo rẹkpa mẹn rẹ sabọ lẹn ele nọnsẹn. Beji mẹn rẹ ha rẹkhan ele yo, mẹn da wo manman luẹ emhin ne bunbun bhi obọ ele. Ọnan da wo yẹ rẹkpa mẹn rẹ manman sikẹ Jehova bi Jesu.”

17. Be ewanlẹn bhi agbotu ha rẹ sabọ rẹkpa ẹbho nan man ele iBaibo yẹ?

¹⁷ Deba eria nan man ele iBaibo ha gbẹghe. Ene ewanlẹn bhi agbotu, bha lẹn sẹbhọ ghe, bha ha  rẹman ene a man ele iBaibo ghe, ẹmhọn ele ti bha bhọ, ọnan ki rẹkpa ele rẹ sabọ lu re alo yẹ mianmẹn. Bha wo ha re ẹghe ọbhi otọ rẹ ne ele talọ ẹghe rebhe sade ele vae bhi ikolo oga. Ele dẹ lẹn ghe, ẹmhọn ele rẹtẹ ibha sade ibha bha yele elin nọnsele a, manman nọn, sade ele munhẹn ha re ewanniẹn ọbhi inọnta. Sẹyẹ, ọkhẹke nin bha ha re ẹghe ọbhi otọ rẹ rẹkhan ibhio mhan bhi agbotu dọ ha man ẹbho emhin. Ọnan dẹ re isẹhoa nin ibha rẹ rẹkpa ọne ọria nọn luẹ iBaibo bhi uwedẹ nin ibha bha mun ọkhọle ọi. Obhio mhan natiọle Jackie nọn lu iwẹnna ọkanẹfan bhi Nigeria da yọle: “Ọ wo han ẹbho ne bunbun nin mẹn man ele iBaibo ilo ghe, obhio mhan nọn rẹkhan mẹn vae dọ man ele emhin, ọkpa bhi ewanlẹn bhi agbotu nọn. Ọkpa bhi ẹwẹ ele da yọle: ‘Ipastor nọnsẹmhẹn ida lu ọnan ghẹdẹ. Ene fele ọkpa ọle rẹnẹ je sade ele ha ọle osa!’” Ọne ọria nan nin mẹn man ọle iBaibo munhẹn ha yo ikolo oga nian.

18. Be ene ewanlẹn ha rẹ sabọ re obọ rẹkhan adia nọn ribhi Acts 20:28 yẹ?

¹⁸ Bha ha man ibhio bha emhin, nin ele da sabọ guẹ ebi a rẹ man ẹbho iBaibo yẹ. Ẹsọn ọsi ene ewanlẹn nọn nan rẹ ha man ene ribhi agbotu ebi a rẹ tẹmhọn Osẹnobulua yẹ. (Tie Acts 20:28.) Ahamiẹn ẹkhọle lo obhio mhan rẹ man ọria iBaibo ranmhude uwẹ rẹkhan ọlẹn, taman ọlẹn nin ọle ji uwẹ da nanlẹn man ọne ọria emhin. Jackie nin mhan ka tẹmhọn ọlẹn da yọle: “Ẹghe-ẹghe, ọle ene ewanlẹn rẹ nọọn mẹn ẹmhọn ene imẹn man ele iBaibo. Ahamiẹn mẹn kuẹlo da ọnọghọ sade mẹn man ọria iBaibo, ele ki wo re ibhude nọn ha rẹkpa mẹn nin mẹn.” Emhin ne bunbun ribhọ nin ene ewanlẹn ha sabọ lu, nin ele rẹ re izebhudu nin ene ele ko ga rẹ ha rẹtẹ man ẹbho emhin. (1 Thess. 5:11) Jackie da yẹ yọle: “Ọ ti mẹn bhọ sade ene ewanlẹn re izebhudu nin mẹn, yẹ khuẹnmhẹn mẹn bhi iwẹnna nin mẹn lu. Inian ọta nin ele taman mẹn diabe amẹn nọn fuọfuọ nin ọria wọn sade ovuẹn manman zẹ. Uwedẹ nin ele rẹ khuẹnmhẹn mẹn wo rẹ mẹn kie ghọnghọn beji mẹn rẹ man ẹbho iBaibo.”​—Prov. 25:25.

19. Be ha sabọ rẹ mhan rebhe ha ghọnghọn?

¹⁹ Ene isẹ mhọn ọria nin ele man ọle iBaibo nian, dẹ yẹ sabọ rẹkpa eria nan man ele iBaibo rẹ lu re alo. Ọkhẹke nin mhan ha muegbe ọbhi otọ nọnsẹn, nin mhan da sabọ ha talọ ọbhi ẹmhọn nin obhio mhan nin mhan rẹkhan deba ọria zilo ọle. Sokpan, hẹi ha talọ gbe. Ọria nin mhan man ọle iBaibo ha vae bhi Kindọn Họọ, ọkhẹke nin mhan ha ne ele lu imọẹ yẹ re ijiẹmhin esili man ele. Ene ewanlẹn dẹ sabọ re izebhudu nin ene a man ele iBaibo sade ele deba ele gbẹghe. Ele dẹ yẹ sabọ rẹkpa ibhio mhan rẹ guẹ ebi a rẹ man ẹbho iBaibo nọnsẹn yẹ. Ọkhẹke nin ene ewanlẹn yẹ ha khuẹnmhẹn ele. Ọ wo manman rẹ mhan ghọnghọn sade mhan lu eka nin mhan ha sabọ lu rẹ rẹkpa ẹbho vae dọ hoẹmhọn iJehova yẹ ha ga ọle.